(১২) ২. পচ্চোরোহণিৰগ্গো

১-৪. পঠমঅধম্মসুত্তাদিৰণ্ণনা

১১৩-৬. দুতিযস্স পঠমদুতিযানি উত্তানত্থানি. ততিযে জানং জানাতীতি সব্বঞ্ঞুতঞ্ঞাণেন জানিতব্বং সব্বং জানাতি এৰ. ন হি পদেসঞাণে ঠিতো জানিতব্বং সব্বং জানাতি. উক্কট্ঠনিদ্দেসেন হি অৰিসেসগ্গহণেন চ ‘‘জান’’ন্তি ইমিনা নিরৰসেসং ঞেয্যজাতং পরিগ্গয্হতীতি তব্বিসযায জাননকিরিযায সব্বঞ্ঞুতঞ্ঞাণমেৰ করণং ভৰিতুং যুত্তং, পকরণৰসেন ‘‘ভগৰা’’তি সদ্দন্তরসন্নিধানেন চ অযমত্থো ৰিভাৰেতব্বো. পস্সিতব্বমেৰ পস্সতীতি দিব্বচক্খুপঞ্ঞাচক্খুধম্মচক্খুবুদ্ধচক্খুসমন্তচক্খুসঙ্খাতেহি ঞাণচক্খূহি পস্সিতব্বং পস্সতি এৰ. অথ ৰা জানং জানাতীতি যথা অঞ্ঞে সৰিপল্লাসা কামরূপপরিঞ্ঞাৰাদিনো জানন্তাপি ৰিপল্লাসৰসেন জানন্তি, ন এৰং ভগৰা. ভগৰা পন পহীনৰিপল্লাসত্তা জানন্তো জানাতি এৰ, দিট্ঠিদস্সনস্স অভাৰা পস্সন্তো পস্সতিযেৰাতি অত্থো. চক্খু ৰিয ভূতোতি দস্সনপরিণাযকট্ঠেন চক্খু ৰিয ভূতো. যথা হি চক্খু সত্তানং দস্সনত্থং পরিণেতি সাধেতি, এৰং লোকস্স যাথাৰদস্সনসাধনতোপি দস্সনকিচ্চপরিণাযকট্ঠেন চক্খু ৰিয ভূতো, পঞ্ঞাচক্খুমযত্তা ৰা সযম্ভুঞাণেন পঞ্ঞাচক্খুং ভূতো পত্তোতি ৰা চক্খুভূতো.

ঞাণসভাৰোতি ৰিদিতকরণট্ঠেন ঞাণসভাৰো. অৰিপরীতসভাৰট্ঠেন পরিযত্তিধম্মপ্পৰত্তনতো ৰা হদযেন চিন্তেত্ৰা ৰাচায নিচ্ছারিতধম্মমযোতি ধম্মভূতো. তেনাহ ‘‘ধম্মসভাৰো’’তি. ধম্মা ৰা বোধিপক্খিযা তেহি উপ্পন্নত্তা লোকস্স চ তদুপ্পাদনতো, অনঞ্ঞসাধারণং ৰা ধম্মং পত্তো অধিগতোতি ধম্মভূতো. সেট্ঠট্ঠেন ব্রহ্মভূতোতি আহ ‘‘সেট্ঠসভাৰো’’তি. অথ ৰা ব্রহ্মা ৰুচ্চতি মগ্গো, তেন উপ্পন্নত্তা লোকস্স চ তদুপ্পাদনতো, তঞ্চ সযম্ভুঞাণেন পত্তোতি ব্রহ্মভূতো. চতুসচ্চধম্মং ৰদতীতি ৰত্তা. চিরং সচ্চপ্পটিৰেধং পৰত্তেন্তো ৰদতীতি পৰত্তা. অত্থং নীহরিত্ৰাতি দুক্খাদিঅত্থং তত্থাপি পীল়নাদিঅত্থং উদ্ধরিত্ৰা. পরমত্থং ৰা নিব্বানং পাপযিতা নিন্নেতা. অমতাধিগমপটিপত্তিদেসনায অমতসচ্ছিকিরিযং সত্তেসু উপ্পাদেন্তো অমতং দদাতীতি অমতস্স দাতা. বোধিপক্খিযধম্মানং তদাযত্তভাৰতো ধম্মসামী. চতুত্থে নত্থি ৰত্তব্বং.

পঠমঅধম্মসুত্তাদিৰণ্ণনা নিট্ঠিতা.

৫-৪২. সঙ্গারৰসুত্তাদিৰণ্ণনা

১১৭-১৫৪. পঞ্চমে অপ্পকাতি থোকা, ন বহূ. অথাযং ইতরা পজাতি যা পনাযং অৰসেসা পজা সক্কাযদিট্ঠিতীরমেৰ অনুধাৰতি, অযমেৰ বহুতরাতি অত্থো. সম্মদক্খাতেতি সম্মা অক্খাতে সুকথিতে. ধম্মেতি তৰ দেসনাধম্মে. ধম্মানুৰত্তিনোতি তং ধম্মং সুত্ৰা তদনুচ্ছৰিকং পটিপদং পূরেত্ৰা মগ্গফলসচ্ছিকরণেন ধম্মানুৰত্তিনো. মচ্চুনো ঠানভূতন্তি কিলেসমারসঙ্খাতস্স মচ্চুনো নিৰাসট্ঠানভূতং. সুদুত্তরং তরিত্ৰা পারমেস্সন্তীতি যে জনা ধম্মানুৰত্তিনো, তে এতং সুদুত্তরং দুরতিক্কমং মারধেয্যং তরিত্ৰা অতিক্কমিত্ৰা নিব্বানপারং গমিস্সন্তি.

কণ্হং ধম্মং ৰিপ্পহাযাতি কাযদুচ্চরিতাদিভেদং অকুসলং ধম্মং জহিত্ৰা. সুক্কং ভাৰেথাতি পণ্ডিতো ভিক্খু অভিনিক্খমনতো পট্ঠায যাৰ অরহত্তমগ্গা কাযসুচরিতাদিভেদং সুক্কং ধম্মং ভাৰেয্য. ওকা অনোকমাগম্মাতি ওকং ৰুচ্চতি আলযো, অনোকং ৰুচ্চতি অনালযো. আলযতো নিক্খমিত্ৰা অনালযসঙ্খাতং নিব্বানং পটিচ্চ আরব্ভ.

তত্রাভিরতিমিচ্ছেয্যাতি যস্মিং অনালযসঙ্খাতে ৰিৰেকে নিব্বানে ইমেহি সত্তেহি দুরভিরমং, তত্রাভিরতিমিচ্ছেয্য. দুৰিধেপি কামেতি ৰত্থুকামকিলেসকামে. চিত্তক্লেসেহীতি পঞ্চহি নীৰরণেহি অত্তানং পরিযোদপেয্য ৰোদাপেয্য, পরিসোধেয্যাতি অত্থো.

সম্বোধিযঙ্গেসূতি সম্বোজ্ঝঙ্গেসু. সম্মা চিত্তং সুভাৰিতন্তি সম্মা হেতুনা নযেন চিত্তং সুট্ঠু ভাৰিতং ৰড্ঢিতং. জুতিমন্তোতি আনুভাৰৰন্তো, অরহত্তমগ্গঞাণজুতিযা খন্ধাদিভেদে ধম্মে জোতেত্ৰা ঠিতাতি অত্থো. তে লোকে পরিনিব্বুতাতি তে ইমস্মিং খন্ধাদিলোকে পরিনিব্বুতা নাম অরহত্তপ্পত্তিতো পট্ঠায কিলেসৰট্টস্স খেপিতত্তা সউপাদিসেসেন, চরিমচিত্তনিরোধেন খন্ধৰট্টস্স খেপিতত্তা অনুপাদিসেসেন চাতি দ্ৰীহি পরিনিব্বানেহি পরিনিব্বুতা, অনুপাদানো ৰিয পদীপো অপণ্ণত্তিকভাৰং গতাতি অত্থো.

ইতো পরং যাৰ ততিযো পণ্ণাসকো, তাৰ উত্তানত্থমেৰ.

সঙ্গারৰসুত্তাদিৰণ্ণনা নিট্ঠিতা.

ততিযপণ্ণাসকং নিট্ঠিতং.

৪. চতুত্থপণ্ণাসকং

১৫৫-১৬৬. চতুত্থস্স পঠমৰগ্গো উত্তানত্থোযেৰ.

১-৪৪. ব্রাহ্মণপচ্চোরোহণীসুত্তাদিৰণ্ণনা

১৬৭-২১০. দুতিযে চ পঠমাদীনি উত্তানত্থানি. দসমে পচ্ছাভূমিৰাসিনোতি পচ্চন্তদেসৰাসিনো. সেৰালমালিকাতি পাতোৰ উদকং ওরোহিত্ৰা সেৰালঞ্চেৰ উপ্পলাদীনি চ গহেত্ৰা অত্তনো উদকসুদ্ধিকভাৰজাননত্থঞ্চেৰ ‘‘লোকস্স চ উদকেন সুদ্ধি হোতী’’তি ইমস্স অত্থস্স জাননত্থঞ্চ মালং কত্ৰা পিলন্ধনকা. উদকোরোহকাতি পাতো মজ্ঝন্হে সাযন্হে চ উদকওরোহণকা. তেনাহ ‘‘সাযততিযকং উদকোরোহণানুযোগমনুযুত্তা’’তি. একাদসমাদীনি উত্তানত্থানি. চতুত্থে পণ্ণাসকে নত্থি ৰত্তব্বং.

ব্রাহ্মণপচ্চোরোহণীসুত্তাদিৰণ্ণনা নিট্ঠিতা.

চতুত্থপণ্ণাসকং নিট্ঠিতং.