(৯) ৪. ধম্মৰগ্গৰণ্ণনা

৮৮. চতুত্থস্স পঠমে ফলসমাধীতি চতূসুপি অরিযফলেসু সমাধি. তথা ফলপঞ্ঞা ৰেদিতব্বা.

৮৯. দুতিযে সম্পযুত্তধম্মে পরিগ্গণ্হাতীতি পগ্গাহো. ন ৰিক্খিপতীতি অৰিক্খেপো.

৯০. ততিযে নমনট্ঠেন নামং. রুপ্পনট্ঠেন রূপং. সম্মসনচারস্স অধিপ্পেতত্তা ‘‘চত্তারো অরূপক্খন্ধা’’ত্ৰেৰ ৰুত্তং. তেনাহ ‘‘ধম্ম-কোট্ঠাসপরিচ্ছেদঞাণং নাম কথিত’’ন্তি.

৯১. চতুত্থে ৰিজাননট্ঠেন ৰিজ্জা. ৰিমুচ্চনট্ঠেন ৰিমুত্তি.

৯২. পঞ্চমে ভৰো নাম সস্সতং সদা ভাৰতো, সস্সতৰসেন উপ্পজ্জনদিট্ঠি ভৰদিট্ঠি. ৰিভৰো নাম উচ্ছেদো ৰিনাসনট্ঠেন, ৰিভৰৰসেন উপ্পজ্জনদিট্ঠি ৰিভৰদিট্ঠি. উত্তানত্থানেৰ হেট্ঠা ৰুত্তনযত্তা.

৯৫. অট্ঠমে দুক্খং ৰচো এতস্মিং ৰিপ্পটিকূলগাহিম্হি ৰিপচ্চনীকসাতে অনাদরে পুগ্গলেতি দুব্বচো, তস্স কম্মং দোৰচস্সং, তস্স দুব্বচস্স পুগ্গলস্স অনাদরিযৰসেন পৰত্তা চেতনা. তস্স ভাৰো দোৰচস্সতা. তস্স ভাৰোতি চ তস্স যথাৰুত্তস্স দোৰচস্সস্স অত্থিভাৰো, অত্থতো দোৰচস্সমেৰ. ৰিত্থারতো পনেসা ‘‘তত্থ কতমা দোৰচস্সতা? সহধম্মিকে ৰুচ্চমানে দোৰচস্সায’’ন্তি অভিধম্মে আগতা. সা অত্থতো সঙ্খারক্খন্ধো হোতি. চতুন্নং ৰা খন্ধানং এতেনাকারেন পৰত্তানং এতং অধিৰচনন্তি ৰদন্তি.

পাপযোগতো পাপা অস্সদ্ধাদযো পুগ্গলা এতস্স মিত্তাতি পাপমিত্তো, তস্স ভাৰো পাপমিত্ততা. ৰিত্থারতো পনেসা ‘‘তত্থ কতমা পাপমিত্ততা? যে তে পুগ্গলা অস্সদ্ধা দুস্সীলা অপ্পস্সুতা মচ্ছরিনো দুপ্পঞ্ঞা. যা তেসং সেৰনা নিসেৰনা সংসেৰনা ভজনা সম্ভজনা ভত্তি সম্ভত্তি তংসম্পৰঙ্কতা’’তি (ধ. স. ১৩৩৩) এৰং আগতা. সাপি অত্থতো দোৰচস্সতা ৰিয দট্ঠব্বা. যায হি চেতনায পুগ্গলো পাপসম্পৰঙ্কো নাম হোতি, সা চেতনা চত্তারোপি ৰা অরূপিনো খন্ধা তদাকারপ্পৰত্তা পাপমিত্ততা.

৯৬. নৰমে সুখং ৰচো এতস্মিং পদক্খিণগাহিম্হি অনুলোমসাতে সাদরে পুগ্গলেতি সুব্বচোতিআদিনা, কল্যাণা সদ্ধাদযো পুগ্গলা এতস্স মিত্তাতি কল্যাণমিত্তোতিআদিনা ৰুত্তৰিপরিযাযেন অত্থো ৰেদিতব্বো.

৯৭. দসমে পথৰীধাতুআদযো সুখধাতুকামধাতুআদযো চ এতাস্ৰেৰ অন্তোগধাতি এতাসু কোসল্লে দস্সিতে তাসুপি কোসল্লং দস্সিতমেৰ হোতীতি ‘‘অট্ঠারস ধাতুযো’’তি ৰুত্তং. ধাতূতি জাননন্তি ইমিনা অট্ঠারসন্নং ধাতূনং সভাৰপরিচ্ছেদিকা সৰনধারণসম্মসনপ্পটিৰেধপঞ্ঞা ৰুত্তা. তত্থ ধাতূনং সৰনধারণপঞ্ঞা সুতমযা, ইতরা ভাৰনামযা. তত্থাপি সম্মসনপঞ্ঞা লোকিযা. ৰিপস্সনা হি সা, ইতরা লোকুত্তরা. লক্খণাদিৰসেন অনিচ্চাদিৰসেন চ মনসিকরণং মনসিকারো, তত্থ কোসল্লং মনসিকারকুসলতা. অট্ঠারসন্নংযেৰ ধাতূনং সম্মসনপ্পটিৰেধপচ্চৰেক্খণপঞ্ঞা মনসিকারকুসলতা, সা আদিমজ্ঝপরিযোসানৰসেন তিধা ভিন্না. তথা হি সম্মসনপঞ্ঞা তস্সা আদি, পটিৰেধপঞ্ঞা মজ্ঝে, পচ্চৰেক্খণপঞ্ঞা পরিযোসানং.

৯৮. একাদসমে আপত্তিযোৰ আপত্তিক্খন্ধা. তা পন অন্তরাপত্তীনং অগ্গহণেন পঞ্চ, তাসং গহণেন সত্ত হোন্তীতি আহ ‘‘পঞ্চন্নঞ্চ সত্তন্নঞ্চ আপত্তিক্খন্ধান’’ন্তি. জাননন্তি ‘‘ইমা আপত্তিযো, এত্তকা আপত্তিযো, এৰঞ্চ তাসং আপজ্জনং হোতী’’তি জাননং. এৰং তিপ্পকারেন জাননপঞ্ঞা হি আপত্তিকুসলতা নাম. আপত্তিতো ৰুট্ঠাপনপ্পযোগতায কম্মভূতা ৰাচা কম্মৰাচা, তথাভূতা অনুস্সাৰনৰাচা. ‘‘ইমায কম্মৰাচায ইতো আপত্তিতো ৰুট্ঠানং হোতি, হোন্তঞ্চ পঠমে, ততিযে ৰা অনুস্সাৰনে য্য-কারং পত্তে, ‘সংৰরিস্সামী’তি ৰা পদে পরিযোসিতে হোতী’’তি এৰং তং তং আপত্তীহি ৰুট্ঠানপরিচ্ছেদজাননপঞ্ঞা আপত্তিৰুট্ঠানকুসলতা. ৰুট্ঠানন্তি চ যথাপন্নায আপত্তিযা যথা তথা অনন্তরাযতাপাদনং. এৰং ৰুট্ঠানগ্গহণেনেৰ দেসনাযপি সঙ্গহো সিদ্ধো হোতি.

ধম্মৰগ্গৰণ্ণনা নিট্ঠিতা.