৯. গিহিসুত্তৰণ্ণনা

১৭৯. নৰমে আভিচেতসিকানন্তি অভিচেতোতি অভিক্কন্তং ৰিসুদ্ধচিত্তং ৰুচ্চতি অধিচিত্তং ৰা, অভিচেতসি জাতানি আভিচেতসিকানি, অভিচেতো সন্নিস্সিতানীতি ৰা আভিচেতসিকানি. তেনেৰাহ ‘‘উত্তমচিত্তনিস্সিতান’’ন্তি. দিট্ঠধম্মসুখৰিহারানন্তি দিট্ঠধম্মে সুখৰিহারানং. দিট্ঠধম্মোতি পচ্চক্খো অত্তভাৰো ৰুচ্চতি, তত্থ সুখৰিহারানন্তি অত্থো. রূপাৰচরজ্ঝানানমেতং অধিৰচনং. তানি হি অপ্পেত্ৰা নিসিন্না ঝাযিনো ইমস্মিংযেৰ অত্তভাৰে অসংকিলিট্ঠং নেক্খম্মসুখং ৰিন্দন্তি, তস্মা ‘‘দিট্ঠধম্মসুখৰিহারানী’’তি ৰুচ্চন্তি.

চতুব্বিধমেরযন্তি পুপ্ফাসৰো, ফলাসৰো, গুল়াসৰো, মধ্ৰাসৰোতি এৰং চতুপ্পভেদং মেরযং. পঞ্চৰিধঞ্চ সুরন্তি পূৰসুরা, পিট্ঠসুরা, ওদনসুরা, কিণ্ণপক্খিত্তা, সম্ভারসংযুত্তাতি এৰং পঞ্চপ্পভেদং সুরং. পুঞ্ঞং অত্থো এতস্সাতি পুঞ্ঞত্থো. যস্মা পনেস পুঞ্ঞেন অত্থিকো নাম হোতি, তস্মা ৰুত্তং ‘‘পুঞ্ঞেন অত্থিকস্সা’’তি. সেসমেত্থ উত্তানমেৰ.

গিহিসুত্তৰণ্ণনা নিট্ঠিতা.