৯-১০. কোকালিকসুত্তাদিৰণ্ণনা

৮৯-৯০. নৰমে (সং. নি. টী. ১.১.১৮১) কোকালিকনামকা দ্ৰে ভিক্খূ. ততো ইধাধিপ্পেতং নিদ্ধারেত্ৰা দস্সেতুং ‘‘কোযং কোকালিকো’’তি পুচ্ছা. সুত্তস্স অট্ঠুপ্পত্তিং দস্সেতুং ‘‘কস্মা চ উপসঙ্কমী’’তি পুচ্ছা. অযং কিরাতিআদি যথাক্কমং তাসং ৰিস্সজ্জনং. ৰিৰেকৰাসং ৰসিতুকামত্তা অপ্পিচ্ছতায চ মা নো কস্সচি…পে… ৰসিংসু. আঘাতং উপ্পাদেসি অত্তনো ইচ্ছাৰিঘাতনতো. থেরা ভিক্খুসঙ্ঘস্স নিয্যাদযিংসু পযুত্তৰাচায অকতত্তা থেরেহি চ অদাপিতত্তা. পুব্বেপি…পে… মঞ্ঞেতি ইমিনা থেরানং কোহঞ্ঞে ঠিতভাৰং আসঙ্কতি অৰণে ৰণং পস্সন্তো ৰিয, সুপরিসুদ্ধে আদাসতলে জল্লং উট্ঠাপেন্তো ৰিয চ.

অপরজ্ঝিত্ৰাতি ভগৰতো সম্মুখা ‘‘পাপভিক্খূ জাতা’’তি ৰত্ৰা. মহাসাৰজ্জদস্সনত্থন্তি মহাসাৰজ্জভাৰদস্সনত্থং, অযমেৰ ৰা পাঠো. মাহেৰন্তি মা এৰমাহ, মা এৰং ভণি. সদ্ধায অযো উপ্পাদো সদ্ধাযো, তং আৰহতীতি সদ্ধাযিকোতি আহ ‘‘সদ্ধায আগমকরো’’তি. সদ্ধাযিকোতি ৰা সদ্ধায অযিতব্বো, সদ্ধেয্যোতি অত্থো. তেনাহ ‘‘সদ্ধাতব্বৰচনো ৰা’’তি.

পীল়কা নাম বাহিরতো পট্ঠায অট্ঠীনি ভিন্দন্তি, ইমা পন পঠমংযেৰ অট্ঠীনি ভিন্দিত্ৰা উগ্গতা. তেনাহ ‘‘অট্ঠীনি ভিন্দিত্ৰা উগ্গতাহি পিল়কাহী’’তি. তরুণবেলুৰমত্তিযোতি তরুণবিল্লফলমত্তিযো. ৰিসগিলিতোতি খিত্তপহরণো. তঞ্চ বল়িসং ৰিসসমঞ্ঞা লোকে. আরক্খদেৰতানং সদ্দং সুত্ৰাতি পদং আনেত্ৰা সম্বন্ধো.

ব্রহ্মলোকেতি সুদ্ধাৰাসলোকে. ৰরাকোতি অনুগ্গহৰচনমেতং. হীনপরিযাযোতি কেচি. পিযসীলাতি ইমিনা এতস্মিং অত্থে নিরুত্তিনযেন পেসলাতি পদসিদ্ধীতি দস্সেতি. কবরক্খীনীতি ব্যাধিবলেন পরিভিন্নৰণ্ণতায কবরভূতানি অক্খীনি. যত্তকন্তি ভগৰতো ৰচনং অঞ্ঞথা করোন্তেন যত্তকং তযা অপরদ্ধং, তস্স পমাণং নত্থীতি অত্থো. যস্মা অনাগামিনো নাম পহীনকামচ্ছন্দব্যাপাদা হোন্তি, ত্ৰঞ্চ দিট্ঠিকামচ্ছন্দব্যাপাদৰসেন ইধাগতো, তস্মা যাৰঞ্চ তে ইদং অপরদ্ধন্তি এৰমেত্থ অত্থো দট্ঠব্বো.

অদিট্ঠিপ্পত্তোতি অপ্পত্তদিট্ঠিকো. গিলিতৰিসো ৰিয ৰিসং গিলিত্ৰা ঠিতো ৰিয. কুঠারিসদিসা মূলপচ্ছিন্দনট্ঠেন. উত্তমত্থেতি অরহত্তে. খীণাসৰোতি ৰদতি সুনক্খত্তো ৰিয অচেলং কোরক্খত্তিযং. যো অগ্গসাৰকো ৰিয পসংসিতব্বো খীণাসৰো, তং ‘‘দুস্সীলো অয’’ন্তি ৰদতি. ৰিচিনাতীতি আচিনোতি পসৰতি. পসংসিযনিন্দা তাৰ সম্পন্নগুণপরিধংসনৰসেন পৰত্তিযা সাৰজ্জতায কটুকৰিপাকা, নিন্দিযপ্পসংসা পন কথং তায সমৰিপাকাতি? তত্থ অৰিজ্জমানগুণসমারোপনেন অত্তনো পরেসঞ্চ মিচ্ছাপটিপত্তিহেতুভাৰতো পসংসিযেন তস্স সমভাৰকরণতো চ. লোকেপি হি অসূরং সূরেন সমং করোন্তো গারয্হো হোতি, পগেৰ দুপ্পটিপন্নং সুপ্পটিপন্নেন সমং করোন্তোতি.

সকেন ধনেনাতি অত্তনো সাপতেয্যেন. অযং অপ্পমত্তকো অপরাধো দিট্ঠধম্মিকত্তা সপ্পতিকারত্তা চ তস্স. অযং মহন্ততরো কলি কতূপচিতস্স সম্পরাযিকত্তা অপ্পতিকারত্তা চ.

নিরব্বুদোতি গণনাৰিসেসো এসোতি আহ ‘‘নিরব্বুদগণনাযা’’তি, সতসহস্সং নিরব্বুদানন্তি অত্থো. যমরিযগরহী নিরযং উপেতীতি এত্থ যথাৰুত্তআযুপ্পমাণং পাকতিকৰসেন অরিযূপৰাদিনা ৰুত্তন্তি ৰেদিতব্বং. অগ্গসাৰকানং পন গুণমহন্ততায ততোপি অতিৰিয মহন্ততরমেৰাতি ৰদন্তি.

অথ খো ব্রহ্মা সহম্পতীতি কো অযং ব্রহ্মা, কস্মা চ পন ভগৰন্তং উপসঙ্কমিত্ৰা এতদৰোচাতি? অযং কস্সপস্স ভগৰতো সাসনে সহকো নাম ভিক্খু অনাগামী হুত্ৰা সুদ্ধাৰাসেসু উপ্পন্নো, তত্থ সহম্পতি ব্রহ্মাতি সঞ্জানন্তি. সো পনাহং ভগৰন্তং উপসঙ্কমিত্ৰা ‘‘পদুমনিরযং কিত্তেস্সামি, ততো ভগৰা ভিক্খূনং আরোচেস্সতি, অথানুসন্ধিকুসলা ভিক্খূ তত্থাযুপ্পমাণং পুচ্ছিস্সন্তি, ভগৰা আচিক্খন্তো অরিযূপৰাদে আদীনৰং পকাসেস্সতী’’তি ইমিনা কারণেন ভগৰন্তং উপসঙ্কমিত্ৰা এতদৰোচ.

মগধরট্ঠে সংৰোহারতো মাগধকো পত্থো, তেন. পচ্চিতব্বট্ঠানস্সাতি নিরযদুক্খেন পচ্চিতব্বপ্পদেসস্স এতং অব্বুদোতি নামং. ৰস্সগণনাতি একতো পট্ঠায দসগুণিতং অব্বুদআযুম্হি ততো অপরং ৰীসতিগুণিতং নিরব্বুদাদীসু ৰস্সগণনা ৰেদিতব্বা. অযঞ্চ গণনা অপরিচিতানং দুক্করাতি ৰুত্তং ‘‘ন তং সুকরং সঙ্খাতু’’ন্তি. কেচি পন ‘‘তত্থ তত্থ পরিদেৰনানত্তেন কম্মকারণনানত্তেনপি ইমানি নামানি লদ্ধানী’’তি ৰদন্তি, অপরে ‘‘সীতনরকা এতে’’তি. সব্বত্থাতি অববাদীসু পদুমপরিযোসানেসু সব্বেসু নিরযেসু. এস নযোতি হেট্ঠিমতো উপরিমস্স ৰীসতিগুণতং অতিদিসতি. দসমে নত্থি ৰত্তব্বং.

কোকালিকসুত্তাদিৰণ্ণনা নিট্ঠিতা.

থেরৰগ্গৰণ্ণনা নিট্ঠিতা.