১. সংযোজনসুত্তৰণ্ণনা

১৩১. চতুত্থস্স পঠমে উপপত্তিপ্পটিলাভং সংৰত্তনিকানীতি উপপত্তিপটিলাভিযানি. ভৰপটিলাভিযানীতি এত্থাপি এসেৰ নযো. যেহীতি যেহি সংযোজনেহি হেতুভূতেহি, করণভূতেহি ৰা. ননু চ সোতাপন্নস্সপি ওরম্ভাগিযানি সংযোজনানি অপ্পহীনানি, কস্মা পন সকদাগামীযেৰ ইধ গহিতোতি আহ ‘‘সকদাগামিস্সাতি ইদং অপ্পহীনসংযোজনেসু অরিযেসু উত্তমকোটিযা গহিত’’ন্তি. তত্থ অপ্পহীনসংযোজনেসূতি অপ্পহীনওরম্ভাগিযসংযোজনেসু. উত্তমকোটিযা গহিতন্তি উক্কট্ঠপরিচ্ছেদেন গহিতং. সকদাগামিতো পরঞ্হি অপ্পহীনওরম্ভাগিযসংযোজনো অরিযো নাম নত্থি. ননু চ সকদাগামিস্স পহীনানিপি ওরম্ভাগিযানি সংযোজনানি অত্থি দিট্ঠিৰিচিকিচ্ছাসীলব্বতপরামাসসংযোজনানং পহীনত্তা, তস্মা ‘‘ওরম্ভাগিযানি সংযোজনানি অপ্পহীনানী’’তি কস্মা ৰুত্তন্তি আহ ‘‘ওরম্ভাগিযেসু চ অপ্পহীনং উপাদাযা’’তিআদি. যস্মা কামরাগব্যাপাদসংযোজনানি সকদাগামিস্স অপ্পহীনানি, তস্মা তানি অপ্পহীনানি উপাদায ‘‘ওরম্ভাগিযানি সংযোজনানি অপ্পহীনানী’’তি ৰুত্তং, ন সব্বেসং অপ্পহীনত্তাতি অধিপ্পাযো.

সংযোজনসুত্তৰণ্ণনা নিট্ঠিতা.