(১৩) ৩. কুসিনারৰগ্গো

১-২. কুসিনারসুত্তাদিৰণ্ণনা

১২৪-১২৫. ততিযস্স পঠমে তণ্হাগেধেন গথিতোতি তণ্হাবন্ধনেন বদ্ধো. তণ্হামুচ্ছনাযাতি তণ্হায ৰসেন মুচ্ছাপত্তিযা. মুচ্ছিতোতি মুচ্ছং মোহং পমাদং আপন্নো. অজ্ঝোপন্নোতি অধিওপন্নো. তণ্হায অধিভৰিত্ৰা অজ্ঝোত্থটো গিলিত্ৰা পরিনিট্ঠপেত্ৰা ৰিয ঠিতো. তেনাহ ‘‘অজ্ঝোপন্নোতি তণ্হায গিলিত্ৰা পরিনিট্ঠপেত্ৰা পৰত্তো’’তি. অনাদীনৰদস্সাৰীতি গথিতাদিভাৰেন পরিভোগে আদীনৰমত্তম্পি ন পস্সতি. নিস্সরণপঞ্ঞোতি অযমত্থো আহারপরিভোগেতি তত্থ পযোজনপরিচ্ছেদিকা ‘‘যাৰদেৰ ইমস্স কাযস্স ঠিতিযা’’তিআদিনা (ম. নি. ১.২৩; ২.২৪; ৩.৭৫; সং. নি. ৪.১২০; অ. নি. ৬.৫৮; ৮.৯) পৰত্তা আহারপটিবদ্ধছন্দরাগনিস্সরণভূতা পঞ্ঞা অস্স অত্থীতি নিস্সরণপঞ্ঞো. সেসমেত্থ উত্তানমেৰ. দুতিযে নত্থি ৰত্তব্বং.

কুসিনারসুত্তাদিৰণ্ণনা নিট্ঠিতা.

৩. গোতমকচেতিযসুত্তৰণ্ণনা

১২৬. ততিযে সম্বহুলাতি পঞ্চসতমত্তা. পঞ্চসতা কির ব্রাহ্মণা তিণ্ণং ৰেদানং পারগূ অপরভাগে ভগৰতো ধম্মদেসনং সুত্ৰা কামেসু আদীনৰং নেক্খম্মে চ আনিসংসং পস্সমানা ভগৰতো সন্তিকে পব্বজিত্ৰা ন চিরস্সেৰ সব্বং বুদ্ধৰচনং উগ্গণ্হিত্ৰা পরিযত্তিং নিস্সায মানং উপ্পাদেসুং – ‘‘যং যং ভগৰা কথেতি, তং তং মযং খিপ্পমেৰ জানাম. ভগৰা হি ইত্থিলিঙ্গাদীনি তীণি লিঙ্গানি, নামাদীনি চত্তারি পদানি, পঠমাদযো সত্ত ৰিভত্তিযো মুঞ্চিত্ৰা ন কিঞ্চি কথেতি, এৰং কথিতে চ অম্হাকং গণ্ঠিপদং নাম নত্থী’’তি, তে ভগৰতি অগারৰা হুত্ৰা ততো পট্ঠায ভগৰতো উপট্ঠানম্পি ধম্মস্সৰনম্পি অভিণ্হং ন গচ্ছন্তি. তে সন্ধায ৰুত্তং ‘‘সম্বহুলা কির ব্রাহ্মণপব্বজিতা…পে… ধম্মস্সৰনং ন গচ্ছন্তী’’তি. মুখপটিঞ্ঞং গহেত্ৰাতি ‘‘সচ্চং কির তুম্হে, ভিক্খৰে’’তিআদিনা তমত্থং পটিপুচ্ছিত্ৰা ‘‘সচ্চং ভগৰা’’তি তেহি ভিক্খূহি ৰুত্তং পটিৰচনং গহেত্ৰা. তঞ্হি অত্তনো মুখেনেৰ পটিঞ্ঞাতত্তা ‘‘মুখপটিঞ্ঞা’’তি ৰুচ্চতি.

নেৰ আগতট্ঠানং ন গতট্ঠানং অদ্দসংসু. কস্মা? অঞ্ঞাণতো. তে কির তস্স সুত্তস্স অত্থং ন জানিংসু. তেসঞ্হি তস্মিং সমযে ৰিচিত্রনযং দেসনাৰিলাসযুত্তম্পি তং সুত্তং ঘনপুথুলেন দুস্সপট্টেন মুখং বদ্ধং কত্ৰা পুরতো ঠপিতমনুঞ্ঞভোজনং ৰিয অহোসি. ননু চ ভগৰা অত্তনা দেসিতং ধম্মং পরে ঞাপেতুং কপ্পসতসহস্সাধিকানি চত্তারি অসঙ্খেয্যানি পারমিযো পূরেত্ৰা সব্বঞ্ঞুতং পত্তো, সো কস্মা যথা তে ন জানন্তি, তথা দেসেতীতি? তেসং মানভঞ্জনত্থং. ভগৰা হি ‘‘অভব্বা ইমে ইমং মানখিলং অনুপহচ্চ মগ্গং ৰা ফলং ৰা সচ্ছিকাতু’’ন্তি তেসং সুতপরিযত্তিং নিস্সায উপ্পন্নং অট্ঠুপ্পত্তিং কত্ৰা দেসনাকুসলো মানভঞ্জনত্থং ‘‘সব্বধম্মমূলপরিযায’’ন্তিআদিনা মূলপরিযাযসুত্তং (ম. নি. ১.১) অভাসি.

সম্মাসম্বুদ্ধো ‘‘ময্হং কথা নিয্যাতী’’তি মুখসম্পত্তমেৰ কথেতীতি চিন্তযিংসূতি ইদং অঙ্গুত্তরভাণকানং ৰল়ঞ্জনকতন্তিনীহারেন ৰুত্তং. মজ্ঝিমভাণকা পন এৰং ৰদন্তি – এৰং মানভঞ্জনত্থং দেসিতঞ্চ পন তং সুত্তং সুত্ৰা তে ভিক্খূ ‘‘তংযেৰ কির পথৰিং দিট্ঠিগতিকো সঞ্জানাতি, সেখোপি অরহাপি তথাগতোপি অভিজানাতি, কি নামিদং কথং নামিদ’’ন্তি চিন্তেন্তা ‘‘পুব্বে মযং ভগৰতা কথিতং যংকিঞ্চি খিপ্পমেৰ জানাম, ইদানি পনিমস্স মূলপরিযাযস্স অন্তং ৰা কোটিং ৰা ন জানাম ন পস্সাম, অহো বুদ্ধা নাম অপ্পমেয্যা অতুলা’’তি উদ্ধতদাঠা ৰিয সপ্পা নিম্মদা হুত্ৰা বুদ্ধূপট্ঠানঞ্চ ধম্মস্সৰনঞ্চ সক্কচ্চং অগমংসু. তেন সমযেন ধম্মসভাযং সন্নিসিন্না ভিক্খূ ‘‘অহো বুদ্ধানং আনুভাৰো, তে নামব্রাহ্মণপব্বজিতা তথা মানমদমত্তা ভগৰতা মূলপরিযাযদেসনায নিহতমানা কতা’’তি কথং সমুট্ঠাপেসুং. তং সুত্ৰা ভগৰা ‘‘ন, ভিক্খৰে, ইদানেৰ, পুব্বেপি অহং এৰং ইমে মানপগ্গহিতসীসে চরন্তে নিহতমানে অকাসি’’ন্তি ৰত্ৰা অতীতং আহরন্তো ‘‘ভূতপুব্বং, ভিক্খৰে, অঞ্ঞতরো দিসাপামোক্খো ব্রাহ্মণো বারাণসিযং পটিৰসতি তিণ্ণং ৰেদানং পারগূ সনিঘণ্টুকেটুভানং সাক্খরপ্পভেদানং ইতিহাসপঞ্চমানং পদকো ৰেয্যাকরণো লোকাযতমহাপুরিসলক্খণেসু অনৰযো, সো পঞ্চমত্তানি মাণৰকসতানি মন্তে ৰাচেতি. পণ্ডিতমাণৰকা বহুঞ্চ গণ্হন্তি লহুঞ্চ, সুট্ঠু চ উপধারেন্তী’’তিআদিনা জাতকং কথেসি.

তং সুত্ৰা তে ভিক্খূ ‘‘পুব্বেপি মযং মানেনেৰ উপহতা’’তি ভিয্যোসোমত্তায নিহতমানা হুত্ৰা অত্তনো উপকারকম্মট্ঠানপরাযণা অহেসুং. ততো ভগৰা একং সমযং জনপদচারিকং চরন্তো ৰেসালিং পত্ৰা গোতমকে চেতিযে ৰিহরন্তো ইমেসং পঞ্চসতানং ভিক্খূনং ঞাণপরিপাকং ৰিদিত্ৰা ইদং গোতমকসুত্তং কথেসি. ইদঞ্চ সুত্তং সুত্ৰা তে পঞ্চসতা ভিক্খূ তস্মিংযেৰ আসনে সহ পটিসম্ভিদাহি অরহত্তং পাপুণিংসূতি.

অভিঞ্ঞাযাতি কুসলাদিভেদং খন্ধাদিভেদঞ্চ দেসেতব্বং ধম্মং, ৰেনেয্যানঞ্চ আসযানুসযচরিযাধিমুত্তিআদিভেদং, তস্স চ নেসং দেসেতব্বপ্পকারং যাথাৰতো অভিজানিত্ৰাতি অত্থো. ইমে পঞ্চক্খন্ধা দ্ৰাদসাযতনানীতিআদি পনেত্থ নিদস্সনমত্তং ৰুত্তন্তি ৰেদিতব্বং. সপ্পচ্চযন্তি সকারণং, ৰেনেয্যানং অজ্ঝাসযেন ৰা পুচ্ছায ৰা অট্ঠুপ্পত্তিযা ৰা সনিমিত্তং হেতূদাহরণসহিতঞ্চাতি অত্থো. রাগাদীনং পটিহরণং পটিহারিযং, তদেৰ পাটিহারিযং, সহ পাটিহারিযেনাতি সপ্পাটিহারিযং. রাগাদিপ্পটিসেধনৰসেনেৰ হি সত্থা ধম্মং দেসেতি. তেনাহ ‘‘পচ্চনীকপটিহরণেন সপ্পাটিহারিযমেৰ কত্ৰা’’তি. অপরে পন ‘‘যথারহং ইদ্ধিআদেসনানুসাসনিপাটিহারিযসহিত’’ন্তি ৰদন্তি অনুসাসনিপাটিহারিযরহিতা দেসনা নত্থীতি কত্ৰা. সেসমেত্থ উত্তানমেৰ.

গোতমকচেতিযসুত্তৰণ্ণনা নিট্ঠিতা.

৪. ভরণ্ডুকালামসুত্তৰণ্ণনা

১২৭. চতুত্থে আল়ারকালামকালেতি আল়ারকালামানং ধরমানকালে. পরিঞ্ঞন্তি পহানপরিঞ্ঞং. সা হি সমতিক্কমো, ন ইতরা. তেনাহ ‘‘পরিঞ্ঞা নাম সমতিক্কমো’’তি. এত্থ চ পঠমো সত্থা রূপাৰচরসমাপত্তিলাভী দট্ঠব্বো, দুতিযো অরূপাৰচরসমাপত্তিলাভী, ততিযো সম্মাসম্বুদ্ধো দট্ঠব্বো. ৰুত্তঞ্হেতং পুগ্গলপঞ্ঞত্তিযং (পু. প. ১৩০) –

‘‘য্ৰাযং সত্থা কামানং পরিঞ্ঞং পঞ্ঞাপেতি, ন রূপানং পরিঞ্ঞং পঞ্ঞাপেতি, ন ৰেদনানং পরিঞ্ঞং পঞ্ঞাপেতি, রূপাৰচরসমাপত্তিযা লাভী সত্থা তেন দট্ঠব্বো. য্ৰাযং সত্থা কামানঞ্চ পরিঞ্ঞং পঞ্ঞাপেতি, রূপানঞ্চ পরিঞ্ঞং পঞ্ঞাপেতি, ন ৰেদনানং পরিঞ্ঞং পঞ্ঞাপেতি, অরূপাৰচরসমাপত্তিযা লাভী সত্থা তেন দট্ঠব্বো. য্ৰাযং সত্থা কামানঞ্চ পরিঞ্ঞং পঞ্ঞাপেতি, রূপানঞ্চ পরিঞ্ঞং পঞ্ঞাপেতি, ৰেদনানঞ্চ পরিঞ্ঞং পঞ্ঞাপেতি, সম্মাসম্বুদ্ধো সত্থা তেন দট্ঠব্বো’’তি.

তত্থ তিত্থিযা সমযং জানন্তা কামানং পরিঞ্ঞং পঞ্ঞাপেয্যুং পঠমজ্ঝানং ৰদমানা. রূপানং পরিঞ্ঞং পঞ্ঞাপেয্যুং অরূপরাগং ৰদমানা. ৰেদনাপরিঞ্ঞং পঞ্ঞাপেয্যুং অসঞ্ঞারাগং ৰদমানা. তে পন ‘‘ইদং নাম পঠমজ্ঝানং, অযং রূপভৰো, অযং অসঞ্ঞাভৰো’’তিপি ন জানন্তি. তে পঞ্ঞাপেতুং অসক্কোন্তাপি কেৰলং ‘‘পঞ্ঞাপেমা’’তি ৰদন্তি. তথাগতো পন কামানং পরিঞ্ঞং অনাগামিমগ্গেন পঞ্ঞাপেতি, রূপৰেদনানং অরহত্তমগ্গেন. এৰমেত্থ দ্ৰে জনা বাহিরকা, একো সম্মাসম্বুদ্ধোতি ইমস্মিং লোকে তযো সত্থারো নাম.

ভরণ্ডুকালামসুত্তৰণ্ণনা নিট্ঠিতা.

৫. হত্থকসুত্তৰণ্ণনা

১২৮. পঞ্চমে অভিক্কন্তাতি অতিক্কন্তা, ৰিগতাতি অত্থোতি আহ ‘‘খযে দিস্সতী’’তি. তেনেৰ হি ‘‘নিক্খন্তো পঠমো যামো’’তি অনন্তরং ৰুত্তং. অভিক্কন্ততরোতি অতিৰিয কন্ততরো. তাদিসো চ সুন্দরো ভদ্দকো নাম হোতীতি আহ ‘‘সুন্দরে দিস্সতী’’তি. কোতি দেৰনাগযক্খগন্ধব্বাদীসু কো কতমো? মেতি মম. পাদানীতি পাদে. ইদ্ধিযাতি ইমায এৰরূপায দেৰিদ্ধিযা. যসসাতি ইমিনা এদিসেন পরিৰারেন পরিচ্ছেদেন. জলন্তি ৰিজ্জোতমানো. অভিক্কন্তেনাতি অতিৰিয কন্তেন কমনীযেন অভিরূপেন. ৰণ্ণেনাতি ছৰিৰণ্ণেন সরীরৰণ্ণনিভায. সব্বা ওভাসযং দিসাতি দস দিসা পভাসেন্তো, চন্দো ৰিয সূরিযো ৰিয চ একোভাসং একালোকং করোন্তোতি গাথায অত্থো. অভিরূপেতি উল়াররূপে সম্পন্নরূপে. অব্ভনুমোদনেতি সম্পহংসনে. ইধ পনাতি ‘‘অভিক্কন্তায রত্তিযা’’তি এতস্মিং পদে. তেনাতি সুন্দরপরিযাযত্তা. খযে ৰা ইধ অভিক্কন্তসদ্দো দট্ঠব্বো, তেন ‘‘অভিক্কন্তায পরিক্খীণায রত্তিযা’’তি ৰুত্তং হোতি.

রূপাযতনাদীসূতি আদিসদ্দেন অক্খরাদীনং সঙ্গহো দট্ঠব্বো. সুৰণ্ণৰণ্ণোতি সুৰণ্ণচ্ছৰীতি অযমেত্থ অত্থোতি আহ ‘‘ছৰিয’’ন্তি. তথা হি ৰুত্তং ‘‘কঞ্চনসন্নিভত্তচো’’তি (ম. নি. ২.৩৯৯; সু. নি. ৫৫৬). সঞ্ঞূল়্হাতি সম্বন্ধিতা, গন্থিতাতি অত্থো. ৰণ্ণাতি গুণৰণ্ণাতি আহ ‘‘থুতিয’’ন্তি, থোমনাযন্তি অত্থো. কুলৰগ্গেতি খত্তিযাদিকুলকোট্ঠাসে. তত্থ ‘‘অচ্ছো ৰিপ্পসন্নো’’তিআদিনা ৰণ্ণিতব্বট্ঠেন ৰণ্ণো, ছৰি. ৰণ্ণনট্ঠেন অভিত্থৰট্ঠেন ৰণ্ণো, থুতি. অঞ্ঞমঞ্ঞং অসঙ্করতো ৰণ্ণেতব্বতো ঠপেতব্বতো ৰণ্ণো, খত্তিযাদিকুলৰগ্গো. ৰণ্ণীযতি ঞাপীযতি এতেনাতি ৰণ্ণো, ঞাপককারণং. ৰণ্ণনতো থূলরস্সাদিভাৰেন উপট্ঠানতো ৰণ্ণো, সণ্ঠানং. মহন্তং খুদ্দকং মজ্ঝিমন্তি ৰণ্ণেতব্বতো পমিতব্বতো ৰণ্ণো, পমাণং. ৰণ্ণীযতি চক্খুনা পস্সীযতীতি ৰণ্ণো, রূপাযতনন্তি এৰং তস্মিং তস্মিং অত্থে ৰণ্ণসদ্দস্স পৰত্তি ৰেদিতব্বা. সোতি ৰণ্ণসদ্দো. ছৰিযা দট্ঠব্বো রূপাযতনে গয্হমানস্সপি ছৰিমুখেনেৰ গহেতব্বতো. ছৰিগতা পন ৰণ্ণধাতু এৰ ‘‘সুৰণ্ণৰণ্ণো’’তি এত্থ ৰণ্ণগ্গহণেন গহিতাতি অপরে.

কেৰলপরিপুণ্ণন্তি একদেসম্পি অসেসেত্ৰা নিরৰসেসতোৰ পরিপুণ্ণন্তি অযমেত্থ অত্থোতি আহ ‘‘অনৰসেসতা অত্থো’’তি. কেৰলকপ্পাতি কপ্প-সদ্দো নিপাতো পদপূরণমত্তং, ‘‘কেৰলং’’ইচ্চেৰ অত্থো. কেৰলসদ্দো চ বহুলৰাচীতি আহ ‘‘যেভুয্যতা অত্থো’’তি. কেচি পন ‘‘ঈসকং অসমত্তং কেৰলং কেৰলকপ্প’’ন্তি ৰদন্তি. অনৰসেসত্থো এত্থ কেৰলসদ্দো সিযা, অনত্থন্তরেন পন কপ্পসদ্দেন পদৰড্ঢনং কতং ‘‘কেৰলা এৰ কেৰলকপ্পা’’তি. তথা ৰা কপ্পনীযত্তা পঞ্ঞপেতব্বত্তা কেৰলকপ্পা. অব্যামিস্সতা ৰিজাতিযেন অসঙ্করো সুদ্ধতা. অনতিরেকতা তংপরমতা ৰিসেসাভাৰো. কেৰলকপ্পন্তি কেৰলং দল়্হং কত্ৰাতি অত্থো. কেৰলং ৰুচ্চতি নিব্বানং সব্বসঙ্খতৰিৰিত্তত্তা, তং এতস্স অধিগতং অত্থীতি কেৰলী, সচ্ছিকতনিরোধো খীণাসৰো.

কপ্প-সদ্দো পনাযং সউপসগ্গো অনুপসগ্গো চাতি অধিপ্পাযেন ওকপ্পনিযপদে লব্ভমানং ওকপ্পসদ্দমত্তং নিদস্সেতি, অঞ্ঞথা কপ্পসদ্দস্স অত্থুদ্ধারে ওকপ্পনিযপদং অনিদস্সনমেৰ সিযা. সমণকপ্পেহীতি ৰিনযসিদ্ধেহি সমণৰোহারেহি. নিচ্চকপ্পন্তি নিচ্চকালং. পঞ্ঞত্তীতি নামং. নামঞ্হেতং তস্স আযস্মতো, যদিদং কপ্পোতি. কপ্পিতকেসমস্সূতি কত্তরিযা ছেদিতকেসমস্সু. দ্ৰঙ্গুলকপ্পোতি মজ্ঝন্হিকৰেলায ৰীতিক্কন্তায দ্ৰঙ্গুলতাৰিকপ্পো. লেসোতি অপদেসো. অনৰসেসং ফরিতুং সমত্থস্স ওভাসস্স কেনচি কারণেন একদেসফরণম্পি সিযা, অযং পন সব্বস্সেৰ ফরতীতি দস্সেতুং সমন্তত্থো কপ্পসদ্দো গহিতোতি আহ ‘‘অনৰসেসং সমন্ততো’’তি.

আভায ফরিত্ৰাতি ৰত্থমালালঙ্কারসরীরসমুট্ঠিতায আভায ফরিত্ৰা. দেৰতানঞ্হি সরীরোভাসং দ্ৰাদসযোজনমত্তং ঠানং. ততো ভিয্যোপি ফরিত্ৰা তিট্ঠতি, তথা ৰত্থাভরণাদিসমুট্ঠিতা পভা.

হত্থকসুত্তৰণ্ণনা নিট্ঠিতা.

৬. কটুৰিযসুত্তৰণ্ণনা

১২৯. ছট্ঠে গাৰীনং কযৰিক্কযৰসেন যোগো এত্থাতি গোযোগো, কযৰিক্কযং করোন্তো গাৰীহি যুজ্জন্তি এত্থাতি ৰা গোযোগো, গাৰীনং ৰিক্কযট্ঠানং. তত্থ জাতো পিলক্খরুক্খো গোযোগপিলক্খো, তস্মিং. সমীপত্থে চেতং ভুম্মৰচনং. তেনাহ ‘‘গাৰীনং ৰিক্কযট্ঠানে উট্ঠিতপিলক্খস্স সন্তিকে’’তি. রিত্তো অস্সাদো এতস্সাতি রিত্তস্সাদো. তেনাহ ‘‘ঝানসুখাভাৰেন রিত্তস্সাদ’’ন্তি. সেসমেত্থ উত্তানমেৰ.

কটুৰিযসুত্তৰণ্ণনা নিট্ঠিতা.

৮. দুতিযঅনুরুদ্ধসুত্তৰণ্ণনা

১৩১. অট্ঠমে ইদং তে মানস্মিন্তি এত্থ মানস্মিন্তি পচ্চত্তে ভুম্মৰচনং. ইদন্তি চ লিঙ্গৰিপল্লাসেন নপুংসকনিদ্দেসো কতোতি আহ ‘‘অযং তে নৰৰিধেন ৰড্ঢিতমানো’’তি. সেসেসুপি এসেৰ নযো.

দুতিযঅনুরুদ্ধসুত্তৰণ্ণনা নিট্ঠিতা.

৯. পটিচ্ছন্নসুত্তৰণ্ণনা

১৩২. নৰমে অসাধারণসিক্খাপদন্তি ভিক্খুনীনং অসাধারণং ভিক্খূনংযেৰ পঞ্ঞত্তসিক্খাপদং সাধারণসিক্খাপদন্তি ভিক্খূনং ভিক্খুনীনঞ্চ সাধারণং উভতোপঞ্ঞত্তিসিক্খাপদং.

পটিচ্ছন্নসুত্তৰণ্ণনা নিট্ঠিতা.

১০. লেখসুত্তৰণ্ণনা

১৩৩. দসমে থিরট্ঠানতোতি থিরট্ঠানতোৰ. পাসাণে লেখসদিসা পরাপরাধনিব্বত্তা কোধলেখা যস্স সো পাসাণলেখূপমসমন্নাগতো পাসাণলেখূপমোতি ৰুত্তো. এৰং ইতরেপি. অনুসেতীতি অপ্পহীনতায অনুসেতি. ন খিপ্পং লুজ্জতীতি ন অন্তরা নস্সতি কম্মট্ঠানেনেৰ নস্সনতো. এৰমেৰন্তি এৰং তস্সপি পুগ্গলস্স কোধো ন অন্তরা পুনদিৰসে ৰা অপরদিৰসে ৰা নিট্ঠাতি, অদ্ধনিযো পন হোতি, মরণেনেৰ নিট্ঠাতীতি অত্থো. কক্খল়েনাতি অতিকক্খল়েন ধম্মচ্ছেদকেন থদ্ধৰচনেন. সংসন্দতীতি একীভৰতি. সম্মোদতীতি নিরন্তরো হোতীতি এৰমেত্থ অত্থো দট্ঠব্বো.

অথ ৰা সন্ধিযতীতি ঠানগমনাদীসু কাযকিরিযাসু কাযেন সমোধানং গচ্ছতি, তিলতণ্ডুলা ৰিয মিস্সীভাৰং উপেতীতি অত্থো. সংসন্দতীতি চিত্তকিরিযাসু চিত্তেন সমোধানং গচ্ছতি, খীরোদকং ৰিয একীভাৰং উপেতীতি অত্থো. সম্মোদতীতি উদ্দেসপরিপুচ্ছাদীসু ৰচীকিরিযাসু ৰাচায সমোধানং গচ্ছতি, ৰিপ্পৰাসাগতোপি পিযসহাযকো ৰিয পিযতরভাৰং উপেতীতি অত্থো. অপিচ কিচ্চকরণীযেসু তেহি সদ্ধিং আদীতোৰ এককিরিযাভাৰং উপগচ্ছন্তো সন্ধিযতি, যাৰ মজ্ঝা পৰত্তন্তো সংসন্দতি, যাৰ পরিযোসানা অনিৰত্তন্তো সম্মোদতীতি ৰেদিতব্বো.

লেখসুত্তৰণ্ণনা নিট্ঠিতা.

কুসিনারৰগ্গৰণ্ণনা নিট্ঠিতা.