৭. পঠমতথাগতঅচ্ছরিযসুত্তৰণ্ণনা

১২৭. সত্তমে ৰত্তমানসমীপে ৰত্তমানে ৰিয ৰোহরিতব্বন্তি ‘‘ওক্কমতী’’তি আহ ‘‘ওক্কন্তো হোতীতি অত্থো’’তি. দসসহস্সচক্কৰাল়পত্থরণো সমুজ্জলভাৰেন উল়ারো. দেৰানুভাৰন্তি দেৰানং পভানুভাৰং. দেৰানঞ্হি পভং সো ওভাসো অধিভৰতি, ন দেৰে. তেনাহ ‘‘দেৰান’’ন্তিআদি. রুক্খগচ্ছাদিনা কেনচি ন হঞ্ঞতীতি অঘা, অসম্বাধা. তেনাহ ‘‘নিচ্চৰিৰরা’’তি. অসংৰুতাতি হেট্ঠা উপরি কেনচি অপিহিতা. তেনাহ ‘‘হেট্ঠাপি অপ্পতিট্ঠা’’তি. তত্থ পি-সদ্দেন যথা হেট্ঠা উদকস্স পিধাযিকা সন্ধারিকা পথৰী নত্থি অসংৰুতা লোকন্তরিকা, এৰং উপরিপি চক্কৰাল়েসু দেৰৰিমানানং অভাৰতো অসংৰুতা অপ্পতিট্ঠাতি দস্সেতি. অন্ধকারো এত্থ অত্থীতি অন্ধকারা. চক্খুৰিঞ্ঞাণং ন জাযতি আলোকস্স অভাৰতো, ন চক্খুনো. তথা হি ‘‘তেনোভাসেন অঞ্ঞমঞ্ঞং সঞ্জানন্তী’’তি ৰুত্তং. জম্বুদীপে ঠিতমজ্ঝন্হিকৰেলায পুব্বৰিদেহৰাসীনং অত্থঙ্গমৰসেন উপড্ঢং সূরিযমণ্ডলং পঞ্ঞাযতি, অপরগোযানৰাসীনং উগ্গমনৰসেন. এৰং সেসদীপেসুপীতি আহ ‘‘একপ্পহারেনেৰ তীসু দীপেসু পঞ্ঞাযন্তী’’তি. ইতো অঞ্ঞথা দ্ৰীসু এৰ দীপেসু পঞ্ঞাযন্তি. একেকায দিসায নৰনৰযোজনসতসহস্সানি অন্ধকারৰিধমনম্পি ইমিনাৰ নযেন দট্ঠব্বং. পভায নপ্পহোন্তীতি অত্তনো পভায ওভাসিতুং নাভিসম্ভুণন্তি. যুগন্ধরপব্বতমত্থকসমপ্পমাণে আকাসে ৰিচরণতো ‘‘চক্কৰাল়পব্বতস্স ৰেমজ্ঝেন চরন্তী’’তি ৰুত্তং.

ব্যাৰটাতি খাদনত্থং গণ্হিতুং উপক্কমন্তা. ৰিপরিৰত্তিত্ৰাতি ৰিৰট্টিত্ৰা. ছিজ্জিত্ৰাতি মুচ্ছাপৰত্তিযা ঠিতট্ঠানতো মুচ্চিত্ৰা, অঙ্গপচ্চঙ্গছেদনৰসেন ৰা ছিজ্জিত্ৰা. অচ্চন্তখারেতি আতপসন্তপাভাৰেন অতিসীতভাৰং সন্ধায অচ্চন্তখারতা ৰুত্তা সিযা. ন হি তং কপ্পসণ্ঠানউদকং সম্পত্তিকরমহামেঘৰুট্ঠং পথৰিসন্ধারকং কপ্পৰিনাসকউদকং ৰিয খারং ভৰিতুমরহতি, তথা সতি পথৰীপি ৰিলীযেয্য, তেসং ৰা পাপকম্মফলেন পেতানং পকতিউদকস্স পুব্বখেল়ভাৰাপত্তি ৰিয তস্স উদকস্স খারভাৰাপত্তি হোতীতি ৰুত্তং ‘‘অচ্চন্তখারে উদকে’’তি.

পঠমতথাগতঅচ্ছরিযসুত্তৰণ্ণনা নিট্ঠিতা.