১-১২. সমণসঞ্ঞাসুত্তাদিৰণ্ণনা

১০১-১১২. ততিযস্স পঠমাদীনি উত্তানানি. ছট্ঠে নিজ্জরকারণানীতি পজহনকারণানি. ইমস্মিং মগ্গো কথীযতীতি কত্ৰা ‘‘অযং হেট্ঠা…পে… পুন গহিতা’’তি ৰুত্তং. কিঞ্চাপি নিজ্জিণ্ণা মিচ্ছাদিট্ঠীতি আনেত্ৰা সম্বন্ধিতব্বং. যথা মিচ্ছাদিট্ঠি ৰিপস্সনায নিজ্জিণ্ণাপি ন সমুচ্ছিন্নাতি সমুচ্ছেদপ্পহানদস্সনত্থং পুন গহিতা, এৰং মিচ্ছাসঙ্কপ্পাদযোপি ৰিপস্সনায পহীনাপি অসমুচ্ছিন্নতায ইধ পুন গহিতাতি অযমত্থো ‘‘মিচ্ছাসঙ্কপ্পস্সা’’তিআদীসু সব্বপদেসু ৰত্তব্বোতি দস্সেতি ‘‘এৰং সব্বপদেসু যোজেতব্বো’’তি ইমিনা. এত্থ চাতি ‘‘সম্মাৰিমুত্তিপচ্চযা চ অনেকে কুসলা ধম্মা ভাৰনাপারিপূরিং গচ্ছন্তী’’তি এতস্মিং পাল়িপদে. এত্থ চ সমুচ্ছেদৰসেন চ পটিপ্পস্সদ্ধিৰসেন চ পটিপক্খধম্মানং সম্মদেৰ ৰিমুচ্চনং সম্মাৰিমুত্তি. তপ্পচ্চযা চ মগ্গফলেসু অট্ঠ ইন্দ্রিযানি ভাৰনাপারিপূরিং উপগচ্ছন্তীতি মগ্গসম্পযুত্তানিপি সদ্ধাদীনি ইন্দ্রিযানি উদ্ধটানি. মগ্গৰসেন হি ফলেসু ভাৰনাপারিপূরী নামাতি. অভিনন্দনট্ঠেনাতি অতিৰিয সিনেহনট্ঠেন. ইদঞ্হি সোমনস্সিন্দ্রিযং উক্কংসগতসাতসভাৰতো সম্পযুত্তধম্মে সিনেহন্তং তেমেন্তং ৰিয পৰত্ততি. পৰত্তসন্ততিআধিপতেয্যট্ঠেনাতি ৰিপাকসন্তানস্স জীৰনে অধিপতিভাৰেন. এৰন্তিআদি ৰুত্তস্সেৰ অত্থস্স নিগমনং. সত্তমাদীনি উত্তানত্থানি.

সমণসঞ্ঞাসুত্তাদিৰণ্ণনা নিট্ঠিতা.

সমণসঞ্ঞাৰগ্গৰণ্ণনা নিট্ঠিতা.