২. ঊমিভযসুত্তৰণ্ণনা

১২২. দুতিযে কোধূপাযাসস্সেতং অধিৰচনন্তি এত্থ কুজ্ঝনট্ঠেন কোধো, স্ৰেৰ চিত্তস্স কাযস্স চ অতিপ্পমদ্দনমথনুপ্পাদনেহি দল়্হআযাসট্ঠেন উপাযাসো. অনেকৰারং পৰত্তিত্ৰা অত্তনা সমৰেতং সত্তং অজ্ঝোত্থরিত্ৰা সীসং উক্খিপিতুং অদত্ৰা ঊমিসদিসতা দট্ঠব্বা. যথা হি বাহিরং উদকং ওতিণ্ণো ঊমীসু ওসীদিত্ৰা মরতি, এৰং ইমস্মিং সাসনে কোধূপাযাসে ওসীদিত্ৰা ৰিব্ভমতি, তস্মা কোধূপাযাসো ‘‘ঊমিভয’’ন্তি ৰুত্তো. ওদরিকত্তস্সেতং অধিৰচনন্তি যথা হি বাহিরং উদকং ওতিণ্ণো কুম্ভীলেন খাদিতো মরতি, এৰং ইমস্মিং সাসনে ওদরিকত্তেন ওদরিকভাৰেন আমিসগেধেন মিচ্ছাজীৰেন জীৰিককপ্পনেন নাসিতসীলাদিগুণতায খাদিতধম্মসরীরো ৰিব্ভমতি, তস্মা ওদরিকত্তং ‘‘কুম্ভীলভয’’ন্তি ৰুত্তং.

অনুপট্ঠিতায সতিযাতি কাযগতং সতিং অনুট্ঠাপেত্ৰা. অসংৰুতেহীতি অপিহিতেহি. পঞ্চন্নেতং কামগুণানং অধিৰচনন্তি যথা হি বাহিরং উদকং ওতিণ্ণো আৰট্টে নিমুজ্জিত্ৰা মরতি, এৰং ইমস্মিং সাসনে পব্বজিতো পঞ্চকামগুণাৰট্টে নিমুজ্জিত্ৰা ৰিব্ভমতি. কামরাগাভিভূতো হি সত্তো ইতো চ এত্তো, এত্তো চ ইতোতি এৰং মনাপিযরূপাদিৰিসযসঙ্খাতে আৰট্টে অত্তানং সংসারেত্ৰা যথা ততো বহিভূতে নেক্খম্মে চিত্তম্পি ন উপ্পাদেতি, এৰং আৰট্টেত্ৰা ব্যসনাপাদনেন কামগুণানং আৰট্টসদিসতা দট্ঠব্বা.

অনুদ্ধংসেতীতি কিলমেতি ৰিলোলতি. রাগানুদ্ধংসিতেনাতি রাগেন অনুদ্ধংসিতেন. মাতুগামস্সেতং অধিৰচনন্তি. যথা হি বাহিরং উদকং ওতিণ্ণো চণ্ডমচ্ছং আগম্ম লদ্ধপ্পহারো মরতি, এৰং ইমস্মিং সাসনে মাতুগামং আরব্ভ উপ্পন্নকামরাগো ৰিব্ভমতি, তস্মা মাতুগামো ‘‘সুসুকাভয’’ন্তি ৰুত্তো. মাতুগামো হি যোনিসোমনসিকাররহিতং অধীরপুরিসং ইত্থিকুত্তভূতেহি অত্তনো হাসভাৰৰিলাসেহি অভিভুয্য গহেত্ৰা ধীরজাতিকম্পি অত্তনো রূপাদীহি সম্পলোভনৰসেন অনৰসেসং অত্তনো উপকারধম্মে সীলাদিকে সম্পাদেতুং অসমত্থং করোন্তো অনযব্যসনং পাপেতি.

ইমানি পন চত্তারি ভযানি ভাযিত্ৰা যথা উদকং অনোরোহন্তস্স উদকং নিস্সায উদকপিপাসাৰিনযনং সরীরসুদ্ধিপরিল়াহূপসমো কাযউতুগ্গাহাপনন্তি, এৰমাদি আনিসংসো নত্থি, এৰমেৰং ইমানি চত্তারি ভযানি ভাযিত্ৰা সাসনে অপব্বজন্তস্সপি ইমং সাসনং নিস্সায সঙ্খেপতো ৰট্টদুক্খূপসমো, ৰিত্থারতো পন সীলানিসংসাদিৰসেন অনেকৰিধো আনিসংসো নত্থি. যথা পন ইমানি চত্তারি ভযানি অভাযিত্ৰা উদকং ওরোহন্তস্স ৰুত্তপ্পকারো আনিসংসো হোতি, এৰং ইমানি অভাযিত্ৰা সাসনে পব্বজন্তস্সপি ৰুত্তপ্পকারো আনিসংসো হোতি. মহাধম্মরক্খিতত্থেরো পনাহ ‘‘চত্তারি ভযানি ভাযিত্ৰা উদকং অনোতরন্তো সোতং ছিন্দিত্ৰা পরতীরং পাপুণিতুং ন সক্কোতি, অভাযিত্ৰা ওতরন্তো সক্কোতি, এৰমেৰং ভাযিত্ৰা সাসনে অপব্বজন্তোপি তণ্হাসোতং ছিন্দিত্ৰা নিব্বানপারং দট্ঠুং ন সক্কোতি, অভাযিত্ৰা পব্বজন্তো সক্কোতী’’তি.

ঊমিভযসুত্তৰণ্ণনা নিট্ঠিতা.