(২৬) ৬. অভিঞ্ঞাৰগ্গো

১-৩. অভিঞ্ঞাসুত্তাদিৰণ্ণনা

২৫৪-২৫৬. ছট্ঠস্স পঠমে পচ্চনীকসমনতো সমথো, সমাধীতি আহ ‘‘চিত্তেকগ্গতা’’তি. অনিচ্চাদিনা ৰিৰিধেনাকারেন দস্সনতো ৰিপস্সনা, সঙ্খারপরিগ্গাহকঞাণং. তেনাহ ‘‘সঙ্খারপরিগ্গহৰিপস্সনাঞাণ’’ন্তি.

দুতিযে অনরিযেহি পরিযেসিতব্বত্তা অনরিযানং পরিযেসনাতি অনরিযপরিযেসনা. সযং লামকতায অনরিযানং পরিযেসনাতি ৰা অনরিযপরিযেসনা. জরাসভাৰন্তি জীরণপকতিকং. ততিযং উত্তানমেৰ.

অভিঞ্ঞাসুত্তাদিৰণ্ণনা নিট্ঠিতা.

৪-১০. মালুক্যপুত্তসুত্তাদিৰণ্ণনা

২৫৭-২৬৩. চতুত্থে অপসাদেতীতি নিগ্গণ্হাতি. উস্সাদেতীতি পগ্গণ্হাতি. অপসাদনাকারং উস্সাদনাকারঞ্চ ৰিভাৰেতুং ‘‘কথ’’ন্তিআদি আরদ্ধং. পঞ্চমাদীনি উত্তানানেৰ. সেসং সুৰিঞ্ঞেয্যমেৰ.

মালুক্যপুত্তসুত্তাদিৰণ্ণনা নিট্ঠিতা.

অভিঞ্ঞাৰগ্গৰণ্ণনা নিট্ঠিতা.

ইতি মনোরথপূরণিযা অঙ্গুত্তরনিকায-অট্ঠকথায

চতুক্কনিপাতৰণ্ণনায অনুত্তানত্থদীপনা সমত্তা.

দুতিযো ভাগো নিট্ঠিতো.