(৭) ২. মহাৰগ্গো

১. তিত্থাযতনসুত্তৰণ্ণনা

৬২. দুতিযস্স পঠমে তিত্থং নাম দ্ৰাসট্ঠি দিট্ঠিযো তব্বিনিমুত্তস্স কস্সচি দিট্ঠিৰিপ্ফন্দিতস্স অভাৰতো. এত্থ হি সত্তা তরন্তি উপ্পিলৰন্তি উম্মুজ্জনিমুজ্জং করোন্তি, তস্মা ‘‘তিত্থ’’ন্তি ৰুচ্চতি. পারগমনসঙ্খাতঞ্হি তরণং দিট্ঠিগতিকানং নত্থি, তত্থেৰ অপরাপরং নিমুজ্জনুম্মুজ্জনৰসেন পিলৰনমেৰ তেসং তরণং নাম. উপ্পাদকাতি পূরণকস্সপাদযো. তিত্থে জাতা তিত্থিযা, যথাৰুত্তং ৰা দিট্ঠিগতসঙ্খাতং তিত্থং এতেসং অত্থীতি তিত্থিকা, তিত্থিকা এৰ তিত্থিযা. মনোরমেতি সাদুফলভরিততায অভযদিসতায চ মনোরমে. ইমেসুযেৰ তীসু ঠানেসূতি যথাৰুত্তেসু তিত্থাযতনেসু.

যো যথা জানাতি, তস্স তথা ৰুচ্চতীতি ইমিনা পুগ্গলজ্ঝাসযৰসেন তথা ৰুত্তন্তি দস্সেতি. পুগ্গল-সদ্দো চ তিস্সন্নম্পি পকতীনং সাধারণো, তস্মা পুরিসগ্গহণেন ততো ৰিসেসনং যথা ‘‘অট্ঠ পুরিসপুগ্গলা’’তি. পটিসংৰিদিতং করোতীতি কেৰলং জাননৰসেন ৰিদিতং করোতি. অনুভৰতি ৰাতি ৰিপাকলক্খণপ্পত্তং অনুভৰতি. পুব্বেকতহেতূতি অন্তোগধাৰধারণং পদন্তি আহ ‘‘পুব্বেকতকম্মপচ্চযেনেৰা’’তি. ইমিনাতি ‘‘সব্বং তং পুব্বেকতহেতূ’’তি ইমিনা ৰচনেন. কম্মৰেদনন্তি কুসলাকুসলকম্মসহজং ৰেদনং. কিরিযৰেদনন্তি ‘‘নেৰ কুসলাকুসলা ন চ কম্মৰিপাকা’’তি এৰং ৰুত্তং কিরিযচিত্তসহজং ৰেদনং. ন কেৰলঞ্চ তে কম্মকিরিযৰেদনা এৰ পটিক্খিপন্তি, অথ খো সাসনে লোকে চ পাকটে ৰাতাবাধাদিরোগে চ পটিক্খিপন্তি এৰাতি দস্সেতুং ‘‘যে ৰা ইমে’’তিআদিমাহ. তত্থ পিত্তসমুট্ঠানাতি পিত্তৰিকারাধিকসম্ভূতা. অনন্তরদ্ৰযেপি এসেৰ নযো. সন্নিপাতিকাতি পিত্তাদীনং তিণ্ণম্পি ৰিকারানং সন্নিপাততো জাতা. উতুপরিণামজাতি সীতাদিউতুনো ৰিপরিণামতো ৰিসমপরিৰুত্তিতো জাতা. ৰিসমপরিহারজাতি অসপ্পাযাহারযোগপটিসেৰনৰসেন কাযস্স ৰিসমং পরিহরণতো জাতা. ওপক্কমিকাতি উপক্কমতো নিব্বত্তা. কম্মৰিপাকজাতি কম্মস্স ৰিপাকভূতক্খন্ধতো জাতা. ৰিরোধিপচ্চযসমুট্ঠানা ধাতূনং ৰিকারাৰত্থা, তপ্পচ্চযা ৰা দুক্খা ৰেদনা আবাধনট্ঠেন আবাধো, সো এৰ রুজ্জনট্ঠেন রোগো. তত্থ ‘‘যো যাপ্যলক্খণো, সো রোগো, ইতরো আবাধো’’তি ৰদন্তি. সব্বেসঞ্চ নেসং তংতংধাতূনং ৰিসমং আসন্নকারণং, ন তথা ইতরানি. তত্থাপি চ পকোপাৰত্থা ধাতুযো আসন্নকারণং, ন তথা পরপচ্চযাৰত্থাতি দট্ঠব্বং. অট্ঠমংযেৰ কম্মৰিপাকজং আবাধং সম্পটিচ্ছন্তি ‘‘সব্বং তং পুব্বেকতহেতূ’’তি ৰিপল্লাসগ্গাহেন. ‘‘পুব্বে’’তি পুরাতনস্সেৰ কম্মস্স গহিতত্তা উপপজ্জৰেদনীযম্পি তে পটিক্খিপন্তীতি ৰুত্তং ‘‘দ্ৰে পটিবাহিত্ৰা’’তি. সম্পটিচ্ছন্তীতি অনুজানন্তি.

অত্তনা কতমূলকেনাতি সাহত্থিককম্মহেতু. আণত্তিমূলকেনাতি পরস্স আণাপনৰসেন কতকম্মহেতু. ইমাতি তিস্সো ৰেদনা. সব্বে পটিবাহন্তীতি সব্বে রোগে পটিসেধেন্তি সব্বেসম্পি তেসং একেন ইস্সরেনেৰ নিম্মিতত্তা তব্ভাৰীভাৰাসম্ভৰতো. এস নযো সেসেসুপি. সব্বং পটিবাহন্তীতি হেতুপচ্চযপটিসেধনতো সব্বং নিসেধেন্তি.

মাতিকং নিক্খিপিত্ৰাতি তিণ্ণম্পি ৰেদানং অসারভাৰদস্সনত্থং উদ্দেসং কত্ৰা. তন্তি তং মাতিকং. ৰিভজিত্ৰা দস্সেতুন্তি দোসদস্সনৰসেনেৰ ৰিভাগতো দস্সেতুং. লদ্ধিপতিট্ঠাপনত্থন্তি অত্তনো লদ্ধিযা পটিজানাপনত্থং. লদ্ধিতো লদ্ধিং সঙ্কমন্তীতি মূললদ্ধিতো অঞ্ঞলদ্ধিং উপগচ্ছন্তি পটিজানন্তি. পুব্বেকতহেতুযেৰ পটিসংৰেদেতীতি কম্মৰেদনম্পি ৰিপাকৰেদনং কত্ৰা ৰদন্তি. দিট্ঠিগতিকা হি ব্যামূল়্হচিত্তা কম্মন্তরৰিপাকন্তরাদীনি আলোল়েন্তি, অসঙ্করতো সঞ্ঞাপেতুং ন সক্কোন্তি. যথা চ অকুসলকম্মে, এৰং কুসলকম্মেপীতি দস্সেতুং ‘‘এৰং পাণাতিপাতা’’তিআদি ৰুত্তং. তত্থ এৰন্তি যথা পুব্বেকতহেতু এৰ পাণাতিপাতিনো নাম হোন্তি, ন ইদানি সযংকতকারণা, এৰং পাণাতিপাতা ৰিরমণম্পি পুব্বেকতহেতু এৰাতি ৰিচারিযমানো পুব্বেকতৰাদো অকিরিযৰাদো এৰ সম্পজ্জতি.

কত্তুকম্যতাছন্দো ন তণ্হাছন্দো. কত্তুকম্যতাতি কাতুমিচ্ছা. পচ্চত্তপুরিসকারোতি তেন তেন পুরিসেন কত্তব্বকিচ্চং ন হোতি পুব্বেকতহেতু এৰ সিজ্ঝনতো. উভযম্পি তং এস ন লব্ভতীতি কত্তব্বকরণং সুচরিতপূরণং, অকত্তব্বঅকরণং দুচ্চরিতৰিরতীতি ইদং উভযম্পি এস ন লভতি. সমণাপি হি পুব্বেকতকারণাযেৰ হোন্তীতি পুব্বেকতকারণাযেৰ সমণাপি হোন্তি, ন ইদানি সংৰরসমাদানাদিনা. অস্সমণাপি পুব্বেকতকারণাযেৰাতি পুব্বেকতকারণাযেৰ অস্সমণাপি হোন্তি, ন সংৰরভেদেন.

যথা পুব্বেকতৰাদে ছন্দৰাযামানং অসম্ভৰতো পচ্চত্তপুরিসকারানং অভাৰো, এৰং ইস্সরনিম্মানৰাদেপি ইস্সরেনেৰ সব্বস্স নিম্মিতভাৰানুজাননতোতি ৰুত্তং ‘‘পুব্বেকতৰাদে ৰুত্তনযেনেৰ ৰেদিতব্বো’’তি. এস নযো অহেতুকৰাদেপীতি আহ ‘‘তথা অহেতুকৰাদেপী’’তি.

ইমেসন্তিআদিনা ইমেসং তিত্থাযতনানং তুচ্ছাসারতায থুসকোট্টনেন কুণ্ডকমত্তস্সপি অলাভো ৰিয পরমত্থলেসস্সপি অভাৰো, তথা খজ্জোপনকোভাসতো তেজসো ফুলিঙ্গমত্তস্সপি অভাৰো ৰিয অন্ধৰেণিকস্সপি মগ্গস্স অপ্পটিলাভো ৰিয সদ্দমত্তং নিস্সায মিচ্ছাভাগেন ৰিপল্লত্থতায দদ্দরজাতকে (জা. ১.২.৪৩-৪৩) সসকসদিসতা চ ৰিভাৰিতা হোতি. সারভাৰন্তি সীলসারাদিসম্পত্তিযা সারসব্ভাৰং. নিয্যানিকভাৰন্তি একন্তেনেৰ ৰট্টতো নিয্যানাৰহভাৰং. অনিগ্গহিতোতি ন নিগ্গহেতব্বো. তেনাহ ‘‘নিগ্গহেতুং অসক্কুণেয্যো’’তি. অসংকিলিট্ঠোতি সংকিলেসৰিরহিতো. তেনাহ ‘‘নিক্কিলেসো’’তিআদি. অনুপৰজ্জোতি ধম্মতো ন উপৰদিতব্বো. অপ্পটিকুট্ঠো নাম অপ্পটিসেধনং ৰা সিযা অনক্কোসনং ৰাতি তদুভযং দস্সেন্তো ‘‘অপ্পটিবাহিতো অনুপক্কুট্ঠো’’তি আহ.

তস্স ধম্মস্সাতি ‘‘অযং খো পন, ভিক্খৰে’’তিআদিনা উদ্ধটস্স ধম্মস্স. পঞ্হং পুচ্ছিত্ৰাতি কথেতুকম্যতাৰসেন পঞ্হং পুচ্ছিত্ৰা. যথাপটিপাটিযাতি মাতিকায যথানিক্খিত্তপ্পটিপাটিযা. ধাতুযোতি সভাৰধারণট্ঠেন ধাতুযো. তা পন যস্মা তণ্হাদিট্ঠিকপ্পনাপরিকপ্পিতঅত্তসুভসুখসস্সতাদিপকতিআদিধুৰাদিজীৰাদিকাযাদিকা ৰিয ন ইচ্ছাসভাৰা দিট্ঠিআদিরহিতেহি ৰিমুচ্চমানউদুম্বরপুপ্ফাদিলোকৰোহারৰত্থূনি ৰিয চ ৰাচাৰত্থুমত্তা, অথ খো সচ্চপরমত্থভূতাতি আহ ‘‘সভাৰা’’তি, সচ্চসভাৰাতি অত্থো. অত্তনো সভাৰং ধারেন্তীতি হি ধাতুযো. নিজ্জীৰনিস্সত্তভাৰপ্পকাসকোতি বাহিরপরিকপ্পিতজীৰাভাৰপ্পকাসকো লোকিযমহাজনসংকপ্পিতসত্তাভাৰপ্পকাসকো চ. আকরট্ঠেনাতি উপ্পজ্জনট্ঠানভাৰেন. উপ্পত্তিট্ঠানম্পি হি আকরো আযতনন্তি ৰুচ্চতি যথা ‘‘কম্বোজো অস্সানং আযতন’’ন্তি. মনোপৰিচারাতি তং তং আরম্মণং উপেচ্চ মনসো ৰিৰিধচরণাকারো. কেহি কত্থাতি আহ ‘‘ৰিতক্কৰিচারপাদেহী’’তিআদি. অট্ঠারসসু ঠানেসূতি ছ সোমনস্সট্ঠানিযানি, ছ দোমনস্সট্ঠানিযানি, ছ উপেক্খাট্ঠানিযানীতি এৰং অট্ঠারসসু ঠানেসু.

পতিট্ঠাধাতূতি সেসভূতত্তযস্স চেৰ সব্বূপাদারূপানঞ্চ পতিট্ঠাসভাৰা ধাতু. ইমিনা নযেন আবন্ধনধাতূতিআদীসুপি অত্থো ৰেদিতব্বো. অপিচ কক্খল়ভাৰসিদ্ধো সহজাতধম্মানং আধারভাৰো পতিট্ঠাভাৰো. দ্রৰভাৰসিদ্ধং সম্পিণ্ডনং আবন্ধনং. উণ্হভাৰসিদ্ধং মুদুতাপক্কতাৰহং পরিপাচনং. থদ্ধভাৰাৰহং উদ্ধুমাতনং ৰিত্থম্ভনং. রূপৰিৰিত্তো রূপপরিযন্তো আকাসোতি যেসং সো পরিচ্ছেদো, তেহি সো অসম্ফুট্ঠোৰাতি ৰুত্তং ‘‘আকাসধাতূতি অসম্ফুট্ঠধাতূ’’তি. সঞ্জাননৰিধুরা আরম্মণূপলদ্ধি ৰিজাননধাতু. ৰিত্থারতোপি কথেতুং ৰট্টতি সঙ্খেপন্তোগধত্তা ৰিত্থারস্স. সঙ্খেপতো কথেতুং ন ৰট্টতি কথেতব্বস্স অত্থস্স অনৰসেসপরিযাদানাভাৰতো. তেনাহ ‘‘ৰিত্থারতোৰ ৰট্টতী’’তি. উভযথাতি সঙ্খেপতো ৰিত্থারতো চ.

অনিপ্ফন্নাপি আকাসধাতু ভূতানি উপাদায গহেতব্বতামত্তেন ‘‘উপাদারূপ’’ন্তেৰ ৰুচ্চতি. দিট্ঠানেৰাতি সল্লক্খেতব্বানি উপাদারূপভাৰসামঞ্ঞতো. তেন সহজাতা ৰেদনা ৰেদনাক্খন্ধো সমুদাযে পৰত্তৰোহারস্স অৰযৰেপি দিস্সনতো যথা ‘‘ৰত্থেকদেসে দড্ঢে ৰত্থং দড্ঢ’’ন্তি. ‘‘ফস্সো চ চেতনা চ সঙ্খারক্খন্ধো’’তি ৰুত্তং মহাভূমকত্তা তেসং তপ্পধানত্তা চ সঙ্খারক্খন্ধস্স. অরূপক্খন্ধা নামং আরম্মণাভিমুখং নমনতো নামাধীনগ্গহণতো চ. রূপক্খন্ধো রূপং পরিব্যত্তং রুপ্পনট্ঠেন. পচ্চযন্তি নিস্সযভূতং পচ্চযং. ৰিভাগেন দ্ৰাচত্তালীস. একাসীতি চিত্তানি ‘‘সম্মসনচারোয’’ন্তি কত্ৰা. অনুক্কমেন পটিপজ্জমানোতি এৰং কঙ্খাৰিতরণৰিসুদ্ধিযং ঠিতো উপরিমেন তিস্সন্নং ৰিসুদ্ধীনং সম্পাদনৰসেন ৰিসুদ্ধিভাৰনং উস্সুক্কাপেন্তো.

ফস্সাযতনন্তি ফস্সস্স উপ্পত্তিট্ঠানং. সুৰণ্ণাদীনন্তি সুৰণ্ণমণিৰজিরাদীনং. আকিণ্ণং ৰিয হুত্ৰা উপ্পজ্জন্তি এত্থাতি আকরো. যথা চক্খু ৰিপাকফস্সস্স ৰিসেসপচ্চযো, ন তথা ইতরেসন্তি কত্ৰা ৰুত্তং ‘‘দ্ৰে চক্খুৰিঞ্ঞাণানী’’তিআদি. এস নযো সেসৰারেসুপি. দ্ৰত্তিংসায ৰিপাকফস্সেসু দ্ৰিপঞ্চৰিঞ্ঞাণসহগতফস্সে ঠপেত্ৰা সেসা দ্ৰাৰীসতি ৰিপাকফস্সা ৰেদিতব্বা. দিট্ঠমেৰ হোতি তেন সমানযোগক্খমত্তা. ‘‘সঙ্খেপতো তাৰা’’তি সঙ্খেপকথং আরভিত্ৰাপি ৰিত্থারকথাপেত্থ ৰুত্তনযত্তা সুৰিঞ্ঞেয্যাৰাতি ৰুত্তং ‘‘হেট্ঠা…পে… ৰেদিতব্ব’’ন্তি.

সোমনস্সস্স উপ্পত্তিট্ঠানভূতং সোমনস্সট্ঠানিযং. তেনাহ ‘‘সোমনস্সস্স কারণভূত’’ন্তি. উপৰিচরতীতি উপেচ্চ পৰত্ততি. সভাৰতো সঙ্কপ্পতো চ সোমনস্সাদিউপ্পত্তিহেতুকা সোমনস্সট্ঠানিযাদিতাতি আহ ‘‘ইট্ঠং ৰা হোতূ’’তিআদি. চতুত্থং দিট্ঠমেৰ হোতি তদৰিনাভাৰতো.

অরিযসচ্চানীতি পুরিমপদে উত্তরপদলোপেনাযং নিদ্দেসোতি আহ ‘‘অরিযভাৰকরানী’’তিআদি. ৰিসুদ্ধিমগ্গে (ৰিসুদ্ধি. ২.৫৩১) পকাসিতং, তস্মা ন ইধ পকাসেতব্বন্তি অধিপ্পাযো. সুখাৰবোধনত্থন্তি দেসিযমানায ৰট্টকথায সুখেন অৰবোধনত্থং. তেনাহ ‘‘যস্স হী’’তিআদি. দ্ৰাদসপদন্তি অৰিজ্জাদীহি পদেহি দ্ৰাদসপদং. পচ্চযৰট্টন্তি পচ্চযপ্পবন্ধং. কথেতুকামো হোতি পচ্চযাকারমুখেন সচ্চানি দস্সেতুকামতায. গব্ভাৰক্কন্তিৰট্টন্তি গব্ভোক্কন্তিমুখেন ৰিপাকৰট্টং দস্সেতি ‘‘গব্ভস্সাৰক্কন্তি হোতী’’তিআদিনা. তস্মা পনেত্থ গব্ভাৰক্কন্তিৰসেনেৰ ৰট্টং দস্সিতন্তি আহ ‘‘গব্ভাৰক্কন্তিৰট্টস্মিং হী’’তিআদি. গব্ভাৰক্কন্তিৰট্টস্মিন্তি মাতুকুচ্ছিম্হি নিব্বত্তনৰসেন পৰত্তধম্মপ্পবন্ধে. দস্সিতেতি দেসনাৰসেন দস্সিতে. পুরিমা দ্ৰে যোনিযো ইতরাহি ওল়ারিকতায পরিব্যত্ততরাতি ৰুত্তং ‘‘গব্ভাৰক্কন্তি…পে… অৰবোধেতুম্পী’’তি.

পচ্চযমত্তন্তি ছন্নং ধাতূনং সাধারণং পচ্চযভাৰমত্তং, ন তেহি ভাগসো নিপ্ফাদিযমানং পচ্চযৰিসেসং ‘‘কুতো পনেতং ছন্নং ধাতূন’’ন্তি অৰিভাগেন ৰুত্তত্তা. তেনাহ ‘‘ইদং ৰুত্তং হোতী’’তিআদি. ন মাতু ন পিতু তাসং ধাতূনং ইমস্স সত্তস্স বাহিরভাৰতো. গব্ভস্সাতি এত্থ গব্ভতি অত্তভাৰভাৰেন ৰত্ততীতি গব্ভো, কললাদিঅৰত্থো ধম্মপ্পবন্ধো. তন্নিস্সিতত্তা পন সত্তসন্তানো গব্ভোতি ৰুত্তো যথা মঞ্চনিস্সিতা ‘‘মঞ্চা উক্কুট্ঠিং করোন্তী’’তি. তন্নিস্সযভাৰতো মাতুকুচ্ছি গব্ভোতি ৰুচ্চতি ‘‘গব্ভে ৰসতি মাণৰো’’তিআদীসু (জা. ১.১৫.৩৬৩). গব্ভো ৰিযাতি ৰা গব্ভো. যথা হি নিৰাসট্ঠানতায সত্তানং ওৰরকো ‘‘গব্ভো’’তি ৰুচ্চতি, এৰং গব্ভসেয্যকানং সত্তানং যাৰ অভিজাতি নিৰাসট্ঠানতায মাতুকুচ্ছি ‘‘গব্ভো’’তি ৰুচ্চতি. ইধ পন পঠমং ৰুত্তঅত্থেনেৰ গব্ভোতি ৰেদিতব্বো. তেনাহ ‘‘গব্ভো চ নামা’’তিআদি.

নিরতিঅত্থেন নিরযো চ সো যথাৰুত্তেন অত্থেন গব্ভো চাতি নিরযগব্ভো. এস নযো সেসপদেসুপি. অযং পন ৰিসেসো – দেৰমনুজাদযো ৰিয উদ্ধং দীঘা অহুত্ৰা তিরিযং অঞ্চিতা দীঘাতি তিরচ্ছানা. তে এৰ খন্ধকোট্ঠাসভাৰেন যোনি চ সো ৰুত্তনযেন গব্ভো চাতি তিরচ্ছানযোনিগব্ভো. পকট্ঠতো সুখতো অপেতং অপগমো পেতভাৰো, তং পত্তানং ৰিসযোতি পেত্তিৰিসযো, পেতযোনি. মনস্স উস্সন্নতায সূরভাৰাদিগুণেহি উপচিতমানসতায উক্কট্ঠগুণচিত্ততায মনুস্সা. দিব্বন্তি কামগুণাদীহি কীল়ন্তি লল়ন্তি জোতন্তীতি দেৰা. গব্ভসদ্দো ৰুত্তনযো এৰ. নানপ্পকারোতি যথাৰুত্তেন তদনন্তরভেদেন চ নানপ্পকারকো. মনুস্সগব্ভো অধিপ্পেতো সুপাকটতায পচ্চক্খভাৰতো. ওক্কন্তি মাতুকুচ্ছিং ওক্কমিত্ৰা ৰিয উপ্পতিত্ৰাতি কত্ৰা. নিব্বত্তনং নিব্বত্তি. পাতুভাৰো উপ্পত্তিপ্পকাসকো চ.

সন্নিপাতো নাম অৰেকল্লজাতিহীনৰেকল্লেতি দস্সেতুং ‘‘ইধ মাতাপিতরো’’তিআদি ৰুত্তং. ইধাতি ইমস্মিং সত্তলোকে. সন্নিপতিতাতি সমোধানভাৰতো সন্নিপতিতা সমাগতা সংসিলিট্ঠা. উতুনীতি উতুমতী সঞ্জাতপুপ্ফা. ইদঞ্চ উতুসমযং সন্ধায ৰুত্তং, ন লোকসমঞ্ঞাকরজস্স লগ্গনদিৰসমত্তং. মাতুগামস্স হি যস্মিং গব্ভাসহসঞ্ঞিতে ওকাসে দারকো নিব্বত্ততি, তত্থ মহতী লোহিতপীল়কা সণ্ঠহিত্ৰা অগ্গহিতপুব্বা এৰ ভিজ্জিত্ৰা পগ্ঘরতি, ৰত্থু সুদ্ধং হোতি পগ্ঘরিতলোহিতত্তা অনামযত্তা চ. ৰিসুদ্ধে ৰত্থুম্হি মাতাপিতূসু একৰারং সন্নিপতিতেসু যাৰ সত্ত দিৰসানি খেত্তমেৰ হোতি. সুদ্ধং ৰত্থু নহানতো পরম্পি কতিপযানি দিৰসানি গব্ভসণ্ঠহনতায খেত্তমেৰ হোতি পরিত্তস্স লোহিতলেসস্স ৰিজ্জমানত্তা. তস্মিং সমযে হত্থগ্গাহৰেণিগ্গাহাদিনা অঙ্গপরামসনেনপি দারকো নিব্বত্ততিযেৰ. ইত্থিসন্তানেপি হি সত্তপি ধাতূ লব্ভন্তেৰ. তথা হি পারিকায নাভিপরামসনেন সামস্স বোধিসত্তস্স, দিট্ঠমঙ্গলিকায নাভিপরামসনেন (জা. অট্ঠ. ৪.১৫.মাতঙ্গজাতকৰণ্ণনা; ম. নি. অট্ঠ. ২.৬৫) মণ্ডব্যস্স নিব্বত্তি অহোসি. গন্ধনতো উপ্পন্নগতিযা নিমিত্তূপট্ঠানেন সূচনতো দীপনতো গন্ধোতি লদ্ধনামেন ভৰগামিকম্মুনা অব্বতি পৰত্ততীতি গন্ধব্বো, তত্থ উপ্পজ্জমানকসত্তো. পচ্চুপট্ঠিতো হোতীতি ন মাতাপিতূনং সন্নিপাতং ওলোকযমানো সমীপে ঠিতো পচ্চুপট্ঠিতো নাম হোতি, কম্মযন্তযন্তিতো পন একো সত্তো তস্মিং ওকাসে নিব্বত্তনকো হোতীতি অযমেত্থ অধিপ্পাযো. তদা হি তত্রূপগসত্তো তত্রূপপত্তিআৰহন্তকম্মসঙ্খাতেন পেল্লকযন্তেন তথত্থায পেল্লিতো উপনীতো ৰিয হোতি.

ৰিঞ্ঞাণপচ্চযা নামরূপন্তি এত্থ ৰিঞ্ঞাণস্স পচ্চযভাৰেন গহিতত্তা ‘‘তযো অরূপিনো খন্ধা’’তি ৰুত্তং. ইধ পন ৰিঞ্ঞাণং পচ্চযভাৰেন অগ্গহেত্ৰা গব্ভোক্কন্তিযা এৰ পচ্চযভাৰেন গহিতত্তা ‘‘ৰিঞ্ঞাণক্খন্ধম্পি পক্খিপিত্ৰা’’তি ৰুত্তং. ইধ পন মনুস্সগব্ভস্স ওক্কন্তিযা অধিপ্পেতত্তা ‘‘গব্ভসেয্যকানং পটিসন্ধিক্খণে’’তি ৰুত্তং.

তণ্হায সমুদযসচ্চভাৰেন গহিতত্তা ‘‘ঠপেত্ৰা তণ্হ’’ন্তি ৰুত্তং. তস্সেৰ পভাৰিকাতি তস্সেৰ যথাৰুত্তস্স দুক্খসচ্চস্স উপ্পাদিকা. দুক্খনিরোধোতি এত্থ দুক্খগ্গহণেন তণ্হাপি গহিতাতি আহ ‘‘তেসং দ্ৰিন্নম্পি…পে… দুক্খনিরোধো’’তি. অৰিসেসেন হি তেভূমকৰট্টং ইধ দুক্খন্তি অধিপ্পেতং. অথ ৰা দুক্খস্স অনুপ্পত্তিনিরোধো তব্ভাৰিকায তণ্হায অনুপ্পত্তিনিরোধেন ৰিনা ন হোতীতি ৰুত্তং ‘‘তেসং দ্ৰিন্নম্পি…পে… দুক্খনিরোধো’’তি. অনুপ্পত্তিনিরোধোতি চ অনুপ্পত্তিনিরোধনিমিত্তং নিব্বানং দস্সেতি.

‘‘তত্থ ৰুত্তনযেনেৰ ৰেদিতব্ব’’ন্তি ৰত্ৰা উভযত্থ পাল়িযা পৰত্তিআকারভেদং দস্সেতুং ‘‘অযং পন ৰিসেসো’’তি আহ. তত্থাতি ৰিসদ্ধিমগ্গে. ইধাতি ইমস্মিং সুত্তে. অৰিজ্জায ত্ৰেৰাতি অৰিজ্জায তু এৰ. অসেসৰিরাগনিরোধাতি এত্থ অচ্চন্তমেৰ সঙ্খারে ৰিরজ্জতি এতেনাতি ৰিরাগো, মগ্গো, তস্মা ৰিরাগসঙ্খাতেন মগ্গেন অসেসনিরোধা অসেসেত্ৰা নিরোধা সমুচ্ছিন্দনাতি এৰমেত্থ অত্থো দট্ঠব্বো.

সকলস্সাতি অনৰসেসস্স. কেৰলস্সাতি ৰা সুদ্ধস্স, পরপরিকপ্পিতসত্তজীৰাদিৰিরহিতস্সাতি অত্থো. খীণাকারোপি ৰুচ্চতি ‘‘নিরুজ্ঝনং নিরোধো’’তি ইমিনা অত্থেন. অরহত্তম্পি নিরোধোতি ৰুচ্চতি নিরোধন্তে উপ্পন্নত্তা. নিব্বানম্পি নিরোধোতি ৰুচ্চতি অৰিজ্জাদীনং নিরোধস্স নিমিত্তভাৰতো অৰিজ্জাদযো নিরুজ্ঝন্তি এত্থাতি নিরোধোতি কত্ৰা. খীণাকারদস্সনৰসেনাতি অৰিজ্জাদীনং অনুপ্পত্তিনিরোধেন নিরুজ্ঝনাকারদস্সনৰসেন. নিব্বানমেৰ সন্ধায, ন পন অরহত্তন্তি অধিপ্পাযো. সভাৰধম্মানং নিগ্গহো নাম যথাৰুত্তধম্মপরিচ্ছেদতো ঊনাধিকভাৰপ্পকাসনেন অত্তসভাৰৰিভাৰনেনেৰ হোতীতি আহ ‘‘নিগ্গণ্হন্তো হী’’তিআদি.

তিত্থাযতনসুত্তৰণ্ণনা নিট্ঠিতা.

২. ভযসুত্তৰণ্ণনা

৬৩. দুতিযে পরিত্তাতুং সমত্থভাৰেনাতি উপ্পন্নভযতো রক্খিতুং সমত্থভাৰেন. নত্থি এত্থ মাতাপুত্তং অঞ্ঞমঞ্ঞং তাযিতুং সমত্থন্তি অমাতাপুত্তানি, তানিযেৰ অমাতাপুত্তিকানি. তেনাহ ‘‘নত্থি এত্থা’’তিআদি. যন্তি ভুম্মত্থে উপযোগৰচনন্তি আহ ‘‘যস্মিং সমযে’’তি. মাতাপি পুত্তং পস্সিতুং ন লভতি, পরিত্তাতুং ন সমত্থন্তি অধিপ্পাযো. পুত্তোপি মাতরন্তি এত্থাপি এসেৰ নযো. চিত্তুত্রাসোযেৰ ভযং চিত্তুত্রাসভযং. ইমিনা ওত্তপ্পভযাদিং নিৰত্তেতি. অটৰিগ্গহণেন অটৰিৰাসিনো ৰুত্তা ‘‘সব্বো গামো আগতো’’তিআদীসু ৰিযাতি আহ ‘‘অটৰীতি চেত্থ অটৰিৰাসিনো চোরা ৰেদিতব্বা’’তি. এতেতি অটৰিৰাসিনো চোরা. এতং ৰুত্তন্তি ‘‘অটৰিসঙ্কোপো’’তি ইদং ৰুত্তং. ঠানগমনাদিইরিযাপথচক্কসমঙ্গিনো ইরিযাপথচক্কসমারুল়্হা নাম হোন্তীতি আহ ‘‘ইরিযাপথচক্কম্পি ৰট্টতী’’তি. ইরিযাপথোযেৰ পৰত্তনট্ঠেন চক্কন্তি ইরিযাপথচক্কং.

পরিযাযন্তীতি পরিতো তেন তেন দিসাভাগেন গচ্ছন্তি. তেনাহ ‘‘ইতো চিতো চ গচ্ছন্তী’’তি. মাতুপেমেন গন্তুং অৰিসহিত্ৰা অত্তনো সন্তিকং আগচ্ছন্তং. অত্তসিনেহস্স বলৰভাৰতো মাতরম্পি অনপেক্খিত্ৰা ‘‘অত্তানংযেৰ রক্খিস্সামী’’তি গচ্ছন্তং. একস্মিং ঠানে নিলীনন্তি ৰুত্তনযেনেৰ গন্ত্ৰা একস্মিং খেমে পদেসে নিসিন্নং. কুল্লে ৰাতিআদীসু কূলং পরতীরং ৰহতি পাপেতীহি কুল্লো, তরণত্থায ৰেল়ুনল়াদীহি কলাপং কত্ৰা বদ্ধো. পত্থরিত্ৰা বদ্ধো পন উল়ুম্পো, চাটিআদি মত্তিকাভাজনং. ৰুয্হমানন্তি উদকোঘেন অধোসোতং নীযমানং.

যথাৰুত্তানি তীণি ভযানি সমাতাপুত্তিকানিযেৰ অস্সুতৰতো পুথুজ্জনস্স ৰসেন অমাতাপুত্তিকানি দস্সিতানীতি আহ ‘‘এৰং পরিযাযতো অমাতাপুত্তিকানি ভযানি দস্সেত্ৰা’’তি.

ভযসুত্তৰণ্ণনা নিট্ঠিতা.

৩. ৰেনাগপুরসুত্তৰণ্ণনা

৬৪. ততিযে এৰংনামকে জনপদেতি যত্থ নামগ্গহণেন কোসলসদ্দস্স রুল়্হীসদ্দতং দস্সেতি. তথা হি কোসলা নাম জানপদিনো রাজকুমারা, তেসং নিৰাসো একোপি জনপদো রুল়্হীসদ্দেন ‘‘কোসলা’’তি ৰুচ্চতি. অক্খরচিন্তকা হি ঈদিসেসু ঠানেসু যুত্তে ৰিয সলিঙ্গৰচনানি (পাণিনি ১.২.৫১) ইচ্ছন্তি. অযমেত্থ রুল়্হী যথা অঞ্ঞত্থাপি ‘‘কুরূসু ৰিহরতি, অঙ্গেসু ৰিহরতী’’তি চ. তব্বিসেসনে পন জনপদসদ্দে জাতিসদ্দে একৰচনমেৰ যথা ‘‘কোসলেসু জনপদে’’তি. চারিকন্তি চরণং. চরণং ৰা চারো, সো এৰ চারিকা. তযিদং মগ্গগমনং ইধাধিপ্পেতং, ন চুণ্ণিকগমনমত্তন্তি আহ ‘‘অদ্ধানগমনং গচ্ছন্তো’’তি. তং ৰিভাগেন দস্সেতুং ‘‘চারিকা চ নামেসা’’তিআদি ৰুত্তং. তত্থ দূরেপীতি দূরেপি নাতিদূরেপি. সহসা গমনন্তি সীঘগমনং. মহাকস্সপপচ্চুগ্গমনাদীসূতি আদি-সদ্দেন আল়ৰকাদীনং অত্থায গমনং সঙ্গণ্হাতি. ভগৰা হি মহাকস্সপত্থেরং পচ্চুগ্গচ্ছন্তো মুহুত্তেন তিগাৰুতমগ্গমগমাসি. আল়ৰকস্সত্থায তিংসযোজনং, তথা অঙ্গুলিমালস্স, পুক্কুসাতিস্স পন পঞ্চচত্তালীসযোজনং, মহাকপ্পিনস্স ৰীসযোজনসতং, ধনিযস্সত্থায সত্ত যোজনসতানি, ধম্মসেনাপতিনো সদ্ধিৰিহারিকস্স ৰনৰাসিস্স তিস্সসামণেরস্স তিগাৰুতাধিকং ৰীসযোজনসতং অগমাসি. ইমং সন্ধাযাতি ইমং অতুরিতচারিকং সন্ধায.

উপলভিংসূতি এত্থ সৰনৰসেন উপলভিংসূতি ইমমত্থং দস্সেন্তো ‘‘সোতদ্ৰার…পে… জানিংসূ’’তি আহ. সব্বম্পি ৰাক্যং অৰধারণফলত্তা অন্তোগধাৰধারণন্তি আহ ‘‘পদপূরণমত্তে ৰা নিপাতো’’তি. অৰধারণত্থেনাতি পন ইমিনা ইট্ঠত্থতোৰধারণত্থং খো-সদ্দগ্গহণন্তি দস্সেতি. অস্সোসীতি পদং খো-সদ্দে গহিতে তেন ফুল্লিতমণ্ডিতৰিভূসিতং ৰিয হোন্তং পূরিতং নাম হোতি, তেন চ পুরিমপচ্ছিমপদানি সংসিলিট্ঠানি নাম হোন্তি, ন তস্মিং অগ্গহিতেতি আহ ‘‘পদপূরণেন ব্যঞ্জনসিলিট্ঠতামত্তমেৰা’’তি. মত্তসদ্দো ৰিসেসনিৰত্তিঅত্থো. তেনস্স অনত্থন্তরদীপনতা দস্সিতা হোতি, এৰসদ্দেন পন ব্যঞ্জনসিলিট্ঠতায একন্তিকতা.

সমিতপাপত্তাতি অচ্চন্তং অনৰসেসতো সৰাসনং সমিতপাপত্তা. এৰঞ্হি বাহিরকৰীতরাগসেক্খাসেক্খপাপসমনতো ভগৰতো পাপসমনং ৰিসেসিতং হোতি. তেনস্স যথাভূতগুণাধিগতমেতং নামং যদিদং সমণোতি দীপেতি. অনেকত্থত্তা নিপাতানং ইধ অনুস্সৰত্থো অধিপ্পেতোতি আহ ‘‘খলূতি অনুস্সৰত্থে নিপাতো’’তি. আলপনমত্তন্তি পিযালাপৰচনমত্তং. পিযসমুদাহারা হেতে ‘‘ভো’’তি ৰা ‘‘আৰুসো’’তি ৰা ‘‘দেৰানং পিযা’’তি ৰা. গোত্তৰসেনাতি এত্থ গং তাযতীতি গোত্তং. গোতমোতি হি পৰত্তমানং ৰচনং বুদ্ধিঞ্চ তাযতি একংসিকৰিসযতায রক্খতীতি গোত্তং. যথা হি বুদ্ধি আরম্মণভূতেন অত্থেন ৰিনা ন ৰত্ততি, তথা অভিধানং অভিধেয্যভূতেন, তস্মা সো গোত্তসঙ্খাতো অত্থো তানি তাযতি রক্খতীতি ৰুচ্চতি. কো পন সোতি? অঞ্ঞকুলপরম্পরাসাধারণং তস্স কুলস্স আদিপুরিসসমুদাগতং তংকুলপরিযাপন্নসাধারণং সামঞ্ঞরূপন্তি দট্ঠব্বং. এত্থ চ সমণোতি ইমিনা পরিক্খকজনেহি ভগৰতো বহুমতভাৰো দস্সিতো সমিতপাপতাকিত্তনতো. গোতমোতি ইমিনা লোকিযজনেহি উচ্চাকুলসম্ভূততা দীপিতা তেন উদিতোদিতৰিপুলখত্তিযকুলৰিভাৰনতো. সব্বখত্তিযানঞ্হি আদিভূতমহাসম্মতমহারাজতো পট্ঠায অসম্ভিন্নং উল়ারতমং সক্যরাজকুলং.

কেনচি পারিজুঞ্ঞেনাতি ঞাতিপারিজুঞ্ঞভোগপারিজুঞ্ঞাদিনা কেনচিপি পারিজুঞ্ঞেন পরিহানিযা অনভিভূতো অনজ্ঝোত্থটো. তথা হি তস্স কুলস্স ন কিঞ্চি পারিজুঞ্ঞং লোকনাথস্স অভিজাতিযং, অথ খো ৰড্ঢিযেৰ. অভিনিক্খমনে চ ততোপি সমিদ্ধতমভাৰো লোকে পাকটো পঞ্ঞাতোতি. সক্যকুলা পব্বজিতোতি ইদং ৰচনং ভগৰতো সদ্ধাপব্বজিতভাৰদীপনং ৰুত্তং মহন্তং ঞাতিপরিৰট্টং মহন্তঞ্চ ভোগক্খন্ধং পহায পব্বজিতভাৰসিদ্ধিতো.

ইত্থম্ভূতাখ্যানত্থেতি ইত্থং এৰংপকারো ভূতো জাতোতি এৰং কথনত্থে. উপযোগৰচনন্তি ‘‘অব্ভুগ্গতো’’তি এত্থ অভি-সদ্দো ইত্থম্ভূতাখ্যানত্থজোতকো, তেন যোগতো ‘‘তং খো পন ভৰন্ত’’ন্তি ইদং সামিঅত্থে উপযোগৰচনং. তেনাহ ‘‘তস্স খো পন ভোতো গোতমস্সাতি অত্থো’’তি. কল্যাণগুণসমন্নাগতোতি কল্যাণেহি গুণেহি যুত্তো, তন্নিস্সিতো তব্বিসযতাযাতি অধিপ্পাযো. সেট্ঠোতি এত্থাপি এসেৰ নযো. কিত্তেতব্বতো কিত্তি, সা এৰ সদ্দনীযতো সদ্দোতি আহ ‘‘কিত্তিসদ্দোতি কিত্তিযেৰা’’তি. অভিত্থৰনৰসেন পৰত্তো সদ্দো থুতিঘোসো. সদেৰকং লোকং অজ্ঝোত্থরিত্ৰা উগ্গতোতি অনঞ্ঞসাধারণে গুণে আরব্ভ পৰত্তত্তা সদেৰকং লোকং অজ্ঝোত্থরিত্ৰা অভিভৰিত্ৰা উগ্গতো.

সো ভগৰাতি যো সো সমতিংস পারমিযো পূরেত্ৰা সব্বকিলেসে ভঞ্জিত্ৰা অনুত্তরং সম্মাসম্বোধিং অভিসম্বুদ্ধো দেৰানং অতিদেৰো সক্কানং অতিসক্কো ব্রহ্মানং অতিব্রহ্মা লোকনাথো ভাগ্যৰন্ততাদীহি কারণেহি সদেৰকে লোকে ‘‘ভগৰা’’তি পত্থটকিত্তিসদ্দো, সো ভগৰা. ‘‘ভগৰা’’তি চ ইদং সত্থু নামকিত্তনং. তেনাহ আযস্মা ধম্মসেনাপতি ‘‘ভগৰাতি নেতং নামং মাতরা কত’’ন্তিআদি (মহানি. ৮৪). পরতো পন ভগৰাতি গুণকিত্তনং. যথা কম্মট্ঠানিকেন ‘‘অরহ’’ন্তিআদীসু নৰসু ঠানেসু পচ্চেকং ইতি-সদ্দং যোজেত্ৰা বুদ্ধগুণা অনুস্সরিযন্তি, এৰং বুদ্ধগুণসংকিত্তনেনপীতি দস্সেন্তো ‘‘ইতিপি অরহং ইতিপি সম্মাসম্বুদ্ধো…পে… ইতিপি ভগৰা’’তি আহ. ‘‘ইতিপেতং ভূতং ইতিপেতং তচ্ছ’’ন্তিআদীসু (দী. নি. ১.৬) ৰিয ইধ ইতিসদ্দো আসন্নপচ্চক্খকরণত্থো, পি-সদ্দো সম্পিণ্ডনত্থো, তেন চ তেসং গুণানং বহুভাৰো দীপিতো, তানি চ সংকিত্তেন্তেন ৰিঞ্ঞুনা চিত্তস্স সম্মুখীভূতানেৰ কত্ৰা সংকিত্তেতব্বানীতি দস্সেন্তো ‘‘ইমিনা চ ইমিনা চ কারণেনাতি ৰুত্তং হোতী’’তি আহ. এৰং নিরূপেত্ৰা কিত্তেন্তো যো কিত্তেতি, তস্স ভগৰতি অতিৰিয অভিপ্পসাদো হোতি.

আরকত্তাতি সুৰিদূরত্তা. অরীনন্তি কিলেসারীনং. অরানন্তি সংসারচক্কস্স অরানং. হতত্তাতি ৰিদ্ধংসিতত্তা. পচ্চযাদীনন্তি চীৰরাদিপচ্চযানঞ্চেৰ পূজাৰিসেসানঞ্চ. ততোতি ৰিসুদ্ধিমগ্গতো (ৰিসুদ্ধি. ১.১২৫-১২৭). যথা চ ৰিসুদ্ধিমগ্গতো, এৰং তংসংৰণ্ণনাতোপি নেসং ৰিত্থারো গহেতব্বো.

ইমং লোকন্তি নযিদং মহাজনস্স সম্মুখমত্তং সন্ধায ৰুত্তং, অথ খো অনৰসেসং পরিযাদাযাতি দস্সেতুং ‘‘সদেৰক’’ন্তিআদি ৰুত্তং. তেনাহ ‘‘ইদানি ৰত্তব্বং নিদস্সেতী’’তি. পজাতত্তাতি যথাসকং কম্মকিলেসেহি নিব্বত্তত্তা. পঞ্চকামাৰচরদেৰগ্গহণং পারিসেসনযেন ইতরেসং পদন্তরেন গহিতত্তা. সদেৰকন্তি চ অৰযৰেন ৰিগ্গহো সমুদাযো সমাসত্থো. ছট্ঠকামাৰচরদেৰগ্গহণং পচ্চাসত্তিনযেন. তত্থ হি সো জাতো তন্নিৰাসী চ. সব্রহ্মকৰচনেন ব্রহ্মকাযিকাদিব্রহ্মগ্গহণন্তি এত্থাপি এসেৰ নযো. পচ্চত্থিকসমণব্রাহ্মণগ্গহণন্তি নিদস্সনমত্তমেতং অপচ্চত্থিকানং সমিতবাহিতপাপানঞ্চ সমণব্রাহ্মণানং সমণব্রাহ্মণৰচনেন গহিতত্তা. কামং ‘‘সদেৰক’’ন্তিআদিৰিসেসনানং ৰসেন সত্তৰিসযো লোকসদ্দোতি ৰিঞ্ঞাযতি তুল্যযোগৰিসযত্তা তেসং, ‘‘সলোমকো সপক্খকো’’তিআদীসু পন অতুল্যযোগেপি অযং সমাসো লব্ভতীতি ব্যভিচারদস্সনতো পজাগহণন্তি আহ ‘‘পজাৰচনেন সত্তলোকগ্গহণ’’ন্তি.

অরূপিনো সত্তা অত্তনো আনেঞ্জৰিহারেন ৰিহরন্তা দিব্বন্তীতি দেৰাতি ইমং নিব্বচনং লভন্তীতি আহ ‘‘সদেৰকগ্গহণেন অরূপাৰচরলোকো গহিতো’’তি. তেনাহ ‘‘আকাসানঞ্চাযতনূপগানং দেৰানং সহব্যত’’ন্তি (অ. নি. ৩.১১৭). সমারকগ্গহণেন ছকামাৰচরদেৰলোকো গহিতো তস্স সৰিসেসং মারস্স ৰসে ৰত্তনতো. সব্রহ্মকগ্গহণেন রূপীব্রহ্মলোকো গহিতো অরূপীব্রহ্মলোকস্স গহিতত্তা. চতুপরিসৰসেনাতি খত্তিযাদিচতুপরিসৰসেন. ইতরা পন চতস্সো পরিসা সমারকাদিগ্গহণেন গহিতা এৰাতি. অৰসেসসত্তলোকো নাগগরুল়াদিভেদো. তীহাকারেহীতি দেৰমারব্রহ্মসহিততাসঙ্খাতেহি তীহি পকারেহি. তীসু পদেসূতি ‘‘সদেৰক’’ন্তিআদীসু তীসু পদেসু. তেন তেনাকারেনাতি সদেৰকত্তাদিনা তেন তেন পকারেন. তেধাতুকমেৰ পরিযাদিন্নন্তি পোরাণা আহূতি যোজনা.

অভিঞ্ঞাতি যকারলোপেনাযং নিদ্দেসো, অভিজানিত্ৰাতি অযমেত্থ অত্থোতি আহ ‘‘অভিঞ্ঞায অধিকেন ঞাণেন ঞত্ৰা’’তি. অনুমানাদিপটিক্খেপোতি অনুমানঅত্থাপত্তিআদিপ্পটিক্খেপো একপ্পমাণত্তা. সব্বত্থ অপ্পটিহতঞাণচারতায হি সব্বপচ্চক্খা বুদ্ধা ভগৰন্তো.

অনুত্তরং ৰিৰেকসুখন্তি ফলসমাপত্তিসুখং. তেন ৰিমিস্সাপি কদাচি ভগৰতো ধম্মদেসনা হোতীতি ‘‘হিত্ৰাপী’’তি পি-সদ্দগ্গহণং. ভগৰা হি ধম্মং দেসেন্তো যস্মিং খণে পরিসা সাধুকারং ৰা দেতি, যথাসুতং ৰা ধম্মং পচ্চৰেক্খতি, তং খণং পুব্বভাগেন পরিচ্ছিন্দিত্ৰা ফলসমাপত্তিং সমাপজ্জতি, যথাপরিচ্ছেদঞ্চ সমাপত্তিতো ৰুট্ঠায ঠিতট্ঠানতো পট্ঠায ধম্মং দেসেতি. অপ্পং ৰা বহুং ৰা দেসেন্তোতি উগ্ঘটিতঞ্ঞুস্স ৰসেন অপ্পং ৰা, ৰিপঞ্চিতঞ্ঞুস্স নেয্যস্স ৰা ৰসেন বহুং ৰা দেসেন্তো. ধম্মস্স কল্যাণতা চ নিয্যানিকতা চ সব্বসো অনৰজ্জভাৰেনেৰাতি আহ ‘‘অনৰজ্জমেৰ কত্ৰা’’তি.

দেসকাযত্তেন আণাদিৰিধিনা অতিসজ্জনং পবোধনং দেসনাতি সা পরিযত্তিধম্মৰসেন ৰেদিতব্বাতি আহ ‘‘দেসনায তাৰ চাতুপ্পদিকগাথাযপী’’তিআদি. নিদাননিগমানিপি সত্থু দেসনায অনুৰিধানতো তদন্তোগধানি এৰাতি আহ ‘‘নিদানং আদি, ইদমৰোচাতি পরিযোসান’’ন্তি.

সাসিতব্বপুগ্গলগতেন যথাপরাধাদিসাসিতব্বভাৰেন অনুসাসনং তদঙ্গৰিনযাদিৰসেন ৰিনযনং সাসনন্তি তং পটিপত্তিধম্মৰসেন ৰেদিতব্বন্তি আহ ‘‘সীলসমাধিৰিপস্সনা’’তিআদি. কুসলানন্তি অনৰজ্জধম্মানং সীলসমথৰিপস্সনানং সীলদিট্ঠীনঞ্চ আদিভাৰো তংমূলিকত্তা উত্তরিমনুস্সধম্মানং. অরিযমগ্গস্স অন্তদ্ৰযৰিগমেন মজ্ঝিমাপটিপদাভাৰো ৰিয সম্মাপটিপত্তিযা আরব্ভ নিব্বত্তীনং ৰেমজ্ঝতাপি মজ্ঝভাৰোতি ৰুত্তং ‘‘অত্থি, ভিক্খৰে…পে… মজ্ঝিমং নামা’’তি. ফলং পরিযোসানং নাম সউপাদিসেসতাৰসেন. নিব্বানং পরিযোসানং নাম অনুপাদিসেসতাৰসেন. ইদানি তেসং দ্ৰিন্নম্পি সাসনস্স পরিযোসানতং আগমেন দস্সেতুং ‘‘তস্মাতিহ ত্ৰ’’ন্তিআদি ৰুত্তং. ‘‘সাত্থং সব্যঞ্জন’’ন্তিআদিৰচনতো ধম্মদেসনায আদিমজ্ঝপরিযোসানং অধিপ্পেতন্তি আহ ‘‘ইধ…পে… অধিপ্পেত’’ন্তি. তস্মিং তস্মিং অত্থে কথাৰধিসদ্দপ্পবন্ধো গাথাৰসেন সুত্তৰসেন চ ৰৰত্থিতো পরিযত্তিধম্মো, সো ইধ দেসনাতি ৰুত্তো, তস্স পন অত্থো ৰিসেসতো সীলাদি এৰাতি আহ ‘‘ভগৰা হি ধম্মং দেসেন্তো…পে… দস্সেতী’’তি. তত্থ সীলং দস্সেত্ৰাতি সীলগ্গহণেন সসম্ভারং সীলং গহিতং, তথা মগ্গগ্গহণেন সসম্ভারো মগ্গোতি তদুভযৰসেন অনৰসেসতো পরিযত্তিঅত্থং পরিযাদায তিট্ঠতি. তেনাতি সীলাদিদস্সনেন. অত্থৰসেন হি ইধ দেসনায আদিকল্যাণাদিভাৰো অধিপ্পেতো. কথিকসণ্ঠিতীতি কথিকস্স সণ্ঠানং কথনৰসেন সমৰট্ঠানং.

ন সো সাত্থং দেসেতি নিয্যানত্থৰিরহতো তস্সা দেসনায. একব্যঞ্জনাদিযুত্তা ৰাতি সিথিলাদিভেদেসু ব্যঞ্জনেসু একপ্পকারেনেৰ দ্ৰিপ্পকারেনেৰ ৰা ব্যঞ্জনেন যুত্তা দমিল়ভাসা ৰিয. ৰিৰটকরণতায ওট্ঠে অফুসাপেত্ৰা উচ্চারেতব্বতো সব্বনিরোট্ঠব্যঞ্জনা ৰা কিরাতভাসা ৰিয. সব্বস্সেৰ ৰিস্সজ্জনীযযুত্ততায সব্বৰিস্সট্ঠব্যঞ্জনা ৰা যৰনভাসা ৰিয. সব্বস্সেৰ সানুসারতায সব্বনিগ্গহিতব্যঞ্জনা ৰা পারসিকাদিমিলক্খভাসা ৰিয. সব্বাপেসা ব্যঞ্জনেকদেসৰসেনেৰ পৰত্তিযা অপরিপুণ্ণব্যঞ্জনাতি কত্ৰা ‘‘অব্যঞ্জনা’’তি ৰুত্তা.

ঠানকরণানি সিথিলানি কত্ৰা উচ্চারেতব্বং অক্খরং পঞ্চসু ৰগ্গেসু পঠমততিযন্তি এৰমাদি সিথিলং. তানি অসিথিলানি কত্ৰা উচ্চারেতব্বং অক্খরং ৰগ্গেসু দুতিযচতুত্থন্তি এৰমাদি ধনিতং. দ্ৰিমত্তকালং দীঘং. একমত্তকালং রস্সং. তদেৰ লহুকং লহুকমেৰ. সংযোগপরং দীঘঞ্চ গরুকং. ঠানকরণানি নিগ্গহেত্ৰা উচ্চারেতব্বং নিগ্গহিতং. পরেন সম্বন্ধং কত্ৰা উচ্চারেতব্বং সম্বন্ধং. তথা ন সম্বন্ধং ৰৰত্থিতং. ঠানকরণানি ৰিস্সট্ঠানি কত্ৰা উচ্চারেতব্বং ৰিমুত্তং. দসধা ব্যঞ্জনবুদ্ধিযা পভেদোতি এৰং সিথিলাদিৰসেন ব্যঞ্জনবুদ্ধিযা অক্খরুপ্পাদকচিত্তস্স দসপ্পকারেন পভেদো. সব্বানি হি অক্খরানি চিত্তসমুট্ঠানানি যথাধিপ্পেতত্থব্যঞ্জনতো ব্যঞ্জনানি চ.

অমক্খেত্ৰাতি অমিলেচ্ছেত্ৰা, অৰিনাসেত্ৰা, অহাপেত্ৰাতি অত্থো. ভগৰা যমত্থং ঞাপেতুং একগাথং একৰাক্যম্পি দেসেতি, তমত্থং তায দেসনায পরিমণ্ডলপদব্যঞ্জনায এৰ দেসেতীতি আহ ‘‘পরিপুণ্ণব্যঞ্জনমেৰ কত্ৰা ধম্মং দেসেতী’’তি. ইধ কেৰলসদ্দো অনৰসেসৰাচকো, ন অৰোমিস্সতাদিৰাচকোতি আহ ‘‘সকলাধিৰচন’’ন্তি. পরিপুণ্ণন্তি সব্বসো পুণ্ণং. তং পন কিঞ্চি ঊনং ৰা অধিকং ৰা ন হোতীতি ‘‘অনূনাধিকৰচন’’ন্তি ৰুত্তং. তত্থ যদত্থং দেসিতং, তস্স সাধকত্তা অনূনতা ৰেদিতব্বা, তব্বিধুরস্স পন অসাধকত্তা অনধিকতা. সকলন্তি সব্বভাগৰন্তং. পরিপুণ্ণমেৰাতি সব্বসো পরিপুণ্ণমেৰ. তেনাহ ‘‘একদেসনাপি অপরিপুণ্ণা নত্থী’’তি. অপরিসুদ্ধা দেসনা নাম হোতি তণ্হাসংকিলেসত্তা. লোকামিসং চীৰরাদযো পচ্চযা, তত্থ অগধিতচিত্ততায লোকামিসনিরপেক্খো. হিতফরণেনাতি হিতূপসংহরণেন. মেত্তাভাৰনায মুদুহদযোতি মেত্তাভাৰনায করুণায ৰা মুদুহদযো. উল্লুম্পনসভাৰসণ্ঠিতেনাতি সকলসংকিলেসতো ৰট্টদুক্খতো চ উদ্ধরণাকারাৰট্ঠিতেন চিত্তেন, করুণাধিপ্পাযেনাতি অত্থো. তস্মাতি যস্মা সিক্খত্তযসঙ্গহং সকলং সাসনং ইধ ব্রহ্মচরিযন্তি অধিপ্পেতং, তস্মা. ব্রহ্মচরিযন্তি ইমিনা সমানাধিকরণানি সব্বপদানি যোজেত্ৰা অত্থং দস্সেন্তো ‘‘সো ধম্মং দেসেতি…পে… পকাসেতীতি এৰমেত্থ অত্থো দট্ঠব্বো’’তি আহ.

সুন্দরন্তি ভদ্দকং. ভদ্দকতা চ পস্সন্তস্স হিতসুখাৰহভাৰেন ৰেদিতব্বাতি আহ ‘‘অত্থাৰহং সুখাৰহ’’ন্তি. তত্থ অত্থাৰহন্তি দিট্ঠধম্মিকসম্পরাযিকপরমত্থসংহিতহিতাৰহং. সুখাৰহন্তি যথাৰুত্ততিৰিধসুখাৰহং. তথানুরূপানন্তি তাদিসানং. যাদিসেহি পন গুণেহি ভগৰা সমন্নাগতো, তেহি চতুপ্পমাণিকস্স লোকস্স সব্বথাপি অচ্চন্তপ্পসাদনীযো তেসং যথাভূতসভাৰত্তাতি দস্সেন্তো ‘‘যথারূপো’’তিআদিমাহ. তত্থ যথাভূত…পে… অরহতন্তি ইমিনা ধম্মপ্পমাণলূখপ্পমাণানং সত্তানং ভগৰতো পসাদাৰহতা দস্সিতা, ইতরেন ইতরেসং. দস্সনমত্তম্পি সাধু হোতীতি এত্থ কোসিযৰত্থু কথেতব্বং. উভতোপক্খিকাতি মিচ্ছাদিট্ঠিসম্মাদিট্ঠিৰসেন উভযপক্খিকা. কেরাটিকাতি সঠা.

অনেকত্থত্তা নিপাতানং যাৰঞ্চিদন্তি নিপাতসমুদাযো অধিমত্তপ্পমাণপরিচ্ছেদং দীপেতীতি আহ ‘‘অধিমত্তপ্পমাণপরিচ্ছেদৰচনমেত’’ন্তি. অধিমত্তৰিপ্পসন্নানীতি অধিকপ্পমাণেন ৰিপ্পসন্নানি. ৰিপ্পসন্নানীতি চ পকতিআকারং অতিক্কমিত্ৰা ৰিপ্পসন্নানীতি অত্থো. ননু চ চক্খাদীনং ইন্দ্রিযানং মনোৰিঞ্ঞেয্যত্তা কথং তেন তেসং ৰিপ্পসন্নতা ৰিঞ্ঞাযতীতি আহ ‘‘তস্স হী’’তিআদি. তস্সাতি ব্রাহ্মণস্স. তেসন্তি চক্খাদীনং পঞ্চন্নং ইন্দ্রিযানং. এৰম্পি মনিন্দ্রিযেন পতিট্ঠিতোকাসস্স অদিট্ঠত্তা কথং মনিন্দ্রিযস্স ৰিপ্পসন্নতা তেন ৰিঞ্ঞাযতীতি আহ ‘‘যস্মা পনা’’তিআদি. নযগ্গাহপঞ্ঞা হেসা তস্স ব্রাহ্মণস্স. মনে ৰিপ্পসন্নেযেৰ হোতি পসন্নচিত্তসমুট্ঠিতরূপসম্পদাহি এৰ চক্খাদীনং পতিট্ঠিতোকাসস্স পসন্নতাসম্ভৰতো.

জম্বোনদসুৰণ্ণং রত্তৰণ্ণমেৰ হোতীতি আহ ‘‘সুরত্তৰণ্ণস্সা’’তি. জম্বোনদসুৰণ্ণস্স ঘটিকাতি জম্বোনদসুৰণ্ণপিণ্ডং. ইমিনা নেক্খন্তি নেক্খপ্পমাণজম্বোনদসুৰণ্ণেন কতং অকতভণ্ডং ৰুত্তন্তি দস্সেতি. নেক্খন্তি ৰা অতিরেকপঞ্চসুৰণ্ণেন কতপিলন্ধনং কতভণ্ডং ৰুত্তং. তঞ্হি ঘট্টনমজ্জনক্খমং হোতীতি. সুৰণ্ণন্তি চ পঞ্চধরণস্স সমঞ্ঞা, তস্মা পঞ্চৰীসতিধরণহিরঞ্ঞৰিচিতং আভরণং ইধ নেক্খন্তি অধিপ্পেতং. জম্বোনদন্তি মহাজম্বুসাখায পৰত্তনদিযং নিব্বত্তং. তং কির রতনং রত্তং. সুৰণ্ণাকারে মহাজম্বুফলরসে ৰা পথৰিযং পৰিট্ঠে সুৰণ্ণঙ্কুরা উট্ঠহন্তি, তেন সুৰণ্ণেন কতপিলন্ধনন্তিপি অত্থো. সুপরিকম্মকতন্তি সুট্ঠু কতপরিকম্মং. সম্পহট্ঠন্তি সম্মা পহট্ঠং ঘট্টনাদিৰসেন সুকতপরিকম্মং. তেনাহ ‘‘সুৰণ্ণকার…পে… সুপরিমজ্জিতন্তি অত্থো’’তি.

ৰাল়রূপানীতি আহরিমানি ৰাল়রূপানি. ‘‘অকপ্পিযরূপাকুলো অকপ্পিযমঞ্চো পল্লঙ্কোতি সারসমাসে. রতনচিত্রন্তি ভিত্তিচ্ছেদাদিৰসেন রতনচিত্রং. রুক্খতূললতাতূলপোটকিতূলানং ৰসেন তিণ্ণং তূলানং. উদ্দলোমিযং কেচীতি সারসমাসাচরিযা উত্তরৰিহারিনো চ. তথা একন্তলোমিযং. কোসেয্যকট্টিস্সমযন্তি কোসেয্যকসটমযং. অজিনচম্মেহীতি অজিনমিগচম্মেহি. তানি কির চম্মানি সুখুমতরানি. তস্মা দুপট্টতিপট্টানি কত্ৰা সিব্বন্তি. তেন ৰুত্তং ‘‘অজিনপ্পৰেণী’’তিআদি.

নিকামলাভীতি যথিচ্ছিতলাভী. তেনাহ ‘‘ইচ্ছিতিচ্ছিতলাভী’’তি. ৰিপুললাভীতি উল়ারলাভী. কসিরন্তি হি পরিত্তং ৰুচ্চতি, তপ্পটিক্খেপেন অকসিরং উল়ারং. তেনাহ ‘‘মহন্তলাভী’’তিআদি.

লদ্ধা চ ন কপ্পন্তীতি সামঞ্ঞেন পটিসিদ্ধত্তা সব্বথা ন কপ্পতীতি কস্সচি আসঙ্কা সিযা, তন্নিৰত্তনত্থং ‘‘কিঞ্চি কিঞ্চি কপ্পতী’’তিআদিমাহ. তত্থ সুদ্ধকোসেয্যন্তি রতনপরিসিব্বনরহিতং. এত্থ চ ‘‘সুদ্ধকোসেয্যং পন ৰট্টতী’’তি ৰিনযে (মহাৰ. অট্ঠ. ২৫৪) ৰুত্তত্তা ইধাপি এত্তকমেৰ ৰুত্তং. দীঘনিকাযট্ঠকথাযং (দী. নি. অট্ঠ. ১.১৫) পন ‘‘ঠপেত্ৰা তূলিকং সব্বানেৰ গোনকাদীনি রতনপরিসিব্বিতানি ন ৰট্টন্তী’’তি ৰুত্তং. তত্থ ‘‘ঠপেত্ৰা তূলিক’’ন্তি এতেন রতনসিব্বনরহিতাপী তূলিকা ন ৰট্টতীতি দীপেতি. ৰচনতোতি এতেন ৰিনযে (চূল়ৰ. ২৯৭) ৰুত্তভাৰং দস্সেতি. একেন ৰিধানেনাতি যথাৰুত্তমেৰ ৰিধানং সন্ধায ৰদতি. যদি এৰং কস্মা ভগৰতা ‘‘লদ্ধা চ ন কপ্পন্তী’’তি সামঞ্ঞেন পটিসেধো কতোতি আহ ‘‘অকপ্পিযং পন উপাদাযা’’তিআদি.

পল্লঙ্কন্তি এত্থ পরি-সদ্দো সমন্ততোতি এতস্মিং অত্থে ৰত্ততি, তস্মা ৰামূরুং দক্খিণূরুঞ্চ সমং ঠপেত্ৰা উভো পাদে অঞ্ঞমঞ্ঞসম্বন্ধে কত্ৰা নিসজ্জা পল্লঙ্কন্তি আহ ‘‘সমন্ততো ঊরুবদ্ধাসন’’ন্তি. ঊরূনং বন্ধনৰসেন নিসজ্জা. পল্লঙ্কং আভুজিত্ৰাতি চ যথা পল্লঙ্কৰসেন নিসজ্জা হোতি, এৰং উভো পাদে আভুজে সমিঞ্জিতে কত্ৰাতি অত্থো. তং পন উভিন্নং পাদানং তথা সম্বন্ধতাকরণন্তি আহ ‘‘বন্ধিত্ৰা’’তি. উজুং কাযং পণিধাযাতি উপরিমং সরীরং উজুকং ঠপেত্ৰা অট্ঠারস পিট্ঠিকণ্টকে কোটিযা কোটিং পটিপাদেত্ৰা. এৰঞ্হি নিসিন্নস্স চম্মমংসন্হারূনি ন পণমন্তি. অথস্স যা তেসং পণমনপচ্চযা খণে খণে ৰেদনা উপ্পজ্জেয্যুং, তা ন উপ্পজ্জন্তি. তাসু অনুপ্পজ্জমানাসু চিত্তং একগ্গং হোতি, কম্মট্ঠানং ন পরিপততি, ৰুদ্ধিং ফাতিং গচ্ছতি. তেনাহ ‘‘অট্ঠারস পিট্ঠিকণ্টকে’’তিআদি. উজুং কাযং ঠপেত্ৰাতি উপরিমং কাযং উজুকং ঠপেত্ৰা, অযমেৰ ৰা পাঠো. হেট্ঠিমকাযস্স হি অনুজুকট্ঠপনং নিসজ্জাৰচনেনেৰ বোধিতন্তি. উজুং কাযন্তি এত্থ কায-সদ্দো উপরিমকাযৰিসযো.

পরিমুখন্তি এত্থ পরি-সদ্দো অভিসদ্দেন সমানত্থোতি আহ ‘‘কম্মট্ঠানাভিমুখ’’ন্তি, বহিদ্ধা পুথুত্তারম্মণতো নিৰারেত্ৰা কম্মট্ঠানংযেৰ পুরক্খত্ৰাতি অত্থো. এত্থ যথা ‘‘ৰনন্তঞ্ঞেৰ পৰিসামী’’তিআদিনা ভাৰনানুরূপং সেনাসনং দস্সিতং, এৰং ‘‘নিসীদামী’’তি ইমিনা অলীনানুদ্ধচ্চপক্খিযো সন্তো ইরিযাপথো দস্সিতো, ‘‘পল্লঙ্কং আভুজিত্ৰা’’তি ইমিনা নিসজ্জায দল়্হভাৰো, ‘‘পরিমুখং সতিং উপট্ঠপেত্ৰা’’তি ইমিনা আরম্মণপরিগ্গহূপাযো. পরিগ্গহিতনিয্যানন্তি সব্বথা গহিতাসম্মোসং পরিচ্চত্তসম্মোসং সতিং কত্ৰা, পরমসতিনেপক্কং উপট্ঠপেত্ৰাতি অত্থো. পরীতি পরিগ্গহট্ঠো ‘‘পরিণাযিকা’’তিআদীসু (ধ. স. ১৬.২০) ৰিয. মুখন্তি নিয্যানট্ঠো ‘‘সুঞ্ঞতৰিমোক্খ’’ন্তিআদীসু (পটি. ম. ১.২০৯-২১০) ৰিয. পটিপক্খতো নিগ্গমনট্ঠো হি নিয্যানট্ঠো.

চত্তারি রূপাৰচরজ্ঝানানি দিব্বভাৰাৰহত্তা দিব্বৰিহারা নাম হোন্তীতি তদাসন্নপ্পৰত্তচঙ্কমোপি তদুপচারতো দিব্বো নাম হোতীতি আহ ‘‘চত্তারি হি রূপজ্ঝানানী’’তিআদি. সমাপজ্জিত্ৰা চঙ্কমন্তস্সাতি ইদঞ্চ চঙ্কমন্তস্স অন্তরন্তরা সমাপত্তিং সমাপজ্জিত্ৰা উট্ঠাযুট্ঠায চঙ্কমনং সন্ধায ৰুত্তং. ন হি সমাপত্তিং সমাপজ্জিত্ৰা অৰুট্ঠিতেন সক্কা চঙ্কমিতুং. সমাপত্তিতো ৰুট্ঠায চঙ্কমন্তস্সপি চঙ্কমোতি ইদং পন সমাপত্তিতো ৰুট্ঠহিত্ৰা অন্তরন্তরা সমাপজ্জিত্ৰা চঙ্কমন্তস্স ৰসেন ৰুত্তং. দ্ৰীসুৰিহারেসূতি ব্রহ্মৰিহারে, অরিযৰিহারে চ. মেত্তাঝানাদযো হিতূপসংহারাদিৰসেন পৰত্তিযা ব্রহ্মভূতা সেট্ঠভূতা ৰিহারাতি ব্রহ্মৰিহারা. অনঞ্ঞসাধারণত্তা পন অরিযানং ৰিহারাতি অরিযৰিহারা, চতস্সোপি ফলসমাপত্তিযো. ইধ পন অরহত্তফলসমাপত্তিযেৰ আগতা.

পচ্চৰেক্খণায ফলসমাপত্তি কথিতা সমাপত্তিং সমাপজ্জিত্ৰা ৰুট্ঠিতস্স পচ্চৰেক্খণাসম্ভৰতো. চঙ্কমাদযোতি ফলসমাপত্তিং সমাপন্নস্সপি সমাপত্তিতো ৰুট্ঠিতস্সপি চঙ্কমট্ঠাননিসজ্জাদযো. অরিযচঙ্কমাদযো হোন্তি ন পন পচ্চৰেক্খন্তস্সাতি অধিপ্পাযো.

ৰেনাগপুরসুত্তৰণ্ণনা নিট্ঠিতা.

৪. সরভসুত্তৰণ্ণনা

৬৫. চতুত্থে গিজ্ঝা এত্থ সন্তীতি গিজ্ঝং, কূটং. তং এতস্সাতি গিজ্ঝকূটো. গিজ্ঝো ৰিযাতি ৰা গিজ্ঝং, কূটং. তং এতস্সাতি গিজ্ঝকূটো, পব্বতো. তস্মিং গিজ্ঝকূটে. তেনাহ ‘‘গিজ্ঝা ৰা’’তিআদি. অচিরপক্কন্তোতি এত্থ ন দেসন্তরপক্কমনং অধিপ্পেতং, অথ খো সাসনপক্কমনন্তি দস্সেন্তো ‘‘ইমস্মিং সাসনে পব্বজিত্ৰা’’তিআদিমাহ, তেনেৰ হি ‘‘ইমস্সা ধম্মৰিনযা’’তি ৰুত্তং. লব্ভতীতি লাভো, চতুন্নং পচ্চযানমেতং অধিৰচনং. সক্কচ্চং কাতব্বো দাতব্বোতি সক্কারো. পচ্চযা এৰ হি পণীতপণীতা সুন্দরসুন্দরা অভিসঙ্খরিত্ৰা কতা সক্কারাতি ৰুচ্চন্তি. সক্কারোতি ৰা সুন্দরকারো, পরেহি অত্তনো গারৰকিরিযা পুপ্ফাদীহি ৰা পূজা. লাভো চ সক্কারো চ লাভসক্কারা, তে নট্ঠা পহীনা এতেসন্তি নট্ঠলাভসক্কারা.

মহালাভসক্কারো উপ্পজ্জীতি তদা কির ভগৰতো মহালাভসক্কারো উপ্পজ্জি যথা তং চত্তারো অসঙ্খেয্যে পূরিতদানপারমিসঞ্চযস্স. সব্বদিসাসু হি যমকমহামেঘো ৰুট্ঠহিত্ৰা মহোঘো ৰিয সব্বপারমিযো ‘‘একস্মিং অত্তভাৰে ৰিপাকং দস্সামা’’তি সম্পিণ্ডিতা ৰিয লাভসক্কারমহোঘং নিব্বত্তযিংসু. ততো ততো অন্নপানযানৰত্থমালাগন্ধৰিলেপনাদিহত্থা খত্তিযব্রাহ্মণাদযো আগন্ত্ৰা ‘‘কহং বুদ্ধো, কহং ভগৰা, কহং দেৰদেৰো নরাসভো পুরিসসীহো’’তি ভগৰন্তং পরিযেসন্তি, সকটসতেহিপি পচ্চযে আহরিত্ৰা ওকাসং অলভমানা সমন্তা গাৰুতপ্পমাণম্পি সকটধুরেন সকটধুরং আহচ্চ তিট্ঠন্তি চেৰ অনুবন্ধন্তি চ অন্ধকৰিন্দব্রাহ্মণো ৰিয. যথা চ ভগৰতো, এৰং ভিক্খুসঙ্ঘস্সপি. ৰুত্তম্পি চেতং –

‘‘তেন খো পন সমযেন ভগৰা সক্কতো হোতি গরুকতো মানিতো পূজিতো অপচিতো লাভী চীৰরপিণ্ডপাতসেনাসনগিলানপচ্চযভেসজ্জপরিক্খারানং, ভিক্খুসঙ্ঘোপি সক্কতো হোতি…পে… পরিক্খারান’’ন্তি (উদা. ৩৮).

তথা –

‘‘যাৰতা খো পন, চুন্দ, এতরহি সঙ্ঘো ৰা গণো ৰা লোকে উপ্পন্নো, নাহং, চুন্দ, অঞ্ঞং একং সঙ্ঘম্পি সমনুপস্সামি এৰংলাভগ্গযসগ্গপ্পত্তং যথরিৰাযং, চুন্দ, ভিক্খুসঙ্ঘো’’তি (দী. নি. ৩.১৭৬).

স্ৰাযং ভগৰতো চ সঙ্ঘস্স চ উপ্পন্নো লাভসক্কারো একতো হুত্ৰা দ্ৰিন্নং মহানদীনং উদকং ৰিয অপ্পমেয্যো অহোসি, ভগৰতো পন ভিক্খুসঙ্ঘস্স চ উপ্পন্নো লাভসক্কারো ধম্মস্সপি উপ্পন্নোযেৰ. ধম্মধরানঞ্হি কতো সক্কারো ধম্মস্স কতো নাম হোতি. তেন ৰুত্তং ‘‘তিণ্ণং রতনানং মহালাভসক্কারো উপ্পজ্জী’’তি.

ৰুত্তমত্থং পাল়িযা নিদস্সেন্তো ‘‘যথাহা’’তিআদিমাহ. তত্থ সক্কতোতি সক্কারপ্পত্তো. যস্স হি চত্তারো পচ্চযে সক্কত্ৰা সুঅভিসঙ্খতে পণীতপণীতে উপনেতি, সো সক্কতো. গরুকতোতি গরুভাৰহেতূনং উত্তমগুণানং মত্থকপ্পত্তিযা অনঞ্ঞসাধারণেন গরুকারেন সব্বদেৰমনুস্সেহি পাসাণচ্ছত্তং ৰিয গরুকতো. যস্মিঞ্হি গরুভাৰং পচ্চুপট্ঠপেত্ৰা পচ্চযে দেন্তি, সো গরুকতো. মানিতোতি সম্মাপটিপত্তিযা মানিতো মনেন পিযাযিতো. তায হি ৰিঞ্ঞূনং মনাপতা. পূজিতোতি মাননাদিপূজায চেৰ চতুপচ্চযপূজায চ পূজিতো. যস্স হি সব্বমেতং পূজনঞ্চ করোন্তি, সো পূজিতো. অপচিতোতি নীচৰুত্তিকরণেন অপচিতো. সত্থারঞ্হি দিস্ৰা মনুস্সা হত্থিক্খন্ধাদীহি ওতরন্তি, মগ্গং দেন্তি, অংসকূটতো সাটকং অপনেন্তি. আসনতো ৰুট্ঠহন্তি, ৰন্দন্তীতি এৰং সো তেহি অপচিতো নাম হোতি.

অৰণ্ণং পত্থরিত্ৰাতি অৰণ্ণং তত্থ তত্থ সংকিত্তনৰসেন পত্থরিত্ৰা. আৰট্টনিমাযন্তি আৰট্টেত্ৰা গহণমাযং. আৰট্টেতি পুরিমাকারতো নিৰত্তেতি অত্তনো ৰসে ৰত্তেতি এতাযাতি আৰট্টনী, মাযা, তং আৰট্টনিমাযং ওসারেত্ৰা পরিজপ্পেত্ৰাতি অত্থো. কোটিতো পট্ঠাযাতি অন্তিমকোটিতো পট্ঠায. থদ্ধকাযেন ফরুসৰাচায তিণ্ণং রতনানং অৰণ্ণকথনং অনত্থাৰহত্তা ৰিসসিঞ্চনসদিসা হোতীতি আহ ‘‘ৰিসং সিঞ্চিত্ৰা’’তি. অঞ্ঞাতোতি আঞাতো. তেনাহ ‘‘ঞাতো’’তিআদি.

কাযঙ্গন্তি কাযমেৰ অঙ্গং, কাযস্স ৰা অঙ্গং, সীসাদি. ৰাচঙ্গন্তি ‘‘হোতু, সাধূ’’তি এৰমাদিৰাচায অৰযৰং. এককেনাতি অসহাযেন. ইমস্স পনত্থস্সাতি ‘‘চরিযং চরণকালে’’তিআদিনা ৰুত্তস্স. যতো যতো গরু ধুরন্তি যস্মিং যস্মিং ঠানে ধুরং গরু ভারিকং হোতি, অঞ্ঞে বলিবদ্দা উক্খিপিতুং ন সক্কোন্তি. যতো গম্ভীরৰত্তনীতি ৰত্তন্তি এত্থাতি ৰত্তনী, দুম্মগ্গস্সেতং নামং, যস্মিং ঠানে উদকচিক্খল্লমহন্ততায ৰা ৰিসমচ্ছিন্নতটভাৰেন ৰা মগ্গো গম্ভীরো হোতীতি অত্থো. তদাস্সু কণ্হং যুঞ্জেন্তীতি অস্সূতি নিপাতমত্তং, তদা কণ্হং যুঞ্জেন্তীতি অত্থো. যদা ধুরঞ্চ গরু হোতি মগ্গো চ গম্ভীরো, তদা অঞ্ঞে বলিবদ্দে অপনেত্ৰা কণ্হমেৰ যুঞ্জেন্তীতি ৰুত্তং হোতি. স্ৰাস্সু তং ৰহতে ধুরন্তি এত্থপি অস্সূতি নিপাতমত্তমেৰ, সো তং ধুরং ৰহতীতি অত্থো.

গেহৰেতনন্তি গেহে নিৰুট্ঠভাৰহেতু দাতব্বং. কাল়কো নাম নামেনাতি অঞ্জনৰণ্ণো কিরেস, তেনস্স ‘‘কাল়কো’’তি নামং অকংসু. কাল়কং উপসঙ্কমিত্ৰা আহাতি কাল়কো কির একদিৰসং চিন্তেসি ‘‘ময্হং মাতা দুগ্গতা মং পুত্তট্ঠানে ঠপেত্ৰা দুক্খেন পোসেতি, যংনূনাহং ভতিং কত্ৰা ইমং দুগ্গতভাৰতো মোচেয্য’’ন্তি. সো ততো পট্ঠায ভতিং উপধারেন্তো ৰিচরতি. অথ তস্মিং দিৰসে গামগোরূপেহি সদ্ধিং তত্থ সমীপে চরতি. সত্থৰাহপুত্তোপি গোসুত্তৰিত্তকো, সো ‘‘অত্থি নু খো এতেসং গুন্নং অন্তরে সকটানি উত্তারেতুং সমত্থো উসভাজানীযো’’তি উপধারযমানো বোধিসত্তং দিস্ৰা ‘‘অযং আজানীযো সক্খিস্সতি ময্হং সকটানি উত্তারেতু’’ন্তি অঞ্ঞাসি. তেন তং উপসঙ্কমিত্ৰা এৰমাহ. সো অঞ্ঞেসং…পে… গেহমেৰ অগমাসীতি তদা কির গামদারকা ‘‘কিং নামেতং কাল়কস্স গলে’’তি তস্স সন্তিকং আগচ্ছন্তি. সো তে অনুবন্ধিত্ৰা দূরতোৰ পলাপেন্তো মাতু সন্তিকং গতো. তং সন্ধাযেতং ৰুত্তং.

সাযন্হসমযন্তি সাযন্হকালে. ভুম্মত্থে এতং উপযোগৰচনং. ন হেত্থ অচ্চন্তসংযোগো সম্ভৰতি. পটিসল্লানা ৰুট্ঠিতোতি এত্থ তেহি তেহি সদ্ধিৰিহারিকঅন্তেৰাসিকউপাসকউপাসিকাদিসত্তেহি চেৰ রূপারম্মণাদিসঙ্খারেহি চ পটিনিৰত্তেত্ৰা অপসক্কিত্ৰা নিলীযনং ৰিৰেচনং কাযচিত্তেহি ততো ৰিৰিত্ততায পটিসল্লানং কাযৰিৰেকো, চিত্তৰিৰেকো চ. যো ততো দুৰিধৰিৰেকতো ৰুট্ঠিতো ভৰঙ্গপ্পত্তিযা সব্রহ্মচারীহি সমাগমেন চ অপেতো. সো পটিসল্লানা ৰুট্ঠিতো নাম হোতি. অযং পন যস্মা পটিসল্লানানং উত্তমতো ফলসমাপত্তিতো ৰুট্ঠাসি, তস্মা ‘‘ফলসমাপত্তিতো’’তি ৰুত্তং. কাযসক্খিনো ভৰিস্সামাতি নামকাযেন দেসনাসম্পটিচ্ছনৰসেন সক্খিভূতা ভৰিস্সাম. ননু চ ‘‘পঞ্ঞত্তে আসনে নিসীদী’’তি ইদং কস্মা ৰুত্তং. তিত্থিযা হি ভগৰতো পটিপক্খা, তে কস্মা তস্স আসনং পঞ্ঞাপেন্তীতি আহ ‘‘তথাগতো হী’’তিআদি.

ৰিগ্গাহিককথন্তি ৰিগ্গাহসংৰত্তনিকং সারম্ভকথং. আযাচেয্যাসীতি ৰচীভেদং কত্ৰা যাচেয্যাসি. পত্থেয্যাসীতি মনসা আসীসেয্যাসি. পিহেয্যাসীতি তস্সেৰ ৰেৰচনং. নিত্তেজতং আপন্নোতি তেজহানিযা নিত্তেজভাৰং আপন্নো, নিত্তেজভূতোতি অত্থো. ততো এৰ ভিক্খুআদযোপি সম্মুখা ওলোকেতুং অসমত্থতায পত্তক্খন্ধো, পতিতক্খন্ধোতি অত্থো. তেনাহ ‘‘ওনতগীৰো’’তি. দস্সিতধম্মেসূতি ৰুত্তধম্মেসু. ৰচনমত্তমেৰ হি তেসং, ন পন দস্সনং তাদিসস্সেৰ ধম্মস্স অভাৰতো. ভগৰতো এৰ ৰা ‘‘ইমে ধম্মা অনভিসম্বুদ্ধা’’তি পরস্স ৰচনৰসেন দস্সিতধম্মেসু. পটিচরিস্সতীতি পটিচ্ছাদনৰসে চরিস্সতি পৰত্তিস্সতি, পটিচ্ছাদনত্থো এৰ ৰা চরতি-সদ্দো অনেকত্থত্তা ধাতূনন্তি আহ ‘‘পটিচ্ছাদেস্সতী’’তি. অঞ্ঞেন ৰা অঞ্ঞন্তি পন পটিচ্ছাদনাকারদস্সনন্তি আহ ‘‘অঞ্ঞেন ৰা ৰচনেনা’’তিআদি.

তত্থ অঞ্ঞং ৰচনন্তি যং সমনুযুঞ্জন্তেন ভগৰতা পরস্স দোসৰিভাৰনং ৰচনং ৰুত্তং, তং ততো অঞ্ঞেনেৰ ৰচনেন পটিচ্ছাদেতি. ‘‘আপত্তিং আপন্নোসী’’তি চোদকেন ৰুত্তৰচনং ৰিয ‘‘কো আপন্নো, কিং আপন্নো, কিস্মিং আপন্নো, কং ভণথ, কিং ভণথা’’তিআদিৰচনেন অঞ্ঞং আগন্তুককথং আহরন্তো ‘‘ত্ৰং ইত্থন্নামং আপত্তিং আপন্নোসী’’তি পুট্ঠো ‘‘পাটলিপুত্তং গতোম্হী’’তি ৰত্ৰা পুন ‘‘ন তৰ পাটলিপুত্তগমনং পুচ্ছাম, আপত্তিং পুচ্ছামা’’তি ৰুত্তে ততো রাজগহং গতোম্হি. রাজগহং ৰা যাহি ব্রাহ্মণগেহং ৰা, আপত্তিং আপন্নোসীতি. ‘‘তত্থ মে সূকরমংসং লদ্ধ’’ন্তিআদীনি ৰদন্তো ৰিয সমনুযুঞ্জকেন ৰুত্তৰচনতো অঞ্ঞং আগন্তুককথং আহরন্তো অপনামেস্সতি, ৰিক্খেপং গমযিস্সতি. অপ্পতীতা হোন্তি তেন অতুট্ঠা অসোমনস্সিকাতি অপচ্চযো, দোমনস্সেতং অধিৰচনং. নেৰ অত্তনো, ন পরেসং হিতং অভিরাধযতীতি অনভিরদ্ধি, দোমনস্সমেৰ. তেনেৰাহ ‘‘অপচ্চযেন দোমনস্সং ৰুত্ত’’ন্তি.

যস্স খো পন তে অত্থায ধম্মো দেসিতোতি এত্থ ধম্ম-সদ্দেন চতুসচ্চধম্মো ৰুত্তোতি আহ ‘‘যস্স মগ্গস্স ৰা ফলস্স ৰা অত্থাযা’’তি. চতুসচ্চধম্মো হি মগ্গফলাধিগমত্থায দেসীযতি. ন নিগ্গচ্ছতীতি ন পৰত্তেতি. নন্তি নং ধম্মং. ইদানি ‘‘যস্স খো পন তে অত্থায ধম্মো দেসিতো’’তি এত্থ ধম্ম-সদ্দেন পটিপত্তিধম্মো দস্সিতো, ন পন চতুসচ্চধম্মোতি অধিপ্পাযেন অত্থৰিকপ্পং দস্সেন্তো ‘‘অথ ৰা’’তিআদিমাহ. পঞ্চ ধম্মাতি গম্ভীরঞাণচরিযভূতানং খন্ধাদীনং উগ্গহসৰনধারণপরিচযযোনিসোমনসিকারে সন্ধাযাহ. তক্করস্স সম্মা দুক্খক্খযাযাতি এত্থ সম্মাসদ্দো উভযত্থাপি যোজেতব্বো ‘‘সম্মা তক্করস্স সম্মা দুক্খক্খযাযা’’তি. যো হি সম্মা ধম্মং পটিপজ্জতি, তস্সেৰ সম্মা দুক্খক্খযো হোতীতি. যো পন ৰুত্তনযেন তক্করো, তস্স নিয্যানং অত্থতো ধম্মস্সেৰ নিয্যানন্তি তপ্পটিক্খেপেন ‘‘সো ধম্মো…পে… ন নিয্যাতি ন নিগ্গচ্ছতী’’তি আহ.

যদি তিরচ্ছানসীহস্স নাদো সব্বতিরচ্ছানএকচ্চমনুস্সামনুস্সনাদতো সেট্ঠত্তা সেট্ঠনাদো, কিমঙ্গং পন তথাগতসীহস্স নাদোতি আহ ‘‘সীহনাদন্তি সেট্ঠনাদ’’ন্তি. যদি ৰা তিরচ্ছানসীহনাদস্স সেট্ঠনাদতা নিব্ভযতায অপ্পটিসত্তুতায ইচ্ছিতা, তথাগতসীহনাদস্সেৰ অযমত্থো সাতিসযোতি আহ ‘‘অভীতনাদং অপ্পটিনাদ’’ন্তি. ‘‘অট্ঠানমেতং অনৰকাসো’’তিআদিনা (ম. নি. ৩.১২৯; অ. নি. ১.২৬৮-২৭১) হি যো অত্থো ৰুত্তো, তস্স ভূততায অযং নাদো সেট্ঠনাদো নাম হোতি উত্তমনাদো. ভূতত্থো হি উত্তমত্থোতি. ইমমত্থং পন ৰদন্তস্স ভগৰতো অঞ্ঞতো ভযং ৰা আসঙ্কা ৰা নত্থীতি অভীতনাদো নাম হোতি. অভূতঞ্হি ৰদতো কুতোচি ভযং ৰা আসঙ্কা ৰা সিযা, এৰং পন ৰদন্তং ভগৰন্তং কোচি উট্ঠহিত্ৰা পটিবাহিতুং সমত্থো নাম নত্থীতি অযং নাদো অপ্পটিনাদো নাম হোতি.

সমন্ততো নিগ্গণ্হনৰসেন তোদনং ৰিজ্ঝনং সন্নিতোদকং, সম্মা ৰা নিতুদন্তি পীল়েন্তি এতেনাতি সন্নিতোদকং. ৰাচাযাতি চ পচ্চত্তে করণৰচনং. তেনাহ ‘‘ৰচনপতোদেনা’’তি. সঞ্জম্ভরিমকংসূতি সমন্ততো সম্ভরিতং অকংসু, সব্বে পরিব্বাজকা ৰাচাতোদনেহি তুদিংসূতি অত্থো. তেনাহ ‘‘সম্ভরিতং…পে… ৰিজ্ঝিংসূ’’তি. সিঙ্গালকংযেৰাতি সিঙ্গালমেৰ, ‘‘সেগালকংযেৰা’’তিপি পাঠো. তস্সেৰাতি সিঙ্গালরৰস্সেৰ. অথ ৰা ভেরণ্ডকংযেৰাতি ভেদণ্ডসকুণিসদিসংযেৰাতি অত্থো. ভেদণ্ডং নাম একো পক্খী দ্ৰিমুখো, তস্স কির সদ্দো অতিৰিয ৰিরূপো অমনাপো. তেনাহ ‘‘অপিচ ভিন্নস্সরং অমনাপসদ্দং নদতী’’তি. সেসমেত্থ উত্তানমেৰ.

সরভসুত্তৰণ্ণনা নিট্ঠিতা.

৫. কেসমুত্তিসুত্তৰণ্ণনা

৬৬. পঞ্চমে কেসমুত্তং নিৰাসো এতেসন্তি কেসমুত্তিযাতি আহ ‘‘কেসমুত্তনিগমৰাসিনো’’তি. অট্ঠৰিধপানকানীতি অম্বপানাদিঅট্ঠৰিধানি পানানি.

‘‘মা অনুস্সৰেনা’’তিআদীসু পন একো দহরকালতো পট্ঠায এৰং অনুস্সৰো অত্থি, এৰং চিরকালকতায অনুস্সুতিযা লব্ভমানং কথমিদং অঞ্ঞথা সিযা, তস্মা ভূতমেতন্তি অনুস্সৰেন গণ্হাতি, তথা গহণং পটিক্খিপন্তো ‘‘মা অনুস্সৰেনা’’তি আহ. অনু অনু সৰনং অনুস্সৰো. অপরো ‘‘অম্হাকং পিতুপিতামহাদিৰুদ্ধানং উপদেসপরম্পরায ইদমাভতং, এৰং পরম্পরাভতকথং নাম ন অঞ্ঞথা সিযা, তস্মা ভূতমেত’’ন্তি গণ্হাতি, তং পটিক্খিপন্তো ‘‘মা পরম্পরাযা’’তি আহ. একো কেনচি কিস্মিঞ্চি ৰুত্তমত্তে ‘‘এৰং কির এত’’ন্তি গণ্হাতি, তং নিসেধেন্তো ‘‘মা ইতিকিরাযা’’তি আহ. পিটকং গন্থো সম্পদীযতি এতস্সাতি পিটকসম্পদানং, গন্থস্স উগ্গণ্হনকো. তেন পিটকউগ্গণ্হনকভাৰেন একচ্চো তাদিসং গন্থং পগুণং কত্ৰা তেন তং সমেন্তং সমেতি, তস্মা ‘‘ভূতমেত’’ন্তি গণ্হাতি, তং সন্ধাযেস পটিক্খেপো ‘‘মা পিটকসম্পদানেনা’’তি, অত্তনো উগ্গহগন্থসম্পত্তিযা মা গণ্হিত্থাতি ৰুত্তং হোতি. সমেতন্তি সংগতং.

কোচি কঞ্চি ৰিতক্কেন্তো ‘‘এৰমেৰ তেন ভৰিতব্ব’’ন্তি কেৰলং অত্তনো সঙ্কপ্পৰসেন ‘‘ভূতমিদ’’ন্তি গণ্হাতি, তং সন্ধাযেতং ৰুত্তং ‘‘মা তক্কহেতূ’’তি. অঞ্ঞো ‘‘ইমায যুত্তিযা ভূতমিদ’’ন্তি কেৰলং অনুমানতো নযগ্গাহেন গণ্হাতি, তং পটিক্খিপন্তো ‘‘মা নযহেতূ’’তি আহ. কস্সচি ‘‘এৰমেতং সিযা’’তি পরিকপ্পেন্তস্স একং কারণং উপট্ঠাতি, সো ‘‘অত্থেত’’ন্তি অত্তনো পরিকপ্পিতাকারেন গণ্হাতি, তং পটিসেধেন্তো ‘‘মা আকারপরিৰিতক্কেনা’’তি আহ. অপরস্স চিন্তযতো যথাপরিকপ্পিতং কঞ্চি অত্থং ‘‘এৰমেতং ন অঞ্ঞথা’’তি অভিনিৰিসন্তস্স একা দিট্ঠি উপ্পজ্জতি. যা যস্স তং কারণং নিজ্ঝাযন্তস্স পচ্চক্খং ৰিয নিরূপেত্ৰা চিন্তেন্তস্স খমতি. সো ‘‘অত্থেত’’ন্তি দিট্ঠিনিজ্ঝানক্খন্তিযা গণ্হাতি, তং সন্ধাযাহ ‘‘মা দিট্ঠিনিজ্ঝানক্খন্তিযা’’তি.

অকুসলৰেরস্সাতি পাণাতিপাতাদিপঞ্চৰিধং ৰেরং সন্ধায ৰদতি. কোধো নাম চেতসো দুক্খন্তি আহ ‘‘কোধচিত্তস্স অভাৰেনা’’তি. কিলেসস্সাতি চিত্তং ৰিবাধেন্তস্স উপতাপেন্তস্স উদ্ধচ্চকুক্কুচ্চাদিকিলেসস্স. সেসমেত্থ উত্তানমেৰ.

কেসমুত্তিসুত্তৰণ্ণনা নিট্ঠিতা.

৬. সাল়্হসুত্তৰণ্ণনা

৬৭. ছট্ঠে পাতো অসিতব্বভোজনং পাতরাসং, ভুত্তং পাতরাসং এতেসন্তি ভুত্তপাতরাসা. দাসা নাম অন্তোজাতা ৰা ধনক্কীতা ৰা করমরানীতা ৰা সযং ৰা দাসব্যং উপগতা. ভত্তৰেতনভতা কম্মকারা নাম.

নিচ্ছাতোতি এত্থ ছাতং ৰুচ্চতি তণ্হা জিঘচ্ছাহেতুতায, সা অস্স নত্থীতি নিচ্ছাতো. তেনাহ ‘‘নিত্তণ্হো’’তি. অব্ভন্তরে সন্তাপকরানং কিলেসানন্তি অত্তনো সন্তানে দরথপরিল়াহজননেন সন্তাপনকিলেসানং. অন্তোতাপনকিলেসানং অভাৰা সীতো সীতলো ভূতো জাতোতি সীতিভূতো. তেনাহ ‘‘সীতলীভূতো’’তি. মগ্গফলনিব্বানসুখানি ৰা পটিসংৰেদেতীতি সুখপ্পটিসংৰেদী. সেসং সুৰিঞ্ঞেয্যমেৰ.

সাল়্হসুত্তৰণ্ণনা নিট্ঠিতা.

৭. কথাৰত্থুসুত্তৰণ্ণনা

৬৮. সত্তমে কথাৰত্থূনীতি কথায পৰত্তিট্ঠানানি. যস্মা তেহি ৰিনা কথা ন পৰত্ততি, তস্মা ‘‘কথাকারণানী’’তি ৰুত্তং. অততি সততি সততং গচ্ছতি পৰত্ততীতি অদ্ধা, কালোতি আহ ‘‘অতীতমদ্ধানং নাম কালোপি ৰত্ততী’’তি. ধম্মপ্পৰত্তিমত্ততায হি পরমত্থতো অৰিজ্জমানোপি কালো তস্সেৰ ধম্মস্স পৰত্তিঅৰত্থাৰিসেসং উপাদায তেনেৰ ৰোহারেন অতীতোতিআদিনা ৰোহরীযতি, অতীতাদিভেদো চ নামাযং নিপ্পরিযাযতো ধম্মানংযেৰ হোতি, ন কালস্সাতি আহ ‘‘খন্ধাপি ৰত্তন্তী’’তি. যথাৰুত্তমত্থং ইতরেসু দ্ৰীসু অতিদিসতি ‘‘অনাগতপচ্চুপ্পন্নেসুপি এসেৰ নযো’’তি. অতীতমদ্ধানন্তিআদীসু চ দ্ৰে পরিযাযা সুত্তন্তপরিযাযো, অভিধম্মপরিযাযো চ. সুত্তন্তপরিযাযেন পটিসন্ধিতো পুব্বে অতীতো অদ্ধা নাম, চুতিতো পচ্ছা অনাগতো অদ্ধা নাম, সহ চুতিপটিসন্ধীতি তদন্তরং পচ্চুপ্পন্নো অদ্ধা নাম. অভিধম্মপরিযাযেন তীসু খণেসু উপ্পাদতো পুব্বে অতীতো অদ্ধা নাম, উপ্পাদতো উদ্ধং অনাগতো অদ্ধা নাম, খণত্তযং পচ্চুপ্পন্নো অদ্ধা নাম. তত্থাযং সুত্তন্তদেসনাতি সুত্তন্তপরিযাযেনেৰ অতীতাদিৰিসযং কথং দস্সেন্তো ‘‘অতীতে কস্সপো নামা’’তিআদিমাহ.

একংসেনেৰ ব্যাকাতব্বো ৰিস্সজ্জেতব্বোতি একংসব্যাকরণীযো. ‘‘চক্খু অনিচ্চ’’ন্তি পঞ্হে উত্তরপদাৰধারণং সন্ধায ‘‘একংসেনেৰ ব্যাকাতব্ব’’ন্তি ৰুত্তং নিচ্চতায লেসস্সপি তত্থ অভাৰতো, পুরিমপদাৰধারণে পন ৰিভজ্জব্যাকরণীযতায. তেনাহ ‘‘অনিচ্চং নাম চক্খূতি পুট্ঠেন পনা’’তিআদি. চক্খুসোতে ৰিসেসত্থসামঞ্ঞত্থানং অসাধারণভাৰতো দ্ৰিন্নং তেসং সদিসচোদনা পটিচ্ছন্নমুখেনেৰ ব্যাকরণীযা পটিক্খেপৰসেন অনুঞ্ঞাতৰসেন চ ৰিস্সজ্জিতব্বতোতি আহ ‘‘যথা চক্খু, তথা সোতং…পে… অযং পটিপুচ্ছাব্যাকরণীযো পঞ্হো’’তি. তং জীৰং তং সরীরন্তি জীৰসরীরানং অনঞ্ঞতাপঞ্হে যস্স যেন অনঞ্ঞতা চোদিতা, সো এৰ পরমত্থতো নুপলব্ভতীতি চ ঝানত্তযস্স মেত্তেয্যতাকিত্তনসদিসোতি অব্যাকাতব্বতায ঠপনীযো ৰুত্তো. এৰরূপো হি পঞ্হো তিধা অৰিস্সজ্জনীযত্তা ব্যাকরণং অকত্ৰা ঠপেতব্বো.

তিট্ঠতি এত্থ ফলং তদাযত্তৰুত্তিতাযাতি ঠানং, কারণন্তি আহ ‘‘কারণাকারণে’’তি. যুত্তেন কারণেনাতি অনুরূপেন কারণেন. পহোতীতি নিগ্গণ্হিতুং সমত্থো হোতি. সস্সতৰাদিভাৰমেৰ দীপেতীতি অত্তনা গহিতে উচ্ছেদৰাদে দোসং দিস্ৰা অত্তনোপি সস্সতৰাদিভাৰমেৰ দীপেতি. পুগ্গলৰাদিম্হীতি ইমিনা ৰচ্ছকুত্তিযৰাদিং দস্সেতি. পঞ্হং পুচ্ছন্তেহি পটিপজ্জিতব্বা পটিপদা পঞ্হপুচ্ছনকানং ৰত্তং.

পটিচরতীতি পটিচ্ছাদনৰসেন চরতি পৰত্ততি. পটিচ্ছাদনত্থো এৰ ৰা চরতিসদ্দো অনেকত্থত্তা ধাতূনন্তি আহ ‘‘পটিচ্ছাদেতী’’তি. অঞ্ঞেনঞ্ঞন্তি পন পটিচ্ছাদনাকারদস্সনন্তি আহ ‘‘অঞ্ঞেন ৰচনেনা’’তিআদি. তত্থ অঞ্ঞেন ৰচনেনাতি যং চোদকেন চুদিতকস্স দোসৰিভাৰনং ৰচনং ৰুত্তং, তং ততো অঞ্ঞেন ৰচনেন পটিচ্ছাদেতি. যো হি ‘‘আপত্তিং আপন্নোসী’’তি ৰুত্তে ‘‘কো আপন্নো, কিং আপন্নো, কিস্মিং আপন্নো, কং ভণথ, কিং ভণথা’’তি ৰদতি. ‘‘এৰরূপং কিঞ্চি তযা দিট্ঠ’’ন্তি ৰুত্তে ‘‘ন সুণামী’’তি সোতং ৰা উপনেতি, অযং অঞ্ঞেনঞ্ঞং পটিচরতি নাম. ‘‘কো আপন্নো’’তিআদিনা হি চোদনং অৰিস্সজ্জেত্ৰাৰ ৰিক্খেপাপজ্জনং অঞ্ঞেনঞ্ঞং পটিচরণং, বহিদ্ধা কথাপনামনং ৰিস্সজ্জেত্ৰাতি অযমেতেসং ৰিসেসো. তেনেৰাহ ‘‘আগন্তুককথং ওতারেন্তো’’তিআদি. তত্থ অপনামেতীতি ৰিক্খেপেতি. তত্রাতি তস্মিং বহিদ্ধাকথায অপনামনে.

উপনিসীদতি ফলং এত্থাতি কারণং উপনিসা, উপেচ্চ নিস্সযতীতি ৰা উপনিসা, সহ উপনিসাযাতি সউপনিসোতি আহ ‘‘সউপনিস্সযো সপচ্চযো’’তি.

ওহিতসোতোতি অনঞ্ঞৰিহিতত্তা ধম্মস্সৰনায অপনামিতসোতো. ততো এৰ তদত্থং ঠপিতসোতো. কুসলধম্মন্তি অরিযমগ্গো অধিপ্পেতোতি আহ ‘‘অরিযমগ্গ’’ন্তি.

কথাৰত্থুসুত্তৰণ্ণনা নিট্ঠিতা.

৮. অঞ্ঞতিত্থিযসুত্তৰণ্ণনা

৬৯. অট্ঠমে ভগৰা মূলং কারণং এতেসং যাথাৰতো অধিগমাযাতি ভগৰংমূলকা. তেনাহ ‘‘ভগৰন্তঞ্হি নিস্সায মযং ইমে ধম্মে আজানাম পটিৰিজ্ঝামা’’তি. অম্হাকং ধম্মাতি তেহি অত্তনা অধিগন্তব্বতায ৰুত্তং. সেৰিতব্বাসেৰিতব্বানঞ্হি যাথাৰতো অধিগমঞ্ঞাণানি অধিগচ্ছনকসম্বন্ধীনি, তানি চ সম্মাসম্বুদ্ধমূলকানি অনঞ্ঞৰিসযত্তা. তেনাহ ‘‘পুব্বে কস্সপসম্মাসম্বুদ্ধেনা’’তিআদি. ইমে ধম্মাতি ইমে ঞাণধম্মা. আজানামাতি অভিমুখং পচ্চক্খতো জানাম. পটিৰিজ্ঝামাতি তস্সেৰ ৰেৰচনং, অধিগচ্ছামাতি অত্থো. ভগৰা নেতা এতেসন্তি ভগৰংনেত্তিকা. নেতাতি সেৰিতব্বধম্মে ৰেনেয্যসন্তানং পাপেতা. ৰিনেতাতি অসেৰিতব্বধম্মে ৰেনেয্যসন্তানতো অপনেতা. তদঙ্গৰিনযাদিৰসেন ৰা ৰিনেতা. অথ ৰা যথা অলমরিযঞাণদস্সনৰিসেসো হোতি, এৰং ৰিসেসতো নেতা. অনুনেতাতি ‘‘ইমে ধম্মা সেৰিতব্বা, ইমে ন সেৰিতব্বা’’তি উভযসম্পাপনাপনযনত্থং পঞ্ঞাপেতা. তেনাহ ‘‘যথাসভাৰতো’’তিআদি.

পটিসরন্তি এত্থাতি পটিসরণং, ভগৰা পটিসরণং এতেসন্তি ভগৰংপটিসরণা. আপাথং উপগচ্ছন্তা হি ভগৰা পটিসরণং সমোসরণট্ঠানং. তেনাহ ‘‘চতুভূমকধম্মা’’তিআদি. পটিসরতি সভাৰসম্পটিৰেধৰসেন পচ্চেকং উপগচ্ছতীতি ৰা পটিসরণং, ভগৰা পটিসরণং এতেসন্তি ভগৰংপটিসরণা. পটিসরতি পটিৰিজ্ঝতীতি ৰা পটিসরণং, তস্মা পটিৰিজ্ঝনৰসেন ভগৰা পটিসরণং এতেসন্তি ভগৰংপটিসরণা. তেনাহ ‘‘অপিচা’’তিআদি. পটিৰেধৰসেনাতি পটিৰিজ্ঝিতব্বতাৰসেন. অসতিপি মুখে অত্থতো এৰং ৰদন্তো ৰিয হোতীতি আহ ‘‘ফস্সো আগচ্ছতি অহং ভগৰা কিন্নামো’’তি. ফস্সো ঞাণস্স আপাথং আগচ্ছন্তোযেৰ হি অত্তনো ‘‘অহং কিন্নামো’’তি নামং পুচ্ছন্তো ৰিয, ভগৰা চস্স নামং করোন্তো ৰিয হোতি.

পটিভাতূতি এত্থ পটিসদ্দাপেক্খায ‘‘ভগৰন্ত’’ন্তি উপযোগৰচনং, অত্থো পন সামিৰচনৰসেনেৰ ৰেদিতব্বোতি দস্সেন্তো আহ ‘‘ভগৰতো’’তি. পটিভাতূতি চ ভাগো হোতু. ভগৰতো হি এস ভাগো, যদিদং ধম্মস্স দেসনা, অম্হাকং পন ভাগো সৰনন্তি অধিপ্পাযো. এৰঞ্হি সদ্দলক্খণেন সমেতি. কেচি পন পটিভাতূতি পদস্স দিস্সতূতি অত্থং ৰদন্তি, ঞাণেন দিস্সতু, দেসীযতূতি ৰা অত্থো. উপট্ঠাতূতি ঞাণস্স পচ্চুপতিট্ঠতু. পাল়িযং কো অধিপ্পযাসোতি এত্থ কো অধিকপ্পযোগোতি অত্থো.

লোকৰজ্জৰসেনাতি লোকিযজনেহি পকতিযা গরহিতব্বৰজ্জৰসেন. ৰিপাকৰজ্জৰসেনাতি ৰিপাকস্স অপাযসংৰত্তনিকৰজ্জৰসেন. কথন্তিআদিনা উভযৰজ্জৰসেনপি অপ্পসাৰজ্জতায ৰিসযং দস্সেতি. সেসমেত্থ সুৰিঞ্ঞেয্যমেৰ.

অঞ্ঞতিত্থিযসুত্তৰণ্ণনা নিট্ঠিতা.

৯. অকুসলমূলসুত্তৰণ্ণনা

৭০. নৰমে লুব্ভতীতি লোভো. দুস্সতীতি দোসো. মুয্হতীতি মোহো. লোভাদীনি পনেতানি অসহজাতানং পাণাতিপাতাদীনং কেসঞ্চি অকুসলানং উপনিস্সযপচ্চযট্ঠেন, সহজাতানং অদিন্নাদানাদীনং কেসঞ্চি সম্পযুত্তা হুত্ৰা উপ্পাদকট্ঠেন, সযঞ্চ অকুসলানীতি সাৰজ্জদুক্খৰিপাকট্ঠেনাতি আহ ‘‘অকুসলানং মূলানি, অকুসলানি চ তানি মূলানী’’তি. ৰুত্তম্পি চেতং ‘‘রত্তো খো, আৰুসো, রাগেন অভিভূতো পরিযাদিন্নচিত্তো পাণম্পি হনতী’’তিআদি. যদপীতি লিঙ্গৰিপল্লাসেন ৰুত্তন্তি আহ ‘‘যোপি, ভিক্খৰে, লোভো’’তি. তদপীতি এত্থাপি এসেৰ নযোতি আহ ‘‘সোপি অকুসলমূল’’ন্তি. ৰিনাপি লিঙ্গৰিপল্লাসেন অত্থযোজনং দস্সেন্তো ‘‘অকুসলমূলং ৰা’’তিআদিমাহ. সব্বত্থাতি ‘‘যদপি, ভিক্খৰে, দোসো, তদপি অকুসলমূল’’ন্তিআদীসু. অভিসঙ্খরোতীতি এত্থ আযূহতীতি অত্থং ৰত্ৰা তঞ্চ আযূহনং পচ্চযসমৰাযসিদ্ধিতো সম্পিণ্ডনং রাসিকরণং ৰিয হোতীতি আহ ‘‘সম্পিণ্ডেতি রাসিং করোতী’’তি.

পাল়িযং ‘‘ৰধেনা’’তিআদীসু ৰধেনাতি মারণেন ৰা পোথনেন ৰা. ৰধসদ্দো হি হিংসনত্থো ৰিহেঠনত্থো চ হোতি. বন্ধনেনাতি অদ্দুবন্ধনাদিনা. জানিযাতি ধনজানিযা, ‘‘সতং গণ্হথ, সহস্সং গণ্হথা’’তি এৰং পৰত্তিতদণ্ডেনাতি অত্থো. গরহাযাতি পঞ্চসিখমুণ্ডককরণং, গোমযসিঞ্চনং, গীৰায কুরণ্ডকবন্ধনন্তি এৰমাদীনি কত্ৰা গরহপাপনেন. তত্থ পঞ্চসিখমুণ্ডককরণং নাম কাকপক্খকরণং. গোমযসিঞ্চনং সীসেন কণোদকাৰসেচনং. কুরণ্ডকবন্ধনং গদ্দুলবন্ধনং.

কালস্মিং ন ৰদতীতি যুত্তকালে ন ৰদতি, ৰত্তব্বকালস্স পুব্বে ৰা পচ্ছা ৰা অযুত্তকালে ৰত্তা হোতি. অভূতৰাদীতি যং নত্থি, তস্স ৰত্তা. তেনাহ ‘‘ভূতং ন ৰদতী’’তি. অত্থং ন ৰদতীতি কারণং ন ৰদতি, অকারণনিস্সিতং নিপ্ফলং ৰত্তা হোতি. ধম্মং ন ৰদতীতি সভাৰং ন ৰদতি, অসভাৰং ৰত্তা অযথাৰাদীতি অত্থো. ৰিনযং ন ৰদতীতি সংৰরৰিনযং ন ৰদতি, ন সংৰরৰিনযপ্পটিসংযুত্তস্স ৰত্তা হোতি, অত্তনো সুণন্তস্স চ ন সংৰরৰিনযাৰহস্স ৰত্তাতি অত্থো.

অতচ্ছন্তি অভূতত্থং. তেনাহ ‘‘ইতরং তস্সেৰ ৰেৰচন’’ন্তি. অথ ৰা অভূতন্তি অসন্তং অৰিজ্জমানং. অতচ্ছন্তি অতথাকারং.

পুঞ্ঞকম্মতো এতি উপ্পজ্জতীতি অযো, ৰড্ঢি. তপ্পটিক্খেপেন অনযো, অৰড্ঢীতি আহ ‘‘অনযং আপজ্জতীতি অৰড্ঢিং আপজ্জতী’’তি. মালুৰাসিপাটিকা নাম দীঘসণ্ঠানং মালুৰাপক্কং, মালুৰাফলপোট্ঠলিকাতি অত্থো. ফলিতাযাতি আতপেন সুস্সিত্ৰা ভিন্নায. ৰটরুক্খাদীনং মূলেতি ৰটরুক্খাদীনং সমীপে. সকভাৰেন সণ্ঠাতুং ন সক্কোন্তীতি কস্মা ন সক্কোন্তি? ভৰনৰিনাসভযা. রুক্খমূলে পতিতমালুৰাবীজতো হি লতা উপ্পজ্জিত্ৰা রুক্খং অভিরুহতি. সা মহাপত্তা চেৰ বহুপত্তা চ মহাকোলিরপত্তসণ্ঠানেহি ততো চ মহন্ততরেহি সাখাৰিটপন্তরেহি পত্তেহি সমন্নাগতা. অথ নং রুক্খং মূলতো পট্ঠায ৰিনন্ধমানা সব্বৰিটপানি সঞ্ছাদেত্ৰা মহন্তং ভারং জনেত্ৰা তিট্ঠতি, সা ৰাতে ৰাযন্তে দেৰে ৰা ৰস্সন্তে ওঘনহেট্ঠাগতা ওলম্বনহেতুভূতং ঘনভাৰং জনেত্ৰা তস্স রুক্খস্স সব্বসাখং ভিজ্জতি, ভূমিযং নিপাতেতি. ততো তস্মিং রুক্খে পতিট্ঠিতৰিমানং ভিজ্জতি ৰিনস্সতি. ইতি তা দেৰতাযো ভৰনৰিনাসভযা সকভাৰেন সণ্ঠাতুং ন সক্কোন্তি. এত্থ চ যং সাখট্ঠকৰিমানং হোতি, তং সাখাসু ভিজ্জমানাসু তত্থ তত্থেৰ ভিজ্জিত্ৰা সব্বসাখাসু ভিন্নাসু সব্বং ভিজ্জতি, রুক্খট্ঠকৰিমানং পন যাৰ রুক্খস্স মূলমত্তম্পি তিট্ঠতি, তাৰ ন নস্সতীতি ৰেদিতব্বং. তত্থ তত্থ পলুজ্জিত্ৰাতি তত্থ তত্থ ভিজ্জিত্ৰা. সেসমেত্থ সুৰিঞ্ঞেয্যমেৰ.

অকুসলমূলসুত্তৰণ্ণনা নিট্ঠিতা.

১০. উপোসথসুত্তৰণ্ণনা

৭১. দসমে তদহূতি এত্থ তস্মিং অহনীতি অত্থোতি আহ ‘‘তস্মিং অহু উপোসথে’’তি. উপৰসন্তি এত্থাতি উপোসথো, উপোসথদিৰসো. উপৰসন্তীতি চ সীলেন ৰা অনসনেন ৰা খীরসাযনাদিৰিধিনা ৰা উপেতা হুত্ৰা ৰসন্তীতি অত্থো. উপোসথদিৰসে হি সাসনিকা সীলেন, বাহিরকা সব্বসো আহারস্স অভুঞ্জনেন খীরসাযনমধুসাযনাদিৰিধিনা ৰা উপেতা হুত্ৰা ৰিহরন্তি. সো পনেস উপোসথদিৰসো অট্ঠমিচাতুদ্দসিপন্নরসিভেদেন তিৰিধো, তস্মা সেসদ্ৰযনিৰারণত্থং ‘‘পন্নরসিকউপোসথদিৰসে’’তি ৰুত্তং. ৰৰস্সগ্গত্থেতি ৰচসাযত্থে. দিৰসদ্দো দিৰাসদ্দো ৰিয দিৰসপরিযাযো, তস্স ৰিসেসনভাৰেন ৰুচ্চমানো দিৰাসদ্দো সৰিসেসেন দীপেতীতি আহ ‘‘দিৰসস্স দিৰা, মজ্ঝন্হিকে কালেতি অত্থো’’তি. পটিচ্ছাপেত্ৰাতি সম্পটিচ্ছনং কারেত্ৰা. ৰিপাকফলেনাতি সদিসফলেন. ন মহপ্ফলো হোতি মনোদুচ্চরিতদুস্সীল্যেন উপক্কিলিট্ঠভাৰতো. ৰিপাকানিসংসেনাতি উদ্রযফলেন. ৰিপাকোভাসেনাতি পটিপক্খৰিগমজনিতেন সভাৰসঙ্খাতেন ৰিপাকোভাসেন. ন মহাওভাসো অপরিসুদ্ধভাৰতো. ৰিপাকৰিপ্ফারস্সাতি ৰিপাকৰেপুল্লস্স.

নাহং ক্ৰচনীতিআদিৰচনস্স মিচ্ছাভিনিৰেসৰসেন পৰত্তত্তা ‘‘ইদং তস্স মুসাৰাদস্মিং ৰদামী’’তি পাল়িযং ৰুত্তং, চতুকোটিকসুঞ্ঞতাদস্সনৰসেন পৰত্তং পন অরিযদস্সনমেৰাতি ন তত্থ মুসাৰাদো. ৰুত্তঞ্হেতং –

‘‘পুন চপরং, ভিক্খৰে, অরিযসাৰকো ইতি পটিসঞ্চিক্খতি ‘নাহং ক্ৰচনি, কস্সচি কিঞ্চনতস্মিং, ন চ মম ক্ৰচনি, কিস্মিঞ্চি কিঞ্চনতত্থী’’’তিআদি (ম. নি. ৩.৭০).

এত্থ হি চতুকোটিকসুঞ্ঞতা কথিতা. কথং? অরিযো (ৰিসুদ্ধি. ২.৭৬০; ম. নি. অট্ঠ. ৩.৭০) হি নাহং ক্ৰচনীতি ক্ৰচি অত্তানং ন পস্সতি, কস্সচি কিঞ্চনতস্মিন্তি অত্তনো অত্তানং কস্সচি পরস্স কিঞ্চনভাৰে উপনেতব্বং ন পস্সতি, ভাতিট্ঠানে ভাতরং, সহাযট্ঠানে সহাযং, পরিক্খারট্ঠানে পরিক্খারং মঞ্ঞিত্ৰা উপনেতব্বং ন পস্সতীতি অত্থো. ন চ মম ক্ৰচনীতি এত্থ মম-সদ্দং তাৰ ঠপেত্ৰা ক্ৰচনি পরস্স চ অত্তানং ক্ৰচি ন পস্সতীতি অযমত্থো. ইদানি মম-সদ্দং আহরিত্ৰা ‘‘মম কিস্মিঞ্চি কিঞ্চনতত্থী’’তি সো পরস্স অত্তানং ‘‘মম কিস্মিঞ্চি কিঞ্চনভাৰেন অত্থী’’তি ন পস্সতি, অত্তনো ভাতিকট্ঠানে ভাতরং, সহাযট্ঠানে সহাযং, পরিক্খারট্ঠানে পরিক্খারন্তি কিস্মিঞ্চি ঠানে পরস্স অত্তানং ইমিনা কিঞ্চনভাৰেন উপনেতব্বং ন পস্সতীতি অত্থো. এৰমযং যস্মা নেৰ কত্থচি অত্তানং পস্সতি, ন তং পরস্স কিঞ্চনভাৰে উপনেতব্বং পস্সতি. ন কত্থচি পরস্স অত্তানং পস্সতি, ন পরস্স অত্তানং অত্তনো কিঞ্চনভাৰে উপনেতব্বং পস্সতি, তস্মা অযং সুঞ্ঞতা চতুকোটিকাতি ৰেদিতব্বা.

যস্মা পন মিচ্ছাদিট্ঠিকানং যাথাৰদস্সনস্স অসম্ভৰতো যথাৰুত্তচতুকোটিকসুঞ্ঞতাদস্সনং ন সম্ভৰতি, তস্মা ‘‘নত্থি মাতা, নত্থি পিতা’’তিআদিৰচনং (দী. নি. ১.১৭১) ৰিয মিচ্ছাগাহৰসেন ‘‘নাহং ক্ৰচনী’’তিআদি ৰুত্তন্তি যুত্তো চেত্থ মুসাৰাদসম্ভৰো. কত্থচীতি ঠানে, কালে ৰা. অথ ‘‘নিপ্ফলো’’তি কস্মা ৰুত্তং. ‘‘ন মহপ্ফলো’’তি সদ্দেন হি মহপ্ফলাভাৰোৰ জোতিতো, ন পন সব্বথা ফলাভাৰোতি আহ ‘‘ব্যঞ্জনমেৰ হি এত্থ সাৰসেস’’ন্তিআদি. সেসপদেসুপীতি ‘‘ন মহানিসংসো’’তিআদীসুপি.

অট্ঠহি কারণেহীতি –

‘‘অথ খো, ভন্তে, সক্কো দেৰানমিন্দো দেৰানং তাৰতিংসানং ভগৰতো অট্ঠ যথাভুচ্চে ৰণ্ণে পযিরুদাহাসি – ‘তং কিং মঞ্ঞন্তি, ভোন্তো দেৰা তাৰতিংসা, যাৰঞ্চ সো ভগৰা বহুজনহিতায পটিপন্নো বহুজনসুখায লোকানুকম্পায অত্থায হিতায সুখায দেৰমনুস্সানং, এৰং বহুজনহিতায পটিপন্নং বহুজনসুখায লোকানুকম্পায অত্থায হিতায সুখায দেৰমনুস্সানং ইমিনাপঙ্গেন সমন্নাগতং সত্থারং নেৰ অতীতংসে সমনুপস্সামি, ন পনেতরহি অঞ্ঞত্র তেন ভগৰতা’’তি –

আদিনা মহাগোৰিন্দসুত্তে (দী. নি. ২.২৯৬) ৰিত্থারিতেহি বহুজনহিতায পটিপন্নাদীহি বুদ্ধানুভাৰদীপকেহি অট্ঠহি কারণেহি. অথ ‘‘নৰহি কারণেহী’’তি অৰত্ৰা ‘‘অট্ঠহি কারণেহী’’তি কস্মা ৰুত্তন্তি আহ ‘‘এত্থ হি…পে… সব্বে লোকিযলোকুত্তরা বুদ্ধগুণা সঙ্গহিতা’’তি. ইদং ৰুত্তং হোতি – ইমস্মিং সুত্তে ‘‘ইতিপি সো ভগৰা’’তি ইমিনা ৰচনেন অৰিসেসতো সব্বেপি লোকিযলোকুত্তরা বুদ্ধগুণা দীপিতা, তস্মা তেন দীপিতগুণে সন্ধায ‘‘অট্ঠহি কারণেহী’’তি ৰুত্তন্তি. অরহন্তিআদীহি পাটিযেক্কগুণাৰ নিদ্দিট্ঠাতি অরহন্তিআদীহি একেকেহি পদেহি একেকে গুণাৰ নিদ্দিট্ঠাতি অত্থো.

সহতন্তিকন্তি পাল়িধম্মসহিতং. পুরিমনযেনেৰ যোজনা কাতব্বাতি ‘‘কিলিট্ঠস্মিঞ্হি কাযে পসাধনং পসাধেত্ৰা নক্খত্তং কীল়মানা ন সোভন্তী’’তিআদিনা নযেন যোজনা কাতব্বাতি অত্থো.

সঙ্ঘস্স অনুস্সরণং নাম তস্স গুণানুস্সরণমেৰাতি আহ ‘‘অট্ঠন্নং অরিযপুগ্গলানং গুণে অনুস্সরতী’’তি. দ্ৰে তযো ৰারে গাহাপিতং উসুমন্তি দ্ৰে তযো ৰারে উদ্ধনং আরোপেত্ৰা সেদনৰসেন গাহাপিতং উসুমং. পুরিমনযেনেৰ যোজনা কাতব্বাতি ‘‘কিলিট্ঠস্মিঞ্হি ৰত্থে পসাধনং পসাধেত্ৰা নক্খত্তং কীল়মানা ন সোভন্তী’’তিআদিনা নযেন যোজনা কাতব্বা.

পহীনকালতো পট্ঠায…পে… ৰিরতাৰাতি এতেন পহানহেতুকা ইধাধিপ্পেতা ৰিরতীতি দস্সেতি. কম্মক্খযকরঞাণেন হি পাণাতিপাতদুস্সীল্যস্স পহীনত্তা অরহন্তো অচ্চন্তমেৰ ততো পটিৰিরতাতি ৰুচ্চতি সমুচ্ছেদৰসেন পহানৰিরতীনং অধিপ্পেতত্তা. কিঞ্চাপি পহানৰিরমণানং পুরিমপচ্ছিমকালতা নত্থি, মগ্গধম্মানং পন সম্মাদিট্ঠিআদীনং সম্মাৰাচাদীনঞ্চ পচ্চযপচ্চযুপ্পন্নভাৰে অপেক্খিতে সহজাতানম্পি পচ্চযপচ্চযুপ্পন্নভাৰেন গহণং পুরিমপচ্ছিমভাৰেনেৰ হোতীতি, গহণপ্পৰত্তিআকারৰসেন পচ্চযভূতেসু সম্মাদিট্ঠিআদীসু পহাযকধম্মেসু পহানকিরিযায পুরিমকালৰোহারো, পচ্চযুপ্পন্নাসু চ ৰিরতীসু ৰিরমণকিরিযায অপরকালৰোহারো চ হোতীতি পহানং ৰা সমুচ্ছেদৰসেন, ৰিরতি পটিপ্পস্সদ্ধিৰসেন যোজেতব্বা.

অথ ৰা পাণো অতিপাতীযতি এতেনাতি পাণাতিপাতো, পাণঘাতহেতুভূতো ধম্মসমূহো. কো পন সো? অহিরিকানোত্তপ্পদোসমোহৰিহিংসাদযো কিলেসা. তে হি অরহন্তো অরিযমগ্গেন পহায সমুগ্ঘাতেত্ৰা পাণাতিপাতদুস্সীল্যতো অচ্চন্তমেৰ পটিৰিরতাতি ৰুচ্চন্তি, কিলেসেসু পহীনেসু কিলেসনিমিত্তস্স কম্মস্স অনুপ্পজ্জনতো. অদিন্নাদানং পহাযাতিআদীসুপি এসেৰ নযো. ৰিরতাৰাতি অৰধারণেন তস্সা ৰিরতিযা কালাদিৰসেন অপরিযন্ততং দস্সেতি. যথা হি অঞ্ঞে সমাদিন্নৰিরতিকাপি অনৰট্ঠিতচিত্ততায লাভজীৰিতাদিহেতু সমাদানং ভিন্দন্তি, ন এৰং অরহন্তো, অরহন্তো পন সব্বসো পহীনপাণাতিপাতত্তা অচ্চন্তৰিরতা এৰাতি.

দণ্ডনসঙ্খাতস্স পরৰিহেঠনস্স চ পরিৰজ্জনভাৰদীপনত্থং দণ্ডসত্থানং নিক্খেপৰচনন্তি আহ ‘‘পরূপঘাতত্থাযা’’তিআদি. লজ্জীতি এত্থ ৰুত্তলজ্জায ওত্তপ্পম্পি ৰুত্তমেৰাতি দট্ঠব্বং. ন হি পাপজিগুচ্ছনপাপুত্তাসরহিতং, পাপভযং ৰা অলজ্জনং অত্থীতি. ধম্মগরুতায ৰা অরহন্তানং ধম্মস্স চ অত্তা ধীনত্তা অত্তাধিপতিভূতা লজ্জাৰ ৰুত্তা, ন পন লোকাধিপতি ওত্তপ্পং. ‘‘দযং মেত্তচিত্ততং আপন্না’’তি কস্মা ৰুত্তং, ননু দযা-সদ্দো ‘‘অদযাপন্নো’’তিআদীসু করুণায পৰত্ততীতি? সচ্চমেতং, অযং পন দযা-সদ্দো অনুরক্খণত্থং অন্তোনীতং কত্ৰা পৰত্তমানো মেত্তায করুণায চ পৰত্ততীতি ইধ মেত্তায পৰত্তমানো ৰুত্তো. মিজ্জতি সিনিয্হতীতি মেত্তা, মেত্তা এতস্স অত্থীতি মেত্তং, মেত্তং চিত্তং এতস্সাতি মেত্তচিত্তো, তস্স ভাৰো মেত্তচিত্ততা, মেত্তাইচ্চেৰ অত্থো.

সব্বপাণভূতহিতানুকম্পীতি এতেন তস্সা ৰিরতিযা পৰত্তৰসেন অপরিযন্ততং দস্সেতি. পাণভূতেতি পাণজাতে. অনুকম্পকাতি করুণাযনকা, যস্মা পন মেত্তা করুণায ৰিসেসপচ্চযো হোতি, তস্মা ৰুত্তং ‘‘তায এৰ দযাপন্নতাযা’’তি. এৰং যেহি ধম্মেহি পাণাতিপাতা ৰিরতি সম্পজ্জতি, তেহি লজ্জামেত্তাকরুণাধম্মেহি সমঙ্গিভাৰো দস্সিতো.

পরপরিগ্গহিতস্স আদানন্তি পরসন্তকস্স আদানং. থেনো ৰুচ্চতি চোরো, তস্স ভাৰো থেয্যং, কামঞ্চেত্থ ‘‘লজ্জী দযাপন্নো’’তি ন ৰুত্তং, অধিকারৰসেন পন অত্থতো ৰুত্তমেৰাতি দট্ঠব্বং. যথা হি লজ্জাদযো পাণাতিপাতপ্পহানস্স ৰিসেসপচ্চযা, এৰং অদিন্নাদানপ্পহানস্সপীতি, তস্মা সাপি পাল়ি আনেত্ৰা ৰত্তব্বা. এস নযো ইতো পরেসুপি. অথ ৰা সুচিভূতেনাতি এতেন হিরোত্তপ্পাদীহি সমন্নাগমো, অহিরিকাদীনঞ্চ পহানং ৰুত্তমেৰাতি ‘‘লজ্জী’’তিআদি ন ৰুত্তন্তি দট্ঠব্বং.

অসেট্ঠচরিযন্তি অসেট্ঠানং হীনানং, অসেট্ঠং ৰা লামকং চরিযং, নিহীনৰুত্তিং মেথুনন্তি অত্থো. ব্রহ্মং সেট্ঠং আচারন্তি মেথুনৰিরতিমাহ. আরাচারী মেথুনাতি এতেন – ‘‘ইধেকচ্চো ন হেৰ খো মাতুগামেন সদ্ধিং দ্ৰযংদ্ৰযসমাপত্তিং সমাপজ্জতি, অপিচ খো মাতুগামস্স উচ্ছাদনপরিমদ্দনন্হাপনসম্বাহনং সাদিযতি, সো তং অস্সাদেতি, তং নিকামেতি, তেন চ ৰিত্তিং আপজ্জতী’’তিআদিনা (অ. নি. ৭.৫০) ৰুত্তা সত্তৰিধমেথুনসংযোগাপি পটিৰিরতি দস্সিতাতি দট্ঠব্বং.

‘‘সচ্চতো থেততো’’তিআদীসু (ম. নি. ১.১৯) ৰিয থেত-সদ্দো থিরপরিযাযো, থিরভাৰো চ সচ্চৰাদিতায ঠিতকথত্তা কথাৰসেন ৰেদিতব্বোতি আহ ‘‘ঠিতকথাতি অত্থো’’তি. ন ঠিতকথোতি যথা হলিদ্দিরাগাদযো অনৰট্ঠিতসভাৰতায ন ঠিতা, এৰং ন ঠিতা কথা যস্স সো ন ঠিতকথোতি হলিদ্দিরাগাদযো যথা কথায উপমা হোন্তি, এৰং যোজেতব্বং. এস নযো ‘‘পাসাণলেখা ৰিযা’’তিআদীসুপি. সদ্ধা অযতি পৰত্ততি এত্থাতি সদ্ধাযা, সদ্ধাযা এৰ সদ্ধাযিকা যথা ৰেনযিকা. সদ্ধায ৰা অযিতব্বা সদ্ধাযিকা, সদ্ধেয্যাতি অত্থো. ৰত্তব্বতং আপজ্জতি ৰিসংৰাদনতোতি অধিপ্পাযো.

একং ভত্তং একভত্তং, তং এতেসমত্থীতি একভত্তিকা, একস্মিং দিৰসে একৰারমেৰ ভুঞ্জনকা. তযিদং রত্তিভোজনেনপি সিযাতি আহ ‘‘রত্তূপরতা’’তি. এৰম্পি সাযন্হভোজনেনপি সিযুং একভত্তিকাতি তদাসঙ্কানিৰত্তনত্থং ‘‘ৰিরতা ৰিকালভোজনা’’তি ৰুত্তং. অরুণুগ্গমনতো পট্ঠায যাৰ মজ্ঝন্হিকা অযং বুদ্ধানং অরিযানং আচিণ্ণসমাচিণ্ণো ভোজনস্স কালো নাম, তদঞ্ঞো ৰিকালো. অট্ঠকথাযং পন দুতিযপদেন রত্তিভোজনস্স পটিক্খিত্তত্তা অপরণ্হো ‘‘ৰিকালো’’তি ৰুত্তো.

সঙ্খেপতো ‘‘সব্বপাপস্স অকরণ’’ন্তিআদিনযপ্পৰত্তং (দী. নি. ২.৯০; ধ. প. ১৮৩) ভগৰতো সাসনং সচ্ছন্দরাগপ্পৰত্তিতো নচ্চাদীনং দস্সনং ন অনুলোমেতীতি আহ ‘‘সাসনস্স অননুলোমত্তা’’তি. অত্তনা পযোজিযমানং পরেহি পযোজাপীযমানঞ্চ নচ্চং নচ্চভাৰসামঞ্ঞতো পাল়িযং একেনেৰ নচ্চসদ্দেন গহিতং, তথা গীতৰাদিতসদ্দা চাতি আহ ‘‘নচ্চননচ্চাপনাদিৰসেনা’’তি. আদি-সদ্দেন গাযনগাযাপনৰাদনৰাদাপনানি সঙ্গণ্হাতি. দস্সনেন চেত্থ সৰনম্পি সঙ্গহিতং ৰিরূপেকসেসনযেন. আলোচনসভাৰতায ৰা পঞ্চন্নং ৰিঞ্ঞাণানং সৰনকিরিযাযপি দস্সনসঙ্খেপসব্ভাৰতো দস্সনাইচ্চেৰ ৰুত্তং. অৰিসূকভূতস্স গীতস্স সৰনং কদাচি ৰট্টতীতি আহ ‘‘ৰিসূকভূতং দস্সন’’ন্তি. তথা হি ৰুত্তং পরমত্থজোতিকায খুদ্দকপাঠট্ঠকথায ‘‘ধম্মূপসংহিতং গীতং ৰট্টতি, গীতূপসংহিতো ধম্মো ন ৰট্টতী’’তি.

যং কিঞ্চীতি গন্থিতং ৰা অগন্থিতং ৰা যং কিঞ্চি পুপ্ফং. গন্ধজাতন্তি গন্ধজাতিযং. তস্সাপি ‘‘যং কিঞ্চী’’তি ৰচনতো ধূপিতস্সপি অধূপিতস্সপি যস্স কস্সচি ৰিলেপনাদি ন ৰট্টতীতি দস্সেতি. উচ্চাতি উচ্চসদ্দেন সমানত্থং একং সদ্দন্তরং. সেতি এত্থাতি সযনং. উচ্চাসযনং মহাসযনঞ্চ সমণসারুপ্পরহিতং অধিপ্পেতন্তি আহ ‘‘পমাণাতিক্কন্তং অকপ্পিযত্থরণ’’ন্তি, আসন্দাদিআসনঞ্চেত্থ সযনেন সঙ্গহিতন্তি দট্ঠব্বং. যস্মা পন আধারে পটিক্খিত্তে তদাধারকিরিযা পটিক্খিত্তাৰ হোতি, তস্মা ‘‘উচ্চাসযনমহাসযনা’’ইচ্চেৰ ৰুত্তং. অত্থতো পন তদুপভোগভূতনিসজ্জানিপজ্জনেহি ৰিরতি দস্সিতাতি দট্ঠব্বা. অথ ৰা ‘‘উচ্চাসযনাসনমহাসযনাসনা’’তি, এতস্মিং অত্থে একসেসনযেন অযং নিদ্দেসো কতো যথা ‘‘নামরূপপচ্চযা সল়াযতন’’ন্তি. (ম. নি. ৩.১২৬; সং. নি. ২.১) আসনকিরিযাপুব্বকত্তা ৰা সযনকিরিযায সযনগ্গহণেনেৰ আসনম্পি সঙ্গহিতন্তি ৰেদিতব্বং.

‘‘কীৰা’’তি অযং নিপাতো. ‘‘কিত্তক’’ন্তি ইমস্স অত্থং বোধেতীতি আহ ‘‘কীৰমহপ্ফলোতি কিত্তকং মহপ্ফলো’’তি. সেসপদেসূতি ‘‘কীৰমহানিসংসো’’তিআদীসু. রত্ত-সদ্দো রতনপরিযাযোতি আহ ‘‘পহূতরত্তরতনানন্তি পহূতেন রত্তসঙ্খাতেন রতনেন সমন্নাগতান’’ন্তি. পাল়িযং পন ‘‘পহূতসত্তরতনান’’ন্তিপি পাঠো দিস্সতি. ভেরিতলসদিসং কত্ৰাতি ভেরিতলং ৰিয সমং কত্ৰা. ততো একং ভাগং ন অগ্ঘতীতি যথাৰুত্তং চক্কৰত্তিরজ্জং ততো সোল়সভাগতো একং ভাগং ন অগ্ঘতি. ততো বহুতরং হোতীতি চক্কৰত্তিরজ্জসিরিতো বহুতরং হোতি.

চাতুমহারাজীকানন্তিআদীসু চাতুমহারাজিকা নাম সিনেরুপব্বতস্স ৰেমজ্ঝে হোন্তি, তেসু বহূ পব্বতট্ঠাপি আকাসট্ঠাপি, তেসং পরম্পরা চক্কৰাল়পব্বতং পত্তা, খিড্ডাপদোসিকা, মনোপদোসিকা, সীতৰলাহকা, উণ্হৰলাহকা, চন্দিমা, দেৰপুত্তো, সূরিযো, দেৰপুত্তোতি এতে সব্বে চাতুমহারাজিকদেৰলোকট্ঠকা এৰ. তেত্তিংস জনা তত্থ উপ্পন্নাতি তাৰতিংসা. অপিচ তাৰতিংসাতি তেসং দেৰানং নামমেৰাতি ৰুত্তং. তেপি অত্থি পব্বতট্ঠকা, অত্থি আকাসট্ঠকা, তেসং পরম্পরা চক্কৰাল়পব্বতং পত্তা, তথা যামাদীনং. একদেৰলোকেপি হি দেৰানং পরম্পরা চক্কৰাল়পব্বতং অপ্পত্তা নাম নত্থি. তত্থ দিব্বসুখং যাতা পযাতা সম্পত্তাতি যামা. তুট্ঠা পহট্ঠাতি তুসিতা. পকতিপটিযত্তারম্মণতো অতিরেকেন রমিতুকামকালে যথারুচিতে ভোগে নিম্মিনিত্ৰা নিম্মিনিত্ৰা রমন্তীতি নিম্মানরতি. চিত্তাচারং ঞত্ৰা পরেহি নিম্মিতেসু ভোগেসু ৰসং ৰত্তেন্তীতি পরনিম্মিতৰসৰত্তী.

তত্থ চাতুমহারাজিকানং দেৰানং মনুস্সগণনায নৰুতিৰস্সসতসহস্সানি আযুপ্পমাণং. তাৰতিংসানং দেৰানং তিস্সো চ ৰস্সকোটিযো সট্ঠি চ ৰস্সসতসহস্সানি. যামানং দেৰানং চুদ্দস চ ৰস্সকোটিযো চত্তারি চ ৰস্সসতসহস্সানি. তুসিতানং দেৰানং সত্তপঞ্ঞাস চ ৰস্সকোটিযো সট্ঠি চ ৰস্সসতসহস্সানি. নিম্মানরতীনং দেৰানং দ্ৰে চ ৰস্সকোটিসতানি তিস্সো চ ৰস্সকোটিযো চত্তারি চ ৰস্সসতসহস্সানি. পরনিম্মিতৰসৰত্তীনং দেৰানং নৰ চ ৰস্সকোটিসতানি একৰীস কোটিযো চ সট্ঠি চ ৰস্সসতসহস্সানি.

মুট্ঠিহত্থপাদকেতি পাদতলতো যাৰ অটনিযা হেট্ঠিমন্তো, তাৰ মুট্ঠিরতনপ্পমাণপাদকে. তঞ্চ খো মজ্ঝিমস্স পুরিসস্স হত্থেন, যস্সিদানি ৰড্ঢকীহত্থোতি সমঞ্ঞা. সীলসমাদানতো পট্ঠায অঞ্ঞং কিঞ্চি অকত্ৰা ধম্মস্সৰনেন ৰা কম্মট্ঠানমনসিকারেন ৰা ৰীতিনামেতব্বন্তি আহ ‘‘তং পন উপৰসন্তেন…পে… ৰিচারেতব্ব’’ন্তি.

ৰাচং ভিন্দিত্ৰা উপোসথঙ্গানি সমাদাতব্বানীতি ‘‘ইমঞ্চ রত্তিং ইমঞ্চ দিৰস’’ন্তি কালপরিচ্ছেদং কত্ৰা ‘‘উপোসথঙ্গৰসেন অট্ঠ সিক্খাপদানি সমাদিযামী’’তি একতো কত্ৰা পুন পচ্চেকং ‘‘পাণাতিপাতা ৰেরমণিসিক্খাপদং সমাদিযামি…পে… উচ্চাসযনমহাসযনা ৰেরমণিসিক্খাপদং সমাদিযামী’’তি এৰং ৰচীভেদং কত্ৰা যথাপাল়ি সমাদাতব্বানি. পাল়িং অজানন্তেন পন অত্তনো ভাসায পচ্চেকং ৰা ‘‘বুদ্ধপঞ্ঞত্তং উপোসথং অধিট্ঠামী’’তি একতো অধিট্ঠানৰসেন ৰা সমাদাতব্বানি, অঞ্ঞং অলভন্তেন অধিট্ঠাতব্বানি. উপাসকসীলঞ্হি অত্তনা সমাদিযন্তেনপি সমাদিন্নং পরসন্তিকে সমাদিযন্তেনপি, একজ্ঝং সমাদিন্নম্পি সমাদিন্নমেৰ হোতি পচ্চেকং সমাদিন্নম্পি. তং পন একজ্ঝং সমাদিযতো একাযেৰ ৰিরতি একা চেতনা হোতি. সা পন সব্বৰিরতিচেতনানং কিচ্চকারীতি তেনপি সব্বসিক্খাপদানি সমাদিন্নানেৰ. পচ্চেকং সমাদিযতো পন নানাৰিরতিচেতনাযো যথাসকং কিচ্চৰসেন উপ্পজ্জন্তি, সব্বসমাদানে পন ৰচীভেদো কাতব্বোযেৰ. পরূপরোধপটিসংযুত্তা পরৰিহিংসাসংযুত্তা.

ননু চ ‘‘মণি’’ন্তি ৰুত্তে ৰেল়ুরিযম্পি সঙ্গহিতমেৰ, কিমত্থং পন ৰেল়ুরিযন্তি আহ ‘‘ৰেল়ুরিযন্তি…পে… দস্সেতী’’তি. ‘‘মণি’’ন্তি ৰত্ৰাৰ ‘‘ৰেল়ুরিয’’ন্তি ইমিনা জাতিমণিভাৰং দস্সেতীতি যোজেতব্বং. একৰস্সিকৰেল়ুৰণ্ণন্তি জাতিতো একৰস্সাতিক্কন্তৰেল়ুৰণ্ণং. লদ্ধকন্তি সুন্দরং. চন্দপ্পভা তারগণাৰ সব্বেতি যথা চন্দপ্পভায কলং সব্বে তারাগণা নানুভৰন্তীতি অযমেত্থ অত্থোতি আহ ‘‘চন্দপ্পভাতি সামিঅত্থে পচ্চত্ত’’ন্তি.

উপোসথসুত্তৰণ্ণনা নিট্ঠিতা.

মহাৰগ্গৰণ্ণনা নিট্ঠিতা.