৫. উপঞ্ঞাতসুত্তৰণ্ণনা

৫. পঞ্চমে ইমঞ্হি ধম্মদ্ৰযন্তি কুসলেসু ধম্মেসু অসন্তুট্ঠিতা, পধানস্মিং অনোসক্কনসঙ্খাতং ধম্মদ্ৰযং. ইমিনাতি ‘‘অসন্তুট্ঠিতা কুসলেসু ধম্মেসূ’’তি ৰচনেন. ইমং দীপেতীতি ‘‘যাৰ সো উপ্পজ্জতি, ন তাৰাহং সন্তুট্ঠো অহোসি’’ন্তি এতং পরিযন্তং কত্ৰা ৰক্খমানত্থং দীপেতি. পধানস্মিন্তি ৰীরিযারম্ভে. ইমমত্থন্তি ‘‘পধানস্মিঞ্চা’’তিআদিনা ৰুত্তমত্থং. ৰীরিযপ্পৰাহে ৰত্তমানে অন্তরা এৰ পটিগমনং নিৰত্তনং পটিৰানং, তদস্স অত্থীতি পটিৰানী, ন পটিৰানী অপ্পটিৰানী, তস্স ভাৰো অপ্পটিৰানিতা, অনোসক্কনাতি আহ ‘‘অপ্পটিৰানিতাতি অপ্পটিক্কমনা অনোসক্কনা’’তি. তত্থ অনোসক্কনাতি অপ্পটিনিৰত্তি.

আগমনীযপটিপদাতি সমথৰিপস্সনাসঙ্খাতা পুব্বভাগপটিপত্তি. সা হি আগচ্ছন্তি ৰিসেসমধিগচ্ছন্তি এতায, আগচ্ছতি ৰা ৰিসেসাধিগমো এতাযাতি আগমনীযা, সা এৰ পটিপজ্জিতব্বতো পটিপদাতি আগমনীযপটিপদা. অপ্পটিৰানপধানন্তি ওসক্কনারহিতপ্পধানং, অন্তরা অনোসক্কিত্ৰা কতৰীরিযন্তি অত্থো.

উপঞ্ঞাতসুত্তৰণ্ণনা নিট্ঠিতা.