১০. গৰেসীসুত্তৰণ্ণনা

১৮০. দসমে সুকারণন্তি বোধিপরিপাচনস্স একন্তিকং সুন্দরং কারণং. মন্দহসিতন্তি ঈসকং হসিতং. কহং কহন্তি হাসসদ্দস্স অনুকরণমেতং. হট্ঠপ্পহট্ঠাকারমত্তন্তি হট্ঠস্স পহট্ঠাকারমত্তং. যথা গহিতসঙ্কেতা ‘‘পহট্ঠো ভগৰা’’তি সঞ্জানন্তি, এৰং আকারনিদস্সনমত্তং.

ইদানি ইমিনা পসঙ্গেন হাসসমুট্ঠানং ৰিভাগতো দস্সেতুং ‘‘হসিতঞ্চ নামেত’’ন্তিআদি আরদ্ধং. তত্থ অজ্ঝুপেক্খনৰসেনপি হাসো ন সম্ভৰতি, পগেৰ দোমনস্সৰসেনাতি আহ ‘‘তেরসহি সোমনস্সসহগতচিত্তেহী’’তি. ননু চ কেচি কোধৰসেনপি হসন্তীতি? ন, তে সম্পিযন্তি কোধৰত্থুং তত্থ ‘‘মযং দানি যথাকামকারিতং আপজ্জিস্সামা’’তি দুৰিঞ্ঞেয্যন্তরেন সোমনস্সচিত্তেনেৰ হাসস্স উপ্পজ্জনতো. তেসূতি পঞ্চসু সোমনস্সসহগতকিরিযচিত্তেসু. বলৰারম্মণেতি উল়ারতমে আরম্মণে যমকপাটিহারিযসদিসে. দুব্বলারম্মণেতি অনুল়ারআরম্মণে.

‘‘ইমস্মিং পন ঠানে…পে… উপ্পাদেতী’’তি ইদং পোরাণট্ঠকথাযং তথা আগতত্তা ৰুত্তং, ন সহেতুকসোমনস্সসহগতচিত্তেহি ভগৰতো সিতং ন হোতীতি দস্সনত্তং. অভিধম্মটীকাযং (ধ. স. মূলটী. ৯৬৮) পন ‘‘অতীতংসাদীসু অপ্পটিহতং ঞাণং ৰত্ৰা ‘ইমেহি ধম্মেহি সমন্নাগতস্স বুদ্ধস্স ভগৰতো সব্বং কাযকম্মং ঞাণপুব্বঙ্গমং ঞাণানুপরিৰত্তী’তিআদিৰচনতো (মহানি. ১৫৬; পটি. ম. ৩.৫) ‘ভগৰতো ইদং চিত্তং উপ্পজ্জতী’তি ৰুত্তৰচনং ৰিচারেতব্ব’’ন্তি ৰুত্তং. তত্থ ইমিনা হসিতুপ্পাদচিত্তেন পৰত্তিযমানম্পি ভগৰতো সিতকরণং পুব্বেনিৰাসঅনাগতংসসব্বঞ্ঞুতঞ্ঞাণানং অনুৰত্তকত্তা ঞাণানুপরিৰত্তিযেৰাতি এৰং পন ঞাণানুপরিৰত্তিভাৰে সতি ন কোচি পাল়িঅট্ঠকথানং ৰিরোধো. তথা হি অভিধম্মট্ঠকথাযং (ধ. স. অট্ঠ. ৫৬৮) ‘‘তেসং ঞাণানং চিণ্ণপরিযন্তে ইদং চিত্তং উপ্পজ্জতী’’তি ৰুত্তং. অৰস্সঞ্চেতং এৰং ইচ্ছিতব্বং, অঞ্ঞথা আৰজ্জনচিত্তস্সপি ভগৰতো তথারূপে কালে ন যুজ্জেয্য. তস্সপি হি ৰিঞ্ঞত্তিসমুট্ঠাপকভাৰস্স নিচ্ছিতত্তা. তথা হি ৰুত্তং ‘‘এৰঞ্চ কত্ৰা মনোদ্ৰারাৰজ্জনস্সপি ৰিঞ্ঞত্তিসমুট্ঠাপকত্তং উপপন্নং হোতী’’তি (ধ. স. মূলটী. ১ কাযকম্মদ্ৰারকথাৰণ্ণনা) ন চ ৰিঞ্ঞত্তিসমুট্ঠাপকত্তে তংসমুট্ঠানকাযৰিঞ্ঞত্তিযা কাযকম্মাদিভাৰং আপজ্জনভাৰো ৰিস্সজ্জতীতি.

হসিতন্তি সিতমেৰ সন্ধায ৰদতি. তেনাহ ‘‘এৰং অপ্পমত্তকম্পী’’তি. সমোসরিতা ৰিজ্জুলতা. সা হি ইতরৰিজ্জুলতা ৰিয খণট্ঠিতিযা সীঘনিরোধা চ ন হোতি, অপিচ খো দন্ধনিরোধা, ন চ সব্বকালিকা. দীধিতি পাৰকমহামেঘতো ৰা চাতুদ্দীপিকমহামেঘতো ৰা নিচ্ছরতি. তেনাহ ‘‘চাতুদ্দীপিকমহামেঘমুখতো’’তি. অযং কির তাসং রস্মীনং ধম্মতা, যদিদং তিক্খত্তুং সীসং পদক্খিণং কত্ৰা দাঠগ্গেসুযেৰ অন্তরধানং. সেসমেত্থ সুৰিঞ্ঞেয্যমেৰ.

গৰেসীসুত্তৰণ্ণনা নিট্ঠিতা.

উপাসকৰগ্গৰণ্ণনা নিট্ঠিতা.