(১১) ১. আসাদুপ্পজহৰগ্গৰণ্ণনা

১১৯. ততিযপণ্ণাসকস্স পঠমে দুক্খেন পজহিতব্বাতি দুপ্পজহা. দুচ্চজাতিআদীসুপি এসেৰ নযো. দ্ৰিন্নং আসানং দুচ্চজভাৰো কথং জানিতব্বোতি পঠমং তাৰ লাভাসায দুচ্চজভাৰং ৰিভাৰেতি ‘‘লাভাসাযা’’তিআদিনা. উভতোব্যূল়্হন্তি যুদ্ধত্থায উভতো সন্নিপতিতং. পক্খন্দন্তীতি অনুপ্পৰিসন্তি. জীৰিতাসায দুপ্পজহত্তাতিআদিনা জীৰিতাসায দুচ্চজভাৰং ৰিভাৰেতি.

১২০. দুতিযে দুল্লভাতি ন সুলভা. ইণং দেমীতি সঞ্ঞং করোতীতি এৰং সঞ্ঞং করোন্তো ৰিয হোতীতি অত্থো. এত্থ চ ‘‘পুব্বকারীতি পঠমং উপকারস্স কারকো. কতঞ্ঞূ কতৰেদীতি তেন কতং ঞত্ৰা পচ্ছা কারকো. তেসু পুব্বকারী ‘ইণং দেমী’তি সঞ্ঞং করোতি, পচ্ছা কারকো ‘ইণং জীরাপেমী’তি সঞ্ঞং করোতী’’তি এত্তকমেৰ ইধ ৰুত্তং. পুগ্গলপণ্ণত্তিসংৰণ্ণনাযং (পু. প. অট্ঠ. ৮৩) পন –

‘‘পুব্বকারীতি পঠমমেৰ কারকো. কতৰেদীতি কতং ৰেদেতি, ৰিদিতং পাকটং করোতি. তে অগারিযানগারিযেহি দীপেতব্বা. অগারিকেসু হি মাতাপিতরো পুব্বকারিনো নাম, পুত্তধীতরো পন মাতাপিতরো পটিজগ্গন্তা অভিৰাদনাদীনি তেসং কুরুমানা কতৰেদিনো নাম. অনগারিযেসু আচরিযুপজ্ঝাযা পুব্বকারিনো নাম, অন্তেৰাসিকসদ্ধিৰিহারিকা আচরিযুপজ্ঝাযে পটিজগ্গন্তা অভিৰাদনাদীনি চ তেসং কুরুমানা কতৰেদিনো নাম. তেসং আৰিভাৰত্থায উপজ্ঝাযপোসকসোণত্থেরাদীনং ৰত্থূনি কথেতব্বানি.

‘‘অপরো নযো – পরেন অকতেযেৰ উপকারে অত্তনি কতং উপকারং অনপেক্খিত্ৰা কারকো পুব্বকারী, সেয্যথাপি মাতাপিতরো চেৰ আচরিযুপজ্ঝাযা চ. সো দুল্লভো সত্তানং তণ্হাভিভূতত্তা. পরেন কতস্স উপকারস্স অনুরূপপ্পৰত্তিং অত্তনি কতং উপকারং উপকারতো জানন্তো ৰেদিযন্তো কতঞ্ঞুকতৰেদী সেয্যথাপি মাতাপিতুআচরিযুপজ্ঝাযেসু সম্মাপটিপন্নো. সোপি দুল্লভো সত্তানং অৰিজ্জাভিভূতত্তা. অপিচ অকারণৰচ্ছলো পুব্বকারী, সকারণৰচ্ছলো কতঞ্ঞুকতৰেদী. ‘করিস্সতি মে’তি এৰমাদিকারণনিরপেক্খকিরিযো পুব্বকারী, ‘করিস্সতি মে’তি এৰমাদিকারণসাপেক্খকিরিযো কতঞ্ঞুকতৰেদী. তমোজোতিপরাযণো পুব্বকারী, জোতিজোতিপরাযণো কতঞ্ঞুকতৰেদী. দেসেতা পুব্বকারী, পটিপজ্জিতা কতঞ্ঞুকতৰেদী. সদেৰকে লোকে অরহং সম্মাসম্বুদ্ধো পুব্বকারী, অরিযসাৰকো কতঞ্ঞুকতৰেদী’’তি ৰুত্তং.

তত্থ কারণেন ৰিনা পৰত্তহিতচিত্তো অকারণৰচ্ছলো. অনাগতম্হি পযোজনং অপেক্খমানো ‘‘করিস্সতি মে’’তিআদিনা চিত্তেন পঠমং গহিতং তাদিসং কতং উপাদায কতঞ্ঞূ এৰ নাম হোতি, ন পুব্বকারীতি অধিপ্পাযেন ‘‘করিস্সতি মেতি এৰমাদিকারণসাপেক্খকিরিযো কতঞ্ঞুকতৰেদী’’তি ৰুত্তং. তমোজোতিপরাযণো পুঞ্ঞফলানি অনুপজীৰন্তো এৰ পুঞ্ঞানি করোতীতি ‘‘পুব্বকারী’’তি ৰুত্তো. পুঞ্ঞফলং উপজীৰন্তো হি কতঞ্ঞুপক্খে তিট্ঠতি.

১২১. ততিযে তিত্তোতি সুহিতো পরিযোসিতো নিট্ঠিতকিচ্চতায নিরুস্সুক্কো. গুণপারিপূরিযা হি পরিপুণ্ণো যাৰদত্থো ইধ তিত্তো ৰুত্তো. তপ্পেতাতি অঞ্ঞেসম্পি তিত্তিকরো. পচ্চেকবুদ্ধো চ তথাগতসাৰকো চ খীণাসৰো তিত্তোতি এত্থ পচ্চেকবুদ্ধো নৰলোকুত্তরধম্মেহি সযং তিত্তো পরিপুণ্ণো, অঞ্ঞং পন তপ্পেতুং ন সক্কোতি. তস্স হি ধম্মকথায অভিসমযো ন হোতি, সাৰকানং পন ধম্মকথায অপরিমাণানং দেৰমনুস্সানং অভিসমযো হোতি. এৰং সন্তেপি যস্মা তে ধম্মং দেসেন্তা ন অত্তনো ৰচনং কত্ৰা কথেন্তি, বুদ্ধানং ৰচনং কত্ৰা কথেন্তি, সোতুং নিসিন্নপরিসাপি – ‘‘অযং ভিক্খু ন অত্তনা পটিৰিদ্ধং ধম্মং কথেতী’’তি চিত্তীকারং করোতি. ইতি সো চিত্তীকারো বুদ্ধানংযেৰ হোতি. এৰং তত্থ সম্মাসম্বুদ্ধোৰ তপ্পেতা নাম. যথা হি ‘‘অসুকস্স নাম ইদঞ্চিদঞ্চ দেথা’’তি রঞ্ঞা আণত্তে কিঞ্চাপি আনেত্ৰা দেন্তি, অথ খো রাজাৰ তত্থ দাযকো. যেহিপি লদ্ধং হোতি, তে ‘‘রঞ্ঞা অম্হাকং ঠানন্তরং দিন্নং, ইস্সরিযৰিভৰো দিন্নো’’ত্ৰেৰ গণ্হন্তি, ন ‘‘রাজপুরিসেহী’’তি এৰংসম্পদমিদং ৰেদিতব্বং.

১২২. চতুত্থে দুত্তপ্পযাতি অতপ্পযা, ন সক্কা কেনচি তপ্পেতুং. যো হি উপট্ঠাককুলং ৰা ঞাতিকুলং ৰা নিস্সায ৰসমানো চীৰরে জিণ্ণে তেহি দিন্নং চীৰরং নিক্খিপতি, ন পরিভুঞ্জতি. পুনপ্পুনং দিন্নম্পি গহেত্ৰা নিক্খিপতেৰ. যো চ তেনেৰ নযেন লদ্ধং লদ্ধং ৰিস্সজ্জেতি, পরস্স দেতি, পুনপ্পুনং লদ্ধম্পি তথেৰ করোতি. ইমে দ্ৰে পুগ্গলা সকটেহিপি পচ্চযে উপনেন্তেন তপ্পেতুং ন সক্কাতি দুত্তপ্পযা.

১২৩. পঞ্চমে ন ৰিস্সজ্জেতীতি অত্তনো অকত্ৰা পরস্স ন দেতি, অতিরেকে পন সতি ন নিক্খিপতি, পরস্স দেতি. তেনেৰাহ ‘‘সব্বংযেৰ পরেসং ন দেতী’’তিআদি. ইদং ৰুত্তং হোতি ‘‘যো ভিক্খু উপট্ঠাককুলা ৰা ঞাতিকুলা ৰা জিণ্ণচীৰরো সাটকং লভিত্ৰা চীৰরং কত্ৰা পরিভুঞ্জতি ন নিক্খিপতি, অগ্গল়ং দত্ৰা পারুপন্তোপি পুনপি দিয্যমানে সহসা নপ্পটিগ্গণ্হাতি. যো চ লদ্ধং লদ্ধং অত্তনা পরিভুঞ্জতি, পরেসং ন দেতি. ইমে দ্ৰেপি সুখেন সক্কা তপ্পেতুন্তি সুতপ্পযা’’তি.

১২৪-১২৭. ছট্ঠসত্তমাদীনি উত্তানত্থানেৰ.

আসাদুপ্পজহৰগ্গৰণ্ণনা নিট্ঠিতা.