(২২) ২. অক্কোসকৰগ্গো

১-২. অক্কোসকসুত্তাদিৰণ্ণনা

২১১-২. দুতিযস্স পঠমে দসহি অক্কোসৰত্থূহি অক্কোসকোতি ‘‘বালোসি, মূল়্হোসি, ওট্ঠোসি, গোণোসি, গদ্রভোসী’’তিআদিনা দসহি অক্কোসৰত্থূহি অক্কোসকো. ‘‘হোতু, মুণ্ডকসমণ, অদণ্ডো অহন্তি করোসি, ইদানি তে রাজকুলং গন্ত্ৰা দণ্ডং আরোপেস্সামী’’তিআদীনি ৰদন্তো পরিভাসকো নামাতি আহ ‘‘ভযদস্সনেন পরিভাসকো’’তি. লোকুত্তরধম্মা অপাযমগ্গস্স পরিপন্থভাৰতো পরিপন্থো নামাতি আহ ‘‘লোকুত্তরপরিপন্থস্স ছিন্নত্তা’’তি, লোকুত্তরসঙ্খাতস্স অপাযমগ্গপরিপন্থস্স ছিন্নত্তাতি অত্থো. দুতিযে নত্থি ৰত্তব্বং.

অক্কোসকসুত্তাদিৰণ্ণনা নিট্ঠিতা.

৩-১০. সীলসুত্তাদিৰণ্ণনা

২১৩-২২০. ততিযে (দী. নি. টী. ২.১৪৯) দুস্সীলোতি এত্থ দু-সদ্দো অভাৰত্থো ‘‘দুপ্পঞ্ঞো’’তিআদীসু (ম. নি. ১.৪৪৯) ৰিয, ন গরহণত্থোতি আহ ‘‘অসীলো নিস্সীলো’’তি. ভিন্নসংৰরোতি এত্থ সমাদিন্নসীলো কেনচি কারণেন সীলভেদং পত্তো, সো তাৰ ভিন্নসংৰরো হোতু. যো পন সব্বেন সব্বং অসমাদিন্নসীলো আচারহীনো, সো কথং ভিন্নসংৰরো নাম হোতীতি? সোপি সাধুসমাচারস্স পরিহরণীযস্স ভেদিতত্তা ভিন্নসংৰরো এৰ নাম. ৰিনট্ঠসংৰরো সংৰররহিতোতি হি ৰুত্তং হোতি. তং তং সিপ্পট্ঠানং. মাঘাতকালেতি ‘‘মা ঘাতেথ পাণীন’’ন্তি এৰং মাঘাতঘোসনং ঘোসিতদিৰসে. অব্ভুগ্গচ্ছতি পাপকো কিত্তিসদ্দো. অজ্ঝাসযেন মঙ্কু হোতিযেৰ ৰিপ্পটিসারিভাৰতো.

তস্সাতি দুস্সীলস্স. সমাদায ৰত্তিতট্ঠানন্তি উট্ঠায সমুট্ঠায কতকারণং. আপাথং আগচ্ছতীতি তং মনসো উপট্ঠাতি. উম্মীলেত্ৰা ইধলোকন্তি উম্মীলনকালে অত্তনো পুত্তদারাদিৰসেন ইধলোকং পস্সতি. নিমীলেত্ৰা পরলোকন্তি নিমীলনকালে গতিনিমিত্তুপট্ঠানৰসেন পরলোকং পস্সতি. তেনাহ ‘‘চত্তারো অপাযা’’তিআদি. পঞ্চমপদন্তি ‘‘কাযস্স ভেদা’’তিআদিনা ৰুত্তো পঞ্চমো আদীনৰকোট্ঠাসো. ৰুত্তৰিপরিযাযেনাতি ৰুত্তত্থায আদীনৰকথায ৰিপরিযাযেন ‘‘অপ্পমত্তো তং তং কসিৰণিজ্জাদিং যথাকালং সম্পাদেতুং সক্কোতী’’তিআদিনা. পাসংসং সীলমস্স অত্থীতি সীলৰা. সীলসম্পন্নোতি সীলেন সমন্নাগতো সম্পন্নসীলোতি এৰমাদিকং পন অত্থৰচনং সুকরন্তি অনামট্ঠং. চতুত্থাদীনি উত্তানত্থানেৰ.

সীলসুত্তাদিৰণ্ণনা নিট্ঠিতা.

অক্কোসকৰগ্গৰণ্ণনা নিট্ঠিতা.