১. রূপাদিৰগ্গৰণ্ণনা

নিদানৰণ্ণনা

ৰিভাগৰন্তানং সভাৰৰিভাৰনং ৰিভাগদস্সনৰসেনেৰ হোতীতি পঠমং তাৰ নিপাতসুত্তৰসেন ৰিভাগং দস্সেতুং ‘‘তত্থ অঙ্গুত্তরাগমো নামা’’তিআদিমাহ. তত্থ তত্থাতি ‘‘অঙ্গুত্তরাগমস্স অত্থং পকাসযিস্সামী’’তি যদিদং ৰুত্তং, তস্মিং ৰচনে, ‘‘যস্স অত্থং পকাসযিস্সামী’’তি পটিঞ্ঞাতং, সো অঙ্গুত্তরাগমো নাম নিপাতসুত্তৰসেন এৰং ৰিভাগোতি অত্থো. অথ ৰা তত্থাতি ‘‘অঙ্গুত্তরনিস্সিতং অত্থ’’ন্তি এতস্মিং ৰচনে যো অঙ্গুত্তরাগমো ৰুত্তো, সো নিপাতসুত্তাদিৰসেন এদিসোতি অত্থো.

ইদানি তং আদিতো পট্ঠায সংৰণ্ণিতুকামো অত্তনো সংৰণ্ণনায পঠমমহাসঙ্গীতিযং নিক্খিত্তানুক্কমেন পৰত্তভাৰদস্সনত্থং ‘‘তস্স নিপাতেসু…পে… ৰুত্তং নিদানমাদী’’তিআদিমাহ. তত্থ যথাপচ্চযং তত্থ তত্থ দেসিতত্তা পঞ্ঞত্তত্তা চ ৰিপ্পকিণ্ণানং ধম্মৰিনযানং সঙ্গহেত্ৰা গাযনং কথনং সঙ্গীতি. এতেন তংতংসিক্খাপদানং সুত্তানঞ্চ আদিপরিযোসানেসু অন্তরন্তরা চ সম্বন্ধৰসেন ঠপিতং সঙ্গীতিকারৰচনং সঙ্গহিতং হোতি. সঙ্গীযমানস্স অত্থস্স মহন্ততায পূজনীযতায চ মহতী সঙ্গীতি মহাসঙ্গীতি, পঠমা মহাসঙ্গীতি পঠমমহাসঙ্গীতি, তস্সা পৰত্তিকালো পঠমমহাসঙ্গীতিকালো, তস্মিং পঠমমহাসঙ্গীতিকালে. নিদদাতি দেসনং দেসকালাদিৰসেন অৰিদিতং ৰিদিতং কত্ৰা নিদস্সেতীতি নিদানং. যো লোকিযেহি উপোগ্ঘাতোতি ৰুচ্চতি, স্ৰাযমেত্থ ‘‘এৰং মে সুত’’ন্তিআদিকো গন্থো ৰেদিতব্বো. ন ‘‘সনিদানাহং, ভিক্খৰে, ধম্মং দেসেমী’’তিআদীসু (অ. নি. ৩.১২৬) ৰিয অজ্ঝাসযাদিদেসনুপ্পত্তিহেতু. তেনেৰাহ – ‘‘এৰং মে সুতন্তিআদিকং আযস্মতা আনন্দেন পঠমমহাসঙ্গীতিকালে ৰুত্তং নিদানমাদী’’তি.

১. ‘‘সা পনেসা’’তিআদিনা বাহিরনিদানে ৰত্তব্বং অতিদিসিত্ৰা ইদানি অব্ভন্তরনিদানং আদিতো পট্ঠায সংৰণ্ণিতুং ‘‘যং পনেত’’ন্তি ৰুত্তং. তত্থ যস্মা সংৰণ্ণনং করোন্তেন সংৰণ্ণেতব্বে ধম্মে পদানি পদৰিভাগং তদত্থঞ্চ দস্সেত্ৰা ততো পরং পিণ্ডত্থাদিনিদস্সনৰসেন চ সংৰণ্ণনা কাতব্বা, তস্মা পদানি তাৰ দস্সেন্তো ‘‘এৰন্তি নিপাতপদ’’ন্তিআদিমাহ. তত্থ পদৰিভাগোতি পদানং ৰিসেসো, ন পদৰিগ্গহো. অথ ৰা পদানি চ পদৰিভাগো চ পদৰিভাগো, পদৰিগ্গহো চ পদৰিভাগো চ পদৰিভাগোতি ৰা একসেসৰসেন পদপদৰিগ্গহা পদৰিভাগসদ্দেন ৰুত্তাতি ৰেদিতব্বং. তত্থ পদৰিগ্গহো ‘‘জেতস্স ৰনং জেতৰন’’ন্তিআদিনা সমাসপদেসু দট্ঠব্বো.

অত্থতোতি পদত্থতো. তং পন পদত্থং অত্থুদ্ধারক্কমেন পঠমং এৰং-সদ্দস্স দস্সেন্তো ‘‘এৰং-সদ্দো তাৰা’’তিআদিমাহ. অৰধারণাদীতি এত্থ আদি-সদ্দেন ইদমত্থপুচ্ছাপরিমাণাদিঅত্থানং সঙ্গহো দট্ঠব্বো. তথা হি ‘‘এৰংগতানি পুথুসিপ্পাযতনানি, এৰমাদীনী’’তিআদীসু ইদং-সদ্দস্স অত্থে এৰং-সদ্দো. গত-সদ্দো হি পকারপরিযাযো, তথা ৰিধাকার-সদ্দা চ. তথা হি ৰিধযুত্তগতসদ্দে লোকিযা পকারত্থে ৰদন্তি. ‘‘এৰং সু তে সুন্হাতা সুৰিলিত্তা কপ্পিতকেসমস্সূ আমুক্কমণিকুণ্ডলাভরণা ওদাতৰত্থৰসনা পঞ্চহি কামগুণেহি সমপ্পিতা সমঙ্গীভূতা পরিচারেন্তি সেয্যথাপি ত্ৰং এতরহি সাচরিযকোতি. নো হিদং, ভো গোতমা’’তিআদীসু (দী. নি. ১.২৮৬) পুচ্ছাযং. ‘‘এৰং লহুপরিৰত্তং (অ. নি. ১.৪৮), এৰমাযুপরিযন্তো’’তি (দী. নি. ১.২৪৪; পারা. ১২) চ আদীসু পরিমাণে.

ননু চ ‘‘এৰং সু তে সুন্হাতা সুৰিলিত্তা এৰমাযুপরিযন্তো’’তি এত্থ এৰং-সদ্দেন পুচ্ছনাকারপরিমাণাকারানং ৰুত্তত্তা আকারত্থো এৰ এৰং-সদ্দোতি? ন, ৰিসেসসব্ভাৰতো. আকারমত্তৰাচকো হি এৰং-সদ্দো আকারত্থোতি অধিপ্পেতো যথা ‘‘এৰং ব্যাখো’’তিআদীসু (ম. নি. ১.২৩৪; পাচি. ৪১৭; চূল়ৰ. ৬৫), ন পন আকারৰিসেসৰাচকো. এৰঞ্চ কত্ৰা ‘‘এৰং জাতেন মচ্চেনা’’তিআদীনি (ধ. প. ৫৩) উপমাদিউদাহরণানি উপপন্নানি হোন্তি. তথা হি ‘‘যথা হি…পে… বহু’’ন্তি (ধ. প. ৫৩) এত্থ পুপ্ফরাসিট্ঠানিযতো মনুস্সূপপত্তিসপ্পুরিসূপনিস্সযসদ্ধম্মস্সৰনযোনিসোমনসিকারভোগসম্পত্তি- আদিদানাদিপুঞ্ঞকিরিযাহেতুসমুদাযতো সোভাসুগন্ধতাদিগুণযোগতো মালাগুণসদিসিযো পহূতা পুঞ্ঞকিরিযা মরিতব্বসভাৰতায মচ্চেন সত্তেন কত্তব্বাতি জোতিতত্তা পুপ্ফরাসিমালাগুণাৰ উপমা. তেসং উপমাকারো যথা-সদ্দেন অনিযমতো ৰুত্তোতি ‘‘এৰং-সদ্দো উপমাকারনিগমনত্থো’’তি ৰত্তুং যুত্তং, সো পন উপমাকারো নিযমিযমানো অত্থতো উপমাৰ হোতীতি আহ – ‘‘উপমাযং আগতো’’তি. তথা ‘‘এৰং ইমিনা আকারেন অভিক্কমিতব্ব’’ন্তিআদিনা উপদিসিযমানায সমণসারুপ্পায আকপ্পসম্পত্তিযা যো তত্থ উপদিসনাকারো, সো অত্থতো উপদেসো এৰাতি ৰুত্তং – ‘‘এৰং তে…পে… উপদেসে’’তি. তথা এৰমেতং ভগৰা, এৰমেতং সুগতাতি এত্থ ভগৰতা যথাৰুত্তমত্থং অৰিপরীততো জানন্তেহি কতং তত্থ সংৰিজ্জমানগুণানং পকারেহি হংসনং উদগ্গতাকরণং সম্পহংসনং, যো তত্থ সম্পহংসনাকারোতি যোজেতব্বং.

এৰমেৰং পনাযন্তি এত্থ গরহণাকারোতি যোজেতব্বং, সো চ গরহণাকারো ‘‘ৰসলী’’তিআদিখুংসনসদ্দসন্নিধানতো ইধ এৰং-সদ্দেন পকাসিতোতি ৰিঞ্ঞাযতি. যথা চেত্থ, এৰং উপমাকারাদযোপি উপমাদিৰসেন ৰুত্তানং পুপ্ফরাসিআদিসদ্দানং সন্নিধানতোতি দট্ঠব্বং. এৰং, ভন্তেতি খোতিআদীসু পন ধম্মস্স সাধুকং সৰনমনসিকারেন নিযোজিতেহি ভিক্খূহি অত্তনো তত্থ ঠিতভাৰস্স পটিজাননৰসেন ৰুত্তত্তা এত্থ এৰং-সদ্দো ৰচনসম্পটিচ্ছনত্থো ৰুত্তো, তেন ‘‘এৰং, ভন্তে, সাধু ভন্তে, সুট্ঠু ভন্তে’’তি ৰুত্তং হোতি. এৰঞ্চ ৰদেহীতি ‘‘যথাহং ৰদামি, এৰং সমণং আনন্দং ৰদেহী’’তি ৰদনাকারো ইদানি ৰত্তব্বো এৰং-সদ্দেন নিদস্সীযতীতি নিদস্সনত্থো ৰুত্তো. এৰং নোতি এত্থাপি তেসং যথাৰুত্তধম্মানং অহিতদুক্খাৰহভাৰে সন্নিট্ঠানজননত্থং অনুমতিগ্গহণৰসেন ‘‘নো ৰা, কথং ৰো এত্থ হোতী’’তি পুচ্ছায কতায ‘‘এৰং নো এত্থ হোতী’’তি ৰুত্তত্তা তদাকারসন্নিট্ঠানং এৰং-সদ্দেন ৰিভাৰিতন্তি ৰিঞ্ঞাযতি. সো পন তেসং ধম্মানং অহিতায দুক্খায সংৰত্তনাকারো নিযমিযমানো অৰধারণত্থো হোতীতি আহ – ‘‘এৰং নো এত্থ হোতীতিআদীসু অৰধারণে’’তি.

নানানযনিপুণন্তি একত্তনানত্তঅব্যাপারএৰংধম্মতাসঙ্খাতা, নন্দিযাৰট্টতিপুক্খলসীহৰিক্কীল়িতঅঙ্কুসদিসালোচনসঙ্খাতা ৰা আধারাদিভেদৰসেন নানাৰিধা নযা নানানযা. নযা ৰা পাল়িগতিযো, তা চ পঞ্ঞত্তিআদিৰসেন সংকিলেসভাগিযাদিলোকিযাদিতদুভযৰোমিস্সকতাদিৰসেন কুসলাদিৰসেন খন্ধাদিৰসেন সঙ্গহাদিৰসেন সমযৰিমুত্তাদিৰসেন পধানাদিৰসেন কুসলমূলাদিৰসেন তিকপট্ঠানাদিৰসেন চ নানপ্পকারাতি নানানযা, তেহি নিপুণং সণ্হং সুখুমন্তি নানানযনিপুণং. আসযোৰ অজ্ঝাসযো, তে চ সস্সতাদিভেদেন তত্থ চ অপ্পরজক্খতাদিভেদেন চ অনেকে, অত্তজ্ঝাসযাদযো এৰ ৰা সমুট্ঠানং উপ্পত্তিহেতু এতস্সাতি অনেকজ্ঝাসযসমুট্ঠানং. অত্থব্যঞ্জনসম্পন্নন্তি অত্থব্যঞ্জনপরিপুণ্ণং উপনেতব্বাভাৰতো. সঙ্কাসনপকাসনৰিৰরণৰিভজনউত্তানীকরণপঞ্ঞত্তিৰসেন ছহি অত্থপদেহি অক্খরপদব্যঞ্জনাকারনিরুত্তিনিদ্দেসৰসেন ছহি ব্যঞ্জনপদেহি চ সমন্নাগতন্তি ৰা অত্থো দট্ঠব্বো.

ৰিৰিধপাটিহারিযন্তি এত্থ পাটিহারিযপদস্স ৰচনত্থং ‘‘পটিপক্খহরণতো রাগাদিকিলেসাপনযনতো চ পাটিহারিয’’ন্তি ৰদন্তি. ভগৰতো পন পটিপক্খা রাগাদযো ন সন্তি, যে হরিতব্বা. পুথুজ্জনানম্পি ৰিগতূপক্কিলেসে অট্ঠগুণসমন্নাগতে চিত্তে হতপটিপক্খে ইদ্ধিৰিধং পৰত্ততি, তস্মা তত্থ পৰত্তৰোহারেন চ ন সক্কা ইধ ‘‘পাটিহারিয’’ন্তি ৰত্থুং. সচে পন মহাকারুণিকস্স ভগৰতো ৰেনেয্যগতা চ কিলেসা পটিপক্খা, তেসং হরণতো ‘‘পাটিহারিয’’ন্তি ৰুত্তং, এৰং সতি যুত্তমেতং. অথ ৰা ভগৰতো চ সাসনস্স চ পটিপক্খা তিত্থিযা, তেসং হরণতো পাটিহারিযং. তে হি দিট্ঠিহরণৰসেন চ দিট্ঠিপ্পকাসনে অসমত্থভাৰেন চ ইদ্ধিআদেসনানুসাসনীহি হরিতা অপনীতা হোন্তীতি. ‘‘পটী’’তি ৰা অযং সদ্দো ‘‘পচ্ছা’’তি এতস্স অত্থং বোধেতি ‘‘তস্মিং পটিপৰিট্ঠম্হি, অঞ্ঞো আগঞ্ছি ব্রাহ্মণো’’তিআদীসু (সু. নি. ৯৮৫; চূল়নি. পারাযনৰগ্গো, ৰত্থুগাথা ৪) ৰিয, তস্মা সমাহিতে চিত্তে ৰিগতূপক্কিলেসে কতকিচ্চেন পচ্ছা হরিতব্বং পৰত্তেতব্বন্তি পটিহারিযং, অত্তনো ৰা উপক্কিলেসেসু চতুত্থজ্ঝানমগ্গেহি হরিতেসু পচ্ছা হরণং পটিহারিযং, ইদ্ধিআদেসনানুসাসনিযো চ ৰিগতূপক্কিলেসেন কতকিচ্চেন চ সত্তহিতত্থং পুন পৰত্তেতব্বা, হরিতেসু চ অত্তনো উপক্কিলেসেসু পরসত্তানং উপক্কিলেসহরণানি হোন্তীতি পটিহারিযানি ভৰন্তি. পটিহারিযমেৰ পাটিহারিযং, পটিহারিযে ৰা ইদ্ধিআদেসনানুসাসনিসমুদাযে ভৰং একমেকং পাটিহারিযন্তি ৰুচ্চতি. পটিহারিযং ৰা চতুত্থজ্ঝানং মগ্গো চ পটিপক্খহরণতো, তত্থ জাতং, তস্মিং ৰা নিমিত্তভূতে, ততো ৰা আগতন্তি পাটিহারিযং. তস্স পন ইদ্ধিআদিভেদেন ৰিসযভেদেন চ বহুৰিধস্স ভগৰতো দেসনাযং লব্ভমানত্তা আহ – ‘‘ৰিৰিধপাটিহারিয’’ন্তি.

ন অঞ্ঞথাতি ভগৰতো সম্মুখা সুতাকারতো ন অঞ্ঞথাতি অত্থো, ন পন ভগৰতো দেসিতাকারতো. অচিন্তেয্যানুভাৰা হি ভগৰতো দেসনা. এৰঞ্চ কত্ৰা ‘‘সব্বপ্পকারেন কো সমত্থো ৰিঞ্ঞাতু’’ন্তি ইদং ৰচনং সমত্থিতং ভৰতি, ধারণবলদস্সনঞ্চ ন ৰিরুজ্ঝতি সুতাকারাৰিরুজ্ঝনস্স অধিপ্পেতত্তা. ন হেত্থ অত্থন্তরতাপরিহারো দ্ৰিন্নং অত্থানং একৰিসযত্তা, ইতরথা থেরো ভগৰতো দেসনায সব্বথা পটিগ্গহণে সমত্থো অসমত্থো চাতি আপজ্জেয্যাতি.

‘‘যো পরো ন হোতি, সো অত্তা’’তি এৰং ৰুত্তায নিযকজ্ঝত্তসঙ্খাতায সসন্ততিযং ৰত্তনতো তিৰিধোপি মে-সদ্দো কিঞ্চাপি একস্মিংযেৰ অত্থে দিস্সতি, করণসম্পদানসামিনিদ্দেসৰসেন পন ৰিজ্জমানভেদং সন্ধাযাহ – ‘‘মে-সদ্দো তীসু অত্থেসু দিস্সতী’’তি.

কিঞ্চাপি উপসগ্গো কিরিযং ৰিসেসেতি, জোতকভাৰতো পন সতিপি তস্মিং সুত-সদ্দো এৰ তং তমত্থং ৰদতীতি অনুপসগ্গস্স সুত-সদ্দস্স অত্থুদ্ধারে সউপসগ্গস্স গহণং ন ৰিরুজ্ঝতীতি দস্সেন্তো ‘‘সউপসগ্গো চ অনুপসগ্গো চা’’তি আহ. অস্সাতি সুতসদ্দস্স. কম্মভাৰসাধনানি ইধ সুতসদ্দে সম্ভৰন্তীতি ৰুত্তং – ‘‘উপধারিতন্তি ৰা উপধারণন্তি ৰা অত্থো’’তি. মযাতি অত্থে সতীতি যদা মে-সদ্দস্স কত্তুৰসেন করণনিদ্দেসো, তদাতি অত্থো. মমাতি অত্থে সতীতি যদা সম্বন্ধৰসেন সামিনিদ্দেসো, তদা.

সুতসদ্দসন্নিট্ঠানে পযুত্তেন এৰং-সদ্দেন সৰনকিরিযাজোতকেন ভৰিতব্বন্তি ৰুত্তং – ‘‘এৰন্তি সোতৰিঞ্ঞাণাদিৰিঞ্ঞাণকিচ্চনিদস্সন’’ন্তি. আদি-সদ্দেন সম্পটিচ্ছনাদীনং সোতদ্ৰারিকৰিঞ্ঞাণানং তদভিনীহটানঞ্চ মনোদ্ৰারিকৰিঞ্ঞাণানং গহণং ৰেদিতব্বং. সব্বেসম্পি ৰাক্যানং এৰকারত্থসহিতত্তা ‘‘সুত’’ন্তি এতস্স সুতমেৰাতি অযমত্থো লব্ভতীতি আহ – ‘‘অস্সৰনভাৰপ্পটিক্খেপতো’’তি. এতেন অৰধারণেন নিযামতং দস্সেতি. যথা চ সুতং সুতমেৰাতি নিযামেতব্বং, তং সম্মা সুতং হোতীতি আহ – ‘‘অনূনাধিকাৰিপরীতগ্গহণনিদস্সন’’ন্তি. অথ ৰা সদ্দন্তরত্থাপোহনৰসেন সদ্দো অত্থং ৰদতীতি সুতন্তি অস্সুতং ন হোতীতি অযমেতস্স অত্থোতি ৰুত্তং – ‘‘অস্সৰনভাৰপ্পটিক্খেপতো’’তি. ইমিনা দিট্ঠাদিৰিনিৰত্তনং করোতি. ইদং ৰুত্তং হোতি – ন ইদং মযা দিট্ঠং, ন সযম্ভুঞাণেন সচ্ছিকতং, অথ খো সুতং, তঞ্চ সম্মদেৰাতি. তেনেৰাহ – ‘‘অনূনাধিকাৰিপরীতগ্গহণনিদস্সন’’ন্তি. অৰধারণত্থে ৰা এৰং-সদ্দে অযমত্থযোজনা – ‘‘করীযতী’’তি তদপেক্খস্স সুত-সদ্দস্স অযমত্থো ৰুত্তো ‘‘অস্সৰনভাৰপ্পটিক্খেপতো’’তি. তেনেৰাহ – ‘‘অনূনাধিকাৰিপরীতগ্গহণনিদস্সন’’ন্তি. সৰন-সদ্দো চেত্থ কম্মত্থো ৰেদিতব্বো ‘‘সুয্যতী’’তি.

এৰং সৰনহেতুসৰনৰিসেসৰসেন পদত্তযস্স একেন পকারেন অত্থযোজনং দস্সেত্ৰা ইদানি পকারন্তরেহি তং দস্সেতুং – ‘‘তথা এৰ’’ন্তিআদি ৰুত্তং. তত্থ তস্সাতি যা সা ভগৰতো সম্মুখা ধম্মস্সৰনাকারেন পৰত্তা মনোদ্ৰারৰিঞ্ঞাণৰীথি, তস্সা. সা হি নানপ্পকারেন আরম্মণে পৰত্তিতুং সমত্থা. তথা চ ৰুত্তং – ‘‘সোতদ্ৰারানুসারেনা’’তি. নানপ্পকারেনাতি ৰক্খমানানং অনেকৰিহিতানং ব্যঞ্জনত্থগ্গহণানং নানাকারেন. এতেন ইমিস্সা যোজনায আকারত্থো এৰং-সদ্দো গহিতোতি দীপেতি. পৰত্তিভাৰপ্পকাসনন্তি পৰত্তিযা অত্থিভাৰপ্পকাসনং. সুতন্তি ধম্মপ্পকাসনন্তি যস্মিং আরম্মণে ৰুত্তপ্পকারা ৰিঞ্ঞাণৰীথি নানপ্পকারেন পৰত্তা, তস্স ধম্মত্তা ৰুত্তং, ন সুতসদ্দস্স ধম্মত্থত্তা. ৰুত্তস্সেৰত্থস্স পাকটীকরণং ‘‘অযঞ্হেত্থা’’তিআদি. তত্থ ৰিঞ্ঞাণৰীথিযাতি করণত্থে করণৰচনং, মযাতি কত্তুঅত্থে.

এৰন্তি নিদ্দিসিতব্বপ্পকাসনন্তি নিদস্সনত্থং এৰং-সদ্দং গহেত্ৰা ৰুত্তং নিদস্সেতব্বস্স নিদস্সিতব্বত্তাভাৰাভাৰতো. তেন এৰং-সদ্দেন সকলম্পি সুত্তং পচ্চামট্ঠন্তি দস্সেতি. সুতসদ্দস্স কিরিযাসদ্দত্তা সৰনকিরিযায চ সাধারণৰিঞ্ঞাণপ্পবন্ধপ্পটিবদ্ধত্তা তত্থ চ পুগ্গলৰোহারোতি ৰুত্তং – ‘‘সুতন্তি পুগ্গলকিচ্চপ্পকাসন’’ন্তি. ন হি পুগ্গলৰোহাররহিতে ধম্মপ্পবন্ধে সৰনকিরিযা লব্ভতীতি.

যস্স চিত্তসন্তানস্সাতিআদিপি আকারত্থমেৰ এৰং-সদ্দং গহেত্ৰা পুরিমযোজনায অঞ্ঞথা অত্থযোজনং দস্সেতুং ৰুত্তং. তত্থ আকারপঞ্ঞত্তীতি উপাদাপঞ্ঞত্তি এৰ ধম্মানং পৰত্তিআকারুপাদানৰসেন তথা ৰুত্তা. সুতন্তি ৰিসযনিদ্দেসোতি সোতব্বভূতো ধম্মো সৰনকিরিযাকত্তুপুগ্গলস্স সৰনকিরিযাৰসেন পৰত্তিট্ঠানন্তি কত্ৰা ৰুত্তং. চিত্তসন্তানৰিনিমুত্তস্স পরমত্থতো কস্সচি কত্তুঅভাৰেপি সদ্দৰোহারেন বুদ্ধিপরিকপ্পিতভেদৰচনিচ্ছায চিত্তসন্তানতো অঞ্ঞং ৰিয তংসমঙ্গিং কত্ৰা ৰুত্তং – ‘‘চিত্তসন্তানেন তংসমঙ্গীনো’’তি. সৰনকিরিযাৰিসযোপি সোতব্বধম্মো সৰনকিরিযাৰসেন পৰত্তচিত্তসন্তানস্স ইধ পরমত্থতো কত্তুভাৰতো, সৰনৰসেন চিত্তপৰত্তিযা এৰ ৰা সৰনকিরিযাভাৰতো তংকিরিযাকত্তু চ ৰিসযো হোতীতি কত্ৰা ৰুত্তং – ‘‘তংসমঙ্গীনো কত্তুৰিসযে’’তি. সুতাকারস্স চ থেরস্স সম্মানিচ্ছিতভাৰতো আহ – ‘‘গহণসন্নিট্ঠান’’ন্তি. এতেন ৰা অৰধারণত্থং এৰং-সদ্দং গহেত্ৰা অযমত্থযোজনা কতাতি দট্ঠব্বং.

পুব্বে সুতানং নানাৰিহিতানং সুত্তসঙ্খাতানং অত্থব্যঞ্জনানং উপধারিতরূপস্স আকারস্স নিদস্সনস্স, অৰধারণস্স ৰা পকাসনসভাৰো এৰং-সদ্দোতি তদাকারাদিউপধারণস্স পুগ্গলপঞ্ঞত্তিযা উপাদানভূতধম্মপ্পবন্ধব্যাপারতায ৰুত্তং – ‘‘এৰন্তি পুগ্গলকিচ্চনিদ্দেসো’’তি. সৰনকিরিযা পন পুগ্গলৰাদিনোপি ৰিঞ্ঞাণনিরপেক্খা নত্থীতি ৰিসেসতো ৰিঞ্ঞাণব্যাপারোতি আহ – ‘‘সুতন্তি ৰিঞ্ঞাণকিচ্চনিদ্দেসো’’তি. মেতি সদ্দপ্পৰত্তিযা একন্তেনেৰ সত্তৰিসযত্তা ৰিঞ্ঞাণকিচ্চস্স চ তত্থেৰ সমোদহিতব্বতো ‘‘মেতি উভযকিচ্চযুত্তপুগ্গলনিদ্দেসো’’তি ৰুত্তং. অৰিজ্জমানপঞ্ঞত্তিৰিজ্জমানপঞ্ঞত্তিসভাৰা যথাক্কমং এৰংসদ্দসুতসদ্দানং অত্থাতি তে তথারূপপঞ্ঞত্তিউপাদানব্যাপারভাৰেন দস্সেন্তো আহ – ‘‘এৰন্তি পুগ্গলকিচ্চনিদ্দেসো, সুতন্তি ৰিঞ্ঞাণকিচ্চনিদ্দেসো’’তি. এত্থ চ করণকিরিযাকত্তুকম্মৰিসেসপ্পকাসনৰসেন পুগ্গলব্যাপারৰিসযপুগ্গলব্যাপারনিদস্সনৰসেন গহণাকারগ্গাহকতব্বিসযৰিসেসনিদ্দেসৰসেন কত্তুকরণব্যাপারকত্তুনিদ্দেসৰসেন চ দুতিযাদযো চতস্সো অত্থযোজনা দস্সিতাতি দট্ঠব্বং.

সব্বস্সপি সদ্দাধিগমনীযস্স অত্থস্স পঞ্ঞত্তিমুখেনেৰ পটিপজ্জিতব্বত্তা সব্বপঞ্ঞত্তীনঞ্চ ৰিজ্জমানাদিৰসেন ছসু পঞ্ঞত্তিভেদেসু অন্তোগধত্তা তেসু ‘‘এৰ’’ন্তিআদীনং পঞ্ঞত্তীনং সরূপং নিদ্ধারেন্তো আহ – ‘‘এৰন্তি চ মেতি চা’’তিআদি. তত্থ এৰন্তি চ মেতি চ ৰুচ্চমানস্সত্থস্স আকারাদিনো ধম্মানং অসল্লক্খণভাৰতো অৰিজ্জমানপঞ্ঞত্তিভাৰোতি আহ – ‘‘সচ্চিকট্ঠপরমত্থৰসেন অৰিজ্জমানপঞ্ঞত্তী’’তি. তত্থ সচ্চিকট্ঠপরমত্থৰসেনাতি ভূতত্থউত্তমত্থৰসেন. ইদং ৰুত্তং হোতি – যো মাযামরীচিআদযো ৰিয অভূতত্থো, অনুস্সৰাদীহি গহেতব্বো ৰিয অনুত্তমত্থো চ ন হোতি, সো রূপসদ্দাদিসভাৰো, রুপ্পনানুভৰনাদিসভাৰো ৰা অত্থো সচ্চিকট্ঠো পরমত্থো চাতি ৰুচ্চতি, ন তথা ‘‘এৰং মে’’তিপদানং অত্থোতি. এতমেৰত্থং পাকটতরং কাতুং ‘‘কিঞ্হেত্থ ত’’ন্তিআদি ৰুত্তং. সুতন্তি পন সদ্দাযতনং সন্ধাযাহ – ‘‘ৰিজ্জমানপঞ্ঞত্তী’’তি. তেনেৰ হি ‘‘যঞ্হি তং এত্থ সোতেন উপলদ্ধ’’ন্তি ৰুত্তং. ‘‘সোতদ্ৰারানুসারেন উপলদ্ধ’’ন্তি পন ৰুত্তে অত্থব্যঞ্জনাদি সব্বং লব্ভতি. তং তং উপাদায ৰত্তব্বতোতি সোতপথমাগতে ধম্মে উপাদায তেসং উপধারিতাকারাদিনো পচ্চামসনৰসেন এৰন্তি, সসন্ততিপরিযাপন্নে খন্ধে উপাদায মেতি ৰত্তব্বত্তাতি অত্থো. দিট্ঠাদিসভাৰরহিতে সদ্দাযতনে পৰত্তমানোপি সুতৰোহারো ‘‘দুতিযং ততিয’’ন্তিআদিকো ৰিয পঠমাদীনি দিট্ঠমুতৰিঞ্ঞাতে অপেক্খিত্ৰা পৰত্তোতি আহ – ‘‘দিট্ঠাদীনি উপনিধায ৰত্তব্বতো’’তি. অস্সুতং ন হোতীতি হি সুতন্তি পকাসিতো অযমত্থোতি.

অত্তনা পটিৰিদ্ধা সুত্তস্স পকারৰিসেসা এৰন্তি থেরেন পচ্চামট্ঠাতি আহ – ‘‘অসম্মোহং দীপেতী’’তি. নানপ্পকারপ্পটিৰেধসমত্থো হোতীতি এতেন ৰক্খমানস্স সুত্তস্স নানপ্পকারতং দুপ্পটিৰিজ্ঝতঞ্চ দস্সেতি. সুতস্স অসম্মোসং দীপেতীতি সুতাকারস্স যাথাৰতো দস্সিযমানত্তা ৰুত্তং. অসম্মোহেনাতি সম্মোহাভাৰেন, পঞ্ঞায এৰ ৰা সৰনকালসম্ভূতায তদুত্তরিকালপঞ্ঞাসিদ্ধি. এৰং অসম্মোসেনাতি এত্থাপি ৰত্তব্বং. ব্যঞ্জনানং পটিৰিজ্ঝিতব্বো আকারো নাতিগম্ভীরো, যথাসুতধারণমেৰ তত্থ করণীযন্তি সতিযা ব্যাপারো অধিকো, পঞ্ঞা তত্থ গুণীভূতাতি ৰুত্তং – ‘‘পঞ্ঞাপুব্বঙ্গমাযা’’তিআদি ‘‘পঞ্ঞায পুব্বঙ্গমা’’তি কত্ৰা. পুব্বঙ্গমতা চেত্থ পধানভাৰো ‘‘মনোপুব্বঙ্গমা’’তিআদীসু (ধ. প. ১, ২) ৰিয, পুব্বঙ্গমতায ৰা চক্খুৰিঞ্ঞাণাদীসু আৰজ্জনাদীনং ৰিয অপ্পধানত্তে পঞ্ঞা পুব্বঙ্গমা এতিস্সাতি অযম্পি অত্থো যুজ্জতি, এৰং সতিপুব্বঙ্গমাযাতি এত্থাপি ৰুত্তনযানুসারেন যথাসম্ভৰমত্থো ৰেদিতব্বো. অত্থব্যঞ্জনসম্পন্নস্সাতি অত্থব্যঞ্জনপরিপুণ্ণস্স, সঙ্কাসনপ্পকাসনৰিৰরণৰিভজনউত্তানীকরণপঞ্ঞত্তিৰসেন ছহি অত্থপদেহি অক্খরপদব্যঞ্জনাকারনিরুত্তিনিদ্দেসৰসেন ছহি ব্যঞ্জনপদেহি চ সমন্নাগতস্সাতি ৰা অত্থো দট্ঠব্বো.

যোনিসোমনসিকারং দীপেতি এৰং-সদ্দেন ৰুচ্চমানানং আকারনিদস্সনাৰধারণত্থানং অৰিপরীতসদ্ধম্মৰিসযত্তাতি অধিপ্পাযো. অৰিক্খেপং দীপেতীতি ‘‘চিত্তপরিযাদানং কত্থ ভাসিত’’ন্তিআদিপুচ্ছাৰসে পকরণপ্পত্তস্স ৰক্খমানস্স সুত্তস্স সৰনং সমাধানমন্তরেন ন সম্ভৰতীতি কত্ৰা ৰুত্তং. ৰিক্খিত্তচিত্তস্সাতিআদি তস্সেৰত্থস্স সমত্থনৰসেন ৰুত্তং. সব্বসম্পত্তিযাতি অত্থব্যঞ্জনদেসকপ্পযোজনাদিসম্পত্তিযা. অৰিপরীতসদ্ধম্মৰিসযেহি ৰিয আকারনিদস্সনাৰধারণত্থেহি যোনিসোমনসিকারস্স, সদ্ধম্মস্সৰনেন ৰিয চ অৰিক্খেপস্স যথা যোনিসোমনসিকারেন ফলভূতেন অত্তসম্মাপণিধিপুব্বেকতপুঞ্ঞতানং সিদ্ধি ৰুত্তা তদৰিনাভাৰতো. এৰং অৰিক্খেপেন ফলভূতেন কারণভূতানং সদ্ধম্মস্সৰনসপ্পুরিসূপনিস্সযানং সিদ্ধি দস্সেতব্বা সিযা অস্সুতৰতো সপ্পুরিসূপনিস্সযরহিতস্স চ তদভাৰতো. ন হি ৰিক্খিত্তচিত্তোতিআদিনা সমত্থনৰচনেন পন অৰিক্খেপেন কারণভূতেন সপ্পুরিসূপনিস্সযেন চ ফলভূতস্স সদ্ধম্মস্সৰনস্স সিদ্ধি দস্সিতা. অযং পনেত্থ অধিপ্পাযো যুত্তো সিযা, সদ্ধম্মস্সৰনসপ্পুরিসূপনিস্সযা ন একন্তেন অৰিক্খেপস্স কারণং বাহিরঙ্গত্তা, অৰিক্খেপো পন সপ্পুরিসূপনিস্সযো ৰিয সদ্ধম্মস্সৰনস্স একন্তকারণন্তি. এৰম্পি অৰিক্খেপেন সপ্পুরিসূপনিস্সযসিদ্ধিজোতনা ন সমত্থিতাৰ. নো ন সমত্থিতা ৰিক্খিত্তচিত্তানং সপ্পুরিসপযিরুপাসনাভাৰস্স অত্থসিদ্ধত্তা. এত্থ চ পুরিমং ফলেন কারণস্স সিদ্ধিদস্সনং নদীপূরেন ৰিয উপরি ৰুট্ঠিসব্ভাৰস্স, দুতিযং কারণেন ফলস্স সিদ্ধিদস্সনং দট্ঠব্বং একন্তৰস্সিনা ৰিয মেঘৰুট্ঠানেন ৰুট্ঠিপ্পৰত্তিযা.

ভগৰতো ৰচনস্স অত্থব্যঞ্জনপ্পভেদপরিচ্ছেদৰসেন সকলসাসনসম্পত্তিওগাহনাকারো নিরৰসেসপরহিতপারিপূরিতাকারণন্তি ৰুত্তং – ‘‘এৰং ভদ্দকো আকারো’’তি. যস্মা ন হোতীতি সম্বন্ধো. পচ্ছিমচক্কদ্ৰযসম্পত্তিন্তি অত্তসম্মাপণিধিপুব্বেকতপুঞ্ঞতাসঙ্খাতগুণদ্ৰযং. অপরাপরং ৰুত্তিযা চেত্থ চক্কভাৰো, চরন্তি এতেহি সত্তা সম্পত্তিভৰেসূতি ৰা. যে সন্ধায ৰুত্তং – ‘‘চত্তারিমানি, ভিক্খৰে, চক্কানি, যেহি সমন্নাগতানং দেৰমনুস্সানং চতুচক্কং ৰত্ততী’’তিআদি (অ. নি. ৪.৩১). পুরিমপচ্ছিমভাৰো চেত্থ দেসনাক্কমৰসেন দট্ঠব্বো. পচ্ছিমচক্কদ্ৰযসিদ্ধিযাতি পচ্ছিমচক্কদ্ৰযস্স অত্থিতায. সম্মাপণিহিতত্তো পুব্বে চ কতপুঞ্ঞো সুদ্ধাসযো হোতি তদসিদ্ধিহেতূনং কিলেসানং দূরীভাৰতোতি আহ – ‘‘আসযসুদ্ধি সিদ্ধা হোতী’’তি. তথা হি ৰুত্তং – ‘‘সম্মাপণিহিতং চিত্তং, সেয্যসো নং ততো করে’’তি (ধ. প. ৪৩), ‘‘কতপুঞ্ঞোসি ত্ৰং, আনন্দ, পধানমনুযুঞ্জ, খিপ্পং হোহিসি অনাসৰো’’তি (দী. নি. ২.২০৭) চ. তেনেৰাহ – ‘‘আসযসুদ্ধিযা অধিগমব্যত্তিসিদ্ধী’’তি. পযোগসুদ্ধিযাতি যোনিসোমনসিকারপুব্বঙ্গমস্স ধম্মস্সৰনপ্পযোগস্স ৰিসদভাৰেন. তথা চাহ – ‘‘আগমব্যত্তিসিদ্ধী’’তি, সব্বস্স ৰা কাযৰচীপযোগস্স নিদ্দোসভাৰেন. পরিসুদ্ধকাযৰচীপযোগো হি ৰিপ্পটিসারাভাৰতো অৰিক্খিত্তচিত্তো পরিযত্তিযং ৰিসারদো হোতীতি.

নানপ্পকারপটিৰেধদীপকেনাতিআদিনা অত্থব্যঞ্জনেসু থেরস্স এৰং-সদ্দসুত-সদ্দানং অসম্মোহদীপনতো চতুপ্পটিসম্ভিদাৰসেন অত্থযোজনং দস্সেতি. তত্থ সোতপ্পভেদপটিৰেধদীপকেনাতি এতেন অযং সুত-সদ্দো এৰং-সদ্দসন্নিধানতো, ৰক্খমানাপেক্খায ৰা সামঞ্ঞেনেৰ সোতব্বধম্মৰিসেসং আমসতীতি দস্সেতি. মনোদিট্ঠিকরণানং পরিযত্তিধম্মানং অনুপেক্খনসুপ্পটিৰেধা ৰিসেসতো মনসিকারপ্পটিবদ্ধাতি তে ৰুত্তনযেন যোনিসোমনসিকারদীপকেন এৰং-সদ্দেন যোজেত্ৰা, সৰনধারণৰচীপরিচযা পরিযত্তিধম্মা ৰিসেসেন সোতাৰধানপ্পটিবদ্ধাতি তে অৰিক্খেপদীপকেন সুত-সদ্দেন যোজেত্ৰা দস্সেন্তো সাসনসম্পত্তিযা ধম্মস্সৰনে উস্সাহং জনেতি. তত্থ ধম্মাতি পরিযত্তিধম্মা. মনসা অনুপেক্খিতাতি ‘‘ইধ সীলং কথিতং, ইধ সমাধি, ইধ পঞ্ঞা, এত্তকা এত্থ অনুসন্ধযো’’তিআদিনা নযেন মনসা অনু অনু পেক্খিতা. দিট্ঠিযা সুপ্পটিৰিদ্ধাতি নিজ্ঝানক্খন্তি ভূতায, ঞাতপরিঞ্ঞাসঙ্খাতায ৰা দিট্ঠিযা তত্থ তত্থ ৰুত্তরূপারূপধম্মে ‘‘ইতি রূপং, এত্তকং রূপ’’ন্তিআদিনা সুট্ঠু ৰৰত্থপেত্ৰা পটিৰিদ্ধা.

সকলেন ৰচনেনাতি পুব্বে তীহি পদেহি ৰিসুং ৰিসুং যোজিতত্তা ৰুত্তং. অসপ্পুরিসভূমিন্তি অকতঞ্ঞুতং, ‘‘ইধেকচ্চো পাপভিক্খু তথাগতপ্পৰেদিতং ধম্মৰিনযং পরিযাপুণিত্ৰা অত্তনো দহতী’’তি (পারা. ১৯৫) এৰং ৰুত্তং অনরিযৰোহারাৰত্থং. সা এৰ অনরিযৰোহারাৰত্থা অসদ্ধম্মো. ননু চ আনন্দত্থেরস্স ‘‘মমেদং ৰচন’’ন্তি অধিমানস্স, মহাকস্সপত্থেরাদীনঞ্চ তদাসঙ্কায অভাৰতো অসপ্পুরিসভূমিসমতিক্কমাদিৰচনং নিরত্থকন্তি? নযিদমেৰং, ‘‘এৰং মে সুত’’ন্তি ৰদন্তেন অযম্পি অত্থো ৰিভাৰিতোতি দস্সনতো. কেচি পন ‘‘দেৰতানং পরিৰিতক্কাপেক্খং তথাৰচনন্তি এদিসী চোদনা অনৰকাসা’’তি ৰদন্তি. তস্মিং কির খণে একচ্চানং দেৰতানং এৰং চেতসো পরিৰিতক্কো উদপাদি ‘‘ভগৰা পরিনিব্বুতো, অযঞ্চ আযস্মা দেসনাকুসলো ইদানি ধম্মং দেসেতি, সক্যকুলপ্পসুতো তথাগতস্স ভাতা চূল়পিতুপুত্তো, কিং নু খো সযং সচ্ছিকতং ধম্মং দেসেতি, উদাহু ভগৰতো এৰ ৰচনং যথাসুত’’ন্তি, এৰং তদাসঙ্কিতপ্পকারতো অসপ্পুরিসভূমিসমোক্কমাদিতো অতিক্কমাদি ৰিভাৰিতন্তি. অত্তনো অদহন্তোতি ‘‘মমেদ’’ন্তি অত্তনি অট্ঠপেন্তো. অপ্পেতীতি নিদস্সেতি. দিট্ঠধম্মিকসম্পরাযিকপরমত্থেসু যথারহং সত্তে নেতীতি নেত্তি, ধম্মোযেৰ নেত্তি ধম্মনেত্তি.

দল়্হতরনিৰিট্ঠা ৰিচিকিচ্ছা কঙ্খা. নাতিসংসপ্পনং মতিভেদমত্তং ৰিমতি. অস্সদ্ধিযং ৰিনাসেতি ভগৰতা ভাসিতত্তা সম্মুখা চস্স পটিগ্গহিতত্তা খলিতদুরুত্তাদিগ্গহণদোসাভাৰতো চ. এত্থ চ পঞ্চমাদযো তিস্সো অত্থযোজনা আকারাদিঅত্থেসু অগ্গহিতৰিসেসমেৰ এৰং-সদ্দং গহেত্ৰা দস্সিতা, ততো পরা চতস্সো আকারত্থমেৰ এৰং-সদ্দং গহেত্ৰা ৰিভাৰিতা, পচ্ছিমা পন তিস্সো যথাক্কমং আকারত্থং নিদস্সনত্থং অৰধারণত্থঞ্চ এৰং-সদ্দং গহেত্ৰা যোজিতাতি দট্ঠব্বং.

এক-সদ্দো অঞ্ঞসেট্ঠঅসহাযসঙ্খাদীসু দিস্সতি. তথা হেস ‘‘সস্সতো অত্তা চ লোকো চ, ইদমেৰ সচ্চং মোঘমঞ্ঞন্তি ইত্থেকে অভিৰদন্তী’’তিআদীসু (ম. নি. ৩.২৭) অঞ্ঞত্থে দিস্সতি, ‘‘চেতসো একোদিভাৰ’’ন্তিআদীসু (দী. নি. ১.২২৮; পারা. ১১) সেট্ঠে, ‘‘একো ৰূপকট্ঠো’’তিআদীসু (দী. নি. ১.৪০৫; ২.২১৫; ম. নি. ১.৮০; সং. নি. ৩.৬৩; চূল়ৰ. ৪৪৫) অসহাযে ‘‘একোৰ খো, ভিক্খৰে, খণো চ সমযো চ ব্রহ্মচরিযৰাসাযা’’তিআদীসু (অ. নি. ৮.২৯) সঙ্খাযং. ইধাপি সঙ্খাযন্তি দস্সেন্তো আহ – ‘‘একন্তি গণনপরিচ্ছেদনিদ্দেসো’’তি. কালঞ্চ সমযঞ্চাতি যুত্তকালঞ্চ পচ্চযসামগ্গিঞ্চ. খণোতি ওকাসো. তথাগতুপ্পাদাদিকো হি মগ্গব্রহ্মচরিযস্স ওকাসো তপ্পচ্চযপ্পটিলাভহেতুত্তা. খণো এৰ চ সমযো. যো খণোতি চ সমযোতি চ ৰুচ্চতি, সো একো এৰাতি হি অত্থো. মহাসমযোতি মহাসমূহো. সমযোপি খোতি সিক্খাপদপূরণস্স হেতুপি. সমযপ্পৰাদকেতি দিট্ঠিপ্পৰাদকে. তত্থ হি নিসিন্না তিত্থিযা অত্তনো অত্তনো সমযং পৰদন্তীতি. অত্থাভিসমযাতি হিতপ্পটিলাভা. অভিসমেতব্বোতি অভিসমযো, অভিসমযো অত্থো অভিসমযট্ঠোতি পীল়নাদীনি অভিসমেতব্বভাৰেন একীভাৰং উপনেত্ৰা ৰুত্তানি. অভিসমযস্স ৰা পটিৰেধস্স ৰিসযভূতো অত্থো অভিসমযট্ঠোতি তানেৰ তথা একত্তেন ৰুত্তানি. তত্থ পীল়নং দুক্খসচ্চস্স তংসমঙ্গিনো হিংসনং অৰিপ্ফারিকতাকরণং. সন্তাপো দুক্খদুক্খতাদিৰসেন সন্তপনং পরিদহনং.

তত্থ সহকারিকারণে সনিজ্ঝং সমেতি সমৰেতীতি সমযো, সমৰাযো. সমেতি সমাগচ্ছতি এত্থ মগ্গব্রহ্মচরিযং তদাধারপুগ্গলেহীতি সমযো, খণো. সমেতি এত্থ, এতেন ৰা সংগচ্ছতি সত্তো, সভাৰধম্মো ৰা সহজাতাদীহি, উপ্পাদাদীহি ৰাতি সমযো, কালো. ধম্মপ্পৰত্তিমত্ততায অত্থতো অভূতোপি হি কালো ধম্মপ্পৰত্তিযা অধিকরণং করণং ৰিয চ কপ্পনামত্তসিদ্ধেন রূপেন ৰোহরীযতীতি. সমং, সহ ৰা অৰযৰানং অযনং পৰত্তি অৰট্ঠানন্তি সমযো, সমূহো যথা ‘‘সমুদাযো’’তি. অৰযৰসহাৰট্ঠানমেৰ হি সমূহোতি. অৰসেসপচ্চযানং সমাগমে এতি ফলং এতস্মা উপ্পজ্জতি পৰত্ততি চাতি সমযো, হেতু যথা ‘‘সমুদযো’’তি. সমেতি সংযোজনভাৰতো সম্বদ্ধো এতি অত্তনো ৰিসযে পৰত্ততি, দল়্হগ্গহণভাৰতো ৰা সংযুত্তা অযন্তি পৰত্তন্তি সত্তা যথাভিনিৰেসং এতেনাতি সমযো, দিট্ঠি. দিট্ঠিসংযোজনেন হি সত্তা অতিৰিয বজ্ঝন্তীতি. সমিতি সঙ্গতি সমোধানন্তি সমযো, পটিলাভো. সমস্স যানং, সম্মা ৰা যানং অপগমোতি সমযো, পহানং. অভিমুখং ঞাণেন সম্মা এতব্বো অভিসমেতব্বোতি অভিসমযো, ধম্মানং অৰিপরীতো সভাৰো. অভিমুখভাৰেন সম্মা এতি গচ্ছতি বুজ্ঝতীতি অভিসমযো, ধম্মানং অৰিপরীতসভাৰাৰবোধো. এৰং তস্মিং তস্মিং অত্থে সমযসদ্দস্স পৰত্তি ৰেদিতব্বা. সমযসদ্দস্স অত্থুদ্ধারে অভিসমযসদ্দস্স উদাহরণং ৰুত্তনযেন ৰেদিতব্বং. অস্সাতি সমযসদ্দস্স. কালো অত্থো সমৰাযাদীনং অত্থানং ইধ অসম্ভৰতো, দেসদেসকপরিসানং ৰিয সুত্তস্স নিদানভাৰেন কালস্স অপদিসিতব্বতো চ.

কস্মা পনেত্থ অনিযমিতৰসেনেৰ কালো নিদ্দিট্ঠো, ন উতুসংৰচ্ছরাদিৰসেন নিযমেত্ৰাতি আহ – ‘‘তত্থ কিঞ্চাপী’’তিআদি. উতুসংৰচ্ছরাদিৰসেন নিযমং অকত্ৰা সমযসদ্দস্স ৰচনে অযম্পি গুণো লদ্ধো হোতীতি দস্সেন্তো ‘‘যে ৰা ইমে’’তিআদিমাহ. সামঞ্ঞজোতনা হি ৰিসেসে অৰতিট্ঠতীতি. তত্থ দিট্ঠধম্মসুখৰিহারসমযো দেৰসিকং ঝানসমাপত্তীহি ৰীতিনামনকালো, ৰিসেসতো সত্তসত্তাহানি. সুপ্পকাসাতি দসসহস্সিলোকধাতুযা পকম্পনওভাসপাতুভাৰাদীহি পাকটা. যথাৰুত্তভেদেসু এৰ সমযেসু একদেসং পকারন্তরেহি সঙ্গহেত্ৰা দস্সেতুং ‘‘যো চায’’ন্তিআদিমাহ. তথা হি ঞাণকিচ্চসমযো অত্তহিতপ্পটিপত্তিসমযো চ অভিসম্বোধিসমযো, অরিযতুণ্হীভাৰসমযো দিট্ঠধম্মসুখৰিহারসমযো, করুণাকিচ্চপরহিতপ্পটিপত্তিধম্মিকথাসমযো দেসনাসমযোযেৰ.

করণৰচনেন নিদ্দেসো কতোতি সম্বন্ধো. তত্থাতি অভিধম্মৰিনযেসু. তথাতি ভুম্মকরণেহি. অধিকরণত্থো আধারত্থো. ভাৰো নাম কিরিযা, কিরিযায কিরিযন্তরলক্খণং ভাৰেনভাৰলক্খণং. তত্থ যথা কালো সভাৰধম্মপরিচ্ছিন্নো সযং পরমত্থতো অৰিজ্জমানোপি আধারভাৰেন পঞ্ঞাতো তঙ্খণপ্পৰত্তানং ততো পুব্বে পরতো চ অভাৰতো ‘‘পুব্বণ্হে জাতো, সাযন্হে গচ্ছতী’’তি চ আদীসু, সমূহো চ অৰযৰৰিনিমুত্তো অৰিজ্জমানোপি কপ্পনামত্তসিদ্ধো অৰযৰানং আধারভাৰেন পঞ্ঞাপীযতি ‘‘রুক্খে সাখা, যৰরাসিযং সম্ভূতো’’তিআদীসু, এৰং ইধাপীতি দস্সেন্তো আহ – ‘‘অধিকরণং…পে… ধম্মান’’ন্তি. যস্মিং কালে, ধম্মপুঞ্জে ৰা কামাৰচরং কুসলং চিত্তং উপ্পন্নং হোতি, তস্মিং এৰ কালে, ধম্মপুঞ্জে চ ফস্সাদযোপি হোন্তীতি অযঞ্হি তত্থ অত্থো. যথা ‘‘গাৰীসু দুয্হমানাসু গতো, দুদ্ধাসু আগতো’’তি দোহনকিরিযায গমনকিরিযা লক্খীযতি, এৰং ইধাপি ‘‘যস্মিং সমযে, তস্মিং সমযে’’তি চ ৰুত্তে ‘‘সতী’’তি অযমত্থো ৰিঞ্ঞাযমানো এৰ হোতি পদত্থস্স সত্তাৰিরহাভাৰতোতি সমযস্স সত্তাকিরিযায চিত্তস্স উপ্পাদকিরিযা, ফস্সাদীনং ভৰনকিরিযা চ লক্খীযতীতি. যস্মিং সমযেতি যস্মিং নৰমে খণে, যস্মিং যোনিসোমনসিকারাদিহেতুম্হি, পচ্চযসমৰাযে ৰা সতি কামাৰচরং কুসলং চিত্তং উপ্পন্নং হোতি, তস্মিংযেৰ খণে হেতুম্হি পচ্চযসমৰাযে চ ফস্সাদযোপি হোন্তীতি উভযত্থ সমযসদ্দে ভুম্মনিদ্দেসো কতো লক্খণভূতভাৰযুত্তোতি দস্সেন্তো আহ – ‘‘খণ…পে… লক্খীযতী’’তি.

হেতুঅত্থো করণত্থো চ সম্ভৰতি ‘‘অন্নেন ৰসতি, অজ্ঝেনেন ৰসতি, ফরসুনা ছিন্দতি, কুদালেন খণতী’’তিআদীসু ৰিয. ৰীতিক্কমঞ্হি সুত্ৰা ভিক্খুসঙ্ঘং সন্নিপাতাপেত্ৰা ওতিণ্ণে ৰত্থুস্মিং তং পুগ্গলং পটিপুচ্ছিত্ৰা ৰিগরহিত্ৰা চ তং তং ৰত্থুং ওতিণ্ণকালং অনতিক্কমিত্ৰা তেনেৰ কালেন সিক্খাপদানি পঞ্ঞাপেন্তো ভগৰা ৰিহরতি সিক্খাপদপঞ্ঞত্তিহেতুঞ্চ অপেক্খমানো ততিযপারাজিকাদীসু ৰিয.

অচ্চন্তমেৰ আরম্ভতো পট্ঠায যাৰ দেসনানিট্ঠানং পরহিতপ্পটিপত্তিসঙ্খাতেন করুণাৰিহারেন. তদত্থজোতনত্থন্তি অচ্চন্তসংযোগত্থজোতনত্থং. উপযোগৰচননিদ্দেসো কতো যথা ‘‘মাসং অজ্ঝেতী’’তি. পোরাণাতি অট্ঠকথাচরিযা. অভিলাপমত্তভেদোতি ৰচনমত্তেন ৰিসেসো. তেন সুত্তৰিনযেসু ৰিভত্তিব্যত্তযো কতোতি দস্সেতি.

ইদানি ‘‘ভগৰা’’তি ইমস্স অত্থং দস্সেন্তো আহ – ‘‘ভগৰাতি গরূ’’তিআদি. ভগৰাতি ৰচনং সেট্ঠন্তি সেট্ঠৰাচকং ৰচনং, সেট্ঠগুণসহচরণং সেট্ঠন্তি ৰুত্তং. অথ ৰা ৰুচ্চতীতি ৰচনং, অত্থো. যস্মা যো ‘‘ভগৰা’’তি ৰচনেন ৰচনীযো অত্থো, সো সেট্ঠোতি অত্থো. ভগৰাতি ৰচনমুত্তমন্তি এত্থাপি এসেৰ নযো. গারৰযুত্তোতি গরুভাৰযুত্তো গরুগুণযোগতো. গরুকরণং ৰা সাতিসযং অরহতীতি গারৰযুত্তো, গারৰারহোতি অত্থো. সিপ্পাদিসিক্খাপকা গরূ হোন্তি, ন চ গারৰযুত্তা, অযং পন তাদিসো ন হোতি, তস্মা গরূতি ৰত্ৰা গারৰযুত্তোতি ৰুত্তন্তি কেচি. ৰুত্তোযেৰ, ন ইধ ৰত্তব্বো ৰিসুদ্ধিমগ্গস্স ইমিস্সা অট্ঠকথায একদেসভাৰতোতি অধিপ্পাযো.

ধম্মসরীরং পচ্চক্খং করোতীতি ‘‘যো ৰো, আনন্দ, মযা ধম্মো চ ৰিনযো চ দেসিতো পঞ্ঞত্তো, সো ৰো মমচ্চযেন সত্থা’’তি (দী. নি. ২.২১৬) ৰচনতো ধম্মস্স সত্থুভাৰপরিযাযো ৰিজ্জতীতি কত্ৰা ৰুত্তং. ৰজিরসঙ্ঘাতসমানকাযো পরেহি অভেজ্জসরীরত্তা. ন হি ভগৰতো রূপকাযে কেনচি সক্কা অন্তরাযো কাতুন্তি. দেসনাসম্পত্তিং নিদ্দিসতি ৰক্খমানস্স সকলসুত্তস্স এৰন্তি নিদ্দিসনতো. সাৰকসম্পত্তিং নিদ্দিসতি পটিসম্ভিদাপত্তেন পঞ্চসু ঠানেসু ভগৰতা এতদগ্গে ঠপিতেন মযা মহাসাৰকেন সুতং, তঞ্চ খো মযা সুতং, ন অনুস্সুতিকং, ন পরম্পরাভতন্তি ইমস্স অত্থস্স দীপনতো. কালসম্পত্তিং নিদ্দিসতি ‘‘ভগৰা’’তি পদস্স সন্নিধানে পযুত্তস্স সমযসদ্দস্স কালস্স বুদ্ধুপ্পাদপ্পটিমণ্ডিতভাৰদীপনতো. বুদ্ধুপ্পাদপরমা হি কালসম্পদা. তেনেতং ৰুচ্চতি –

‘‘কপ্পকসাযে কলিযুগে, বুদ্ধুপ্পাদো অহো মহচ্ছরিযং;

হুতাৰহমজ্ঝে জাতং, সমুদিতমকরন্দমরৰিন্দ’’ন্তি. (দী. নি. টী. ১.১; সং. নি. টী. ১.১.১ দেৰতাসংযুত্ত);

ভগৰাতি দেসকসম্পত্তিং নিদ্দিসতি গুণৰিসিট্ঠসত্তুত্তমগরুগারৰাধিৰচনভাৰতো.

এৰংনামকে নগরেতি কথং পনেতং নগরং এৰংনামকং জাতন্তি? ৰুচ্চতে, যথা কাকন্দস্স ইসিনো নিৰাসট্ঠানে মাপিতা নগরী কাকন্দী, মাকন্দস্স নিৰাসট্ঠানে মাপিতা মাকন্দী, কুসম্বস্স নিৰাসট্ঠানে মাপিতা কোসম্বীতি ৰুচ্চতি, এৰং সৰত্থস্স ইসিনো নিৰাসট্ঠানে মাপিতা নগরী সাৰত্থীতি ৰুচ্চতি. এৰং তাৰ অক্খরচিন্তকা ৰদন্তি. অট্ঠকথাচরিযা পন ভণন্তি – ‘‘যং কিঞ্চি মনুস্সানং উপভোগপরিভোগং, সব্বমেত্থ অত্থী’’তি সাৰত্থি. সত্থসমাযোগে চ ‘কিং ভণ্ডমত্থী’তি পুচ্ছিতে ‘সব্বমত্থী’তি ৰচনমুপাদায সাৰত্থি.

‘‘সব্বদা সব্বূপকরণং, সাৰত্থিযং সমোহিতং;

তস্মা সব্বমুপাদায, সাৰত্থীতি পৰুচ্চতি. (ম. নি. অট্ঠ. ১.১৪; খু. পা. অট্ঠ. ৫.মঙ্গলসুত্তৰণ্ণনা; উদা. অট্ঠ. ৫; পটি. ম. ২.১.১৮৪);

‘‘কোসলানং পুরং রম্মং, দস্সনেয্যং মনোরমং;

দসহি সদ্দেহি অৰিৰিত্তং, অন্নপানসমাযুতং.

‘‘ৰুদ্ধিং ৰেপুল্লতং পত্তং, ইদ্ধং ফীতং মনোরমং;

আল়কমন্দাৰ দেৰানং, সাৰত্থিপুরমুত্তম’’ন্তি. (ম. নি. অট্ঠ. ১.১৪; খু. পা. অট্ঠ. ৫.মঙ্গলসুত্তৰণ্ণনা);

অৰিসেসেনাতি ন ৰিসেসেন, ৰিহারভাৰসামঞ্ঞেনাতি অত্থো. ইরিযাপথৰিহারো…পে… ৰিহারেসূতি ইরিযাপথৰিহারো দিব্বৰিহারো ব্রহ্মৰিহারো অরিযৰিহারোতি এতেসু চতূসু ৰিহারেসু. সমঙ্গিপরিদীপনন্তি সমঙ্গিভাৰপরিদীপনং. এতন্তি ৰিহরতীতি এতং পদং. তথা হি তং ‘‘ইধেকচ্চো গিহিসংসট্ঠো ৰিহরতি সহনন্দী সহসোকী’’তিআদীসু (সং. নি. ৪.২৪১) ইরিযাপথৰিহারে আগতং, ‘‘যস্মিং সমযে, ভিক্খৰে, ভিক্খু ৰিৰিচ্চেৰ কামেহি … পঠমং ঝানং উপসম্পজ্জ ৰিহরতী’’তিআদীসু (ধ. স. ৪৯৯; ৰিভ. ৬২৪) দিব্বৰিহারে, ‘‘সো মেত্তাসহগতেন চেতসা একং দিসং ফরিত্ৰা ৰিহরতী’’তিআদীসু (দী. নি. ১.৫৫৬; ৩.৩০৮; ম. নি. ১.৭৭, ৪৫৯, ৫০৯; ২.৩০৯, ৩১৫, ৪৫১, ৪৭১; ৩.২৩০, ৰিভ. ৬৪২, ৬৪৩) ব্রহ্মৰিহারে, ‘‘সো খোহং, অগ্গিৰেস্সন, তস্সাযেৰ কথায পরিযোসানে তস্মিংযেৰ পুরিমস্মিং সমাধিনিমিত্তে অজ্ঝত্তমেৰ চিত্তং সণ্ঠপেমি সন্নিসাদেমি একোদিং করোমি, সমাদহামি, যেন সুদং নিচ্চকপ্পং ৰিহরামী’’তিআদীসু (ম. নি. ১.৩৮৭) অরিযৰিহারে.

তত্থ ইরিযনং পৰত্তনং ইরিযা, কাযপ্পযোগো. তস্সা পৰত্তনূপাযভাৰতো ঠানাদি ইরিযাপথো. ঠানসমঙ্গী ৰা হি কাযেন কিঞ্চি করেয্য গমনাদীসু অঞ্ঞতরসমঙ্গী ৰা. অথ ৰা ইরিযতি পৰত্ততি এতেন অত্তভাৰো, কাযকিচ্চং ৰাতি ইরিযা, তস্সা পৰত্তিযা উপাযভাৰতো পথোতি ইরিযাপথো, ঠানাদি এৰ. সো চ অত্থতো গতিনিৰত্তিআদিআকারেন পৰত্তো চতুসন্ততিরূপপ্পবন্ধো এৰ. ৰিহরণং, ৰিহরতি এতেনাতি ৰা ৰিহারো. দিৰি ভৰো দিব্বো, তত্থ বহুলপ্পৰত্তিযা ব্রহ্মপারিসজ্জাদিদেৰলোকে ভৰোতি অত্থো. তত্থ যো দিব্বানুভাৰো, তদত্থায সংৰত্ততীতি ৰা দিব্বো, অভিঞ্ঞাভিনীহারৰসেন মহাগতিকত্তা ৰা দিব্বো, দিব্বো চ সো ৰিহারো চাতি দিব্বৰিহারো, চতস্সো রূপাৰচরসমাপত্তিযো. অরূপসমাপত্তিযোপি এত্থেৰ সঙ্গহং গচ্ছন্তি. ব্রহ্মানং, ব্রহ্মানো ৰা ৰিহারা ব্রহ্মৰিহারা, চতস্সো অপ্পমঞ্ঞাযো. অরিযো, অরিযানং ৰা ৰিহারো অরিযৰিহারো, চত্তারি সামঞ্ঞফলানি. সো হি একং ইরিযাপথবাধনন্তিআদি যদিপি ভগৰা একেনপি ইরিযাপথেন চিরতরং কালং অত্তভাৰং পৰত্তেতুং সক্কোতি, তথাপি উপাদিন্নকসরীরস্স অযং সভাৰোতি দস্সেতুং ৰুত্তং. যস্মা ৰা ভগৰা যত্থ কত্থচি ৰসন্তো ৰেনেয্যানং ধম্মং দেসেন্তো নানাসমাপত্তীহি চ কালং ৰীতিনামেন্তো ৰসতীতি সত্তানং অত্তনো চ ৰিৰিধহিতসুখং হরতি উপনেতি উপ্পাদেতি, তস্মা ৰিৰিধং হরতীতি ৰিহরতীতি এৰমেত্থ অত্থো ৰেদিতব্বো.

জেতস্স রাজকুমারস্সাতি এত্থ অত্তনো পচ্চত্থিকজনং জিনাতীতি জেতো. সোতসদ্দো ৰিয হি কত্তুসাধনো জেতসদ্দো. অথ ৰা রঞ্ঞা পসেনদিকোসলেন অত্তনো পচ্চত্থিকজনে জিতে জাতোতি জেতো. রঞ্ঞো হি জযং আরোপেত্ৰা কুমারো জিতৰাতি জেতোতি ৰুত্তো. মঙ্গলকামতায ৰা তস্স এৰংনামমেৰ কতন্তি জেতো. মঙ্গলকামতায হি জেয্যোতি এতস্মিং অত্থে জেতোতি ৰুত্তং. ৰিত্থারো পনাতিআদিনা ‘‘অনাথপিণ্ডিকস্স আরামে’’তি এত্থ সুদত্তো নাম সো, গহপতি, মাতাপিতূহি কতনামৰসেন, সব্বকামসমিদ্ধতায পন ৰিগতমচ্ছেরতায করুণাদিগুণসমঙ্গিতায চ নিচ্চকালং অনাথানং পিণ্ডমদাসি. তেন অনাথপিণ্ডিকোতি সঙ্খং গতো. আরমন্তি এত্থ পাণিনো, ৰিসেসেন ৰা পব্বজিতাতি আরামো, তস্স পুপ্ফফলাদিসোভায নাতিদূরনচ্চাসন্নতাদিপঞ্চৰিধসেনাসনঙ্গসম্পত্তিযা চ ততো ততো আগম্ম রমন্তি অভিরমন্তি, অনুক্কণ্ঠিতা হুত্ৰা নিৰসন্তীতি অত্থো. ৰুত্তপ্পকারায ৰা সম্পত্তিযা তত্থ তত্থ গতেপি অত্তনো অব্ভন্তরংযেৰ আনেত্ৰা রমেতীতি আরামো. সো হি অনাথপিণ্ডিকেন গহপতিনা জেতস্স রাজকুমারস্স হত্থতো অট্ঠারসহিরঞ্ঞকোটীহি সন্থারেন কিণিত্ৰা অট্ঠারসহিরঞ্ঞকোটীহি সেনাসনানি কারাপেত্ৰা অট্ঠারসহিরঞ্ঞকোটীহি ৰিহারমহং নিট্ঠাপেত্ৰা এৰং চতুপঞ্ঞাসহিরঞ্ঞকোটিপরিচ্চাগেন বুদ্ধপ্পমুখস্স ভিক্খুসঙ্ঘস্স নিয্যাতিতো, তস্মা ‘‘অনাথপিণ্ডিকস্স আরামো’’তি ৰুচ্চতীতি ইমমত্থং নিদস্সেতি.

তত্থাতি ‘‘একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে’’তি যং ৰুত্তং ৰাক্যং, তত্থ. সিযাতি কস্সচি এৰং পরিৰিতক্কো সিযা, ৰক্খমানাকারেন কদাচি চোদেয্য ৰাতি অত্থো. অথ তত্থ ৰিহরতীতি যদি জেতৰনে অনাথপিণ্ডিকস্স আরামে ৰিহরতি. ন ৰত্তব্বন্তি নানাঠানভূতত্তা সাৰত্থিজেতৰনানং, ‘‘একং সময’’ন্তি চ ৰুত্তত্তাতি অধিপ্পাযো. ইদানি চোদকো তমেৰ অত্তনো অধিপ্পাযং ‘‘ন হি সক্কা’’তিআদিনা ৰিৰরতি. ইতরো সব্বমেতং অৰিপরীতং অত্থং অজানন্তেন তযা ৰুত্তন্তি দস্সেন্তো ‘‘ন খো পনেতং এৰং দট্ঠব্ব’’ন্তিআদিমাহ. তত্থ এতন্তি ‘‘সাৰত্থিযং ৰিহরতি জেতৰনে অনাথপিণ্ডিকস্স আরামে’’তি এতং ৰচনং. এৰন্তি ‘‘যদি তাৰ ভগৰা’’তিআদিনা যং তং ভৰতা চোদিতং, তং অত্থতো এৰং ন খো পন দট্ঠব্বং, ন উভযত্থ অপুব্বং অচরিমং ৰিহারদস্সনত্থন্তি অত্থো. ইদানি অত্তনা যথাধিপ্পেতং অৰিপরীতমত্থং, তস্স চ পটিকচ্চেৰ ৰুত্তভাৰং, তেন চ অপ্পটিৰিদ্ধতং পকাসেন্তো ‘‘ননু অৰোচুম্হ…পে… জেতৰনে’’তি আহ. এৰম্পি ‘‘জেতৰনে অনাথপিণ্ডিকস্স আরামে ৰিহরতি’’চ্চেৰ ৰত্তব্বং, ন ‘‘সাৰত্থিয’’ন্তি চোদনং মনসি কত্ৰা ৰুত্তং – ‘‘গোচরগামনিদস্সনত্থ’’ন্তিআদি.

অৰস্সঞ্চেত্থ গোচরগামকিত্তনং কত্তব্বং. তথা হি তং যথা জেতৰনাদিকিত্তনং পব্বজিতানুগ্গহকরণাদিঅনেকপ্পযোজনং, এৰং গোচরগামকিত্তনম্পি গহট্ঠানুগ্গহকরণাদিৰিৰিধপযোজনন্তি দস্সেন্তো ‘‘সাৰত্থিৰচনেনা’’তিআদিমাহ. তত্থ পচ্চযগ্গহণেন উপসঙ্কমপযিরুপাসনানং ওকাসদানেন ধম্মদেসনায সরণেসু সীলেসু চ পতিট্ঠাপনেন যথূপনিস্সযং উপরিৰিসেসাধিগমাৰহনেন চ গহট্ঠানুগ্গহকরণং, উগ্গহপরিপুচ্ছানং কম্মট্ঠানানুযোগস্স চ অনুরূপৰসনট্ঠানপরিগ্গহেনেত্থ পব্বজিতানুগ্গহকরণং ৰেদিতব্বং. করুণায উপগমনং, ন লাভাদিনিমিত্তং. পঞ্ঞায অপগমনং, ন ৰিরোধাদিনিমিত্তন্তি উপগমনাপগমনানং নিরুপক্কিলেসতং ৰিভাৰেতি. ধম্মিকসুখং নাম অনৰজ্জসুখং. দেৰতানং উপকারবহুলতা জনৰিৰিত্ততায. পচুরজনৰিৰিত্তঞ্হি ঠানং দেৰা উপসঙ্কমিতব্বং মঞ্ঞন্তি. তদত্থপরিনিপ্ফাদনন্তি লোকত্থনিপ্ফাদনং, বুদ্ধকিচ্চসম্পাদনন্তি অত্থো. এৰমাদিনাতি আদি-সদ্দেন সাৰত্থিকিত্তনেন রূপকাযস্স অনুগ্গণ্হনং দস্সেতি, জেতৰনাদিকিত্তনেন ধম্মকাযস্স. তথা পুরিমেন পরাধীনকিরিযাকরণং, দুতিযেন অত্তাধীনকিরিযাকরণং. পুরিমেন ৰা করুণাকিচ্চং, ইতরেন পঞ্ঞাকিচ্চং. পুরিমেন চস্স পরমায অনুকম্পায সমন্নাগমং, পচ্ছিমেন পরমায উপেক্খায সমন্নাগমং দীপেতি. ভগৰা হি সব্বসত্তে পরমায অনুকম্পায অনুকম্পতি, ন চ তত্থ সিনেহদোসানুপতিতো পরমুপেক্খকভাৰতো. উপেক্খকো চ ন পরহিতসুখকরণে অপ্পোস্সুক্কো মহাকারুণিকভাৰতো. তস্স মহাকারুণিকতায লোকনাথতা, উপেক্খকতায অত্তনাথতা.

তথা হেস বোধিসত্তভূতো মহাকরুণায সঞ্চোদিতমানসো সকললোকহিতায উস্সুক্কমাপন্নো মহাভিনীহারতো পট্ঠায তদত্থনিপ্ফাদনত্থং পুঞ্ঞঞাণসম্ভারে সম্পাদেন্তো অপরিমিতং কালং অনপ্পকং দুক্খমনুভোসি, উপেক্খকতায সম্মা পতিতেহি দুক্খেহি ন ৰিকম্পিততা. মহাকারুণিকতায সংসারাভিমুখতা, উপেক্খকতায ততো নিব্বিন্দনা. তথা উপেক্খকতায নিব্বানাভিমুখতা, মহাকারুণিকতায তদধিগমো. তথা মহাকারুণিকতায পরেসং অহিংসাপনং, উপেক্খকতায সযং পরেহি অভাযনং. মহাকারুণিকতায পরং রক্খতো অত্তনো রক্খণং, উপেক্খকতায অত্তানং রক্খতো পরেসং রক্খণং. তেনস্স অত্তহিতায পটিপন্নাদীসু চতুত্থপুগ্গলভাৰো সিদ্ধো হোতি. তথা মহাকারুণিকতায সচ্চাধিট্ঠানস্স চ চাগাধিট্ঠানস্স চ পারিপূরী, উপেক্খকতায উপসমাধিট্ঠানস্স চ পঞ্ঞাধিট্ঠানস্স চ পারিপূরী. এৰং পুরিসুদ্ধাসযপ্পযোগস্স মহাকারুণিকতায লোকহিতত্থমেৰ রজ্জসম্পদাদিভৰসম্পত্তিযা উপগমনং, উপেক্খকতায তিণাযপি অমঞ্ঞমানস্স ততো অপগমনং. ইতি সুৰিসুদ্ধউপগমাপগমস্স মহাকারুণিকতায লোকহিতত্থমেৰ দানৰসেন সম্পত্তীনং পরিচ্চজনা, উপেক্খকতায চস্স ফলস্স অত্তনো অপচ্চাসীসনা. এৰং সমুদাগমনতো পট্ঠায অচ্ছরিযব্ভুতগুণসমন্নাগতস্স মহাকারুণিকতায পরেসং হিতসুখত্থং অতিদুক্করকারিতা, উপেক্খকতায কাযম্পি অনলঙ্কারিতা.

তথা মহাকারুণিকতায চরিমত্তভাৰে জিণ্ণাতুরমতদস্সনেন সঞ্জাতসংৰেগো, উপেক্খকতায উল়ারেসু দেৰভোগসদিসেসু ভোগেসু নিরপেক্খো মহাভিনিক্খমনং নিক্খমি. তথা মহাকারুণিকতায ‘‘কিচ্ছং ৰতাযং লোকো আপন্নো’’তিআদিনা (দী. নি. ২.৫৭; সং. নি. ২.৪, ১০) করুণামুখেনেৰ ৰিপস্সনারম্ভো, উপেক্খকতায বুদ্ধভূতস্স সত্ত সত্তাহানি ৰিৰেকসুখেনেৰ ৰীতিনামনং. মহাকারুণিকতায ধম্মগম্ভীরতং পচ্চৰেক্খিত্ৰা ধম্মদেসনায অপ্পোস্সুক্কনং আপজ্জিত্ৰাপি মহাব্রহ্মুনো অজ্ঝেসনাপদেসেন ওকাসকরণং, উপেক্খকতায পঞ্চৰগ্গিযাদিৰেনেয্যানং অননুরূপসমুদাচারেপি অনঞ্ঞথাভাৰো. মহাকারুণিকতায কত্থচি পটিঘাতাভাৰেনস্স সব্বত্থ অমিত্তসঞ্ঞাভাৰো, উপেক্খকতায কত্থচিপি অনুরোধাভাৰেন সব্বত্থ সিনেহসন্থৰাভাৰো. মহাকারুণিকতায পরেসং পসাদনা, উপেক্খকতায পসন্নাকারেহি ন ৰিকম্পনা. মহাকারুণিকতায ধম্মানুরাগাভাৰেন তত্থ আচরিযমুট্ঠিঅভাৰো, উপেক্খকতায সাৰকানুরাগাভাৰেন পরিৰারপরিকম্মতাভাৰো. মহাকারুণিকতায ধম্মং দেসেতুং পরেহি সংসগ্গমুপগচ্ছতোপি উপেক্খকতায ন তত্থ অভিরতি. মহাকারুণিকতায গামাদীনং আসন্নট্ঠানে ৰসতোপি উপেক্খকতায অরঞ্ঞট্ঠানে এৰ ৰিহরণং. তেন ৰুত্তং – ‘‘পুরিমেনস্স পরমায অনুকম্পায সমন্নাগমং দীপেতী’’তি.

তন্তি তত্রাতি পদং. ‘‘দেসকালপরিদীপন’’ন্তি যে দেসকালা ইধ ৰিহরণকিরিযাৰিসেসনভাৰেন ৰুত্তা, তেসং পরিদীপনন্তি দস্সেন্তো ‘‘যং সমযং…পে… দীপেতী’’তি আহ. তং-সদ্দো হি ৰুত্তস্স অত্থস্স পটিনিদ্দেসো, তস্মা ইধ কালস্স দেসস্স ৰা পটিনিদ্দেসো ভৰিতুমরহতি, ন অঞ্ঞস্স. অযং তাৰ তত্র-সদ্দস্স পটিনিদ্দেসভাৰে অত্থৰিভাৰনা. যস্মা পন ঈদিসেসু ঠানেসু তত্র-সদ্দো ধম্মদেসনাৰিসিট্ঠং দেসকালঞ্চ ৰিভাৰেতি, তস্মা ৰুত্তং – ‘‘ভাসিতব্বযুত্তে ৰা দেসকালে দীপেতী’’তি. তেন তত্রাতি যত্র ভগৰা ধম্মদেসনত্থং ভিক্খূ আলপতি ভাসতি, তাদিসে দেসে, কালে ৰাতি অত্থো. ন হীতিআদিনা তমেৰত্থং সমত্থেতি. ননু চ যত্থ ঠিতো ভগৰা ‘‘অকালো খো তাৰা’’তিআদিনা বাহিযস্স ধম্মদেসনং পটিক্খিপি, তত্থেৰ অন্তরৰীথিযং ঠিতো তস্স ধম্মং দেসেসীতি? সচ্চমেতং, অদেসেতব্বকালে অদেসনায ইদং উদাহরণং. তেনেৰাহ – ‘‘অকালো খো তাৰা’’তি.

যং পন তত্থ ৰুত্তং – ‘‘অন্তরঘরং পৰিট্ঠম্হা’’তি, তম্পি তস্স অকালভাৰস্সেৰ পরিযাযেন দস্সনত্থং ৰুত্তং. তস্স হি তদা অদ্ধানপরিস্সমেন রূপকাযে অকম্মঞ্ঞতা অহোসি, বলৰপীতিৰেগেন নামকাযে. তদুভযস্স ৰূপসমং আগমেন্তো পপঞ্চপরিহারত্থং ভগৰা ‘‘অকালো খো’’তি পরিযাযেন পটিক্খিপি. অদেসেতব্বদেসে অদেসনায পন উদাহরণং ‘‘অথ খো ভগৰা মগ্গা ওক্কম্ম অঞ্ঞতরস্মিং রুক্খমূলে নিসীদি (সং. নি. ২.১৫৪), ৰিহারপচ্ছাযাযং পঞ্ঞত্তে আসনে নিসীদী’’তি (দী. নি. ১.৩৬৩) চ এৰমাদিকং ইধ আদিসদ্দেন সঙ্গহিতং. ‘‘অথ খো সো, ভিক্খৰে, বালো ইধ পুব্বে নেসাদো ইধ পাপানি কম্মানি করিত্ৰা’’তিআদীসু (ম. নি. ৩.২৫১) পদপূরণমত্তে খো-সদ্দো, ‘‘দুক্খং খো অগারৰো ৰিহরতি অপ্পতিস্সো’’তিআদীসু (অ. নি. ৪.২১) অৰধারণে, ‘‘কিত্তাৰতা নু খো, আৰুসো, সত্থু পৰিৰিত্তস্স ৰিহরতো সাৰকা ৰিৰেকং নানুসিক্খন্তী’’তিআদীসু (ম. নি. ১.৩১) আদিকালত্থে, ৰাক্যারম্ভেতি অত্থো. তত্থ পদপূরণেন ৰচনালঙ্কারমত্তং কতং হোতি, আদিকালত্থেন ৰাক্যস্স উপঞ্ঞাসমত্তং. অৰধারণত্থেন পন নিযমদস্সনং, তস্মা আমন্তেসি এৰাতি আমন্তনে নিযমো দস্সিতো হোতি.

ভগৰাতি লোকগরুদীপনন্তি কস্মা ৰুত্তং, ননু পুব্বেপি ভগৰাসদ্দস্স অত্থো ৰুত্তোতি? যদিপি ৰুত্তো, তং পনস্স যথাৰুত্তে ঠানে ৰিহরণকিরিযায কত্তু ৰিসেসদস্সনত্থং কতং, ন আমন্তনকিরিযায, ইধ পন আমন্তনকিরিযায, তস্মা তদত্থং পুন ‘‘ভগৰা’’তি পাল়িযং ৰুত্তন্তি তস্সত্থং দস্সেতুং ‘‘ভগৰাতি লোকগরুদীপন’’ন্তি আহ. তেন লোকগরুভাৰতো তদনুরূপং পটিপত্তিং পত্থেন্তো অত্তনো সন্তিকং উপগতানং ভিক্খূনং অজ্ঝাসযানুরূপং ধম্মং দেসেতুং তে আমন্তেসীতি দস্সেতি. কথাসৰনযুত্তপুগ্গলৰচনন্তি ৰক্খমানায চিত্তপরিযাদানদেসনায সৰনযোগ্গপুগ্গলৰচনং. চতূসুপি পরিসাসু ভিক্খূ এৰ এদিসানং দেসনানং ৰিসেসেন ভাজনভূতাতি সাতিসযং সাসনসম্পটিগ্গাহকভাৰদস্সনত্থং ইধ ভিক্খুগ্গহণন্তি দস্সেত্ৰা ইদানি সদ্দত্থং দস্সেতুং ‘‘অপিচা’’তিআদিমাহ. তত্থ ভিক্খকোতি ভিক্খূতি ভিক্খনধম্মতায ভিক্খূতি অত্থো. ভিক্খাচরিযং অজ্ঝুপগতোতি বুদ্ধাদীহি অজ্ঝুপগতং ভিক্খাচরিযং, উঞ্ছাচরিযং, অজ্ঝুপগতত্তা অনুট্ঠিতত্তা ভিক্খু. যো হি অপ্পং ৰা মহন্তং ৰা ভোগক্খন্ধং পহায অগারস্মা অনগারিযং পব্বজিতো, সো কসিগোরক্খাদিজীৰিকাকপ্পনং হিত্ৰা লিঙ্গসম্পটিচ্ছনেনেৰ ভিক্খাচরিযং অজ্ঝুপগতত্তা ভিক্খু, পরপ্পটিবদ্ধজীৰিকত্তা ৰা ৰিহারমজ্ঝে কাজভত্তং ভুঞ্জমানোপি ভিক্খাচরিযং অজ্ঝুপগতোতি ভিক্খু, পিণ্ডিযালোপভোজনং নিস্সায পব্বজ্জায উস্সাহজাতত্তা ৰা ভিক্খাচরিযং অজ্ঝুপগতোতি ভিক্খূতি এৰমেত্থ অত্থো দট্ঠব্বো. আদিনা নযেনাতি ‘‘ছিন্নভিন্নপটধরোতি ভিক্খু, ভিন্দতি পাপকে অকুসলে ধম্মেতি ভিক্খু, ভিন্নত্তা পাপকানং অকুসলানং ধম্মানং ভিক্খূ’’তিআদিনা (ৰিভ. ৫১০) ৰিভঙ্গে আগতনযেন. ঞাপনেতি অৰবোধনে, পটিৰেদনেতি অত্থো.

ভিক্খনসীলতাতি ভিক্খনেন জীৰনসীলতা, ন কসিৰাণিজ্জাদিনা জীৰনসীলতা. ভিক্খনধম্মতাতি ‘‘উদ্দিস্স অরিযা তিট্ঠন্তী’’তি (জা. ১.৭.৫৯) এৰং ৰুত্তা ভিক্খনসভাৰতা, ন যাচনকোহঞ্ঞসভাৰতা. ভিক্খনে সাধুকারিতাতি ‘‘উত্তিট্ঠে নপ্পমজ্জেয্যা’’তি (ধ. প. ১৬৮) ৰচনং অনুস্সরিত্ৰা তত্থ অপ্পমজ্জনা. অথ ৰা সীলং নাম পকতিসভাৰো, ইধ পন তদধিট্ঠানং. ধম্মোতি ৰতং. সাধুকারিতাতি সক্কচ্চকারিতা আদরকিরিযা. হীনাধিকজনসেৰিতন্তি যে ভিক্খুভাৰে ঠিতাপি জাতিমদাদিৰসেন উদ্ধতা উন্নল়া, যে চ গিহিভাৰে পরেসং অধিকভাৰম্পি অনুপগতত্তা ভিক্খাচরিযং পরমকারুঞ্ঞতং মঞ্ঞন্তি, তেসং উভযেসম্পি যথাক্কমং ‘‘ভিক্খৰো’’তি ৰচনেন হীনজনেহি দলিদ্দেহি পরমকারুঞ্ঞতং পত্তেহি পরকুলেসু ভিক্খাচরিযায জীৰিকং কপ্পেন্তেহি সেৰিতং ৰুত্তিং পকাসেন্তো উদ্ধতভাৰনিগ্গহং করোতি. অধিকজনেহি উল়ারভোগখত্তিযকুলাদিতো পব্বজিতেহি বুদ্ধাদীহি আজীৰৰিসোধনত্থং সেৰিতং ৰুত্তিং পকাসেন্তো দীনভাৰনিগ্গহং করোতীতি যোজেতব্বং. যস্মা ‘‘ভিক্খৰো’’তি ৰচনং আমন্তনভাৰতো অভিমুখীকরণং, পকরণতো সামত্থিযতো চ সুস্সুসাজননং সক্কচ্চসৰনমনসিকারনিযোজনঞ্চ হোতি, তস্মা তমত্থং দস্সেন্তো ‘‘ভিক্খৰোতি ইমিনা’’তিআদিমাহ. তত্থ সাধুকং সৰনমনসিকারেতি সাধুকসৰনে সাধুকমনসিকারে চ. কথং পন পৰত্তিতা সৰনাদযো সাধুকং পৰত্তিতা হোন্তীতি? ‘‘অদ্ধা ইমায সম্মাপটিপত্তিযা সকলসাসনসম্পত্তি হত্থগতা ভৰিস্সতী’’তি আদরগারৰযোগেন কথাদীসু অপরিভৰাদিনা চ. ৰুত্তঞ্হি ‘‘পঞ্চহি, ভিক্খৰে, ধম্মেহি সমন্নাগতো সুণন্তো সদ্ধম্মং ভব্বো নিযামং ওক্কমিতুং কুসলেসু ধম্মেসু সম্মত্তং. কতমেহি পঞ্চহি? কথং ন পরিভোতি, কথিতং ন পরিভোতি, ন অত্তানং পরিভোতি, অৰিক্খিত্তচিত্তো ধম্মং সুণাতি একগ্গচিত্তো, যোনিসো চ মনসিকরোতি. ইমেহি খো, ভিক্খৰে, পঞ্চহি ধম্মেহি সমন্নাগতো সুণন্তো সদ্ধম্মং ভব্বো নিযামং ওক্কমিতুং কুসলেসু ধম্মেসু সম্মত্ত’’ন্তি (অ. নি. ৫.১৫১). তেনেৰাহ – ‘‘সাধুকং সৰনমনসিকারাযত্তা হি সাসনসম্পত্তী’’তি.

পুব্বে সব্বপরিসাসাধারণত্তেপি ভগৰতো ধম্মদেসনায ‘‘জেট্ঠসেট্ঠা’’তিআদিনা ভিক্খূনং এৰ আমন্তনে কারণং দস্সেত্ৰা ইদানি ভিক্খূ আমন্তেত্ৰাৰ ধম্মদেসনায পযোজনং দস্সেতুং ‘‘কিমত্থং পন ভগৰা’’তি চোদনং সমুট্ঠাপেতি. তত্থ অঞ্ঞং চিন্তেন্তাতি অঞ্ঞৰিহিতা. ৰিক্খিত্তচিত্তাতি অসমাহিতচিত্তা. ধম্মং পচ্চৰেক্খন্তাতি হিয্যো ততো পরং দিৰসেসু ৰা সুতধম্মং পতি পতি মনসা অৰেক্খন্তা. ভিক্খূ আমন্তেত্ৰা ধম্মে দেসিযমানে আদিতো পট্ঠায দেসনং সল্লক্খেতুং সক্কোন্তীতি ইমমত্থং ব্যতিরেকমুখেন দস্সেতুং ‘‘তে অনামন্তেত্ৰা’’তিআদি ৰুত্তং.

ভিক্খৰোতি চেত্থ সন্ধিৰসেন ই-কারলোপো দট্ঠব্বো. ভিক্খৰো ইতীতি অযং ইতি-সদ্দো হেতুপরিসমাপনাদিঅত্থপদত্থৰিপরিযাযপকারাৰধারণনিদস্সনাদিঅনেকত্থপ্পভেদো. তথা হেস ‘‘রুপ্পতীতি খো, ভিক্খৰে, তস্মা রূপন্তি ৰুচ্চতী’’তিআদীসু (সং. নি. ৩.৭৯) হেত্ৰত্থে দিস্সতি. ‘‘তস্মাতিহ মে, ভিক্খৰে, ধম্মদাযাদা ভৰথ, মা আমিসদাযাদা. অত্থি মে তুম্হেসু অনুকম্পা. কিন্তি মে সাৰকা ধম্মদাযাদা ভৰেয্যুং, নো আমিসদাযাদা’’তিআদীসু (ম. নি. ১.১৯) পরিসমাপনে. ‘‘ইতি ৰা ইতি এৰরূপা নচ্চগীতৰাদিতৰিসূকদস্সনা পটিৰিরতো’’তিআদীসু (দী. নি. ১.১৩) আদিঅত্থে. ‘‘মাগণ্ডিযোতি তস্স ব্রাহ্মণস্স সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনমভিলাপো’’তিআদীসু (মহানি. ৭৩, ৭৫) পদত্থৰিপরিযাযে. ‘‘ইতি খো, ভিক্খৰে, সপ্পটিভযো বালো, অপ্পটিভযো পণ্ডিতো, সউপদ্দৰো বালো, অনুপদ্দৰো পণ্ডিতো, সউপসগ্গো বালো, অনুপসগ্গো পণ্ডিতো’’তিআদীসু (ম. নি. ৩.১২৪) পকারে. ‘‘অত্থি ইদপ্পচ্চযা জরামরণন্তি পুট্ঠেন সতা, ‘আনন্দ, অত্থী’তিস্স ৰচনীযং. ‘কিং পচ্চযা জরামরণ’ন্তি ইতি চে ৰদেয্য. জাতিপচ্চযা জরামরণং ইচ্চস্স ৰচনীয’’ন্তিআদীসু (দী. নি. ২.৯৬) অৰধারণে. ‘‘অত্থীতি খো, কচ্চান, অযমেকো অন্তো, নত্থীতি খো, কচ্চান, অযং দুতিযো অন্তো’’তিআদীসু (সং. নি. ২.১৫; সং. নি. ৩.৯০) নিদস্সনে. ইধাপি নিদস্সনে এৰ দট্ঠব্বো. ভিক্খৰোতি হি আমন্তনাকারো. তমেস ইতি-সদ্দো নিদস্সেতি ‘‘ভিক্খৰোতি আমন্তেসী’’তি. ইমিনা নযেন ‘‘ভদ্দন্তে’’তিআদীসুপি যথারহং ইতি-সদ্দস্স অত্থো ৰেদিতব্বো. পুব্বে ‘‘ভগৰা আমন্তেসী’’তি ৰুত্তত্তা ‘‘ভগৰতো পচ্চস্সোসু’’ন্তি ইধ ‘‘ভগৰতো’’তি সামিৰচনং আমন্তনমেৰ সম্বন্ধিঅন্তরং অপেক্খতীতি ইমিনা অধিপ্পাযেন ‘‘ভগৰতো আমন্তনং পটিঅস্সোসু’’ন্তি ৰুত্তং. ‘‘ভগৰতো’’তি পন ইদং পটিস্সৰসম্বন্ধেন সম্পদানৰচনং যথা ‘‘দেৰদত্তায পটিস্সুণোতী’’তি. যং নিদানং ভাসিতন্তি সম্বন্ধো. ইমস্স সুত্তস্স সুখাৰগাহণত্থন্তি কমলকুৰলযুজ্জলৰিমলসাদুরসসলিলায পোক্খরণিযা সুখাৰতরণত্থং নিম্মলসিলাতলরচনাৰিলাসসোভিতরতনসোপানং ৰিপ্পকিণ্ণমুত্তাতলসদিসৰালুকাচুণ্ণপণ্ডরভূমিভাগং তিত্থং ৰিয সুৰিভত্তভিত্তিৰিচিত্রৰেদিকাপরিক্খিত্তস্স নক্খত্তপথং ফুসিতুকামতায ৰিয পটিৰিজম্ভিতসমুস্সযস্স পাসাদৰরস্স সুখারোহনত্থং দন্তমযসণ্হমুদুফলকঞ্চনলতাৰিনদ্ধমণিগণপ্পভাসমুদযুজ্জলসোভং সোপানং ৰিয সুৰণ্ণৰলযনূপুরাদিসঙ্ঘট্টনসদ্দসম্মিস্সিতস্স কথিতহসিতমধুরস্সরগেহজনৰিজম্ভিতৰিচরিতস্স উল়ারইস্সরিযৰিভৰসোভিতস্স মহাঘরস্স সুখপ্পৰেসনত্থং সুৰণ্ণরজতমণিমুত্তাপৰাল়াদিজুতিৰিস্সরৰিজ্জোতিতসুপ্পতিট্ঠিতৰিসালদ্ৰারবাহং মহাদ্ৰারং ৰিয চ অত্থব্যঞ্জনসম্পন্নস্স বুদ্ধানং দেসনাঞাণগম্ভীরভাৰসংসূচকস্স ইমস্স সুত্তস্স সুখাৰগাহত্থং.

এত্থাহ – ‘‘কিমত্থং পন ধম্মৰিনযসঙ্গহে কযিরমানে নিদানৰচনং, ননু ভগৰতা ভাসিতৰচনস্সেৰ সঙ্গহো কাতব্বো’’তি? ৰুচ্চতে, দেসনায ঠিতিঅসম্মোসসদ্ধেয্যভাৰসম্পাদনত্থং. কালদেসদেসকনিমিত্তপরিসাপদেসেহি উপনিবন্ধিত্ৰা ঠপিতা হি দেসনা চিরট্ঠিতিকা হোতি অসম্মোসধম্মা সদ্ধেয্যা চ. দেসকালকত্তুহেতুনিমিত্তেহি উপনিবদ্ধো ৰিয ৰোহারৰিনিচ্ছযো. তেনেৰ চ আযস্মতা মহাকস্সপেন ‘‘চিত্তপরিযাদানসুত্তং, আৰুসো আনন্দ, কত্থ ভাসিত’’ন্তিআদিনা দেসাদিপুচ্ছাসু কতাসু তাসং ৰিস্সজ্জনং করোন্তেন ধম্মভণ্ডাগারিকেন ‘‘এৰং মে সুত’’ন্তিআদিনা ইমস্স সুত্তস্স নিদানং ভাসিতং. অপিচ সত্থুসম্পত্তিপ্পকাসনত্থং নিদানৰচনং. তথাগতস্স হি ভগৰতো পুব্বচরণানুমানাগমতক্কাভাৰতো সম্মাসম্বুদ্ধভাৰসিদ্ধি. ন হি সম্মাসম্বুস্স পুব্বচরণাদীহি অত্থো অত্থি সব্বত্থ অপ্পটিহতঞাণচারতায একপ্পমাণত্তা চ ঞেয্যধম্মেসু. তথা আচরিযমুট্ঠিধম্মমচ্ছরিযসাসনসাৰকানানুরাগাভাৰতো খীণাসৰভাৰসিদ্ধি. ন হি সব্বসো খীণাসৰস্স তে সম্ভৰন্তীতি সুৰিসুদ্ধস্স পরানুগ্গহপ্পৰত্তি. এৰং দেসকসংকিলেসভূতানং দিট্ঠিসীলসম্পদাদূসকানং অৰিজ্জাতণ্হানং অচ্চন্তাভাৰসংসূচকেহি ঞাণপ্পহানসম্পদাভিব্যঞ্জনকেহি চ সম্বুদ্ধৰিসুদ্ধভাৰেহি পুরিমৰেসারজ্জদ্ৰযসিদ্ধি, ততো চ অন্তরাযিকনিয্যানিকধম্মেসু সম্মোহাভাৰসিদ্ধিতো পচ্ছিমৰেসারজ্জদ্ৰযসিদ্ধীতি ভগৰতো চতুৰেসারজ্জসমন্নাগমো অত্তহিতপরহিতপ্পটিপত্তি চ নিদানৰচনেন পকাসিতা হোতি. তত্থ তত্থ সম্পত্তপরিসায অজ্ঝাসযানুরূপং ঠানুপ্পত্তিকপ্পটিভানেন ধম্মদেসনাদীপনতো, ইধ পন রূপগরুকানং পুগ্গলানং অজ্ঝাসযানুরূপং ঠানুপ্পত্তিকপ্পটিভানেন ধম্মদেসনাদীপনতোতি যোজেতব্বং. তেন ৰুত্তং – ‘‘সত্থুসম্পত্তিপ্পকাসনত্থং নিদানৰচন’’ন্তি.

তথা সাসনসম্পত্তিপ্পকাসনত্থং নিদানৰচনং. ঞাণকরুণাপরিগ্গহিতসব্বকিরিযস্স হি ভগৰতো নত্থি নিরত্থকা পটিপত্তি, অত্তহিতত্থা ৰা. তস্মা পরেসং এৰ অত্থায পৰত্তসব্বকিরিযস্স সম্মাসম্বুদ্ধস্স সকলম্পি কাযৰচীমনোকম্মং যথাপৰত্তং ৰুচ্চমানং দিট্ঠধম্মিকসম্পরাযিকপরমত্থেহি যথারহং সত্তানং অনুসাসনট্ঠেন সাসনং, ন কপ্পরচনা. তযিদং সত্থুচরিতং কালদেসদেসকপরিসাপদেসেহি সদ্ধিং তত্থ তত্থ নিদানৰচনেহি যথারহং পকাসীযতি. ‘‘ইধ পন রূপগরুকানং পুগ্গলান’’ন্তিআদি সব্বং পুরিমসদিসমেৰ. তেন ৰুত্তং – ‘‘সাসনসম্পত্তিপ্পকাসনত্থং নিদানৰচন’’ন্তি. অপিচ সত্থুনো পমাণভাৰপ্পকাসনেন ৰচনেন সাসনস্স পমাণভাৰদস্সনত্থং নিদানৰচনং, তঞ্চ দেসকপ্পমাণভাৰদস্সনং হেট্ঠা ৰুত্তনযানুসারেন ‘‘ভগৰা’’তি চ ইমিনা পদেন ৰিভাৰিতন্তি ৰেদিতব্বং. ভগৰাতি হি তথাগতস্স রাগদোসমোহাদিসব্বকিলেসমলদুচ্চরিতদোসপ্পহানদীপনেন ৰচনেন অনঞ্ঞসাধারণসুপরিসুদ্ধঞাণকরুণাদিগুণৰিসেসযোগপরিদীপনেন ততো এৰ সব্বসত্তুত্তমভাৰদীপনেন অযমত্থো সব্বথা পকাসিতো হোতীতি. ইদমেত্থ নিদানৰচনপ্পযোজনস্স মুখমত্তনিদস্সনং.

নিক্খিত্তস্সাতি দেসিতস্স. দেসনা হি দেসেতব্বস্স সীলাদিঅত্থস্স ৰেনেয্যসন্তানেসু নিক্খিপনতো ‘‘নিক্খেপো’’তি ৰুচ্চতি. সুত্তনিক্খেপং ৰিচারেত্ৰাৰ ৰুচ্চমানা পাকটা হোতীতি সামঞ্ঞতো ভগৰতো দেসনায সমুট্ঠানস্স ৰিভাগং দস্সেত্ৰা ‘‘এত্থাযং দেসনা এৰংসমুট্ঠানা’’তি দেসনায সমুট্ঠানে দস্সিতে সুত্তস্স সম্মদেৰ নিদানপরিজাননেন ৰণ্ণনায সুৰিঞ্ঞেয্যত্তা ৰুত্তং. তত্থ যথা অনেকসতঅনেকসহস্সভেদানিপি সুত্তন্তানি সংকিলেসভাগিযাদিপট্ঠাননযৰসেন সোল়সৰিধতং নাতিৰত্তন্তি, এৰং অত্তজ্ঝাসযাদিসুত্তনিক্খেপৰসেন চতুব্বিধভাৰন্তি আহ – ‘‘চত্তারো হি সুত্তনিক্খেপা’’তি. এত্থ চ যথা অত্তজ্ঝাসযস্স অট্ঠুপ্পত্তিযা চ পরজ্ঝাসযপুচ্ছাহি সদ্ধিং সংসগ্গভেদো সম্ভৰতি ‘‘অত্তজ্ঝাসযো চ পরজ্ঝাসযো চ, অত্তজ্ঝাসযো চ পুচ্ছাৰসিকো চ, অট্ঠুপ্পত্তিকো চ পরজ্ঝাসযো চ, অট্ঠুপ্পত্তিকো চ পুচ্ছাৰসিকো চা’’তি অজ্ঝাসযপুচ্ছানুসন্ধিসব্ভাৰতো, এৰং যদিপি অট্ঠুপ্পত্তিযা অত্তজ্ঝাসযেনপি সংসগ্গভেদো সম্ভৰতি, অত্তজ্ঝাসযাদীহি পন পুরতো ঠিতেহি অট্ঠুপ্পত্তিযা সংসগ্গো নত্থীতি ন ইধ নিরৰসেসো ৰিত্থারনযো সম্ভৰতীতি ‘‘চত্তারো সুত্তনিক্খেপা’’তি ৰুত্তং. তদন্তোগধত্তা ৰা সেসনিক্খেপানং মূলনিক্খেপৰসেন চত্তারোৰ দস্সিতা. যথাদস্সনঞ্হেত্থ অযং সংসগ্গভেদো গহেতব্বোতি.

তত্রাযং ৰচনত্থো – নিক্খিপীযতীতি নিক্খেপো, সুত্তং এৰ নিক্খেপো সুত্তনিক্খেপো. অথ ৰা নিক্খিপনং নিক্খেপো, সুত্তস্স নিক্খেপো সুত্তনিক্খেপো, সুত্তদেসনাতি অত্থো. অত্তনো অজ্ঝাসযো অত্তজ্ঝাসযো, সো অস্স অত্থি কারণভূতোতি অত্তজ্ঝাসযো. অত্তনো অজ্ঝাসযো এতস্সাতি ৰা অত্তজ্ঝাসযো. পরজ্ঝাসযেপি এসেৰ নযো. পুচ্ছায ৰসো পুচ্ছাৰসো, সো এতস্স অত্থীতি পুচ্ছাৰসিকো. সুত্তদেসনাৰত্থুভূতস্স অত্থস্স উপ্পত্তি অত্থুপ্পত্তি, অত্থুপ্পত্তিযেৰ অট্ঠুপ্পত্তি ত্থ-কারস্স ট্ঠ-কারং কত্ৰা. সা এতস্স অত্থীতি অট্ঠুপ্পত্তিকো. অথ ৰা নিক্খিপীযতি সুত্তং এতেনাতি সুত্তনিক্খেপো, অত্তজ্ঝাসযাদি এৰ. এতস্মিং অত্থৰিকপ্পে অত্তনো অজ্ঝাসযো অত্তজ্ঝাসযো. পরেসং অজ্ঝাসযো পরজ্ঝাসযো. পুচ্ছীযতীতি পুচ্ছা, পুচ্ছিতব্বো অত্থো. পুচ্ছাৰসেন পৰত্তং ধম্মপ্পটিগ্গাহকানং ৰচনং পুচ্ছাৰসিকং, তদেৰ নিক্খেপসদ্দাপেক্খায পুল্লিঙ্গৰসেন ৰুত্তং – ‘‘পুচ্ছাৰসিকো’’তি. তথা অট্ঠুপ্পত্তি এৰ অট্ঠুপ্পত্তিকোতি এৰমেত্থ অত্থো ৰেদিতব্বো.

অপিচেত্থ পরেসং ইন্দ্রিযপরিপাকাদিকারণনিরপেক্খত্তা অত্তজ্ঝাসযস্স ৰিসুং সুত্তনিক্খেপভাৰো যুত্তো কেৰলং অত্তনো অজ্ঝাসযেনেৰ ধম্মতন্তিট্ঠপনত্থং পৰত্তিতদেসনত্তা. পরজ্ঝাসযপুচ্ছাৰসিকানং পন পরেসং অজ্ঝাসযপুচ্ছানং দেসনাপৰত্তিহেতুভূতানং উপ্পত্তিযং পৰত্তিতানং কথমট্ঠুপ্পত্তিযা অনৰরোধো, পুচ্ছাৰসিকঅট্ঠুপ্পত্তিকানং ৰা পরজ্ঝাসযানুরোধেন পৰত্তিতানং কথং পরজ্ঝাসযে অনৰরোধোতি? ন চোদেতব্বমেতং. পরেসঞ্হি অভিনীহারপরিপুচ্ছাদিৰিনিমুত্তস্সেৰ সুত্তদেসনাকারণুপ্পাদস্স অট্ঠুপ্পত্তিভাৰেন গহিতত্তা পরজ্ঝাসযপুচ্ছাৰসিকানং ৰিসুং গহণং. তথা হি ব্রহ্মজালধম্মদাযাদসুত্তাদীনং ৰণ্ণাৰণ্ণআমিসুপ্পাদাদিদেসনানিমিত্তং ‘‘অট্ঠুপ্পত্তী’’তি ৰুচ্চতি. পরেসং পুচ্ছং ৰিনা অজ্ঝাসযং এৰ নিমিত্তং কত্ৰা দেসিতো পরজ্ঝাসযো, পুচ্ছাৰসেন দেসিতো পুচ্ছাৰসিকোতি পাকটোযমত্থোতি. অত্তনো অজ্ঝাসযেনেৰ কথেসীতি ধম্মতন্তিট্ঠপনত্থং কথেসি. ৰিমুত্তিপরিপাচনীযা ধম্মা সদ্ধিন্দ্রিযাদযো. অজ্ঝাসযন্তি অধিমুত্তিং. খন্তিন্তি দিট্ঠিনিজ্ঝানক্খন্তিং. মনন্তি পঞ্ঞত্তিচিত্তং. অভিনীহারন্তি পণিধানং. বুজ্ঝনভাৰন্তি বুজ্ঝনসভাৰং, পটিৰিজ্ঝনাকারং ৰা. রূপগরুকানন্তি পঞ্চসু আরম্মণেসু রূপারম্মণগরুকা রূপগরুকা. চিত্তেন রূপনিন্না রূপপোণা রূপপব্ভারা রূপদস্সনপ্পসুতা রূপেন আকড্ঢিতহদযা, তেসং রূপগরুকানং.

পটিসেধত্থোতি পটিক্খেপত্থো. কস্স পন পটিক্খেপত্থোতি? কিরিযাপধানঞ্হি ৰাক্যং, তস্মা ‘‘ন সমনুপস্সামী’’তি সমনুপস্সনাকিরিযাপটিসেধত্থো. তেনাহ – ‘‘ইমস্স পন পদস্সা’’তিআদি. যো পরো ন হোতি, সো অত্তাতি লোকসমঞ্ঞামত্তসিদ্ধং সত্তসন্তানং সন্ধায – ‘‘অহ’’ন্তি সত্থা ৰদতি, ন বাহিরকপরিকপ্পিতং অহংকারৰিসযং অহংকারস্স বোধিমূলেযেৰ সমুচ্ছিন্নত্তা. লোকসমঞ্ঞানতিক্কমন্তা এৰ হি বুদ্ধানং লোকিযে ৰিসযে দেসনাপৰত্তি. ভিক্খৰেতি আলপনে কারণং হেট্ঠা ৰুত্তমেৰ. অঞ্ঞন্তি অপেক্খাসিদ্ধত্তা অঞ্ঞত্থস্স ‘‘ইদানি ৰত্তব্বইত্থিরূপতো অঞ্ঞ’’ন্তি আহ. একম্পি রূপন্তি একং ৰণ্ণাযতনং. সমং ৰিসমং সম্মা যাথাৰতো অনু অনু পস্সতীতি সমনুপস্সনা, ঞাণং. সংকিলিস্সনৰসেন অনু অনু পস্সতীতি সমনুপস্সনা, দিট্ঠি. নো নিচ্চতোতি এত্থ ইতি-সদ্দো আদিঅত্থো, এৰমাদিকোতি অত্থো. তেন ‘‘দুক্খতো সমনুপস্সতী’’তি এৰমাদীনি সঙ্গণ্হাতি. ওলোকেন্তোপীতি দেৰমনুস্সৰিমানকপ্পরুক্খমণিকনকাদিগতানি রূপানি অনৰসেসং সব্বঞ্ঞুতঞ্ঞাণেন ওলোকেন্তোপি. সামঞ্ঞৰচনোপি যং-সদ্দো ‘‘একরূপম্পী’’তি রূপস্স অধিগতত্তা রূপৰিসযো ইচ্ছিতোতি ‘‘যং রূপ’’ন্তি ৰুত্তং. তথা পুরিসসদ্দো পরিযাদিযিতব্বচিত্তপুগ্গলৰিসযোতি রূপগরুকস্সাতি ৰিসেসিতং. গহণং ‘‘খেপন’’ন্তি চ অধিপ্পেতং, পরিযাদানঞ্চ উপ্পত্তিনিৰারণন্তি আহ – ‘‘চতুভূমককুসলচিত্ত’’ন্তি. তঞ্হি রূপং তাদিসস্স পরিত্তকুসলস্সপি উপ্পত্তিং নিৰারেতি, কিমঙ্গং পন মহগ্গতানুত্তরচিত্তস্সাতি লোকুত্তরকুসলচিত্তস্সপি উপ্পত্তিযা নিৰারণং হোতুং সমত্থং, লোকিযকুসলুপ্পত্তিযা নিৰারকত্তে ৰত্তব্বমেৰ নত্থীতি ‘‘চতুভূমককুসলচিত্তং পরিযাদিযিত্ৰা’’তি ৰুত্তং. ন হি কামগুণস্সাদপ্পসুতস্স পুরিসস্স দানাদিৰসেন সৰিপ্ফারিকা কুসলুপ্পত্তি সম্ভৰতি. গণ্হিত্ৰা খেপেত্ৰাতি অত্তানং অস্সাদেত্ৰা পৰত্তমানস্স অকুসলচিত্তস্স পচ্চযো হোন্তং পৰত্তিনিৰারণেন মুট্ঠিগতং ৰিয গহেত্ৰা অনুপ্পাদনিরোধেন খেপেত্ৰা ৰিয তিট্ঠতি. তাৰ মহতি লোকসন্নিৰাসে তস্স পরিযাদিযট্ঠানং অৰিচ্ছেদতো লব্ভতীতি আহ – ‘‘তিট্ঠতী’’তি যথা ‘‘পব্বতা তিট্ঠন্তি, নজ্জো সন্দন্তী’’তি. তেনাহ – ‘‘ইধ উভযম্পি ৰট্টতী’’তিআদি.

যথযিদন্তি সন্ধিৰসেন আকারস্স রস্সত্তং যকারাগমো চাতি আহ – ‘‘যথা ইদ’’ন্তি. ইত্থিযা রূপন্তি ইত্থিসরীরগতং তপ্পটিবদ্ধঞ্চ রূপাযতনং. পরমত্থস্স নিরুল়্হো, পঠমং সাধারণতো সদ্দসত্থলক্খণানি ৰিভাৰেতব্বানি, পচ্ছা অসাধারণতোতি তানি পাল়িৰসেন ৰিভাৰেতুং – ‘‘রুপ্পতীতি খো…পে… ৰেদিতব্ব’’ন্তি আহ. তত্থ রুপ্পতীতি সীতাদিৰিরোধিপচ্চযেহি ৰিকারং আপাদীযতি, আপজ্জতীতি ৰা অত্থো. ৰিকারুপ্পত্তি চ ৰিরোধিপচ্চযসন্নিপাতে ৰিসদিসুপ্পত্তি ৰিভূততরা, কুতো পনাযং ৰিসেসোতি চে? ‘‘সীতেনা’’তিআদিৰচনতো. এৰঞ্চ কত্ৰা ৰেদনাদীসু অনৰসেসরূপসমঞ্ঞা সামঞ্ঞলক্খণন্তি সব্বরূপধম্মসাধারণং রূপ্পনং. ইদানি অত্থুদ্ধারনযেন রূপসদ্দং সংৰণ্ণেন্তো ‘‘অযং পনা’’তিআদিমাহ. রূপক্খন্ধে ৰত্ততীতি ‘‘ওল়ারিকং ৰা সুখুমং ৰা’’তিআদিৰচনতো (ম. নি. ১.৩৬১; ২.১১৩; ৩.৮৬, ৮৯; ৰিভ. ২). রূপূপপত্তিযাতি এত্থ রূপভৰো রূপং উত্তরপদলোপেন. রূপভৰূপপত্তিযাতি অযঞ্হেত্থ অত্থো. কসিণনিমিত্তেতি পথৰীকসিণাদিসঞ্ঞিতে পটিভাগনিমিত্তে. রূপ্পতি অত্তনো ফলস্স সভাৰং করোতীতি রূপং, সভাৰহেতূতি আহ – ‘‘সরূপা…পে… এত্থ পচ্চযে’’তি. করচরণাদিঅৰযৰসঙ্ঘাতভাৰেন রূপীযতি নিরূপীযতীতি রূপং, রূপকাযোতি আহ – ‘‘আকাসো…পে… এত্থ সরীরে’’তি.

রূপযতি ৰণ্ণৰিকারং আপজ্জমানং হদযঙ্গতভাৰং পকাসেতীতি রূপং, ৰণ্ণাযতনং. আরোহপরিণাহাদিভেদরূপগতং সণ্ঠানসম্পত্তিং নিস্সায পসাদং আপজ্জমানো রূপপ্পমাণোতি ৰুত্তোতি আহ – ‘‘এত্থ সণ্ঠানে’’তি. পিযরূপন্তিআদীসু সভাৰত্থো রূপসদ্দো. আদিসদ্দেন রূপজ্ঝানাদীনং সঙ্গহো. ‘‘রূপী রূপানি পস্সতী’’তি এত্থ অজ্ঝত্তং কেসাদীসু পরিকম্মসঞ্ঞাৰসেন পটিলদ্ধরূপজ্ঝানং রূপং, তং অস্স অত্থীতি রূপীতি ৰুত্তো. ইত্থিযা চতুসমুট্ঠানে ৰণ্ণেতি ইত্থিসরীরপরিযাপন্নমেৰ রূপং গহিতং, তপ্পটিবদ্ধৰত্থালঙ্কারাদিরূপম্পি পন পুরিসচিত্তস্স পরিযাদাযকং হোতীতি দস্সেতুং – ‘‘অপিচা’’তিআদি ৰুত্তং. গন্ধৰণ্ণগ্গহণেন ৰিলেপনং ৰুত্তং. কামং ‘‘অসুকায ইত্থিযা পসাধন’’ন্তি সল্লক্খিতস্স অকাযপ্পটিবদ্ধস্সপি ৰণ্ণো পটিবদ্ধচিত্তস্স পুরিসস্স চিত্তং পরিযাদায তিট্ঠেয্য, তং পন ন একন্তিকন্তি একন্তিকং দস্সেন্তো ‘‘কাযপ্পটিবদ্ধো’’তিআহ. উপকপ্পতীতি চিত্তস্স পরিযাদানায উপকপ্পতি. পুরিমস্সেৰাতি পুব্বে ৰুত্তঅত্থস্সেৰ দল়্হীকরণত্থং ৰুত্তং যথা ‘‘দ্ৰিক্খত্তুং বন্ধং সুবন্ধ’’ন্তি. নিগমনৰসেন ৰা এতং ৰুত্তন্তি দট্ঠব্বং. ওপম্মৰসেন ৰুত্তন্তি ‘‘যং এৰং পুরিসস্স চিত্তং পরিযাদায তিট্ঠতী’’তি সকলমেৰিদং পুরিমৰচনং উপমাৰসেন ৰুত্তং, তত্থ পন উপমাভূতং অত্থং দস্সেতুং – ‘‘যথযিদং…পে… ইত্থিরূপ’’ন্তি ৰুত্তং. পরিযাদানে আনুভাৰো সম্ভৰো পরিযাদানানুভাৰো, তস্স দস্সনৰসেন ৰুত্তং.

ইদং পন ‘‘ইত্থিরূপ’’ন্তিআদিৰচনং পরিযাদানানুভাৰে সাধেতব্বে দীপেতব্বে ৰত্থু কারণং. নাগো নাম সো রাজা, দীঘদাঠিকত্তা পন ‘‘মহাদাঠিকনাগরাজা’’তি ৰুত্তো. অসংৰরনিযামেনাতি চক্খুদ্ৰারিকেন অসংৰরনীহারেন. নিমিত্তং গহেত্ৰাতি রাগুপ্পত্তিহেতুভূতং রূপং সুভনিমিত্তং গহেত্ৰা. ৰিসিকাদস্সনং গন্ত্ৰাতি সিৰথিকদস্সনং গন্ত্ৰা. তত্থ হি আদীনৰানুপস্সনা ইজ্ঝতি. ৰত্থুলোভেন কুতো তাদিসায মরণন্তি অসদ্দহন্তো ‘‘মুখং তুম্হাকং ধূমৰণ্ণ’’ন্তি তে দহরসামণেরে উপ্পণ্ডেন্তো ৰদতি.

রতনত্তযে সুপ্পসন্নত্তা কাকৰণ্ণতিস্সাদীহি ৰিসেসনত্থঞ্চ সো তিস্সমহারাজা সদ্ধাসদ্দেন ৰিসেসেত্ৰা ৰুচ্চতি. দহরস্স চিত্তং পরিযাদায তিট্ঠতীতি অধিকারৰসেন ৰুত্তং. নিট্ঠিতুদ্দেসকিচ্চোতি গামে অসপ্পাযরূপদস্সনং ইমস্স অনত্থায সিযাতি আচরিযেন নিৰারিতগামপ্পৰেসো পচ্ছা নিট্ঠিতুদ্দেসকিচ্চো হুত্ৰা ঠিতো. তেন ৰুত্তং – ‘‘অত্থকামানং ৰচনং অগ্গহেত্ৰা’’তি. নিৰত্থৰত্থং সঞ্জানিত্ৰাতি অত্তনা দিট্ঠদিৰসে নিৰত্থৰত্থং তস্সা মতদিৰসে সিৰথিকদস্সনত্থং গতেন লদ্ধং সঞ্জানিত্ৰা. এৰম্পীতি এৰং মরণসম্পাপনৰসেনপি. অযং তাৰেত্থ অট্ঠকথায অনুত্তানত্থদীপনা.

নেত্তিনযৰণ্ণনা

ইদানি পকরণনযেন পাল়িযা অত্থৰণ্ণনং করিস্সাম. সা পন অত্থসংৰণ্ণনা যস্মা দেসনায সমুট্ঠানপ্পযোজনভাজনেসু পিণ্ডত্থেসু চ নিদ্ধারিতেসু সুকরা হোতি সুৰিঞ্ঞেয্যা চ, তস্মা সুত্তদেসনায সমুট্ঠানাদীনি পঠমং নিদ্ধারযিস্সাম. তত্থ সমুট্ঠানং নাম দেসনানিদানং, তং সাধারণমসাধারণন্তি দুৰিধং. তত্থ সাধারণম্পি অজ্ঝত্তিকবাহিরভেদতো দুৰিধং. তত্থ সাধারণং অজ্ঝত্তিকসমুট্ঠানং নাম লোকনাথস্স মহাকরুণা. তায হি সমুস্সাহিতস্স ভগৰতো ৰেনেয্যানং ধম্মদেসনায চিত্তং উদপাদি, যং সন্ধায ৰুত্তং – ‘‘সত্তেসু চ কারুঞ্ঞতং পটিচ্চ বুদ্ধচক্খুনা লোকং ৰোলোকেসী’’তিআদি (ম. নি. ১.২৮৩; মহাৰ. ৯; সং. নি. ১.১৭৩). এত্থ চ হেতাৰত্থাযপি মহাকরুণায সঙ্গহো দট্ঠব্বো যাৰদেৰ সংসারমহোঘতো সদ্ধম্মদেসনাহত্থদানেহি সত্তসন্তারণত্থং তদুপ্পত্তিতো. যথা চ মহাকরুণা, এৰং সব্বঞ্ঞুতঞ্ঞাণং দসবলঞাণাদযো চ দেসনায অব্ভন্তরসমুট্ঠানভাৰেন ৰত্তব্বা. সব্বঞ্হি ঞেয্যধম্মং তেসং দেসেতব্বাকারং সত্তানঞ্চ আসযানুসযাদিং যাথাৰতো জানন্তো ভগৰা ঠানাট্ঠানাদীসু কোসল্লেন ৰেনেয্যজ্ঝাসযানুরূপং ৰিচিত্তনযদেসনং পৰত্তেসীতি. বাহিরং পন সাধারণং সমুট্ঠানং দসসহস্সমহাব্রহ্মপরিৰারস্স সহম্পতিব্রহ্মুনো অজ্ঝেসনং. তদজ্ঝেসনুত্তরকালঞ্হি ধম্মগম্ভীরতাপচ্চৰেক্খণাজনিতং অপ্পোস্সুক্কতং পটিপ্পস্সম্ভেত্ৰা ধম্মস্সামী ধম্মদেসনায উস্সাহজাতো অহোসি. অসাধারণম্পি অব্ভন্তরবাহিরভেদতো দুৰিধমেৰ. তত্থ অব্ভন্তরং যায মহাকরুণায যেন চ দেসনাঞাণেন ইদং সুত্তং পৰত্তিতং, তদুভযং ৰেদিতব্বং. বাহিরং পন রূপগরুকানং পুগ্গলানং অজ্ঝাসযো. স্ৰাযমত্থো অট্ঠকথাযং ৰুত্তো এৰ.

পযোজনম্পি সাধারণাসাধারণতো দুৰিধং. তত্থ সাধারণং যাৰ অনুপাদাপরিনিব্বানং ৰিমুত্তিরসত্তা ভগৰতো দেসনায. তেনেৰাহ – ‘‘এতদত্থা কথা, এতদত্থা মন্তনা’’তিআদি. অসাধারণং পন তেসং রূপগরুকানং পুগ্গলানং রূপে ছন্দরাগস্স জহাপনং, উভযম্পেতং বাহিরমেৰ. সচে পন ৰেনেয্যসন্তানগতম্পি দেসনাবলসিদ্ধিসঙ্খাতং পযোজনং অধিপ্পাযসমিজ্ঝনভাৰতো যথাধিপ্পেতত্থসিদ্ধিযা মহাকারুণিকস্স ভগৰতোপি পযোজনমেৰাতি গণ্হেয্য, ইমিনা পরিযাযেনস্স অব্ভন্তরতাপি সিযা.

অপিচ তেসং রূপগরুকানং পুগ্গলানং রূপস্মিং ৰিজ্জমানস্স আদীনৰস্স যাথাৰতো অনৰবোধো ইমিস্সা দেসনায সমুট্ঠানং, তদৰবোধো পযোজনং. সো হি ইমায দেসনায ভগৰন্তং পযোজেতি তন্নিপ্ফাদনপরাযং দেসনাতি কত্ৰা. যঞ্হি দেসনায সাধেতব্বং ফলং, তং আকঙ্খিতব্বত্তা দেসকং দেসনায পযোজেতীতি পযোজনন্তি ৰুচ্চতি. তথা তেসং পুগ্গলানং তদঞ্ঞেসঞ্চ ৰেনেয্যানং রূপমুখেন পঞ্চসু উপাদানক্খন্ধেসু আদীনৰদস্সনঞ্চেত্থ পযোজনং. তথা সংসারচক্কনিৰত্তিসদ্ধম্মচক্কপ্পৰত্তিসস্সতাদিমিচ্ছাৰাদনিরাকরণং সম্মাৰাদপুরেক্খারো অকুসলমূলসমূহননং কুসলমূলসমারোপনং অপাযদ্ৰারপিদহনং সগ্গমগ্গদ্ৰারৰিৰরণং পরিযুট্ঠানৰূপসমনং অনুসযসমুগ্ঘাতনং ‘‘মুত্তো মোচেস্সামী’’তি পুরিমপটিঞ্ঞাৰিসংৰাদনং তপ্পটিপক্খমারমনোরথৰিসংৰাদনং তিত্থিযধম্মনিম্মথনং বুদ্ধধম্মপতিট্ঠাপনন্তি এৰমাদীনিপি পযোজনানি ইধ ৰেদিতব্বানি.

যথা তে পুগ্গলা রূপগরুকা, এৰং তদঞ্ঞে চ সক্কাযগরুকা সক্কাযস্মিং অল্লীনা সঙ্খতধম্মানং সম্মাসম্বুদ্ধস্স চ পটিপত্তিং অজানন্তা অসদ্ধম্মস্সৰনসাধারণপরিচরিযমনসিকারপরা সদ্ধম্মস্সৰনধারণপরিচযপ্পটিৰেধৰিমুখা চ ভৰৰিপ্পমোক্খেসিনো ৰেনেয্যা ইমিস্সা দেসনায ভাজনং.

পিণ্ডত্তা চেত্থ রূপগ্গহণেন রূপধাতুরূপাযতনরূপক্খন্ধপরিগ্গণ্হনং রূপমুখেন চতুধম্মানং ৰট্টত্তযৰিচ্ছেদনূপাযো আসৰোঘাদিৰিৰেচনং অভিনন্দননিৰারণসঙ্গতিক্কমো ৰিৰাদমূলপরিচ্চাগো সিক্খত্তযানুযোগো পহানত্তযদীপনা সমথৰিপস্সনানুট্ঠানং ভাৰনাসচ্ছিকিরিযাসিদ্ধীতি এৰমাদযো ৰেদিতব্বা.

ইতো পরং পন সোল়স হারা দস্সেতব্বা. তত্থ ‘‘রূপ’’ন্তি সহজাতা তস্স নিস্সযভূতা তপ্পটিবদ্ধা চ সব্বে রূপারূপধম্মা তণ্হাৰজ্জা দুক্খসচ্চং. তংসমুট্ঠাপিকা তদারম্মণা চ তণ্হা সমুদযসচ্চং. তদুভযেসং অপ্পৰত্তি নিরোধসচ্চং. নিরোধপ্পজাননা পটিপদা মগ্গসচ্চং. তত্থ সমুদযেন অস্সাদো, দুক্খেন আদীনৰো, মগ্গনিরোধেহি নিস্সরণং, রূপারম্মণস্স অকুসলচিত্তস্স কুসলচিত্তস্স চ পরিযাদানং ফলং. যঞ্হি দেসনায সাধেতব্বং পযোজনং, তং ফলন্তি ৰুত্তোৰাযমত্থো. তদত্থং হিদং সুত্তং ভগৰতা দেসিতন্তি. যথা তং কুসলচিত্তং ন পরিযাদিযতি, এৰং পটিসঙ্খানভাৰনাবলপরিগ্গহিতা ইন্দ্রিযেসু গুত্তদ্ৰারতা উপাযো. পুরিসস্স কুসলচিত্তপরিযাদানেনস্স রূপস্স অঞ্ঞরূপাসাধারণতাদস্সনাপদেসেন অত্থকামেহি ততো চিত্তং সাধুকং রক্খিতব্বং. অযমেত্থ ভগৰতো আণত্তীতি অযং দেসনাহারো. অস্সাদাদিসন্দস্সনৰিভাৰনলক্খণো হি দেসনাহারো. ৰুত্তঞ্হেতং নেত্তিপ্পকরণে –

‘‘অস্সাদাদীনৰতা, নিস্সরণম্পি চ ফলং উপাযো চ;

আণত্তী চ ভগৰতো, যোগীনং দেসনাহারো’’তি. (নেত্তি. ৪ নিদ্দেসৰার);

দেসীযতি সংৰণ্ণীযতি এতায সুত্তত্থোতি দেসনা, দেসনায সহচরণতো ৰা দেসনা. ননু চ অঞ্ঞেপি হারা দেসনাসঙ্খাতস্স সুত্তস্স অত্থসংৰণ্ণনাতো দেসনায সহচারিনো ৰাতি? সচ্চমেতং, অযং পন হারো যেভুয্যেন যথারুতৰসেনেৰ ৰিঞ্ঞাযমানো দেসনায সহ চরতীতি ৰত্তব্বতং অরহতি, ন তথাপরে. ন হি অস্সাদাদীনৰনিস্সরণাদিসন্দস্সনরহিতা সুত্তদেসনা অত্থি. কিং পন তেসং অস্সাদাদীনং অনৰসেসানং ৰচনং দেসনাহারো, উদাহু একচ্চানন্তি? নিরৰসেসানংযেৰ. যস্মিঞ্হি সুত্তে অস্সাদাদীনৰনিস্সরণানি সরূপতো আগতানি, তত্থ ৰত্তব্বমেৰ নত্থি. যত্থ পন একদেসেন আগতানি, ন চ সরূপেন, তত্থ অনাগতং অত্থৰসেন নিদ্ধারেত্ৰা হারো যোজেতব্বো.

সযং সমন্তচক্খুভাৰতো তংদস্সনেন সভাৰতো চ ‘‘অহ’’ন্তি ৰুত্তং. ভিক্খনসীলতাদিগুণযোগতো অভিমুখীকরণত্থঞ্চ, ‘‘ভিক্খৰে’’তি ৰুত্তং. অত্তাভাৰতো অপরতাদস্সনত্থঞ্চ ‘‘অঞ্ঞ’’ন্তি ৰুত্তং. একস্স অনুপলব্ভদস্সনত্থং অনেকভাৰপ্পটিসেধনত্থঞ্চ ‘‘একরূপম্পী’’তি ৰুত্তং. তাদিসস্স রূপস্স অভাৰতো অদস্সনতো চ ‘‘ন সমনুপস্সামী’’তি ৰুত্তং. তস্স পচ্চামসনতো অনিযমতো চ ‘‘য’’ন্তি ৰুত্তং. ইদানি ৰুচ্চমানাকারপরামসনতো তদঞ্ঞাকারনিসেধনতো চ ‘‘এৰ’’ন্তি ৰুত্তং. ৰিসভাগিন্দ্রিযৰত্থুতো সভাগৰত্থুস্মিং তদভাৰতো চ ‘‘পুরিসস্সা’’তি ৰুত্তং. নিমিত্তগ্গাহস্স ৰত্থুভাৰতো তথা পরিকপ্পিতত্তা চ ‘‘চিত্তং পরিযাদায তিট্ঠতী’’তি ৰুত্তং. এৰন্তি ৰুত্তাকারপরামসনত্থঞ্চেৰ নিদস্সনত্থঞ্চ ‘‘যথা’’তি ৰুত্তং. অত্তনো পচ্চক্খভাৰতো ভিক্খূনং পচ্চক্খকরণত্থঞ্চ ‘‘ইদ’’ন্তি ৰুত্তং. ইত্থিসন্তানপরিযাপন্নতো তপ্পটিবদ্ধভাৰতো চ ‘‘ইত্থিরূপ’’ন্তি ৰুত্তন্তি এৰং অনুপদৰিচযতো ৰিচযো হারো. ৰিচীযন্তি এতেন, এত্থ ৰা পদপঞ্হাদযোতি ৰিচযো, ৰিচিতি এৰ ৰা তেসন্তি ৰিচযো. পদপুচ্ছাৰিস্সজ্জনপুব্বাপরানুগ্গহনং অস্সাদাদীনঞ্চ ৰিসেসনিদ্ধারণৰসেন পৰিচযলক্খণো হি ৰিচযো হারো. ৰুত্তম্পি চেতং –

‘‘যং পুচ্ছিতঞ্চ ৰিস্সজ্জিতঞ্চ, সুত্তস্স যা চ অনুগীতি;

সুত্তস্স যো পৰিচযো, হারো ৰিচযোতি নিদ্দিট্ঠো’’তি. (নেত্তি. ৪ নিদ্দেসৰার);

অনাদিমতি সংসারে ইত্থিপুরিসানং অঞ্ঞমঞ্ঞরূপাভিরামতায ‘‘ইত্থিরূপং পুরিসস্স চিত্তং পরিযাদায তিট্ঠতী’’তি যুজ্জতীতি অযং যুত্তিহারো. ব্যঞ্জনত্থানং যুত্তাযুত্তৰিভাগৰিভাৰনলক্খণো হি যুত্তিহারো. ৰুত্তম্পি চেতং –

‘‘সব্বেসং হারানং, যা ভূমী যো চ গোচরো তেসং;

যুত্তাযুত্তিপরিক্খা, হারো যুত্তীতি নিদ্দিট্ঠো’’তি. (নেত্তি. ৪ নিদ্দেসৰার);

যুত্তীতি চ উপপত্তি সাধনযুত্তি, ইধ পন যুত্তিৰিচারণা যুত্তি উত্তরপদলোপেন ‘‘রূপভৰো রূপ’’ন্তি যথা. যুত্তিসহচরণতো ৰা যুত্তি.

ইত্থিরূপং অযোনিসো ওলোকিযমানং ইন্দ্রিযেসু অগুত্তদ্ৰারতায পদট্ঠানং, সা কুসলানং ধম্মানং অভাৰনায পদট্ঠানং, সা সব্বস্সপি সংকিলেসপক্খস্স পরিৰুদ্ধিযা পদট্ঠানং. ব্যতিরেকতো পন ইত্থিরূপং যোনিসো ওলোকিযমানং সতিপট্ঠানভাৰনায পদট্ঠানং, সা বোজ্ঝঙ্গানং ভাৰনাপারিপূরিযা পদট্ঠানং, সা ৰিজ্জাৰিমুত্তীনং পারিপূরিযা পদট্ঠানং, কুসলস্স চিত্তস্স পরিযাদানং সম্মোহাভিনিৰেসস্স পদট্ঠানং, সো সঙ্খারানং পদট্ঠানং, সঙ্খারা ৰিঞ্ঞাণস্সাতি সব্বং আৰত্ততি ভৰচক্কং. ব্যতিরেকতো পন কুসলস্স চিত্তস্স অপরিযাদানং তেসং তেসং কুসলানং ধম্মানং উপ্পাদায পারিপূরিযা পদট্ঠানন্তি অযং তাৰ অৰিসেসতো নযো. ৰিসেসতো পন সীলস্স অপরিযাদানং অৰিপ্পটিসারস্স পদট্ঠানং, অৰিপ্পটিসারো পামোজ্জস্সাতিআদিনা যাৰ অনুপাদাপরিনিব্বানং নেতব্বং. অযং পদট্ঠানো হারো. সুত্তে আগতধম্মানং পদট্ঠানভূতে ধম্মে তেসঞ্চ পদট্ঠানভূতেতি সম্ভৰতো পদট্ঠানভূতধম্মনিদ্ধারণলক্খণো হি পদট্ঠানো হারো. ৰুত্তঞ্চেতং –

‘‘ধম্মং দেসেতি জিনো, তস্স চ ধম্মস্স যং পদট্ঠানং;

ইতি যাৰ সব্বধম্মা, এসো হারো পদট্ঠানো’’তি. (নেত্তি. ৪ নিদ্দেসৰার);

পদট্ঠানন্তি আসন্নকারণং. ইধ পন পদট্ঠানৰিচারণা পদট্ঠানোতিআদি যুত্তিহারে ৰুত্তনযেনেৰ ৰেদিতব্বং.

একরূপন্তি চ রূপাযতনগ্গহণেন ছন্নম্পি বাহিরানং আযতনানং গহণং বাহিরাযতনভাৰেন একলক্খণত্তা. চিত্তন্তি মনাযতনগ্গহণেন ছন্নম্পি অজ্ঝত্তিকানং আযতনানং গহণং অজ্ঝত্তিকাযতনভাৰেন একলক্খণত্তা. এৰং খন্ধধাতাদিৰসেনপি একলক্খণতা ৰত্তব্বা. অযং লক্খণো হারো. লক্খীযন্তি এতেন, এত্থ ৰা একলক্খণধম্মা অৰুত্তাপি একচ্চৰচনেনাতি লক্খণো. সুত্তে অনাগতেপি ধম্মে ৰুত্তপ্পকারে আগতে ৰিয নিদ্ধারেত্ৰা যা সংৰণ্ণনা, সো লক্খণো হারো. ৰুত্তম্পি চেতং –

‘‘ৰুত্তম্হি একধম্মে, যে ধম্মা একলক্খণা কেচি;

ৰুত্তা ভৰন্তি সব্বে, সো হারো লক্খণো নামা’’তি. (নেত্তি. ৪ নিদ্দেসৰার);

নিদানে ইমিস্সা দেসনায রূপগরুকানং পুগ্গলানং রূপস্মিং অনাদীনৰদস্সিতা ৰুত্তা, ‘‘কথং নু খো ইমে ইমং দেসনং সুত্ৰা রূপে আদীনৰদস্সনমুখেন সব্বস্মিম্পি খন্ধপঞ্চকে সব্বসো ছন্দরাগং পহায সকলৰট্টদুক্খতো মুচ্চেয্যুং, পরে চ তত্থ পতিট্ঠাপেয্যু’’ন্তি অযমেত্থ ভগৰতো অধিপ্পাযো. পদনিব্বচনং নিরুত্তং, তং ‘‘এৰ’’ন্তিআদিনিদানপদানং ‘‘নাহ’’ন্তিআদিপাল়িপদানঞ্চ অট্ঠকথাযং তস্সা লীনত্থৰণ্ণনায চ ৰুত্তনযানুসারেন সুকরত্তা ন ৰিত্থারযিম্হ.

পদপদত্থদেসনাদেসনানিক্খেপসুত্তসন্ধিৰসেন পঞ্চৰিধা সন্ধি. তত্থ পদস্স পদন্তরেন সম্বন্ধো পদসন্ধি. পদত্থস্স পদত্থন্তরেন সম্বন্ধো পদত্থসন্ধি, যো ‘‘কিরিযাকারকসম্বন্ধো’’তি ৰুচ্চতি. নানানুসন্ধিকস্স সুত্তস্স তংতংঅনুসন্ধীহি সম্বন্ধো, একানুসন্ধিকস্স চ পুব্বাপরসম্বন্ধো দেসনাসন্ধি, যা অট্ঠকথাযং ‘‘পুচ্ছানুসন্ধি, অজ্ঝাসযানুসন্ধি, যথানুসন্ধী’’তি তিধা ৰিভত্তা. অজ্ঝাসযো চেত্থ অত্তজ্ঝাসযো পরজ্ঝাসযোতি দ্ৰিধা ৰেদিতব্বো. দেসনানিক্খেপসন্ধি চতুন্নং সুত্তনিক্খেপানং ৰসেন ৰেদিতব্বা. সুত্তসন্ধি ইধ পঠমনিক্খেপৰসেনেৰ ৰেদিতব্বা. ‘‘কস্মা পনেত্থ ইদমেৰ চিত্তপরিযাদানসুত্তং পঠমং নিক্খিত্ত’’ন্তি নাযমনুযোগো কত্থচি ন পৰত্ততি. অপিচ ইমে সত্তা অনাদিমতি সংসারে পরিব্ভমন্তা ইত্থিপুরিসা অঞ্ঞমঞ্ঞেসং পঞ্চকামগুণসঙ্খাতরূপাভিরামা, তত্থ ইত্থী পুরিসস্স রূপে সত্তা গিদ্ধা গধিতা লগ্গা লগ্গিতা আসত্তা, সা চস্সা তত্থ আসত্তি দুব্বিৰেচনীযা. তথা পুরিসো ইত্থিযা রূপে, তত্থ চ দস্সনসংসগ্গো গরুতরো ইতরেসঞ্চ মূলভূতো. তেনেৰ হি ভগৰা ‘‘কথং নু খো মাতুগামে পটিপজ্জিতব্ব’’ন্তি (দী. নি. ২.২০৩) পুট্ঠো ‘‘অদস্সনমেৰা’’তি অৰোচ. তস্মা ভগৰা পঞ্চসু কামগুণেসু রূপে ছন্দরাগহাপনত্থং ইদমেৰ সুত্তং পঠমং দেসেসি. নিব্বানাধিগমায পটিপত্তিযা আদি রেসা পটিপত্তীতি. যং পন একিস্সা দেসনায দেসনন্তরেন সংসন্দনং, অযম্পি দেসনাসন্ধি. সা ইধ এৰং ৰেদিতব্বা. ‘‘নাহং, ভিক্খৰে…পে… তিট্ঠতী’’তি অযং দেসনা. ‘‘যে খো, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি, তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জন্তি অনেকে পাপকা অকুসলা ধম্মা’’তি (সং. নি. ৪.১১৮) ইমায দেসনায সংসন্দতি. তথা ‘‘রূপে মঞ্ঞতি, রূপেসু মঞ্ঞতি, রূপতো মঞ্ঞতি, রূপং ‘মে’তি মঞ্ঞতি. রূপং, ভিক্খৰে, অনভিজানং অপরিজানং অৰিরাজযং অপ্পজহং অভব্বো দুক্খক্খযাযা’’তি (সং. নি. ৪.১১২) এৰমাদীহি দেসনাহি সংসন্দতীতি অযং চতুব্যূহো হারো. ৰিযূহীযন্তি ৰিভাগেন পিণ্ডীযন্তি এতেন, এত্থ ৰাতি ব্যূহো, নিব্বচনাদীনং চতুন্নং ব্যূহোতি চতুব্যূহো, চতুন্নং ৰা ব্যূহো এত্থাতি চতুব্যূহো. নিব্বচনাধিপ্পাযাদীনং চতুন্নং ৰিভাগলক্খণো হি চতুব্যূহো হারো. ৰুত্তঞ্হেতং –

‘‘নেরুত্তমধিপ্পাযো, ব্যঞ্জনমথ দেসনানিদানঞ্চ;

পুব্বাপরানুসন্ধী, এসো হারো চতুব্যূহো’’তি. (নেত্তি. ৪ নিদ্দেসৰার);

‘‘নাহং, ভিক্খৰে, অঞ্ঞং…পে… ইত্থিরূপ’’ন্তি এতেন অযোনিসোমনসিকারো দীপিতো. যং তত্থ চিত্তং পরিযাদিযতি, তেন যোনিসোমনসিকারো. তত্থ অযোনিসোমনসিকরোতো তণ্হাৰিজ্জা পরিৰড্ঢন্তি, তাসু তণ্হাগহণেন নৰ তণ্হামূলকা ধম্মা আৰট্টন্তি, অৰিজ্জাগহণেন অৰিজ্জামূলকং সব্বং ভৰচক্কং আৰট্টতি, যোনিসোমনসিকারগ্গহণেন চ যোনিসোমনসিকারমূলকা ধম্মা আৰট্টন্তি, চতুব্বিধঞ্চ সম্পত্তিচক্কন্তি. অযং আৰট্টো হারো. আৰট্টযন্তি এতেন, এত্থ ৰা সভাগৰিসভাগা চ ধম্মা, তেসং ৰা আৰট্টনন্তি আৰট্টো. দেসনায গহিতধম্মানং সভাগাসভাগধম্মৰসেন আৰট্টনলক্খণো হি আৰট্টো হারো. ৰুত্তম্পি চেতং –

‘‘একম্হি পদট্ঠানে, পরিযেসতি সেসকং পদট্ঠানং;

আৰট্টতি পটিপক্খে, আৰট্টো নাম সো হারো’’তি. (নেত্তি. ৪ নিদ্দেসৰার);

রূপং চতুব্বিধং কম্মসমুট্ঠানং, চিত্তসমুট্ঠানং, উতুসমুট্ঠানং, আহারসমুট্ঠানং, তথা ইট্ঠং ইট্ঠমজ্ঝত্তং অনিট্ঠং অনিট্ঠমজ্ঝত্তন্তি. ইধ পন ইট্ঠং অধিপ্পেতং. চিত্তং কুসলচিত্তমেত্থ ৰেদিতব্বং. তং কামাৰচরং, রূপাৰচরং, অরূপাৰচরং, লোকুত্তরন্তি চতুব্বিধং. ৰেদনাদিসম্পযুত্তধম্মভেদতো অনেকৰিধন্তি অযং ৰিভত্তিহারো. ৰিভজীযন্তি এতেন, এত্থ ৰা সাধারণাসাধারণানং সংকিলেসৰোদানধম্মানং ভূমিযোতি ৰিভত্তি. ৰিভজনং ৰা এতেসং ভূমিযোতি ৰিভত্তি. সংকিলেসধম্মে ৰোদানধম্মে চ সাধারণাসাধারণতো পদট্ঠানতো ভূমিতো ৰিভজনলক্খণো হি ৰিভত্তিহারো. ৰুত্তম্পি চেতং –

‘‘ধম্মঞ্চ পদট্ঠানং, ভূমিঞ্চ ৰিভজ্জতে অযং হারো;

সাধারণে অসাধারণে চ নেয্যো ৰিভত্তী’’তি. (নেত্তি. ৪ নিদ্দেসৰার);

ইত্থিরূপং পুরিসস্স চিত্তং পরিযাদায তিট্ঠতি অযোনিসো মনসিকরোতো, যোনিসো মনসিকরোতো ন পরিযাদিযতি সুসংৰুতিন্দ্রিযত্তা সীলেসু সমাহিতস্সাতি অযং পরিৰত্তো হারো. পটিপক্খৰসেন পরিৰত্তীযন্তি ইমিনা, এত্থ ৰা সুত্তে ৰুত্তধম্মা, পরিৰত্তনং ৰা তেসন্তি পরিৰত্তো. নিদ্দিট্ঠানং ধম্মানং পটিপক্খতো পরিৰত্তনলক্খণো হি পরিৰত্তো হারো. ৰুত্তঞ্হেতং –

‘‘কুসলাকুসলে ধম্মে, নিদ্দিট্ঠে ভাৰিতে পহীনে চ;

পরিৰত্ততি পটিপক্খে, হারো পরিৰত্তনো নামা’’তি. (নেত্তি. ৪ নিদ্দেসৰার);

ভিক্খৰে, সমণা পব্বজিতাতি পরিযাযৰচনং. অঞ্ঞং পরং কিঞ্চীতি পরিযাযৰচনং. রূপং ৰণ্ণং চক্খুৰিঞ্ঞেয্যন্তি পরিযাযৰচনং. সমনুপস্সামি ওলোকেস্সামি জানামীতি পরিযাযৰচনং. এৰং ইত্থং ইমং পকারন্তি পরিযাযৰচনং. পুরিসস্স পুগ্গলস্সাতি পরিযাযৰচনং. চিত্তং ৰিঞ্ঞাণং মনোতি পরিযাযৰচনং. পরিযাদায গহেত্ৰা খেপেত্ৰাতি পরিযাযৰচনং. তিট্ঠতি ধরতি ঠাতীতি পরিযাযৰচনং. যথা যেন পকারেন যেনাকারেনাতি পরিযাযৰচনং. ইত্থী নারী মাতুগামোতি পরিযাযৰচনন্তি অযং ৰেৰচনো হারো. ৰিৰিধং ৰচনং একস্সেৰত্থস্স ৰাচকমেত্থাতি ৰিৰচনং, ৰিৰচনমেৰ ৰেৰচনং. ৰিৰিধং ৰুচ্চতি এতেন অত্থোতি ৰা ৰিৰচনং, ৰিৰচনমেৰ ৰেৰচনং. একস্মিং অত্থে অনেকপরিযাযসদ্দপ্পযোজনলক্খণো হি ৰেৰচনো হারো. ৰুত্তঞ্হেতং –

‘‘ৰেৰচনানি বহূনি তু, সুত্তে ৰুত্তানি একধম্মস্স;

যো জানাতি সুত্তৰিদূ, ৰেৰচনো নাম সো হারো’’তি. (নেত্তি. ৪ নিদ্দেসৰার);

রূপং কাল়সামাদিৰসেন অনেকধা পঞ্ঞত্তং. পুরিসো খত্তিযাদিৰসেন অনেকধা পঞ্ঞত্তো. চিত্তং পরিত্তমহগ্গতাদিৰসেন অনেকধা পঞ্ঞত্তং. ‘‘পরিযাদাযা’’তি এত্থ পরিযাদানং পরিযাদাযকানং পাপধম্মানং ৰসেন ৰীতিক্কমপরিযুট্ঠানাদিনা চ অনেকধা পঞ্ঞত্তং. অযং পঞ্ঞত্তিহারো. পকারেহি, পভেদতো ৰা ঞাপীযন্তি ইমিনা, এত্থ ৰা অত্থাতি পঞ্ঞত্তি. একেকস্স ধম্মস্স অনেকাহি পঞ্ঞত্তীহি পঞ্ঞাপেতব্বাকারৰিভাৰনলক্খণো হি পঞ্ঞত্তিহারো. ৰুত্তঞ্হেতং –

‘‘একং ভগৰা ধম্মং, পঞ্ঞত্তীহি ৰিৰিধাহি দেসেতি;

সো আকারো ঞেয্যো, পঞ্ঞত্তী নাম সো হারো’’তি. (নেত্তি. ৪ নিদ্দেসৰার);

ৰিরোধিপচ্চযসমৰাযে ৰিসদিসুপ্পত্তিরুপ্পনৰণ্ণৰিকারাপত্তিযা তংসমঙ্গিনো হদযঙ্গতভাৰপ্পকাসনং রূপট্ঠোতি অনিচ্চতামুখেন ওতরণং, অনিচ্চস্স পন দুক্খত্তা দুক্খতামুখেন, দুক্খস্স চ অনত্তকত্তা সুঞ্ঞতামুখেন ওতরণং. চিত্তং মনোৰিঞ্ঞাণধাতু, তস্সা পরিযাদাযিকা তণ্হা তদেকট্ঠা চ পাপধম্মা ধম্মধাতূতি ধাতুমুখেন ওতরণং. এৰং খন্ধাযতনাদিমুখেহিপি ওতরণং ৰত্তব্বন্তি অযং ওতরণো হারো. ওতারীযন্তি অনুপ্পৰেসীযন্তি এতেন, এত্থ ৰা সুত্তাগতা ধম্মা পটিচ্চসমুপ্পাদাদীসূতি ওতরণো. পটিচ্চসমুপ্পাদাদিমুখেন সুত্তত্থস্স ওতরণলক্খণো হি ওতরণো হারো. ৰুত্তঞ্হেতং –

‘‘যো চ পটিচ্চুপ্পাদো, ইন্দ্রিযখন্ধা চ ধাতুআযতনা;

এতেহি ওতরতি যো, ওতরণো নাম সো হারো’’তি. (নেত্তি. ৪ নিদ্দেসৰার);

নাহং, ভিক্খৰে…পে… সমনুপস্সামীতি আরম্ভো. এৰং পুরিসস্স চিত্তং পরিযাদায তিট্ঠতীতি পদসুদ্ধি, ন পন আরম্ভসুদ্ধি. যথযিদন্তিআদি পদসুদ্ধি চেৰ আরম্ভসুদ্ধি চাতি অযং সোধনো হারো. সোধীযন্তি সমাধীযন্তি এতেন, এত্থ ৰা সুত্তে পদপদত্থপঞ্হারম্ভাতি সোধনো. সুত্তে পদপদত্থপঞ্হারম্ভানং সোধনলক্খণো হি সোধনো হারো. ৰুত্তঞ্হেতং –

‘‘ৰিস্সজ্জিতম্হি পঞ্হে, গাথাযং পুচ্ছিতাযমারব্ভ;

সুদ্ধাসুদ্ধপরিক্খা, হারো সো সোধনো নামা’’তি. (নেত্তি. ৪ নিদ্দেসৰার);

অঞ্ঞন্তি সামঞ্ঞতো অধিট্ঠানং কস্সচি ৰিসেসস্স অনামট্ঠত্তা. একরূপম্পীতি তং অৰিকপ্পেত্ৰা ৰিসেসৰচনং. যথযিদন্তি সামঞ্ঞতো অধিট্ঠানং অনিযমৰচনভাৰতো. ইত্থিরূপন্তি তং অৰিকপ্পেত্ৰা ৰিসেসৰচনন্তি অযং অধিট্ঠানো হারো. অধিট্ঠীযন্তি অনুপ্পৰত্তীযন্তি এতেন, এত্থ ৰা সামঞ্ঞৰিসেসভূতা ধম্মা ৰিনা ৰিকপ্পেনাতি অধিট্ঠানো. সুত্তাগতানং ধম্মানং অৰিকপ্পনৰসেনেৰ সামঞ্ঞৰিসেসনিদ্ধারণলক্খণো হি অধিট্ঠানো হারো. ৰুত্তম্পি চেতং –

‘‘একত্ততায ধম্মা, যেপি চ ৰেমত্ততায নিদ্দিট্ঠা;

তেন ৰিকপ্পযিতব্বা, এসো হারো অধিট্ঠানো’’তি. (নেত্তি. ৪ নিদ্দেসৰার);

রূপস্স কম্মাৰিজ্জাদযো কম্মচিত্তাদযো চ হেতু. সমনুপস্সনায আৰজ্জনাদযো. কুসলস্স চিত্তস্স যোনিসো মনসিকারাদযো. পরিযাদাযাতি এত্থ পরিযাদানস্স অযোনিসোমনসিকারাদযোতি অযং পরিক্খারো হারো. পরিকরোতি অভিসঙ্খরোতি ফলন্তি পরিক্খারো, হেতু পচ্চযো চ. পরিক্খারং আচিক্খতীতি পরিক্খারো, হারো. পরিক্খারৰিসযত্তা, পরিক্খারসহচরণতো ৰা পরিক্খারো. সুত্তে আগতধম্মানং পরিক্খারসঙ্খাতহেতুপচ্চযে নিদ্ধারেত্ৰা সংৰণ্ণনালক্খণো হি পরিক্খারো হারো. ৰুত্তঞ্হেতং –

‘‘যে ধম্মা যং ধম্মং, জনযন্তিপ্পচ্চযা পরম্পরতো;

হেতুমৰকড্ঢযিত্ৰা, এসো হারো পরিক্খারো’’তি. (নেত্তি. ৪ নিদ্দেসৰার);

পুরিসস্স চিত্তং পরিযাদায তিট্ঠতীতি এত্থ পরিযাদাযিকা ৰিসেসতো তণ্হাৰিজ্জা ৰেদিতব্বা তাসং ৰসেন পরিযাদানসম্ভৰতো. তাসু তণ্হায রূপমধিট্ঠানং, অৰিজ্জায অরূপং. ৰিসেসতো তণ্হায সমথো পটিপক্খো, অৰিজ্জায ৰিপস্সনা. সমথস্স চেতোৰিমুত্তি, ফলৰিপস্সনায পঞ্ঞাৰিমুত্তি. তথা হি তা রাগৰিরাগা অৰিজ্জাৰিরাগাতি ৰিসেসেত্ৰা ৰুচ্চন্তীতি অযং সমারোপনো হারো. সমারোপীযন্তি এতেন, এত্থ ৰা পদট্ঠানাদিমুখেন ধম্মাতি সমারোপনো. সুত্তে আগতধম্মানং পদট্ঠানৰেৰচনভাৰনাপহানসমারোপনৰিচারণলক্খণো হি সমারোপনো হারো. ৰুত্তঞ্হেতং –

‘‘যে ধম্মা যং মূলা, যে চেকত্থা পকাসিতা মুনিনা;

তে সমারোপযিতব্বা, এস সমারোপনো হারো’’তি. (নেত্তি. ৪ নিদ্দেসৰার);

এত্তাৰতা চ –

‘‘দেসনা ৰিচযো যুত্তি, পদট্ঠানো চ লক্খণো;

চতুব্যূহো চ আৰট্টো, ৰিভত্তি পরিৰত্তনো.

ৰেৰচনো চ পঞ্ঞত্তি, ওতরণো চ সোধনো;

অধিট্ঠানো পরিক্খারো, সমারোপনো সোল়সো’’তি. (নেত্তি. ১ উদ্দেসৰার) –

এৰং ৰুত্তা সোল়স হারা দস্সিতাতি ৰেদিতব্বা. হরীযন্তি এতেহি, এত্থ ৰা সুত্তগেয্যাদিৰিসযা অঞ্ঞাণসংসযৰিপল্লাসাতি হারা. হরন্তি ৰা সযং তানি, হরণমত্তমেৰ ৰাতি হারা ফলূপচারেন. অথ ৰা হরীযন্তি ৰোহরীযন্তি ধম্মসংৰণ্ণকধম্মপ্পটিগ্গাহকেহি ধম্মস্স দানগ্গহণৰসেনাতি হারা. অথ ৰা হারা ৰিযাতি হারা. যথা হি অনেকরতনাৰলিসমূহো হারসঙ্খাতো অত্তনো অৰযৰভূতরতনসম্ফস্সেহি সমুপজনিযমানহিলাদসুখো হুত্ৰা তদুপভোগিজনসরীরসন্তাপং নিদাঘপরিল়াহূপজনিতং ৰূপসমেতি, এৰমেৰ তেপি নানাৰিধপরমত্থরতনপ্পবন্ধা সংৰণ্ণনাৰিসেসা অত্তনো অৰযৰভূতপরমত্থরতনাধিগমেন সমুপ্পাদিযমাননিব্বুতিসুখা ধম্মপ্পটিগ্গাহকজনহদযপরিতাপং কামরাগাদিকিলেসহেতুকং ৰূপসমেন্তীতি. অথ ৰা হারযন্তি অঞ্ঞাণাদিনীহারং অপগমং করোন্তি আচিক্খন্তীতি ৰা হারা. অথ ৰা সোতুজনচিত্তস্স হরণতো রমণতো চ হারা নিরুত্তিনযেন যথা ‘‘ভৰেসু ৰন্তগমনো ভগৰা’’তি (ৰিসুদ্ধি. ১.১৪৪; পারা. অট্ঠ. ১.ৰেরঞ্জকণ্ডৰণ্ণনা).

ইতো পরং পন নন্দিযাৰট্টাদিপঞ্চৰিধনযা ৰেদিতব্বা – তত্থ তণ্হাৰিজ্জা সমুদযসচ্চং, তাসং অধিট্ঠানাদিভূতা রূপধম্মা দুক্খসচ্চং, তেসং অপ্পৰত্তি নিরোধসচ্চং, নিরোধপ্পজাননা পটিপদা মগ্গসচ্চং. তণ্হাগহণেন চেত্থ মাযাসাঠেয্যমানাতিমানমদপ্পমাদপাপিচ্ছতাপাপমিত্ততাঅহিরিকঅনোত্তপ্পাদিৰসেন অকুসলপক্খো নেতব্বো. অৰিজ্জাগহণেন ৰিপরীতমনসিকারকোধূপনাহমক্খপল়াসইস্সামচ্ছরিয- সারম্ভদোৰচস্সতাভৰদিট্ঠিৰিভৰদিট্ঠিআদিৰসেন অকুসলপক্খো নেতব্বো. ৰুত্তৰিপরিযাযতো কুসলপক্খো নেতব্বো. কথং? অমাযাঅসাঠেয্যাদিৰসেন অৰিপরীতমনসিকারাদিৰসেন চ. তথা সমথপক্খিযানং সদ্ধিন্দ্রিযাদীনং, ৰিপস্সনাপক্খিযানং অনিচ্চসঞ্ঞাদীনঞ্চ ৰসেন ৰোদানপক্খো নেতব্বোতি অযং নন্দিযাৰট্টস্স নযস্স ভূমি. যো হি তণ্হাঅৰিজ্জাহি সংকিলেসপক্খস্স সুত্তত্থস্স সমথৰিপস্সনাহি ৰোদানপক্খস্স চ চতুসচ্চযোজনমুখেন নযনলক্খণো সংৰণ্ণনাৰিসেসো, অযং নন্দিযাৰট্টনযো নাম. ৰুত্তঞ্হেতং –

‘‘তণ্হঞ্চ অৰিজ্জম্পি চ, সমথেন ৰিপস্সনায যো নেতি;

সচ্চেহি যোজযিত্ৰা, অযং নযো নন্দিযাৰট্টো’’তি. (নেত্তি. ৪ নিদ্দেসৰার);

নন্দিযাৰট্টস্স ৰিয আৰট্টো এতস্সাতি নন্দিযাৰট্টো. যথা হি নন্দিযাৰট্টো অন্তো ঠিতেন পধানাৰযৰেন বহিদ্ধা আৰট্টতি, এৰমযম্পি নযোতি অত্থো. অথ ৰা নন্দিযা তণ্হায পমোদস্স ৰা আৰট্টো এত্থাতি নন্দিযাৰট্টো.

হেট্ঠা ৰুত্তনযেন গহিতেসু তণ্হাৰিজ্জাতপ্পক্খিযধম্মেসু তণ্হা লোভো, অৰিজ্জা মোহো, অৰিজ্জায সম্পযুত্তো লোহিতে সতি পুব্বো ৰিয তণ্হায সতি সিজ্ঝমানো আঘাতো দোসো ইতি তীহি অকুসলমূলেহি গহিতেহি, তপ্পটিপক্খতো কুসলচিত্তগ্গহণেন চ তীণি কুসলমূলানি গহিতানি এৰ হোন্তি. ইধাপি লোভো সব্বানি ৰা সাসৰকুসলমূলানি সমুদযসচ্চং, তন্নিব্বত্তা তেসং অধিট্ঠানগোচরভূতা উপাদানক্খন্ধা দুক্খসচ্চন্তিআদিনা সচ্চযোজনা ৰেদিতব্বা. ফলং পনেত্থ ৰিমোক্খত্তযৰসেন নিদ্ধারেতব্বং, তীহি অকুসলমূলেহি তিৰিধদুচ্চরিতসংকিলেসমলৰিসমঅকুসলসঞ্ঞাৰিতক্কাদিৰসেন অকুসলপক্খো নেতব্বো, তথা তীহি কুসলমূলেহি তিৰিধসুচরিতসমকুসলসঞ্ঞাৰিতক্কসদ্ধম্মসমাধিৰিমোক্খমুখাদিৰসেন ৰোদানপক্খো নেতব্বোতি অযং তিপুক্খলস্স নযস্স ভূমি. যো হি অকুসলমূলেহি সংকিলেসপক্খস্স কুসলমূলেহি ৰোদানপক্খস্স সুত্তত্থস্স চ চতুসচ্চযোজনামুখেন নযনলক্খণো সংৰণ্ণনাৰিসেসো, অযং তিপুক্খলনযো নাম. তীহি অৰযৰেহি লোভাদীহি সংকিলেসপক্খে, অলোভাদীহি চ ৰোদানপক্খে পুক্খলো সোভনোতি তিপুক্খলো. ৰুত্তঞ্হেতং –

‘‘যো অকুসলে সমূলেহি,

নেতি কুসলে চ কুসলমূলেহি;

ভূতং তথং অৰিতথং,

তিপুক্খলং তং নযং আহূ’’তি. (নেত্তি. ৪ নিদ্দেসৰার);

ৰুত্তনযেন গহিতেসু তণ্হাৰিজ্জাতপ্পক্খিযধম্মেসু ৰিসেসতো তণ্হাদিট্ঠীনং ৰসেন অসুভে ‘‘সুভ’’ন্তি, দুক্খে ‘‘সুখ’’ন্তি চ ৰিপল্লাসা, অৰিজ্জাদিট্ঠীনং ৰসেন অনিচ্চে ‘‘নিচ্চ’’ন্তি, অনত্তনি ‘‘অত্তা’’তি ৰিপল্লাসা ৰেদিতব্বা. তেসং পটিপক্খতো কুসলচিত্তগ্গহণেন সিদ্ধেহি সতিৰীরিযসমাধিপঞ্ঞিন্দ্রিযেহি চত্তারি সতিপট্ঠানানি সিদ্ধানিযেৰ হোন্তি.

তত্থ চতূহি ইন্দ্রিযেহি চত্তারো পুগ্গলা নিদ্দিসিতব্বা. কথং? দুৰিধো হি তণ্হাচরিতো মুদিন্দ্রিযো তিক্খিন্দ্রিযোতি, তথা দিট্ঠিচরিতো. তেসু পঠমো অসুভে ‘‘সুভ’’ন্তি ৰিপরিযেসগ্গাহী সতিবলেন যথাভূতং কাযসভাৰং সল্লক্খেন্তো ভাৰনাবলেন তং ৰিপল্লাসং সমুগ্ঘাতেত্ৰা সম্মত্তনিযামং ওক্কমতি. দুতিযো অসুখে ‘‘সুখ’’ন্তি ৰিপরিযেসগ্গাহী ‘‘উপ্পন্নং কামৰিতক্কং নাধিৰাসেতী’’তিআদিনা (ম. নি. ১.২৬; অ. নি. ৪.১৪; ৬.৫৮) ৰুত্তেন ৰীরিযসংৰরভূতেন ৰীরিযবলেন পটিপক্খং ৰিনোদেন্তো ভাৰনাবলেন তং ৰিপল্লাসং ৰিধমেত্ৰা সম্মত্তনিযামং ওক্কমতি. ততিযো অনিচ্চে ‘‘নিচ্চ’’ন্তি ৰিপল্লাসগ্গাহী সমথবলেন সমাহিতচিত্তো সঙ্খারানং খণিকভাৰং সল্লক্খেন্তো ভাৰনাবলেন তং ৰিপল্লাসং সমুগ্ঘাতেত্ৰা সম্মত্তনিযামং ওক্কমতি. চতুত্থো সন্ততিসমূহকিচ্চারম্মণঘনৰঞ্চিততায ফস্সাদিধম্মপুঞ্জমত্তে অনত্তনি ‘‘অত্তা’’তি মিচ্ছাভিনিৰেসী চতুকোটিকসুঞ্ঞতামনসিকারেন তং মিচ্ছাভিনিৰেসং ৰিদ্ধংসেন্তো সামঞ্ঞফলং সচ্ছিকরোতি. সুভসঞ্ঞাদীহি চতূহিপি ৰা ৰিপল্লাসেহি সমুদযসচ্চং, তেসমধিট্ঠানারম্মণভূতা পঞ্চুপাদানক্খন্ধা দুক্খসচ্চন্তিআদিনা সচ্চযোজনা ৰেদিতব্বা. ফলং পনেত্থ চত্তারি সামঞ্ঞফলানি, চতূহি চেত্থ ৰিপল্লাসেহি চতুরাসৰোঘযোগগন্থঅগতিতণ্হুপাদানসল্লৰিঞ্ঞাণট্ঠিতিঅপরিঞ্ঞাদিৰসেন অকুসলপক্খো নেতব্বো, তথা চতূহি সতিপট্ঠানেহি চতুব্বিধজ্ঝানৰিহারাধিট্ঠানসুখভাগিযধম্মঅপ্পমঞ্ঞাসম্মপ্পধানইদ্ধিপাদাদিৰসেন ৰোদানপক্খো নেতব্বোতি অযং সীহৰিক্কীল়িতস্স নযস্স ভূমি. যো হি সুভসঞ্ঞাদীহি ৰিপল্লাসেহি সকলস্স সংকিলেসপক্খস্স সদ্ধিন্দ্রিযাদীহি চ ৰোদানপক্খস্স চতুসচ্চযোজনাৰসেন নযনলক্খণো সংৰণ্ণনাৰিসেসো, অযং সীহৰিক্কীল়িতো নাম. ৰুত্তঞ্হেতং –

‘‘যো নেতি ৰিপল্লাসেহি,

কিলেসে ইন্দ্রিযেহি সদ্ধম্মে;

এতং নযং নযৰিদূ,

সীহৰিক্কীল়িতং আহূ’’তি. (নেত্তি. ৪ নিদ্দেসৰার);

অসন্তাসনজৰপরক্কমাদিৰিসেসযোগেন সীহো ভগৰা, তস্স ৰিক্কীল়িতং দেসনা ৰচীকম্মভূতো ৰিহারোতি কত্ৰা ৰিপল্লাসতপ্পটিপক্খপরিদীপনতো সীহস্স ৰিক্কীল়িতং এত্থাতি সীহৰিক্কীল়িতো, নযো. বলৰিসেসযোগদীপনতো ৰা সীহৰিক্কীল়িতসদিসত্তা নযো সীহৰিক্কীল়িতো. বলৰিসেসো চেত্থ সদ্ধাদিবলং, দসবলানি এৰ ৰা.

ইমেসং পন তিণ্ণং অত্থনযানং সিদ্ধিযা ৰোহারনযদ্ৰযং সিদ্ধমেৰ হোতি. তথা হি অত্থনযত্তযদিসাভাৰেন কুসলাদিধম্মানং আলোচনং দিসালোচনং. ৰুত্তঞ্হেতং –

‘‘ৰেয্যাকরণেসু হি যে,

কুসলাকুসলা তহিং তহিং ৰুত্তা;

মনসা ওলোকযতে,