৭. কামসুত্তৰণ্ণনা

৭. সত্তমে অসন্তি লূনন্তি তেনাতি অসিতং, দাত্তং. ৰিৰিধা আভঞ্জন্তি ভারং ওলম্বেন্তি তেনাতি ব্যাভঙ্গী, ৰিধং. কুলপুত্তোতি এত্থ দুৰিধো কুলপুত্তো জাতিকুলপুত্তো, আচারকুলপুত্তো চ. তত্থ ‘‘তেন খো পন সমযেন রট্ঠপালো নাম কুলপুত্তো তস্মিংযেৰ থুল্লকোট্ঠিকে অগ্গকুলিকস্স পুত্তো’’তি (ম. নি. ২.২৯৪) এৰং আগতো উচ্চকুলপ্পসুতো জাতিকুলপুত্তো নাম. ‘‘যে তে কুলপুত্তা সদ্ধা অগারস্মা অনগারিযং পব্বজিতা’’তি (ম. নি. ১.৩৪) এৰং আগতা পন যত্থ কত্থচি কুলে পসুতাপি আচারসম্পন্না আচারকুলপুত্তো নাম. ইধ পন আচারকুলপুত্তো অধিপ্পেতো. তেনাহ ‘‘কুলপুত্তোতি আচারকুলপুত্তো’’তি. যুত্তন্তি অনুচ্ছৰিকং, এৰং ৰত্তব্বতং অরহতীতি অত্থো. সেসমেত্থ উত্তানমেৰ.

কামসুত্তৰণ্ণনা নিট্ঠিতা.