(৬) ১. পুঞ্ঞাভিসন্দৰগ্গো

১. পঠমপুঞ্ঞাভিসন্দসুত্তৰণ্ণনা

৫১. দুতিযস্স পঠমে পুঞ্ঞাভিসন্দাতি ৰা পুঞ্ঞনদিযো. অৰিচ্ছেদেন নিচ্চং পৰত্তিযমানানি হি পুঞ্ঞানি অভিসন্দনট্ঠেন ‘‘পুঞ্ঞাভিসন্দা’’তি ৰুত্তা. অপরিমিতন্তি আল়্হকগণনায অপরিমিতং, যোজনৰসেন পনস্স পরিমাণং অত্থি. তথা হি হেট্ঠা মহাপথৰিযা উপরি আকাসেন পরতো চক্কৰাল়পব্বতেন মজ্ঝে তত্থ তত্থ ঠিতেহি দীপপব্বতপরিযন্তেহি পরিচ্ছিন্নত্তা যোজনতো সক্কা পমাণং কাতুং. ভেরৰারম্মণেহীতি সৰিঞ্ঞাণকাৰিঞ্ঞাণকেহি ভেরৰারম্মণেহি. তথা হি তং মহাসরীরমচ্ছকুম্ভীলযক্খরক্খসমহানাগদানৰাদীনং সৰিঞ্ঞাণকানং ৰল়ৰামুখপাতালাদীনং অৰিঞ্ঞাণকানঞ্চ ভেরৰারম্মণানং ৰসেন ‘‘বহুভেরৰ’’ন্তি ৰুচ্চতি. সেসমেত্থ উত্তানমেৰ.

পঠমপুঞ্ঞাভিসন্দসুত্তৰণ্ণনা নিট্ঠিতা.

২. দুতিযপুঞ্ঞাভিসন্দসুত্তৰণ্ণনা

৫২. দুতিযে সোতাপন্নস্স সদ্ধা অধিপ্পেতাতি সোতাপন্নস্স মগ্গেনাগতা সদ্ধা অধিপ্পেতা.

দুতিযপুঞ্ঞাভিসন্দসুত্তৰণ্ণনা নিট্ঠিতা.

৩-৪. পঠমসংৰাসসুত্তাদিৰণ্ণনা

৫৩-৫৪. ততিযে যথাকম্মং তা তা গতিযো অরন্তি উপগচ্ছন্তীতি অরিযা, সত্তা. ইমে পন কুচ্ছিতা অরিযাতি কদরিযা. থদ্ধমচ্ছরিনো, থদ্ধেন মচ্ছরেন সমন্নাগতাতি অত্থো. থদ্ধমচ্ছরিযসদিসঞ্হি কুচ্ছিতং সব্বদা নিহীনং নত্থি সব্বগুণানং আদিভূতস্স ভোগসম্পত্তিআদিসব্বসম্পত্তীনং মূলভূতস্স দানস্স নিসেধনতো. তেনাহ ‘‘কদরিযাতি থদ্ধমচ্ছরিনো’’তি. একচ্চো হি অত্তনো ৰসনট্ঠানে ভিক্খূ হত্থং পসারেত্ৰাপি ন ৰন্দতি. অঞ্ঞত্থ গতো ৰিহারং পৰিসিত্ৰা সক্কচ্চং ৰন্দিত্ৰা মধুরপ্পটিসন্থারং করোতি ‘‘কিং, ভন্তে, অম্হাকং ৰসনট্ঠানং নাগচ্ছথ, সম্পন্নো পদেসো, পটিবলাহং অয্যানং যাগুভত্তাদীহি উপট্ঠানং কাতু’’ন্তি. ভিক্খু ‘‘সদ্ধো অযং উপাসকো’’তি যাগুভত্তাদীহি সঙ্গণ্হাতি.

অথেকো থেরো তস্স গামং গন্ত্ৰা পিণ্ডায চরতি. সো তং দিস্ৰা অঞ্ঞেন ৰা গচ্ছতি, ঘরং ৰা পৰিসতি. সচেপি সম্মুখীভাৰং আগচ্ছতি, হত্থেন ৰন্দিত্ৰা ‘‘অয্যস্স ভিক্খং দেথ, অহং একেন কম্মেন গচ্ছামী’’তি পক্কমতি. থেরো সকলগামং চরিত্ৰা তুচ্ছপত্তোৰ নিক্খমতি. ইদং তাৰ মুদুমচ্ছরিযং নাম. যেন অদাযকোপি দাযকো ৰিয পঞ্ঞাযতি. ইধ পন থদ্ধমচ্ছরিযং অধিপ্পেতং. যেন সমন্নাগতো ভিক্খূসু পিণ্ডায পৰিট্ঠেসু ‘‘থেরা ঠিতা’’তি ৰুত্তে ‘‘কিং ময্হং পাদা রুজ্জন্তী’’তিআদীনি ৰত্ৰা সিলাথম্ভো ৰিয খাণুকো ৰিয চ থদ্ধো হুত্ৰা তিট্ঠতি, সামীচিম্পি ন করোতি, কুতো দানং. অযমিধ অধিপ্পেতো. তেন ৰুত্তং ‘‘থদ্ধমচ্ছরিনোতি থদ্ধেন মচ্ছরেন সমন্নাগতাতি অত্থো’’তি. মচ্ছরং মচ্ছেরং মচ্ছরিযন্তি অত্থতো একং.

পরিভাসকাতি ভিক্খূ ঘরদ্ৰারে ঠিতে দিস্ৰা ‘‘কিং তুম্হে কসিত্ৰা আগতা ৰপিত্ৰা লাযিত্ৰা, মযং অত্তনোপি ন লভাম, কুতো তুম্হাকং, সীঘং নিক্খমথা’’তিআদীহি সন্তজ্জকা. যাচকানং ৰচনস্স অত্থং জানন্তীতি এত্থ কিঞ্চাপি ভিক্খূ ঘরদ্ৰারে ঠিতা তুণ্হী হোন্তি, অত্থতো পন ‘‘ভিক্খং দেথা’’তি ৰদন্তি নাম অরিযায যাচনায. ৰুত্তঞ্হেতং ‘‘উদ্দিস্স অরিযা তিট্ঠন্তি, এসা অরিযান যাচনা’’তি (মি. প. ৪.৫.৯). তত্র যে ‘‘মযং পচাম, ইমে ন পচন্তি, পচমানে পত্ৰা অলভন্তা কুহিং লভিস্সতী’’তি দেয্যধম্মং সংৰিভজন্তি, তে ৰদঞ্ঞূ যাচকানং ৰচনস্স অত্থং জানন্তি নাম ঞত্ৰা কত্তব্বকরণতো. চতুত্থং উত্তানমেৰ.

পঠমসংৰাসসুত্তাদিৰণ্ণনা নিট্ঠিতা.

৫-৬. সমজীৰীসুত্তাদিৰণ্ণনা

৫৫-৫৬. পঞ্চমে অনুগ্গণ্হনত্থন্তি নকুলমাতা নকুলপিতাতি ইমেসং দ্ৰিন্নং সঙ্গহত্থায. নকুলস্স দারকস্স পিতা নকুলপিতা. নকুলমাতাতি এত্থাপি এসেৰ নযো. সেসমেত্থ উত্তানমেৰ. ছট্ঠে নত্থি ৰত্তব্বং.

সমজীৰীসুত্তাদিৰণ্ণনা নিট্ঠিতা.

৭-১০. সুপ্পৰাসাসুত্তাদিৰণ্ণনা

৫৭-৬০. সত্তমে আযুভাগপটিলাভিনী হোতীতি আযুকোট্ঠাসস্স পটিলাভিনী হোতি. তিৰিধলোকন্তি সত্তসঙ্খারভাজনসঙ্খাতং তিৰিধং লোকং. ৰিদিতং কত্ৰাতি ৰিভূতং কত্ৰা. লোকৰিদূনন্তি করণত্থে সামিৰচনন্তি আহ ‘‘বুদ্ধেহি পসত্থা’’তি. অট্ঠমনৰমদসমানি উত্তানত্থানেৰ.

সুপ্পৰাসাসুত্তাদিৰণ্ণনা নিট্ঠিতা.

পুঞ্ঞাভিসন্দৰগ্গৰণ্ণনা নিট্ঠিতা.