৮. দুতিযতথাগতঅচ্ছরিযসুত্তৰণ্ণনা

১২৮. অট্ঠমে আলীযন্তি আরমিতব্বট্ঠেন সেৰীযন্তীতি আলযা, পঞ্চ কামগুণা. আরমন্তীতি রতিং ৰিন্দন্তি কীল়ন্তি লল়ন্তি. আলীযন্তি ৰা অল্লীযন্তা অভিরমণৰসেন সেৰন্তীতি আলযা, তণ্হাৰিচরিতানি. তেহি আলযেহি রমন্তীতি আলযারামা. যথেৰ হি সুসজ্জিতং পুপ্ফফলভরিতরুক্খাদিসম্পন্নউয্যানং পৰিট্ঠো রাজা তায সম্পত্তিযা রমতি, সম্মুদিতো আমোদিতপ্পমোদিতো হোতি, ন উক্কণ্ঠেতি, সাযম্পি নিক্খমিতুং ন ইচ্ছতি, এৰমিমেহি কামালযতণ্হালযেহি সত্তা রমন্তি, সংসারৰট্টে পমুদিতা অনুক্কণ্ঠিতা ৰসন্তি. তেন তেসং ভগৰা দুৰিধম্পি আলযং উয্যানভূমিং ৰিয দস্সেন্তো ‘‘আলযারামা’’তিআদিমাহ. সেসমেত্থ উত্তানমেৰ.

দুতিযতথাগতঅচ্ছরিযসুত্তৰণ্ণনা নিট্ঠিতা.