৩-৪. উগ্ঘটিতঞ্ঞূসুত্তাদিৰণ্ণনা

১৩৩-৪. ততিযে উগ্ঘটিতঞ্ঞূতি এত্থ উগ্ঘটনং নাম ঞাণুগ্ঘটনং, ঞাণেন উগ্ঘটিতমত্তেযেৰ জানাতীতি অত্থো. সহ উদাহটৰেলাযাতি উদাহারে উদাহটমত্তেযেৰ. ধম্মাভিসমযো হোতীতি চতুসচ্চধম্মস্স ঞাণেন সদ্ধিং অভিসমযো. অযং ৰুচ্চতীতি অযং ‘‘চত্তারো সতিপট্ঠানা’’তিআদিনা (ৰিভ. ৩৫৫) নযেন সংখিত্তেন মাতিকায ঠপিযমানায দেসনানুসারেন ঞাণং পেসেত্ৰা অরহত্তং গণ্হিতুং সমত্থো পুগ্গলো ‘‘উগ্ঘটিতঞ্ঞূ’’তি ৰুচ্চতি. ৰিপঞ্চিতং ৰিত্থারিতমেৰ অত্থং জানাতীতি ৰিপঞ্চিতঞ্ঞূ. অযং ৰুচ্চতীতি অযং সংখিত্তেন মাতিকং ঠপেত্ৰা ৰিত্থারেন অত্থে ভাজিযমানে অরহত্তং পাপুণিতুং সমত্থো পুগ্গলো ‘‘ৰিপঞ্চিতঞ্ঞূ’’তি ৰুচ্চতি. উদ্দেসাদীহি নেতব্বোতি নেয্যো. অনুপুব্বেন ধম্মাভিসমযোতি অনুক্কমেন অরহত্তপ্পত্তি. ব্যঞ্জনপদমেৰ পরমং অস্সাতি পদপরমো. ন তায জাতিযা ধম্মাভিসমযো হোতীতি তেন অত্তভাৰেন ঝানং ৰা ৰিপস্সনং ৰা মগ্গং ৰা ফলং ৰা নিব্বত্তেতুং ন সক্কোতীতি অত্থো. চতুত্থং উত্তানমেৰ.

উগ্ঘটিতঞ্ঞূসুত্তাদিৰণ্ণনা নিট্ঠিতা.