(৭) ২. সুখৰগ্গৰণ্ণনা

৬৫. দুতিযস্স পঠমে সব্বকামনিপ্ফত্তিমূলকং সুখন্তি অনৰসেসউপভোগপরিভোগৰত্থুনিপ্ফত্তিহেতুকং কামসুখং. পব্বজ্জামূলকং সুখন্তি পব্বজ্জাহেতুকং পৰিৰেকসুখং.

৬৬. দুতিযে কামেতি পঞ্চ কামগুণে, সব্বেপি ৰা তেভূমকে ধম্মে. ৰুত্তঞ্হেতং ‘‘সব্বেপি তেভূমকা ধম্মা কমনীযট্ঠেন কামা’’তি (মহানি. ১). নেক্খম্মং ৰুচ্চতি পব্বজ্জা ঘরবন্ধনতো নিক্খন্তত্তা. নিব্বানমেৰ ৰা –

‘‘পব্বজ্জা পঠমং ঝানং, নিব্বানঞ্চ ৰিপস্সনা;

সব্বেপি কুসলা ধম্মা, নেক্খম্মন্তি পৰুচ্চরে’’তি. (ইতিৰু. অট্ঠ. ১০৯) –

হি ৰুত্তং.

৬৭. ততিযে উপধী ৰুচ্চন্তি পঞ্চুপাদানক্খন্ধা, তন্নিস্সিতং সুখং উপধিসুখং. তপ্পটিপক্খতো নিরুপধিসুখং লোকুত্তরসুখং.

৬৮. চতুত্থে ৰট্টপরিযাপন্নং সুখং ৰট্টসুখং. নিব্বানারম্মণং সুখং ৰিৰট্টসুখং.

৬৯. পঞ্চমে সংকিলেসন্তি সংকিলিট্ঠং. তেনাহ ‘‘ৰট্টগামিসুখ’’ন্তি. ৰিৰট্টসুখন্তি মগ্গফলসহগতং সুখং.

৭০. ছট্ঠে অরিযানমেৰ সুখং অরিযসুখং, অরিযঞ্চ তং সুখঞ্চাতিপি অরিযসুখং. অনরিযানমেৰ সুখং অনরিযসুখং. অনরিযঞ্চ তং সুখঞ্চাতিপি অনরিযসুখং.

৭১. সত্তমে তন্তি চেতসিকসুখং.

৭২. অট্ঠমে সহ পীতিযা ৰত্ততীতি সপ্পীতিকং, পীতিসহগতং সুখং. সভাৰতো ৰিরাগতো চ নত্থি এতস্স পীতীতি নিপ্পীতিকং সুখং. অট্ঠকথাযং পনেত্থ ঝানসুখমেৰ উদ্ধটং, তথা চ ‘‘লোকিযসপ্পীতিকসুখতো লোকিযনিপ্পীতিকসুখং অগ্গ’’ন্তি ৰুত্তং. লোকিযনিপ্পীতিকম্পি হি অগ্গং লব্ভতেৰাতি ভূমন্তরং ভিন্দিত্ৰা অগ্গভাৰো ৰেদিতব্বো.

৭৩. নৰমে সাতসভাৰমেৰ সুখং সাতসুখং, ন উপেক্খাসুখং ৰিয অসাতসভাৰং. কামঞ্চেত্থ কাযৰিঞ্ঞাণসহগতম্পি সাতসুখমেৰ, অট্ঠকথাযং পন ‘‘তীসু ঝানেসু সুখ’’ন্তেৰ ৰুত্তং.

৭৪. দসমে সমাধিসম্পযুত্তং সুখং সমাধিসুখং. ন সমাধিসম্পযুত্তং সুখং অসমাধিসুখং.

৭৫. একাদসমে সুত্তন্তকথা এসাতি ‘‘সপ্পীতিকং ঝানদ্ৰয’’ন্তি ৰুত্তং.

৭৭. তেরসমে রূপজ্ঝানং রূপং উত্তরপদলোপেন, তং আরম্মণং এতস্সাতি রূপারম্মণং. চতুত্থজ্ঝানগ্গহণং পন যদস্স পটিযোগী, তেন সমানযোগক্খমদস্সনপরং. যং কিঞ্চি রূপন্তি যং কিঞ্চি রুপ্পনলক্খণং রূপং. তপ্পটিক্খেপেন অরূপং ৰেদিতব্বং.

সুখৰগ্গৰণ্ণনা নিট্ঠিতা.