৪. আনেঞ্জসুত্তৰণ্ণনা

১১৭. চতুত্থে সহ ব্যযতি গচ্ছতীতি সহব্যো, সহপৰত্তনকো. তস্স ভাৰো সহব্যতা, সহপৰত্তীতি আহ ‘‘সহভাৰং উপপজ্জতী’’তি. ‘‘যাৰতকং তেসং দেৰানং আযুপ্পমাণং, তং সব্বং খেপেত্ৰা নিরযম্পি গচ্ছতী’’তিআদিৰচনতো অরূপভৰতো চুতস্স অপাযূপপত্তি ৰুত্তা ৰিয দিস্সতীতি তন্নিৰত্তনত্থং ভগৰতো অধিপ্পাযং ৰিৰরন্তো ‘‘সন্ধাযভাসিতমিদং ৰচন’’ন্তি দীপেতি ‘‘নিরযাদীহি অৰিপ্পমুত্তত্তা’’তিআদিনা. ন হি তস্স উপচারজ্ঝানতো বলৰতরং অকুসলং অত্থীতি. ইমিনা ততো চৰন্তানং উপচারজ্ঝানমেৰ পটিসন্ধিজনকং কম্মন্তি দীপেতি. অধিকং পযসতি পযুজ্জতি এতেনাতি অধিপ্পযাসো, সৰিসেসং ইতিকত্তব্বকিরিযা. তেনাহ ‘‘অধিকপ্পযোগো’’তি. সেসমেত্থ উত্তানমেৰ.

আনেঞ্জসুত্তৰণ্ণনা নিট্ঠিতা.