১৮. অপরঅচ্ছরাসঙ্ঘাতৰগ্গৰণ্ণনা

৩৮২. ইদম্পি সুত্তন্তি এত্থ পি-সদ্দো হেট্ঠা ৰুত্তচূল়চ্ছরাসঙ্ঘাতসুত্তং সম্পিণ্ডেতি. চূল়চ্ছরাসঙ্ঘাতসুত্তে অপ্পনং অপ্পত্তায মেত্তায তাৰমহন্তো ৰিপাকো দস্সিতো, কিমঙ্গং পন ইমিস্সা অপ্পনাপ্পত্তায মেত্তাযাতি দস্সেতুং – ‘‘অপ্পনাপ্পত্তায হী’’তিআদিমাহ. ৰিপাককথাযেৰ নত্থীতি ৰিপাকে কথাযেৰ নত্থি, অযমেৰ ৰা পাঠো. গণনানুপুব্বতাতি গণনানুপুব্বতায. পঠমং উপ্পন্নন্তিপি পঠমং, পঠমং সমাপজ্জতীতি ইদং পন ন একন্তলক্খণং. চিণ্ণৰসীভাৰো হি অট্ঠসমাপত্তিলাভী আদিতো পট্ঠায মত্থকং পাপেন্তোপি সমাপজ্জিতুং সক্কোতি, মত্থকতো পট্ঠায আদিং পাপেন্তোপি, অন্তরন্তরা ওক্কন্তোপি সমাপজ্জিতুং সক্কোতি এৰ. পুব্বুপ্পত্তিযট্ঠেন পন পঠমং নাম হোতি. ৰিভঙ্গেতি ঝানৰিভঙ্গে. ৰিপস্সনং কযিরমানং লক্খণূপনিজ্ঝানকিচ্চং মগ্গেন সিজ্ঝতি তগ্গতসম্মোহৰিদ্ধংসনতো. অপিচ ৰিপস্সনায লক্খণূপনিজ্ঝানং মগ্গেন উপ্পন্নেন সিজ্ঝতি ইতরথা পরিৰত্তনতো, তস্মা মগ্গো লক্খণূপনিজ্ঝানং, ন অনিচ্চাদিলক্খণানং আরম্মণকরণতো. যথা ফলং নিব্বানস্স অসঙ্খতলক্খণং আরম্মণকরণৰসেন উপনিজ্ঝাযতি, এৰং মগ্গোপি. এৰম্পিস্স লক্খণূপনিজ্ঝানতং ৰেদিতব্বং. ৰত্তব্বমেৰ নত্থি অরিত্তজ্ঝানতায. সেসং ৰিসেসং, অরিত্তজ্ঝানা এৰাতি অত্থো.

৩৮৬-৩৮৭. হিতফরণন্তি সত্তেসু হিতানুরূপং ঝানস্স ফরিত্ৰা পৰত্তনং. চেতোপটিপক্খতো ৰিমুচ্চতি এতাযাতি চেতোৰিমুত্তি, অপ্পনাপ্পত্তা মেত্তা. তেনাহ – ‘‘ইধা’’তিআদি. এসেৰ নযোতি ইমিনা করুণাদীনম্পি অপ্পনাপ্পত্ততং অতিদিসতি. ৰট্টং হোন্তি কম্মৰট্টভাৰতো. ৰট্টপাদা হোন্তীতি ৰিপাকৰট্টস্স কারণং হোন্তি.

৩৯০. অজ্ঝত্তপরিকম্মৰসেনাতি অত্তনো কেসাদীসু পরিকম্মকরণৰসেন. অট্ঠারসৰিধেতি অট্ঠারসপ্পভেদে. কাযেতি রূপকাযে. রূপকাযো হি ইধ অঙ্গপচ্চঙ্গানং কেসাদীনঞ্চ ধম্মানং সমূহট্ঠেন হত্থিকাযরথকাযাদযো ৰিয কাযোতি অধিপ্পেতো. সমূহৰিসযতায চস্স কাযসদ্দস্স সমুদাযূপাদনতায চ অসুভাকারস্স ‘‘কাযে’’তি একৰচনং. তথা আরম্মণাদিৰিভাগেন অনেকভেদভিন্নম্পি চিত্তং চিত্তভাৰসামঞ্ঞেন একজ্ঝং গহেত্ৰা ‘‘চিত্তে’’তি একৰচনং কতং. কাযানুপস্সীতি ইমস্স অত্থং দস্সেতুং – ‘‘তমেৰ কাযং পঞ্ঞায অনুপস্সন্তো’’তি আহ. তমেৰ কাযন্তি চ অৰধারণেন ৰেদনাদিঅনুপস্সনং নিৰত্তেতি. তেন চ পুন কাযগ্গহণস্স পযোজনং সূচিতন্তি দট্ঠব্বং. ‘‘কাযে’’তি হি ৰত্ৰাপি পুন ‘‘কাযানুপস্সী’’তি দুতিযং কাযগ্গহণং অসম্মিস্সতো ৰৰত্থানঘনৰিনিব্ভোগাদিদস্সনত্থং কতং. তেন ৰেদনাদযোপি এত্থ সিতা, এত্থ পটিবদ্ধাতি কাযৰেদনাদিঅনুপস্সনপ্পসঙ্গেপি আপন্নে ন কাযে ৰেদনানুপস্সী চিত্তানুপস্সী ধম্মানুপস্সী ৰা. অথ খো কাযানুপস্সীযেৰাতি কাযসঙ্খাতৰত্থুস্মিং কাযানুপস্সনাকারস্সেৰ দস্সনেন অসম্মিস্সতো ৰৰত্থানং দস্সিতং হোতি. তথা ন কাযে অঙ্গপচ্চঙ্গৰিনিমুত্তএকধম্মানুপস্সী, নাপি কেসলোমাদিৰিনিমুত্তইত্থিপুরিসানুপস্সী. যোপি চেত্থ কেসলোমাদিকো ভূতুপাদাযসমূহসঙ্খাতো কাযো, কত্থপি ন ভূতুপাদাযৰিনিমুত্তএকধম্মানুপস্সী, অথ খো রথসম্ভারানুপস্সকো ৰিয অঙ্গপচ্চঙ্গসমূহানুপস্সী, নাগরাৰযৰানুপস্সকো ৰিয কেসলোমাদিসমূহানুপস্সী, কদলিক্খন্ধপত্তৰট্টিৰিনিব্ভুজ্জকো রিত্তমুট্ঠিৰিনিৰেঠকো ৰিয চ ভূতুপাদাযসমূহানুপস্সীযেৰাতি নানপ্পকারতো সমূহৰসেনেৰ কাযসঙ্খাতস্স ৰত্থুনো দস্সনেন ঘনৰিনিব্ভোগো দস্সিতো হোতি. ন হেত্থ যথাৰুত্তসমূহৰিনিমুত্তো কাযো ৰা ইত্থী ৰা পুরিসো ৰা অঞ্ঞো ৰা কোচি ধম্মো দিস্সতি, যথাৰুত্তধম্মসমূহমত্তেযেৰ পন তথা তথা সত্তা মিচ্ছাভিনিৰেসং করোন্তি.

অট্ঠারসৰিধেনাতি অট্ঠারসৰিধা. সতিপট্ঠানভাৰকস্সাতি সতিপট্ঠানভাৰং ভাৰেন্তস্স. তীসু ভৰেসু কিলেসে আতপেতীতি আতাপো, ৰীরিযস্সেতং নামং. যদিপি হি কিলেসানং পহানং আতাপনন্তি, তং সম্মাদিট্ঠিআদীনম্পি অত্থেৰ. আতপসদ্দো ৰিয পন আতাপসদ্দোপি ৰীরিযেৰ নিরুল়্হো. অথ ৰা পটিপক্খপ্পহানে সম্পযুত্তধম্মানং অব্ভুস্সহনৰসেন পৰত্তমানস্স ৰীরিযস্স সাতিসযং তদাতাপনন্তি ৰীরিযমেৰ তথা ৰুচ্চতি, ন অঞ্ঞধম্মা, তস্মা আতাপোতি ৰীরিযস্স নামং, সো অস্স অত্থীতি আতাপী. অযঞ্চ ঈকারো পসংসায অতিসযস্স ৰা দীপকোতি আতাপিগ্গহণেন সম্মপ্পধানসমঙ্গিতং দস্সেতি. তেনেৰাহ – ‘‘আতাপীতি…পে… ৰীরিযেন ৰীরিযৰা’’তি. সম্পজানোতি সম্পজঞ্ঞসঙ্খাতেন ঞাণেন সমন্নাগতো. তেনাহ – ‘‘অট্ঠারসৰিধেন…পে… সম্মা পজানন্তো’’তি. অযং পনেত্থ ৰচনত্থো – সম্মা সমন্ততো সামঞ্চ পজানন্তো সম্পজানো, অসম্মিস্সতো ৰৰত্থানে অঞ্ঞধম্মানুপস্সিতাভাৰেন সম্মা অৰিপরীতং সব্বাকারপ্পজানেন সমন্ততো উপরূপরিৰিসেসাৰহভাৰেন পৰত্তিযা সম্মা পজানন্তোতি অত্থো.

কাযো চ ইধ লুজ্জনপ্পলুজ্জনট্ঠেন লোকোতি অধিপ্পেতোতি আহ – ‘‘তস্মিংযেৰ কাযসঙ্খাতে লোকে’’তি. পঞ্চকামগুণিকতণ্হন্তি রূপাদীসু পঞ্চসু কামগুণেসু পৰত্তমানং তণ্হং. যস্মা পনেত্থ অভিজ্ঝাগহণেন কামচ্ছন্দো, দোমনস্সগ্গহণেন ব্যাপাদো সঙ্গহং গচ্ছতি, তস্মা নীৰরণপরিযাপন্নবলৰধম্মদ্ৰযদস্সনেন নীৰরণপ্পহানং ৰুত্তং হোতীতি ৰেদিতব্বং. ৰিসেসেন চেত্থ অভিজ্ঝাৰিনযেন কাযসম্পত্তিমূলকস্স অনুরোধস্স, দোমনস্সৰিনযেন কাযৰিপত্তিমূলকস্স ৰিরোধস্স, অভিজ্ঝাৰিনযেন চ কাযে অভিরতিযা, দোমনস্সৰিনযেন কাযভাৰনায অনভিরতিযা, অভিজ্ঝাৰিনযেন কাযে অভূতানং সুভসুখভাৰাদীনং পক্খেপস্স, দোমনস্সৰিনযেন কাযে ভূতানং অসুভাসুখভাৰাদীনং অপনযনস্স চ পহানং ৰুত্তং. তেন যোগাৰচরস্স যোগানুভাৰো যোগসমত্থতা চ দীপিতা হোতি. যোগানুভাৰো হি এস, যদিদং অনুরোধৰিরোধৰিপ্পমুত্তো অরতিরতিসহো অভূতপক্খেপভূতাপনযনৰিরহিতো চ হোতি. অনুরোধৰিরোধৰিপ্পমুত্তো চেস অরতিরতিসহো অভূতং অপক্খিপন্তো ভূতঞ্চ অনপনেন্তো যোগসমত্থো হোতীতি. সুদ্ধরূপসম্মসনমেৰ কথিতন্তি কেৰলং কাযানুপস্সনাভাৰতো ৰুত্তং.

সুখাদিভেদাসু ৰেদনাসূতি সুখদুক্খঅদুক্খমসুখসামিসনিরামিসভেদাসু ৰেদনাসু. তত্থ সুখযতীতি সুখা, সম্পযুত্তধম্মে কাযঞ্চ লদ্ধস্সাদে করোতীতি অত্থো. সুট্ঠু ৰা খাদতি, খনতি ৰা কাযিকং চেতসিকঞ্চ আবাধন্তি সুখা, সুকরং ওকাসদানং এতিস্সাতি ৰা সুখা. দুক্খযতীতি দুক্খা, সম্পযুত্তধম্মে কাযঞ্চ পীল়েতি ৰিবাধতীতি অত্থো. দুট্ঠু ৰা খাদতি, খনতি ৰা কাযিকং চেতসিকঞ্চ সাতন্তি দুক্খা, দুক্করং ওকাসদানং এতিস্সাতি ৰা দুক্খা. দুক্খসুখপ্পটিক্খেপেন অদুক্খমসুখাতি উপেক্খা ৰুত্তা. ৰেদিযতি আরম্মণরসং অনুভৰতীতি ৰেদনা. ৰেদিযমানোতি অনুভৰমানো. সুখং ৰেদনং ৰেদিযামীতি পজানাতীতি কাযিকং ৰা চেতসিকং ৰা সুখং ৰেদনং ৰেদিযমানো ‘‘অহং সুখং ৰেদনং ৰেদিযামী’’তি পজানাতীতি অত্থো. তত্থ কামং উত্তানসেয্যকাপি দারকা থঞ্ঞপিৰনাদিকালে সুখং ৰেদনং ৰেদিযমানা ‘‘সুখং ৰেদনং ৰেদিযামা’’তি পজানন্তি, ন পনেতং এৰরূপং পজাননং সন্ধায ৰুত্তং. এৰরূপঞ্হি জাননং সত্তুপলদ্ধিং ন জহতি, অত্তসঞ্ঞং ন উগ্ঘাটেতি, কম্মট্ঠানং ৰা সতিপট্ঠানভাৰনা ৰা ন হোতি. ইমস্স পন ভিক্খুনো জাননং সত্তুপলদ্ধিং জহতি, অত্তসঞ্ঞং উগ্ঘাটেতি, কম্মট্ঠানঞ্চেৰ সতিপট্ঠানভাৰনা চ হোতি. ইদঞ্হি ‘‘কো ৰেদিযতি, তস্স ৰেদনা, কিং কারণা ৰেদনা’’তি এৰং সম্পজানন্তস্স ৰেদিযনং সন্ধায ৰুত্তং.

তত্থ কো ৰেদিযতীতি? ন কোচি সত্তো ৰা পুগ্গলো ৰা ৰেদিযতি. কস্স ৰেদনাতি? ন কস্সচি সত্তস্স ৰা পুগ্গলস্স ৰা ৰেদনা. কিং কারণা ৰেদনাতি? ৰত্থুআরম্মণা চ পনস্স ৰেদনাতি. তস্মা এস এৰং পজানাতি ‘‘তং তং সুখাদীনং ৰত্থুভূতং রূপাদিং আরম্মণং কত্ৰা ৰেদনাৰ ৰেদিযতি, তং পন ৰেদনাপৰত্তিং উপাদায ‘অহং ৰেদিযামী’তি ৰোহারমত্তং হোতী’’তি. এৰং ‘‘সুখাদীনং ৰত্থুভূতং রূপাদিং আরম্মণং কত্ৰা ৰেদনাৰ ৰেদিযতী’’তি সল্লক্খেন্তো এস ‘‘সুখং ৰেদনং ৰেদিযামী’’তি পজানাতীতি ৰেদিতব্বো.

অথ ৰা সুখং ৰেদনং ৰেদিযামীতি পজানাতীতি সুখৰেদনাক্খণে দুক্খায ৰেদনায অভাৰতো সুখং ৰেদনং ৰেদিযমানো ‘‘সুখং ৰেদনংযেৰ ৰেদিযামী’’তি পজানাতি. তেন যা পুব্বে ভূতপুব্বা দুক্খা ৰেদনা, তস্সা ইদানি অভাৰতো ইমিস্সা চ সুখায ৰেদনায ইতো পরং পঠমং অভাৰতো ‘‘ৰেদনা নাম অনিচ্চা অদ্ধুৰা ৰিপরিণামধম্মা’’তি ইতিহ তত্থ সম্পজানো হোতি. দুক্খং ৰেদনং ৰেদিযামীতি পজানাতীতিআদীসুপি এসেৰ নযো.

সামিসং ৰা সুখন্তিআদীসু যস্মা কিলেসেহি আমসিতব্বতো আমিসা নাম পঞ্চ কামগুণা. আরম্মণকরণৰসেন সহ আমিসেহীতি সামিসা, তস্মা সামিসা সুখা নাম পঞ্চকামগুণামিসনিস্সিতা ছসু দ্ৰারেসু উপ্পন্না ছগেহস্সিতা সোমনস্সৰেদনা. সামিসা দুক্খা নাম ছগেহস্সিতা দোমনস্সৰেদনা. সা চ ছসু দ্ৰারেসু ‘‘ইট্ঠারম্মণং নানুভৰিস্সামি নানুভৰামী’’তি ৰিতক্কযতো উপ্পন্না কামগুণনিস্সিতা দোমনস্সৰেদনা ৰেদিতব্বা. নিরামিসা সুখা নাম ছনেক্খম্মস্সিতা সোমনস্সৰেদনা. সা চ ছসু দ্ৰারেসু ইট্ঠারম্মণে আপাথগতে অনিচ্চাদিৰসেন ৰিপস্সনং পট্ঠপেত্ৰা উস্সুক্কাপেতুং সক্কোন্তস্স ‘‘উস্সক্কিতা মে ৰিপস্সনা’’তি সোমনস্সজাতস্স উপ্পন্না সোমনস্সৰেদনা দট্ঠব্বা.

নিরামিসা দুক্খা নাম ছনেক্খম্মস্সিতা দোমনস্সৰেদনা. সা পন ছসু দ্ৰারেসু ইট্ঠারম্মণে আপাথগতে অনুত্তরৰিমোক্খসঙ্খাতঅরিযফলধম্মেসু পিহং পট্ঠপেত্ৰা তদধিগমায অনিচ্চাদিৰসেন ৰিপস্সনং পট্ঠপেত্ৰা উস্সুক্কাপেতুং অসক্কোন্তস্স ‘‘ইমম্পি পক্খং ইমম্পি মাসং ইমম্পি সংৰচ্ছরং ৰিপস্সনং উস্সুক্কাপেত্ৰা অরিযভূমিং পাপুণিতুং নাসক্খি’’ন্তি অনুসোচতো উপ্পন্না দোমনস্সৰেদনা.

সামিসা অদুক্খমসুখা নাম ছগেহস্সিতা উপেক্খাৰেদনা. সা চ ছসু দ্ৰারেসু ইট্ঠারম্মণে আপাথগতে গুল়পিণ্ডকে নিলীনমক্খিকা ৰিয রূপাদীনি অনুৰত্তমানা তত্থেৰ লগ্গা লগ্গিতা হুত্ৰা উপ্পন্না কামগুণনিস্সিতা উপেক্খাৰেদনা. নিরামিসা অদুক্খমসুখা নাম ছনেক্খম্মস্সিতা উপেক্খাৰেদনা. সা পন ছসু দ্ৰারেসু ইট্ঠাদিআরম্মণে আপাথগতে ইট্ঠে অরজ্জন্তস্স, অনিট্ঠে অদুস্সন্তস্স, অসমপেক্খনেন অমুয্হন্তস্স উপ্পন্না ৰিপস্সনাঞাণসম্পযুত্তা উপেক্খাৰেদনা. এৰং ৰুত্তন্তি মহাসতিপট্ঠানসুত্তে ৰুত্তং. সাৰ ৰেদনা ৰেদিতব্বাতি লুজ্জনপ্পলুজ্জনট্ঠেন সা ৰেদনা ‘‘লোকো’’তি ৰেদিতব্বা.

এৰং ৰিত্থারিতেতি ‘‘সরাগং ৰা চিত্তং সরাগং চিত্তন্তি পজানাতি, ৰীতরাগং ৰা চিত্তং…পে… সদোসং ৰা চিত্তং, ৰীতদোসং ৰা চিত্তং, সমোহং ৰা চিত্তং, ৰীতমোহং ৰা চিত্তং, সংখিত্তং ৰা চিত্তং, ৰিক্খিত্তং ৰা চিত্তং, মহগ্গতং ৰা চিত্তং, অমহগ্গতং ৰা চিত্তং, সউত্তরং ৰা চিত্তং, অনুত্তরং ৰা চিত্তং, সমাহিতং ৰা চিত্তং, অসমাহিতং ৰা চিত্তং, ৰিমুত্তং ৰা চিত্তং, অৰিমুত্তং ৰা চিত্তন্তি পজানাতী’’তি এৰং সতিপট্ঠানসুত্তে (দী. নি. ২.৩৮১; ম. নি. ১.১১৪) ৰিত্থারেত্ৰা দস্সিতে সোল়সৰিধে চিত্তে.

তত্থ সরাগন্তি অট্ঠৰিধং লোভসহগতং. ৰীতরাগন্তি লোকিযকুসলাব্যাকতং. ইদং পন যস্মা সম্মসনং ন ধম্মসমোধানং, তস্মা ইধ একপদেপি লোকুত্তরং ন লব্ভতি. সেসানি চত্তারি অকুসলচিত্তানি নেৰ পুরিমপদং, ন পচ্ছিমপদং ভজন্তি. সদোসন্তি দুৰিধং দোমনস্সসহগতং. ৰীতদোসন্তি লোকিযকুসলাব্যাকতং. সেসানি দস অকুসলচিত্তানি নেৰ পুরিমপদং, ন পচ্ছিমপদং ভজন্তি. সমোহন্তি ৰিচিকিচ্ছাসহগতঞ্চেৰ উদ্ধচ্চসহগতঞ্চাতি দুৰিধং. যস্মা পন মোহো সব্বাকুসলেসু উপ্পজ্জতি, তস্মা সেসানিপি ইধ ৰত্তন্তিযেৰ. ইমস্মিঞ্ঞেৰ হি দুকে দ্ৰাদসাকুসলচিত্তানি পরিযাদিন্নানীতি. ৰীতমোহন্তি লোকিযকুসলাব্যাকতং.

সংখিত্তন্তি থিনমিদ্ধানুপতিতং. এতঞ্হি সঙ্কুচিতচিত্তং নাম আরম্মণে সঙ্কোচৰসেন পৰত্তনতো. ৰিক্খিত্তন্তি উদ্ধচ্চসহগতং. এতঞ্হি পসটচিত্তং নাম আরম্মণে সৰিসেসং ৰিক্খেপৰসেন ৰিসটভাৰেন পৰত্তনতো. মহগ্গতন্তি রূপাৰচরং অরূপাৰচরঞ্চ. অমহগ্গতন্তি কামাৰচরং. সউত্তরন্তি কামাৰচরং. অনুত্তরন্তি রূপাৰচরং অরূপাৰচরঞ্চ. তত্রাপি সউত্তরং রূপাৰচরং, অনুত্তরং অরূপাৰচরমেৰ. সমাহিতন্তি যস্স অপ্পনাসমাধি ৰা উপচারসমাধি ৰা অত্থি. অসমাহিতন্তি উভযসমাধিৰিরহিতং. ৰিমুত্তন্তি তদঙ্গৰিক্খম্ভনৰিমুত্তীহি ৰিমুত্তং. অৰিমুত্তন্তি উভযৰিমুত্তিরহিতং. সমুচ্ছেদপ্পটিপ্পস্সদ্ধিনিস্সরণৰিমুত্তীনং পন ইধ ওকাসোৰ নত্থি, ওকাসাভাৰো চ সম্মসনচারস্স অধিপ্পেতত্তা ৰেদিতব্বো.

উপাদানস্স খন্ধা উপাদানক্খন্ধা, উপাদানস্স পচ্চযভূতা ধম্মপুঞ্জা ধম্মরাসযোতি অত্থো. উপাদানেহি আরম্মণকরণাদিৰসেন উপাদাতব্বা ৰা খন্ধা উপাদানক্খন্ধা. ছ অজ্ঝত্তিকবাহিরাযতনানীতি চক্খু সোতং ঘানং জিৰ্হা কাযো মনোতি ইমানি ছ অজ্ঝত্তিকাযতনানি চেৰ, রূপং সদ্দো গন্ধো রসো ফোট্ঠব্বো ধম্মাতি ইমানি ছ বাহিরাযতনানি চ. এত্থ পন লোকুত্তরধম্মা ন গহেতব্বা সম্মসনচারস্স অধিপ্পেতত্তা. সত্ত সম্বোজ্ঝঙ্গাতি সতিসম্বোজ্ঝঙ্গাদযো সত্ত সম্বোজ্ঝঙ্গা. সতিআদযো হি সম্বোধিস্স, সম্বোধিযা ৰা অঙ্গাতি সম্বোজ্ঝঙ্গা. তথা হি সম্বুজ্ঝতি আরদ্ধৰিপস্সকতো পট্ঠায যোগাৰচরোতি সম্বোধি, যায ৰা সো সতিআদিকায সত্তধম্মসামগ্গিযা সম্বুজ্ঝতি, কিলেসনিদ্দাতো উট্ঠাতি, সচ্চানি ৰা পটিৰিজ্ঝতি, সা ধম্মসামগ্গী সম্বোধি, তস্স সম্বোধিস্স, তস্সা ৰা সম্বোধিযা অঙ্গাতি সম্বোজ্ঝঙ্গা.

চত্তারি অরিযসচ্চানীতি ‘‘দুক্খং দুক্খসমুদযো দুক্খনিরোধো দুক্খনিরোধগামিনিপটিপদা’’তি (সং. নি. ৫.১০৭১-১০৭২) এৰং ৰুত্তানি চত্তারি অরিযসচ্চানি. তত্থ পুরিমানি দ্ৰে সচ্চানি ৰট্টং পৰত্তিহেতুভাৰতো. পচ্ছিমানি ৰিৰট্টং নিৰট্টতদধিগমূপাযভাৰতো. তেসু ভিক্খুনো ৰট্টে কম্মট্ঠানাভিনিৰেসো হোতি সরূপতো পরিগ্গহসম্ভৰতো. ৰিৰট্টে নত্থি অভিনিৰেসো অৰিসযত্তা অৰিসযত্তে চ পযোজনাভাৰতো. পঞ্চধা ৰুত্তেসূতি সতিপট্ঠানসুত্তে ৰুত্তেসু. সুদ্ধঅরূপসম্মসনমেৰাতি রূপেন অমিস্সিতত্তা কেৰলং অরূপসম্মসনমেৰ. খন্ধাযতনসচ্চকোট্ঠাসানং পঞ্চক্খন্ধসঙ্গহতো ‘‘রূপারূপসম্মসন’’ন্তি ৰুত্তং. পুব্বভাগিযানম্পি সতিপট্ঠানানং সঙ্গহিতত্তা ‘‘লোকিযলোকুত্তরমিস্সকানেৰ কথিতানী’’তি আহ.

৩৯৪. অনিব্বত্তানন্তি অজাতানং. পযোগং পরক্কমন্তি এত্থ ভুসং যোগো পযোগো, পযোগোৰ পরক্কমো, পযোগসঙ্খাতং পরক্কমন্তি অত্থো. চিত্তং উক্খিপতীতি কোসজ্জপক্খে পতিতুং অপদানৰসেন উক্খিপতি. পধানৰীরিযন্তি সম্মপ্পধানলক্খণপ্পত্তৰীরিযং. লোকিযাতি লোকিযসম্মপ্পধানকথা. সব্বপুব্বভাগেতি সব্বমগ্গানং পুব্বভাগে. কস্সপসংযুত্তপরিযাযেনাতি কস্সপসংযুত্তে আগতসুত্তেন ‘‘উপ্পন্না মে পাপকা অকুসলা ধম্মা অপ্পহীযমানা অনত্থায সংৰত্তেয্যু’’ন্তি (সং. নি. ২.১৪৫) আগতত্তা. সা লোকিযাতি ৰেদিতব্বা.

সমথৰিপস্সনাৰাতি অৰধারণেন মগ্গং নিৰত্তেত্ৰা তস্স নিৰত্তনে কারণং দস্সেন্তো, ‘‘মগ্গো পনা’’তিআদিমাহ. সকিং উপ্পজ্জিত্ৰাতি ইদং ভূতকথনমত্তং. নিরুদ্ধস্স পুন অনুপ্পজ্জনতো ‘‘ন কোচি গুণো’’তি আসঙ্কেয্যাতি আহ – ‘‘সো হী’’তিআদি. অনন্তরমেৰ যথা ফলং উপ্পজ্জতি, তথা পৰত্তিযেৰস্স পচ্চযদানং. পুরিমস্মিম্পীতি ‘‘অনুপ্পন্না মে কুসলা ধম্মা উপ্পজ্জমানা অনত্থায সংৰত্তেয্যু’’ন্তি এত্থপি. ৰুত্তন্তি পোরাণট্ঠকথাযং. তং পন তথাৰুত্তৰচনং ন যুত্তং দুতিযস্মিং ৰিয পুরিমস্মিং মগ্গস্স অগ্গহণে কারণাভাৰতো. পুরিমস্মিং অগ্গহিতে মগ্গে অনুপ্পজ্জমানো মগ্গো অনত্থায সংৰত্তেয্যাতি আপজ্জেয্য, ন চেতং যুত্তং আপজ্জমানে তস্মিং পধানত্থসম্ভৰতো. চতুকিচ্চসাধনৰসেনাতি অনুপ্পন্নাকুসলানুপ্পাদনাদিচতুকিচ্চসাধনৰসেন.

ৰুত্তনযেনাতি ‘‘অসমুদাচারৰসেন ৰা অননুভূতারম্মণৰসেন ৰা’’তিআদিনা ৰুত্তনযেন. ৰিজ্জমানাতি ধরমানসভাৰা. খণত্তযপরিযাপন্নত্তা উপ্পাদাদিসমঙ্গিনো ৰত্তমানভাৰেন উপ্পন্নং ৰত্তমানুপ্পন্নং. তঞ্হি উপ্পাদতো পট্ঠায যাৰ ভঙ্গা উদ্ধং পন্নং পত্তন্তি নিপ্পরিযাযতো ‘‘উপ্পন্ন’’ন্তি ৰুচ্চতি. অনুভৰিত্ৰা ভৰিত্ৰা চ ৰিগতং ভুত্ৰাৰিগতং. অনুভৰনভৰনানি হি ভৰনসামঞ্ঞেন ভুত্ৰা-সদ্দেন ৰুত্তানি. সামঞ্ঞমেৰ হি উপসগ্গেন ৰিসেসীযতি. ইধ ৰিপাকানুভৰনৰসেন তদারম্মণং অৰিপক্কৰিপাকস্স সব্বথা অৰিগতত্তা ভৰিত্ৰাৰিগতমত্তৰসেন কম্মঞ্চ ‘‘ভুত্ৰাৰিগতুপ্পন্ন’’ন্তি ৰুত্তং. ন অট্ঠসালিনিযং ৰিয রজ্জনাদিৰসেন অনুভূতাপগতং জৰনং উপ্পজ্জিত্ৰা নিরুদ্ধতাৰসেন ভূতাপগতঞ্চ সঙ্খতং ভূতাপগতুপ্পন্নন্তি. তস্মা ইধ ওকাসকতুপ্পন্নং ৰিপাকমেৰ ৰদতি, ন তত্থ ৰিয কম্মম্পি. অট্ঠসালিনিযঞ্হি ভূতাৰিগতুপ্পন্নং ওকাসকতুপ্পন্নঞ্চ অঞ্ঞথা দস্সিতং. ৰুত্তঞ্হি তত্থ (ধ. স. অট্ঠ. ১ কামাৰচরকুসলপদভাজনীয) –

‘‘আরম্মণরসং অনুভৰিত্ৰা নিরুদ্ধং অনুভূতাপগতসঙ্খাতং কুসলাকুসলং, উপাদাদিত্তযং অনুপ্পত্ৰা নিরুদ্ধং ভূতাপগতসঙ্খাতং সেসসঙ্খতঞ্চ ভূতাপগতুপ্পন্নং নাম. ‘যানিস্স তানি পুব্বে কতানি কম্মানী’তি এৰমাদিনা নযেন ৰুত্তং কম্মং অতীতম্পি সমানং অঞ্ঞং ৰিপাকং পটিবাহিত্ৰা অত্তনো ৰিপাকস্সোকাসং কত্ৰা ঠিতত্তা, তথাকতোকাসঞ্চ ৰিপাকং অনুপ্পন্নম্পি সমানং এৰং কতে ওকাসে একন্তেন উপ্পজ্জনতো ওকাসকতুপ্পন্নং নামা’’তি.

ইধ পন সম্মোহৰিনোদনিযং ৰুত্তনযেনেৰ ভুত্ৰাৰিগতুপ্পন্নং ওকাসকতুপ্পন্নঞ্চ দস্সিতং. ৰুত্তঞ্হি, সম্মোহৰিনোদনিযং (ৰিভ. অট্ঠ. ৪০৬) –

‘‘কম্মে পন জহিতে আরম্মণরসং অনুভৰিত্ৰা নিরুদ্ধো ৰিপাকো ভুত্ৰাৰিগতং নাম. কম্মং উপ্পজ্জিত্ৰা নিরুদ্ধং ভুত্ৰাৰিগতং নাম. তদুভযম্পি ভুত্ৰাৰিগতুপ্পন্নন্তি সঙ্খ্যং গচ্ছতি. কুসলাকুসলং কম্মং অঞ্ঞকম্মস্স ৰিপাকং পটিবাহিত্ৰা অত্তনো ৰিপাকস্স ওকাসং করোতি. এৰং কতে ওকাসে ৰিপাকো উপ্পজ্জমানো ওকাসকরণতো পট্ঠায উপ্পন্নোতি ৰুচ্চতি. ইদং ওকাসকতুপ্পন্নং নামা’’তি.

তত্থ অট্ঠসালিনিযা অযমধিপ্পাযো – ‘‘সতিপি সব্বেসম্পি চিত্তুপ্পাদানং সংৰেদযিতসভাৰা আরম্মণানুভৰনে সৰিপল্লাসে পন সন্তানে চিত্তাভিসঙ্খারৰসেন পৰত্তিতো অব্যাকতেহি ৰিসিট্ঠো কুসলাকুসলানং সাতিসযো ৰিসযানুভৰনাকারো. যথা ৰিকপ্পগ্গাহৰসেন রাগাদীহি তব্বিপক্খেহি চ অকুসলং কুসলঞ্চ নিপ্পরিযাযতো আরম্মণরসং অনুভৰতি, ন তথা ৰিপাকো কম্মৰেগক্খিত্তত্তা, নাপি কিরিযা অহেতুকানং অতিদুব্বলতায, সহেতুকানঞ্চ খীণকিলেসস্স ছল়ঙ্গুপেক্খাৰতো উপ্পজ্জমানানং অতিসন্তৰুত্তিত্তা, তস্মা রজ্জনাদিৰসেন আরম্মণরসানুভৰনং সাতিসযন্তি অকুসলং কুসলঞ্চ উপ্পজ্জিত্ৰা নিরুদ্ধতাসামঞ্ঞেন সেসসঙ্খতঞ্চ ভূতাপগত’’ন্তি ৰুত্তং. সম্মোহৰিনোদনিযা পন ৰিপাকানুভৰনৰসেন তদারম্মণং অৰিপক্কপাকস্স সব্বথা অৰিগতত্তা ভৰিত্ৰাৰিগতমত্তৰসেন কম্মঞ্চ ভুত্ৰাপগতন্তি ৰুত্তং. তেনেৰ তত্থ ওকাসকতুপ্পন্নন্তি ৰিপাকমেৰাহ, ন কম্মম্পি, তস্মা ইধাপি সম্মোহৰিনোদনিযং ৰুত্তনযেনেৰ ভুত্ৰাপগতুপ্পন্নং ওকাসকতুপ্পন্নঞ্চ ৰিভত্তন্তি দট্ঠব্বং.

পঞ্চক্খন্ধা পন ৰিপস্সনায ভূমি নামাতি সম্মসনস্স ঠানভাৰতো ৰুত্তং. তেসূতি অতীতাদিভেদেসু. অনুসযিতকিলেসাতি অপ্পহীনা মগ্গেন পহাতব্বা অধিপ্পেতা. তেনাহ – ‘‘অতীতা ৰা…পে… ন ৰত্তব্বা’’তি. হোন্তু তাৰ ‘‘অতীতা’’তি ৰা ‘‘পচ্চুপ্পন্না’’তি ৰা ন ৰত্তব্বা, ‘‘অনাগতা’’তি পন কস্মা ন ৰত্তব্বা, ননু কারণলাভে উপ্পজ্জনারহা অপ্পহীনট্ঠেন থামগতা কিলেসা অনুসযাতি ৰুচ্চন্তীতি? সচ্চমেতং, অনাগতভাৰোপি নেসং ন পরিচ্ছিন্নো ইতরানাগতক্খন্ধানং ৰিযাতি ‘‘অনাগতা ৰাতি ন ৰত্তব্বা’’তি ৰুত্তং. যদি হি নেসং পরিচ্ছিন্নো অনাগতভাৰো সিযা, ততো ‘‘পচ্চুপ্পন্না, অতীতা’’তি চ ৰত্তব্বা সিযুং, পচ্চযসমৰাযে পন উপ্পজ্জনারহতং উপাদায অনাগতৰোহারো তত্থ ৰেদিতব্বো.

ইদং ভূমিলদ্ধুপ্পন্নং নামাতি ইদং যথাৰুত্তং কিলেসজাতং অপ্পহীনট্ঠেন ভূমিলদ্ধুপ্পন্নং নাম কারণলাভে সতি ৰিজ্জমানকিচ্চকরণতো. তাসু তাসু ভূমিসূতি মনুস্সদেৰাদিঅত্তভাৰসঙ্খাতেসু উপাদানক্খন্ধেসু. আরম্মণকরণৰসেন হি ভৰন্তি এত্থ কিলেসাতি ভূমিযো, উপাদানক্খন্ধা. অসমুগ্ঘাতগতাতি তস্মিং তস্মিং সন্তানে অনুপ্পত্তিধম্মতং অনাপাদিততায সমুগ্ঘাতং সমুচ্ছেদং ন গতাতি অসমুগ্ঘাতগতা. ভূমিলদ্ধুপ্পন্নং নামাতি এত্থ লদ্ধভূমিকং ভূমিলদ্ধন্তি ৰুত্তং অগ্গিআহিতো ৰিয. ওকাসকতুপ্পন্নসদ্দেপি চ অট্ঠসালিনিযং (ধ. স. অট্ঠ. ১ কামাৰচরকুসলপদভাজনীয) আগতনযেন ওকাসো কতো এতেন কুসলাকুসলকম্মেন, ওকাসো কতো এতস্স ৰিপাকস্সাতি চ দুৰিধত্থেপি এৰমেৰ কতসদ্দস্স পরনিপাতো ৰেদিতব্বো. ইধ পন ওকাসকতুপ্পন্নসদ্দেন ৰিপাকস্সেৰ গহিতত্তা ‘‘ওকাসো কতো এতস্স ৰিপাকস্সা’’তি এৰং ৰিগ্গহো দট্ঠব্বো.

খণত্তযসমঙ্গিতায সমুদাচারপ্পত্তং সমুদাচারুপ্পন্নং. তেনাহ – ‘‘সম্পতি ৰত্তমানংযেৰা’’তি. আরম্মণং অধিগ্গয্হ দল়্হং গহেত্ৰা পৰত্তং আরম্মণাধিগ্গহিতুপ্পন্নং. ৰিক্খম্ভনপ্পহানৰসেন অপ্পহীনা অৰিক্খম্ভিতা. সমুচ্ছেদপ্পহানৰসেন অপ্পহীনা অসমুগ্ঘাতিতা. নিমিত্তগ্গাহৰসেন আরম্মণস্স অধিগ্গহিতত্তা তং আরম্মণং অনুস্সরিতানুস্সরিতক্খণে কিলেসুপ্পত্তিহেতুভাৰেন উপতিট্ঠনতো অধিগ্গহিতমেৰ নামং হোতীতি আহ – ‘‘আরম্মণস্স অধিগ্গহিতত্তা’’তি. এত্থ চ আহটখীররুক্খো ৰিয নিমিত্তগ্গাহৰসেন অধিগ্গহিতং আরম্মণং, অনাহটখীররুক্খো ৰিয অৰিক্খম্ভিততায অন্তোগতকিলেসআরম্মণং দট্ঠব্বং. নিমিত্তগ্গাহিকা অৰিক্খম্ভিতকিলেসা ৰা পুগ্গলা ৰা আহটানাহটখীররুক্খসদিসা. পুরিমনযেনেৰাতি অৰিক্খম্ভিতুপ্পন্নে ৰুত্তনযেনেৰ. ৰিত্থারেতব্বন্তি ‘‘ইমস্মিং নাম ঠানে নুপ্পজ্জিস্সন্তী’’তি ন ৰত্তব্বা. কস্মা? অসমুগ্ঘাতিতত্তা. যথা কিং? যথা সচে খীররুক্খং কুঠারিযা আহনেয্যুং, ইমস্মিং নাম ঠানে খীরং ন নিক্খমেয্যাতি ন ৰত্তব্বং, এৰং. ইদং অসমুগ্ঘাতিতুপ্পন্নং নামাতি এৰং যোজেত্ৰা ৰিত্থারেতব্বং.

ইমেসু উপ্পন্নেসূতি যথাৰুত্তেসু অট্ঠসু উপ্পন্নেসু. ইদং ন মগ্গৰজ্ঝং অপ্পহাতব্বৰত্থুত্তা. মগ্গৰজ্ঝং মগ্গেন পহেয্যৰত্থুত্তা. রত্তোতি রাগেন সমন্নাগতো. এস নযো দুট্ঠো মূল়্হোতি এত্থাপি. ৰিনিবদ্ধোতি মানসংযোজনেন ৰিরূপং নিবন্ধিতো. পরামট্ঠোতি দিট্ঠিপরামাসেন ধম্মসভাৰং অতিক্কম্ম পরতো আমট্ঠো. অনিট্ঠঙ্গতোতি নিট্ঠং অগতো, সংসযাপন্নোতি অত্থো. থামগতোতি অনুসযৰসেন দল়্হতং উপগতো. যুগনদ্ধাতি পহাতব্বপ্পহাযকযুগে নদ্ধা ৰিয ৰত্তনকা এককালিকত্তা. সংকিলেসিকাতি সংকিলেসধম্মসহিতা.

পাল়িযন্তি পটিসম্ভিদাপাল়িযং (পটি. ম. ৩.২১). তিকালিকেসুপি কিলেসেসু ৰাযামাভাৰদস্সনত্থং অজাতফলতরুণরুক্খো পাল়িযং নিদস্সিতো, অট্ঠকথাযং পন জাতো সত্তো অসমুদাহটকিলেসো নাম নত্থীতি ‘‘জাতফলরুক্খেন দীপেতব্ব’’ন্তি ৰত্ৰা তমত্থং ৰিৰরিতুং ‘‘যথা হী’’তিআদি ৰুত্তং. অথ ৰা মগ্গেন পহীনকিলেসানমেৰ অতীতাদিভেদেন তিধা নৰত্তব্বতং পাকটং কাতুং অজাতফলরুক্খো উপমাৰসেন পাল়িযং আভতো, অতীতাদীনং অপ্পহীনতাদস্সনত্থম্পি ‘‘জাতফলরুক্খেন দীপেতব্ব’’ন্তি অট্ঠকথাযং ৰুত্তং. তত্থ যথা অচ্ছিন্নে রুক্খে নিব্বত্তনারহানি ফলানি ছিন্নে অনুপ্পজ্জমানানি কদাচি সসভাৰানি অহেসুং, হোন্তি, ভৰিস্সন্তি ৰাতি অতীতাদিভাৰেন ন ৰত্তব্বানি, এৰং মগ্গেন পহীনকিলেসা চ দট্ঠব্বা মগ্গে অনুপ্পন্নে উপ্পত্তিরহানং উপ্পন্নে সব্বেন সব্বং অভাৰতো. যথা চ ছেদে অসতি ফলানি উপ্পজ্জিস্সন্তীতি ছেদনস্স সাত্থকতা, এৰং মগ্গভাৰনায চ সাত্থকতা যোজেতব্বা. নাপি ন পজহতীতি উপ্পজ্জনারহানং পজহনতো ৰুত্তং. উপ্পজ্জিত্ৰাতি লক্খণে ত্ৰা-সদ্দো. মগ্গস্স উপ্পজ্জনকিরিযায হি সমুদযপ্পহাননিব্বানসছিকরণকিরিযা ৰিয খন্ধানং পরিজাননকিরিযা লক্খীযতি.

তেপি পজহতিযেৰাতি যে তেহি কিলেসেহি জনেতব্বা উপাদিন্নক্খন্ধা, তেপি পজহতিযেৰ তন্নিমিত্তস্স অভিসঙ্খারৰিঞ্ঞাণস্স নিরোধনতো. তেনাহ – ‘‘ৰুত্তম্পি চেত’’ন্তিআদি. অভিসঙ্খারৰিঞ্ঞাণস্স নিরোধেনাতি কম্মৰিঞ্ঞাণস্স অনুপ্পত্তিধম্মতাপাদনেন. এত্থাতি এতস্মিং সোতাপত্তিমগ্গঞাণে হেতুভূতে. এতেতি নামরূপসঞ্ঞিতা সঙ্খারা. সব্বভৰেহি ৰুট্ঠাতিযেৰাতিপি ৰদন্তীতি অরহত্তমগ্গো সব্বভৰেহি ৰুট্ঠাতিযেৰাতি ৰদন্তি তদুপ্পত্তিতো উদ্ধং ভৰূপপত্তিযা কিলেসস্সপি অভাৰতো.

একচিত্তক্খণিকত্তা মগ্গস্সাতি অধিপ্পাযেন ‘‘কথং অনুপ্পন্নানং…পে… ঠিতিযা ভাৰনা হোতী’’তি পুচ্ছতি. মগ্গপ্পৰত্তিযাযেৰ উভযকিচ্চসিদ্ধিতো আহ – ‘‘মগ্গপ্পৰত্তিযাযেৰা’’তি. মগ্গো হীতিআদিনা তমত্থং ৰিৰরতি. অনুপ্পন্নো নাম ৰুচ্চতি, তস্মা তস্স ভাৰনা অনুপ্পন্নানং উপ্পাদায ভাৰনা ৰুত্তাতি যোজেতব্বা. ৰত্তুং ৰট্টতীতি যাৰতা মগ্গস্স পৰত্তিযেৰ ঠিতি, তত্তকানেৰ নিব্বত্তিতলোকুত্তরানি.

৩৯৮-৪০১. কত্তুকম্যতাছন্দং অধিপতিং করিত্ৰা পটিলদ্ধসমাধি ছন্দসমাধীতি আহ – ‘‘ছন্দং নিস্সায পৰত্তো সমাধি ছন্দসমাধী’’তি পধানসঙ্খারাতি চতুকিচ্চসাধকস্স সম্মপ্পধানৰীরিযস্সেতং অধিৰচনং. তেনাহ – ‘‘পধানভূতা সঙ্খারা পধানসঙ্খারা’’তি. তত্থ পধানভূতাতি ৰীরিযভূতা. সঙ্খতসঙ্খারাদিনিৰত্তনত্থং পধানগ্গহণন্তি. অথ ৰা তং তং ৰিসেসং সঙ্খরোতীতি সঙ্খারো, সব্বং ৰীরিযং. তত্থ চতুকিচ্চসাধকতো সেসনিৰত্তনত্থং পধানগ্গহণন্তি, পধানভূতা সেট্ঠভূতাতি অত্থো. চতুব্বিধস্স পন ৰীরিযস্স অধিপ্পেতত্তা বহুৰচননিদ্দেসো কতো. তেহি ধম্মেহীতি ছন্দসমাধিনা পধানসঙ্খারেহি চ. ইদ্ধিপাদন্তি এত্থ ইজ্ঝতীতি ইদ্ধি, সমিজ্ঝতি নিপ্ফজ্জতীতি অত্থো. ইজ্ঝন্তি ৰা এতায সত্তা ইদ্ধা ৰুদ্ধা উক্কংসগতা হোন্তীতিপি ইদ্ধি. পঠমেনত্থেন ইদ্ধি এৰ পাদো ইদ্ধিপাদো, ইদ্ধিকোট্ঠাসোতি অত্থো. দুতিযেনত্থেন ইদ্ধিযা পাদোতি ইদ্ধিপাদো, পাদোতি পতিট্ঠা, অধিগমূপাযোতি অত্থো. তেন হি যস্মা উপরূপরিৰিসেসসঙ্খাতং ইদ্ধিং পজ্জন্তি পাপুণন্তি, তস্মা পাদোতি ৰুচ্চতি. তেনাহ – ‘‘ইদ্ধিযা পাদং, ইদ্ধিভূতং ৰা পাদং ইদ্ধিপাদ’’ন্তি.

অথ ৰা ইদ্ধিপাদন্তি নিপ্ফত্তিপরিযাযেন ইজ্ঝনট্ঠেন, ইজ্ঝন্তি এতায সত্তা ইদ্ধা ৰুদ্ধা উক্কংসগতা হোন্তীতি ইমিনা ৰা পরিযাযেন ইদ্ধীতি সঙ্খং গতানং উপচারজ্ঝানাদিকুসলচিত্তসম্পযুত্তানং ছন্দসমাধিপধানসঙ্খারানং অধিট্ঠানট্ঠেন পাদভূতং সেসচিত্তচেতসিকরাসিন্তি অত্থো. তেনেৰ ইদ্ধিপাদৰিভঙ্গে (ৰিভ. ৪৩৪-৪৩৭) ‘‘ইদ্ধিপাদোতি তথাভূতস্স ৰেদনাক্খন্ধো…পে… ৰিঞ্ঞাণক্খন্ধো’’তি ৰুত্তং. সা এৰ চ তথাৰুত্তা ইদ্ধি যস্মা হেট্ঠিমা হেট্ঠিমা উপরিমায উপরিমায তযো ছন্দসমাধিপ্পধানসঙ্খারা পাদভূতা অধিট্ঠানভূতা, তস্মা ৰুত্তং ‘‘ইদ্ধিভূতং ৰা পাদ’’ন্তি. তথা হেট্ঠা ধম্মা ইদ্ধিপি হোন্তি ইদ্ধিপাদাপি, সেসা পন সম্পযুত্তকা চত্তারো খন্ধা ইদ্ধিপাদাযেৰ. ৰীরিযচিত্তৰীমংসাসমাধিপ্পধানসঙ্খারসঙ্খাতাপি তযো তযো ধম্মা ইদ্ধিপি হোন্তি ইদ্ধিপাদাপি, সেসা পন সম্পযুত্তকা চত্তারো খন্ধা ইদ্ধিপাদাযেৰ.

অপিচ পুব্বভাগো পুব্বভাগো ইদ্ধিপাদো নাম, পটিলাভো পটিলাভো ইদ্ধি নামাতি ৰেদিতব্বা. অযমত্থো উপচারেন ৰা ৰিপস্সনায ৰা দীপেতব্বো. পঠমজ্ঝানপরিকম্মঞ্হি ইদ্ধিপাদো নাম, পঠমজ্ঝানং ইদ্ধি নাম. দুতিযঝান… ততিযঝান… চতুত্থঝান… আকাসানঞ্চাযতন… ৰিঞ্ঞাণঞ্চাযতন… আকিঞ্চঞ্ঞাযতন… নেৰসঞ্ঞানাসঞ্ঞাযতনপরিকম্মং ইদ্ধিপাদো নাম, নেৰসঞ্ঞানাসঞ্ঞাযতনং ইদ্ধি নাম. সোতাপত্তিমগ্গস্স ৰিপস্সনা ইদ্ধিপাদো নাম, সোতাপত্তিমগ্গো ইদ্ধি নাম. সকদাগামি-অনাগামি-অরহত্তমগ্গস্স ৰিপস্সনা ইদ্ধিপাদো নাম, অরহত্তমগ্গো ইদ্ধি নাম. পটিলাভেনপি দীপেতুং ৰট্টতিযেৰ. পঠমজ্ঝানঞ্হি ইদ্ধিপাদো নাম, দুতিযজ্ঝানং ইদ্ধি নাম. দুতিযজ্ঝানং ইদ্ধিপাদো নাম, ততিযজ্ঝানং ইদ্ধি নাম…পে… অনাগামিমগ্গো ইদ্ধিপাদো নাম, অরহত্তমগ্গো ইদ্ধি নাম.

সেসেসুপীতি ৰীরিযসমাধিআদীসুপি. তত্থ হি ৰীরিযং, চিত্তং, ৰীমংসং অধিপতিং করিত্ৰা পটিলদ্ধসমাধি ৰীরিযসমাধি, চিত্তসমাধি, ৰীমংসাসমাধীতি অত্থো ৰেদিতব্বো. ছন্দাদীসু একন্তি ছন্দাদীসু চতূসু আদিতো ৰুত্তত্তা আদিভূতং একং পধানং ছন্দন্তি অধিপ্পাযো. তেনেৰাহ – ‘‘তদাস্স পঠমিদ্ধিপাদো’’তি. এৰং সেসাপীতি এতেন ৰীরিযং চিত্তং ৰীমংসং নিস্সায ৰিপস্সনং ৰড্ঢেত্ৰা অরহত্তং পাপুণন্তানং ৰসেন দুতিযৰীরিযিদ্ধিপাদাদযো যোজেতব্বাতি দস্সেতি. ইমিনা হি সুত্তন্তেন চতুন্নং ভিক্খূনং মত্থকপ্পত্তং কম্মট্ঠানং দস্সিতং. একো হি ভিক্খু ছন্দং অৰস্সযতি, কত্তুকম্যতাকুসলধম্মচ্ছন্দেন অত্থনিপ্ফত্তিযং সতি ‘‘অহং লোকুত্তরধম্মং নিব্বত্তেস্সামি, নত্থি ময্হং এতস্স নিব্বত্তনে ভারো’’তি ছন্দং জেট্ঠকং ছন্দং ধুরং ছন্দং পুব্বঙ্গমং কত্ৰা লোকুত্তরধম্মং নিব্বত্তেতি. একো ৰীরিযং অৰস্সযতি, একো চিত্তং, একো পঞ্ঞং অৰস্সযতি, পঞ্ঞায অত্থনিপ্ফত্তিযং সতি ‘‘অহং লোকুত্তরধম্মং নিব্বত্তেস্সামি, নত্থি ময্হং এতস্স নিব্বত্তনে ভারো’’তি পঞ্ঞং জেট্ঠকং পঞ্ঞং ধুরং পঞ্ঞং পুব্বঙ্গমং কত্ৰা লোকুত্তরধম্মং নিব্বত্তেতি.

কথং? যথা হি চতূসু অমচ্চপুত্তেসু ঠানন্তরং পত্থেত্ৰা ৰিচরন্তেসু একো উপট্ঠানং অৰস্সযতি, একো সূরভাৰং, একো জাতিং, একো মন্তং. কথং? তেসু হি পঠমো উপট্ঠানে অপ্পমাদকারিতায অত্থনিপ্ফত্তিযা সতি লব্ভমানং ‘‘লচ্ছামেতং ঠানন্তর’’ন্তি উপট্ঠানং অৰস্সযতি. দুতিযো উপট্ঠানে অপ্পমত্তোপি ‘‘একচ্চো সঙ্গামে পচ্চুপট্ঠিতে সণ্ঠাতুং ন সক্কোতি, অৰস্সং পন রঞ্ঞো পচ্চন্তো কুপ্পিস্সতি, তস্মিং কুপ্পিতে রথস্স পুরতো কম্মং কত্ৰা রাজানং আরাধেত্ৰা আহরাপেস্সামেতং ঠানন্তর’’ন্তি সূরভাৰং অৰস্সযতি. ততিযো ‘‘সূরভাৰেপি সতি একচ্চো হীনজাতিকো হোতি, জাতিং সোধেত্ৰা ঠানন্তরং দেন্তো ময্হং দস্সতী’’তি জাতিং অৰস্সযতি. চতুত্থো ‘‘জাতিমাপি একো অমন্তনীযো হোতি, মন্তেন কত্তব্বকিচ্চে উপ্পন্নে আহরাপেস্সামেতং ঠানন্তর’’ন্তি মন্তং অৰস্সযতি. তে সব্বেপি অত্তনো অত্তনো অৰস্সযবলেন ঠানন্তরানি পাপুণিংসু.

তত্থ উপট্ঠানে অপ্পমত্তো হুত্ৰা ঠানন্তরং পত্তো ৰিয ছন্দং অৰস্সায কত্তুকম্যতাকুসলধম্মচ্ছন্দেন ‘‘অত্থনিপ্ফত্তিযং সতি অহং লোকুত্তরধম্মং নিব্বত্তেস্সামি, নত্থি ময্হং এতস্স নিব্বত্তনে সারো’’তি ছন্দং জেট্ঠকং ছন্দং ধুরং ছন্দং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো রট্ঠপালত্থেরো (ম. নি. ২.২৯৩ আদযো) ৰিয. সো হি আযস্মা ‘‘ছন্দে সতি কথং নানুজানিস্সন্তী’’তি সত্তাহম্পি ভত্তানি অভুঞ্জিত্ৰা মাতাপিতরো অনুজানাপেত্ৰা পব্বজিত্ৰা ছন্দমেৰ অৰস্সায লোকুত্তরধম্মং নিব্বত্তেসি. সূরভাৰেন রাজানং আরাধেত্ৰা ঠানন্তরং পত্তো ৰিয ৰীরিযং জেট্ঠকং ৰীরিযং ধুরং ৰীরিযং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো সোণত্থেরো (মহাৰ. ২৪৩ আদযো) ৰিয. সো হি আযস্মা ৰীরিযং ধুরং কত্ৰা লোকুত্তরধম্মং নিব্বত্তেসি.

জাতিসম্পত্তিযা ঠানন্তরং পত্তোৰিয চিত্তং জেট্ঠকং চিত্তং ধুরং চিত্তং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো সম্ভূতত্থেরো (থেরগা. অট্ঠ. ২ সম্ভূতত্থেরগাথাৰণ্ণনা) ৰিয. সো হি আযস্মা চিত্তং জেট্ঠকং চিত্তং ধুরং চিত্তং পুব্বঙ্গমং কত্ৰা লোকুত্তরধম্মং নিব্বত্তেসি. মন্তং অৰস্সায ঠানন্তরং পত্তো ৰিয ৰীমংসং জেট্ঠকং ৰীমংসং ধুরং ৰীমংসং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো থেরো মোঘরাজা (সু. নি. ১১২২ আদযো; চূল়নি. মোঘরাজমাণৰপুচ্ছানিদ্দেসো ৮৫) ৰিয. সো হি আযস্মা ৰীমংসং জেট্ঠকং ৰীমংসং ধুরং ৰীমংসং পুব্বঙ্গমং কত্ৰা লোকুত্তরধম্মং নিব্বত্তেসি. তস্স হি ভগৰা ‘‘সুঞ্ঞতো লোকং অৰেক্খস্সূ’’তি (সু. নি. ১১২৫; চূল়নি. মোঘরাজমাণৰপুচ্ছানিদ্দেসো ৮৮) সুঞ্ঞতাকথং কথেসি. পঞ্ঞানিস্সিতমাননিগ্গহত্থঞ্চ দ্ৰিক্খত্তুং পুচ্ছিতো পঞ্হং ন কথেসি. এত্থ চ পুনপ্পুনং ছন্দুপ্পাদনং তোসনং ৰিয হোতীতি ছন্দস্স উপট্ঠানসদিসতা ৰুত্তা, থামভাৰতো ৰীরিযস্স সূরত্তসদিসতা, ‘‘ছদ্ৰারাধিপতি রাজা’’তি (ধ. প. অট্ঠ. ২.এরকপত্তনাগরাজৰত্থু) ৰচনতো পুব্বঙ্গমতা চিত্তস্স ৰিসিট্ঠজাতিসদিসতা.

৪০২-৪০৬. অত্তনো সদ্ধাধুরেতি অত্তনো সদ্ধাকিচ্চে সদ্দহনকিরিযায. ইন্দট্ঠং কারেতীতি অনুৰত্তনৰসেন সম্পযুত্তধম্মেসু ইন্দট্ঠং কারেতি, তস্মা আধিপতেয্যট্ঠেন সদ্ধা এৰ ইন্দ্রিযন্তি সদ্ধিন্দ্রিযং. তথা ৰীরিযাদীনং সকসককিচ্চেসূতি আহ – ‘‘ৰীরিযিন্দ্রিযাদীসুপি এসেৰ নযো’’তি. ৰিসোধেন্তোতি ৰিপক্খৰিৰজ্জনসপক্খনিসেৰনসরিক্খূপনিস্সযসঙ্গণ্হনলক্খণেহি তীহি কারণেহি ৰিসোধনৰসেন সোধেন্তো.

অস্সদ্ধে পুগ্গলে পরিৰজ্জযতোতি বুদ্ধাদীসু পসাদসিনেহাভাৰেন সদ্ধারহিতে লূখপুগ্গলে সব্বসো ৰজ্জযতো. সদ্ধে পুগ্গলে সেৰতোতি বুদ্ধাদীসু সদ্ধাধিমুত্তে ৰক্কলিত্থেরসদিসে সেৰতো. পসাদনীযেতি পসাদাৰহে সম্পসাদনীযসুত্তাদিকে (দী. নি. ৩.১৪১ আদযো). পচ্চৰেক্খতোতি পাল়িতো অত্থতো চ পতি পতি অৰেক্খন্তস্স চিন্তেন্তস্স. ৰিসুজ্ঝতীতি পটিপক্খমলৰিগমতো পচ্চযৰসেন সভাৰসংসুদ্ধিতো ৰিসুদ্ধফলনিব্বত্তিতো চ সদ্ধিন্দ্রিযং ৰিসুজ্ঝতি. এস নযো সেসেসুপি. সম্মপ্পধানেতি সম্মপ্পধানপ্পটিসংযুত্তে (সং. নি. ৫.৬৫১-৬৬২ আদযো) সুত্তন্তে. এস নযো সেসেসুপি. ঝানৰিমোক্খেতি পঠমজ্ঝানাদিজ্ঝানানি চেৰ পঠমৰিমোক্খাদিৰিমোক্খে চ. কামঞ্চেত্থ ঝানানিযেৰ ৰিমোক্খা, পৰত্তিআকারৰসেন পন ৰিসুং গহণং.

গম্ভীরঞাণচরিযন্তি গম্ভীরানং ঞাণানং পৰত্তিট্ঠানং. তেনাহ – ‘‘সণ্হসুখুম’’ন্তিআদি. খন্ধন্তরন্তি সভাৰজাতিভূমিআদিৰসেন খন্ধানং নানত্তং. এস নযো সেসেসুপি. অকতাভিনিৰেসোতি পুব্বে অকতভাৰনাভিনিৰেসো. সদ্ধাধুরাদীসূতি সদ্ধাধুরে পঞ্ঞাধুরে চ. অৰসানেতি ভাৰনাপরিযোসানে. ৰিৰট্টেত্ৰাতি সঙ্খারারম্মণতো ৰিৰট্টেত্ৰা নিব্বানং আরম্মণং কত্ৰা. অরহত্তং গণ্হাতীতি মগ্গপরম্পরায অরহত্তং গণ্হাতি. অকম্পিযট্ঠেনাতি পটিপক্খেহি অকম্পিযভাৰেন. এতেনেৰস্স সম্পযুত্তধম্মেসু থিরভাৰোপি ৰিভাৰিতো দট্ঠব্বো. ন হি সম্পযুত্তধম্মেসু থিরভাৰেন ৰিনা পটিপক্খেহি অকম্পিযতা সম্ভৰতি. সম্পযুত্তধম্মেসু থিরভাৰেনেৰ হি অকুসলানং অব্যাকতানঞ্চ নেসং বলৰভাৰূপপত্তি. অস্সদ্ধিযেতি অস্সদ্ধিযহেতু. নিমিত্তত্থে হেতং ভুম্মৰচনং. এস নযো সেসেসুপি.

৪১৮. আদিপদানন্তি সতিআদিপদানং. সরণট্ঠেনাতি চিরকতচিরভাসিতানং অনুস্সরণট্ঠেন. উপট্ঠানলক্খণাতি কাযাদীসু অসুভাকারাদিসল্লক্খণমুখেন তত্থ উপতিট্ঠনসভাৰা. উপতিট্ঠনঞ্চ আরম্মণং উপগন্ত্ৰা ঠানং, অৰিস্সজ্জনং ৰা আরম্মণস্স. অপিলাপনলক্খণাতি অসম্মুস্সনসভাৰা, উদকে অলাবু ৰিয আরম্মণে প্লৰিত্ৰা গন্তুং অপ্পদানং, পাসাণস্স ৰিয নিচ্চলস্স আরম্মণস্স ঠপনং সারণং অসম্মুট্ঠকরণং অপিলাপনং. সাপতেয্যন্তি সন্তকং. অপিলাপনং অসম্মুট্ঠং করোতি অপিলাপেতি, সাযং পাতঞ্চ রাজানং ইস্সরিযসম্পত্তিং সল্লক্খাপেতি সারেতীতি অত্থো. কণ্হসুক্কসপ্পটিভাগে ধম্মেতি কণ্হসুক্কসঙ্খাতে সপ্পটিভাগে ধম্মে. কণ্হো হি ধম্মো সুক্কেন, সুক্কো চ কণ্হেন সপ্পটিভাগো. ৰিত্থার-সদ্দো আদিসদ্দত্থো. তেন ‘‘ইমে চত্তারো ধম্মা সম্মপ্পধানা, ইমে চত্তারো ইদ্ধিপাদা, ইমানি পঞ্চিন্দ্রিযানি, ইমানি পঞ্চ বলানি, ইমে সত্ত বোজ্ঝঙ্গা, অযং অরিযো অট্ঠঙ্গিকো মগ্গো, অযং সমথো, অযং ৰিপস্সনা, অযং ৰিজ্জা, অযং ৰিমুত্তি, ইমে লোকুত্তরধম্মাতি এৰং খো, মহারাজ, অপিলাপনলক্খণা সতী’’তি (মি. প. ২.১.১৩) ইমং পাল়িসেসং সঙ্গণ্হাতি. থেরেনাতি নাগসেনত্থেরেন. সো হি ধম্মানং কিচ্চং লক্খণং কত্ৰা অস্সেতি ‘‘অপিলাপনলক্খণা সতি, আকোটনলক্খণো ৰিতক্কো’’তিআদিনা. এৰঞ্হি ধম্মা সুবোধা হোন্তীতি. সম্মোসপচ্চনীকং কিচ্চং অসম্মোসো, ন সম্মোসাভাৰমত্তন্তি আহ – ‘‘অসম্মোসরসা ৰা’’তি. যস্স ধম্মস্স বলেন সম্পযুত্তধম্মা আরম্মণাভিমুখা ভৰন্তি, সা সতি. তস্মা সা তেসং আরম্মণাভিমুখভাৰং পচ্চুপট্ঠাপেসি, সযং ৰা আরম্মণাভিমুখভাৰেন পচ্চুপতিট্ঠতীতি ৰুত্তং – ‘‘গোচরাভিমুখীভাৰপচ্চুপট্ঠানা’’তি. সম্মা পসত্থো বোজ্ঝঙ্গোতি সম্বোজ্ঝঙ্গো. বোধিযা ৰক্খমানায ধম্মসামগ্গিযা, বোধিস্স ৰা অরিযসাৰকস্স অঙ্গোতি বোজ্ঝঙ্গো. যা হীতিআদিনা তমেৰ সঙ্খেপতো ৰুত্তমত্থং ৰিৰরতি. ‘‘যা হি অযং ধম্মসামগ্গী’’তি এতস্স ‘‘বোধীতি ৰুচ্চতী’’তি ইমিনা সম্বন্ধো. ধম্মসামগ্গিযাতি ধম্মসমূহেন, যায ধম্মসামগ্গিযাতি সম্বন্ধো. পতিট্ঠানাযূহনা ওঘতরণসুত্তৰণ্ণনাযং (সং. নি. অট্ঠ. ১.১.১) ‘‘কিলেসৰসেন পতিট্ঠানং, অভিসঙ্খারৰসেন আযূহনা. তণ্হা দিট্ঠিৰসেন পতিট্ঠানং, অৰসেসকিলেসাভিসঙ্খারেহি আযূহনা. তণ্হাৰসেন পতিট্ঠানং, দিট্ঠিৰসেন আযূহনা. সস্সতদিট্ঠিযা পতিট্ঠানং, উচ্ছেদদিট্ঠিযা আযূহনা. লীনৰসেন পতিট্ঠানং, উদ্ধচ্চৰসেন আযূহনা. কামসুখল্লিকানুযোগৰসেন পতিট্ঠানং, অত্তকিলমথানুযোগৰসেন আযূহনা. সব্বাকুসলাভিসঙ্খারৰসেন পতিট্ঠানং, সব্বলোকিযকুসলাভিসঙ্খারৰসেন আযূহনা’’তি এৰং ৰুত্তেসু সত্তসু পকারেসু ইধ অৰুত্তানং ৰসেন ৰেদিতব্বা. পটিপক্খভূতাযাতি এত্থ লীনপ্পতিট্ঠানকামসুখল্লিকানুযোগউচ্ছেদাভিনিৰেসানং ধম্মৰিচযৰীরিযপীতিপ্পধানা ধম্মসামগ্গী পটিপক্খো, উদ্ধচ্চাযূহনঅত্তকিলমথানুযোগসস্সতাভিনিৰেসানং পস্সদ্ধিসমাধিউপেক্খাপধানা ধম্মসামগ্গী পটিপক্খো. সতি পন উভযত্থাপি ইচ্ছিতব্বা. তথা হি সা ‘‘সব্বত্থিকা’’তি ৰুত্তা.

কিলেসসন্তাননিদ্দায উট্ঠহতীতি এতেন সিখাপ্পত্তৰিপস্সনায সহগতানম্পি সতিআদীনং বোজ্ঝঙ্গভাৰং দস্সেতি. ৰুট্ঠানগামিনিৰিপস্সনা হি কিলেসে নিরোধেন্তী এৰ পৰত্ততীতি. চত্তারি ৰাতিআদিনা পন মগ্গফলসহগতানং বোজ্ঝঙ্গভাৰং দস্সেতি. সত্তহি বোজ্ঝঙ্গেহি ভাৰিতেহি সচ্চপ্পটিৰেধো হোতীতি কথমিদং জানিতব্বন্তি চোদনং সন্ধাযাহ – ‘‘যথাহা’’তিআদি. ঝানঙ্গমগ্গঙ্গাদযো ৰিযাতি এতেন বোধিবোজ্ঝঙ্গসদ্দানং সমুদাযাৰযৰৰিসযতং দস্সেতি. সেনঙ্গরথঙ্গাদযো ৰিযাতি এতেন পুগ্গলপঞ্ঞত্তিযা অৰিজ্জমানপঞ্ঞত্তিভাৰং দস্সেতি.

বোধায সংৰত্তন্তীতি বোজ্ঝঙ্গাতি কারণত্থো অঙ্গসদ্দোতি কত্ৰা ৰুত্তং. বুজ্ঝন্তীতি বোধিযো, বোধিযো এৰ অঙ্গানি বোজ্ঝঙ্গানীতি ৰুত্তং – ‘‘বুজ্ঝন্তীতি বোজ্ঝঙ্গা’’তি. ৰিপস্সনাদীনং কারণাদীনং বুজ্ঝিতব্বানঞ্চ সচ্চানং অনুরূপং পচ্চক্খভাৰেন পটিমুখং অৰিপরীততায সম্মা চ বুজ্ঝন্তীতি এৰং অত্থৰিসেসদীপকেহি উপসগ্গেহি ‘‘অনুবুজ্ঝন্তী’’তিআদি ৰুত্তং. বোধিসদ্দো হি সব্বৰিসেসযুত্তবুজ্ঝনং সামঞ্ঞেন সঙ্গণ্হাতি. সং-সদ্দো পসংসাযং সুন্দরভাৰে চ দিস্সতীতি আহ – ‘‘পসত্থো সুন্দরো চ বোজ্ঝঙ্গো সম্বোজ্ঝঙ্গো’’তি.

ধম্মে ৰিচিনতীতি ধম্মৰিচযো. তত্থ ধম্মেতি চতুসচ্চধম্মে তব্বিনিমুত্তস্স সভাৰধম্মস্স অভাৰতো. ততো এৰ সো পৰিচযলক্খণো. ওভাসনরসোতি ৰিসযোভাসনরসো. অসম্মুয্হনাকারেন পচ্চুপতিট্ঠতীতি অসম্মোহপচ্চুপট্ঠানো.

ৰীরস্স ভাৰো, কম্মং ৰাতি ৰীরিযং. ঈরযিতব্বতোতি পৰত্তেতব্বতো. পগ্গহলক্খণন্তি কোসজ্জপক্খে পতিতুং অদত্ৰা সম্পযুত্তধম্মানং পগ্গহলক্খণং. ততো এৰ সম্পযুত্তধম্মে উপত্থম্ভনরসং. অনোসীদনং অসংসীদনং.

পীণযতীতি তপ্পেতি. পীণনকিচ্চেন সম্পযুত্তধম্মানং ৰিয তংসমুট্ঠানপণীতরূপেহি কাযস্সাব্যপনং. ফরণপীতিৰসেন হেতং লক্খণং ৰুত্তং, তথা রসোতি. উদগ্গভাৰো ওদগ্যং, তং পচ্চুপট্ঠপেতীতি ওদগ্যপচ্চুপট্ঠানা. উব্বেগপীতিৰসেন চেতং ৰুত্তং.

কাযচিত্তদরথপ্পস্সম্ভনতোতি কাযদরথস্স চিত্তদরথস্স চ পস্সম্ভনতো ৰূপসমনতো. তেনাহ – ‘‘উপসমলক্খণা’’তি, কাযচিত্তদরথানং ৰূপসমনলক্খণাতি অত্থো. কাযোতি চেত্থ ৰেদনাদযো তযো খন্ধা. দরথো সারম্ভো, দুক্খদোমনস্সপচ্চযানং উদ্ধচ্চাদিকানং কিলেসানং, তথাপৰত্তানং ৰা চতুন্নং খন্ধানমেতং অধিৰচনং. দরথনিম্মদ্দনেন পরিল়াহপরিপ্ফন্দনৰিরহিতো সীতিভাৰো অপরিপ্ফন্দনসীতিভাৰো.

সম্মা চিত্তস্স ঠপনং সমাধানং. অৰিক্খেপো সম্পযুত্তানং অৰিক্খিত্ততা. যেন সম্পযুত্তা অৰিক্খিত্তা হোন্তি, সো ধম্মো অৰিক্খেপো. অৰিসারো অত্তনো এৰ অৰিসরণভাৰো. অথ ৰা ৰিক্খেপপ্পটিপক্খতায অৰিক্খেপলক্খণো. ন্হানীযচুণ্ণস্স উদকং ৰিয সম্পযুত্তধম্মানং সম্পিণ্ডনকিচ্চতায অৰিসারভাৰেন লক্খিতব্বো অৰিসারলক্খণো. নিৰাতে দীপচ্চিট্ঠিতি ৰিয চেতসো ঠিতিভাৰেন পচ্চুপতিট্ঠতীতি চিত্তট্ঠিতিপচ্চুপট্ঠানো.

অজ্ঝুপেক্খনতোতি সমপ্পৰত্তেসু অস্সেসু সারথি ৰিয সম্পযুত্তধম্মানং অজ্ঝুপেক্খনতো. পটিসঙ্খানলক্খণাতি মজ্ঝত্তভাৰে ঠত্ৰা ৰীমংসনসঙ্খাতপ্পটিসঙ্খানলক্খণা. সমৰাহিতলক্খণাতি সমং অৰিসমং যথাসককিচ্চেসু সম্পযুত্তধম্মানং পৰত্তনলক্খণা. উদাসীনভাৰেন পৰত্তমানাপি সেসসম্পযুত্তধম্মে যথাসককিচ্চেসু পৰত্তেতি, যথা রাজা তুণ্হী নিসিন্নোপি অত্থকরণে ধম্মট্ঠে যথাসকং কিচ্চেসু অপ্পমত্তো পৰত্তেতি. অলীনানুদ্ধতপ্পৰত্তিপচ্চযত্তা ঊনাধিকনিৰারণরসা. পক্খপাতুপচ্ছেদনরসাতি ‘‘ইদং নিহীনকিচ্চং হোতু, ইদং অতিরেকতরকিচ্চ’’ন্তি এৰং পক্খপাতনৰসেন ৰিয পৰত্তি পক্খপাতো, তং উপচ্ছিন্দন্তী ৰিয হোতীতি পক্খপাতুপচ্ছেদনরসা. সম্পযুত্তধম্মানং সকসককিচ্চে মজ্ঝত্তভাৰেন পচ্চুপতিট্ঠতীতি মজ্ঝত্তভাৰপচ্চুপট্ঠানো. বোজ্ঝঙ্গানং উপরূপরি উপ্পাদনমেৰ ব্রূহনং ৰড্ঢনঞ্চাতি আহ – ‘‘উপ্পাদেতী’’তি.

সতি চ সম্পজঞ্ঞঞ্চ সতিসম্পজঞ্ঞং, সতিপধানং ৰা সম্পজঞ্ঞং সতিসম্পজঞ্ঞং. তং সব্বত্থ সতোকারিভাৰাৰহত্তা সতিসম্বোজ্ঝঙ্গস্স উপ্পাদায হোতি. যথা পচ্চনীকধম্মপ্পহানং অনুরূপধম্মসেৰনা চ অনুপ্পন্নানং কুসলানং ধম্মানং উপ্পাদায হোতি, এৰং সতিরহিতপুগ্গলৰিৰজ্জনা, সতোকারিপুগ্গলসেৰনা, তত্থ চ যুত্ততা সতিসম্বোজ্ঝঙ্গস্স উপ্পাদায হোতীতি ইমমত্থং দস্সেতি, ‘‘সতিসম্পজঞ্ঞ’’ন্তিআদিনা. সত্তসু ঠানেসূতি ‘‘অভিক্কন্তে পটিক্কন্তে সম্পজানকারী হোতি, আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারী হোতী’’তি (দী. নি. ২.৩৭৬; ম. নি. ১.১০৯) এৰং ৰুত্তেসু অভিক্কন্তাদীসু সত্তসু ঠানেসু. তিস্সদত্তত্থেরো নাম যো বোধিমণ্ডে সুৰণ্ণসলাকং গহেত্ৰা ‘‘অট্ঠারসসু ভাসাসু কতরভাসায ধম্মং কথেমী’’তি পরিসং পধারেসি. অভযত্থেরোতি দত্তাভযত্থেরমাহ. অভিনিৰেসন্তি ৰিপস্সনাভিনিৰেসং.

পরিপুচ্ছকতাতি পরিযোগাহেত্ৰা পুচ্ছকভাৰো. আচরিযে পযিরুপাসিত্ৰা পঞ্চপি নিকাযে সহ অট্ঠকথায পরিযোগাহেত্ৰা যং যং তত্থ গণ্ঠিট্ঠানভূতং, তং তং ‘‘ইদং, ভন্তে, কথং, ইমস্স কো অত্থো’’তি খন্ধাযতনাদিঅত্থং পুচ্ছন্তস্স হি ধম্মৰিচযসম্বোজ্ঝঙ্গো উপ্পজ্জতি. তেনাহ – ‘‘খন্ধধাতু…পে… বহুলতা’’তি.

ৰত্থুৰিসদকিরিযাতি এত্থ চিত্তচেতসিকানং পৰত্তিট্ঠানভাৰতো সরীরং তপ্পটিবদ্ধানি চীৰরাদীনি চ ৰত্থূনীতি অধিপ্পেতানি. তানি যথা চিত্তস্স সুখাৰহানি হোন্তি, তথা করণং তেসং ৰিসদকিরিযা. তেনাহ – ‘‘অজ্ঝত্তিকবাহিরান’’ন্তিআদি. উস্সন্নদোসন্তি ৰাতপিত্তাদিৰসেন উপচিতদোসং. সেদমলমক্খিতন্তি সেদেন চেৰ জল্লিকাসঙ্খাতেন সরীরমলেন চ মক্খিতং. চ-সদ্দেন অঞ্ঞম্পি সরীরস্স পীল়াৰহং অচ্চাসনাদিং সঙ্গণ্হাতি. সেনাসনং ৰাতি ৰা-সদ্দেন মলগ্গহিতপত্তাদীনং সঙ্গহো দট্ঠব্বো. পরিভণ্ডকরণাদীহীতি আদি-সদ্দেন পত্তপচনাদীনং সঙ্গহো দট্ঠব্বো. অৰিসদেতি ৰত্থুম্হি অৰিসদে সতি, ৰিসযভূতে ৰা. কথং ভাৰনমনুযুত্তস্স তানি অজ্ঝত্তিকবাহিরৰত্থূনি ৰিসযো? অন্তরন্তরা পৰত্তনকচিত্তুপ্পাদৰসেনেৰ ৰুত্তং. তে হি চিত্তুপ্পাদা চিত্তেকগ্গতায অপরিসুদ্ধভাৰায সংৰত্তন্তি. চিত্তচেতসিকেসূতি নিস্সযাদিপচ্চযভূতেসু চিত্তচেতসিকেসু. ঞাণম্পীতি অপি-সদ্দো সম্পিণ্ডনত্থো. তেন ‘‘ন কেৰলং ৰত্থুযেৰ, অথ খো তস্মিং অপরিসুদ্ধে ঞাণম্পি অপরিসুদ্ধং হোতী’’তি নিস্সযাপরিসুদ্ধিযা তংনিস্সিতাপরিসুদ্ধি ৰিয ৰিসযস্স অপরিসুদ্ধতায ৰিসযিনো অপরিসুদ্ধিং দস্সেতি.

সমভাৰকরণন্তি কিচ্চতো অনূনাধিকভাৰকরণং. সদ্ধিন্দ্রিযং বলৰং হোতি, সদ্ধেয্যৰত্থুস্মিং পচ্চযৰসেন অধিমোক্খকিচ্চস্স পটুতরভাৰেন পঞ্ঞায অৰিসদতায ৰীরিযাদীনঞ্চ সিথিলতাদিনা সদ্ধিন্দ্রিযং বলৰং হোতি. তেনাহ – ‘‘ইতরানি মন্দানী’’তি. ততোতি তস্মা, সদ্ধিন্দ্রিযস্স বলৰভাৰতো ইতরেসঞ্চ মন্দত্তাতি অত্থো. কোসজ্জপক্খে পতিতুং অদত্ৰা সম্পযুত্তধম্মানং পগ্গণ্হনং অনুবলপ্পদানং পগ্গহো. পগ্গহোৰ কিচ্চং পগ্গহকিচ্চং. কাতুং ন সক্কোতীতি আনেত্ৰা সম্বন্ধিতব্বং. আরম্মণং উপগন্ত্ৰা ঠানং, অনিস্সজ্জনং ৰা উপট্ঠানং. ৰিক্খেপপ্পটিপক্খো, যেন ৰা সম্পযুত্তা অৰিক্খিত্তা হোন্তি, সো অৰিক্খেপো. রূপগতং ৰিয চক্খুনা যেন যাথাৰতো ৰিসযসভাৰং পস্সতি, তং দস্সনকিচ্চং কাতুং ন সক্কোতি বলৰতা সদ্ধিন্দ্রিযেন অধিভূতত্তা. সহজাতধম্মেসু হি ইন্দট্ঠং কারেন্তানং সহপৰত্তমানানং ধম্মানং একদেসতাৰসেনেৰ অত্থসিদ্ধি, ন অঞ্ঞথা. তস্মাতি ৰুত্তমেৰত্থং কারণভাৰেন পচ্চামসতি. তন্তি সদ্ধিন্দ্রিযং. ধম্মসভাৰপচ্চৰেক্খণেনাতি যস্স সদ্ধেয্যস্স ৰত্থুনো উল়ারতাদিগুণে অধিমুচ্চনস্স সাতিসযপ্পৰত্তিযা সদ্ধিন্দ্রিযং বলৰং জাতং, তস্স পচ্চযপচ্চযুপ্পন্নতাদিৰিভাগতো যাথাৰতো ৰীমংসনেন. এৰঞ্হি এৰংধম্মতানযেন যাথাৰসরসতো পরিগ্গয্হমানে সৰিপ্ফারো অধিমোক্খো ন হোতি ‘‘অযং ইমেসং ধম্মানং সভাৰো’’তি পরিজাননৰসেন পঞ্ঞাব্যাপারস্স সাতিসযত্তা. ধুরিযধম্মেসু হি যথা সদ্ধায বলৰভাৰে পঞ্ঞায মন্দভাৰো হোতি, এৰং পঞ্ঞায বলৰভাৰে সদ্ধায মন্দভাৰো হোতি. তেন ৰুত্তং – ‘‘তং ধম্মসভাৰপচ্চৰেক্খণেন হাপেতব্ব’’ন্তি.

তথা অমনসিকারেনাতি যেনাকারেন ভাৰনমনুযুঞ্জন্তস্স সদ্ধিন্দ্রিযং বলৰং জাতং, তেনাকারেন ভাৰনায অননুযুঞ্জনতোতি ৰুত্তং হোতি. ইধ দুৰিধেন সদ্ধিন্দ্রিযস্স বলৰভাৰো অত্তনো ৰা পচ্চযৰিসেসেন কিচ্চুত্তরিযতো ৰীরিযাদীনং ৰা মন্দকিচ্চতায. তত্থ পঠমৰিকপ্পে হাপনৰিধি দস্সিতো, দুতিযৰিকপ্পে পন যথা মনসিকরোতো ৰীরিযাদীনং মন্দকিচ্চতায সদ্ধিন্দ্রিযং বলৰং জাতং, তথা অমনসিকারেন ৰীরিযাদীনং পটুকিচ্চভাৰাৰহেন মনসিকারেন সদ্ধিন্দ্রিযং তেহি সমরসং করোন্তেন হাপেতব্বং. ইমিনা নযেন সেসিন্দ্রিযেসুপি হাপনৰিধি ৰেদিতব্বো.

ৰক্কলিত্থেরৰত্থূতি সো হি আযস্মা সদ্ধাধিমুত্ততায কতাধিকারো সত্থু রূপদস্সনপ্পসুতো এৰ হুত্ৰা ৰিহরন্তো সত্থারা ‘‘কিং তে, ৰক্কলি, ইমিনা পূতিকাযেন দিট্ঠেন, যো খো, ৰক্কলি, ধম্মং পস্সতি, সো মং পস্সতী’’তিআদিনা (সং. নি. ৩.৮৭) নযেন ওৰদিত্ৰা কম্মট্ঠানে নিযোজিতোপি তং অননুযুঞ্জন্তো পণামিতো অত্তানং ৰিনিপাতেতুং পপাতট্ঠানং অভিরুহি. অথ নং সত্থা যথানিসিন্নোৰ ওভাসৰিস্সজ্জনেন অত্তানং দস্সেত্ৰা –

‘‘পামোজ্জবহুলো ভিক্খু, পসন্নো বুদ্ধসাসনে;

অধিগচ্ছে পদং সন্তং, সঙ্খারূপসমং সুখ’’ন্তি. (ধ. প. ৩৮১) –

গাথং ৰত্ৰা ‘‘এহি, ৰক্কলী’’তি আহ. সো তেনেৰ অমতেন অভিসিত্তো হট্ঠতুট্ঠো হুত্ৰা ৰিপস্সনং পট্ঠপেসি, সদ্ধায পন বলৰভাৰেন ৰিপস্সনাৰীথিং ন ওতরি. তং ঞত্ৰা ভগৰা তস্স ইন্দ্রিযসমত্তপ্পটিপাদনায কম্মট্ঠানং সোধেত্ৰা অদাসি. সো সত্থারা দিন্ননযে ঠত্ৰা ৰিপস্সনং উস্সুক্কাপেত্ৰা মগ্গপ্পটিপাটিযা অরহত্তং পাপুণি. তেন ৰুত্তং – ‘‘ৰক্কলিত্থেরৰত্থু চেত্থ নিদস্সন’’ন্তি. এত্থাতি সদ্ধিন্দ্রিযস্স অধিমত্তভাৰে সেসিন্দ্রিযানং সকিচ্চাকরণে. ইতরকিচ্চভেদন্তি উপট্ঠানাদিকিচ্চৰিসেসং. পস্সদ্ধাদীতি আদি-সদ্দেন সমাধিউপেক্খাসম্বোজ্ঝঙ্গানং সঙ্গহো. হাপেতব্বন্তি যথা সদ্ধিন্দ্রিযস্স বলৰভাৰো ধম্মসভাৰপচ্চৰেক্খণেন হাযতি, এৰং ৰীরিযিন্দ্রিযস্স অধিমত্ততা পস্সদ্ধিআদিভাৰনায হাযতি সমাধিপক্খিযত্তা তস্সা. তথা হি সমাধিন্দ্রিযস্স অধিমত্ততং কোসজ্জপাততো রক্খন্তী ৰীরিযাদিভাৰনা ৰিয ৰীরিযিন্দ্রিযস্স অধিমত্ততং উদ্ধচ্চপাততো রক্খন্তী পস্সদ্ধাদিভাৰনা একংসতো হাপেতি. তেন ৰুত্তং – ‘‘পস্সদ্ধাদিভাৰনায হাপেতব্ব’’ন্তি.

সোণত্থেরস্স ৰত্থূতি সুখুমালসোণত্থেরস্স ৰত্থু. সো হি আযস্মা সত্থু সন্তিকে কম্মট্ঠানং গহেত্ৰা সীতৰনে ৰিহরন্তো ‘‘মম সরীরং সুখুমালং, ন চ সক্কা সুখেনেৰ সুখং অধিগন্তুং, কিলমেত্ৰাপি সমণধম্মো কাতব্বো’’তি ঠানচঙ্কমমেৰ অধিট্ঠায পধানমনুযুঞ্জন্তো পাদতলেসু ফোটেসু উট্ঠিতেসুপি ৰেদনং অজ্ঝুপেক্খিত্ৰা দল়্হৰীরিযং করোন্তো অচ্চারদ্ধৰীরিযতায ৰিসেসং নিব্বত্তেতুং নাসক্খি. সত্থা তত্থ গন্ত্ৰা ৰীণূপমোৰাদেন ওৰদিত্ৰা ৰীরিযসমতাযোজনৰিধিং দস্সেন্তো কম্মট্ঠানং ৰিসোধেত্ৰা গিজ্ঝকূটং গতো. থেরোপি সত্থারা দিন্ননযেন ৰীরিযসমতং যোজেত্ৰা ভাৰেন্তো ৰিপস্সনম্পি উস্সুক্কাপেত্ৰা অরহত্তে পতিট্ঠাসি. তেন ৰুত্তং – ‘‘সোণত্থেরস্স ৰত্থু দস্সেতব্ব’’ন্তি. সেসেসুপীতি সতিসমাধিপঞ্ঞিন্দ্রিযেসুপি.

সমতন্তি সদ্ধাপঞ্ঞানং অঞ্ঞমঞ্ঞং অনূনাধিকভাৰং, তথা সমাধিৰীরিযানং. যথা হি সদ্ধাপঞ্ঞানং ৰিসুং ধুরিযধম্মভূতানং কিচ্চতো অঞ্ঞমঞ্ঞানতিৰত্তনং ৰিসেসতো ইচ্ছিতব্বং, যতো নেসং সমধুরতায অপ্পনা সম্পজ্জতি, এৰং সমাধিৰীরিযানং কোসজ্জুদ্ধচ্চপক্খিকানং সমরসতায সতি অঞ্ঞমঞ্ঞূপত্থম্ভনতো সম্পযুত্তধম্মানং অন্তদ্ৰযপাতাভাৰেন সম্মদেৰ অপ্পনা ইজ্ঝতি. বলৰসদ্ধোতিআদি ব্যতিরেকমুখেন ৰুত্তস্সেৰত্থস্স সমত্থনং. তস্সত্থো – যো বলৰতিযা সদ্ধায সমন্নাগতো অৰিসদঞাণো, সো মুধপ্পসন্নো হোতি, ন অৰেচ্চপ্পসন্নো. তথা হি অৰত্থুস্মিং পসীদতি সেয্যথাপি তিত্থিযসাৰকা. কেরাটিকপক্খন্তি সাঠেয্যপক্খং ভজতি. সদ্ধাহীনায পঞ্ঞায অতিধাৰন্তো ‘‘দেয্যৰত্থুপরিচ্চাগেন ৰিনা চিত্তুপ্পাদমত্তেনপি দানমযং পুঞ্ঞং হোতী’’তিআদীনি পরিকপ্পেতি হেতুপ্পটিরূপকেহি ৰঞ্চিতো, এৰংভূতো সুক্খতক্কৰিলুত্তচিত্তো পণ্ডিতানং ৰচনং নাদিযতি, সঞ্ঞত্তিং ন গচ্ছতি. তেনাহ – ‘‘ভেসজ্জসমুট্ঠিতো ৰিয রোগো অতেকিচ্ছো হোতী’’তি. যথা চেত্থ সদ্ধাপঞ্ঞানং অঞ্ঞমঞ্ঞং সমভাৰো অত্থাৰহো, অনত্থাৰহো ৰিসমভাৰো, এৰং সমাধিৰীরিযানং অঞ্ঞমঞ্ঞং অৰিক্খেপাৰহো সমভাৰো, ইতরো ৰিক্খেপাৰহো চাতি কোসজ্জং অভিভৰতি, তেন অপ্পনং ন পাপুণাতীতি অধিপ্পাযো. উদ্ধচ্চং অভিভৰতীতি এত্থাপি এসেৰ নযো. তং উভযন্তি সদ্ধাপঞ্ঞাদ্ৰযং সমাধিৰীরিযদ্ৰযঞ্চ. সমং কত্তব্বন্তি সমরসং কাতব্বং.

সমাধিকম্মিকস্সাতি সমথকম্মট্ঠানিকস্স. এৰন্তি এৰং সন্তে, সদ্ধায থোকং বলৰভাৰে সতীতি অত্থো. সদ্দহন্তোতি ‘‘পথৰী পথৰীতি মনসিকরণমত্তেন কথং ঝানুপ্পত্তী’’তি অচিন্তেত্ৰা ‘‘অদ্ধা সম্মাসম্বুদ্ধেন ৰুত্তৰিধি ইজ্ঝিস্সতী’’তি সদ্দহন্তো সদ্ধং জনেন্তো. ওকপ্পেন্তোতি আরম্মণং অনুপ্পৰিসিত্ৰা ৰিয অধিমুচ্চনৰসেন অৰকপ্পেন্তো পক্খন্দন্তো. একগ্গতা বলৰতী ৰট্টতি সমাধিপ্পধানত্তা ঝানস্স. উভিন্নন্তি সমাধিপঞ্ঞানং. সমাধিকম্মিকস্স সমাধিনো অধিমত্ততা ৰিয পঞ্ঞায অধিমত্ততাপি ইচ্ছিতব্বাতি আহ – ‘‘সমতাযপী’’তি, সমভাৰেনপীতি অত্থো. অপ্পনাতি লোকিযঅপ্পনা. তথা হি ‘‘হোতিযেৰা’’তি সাসঙ্কং ৰদতি. লোকুত্তরপ্পনা পন তেসং সমভাৰেনেৰ ইচ্ছিতা. যথাহ – ‘‘সমথৰিপস্সনং যুগনদ্ধং ভাৰেতী’’তি (অ. নি. ৪.১৭০; পটি. ম. ২.৫).

যদি ৰিসেসতো সদ্ধাপঞ্ঞানং সমাধিৰীরিযানঞ্চ সমতাৰ ইচ্ছিতা, কথং সতীতি আহ – ‘‘সতি পন সব্বত্থ বলৰতী ৰট্টতী’’তি. সব্বত্থাতি লীনুদ্ধচ্চপক্খিকেসু পঞ্চসু ইন্দ্রিযেসু. উদ্ধচ্চপক্খিকে গণ্হন্তো ‘‘সদ্ধাৰীরিযপঞ্ঞান’’ন্তি আহ. অঞ্ঞথাপীতি চ গহেতব্বা সিযা. তথা হি কোসজ্জপক্খিকেন চ সমাধিনাইচ্চেৰ ৰুত্তং, ন ‘‘পস্সদ্ধিসমাধিউপেক্খাহী’’তি. সাতি সতি. সব্বেসু রাজকম্মেসু নিযুত্তো সব্বকম্মিকো. তেনাতি তেন সব্বত্থ ইচ্ছিতব্বত্থেন কারণেন. আহ অট্ঠকথাযং. সব্বত্থ নিযুত্তা সব্বত্থিকা সব্বত্থ লীনে উদ্ধতে চ চিত্তে ইচ্ছিতব্বত্তা, সব্বেন ৰা লীনুদ্ধচ্চপক্খিযেন বোজ্ঝঙ্গগণেন অত্থেতব্বাতি সব্বত্থা, সাৰ সব্বত্থিকা. চিত্তন্তি কুসলচিত্তং. তস্স হি সতিপটিসরণং পরাযণং অপ্পত্তস্স পত্তিযা অনধিগতস্স অধিগমায. তেনাহ – ‘‘আরক্খপচ্চুপট্ঠানা’’তিআদি.

খন্ধাদিভেদেসু অনোগাল়্হপঞ্ঞানন্তি পরিযত্তিবাহুসচ্চৰসেনপি খন্ধাযতনাদীসু অপ্পতিট্ঠিতবুদ্ধীনং. বহুস্সুতসেৰনা হি সুতমযঞাণাৰহা. তরুণৰিপস্সনাসমঙ্গীপি ভাৰনামযঞাণে ঠিতত্তা একংসতো পঞ্ঞৰা এৰ নাম হোতীতি আহ – ‘‘সমপঞ্ঞাস…পে… পুগ্গলসেৰনা’’তি. ঞেয্যধম্মস্স গম্ভীরভাৰৰসেন তপ্পরিচ্ছেদকঞাণস্স গম্ভীরভাৰগ্গহণন্তি আহ – ‘‘গম্ভীরেসু খন্ধাদীসু পৰত্তায গম্ভীরপঞ্ঞাযা’’তি. তঞ্হি ঞেয্যং তাদিসায পঞ্ঞায চরিতব্বতো গম্ভীরঞাণচরিযং. তস্সা ৰা পঞ্ঞায তত্থ পভেদতো পৰত্তি গম্ভীরঞাণচরিযা, তস্সা পচ্চৰেক্খণাতি আহ – ‘‘গম্ভীরপঞ্ঞায পভেদপচ্চৰেক্খণা’’তি.

পঞ্চৰিধবন্ধনকম্মকারণং নিরযে নিব্বত্তসত্তস্স যেভুয্যেন সব্বপঠমং করোন্তীতি দেৰদূতসুত্তাদীসু আদিতো ৰুত্তত্তা চ আহ – ‘‘পঞ্চৰিধবন্ধনকম্মকারণতো পট্ঠাযা’’তি. সকটৰহনাদিকালেতি আদি-সদ্দেন তদঞ্ঞং মনুস্সেহি তিরচ্ছানেহি চ ৰিবাধিতব্বকালং সঙ্গণ্হাতি. একং বুদ্ধন্তরন্তি ইদং অপরাপরেসু পেতেসুযেৰ উপ্পজ্জনকসত্তৰসেন ৰুত্তং, একচ্চানং ৰা পেতানং একচ্চতিরচ্ছানানং ৰিয দীঘাযুকতা সিযাতি তথা ৰুত্তং. তথা হি কাল়ো নাগরাজা চতুন্নং বুদ্ধানং সম্মুখীভাৰং লভিত্ৰা ঠিতোপি মেত্তেয্যস্সপি ভগৰতো সম্মুখীভাৰং লভিস্সতীতি ৰদন্তি, যতস্স কপ্পাযুকতা ৰুত্তা.

এৰং আনিসংসদস্সাৰিনোতি ৰীরিযাযত্তো এৰ সব্বো লোকিযো লোকুত্তরো চ ৰিসেসাধিগমোতি এৰং ৰীরিযে আনিসংসদস্সনসীলস্স. গমনৰীথিন্তি সপুব্বভাগং নিব্বানগামিনিপটিপদং, সহ ৰিপস্সনায অরিযমগ্গপ্পটিপাটি, সত্তৰিসুদ্ধিপরম্পরা ৰা. সা হি ‘‘ভিক্খুনো ৰট্টনিয্যানায গন্তব্বা পটিপজ্জিতব্বা পটিপদা’’তি কত্ৰা গমনৰীথি নাম.

কাযদল়্হীবহুলোতি যথা তথা কাযস্স দল়্হীকম্মপ্পসুতো. পিণ্ডপাতন্তি রট্ঠপিণ্ডং. পচ্চযদাযকানং অত্তনি কারস্স অত্তনো সম্মাপটিপত্তিযা মহপ্ফলভাৰস্স করণেন পিণ্ডস্স ভিক্খায পটিপূজনা পিণ্ডপাতাপচাযনং.

নীহরন্তোতি পত্তত্থৰিকতো নীহরন্তো. তং সদ্দং সুত্ৰাতি তং উপাসিকায ৰচনং পণ্ণসালাদ্ৰারে ঠিতোৰ পঞ্চাভিঞ্ঞতায দিব্বসোতেন সুত্ৰা. মনুস্সসম্পত্তি, দিব্বসম্পত্তি, নিব্বানসম্পত্তীতি ইমা তিস্সো সম্পত্তিযো. দাতুং সক্খিস্সসীতি তযি কতেন দানমযেন ৰেয্যাৰচ্চমযেন চ পুঞ্ঞকম্মেন খেত্তৰিসেসভাৰূপগমনেন অপরাপরং দেৰমনুস্সানং সম্পত্তিযো অন্তে নিব্বানসম্পত্তিঞ্চ দাতুং সক্খিস্সসীতি থেরো অত্তানং পুচ্ছতি. সিতং করোন্তোতি ‘‘অকিচ্ছেনেৰ মযা ৰট্টদুক্খং সমতিক্কন্ত’’ন্তি পচ্চৰেক্খণাৰসানে সঞ্জাতপামোজ্জৰসেন সিতং করোন্তো.

নিপ্পরিস্সযকালোতি নিরুপদ্দৰকালো, তদা ভিক্খুসঙ্ঘস্স সুলভা পচ্চযা হোন্তীতি পচ্চযহেতুকা চিত্তপীল়া নত্থীতি অধিপ্পাযো. পস্সন্তানংযেৰাতি অনাদরে সামিৰচনং. খীরধেনুন্তি খীরদাযিকং ধেনুং. কিঞ্চিদেৰ কত্ৰাতি কিঞ্চিদেৰ ভতিকম্মং কত্ৰা. উচ্ছুযন্তকম্মন্তি উচ্ছুযন্তসালায কাতব্বং কিচ্চং. তমেৰ মগ্গন্তি উপাসকেন পটিপন্নমগ্গং. উপকট্ঠাযাতি আসন্নায. ৰিপ্পটিপন্নন্তি জাতিধম্মকুলধম্মাদিলঙ্ঘনেন অসম্মাপটিপন্নং. এৰন্তি যথা অসম্মাপটিপন্নো পুত্তো তায এৰ অসম্মাপটিপত্তিযা কুলসন্তানতো বাহিরো হুত্ৰা পিতু সন্তিকা দাযজ্জস্স ন ভাগী, এৰং কুসীতোপি তেনেৰ কুসীতভাৰেন ন সম্মাপটিপন্নো সত্থু সন্তিকা লদ্ধব্বঅরিযধনদাযজ্জস্স ন ভাগী. আরদ্ধৰীরিযোৰ লভতি সম্মাপটিপজ্জনতো. উপ্পজ্জতি ৰীরিযসম্বোজ্ঝঙ্গোতি যোজনা, এৰং সব্বত্থ.

মহাতি সীলাদিগুণেহি মহন্তো ৰিপুলো অনঞ্ঞসাধারণো. তং পনস্স গুণমহত্তং দসসহস্সিলোকধাতুকম্পনেন লোকে পাকটন্তি দস্সেন্তো ‘‘সত্থুনো হী’’তিআদিমাহ.

যস্মা সত্থুসাসনে পব্বজিতস্স পব্বজ্জূপগমনেন সক্যপুত্তিযভাৰো সঞ্জাযতি, তস্মা বুদ্ধপুত্তভাৰং দস্সেন্তো ‘‘অসম্ভিন্নাযা’’তিআদিমাহ.

অলসানং ভাৰনায নামমত্তম্পি অজানন্তানং কাযদল়্হীবহুলানং যাৰদত্থং ভুঞ্জিত্ৰা সেয্যসুখাদিঅনুযুঞ্জনকানং তিরচ্ছানগতিকানং পুগ্গলানং দূরতো ৰজ্জনা কুসীতপুগ্গলপরিৰজ্জনাতি আহ – ‘‘কুচ্ছিং পূরেত্ৰা ঠিতঅজগরসদিসে’’তিআদি. ‘‘দিৰসং চঙ্কমেন নিসজ্জায আৰরণীযেহি ধম্মেহি চিত্তং পরিসোধেস্সামা’’তিআদিনা ভাৰনারম্ভৰসেন আরদ্ধৰীরিযানং দল়্হপরক্কমানং কালেন কালং উপসঙ্কমনা আরদ্ধৰীরিযপুগ্গলসেৰনাতি আহ – ‘‘আরদ্ধৰীরিযে’’তিআদি. ৰিসুদ্ধিমগ্গে (ৰিসুদ্ধি. ১.৬৪-৬৫) পন জাতিমহত্তপচ্চৰেক্খণা সব্রহ্মচারিমহত্তপচ্চৰেক্খণাতি ইদং দ্ৰযং ন গহিতং, থিনমিদ্ধৰিনোদনতা সম্মপ্পধানপচ্চৰেক্খণতাতি ইদং দ্ৰযং গহিতং. তত্থ আনিসংসদস্সাৰিতায এৰ সম্মপ্পধানপচ্চৰেক্খণা গহিতা হোতি লোকিযলোকুত্তরৰিসেসাধিগমস্স ৰীরিযাযত্ততাদস্সনভাৰতো, থিনমিদ্ধৰিনোদনং পন তদধিমুত্ততায এৰ গহিতং হোতি. ৰীরিযুপ্পাদনে যুত্তপ্পযুত্তস্স থিনমিদ্ধৰিনোদনং অত্থসিদ্ধমেৰাতি. তত্থ থিনমিদ্ধৰিনোদনকুসীতপুগ্গলপরিৰজ্জনআরদ্ধৰীরিযপুগ্গলসেৰনতদধি- মুত্ততাপটিপক্খৰিধমনপচ্চযূপসংহারৰসেন অপাযভযপচ্চৰেক্খণাদযো সমুত্তেজনৰসেন ৰীরিযসম্বোজ্ঝঙ্গস্স উপ্পাদকা দট্ঠব্বা.

বুদ্ধানুস্সতিযা উপচারসমাধিনিট্ঠত্তা ৰুত্তং – ‘‘যাৰ উপচারা’’তি. সকলসরীরং ফরমানোতি পীতিসমুট্ঠানেহি পণীতরূপেহি সকলসরীরং ফরমানো, ধম্মসঙ্ঘগুণে অনুস্সরন্তস্সপি যাৰ উপচারা সকলসরীরং ফরমানো পীতিসম্বোজ্ঝঙ্গো উপ্পজ্জতীতি এৰং সেসঅনুস্সতীসু, পসাদনীযসুত্তন্তপচ্চৰেক্খণায চ যোজেতব্বং তস্সাপি ৰিমুত্তাযতনভাৰেন তগ্গতিকত্তা. এৰরূপে কালেতি ‘‘দুব্ভিক্খভযাদীসূ’’তি ৰুত্তকালে. সমাপত্তি…পে… ন সমুদাচরন্তীতি ইদং উপসমানুস্সতিযা ৰসেন ৰুত্তং. সঙ্খারানঞ্হি ৰসেন সপ্পদেসৰূপসমেপি নিপ্পদেসৰূপসমে ৰিয তথা সঞ্ঞায পৰত্তিতো ভাৰনামনসিকারো কিলেসৰিক্খম্ভনসমত্থো হুত্ৰা উপচারসমাধিং আৰহন্তো তথারূপপীতিসোমনস্সসমন্নাগতো পীতিসম্বোজ্ঝঙ্গস্স উপাদায হোতীতি. তত্থ ‘‘ৰিক্খম্ভিতা কিলেসা’’তি পাঠো. ন সমুদাচরন্তীতি ইতি-সদ্দো কারণত্থো. যস্মা ন সমুদাচরন্তি, তস্মা তং নেসং অসমুদাচারং পচ্চৰেক্খন্তস্সাতি যোজনা. ন হি কিলেসে পচ্চৰেক্খন্তস্স বোজ্ঝঙ্গুপ্পত্তি যুত্তা, পসাদনীযেসু ঠানেসু পসাদসিনেহাভাৰেন লূখহদযতায লূখতা. সা তত্থ আদরগারৰাকরণেন ৰিঞ্ঞাযতীতি আহ – ‘‘অসক্কচ্চকিরিযায সংসূচিতলূখভাৰে’’তি.

পণীতভোজনসেৰনতাতি পণীতসপ্পাযভোজনসেৰনতা. উতুইরিযাপথসুখগ্গহণেন সপ্পাযউতুইরিযাপথগ্গহণং দট্ঠব্বং. তঞ্হি তিৰিধম্পি সপ্পাযং সেৰিযমানং কাযস্স কল্যতাপাদনৰসেন চিত্তস্স কল্যতং আৰহন্তং দুৰিধাযপি পস্সদ্ধিযা কারণং হোতি. অহেতুকসত্তেসু লব্ভমানং সুখদুক্খন্তি অযমেকো অন্তো, ইস্সরাদিৰিসমহেতুকন্তি পন অযং দুতিযো. এতে উভো অন্তে অনুপগম্ম যথাসকং কম্মুনা হোতীতি অযং মজ্ঝিমা পটিপত্তি. মজ্ঝত্তো পযোগো যস্স সো মজ্ঝত্তপযোগো, তস্স ভাৰো মজ্ঝত্তপযোগতা. অযঞ্হি সভাৰাসারদ্ধতায তংপস্সদ্ধকাযতায কারণং হোতি, পস্সদ্ধিদ্ৰযং আৰহতি. এতেনেৰ সারদ্ধকাযপুগ্গলপরিৰজ্জনপস্সদ্ধকাযপুগ্গলসেৰনানং তদাৰহনতা সংৰণ্ণিতাতি দট্ঠব্বং.

ৰত্থুৰিসদকিরিযা ইন্দ্রিযসমত্তপ্পটিপাদনা চ পঞ্ঞাৰহা ৰুত্তা, সমাধানাৰহাপি তা হোন্তি. সমাধানাৰহভাৰেনেৰ পঞ্ঞাৰহভাৰতোতি ৰুত্তং – ‘‘ৰত্থুৰিসদকিরিযা…পে… ৰেদিতব্বা’’তি.

কারণকোসল্লভাৰনাকোসল্লানং নানন্তরিযভাৰতো রক্খনাকোসল্লস্স চ তংমূলকত্তা ‘‘নিমিত্তকুসলতা নাম কসিণনিমিত্তস্স উগ্গহকুসলতা’’ইচ্চেৰ ৰুত্তং. কসিণনিমিত্তস্সাতি চ নিদস্সনমত্তং দট্ঠব্বং. অসুভনিমিত্তাদিকস্সপি হি যস্স কস্সচি ঝানুপ্পত্তিনিমিত্তস্স উগ্গহকোসল্লং নিমিত্তকুসলতা এৰাতি. অতিসিথিলৰীরিযতাদীহীতি আদি-সদ্দেন পঞ্ঞাপযোগমন্দতং পযোগৰেকল্লঞ্চ সঙ্গণ্হাতি. তস্স পগ্গণ্হনন্তি তস্স লীনস্স চিত্তস্স ধম্মৰিচযসম্বোজ্ঝঙ্গাদিসমুট্ঠাপনেন লযাপত্তিতো সমুদ্ধরণং. ৰুত্তঞ্হেতং ভগৰতা –

‘‘যস্মিঞ্চ খো, ভিক্খৰে, সমযে লীনং চিত্তং হোতি, কালো তস্মিং সমযে ধম্মৰিচযসম্বোজ্ঝঙ্গস্স ভাৰনায, কালো ৰীরিযসম্বোজ্ঝঙ্গস্স ভাৰনায, কালো পীতিসম্বোজ্ঝঙ্গস্স ভাৰনায. তং কিস্স হেতু? লীনং, ভিক্খৰে, চিত্তং, তং এতেহি ধম্মেহি সুসমুট্ঠাপযং হোতি. সেয্যথাপি, ভিক্খৰে, পুরিসো পরিত্তং অগ্গিং উজ্জালেতুকামো অস্স. সো তত্থ সুক্খানি চেৰ তিণানি পক্খিপেয্য, সুক্খানি চ গোমযানি পক্খিপেয্য, সুক্খানি চ কট্ঠানি পক্খিপেয্য, মুখৰাতঞ্চ দদেয্য, ন চ পংসুকেন ওকিরেয্য, ভব্বো নু খো সো পুরিসো পরিত্তং অগ্গিং উজ্জালেতুন্তি? এৰং, ভন্তে’’তি (সং. নি. ৫.২৩৪).

এত্থ চ যথাসকং আহারৰসেন ধম্মৰিচযসম্বোজ্ঝঙ্গাদীনং ভাৰনা সমুট্ঠাপনাতি ৰেদিতব্বা, সা অনন্তরং ৰিভাৰিতা এৰ.

অচ্চারদ্ধৰীরিযতাদীহীতি আদি-সদ্দেন পঞ্ঞাপযোগবলৰতং পমোদুপ্পিলাপনঞ্চ সঙ্গণ্হাতি. তস্স নিগ্গণ্হনন্তি তস্স উদ্ধতস্স চিত্তস্স সমাধিসম্বোজ্ঝঙ্গাদিসমুট্ঠাপনেন উদ্ধতাপত্তিতো নিসেধনং. ৰুত্তম্পি চেতং ভগৰতা –

‘‘যস্মিঞ্চ খো, ভিক্খৰে, সমযে উদ্ধতং চিত্তং হোতি, কালো তস্মিং সমযে পস্সদ্ধিসম্বোজ্ঝঙ্গস্স ভাৰনায, কালো সমাধিসম্বোজ্ঝঙ্গস্স ভাৰনায, কালো উপেক্খাসম্বোজ্ঝঙ্গস্স ভাৰনায. তং কিস্স হেতু? উদ্ধতং, ভিক্খৰে, চিত্তং, তং এতেহি ধম্মেহি সুৰূপসমং হোতি. সেয্যথাপি, ভিক্খৰে, পুরিসো মহন্তং অগ্গিক্খন্ধং নিব্বাপেতুকামো অস্স, সো তত্থ অল্লানি চেৰ তিণানি পক্খিপেয্য, অল্লানি চ গোমযানি নিক্খিপেয্য, অল্লানি চ কট্ঠানি পক্খিপেয্য, মুখৰাতঞ্চ ন দদেয্য, পংসুকেন চ ওকিরেয্য, ভব্বো নু খো সো পুরিসো মহন্তং অগ্গিক্খন্ধং নিব্বাপেতুন্তি? এৰং, ভন্তে’’তি (সং. নি. ৫.২৩৪).

এত্থাপি যথাসকং আহারৰসেন পস্সদ্ধিসম্বোজ্ঝঙ্গাদীনং ভাৰনা সমুট্ঠাপনাতি ৰেদিতব্বা. তত্থ পস্সদ্ধিসম্বোজ্ঝঙ্গস্স ভাৰনা ৰুত্তা এৰ, সমাধিসম্বোজ্ঝঙ্গস্স ৰুচ্চমানা, ইতরস্স অনন্তরং ৰক্খতি.

পঞ্ঞাপযোগমন্দতাযাতি পঞ্ঞাব্যাপারস্স অপ্পকভাৰেন. যথা হি দানং অলোভপ্পধানং, সীলং অদোসপ্পধানং, এৰং ভাৰনা অমোহপ্পধানা. তত্থ যদা পঞ্ঞা ন বলৰতী হোতি, তদা ভাৰনা পুব্বেনাপরং ৰিসেসাৰহা ন হোতি. অনভিসঙ্গতো ৰিয আহারো পুরিসস্স, যোগিনো চিত্তস্স অভিরুচিং ন জনেতি, তেন তং নিরস্সাদং হোতি. তথা ভাৰনায সম্মদেৰ অৰীথিপটিপত্তিযা উপসমসুখং ন ৰিন্দতি, তেনপি চিত্তং নিরস্সাদং হোতি. তেন ৰুত্তং – ‘‘পঞ্ঞাপযোগমন্দতাযা…পে… নিরস্সাদং হোতী’’তি. তস্স সংৰেগুপ্পাদনং পসাদুপ্পাদনঞ্চ তিকিচ্ছনন্তি তং দস্সেন্তো, ‘‘অট্ঠ সংৰেগৰত্থূনী’’তিআদিমাহ. তত্থ জাতিজরাব্যাধিমরণানি যথারহং সুগতিযং দুগ্গতিযঞ্চ হোন্তীতি তদঞ্ঞমেৰ পঞ্চৰিধবন্ধনাদিখুপ্পিপাসাদিঅঞ্ঞমঞ্ঞৰিহেঠনাদিহেতুকং অপাযদুক্খং দট্ঠব্বং. তযিদং সব্বং তেসং তেসং সত্তানং পচ্চুপ্পন্নভৰনিস্সিতং গহিতন্তি অতীতে অনাগতে চ কালে ৰট্টমূলকদুক্খানি ৰিসুং গহিতানি. যে পন সত্তা আহারূপজীৰিনো, তত্থ চ উট্ঠানফলূপজীৰিনো, তেসং অঞ্ঞেহি অসাধারণজীৰিতদুক্খং অট্ঠমং সংৰেগৰত্থু গহিতন্তি দট্ঠব্বং. অযং ৰুচ্চতি সমযে সম্পহংসনতাতি অযং ভাৰনাচিত্তস্স সম্পহংসিতব্বসমযে ৰুত্তনযেনেৰ সংৰেগজননৰসেন চেৰ পসাদুপ্পাদনৰসেন চ সম্মদেৰ পহংসনা, সংৰেগজননপুব্বকপসাদুপ্পাদনেন তোসনাতি অত্থো.

সম্মাপটিপত্তিং আগম্মাতি লীনুদ্ধচ্চৰিরহেন সমথৰীথিপটিপত্তিযা চ সম্মা অৰিসমং সম্মদেৰ ভাৰনাপটিপত্তিং আগম্ম. অলীনন্তিআদীসু কোসজ্জপক্খিযানং ধম্মানং অনধিমত্ততায অলীনং, উদ্ধচ্চপক্খিকানং অনধিমত্ততায অনুদ্ধতং, পঞ্ঞাপযোগসম্পত্তিযা উপসমসুখাধিগমেন চ অনিরস্সাদং, ততো এৰ আরম্মণে সমপ্পৰত্তং সমথৰীথিপটিপন্নং. অলীনানুদ্ধতাহি ৰা আরম্মণে সমপ্পৰত্তং, অনিরস্সাদতায সমথৰীথিপটিপন্নং. সমপ্পৰত্তিযা ৰা অলীনং অনুদ্ধতং, সমথৰীথিপটিপত্তিযা অনিরস্সাদন্তি দট্ঠব্বং. তত্থ অলীনতায পগ্গহে, অনুদ্ধততায নিগ্গহে, অনিরস্সাদতায সম্পহংসনে ন ব্যাপারং আপজ্জতি. অযং ৰুচ্চতি সমযে অজ্ঝুপেক্খনতাতি অযং অজ্ঝুপেক্খিতব্বসমযে ভাৰনাচিত্তস্স পগ্গহনিগ্গহসম্পহংসনেসু ব্যাৰটতাসঙ্খাতং পটিপক্খং অভিভুয্য অজ্ঝুপেক্খনা ৰুচ্চতি. পটিপক্খৰিক্খম্ভনতো ৰিপস্সনায অধিট্ঠানভাৰূপগমনতো চ উপচারজ্ঝানম্পি সমাধানকিচ্চনিপ্ফত্তিযা পুগ্গলস্স সমাহিতভাৰসাধনমেৰাতি তত্থ সমধুরভাৰেনাহ – ‘‘উপচারং ৰা অপ্পনং ৰা’’তি. এস উপ্পজ্জতীতি এস সমাধিসম্বোজ্ঝঙ্গো অনুপ্পন্নো উপ্পজ্জতি.

অনুরোধৰিরোধপ্পহানৰসেন মজ্ঝত্তভাৰো উপেক্খাসম্বোজ্ঝঙ্গস্স কারণং তস্মিং সতি সিজ্ঝনতো, অসতি চ অসিজ্ঝনতো, সো চ মজ্ঝত্তভাৰো ৰিসযৰসেন দুৰিধোতি আহ – ‘‘সত্তমজ্ঝত্ততা সঙ্খারমজ্ঝত্ততা’’তি. তদুভযেন চ ৰিরুজ্ঝনং পস্সদ্ধিসম্বোজ্ঝঙ্গভাৰনায এৰ দূরীকতন্তি অনুরুজ্ঝনস্সেৰ পহানৰিধিং দস্সেতুং – ‘‘সত্তমজ্ঝত্ততা’’তিআদি ৰুত্তং. তেনাহ – ‘‘সত্তসঙ্খারকেলাযনপুগ্গলপরিৰজ্জনতা’’তি. উপেক্খায হি ৰিসেসতো রাগো পটিপক্খো. তথা চাহ – ‘‘উপেক্খা রাগবহুলস্স ৰিসুদ্ধিমগ্গো’’তি (ৰিসুদ্ধি. ১.২৬৯). দ্ৰীহাকারেহীতি কম্মস্সকতাপচ্চৰেক্খণং, অত্তসুঞ্ঞতাপচ্চৰেক্খণন্তি, ইমেহি দ্ৰীহি কারণেহি. দ্ৰীহেৰাতি অৰধারণং সঙ্খ্যাসমানতাদস্সনত্থং. সঙ্খ্যা এৰ হেত্থ সমানা, ন সঙ্খ্যেয্যং সব্বথা সমানন্তি. অস্সামিকভাৰো অনত্তনিযতা. সতি হি অত্তনি তস্স কিঞ্চনভাৰেন চীৰরং অঞ্ঞং ৰা কিঞ্চি অত্তনিযং নাম সিযা, সো পন কোচি নত্থেৰাতি অধিপ্পাযো. অনদ্ধনিযন্তি ন অদ্ধানক্খমং, ন চিরট্ঠাযী ইত্তরং অনিচ্চন্তি অত্থো. তাৰকালিকন্তি তস্সেৰ ৰেৰচনং.

মমাযতীতি মমত্তং করোতি, মমাতি তণ্হায পরিগ্গয্হ তিট্ঠতি. ধনাযন্তাতি ধনং দব্বং করোন্তা.

৪১৯. সম্মাদস্সনলক্খণাতি সম্মা অৰিপরীতং অনিচ্চাদিৰসেন দস্সনসভাৰা. সম্মাঅভিনিরোপনলক্খণোতি সম্মদেৰ আরম্মণে চিত্তস্স অভিনিরোপনসভাৰো. চতুরঙ্গসমন্নাগতা ৰাচা জনং সঙ্গণ্হাতীতি তব্বিপক্খৰিরতিসভাৰা সম্মাৰাচা ভেদকরমিচ্ছাৰাচাপহানেন জনে সম্পযুত্তে চ পরিগ্গণ্হনকিচ্চৰতী হোতীতি ‘‘পরিগ্গহলক্খণা’’তি ৰুত্তা. ৰিসংৰাদনাদিকিচ্চতায হি লূখানং অপরিগ্গাহকানং মুসাৰাদাদীনং পটিপক্খভূতা সিনিদ্ধভাৰেন পরিগ্গহণসভাৰা সম্মাজপ্পনকিচ্চা সম্মাৰাচা তপ্পচ্চযসুভাসিতসম্পটিগ্গাহকে জনে সম্পযুত্তধম্মে চ পরিগ্গণ্হন্তী পৰত্ততীতি পরিগ্গহলক্খণা. যথা চীৰরকম্মাদিপ্পযোগসঙ্খাতো কম্মন্তো কাতব্বং চীৰররজনাদিকং সমুট্ঠাপেতি নিপ্ফাদেতি, তংতংকিরিযানিপ্ফাদকো ৰা চেতনাসঙ্খাতো কম্মন্তো হত্থচলনাদিকং কিরিযং সমুট্ঠাপেতি, এৰং সাৰজ্জকত্তব্বকিরিযাসমুট্ঠাপকমিচ্ছাকম্মন্তপ্পহানেন সম্মাকম্মন্তো নিরৰজ্জস্স কত্তব্বস্স নিরৰজ্জাকারেন সমুট্ঠাপনকিচ্চৰা হোতীতি আহ – ‘‘সম্মাসমুট্ঠাপনলক্খণো’’তি. সম্পযুত্তধম্মানং ৰা উক্খিপনং সমুট্ঠাপনং কাযিককিরিযায ভারুক্খিপনং ৰিয. সম্মাৰোদাপনলক্খণোতি জীৰমানস্স পুগ্গলস্স, সম্পযুত্তধম্মানং ৰা জীৰিতিন্দ্রিযৰুত্তিযা, আজীৰস্সেৰ ৰা সম্মদেৰ সোধনং ৰোদাপনং লক্খণং এতস্সাতি সম্মাৰোদাপনলক্খণো. অথ ৰা কাযৰাচানং খন্ধসন্তানস্স চ সংকিলেসভূতমিচ্ছাআজীৰপ্পহানেন সম্মাআজীৰো ‘‘ৰোদাপনলক্খণো’’তি ৰুত্তো. সম্মাৰাযামসতিসমাধীসু ৰত্তব্বং হেট্ঠা ৰুত্তমেৰ.

পঞ্ঞায কুসলানং ধম্মানং পুব্বঙ্গমভাৰতো সব্বেপি অকুসলা ধম্মা তস্সা পটিপক্খাৰাতি ৰুত্তং – ‘‘অঞ্ঞেহিপি অত্তনো পচ্চনীককিলেসেহি সদ্ধি’’ন্তি. অথ ৰা অত্তনো পচ্চনীককিলেসা দিট্ঠেকট্ঠা অৰিজ্জাদযো পঞ্ঞায উজুপচ্চনীকভাৰতো. পস্সতীতি পস্সন্তী ৰিয হোতি ৰিবন্ধাভাৰতো. তেনাহ – ‘‘তপ্পটিচ্ছাদক…পে… অসম্মোহতো’’তি. সম্মাসঙ্কপ্পাদীনং মিচ্ছাসঙ্কপ্পাদযো উজুৰিপচ্চনীকাতি আহ – ‘‘সম্মাসঙ্কপ্পাদযো…পে… পজহন্তী’’তি. তথেৰাতি ইমিনা অত্তনো পচ্চনীককিলেসেহি সদ্ধিন্তি ইমমত্থং অনুকড্ঢতি. ৰিসেসতোতি সম্মাদিট্ঠিযা ৰুত্তকিচ্চতো ৰিসেসেন. এত্থাতি এতেসু সম্মাসঙ্কপ্পাদীসু.

এসা সম্মাদিট্ঠি নামাতি লোকিযং লোকুত্তরঞ্চ একজ্ঝং কত্ৰা ৰদতি মিস্সকতাভাৰতো. তেনাহ – ‘‘পুব্বভাগে’’তিআদি. একারম্মণা নিব্বানারম্মণত্তা. কিচ্চতোতি পুব্বভাগে দুক্খাদীহি ঞাণেহি কাতব্বকিচ্চস্স ইধ নিপ্ফত্তিতো, ইমস্সেৰ ৰা ঞাণস্স দুক্খাদিপ্পকাসনকিচ্চতো. চত্তারি নামানি লভতি দুক্খপরিঞ্ঞাদিচতুকিচ্চসাধনতো. তীণি নামানি লভতি কামসঙ্কপ্পাদিপ্পহানকিচ্চনিপ্ফত্তিতো. সিক্খাপদৰিভঙ্গে (ৰিভ. ৭০৩ আদযো) ‘‘ৰিরতিচেতনা তংসম্পযুত্তা চ ধম্মা সিক্খাপদানী’’তি ৰুত্তানি, তত্থ পধানানং ৰিরতিচেতনানং ৰসেন ‘‘ৰিরতিযোপি হোন্তি চেতনাদযোপী’’তি আহ. ‘‘সম্মা ৰদতি এতাযা’’তিআদিনা অত্থসম্ভৰতো সম্মাৰাচাদযো তযো ৰিরতিযোপি হোন্তি চেতনাদযোপি. মুসাৰাদাদীহি ৰিরমণকালে ৰিরতিযো, সুভাসিতাদিৰাচাভাসনাদিকালে চেতনাদযো যোজেতব্বা. মগ্গক্খণে পন ৰিরতিযোৰ মগ্গলক্খণপ্পত্তিতো. ন হি চেতনা নিয্যানসভাৰা. অথ ৰা একস্স ঞাণস্স দুক্খাদিঞাণতা ৰিয একায ৰিরতিযা মুসাৰাদাদিৰিরতিভাৰো ৰিয চ একায চেতনায সম্মাৰাচাদিকিচ্চত্তযসাধনসভাৰা সম্মাৰাচাদিভাৰাসিদ্ধিতো ‘‘মগ্গক্খণে ৰিরতিযোৰা’’তি ৰুত্তং.

চত্তারি নামানি লভতীতি চতুসম্মপ্পধানচতুসতিপট্ঠানৰসেন লভতি. মগ্গক্খণেতি আনেত্ৰা সম্বন্ধো. পুব্বভাগেপি মগ্গক্খণেপি সম্মাসমাধি এৰাতি যদিপি সমাধিউপকারকানং অভিনিরোপনানুমজ্জনসম্পিযাযনব্রূহনসন্তসুখানং ৰিতক্কাদীনং ৰসেন চতূহি ঝানেহি সম্মাসমাধি ৰিভত্তো, তথাপি ৰাযামো ৰিয অনুপ্পন্নাকুসলানুপ্পাদনাদিচতুৰাযামকিচ্চং, সতি ৰিয চ অসুভাসুখানিচ্চানত্তেসু কাযাদীসু সুভাদিসঞ্ঞাপহানলক্খণং চতুসতিকিচ্চং, একো সমাধি চতুজ্ঝানসমাধিকিচ্চং ন সাধেতীতি পুব্বভাগেপি পঠমজ্ঝানসমাধি, পঠমজ্ঝানসমাধি এৰ মগ্গক্খণেপি, তথা পুব্বভাগেপি চতুত্থজ্ঝানসমাধি, চতুত্থজ্ঝানসমাধি এৰ মগ্গক্খণেপীতি অত্থো.

‘‘কিং পনাযং মগ্গধম্মানং দেসনানুক্কমো, কেৰলং ৰাচায কমৰত্তিনিভাৰতো, উদাহু কঞ্চি ৰিসেসং উপাদাযা’’তি ৰিচারণাযং কঞ্চি ৰিসেসং উপাদাযাতি দস্সেন্তো আহ – ‘‘ইমেসূ’’তিআদি. তত্থ ভাৰনানুভাৰা হিতফলায সাতিসযং তিক্খৰিসদভাৰপ্পত্তিযা অচ্ছরিযব্ভুতসমত্থতাযোগেন সব্বসো পটিপক্খৰিধমনেন যাথাৰতো ধম্মসভাৰবোধনেন চ সম্মাদিট্ঠিযা বহুকারতা ৰেদিতব্বা. তেনাহ – ‘‘অযং হী’’তিআদি.

তস্সাতি সম্মাদিট্ঠিযা. বহুকারোতি ধম্মসম্পটিৰেধে বহূপকারো. ইদানি তমত্থং উপমাহি ৰিভাৰেতুং, ‘‘যথা হী’’তিআদি ৰুত্তং.

ৰচীভেদস্স কারকো ৰিতক্কো সাৰজ্জানৰজ্জৰচীভেদনিৰত্তনপ্পৰত্তনাকারায সম্মাৰাচাযপি উপকারকো এৰাতি আহ – ‘‘স্ৰাযং…পে… সম্মাৰাচাযপি উপকারকো’’তি. সম্মাসঙ্কপ্পো হি সচ্চৰাচায ৰিরতিৰাচাযপি ৰিসেসপচ্চযো মিচ্ছাসঙ্কপ্পতদেকট্ঠকিলেসপ্পহানতো.

সংৰিদহিত্ৰাতিআদীসু সম্মা ৰিদহনং কম্মন্তপ্পযোজনঞ্চ একন্তানৰজ্জৰচীকাযকম্মৰসেন ইচ্ছিতব্বন্তি ৰিরতিৰাচাৰসেন সংৰিদহনং ৰিরতিকম্মন্তস্সেৰ পযোজনঞ্চ নিদস্সিতন্তি দট্ঠব্বং. এৰং হিস্স সম্মাৰাচায সম্মাকম্মন্তস্সাপি বহুকারতা জোতিতা সিযা. ৰচীভেদনিযামিকা হি ৰচীদুচ্চরিতৰিরতি কাযিককিরিযনিযামিকায কাযদুচ্চরিতৰিরতিযা উপকারিকা. তথা হি ৰিসংৰাদনাদিমিচ্ছাৰাচতো অৰিরতো মিচ্ছাকম্মন্ততোপি ন ৰিরমতেৰ. যথাহ – ‘‘একং ধম্মং অতীতস্স…পে… নত্থি পাপং অকারিয’’ন্তি. তস্মা অৰিসংৰাদনাদিসম্মাৰাচায ঠিতো সম্মাকম্মন্তম্পি পূরেতিযেৰাতি ৰচীদুচ্চরিতৰিরতি কাযদুচ্চরিতৰিরতিযা উপকারিকা.

যস্মা আজীৰপারিসুদ্ধি নাম দুস্সীল্যপ্পহানপুব্বিকা, তস্মা সম্মাৰাচাকম্মন্তানন্তরং সম্মাআজীৰো দেসিতোতি দস্সেতুং – ‘‘চতুব্বিধং পনা’’তিআদি ৰুত্তং. এত্তাৰতাতি পরিসুদ্ধসীলাজীৰিকামত্তেন. ইদং ৰীরিযন্তি চতুসম্মপ্পধানৰীরিযং.

ৰীরিযারম্ভোপি সম্মাসতিপরিগ্গহিতো এৰ নিব্বানাৰহো, ন কেৰলোতি দস্সেতুং – ‘‘ততো’’তিআদি ৰুত্তং. সূপট্ঠিতাতি বহিদ্ধাৰিক্খেপং পহায সুট্ঠু উপট্ঠিতা কাতব্বা. সমাধিস্স উপকারধম্মা নাম যথাৰুত্তৰত্থুৰিসদকিরিযাদযো. তপ্পটিপক্খতো অনুপকারধম্মা ৰেদিতব্বা. গতিযোতি নিপ্ফত্তিযো. সমন্ৰেসিত্ৰাতি সম্মা পরিযেসিত্ৰা.

৪২৭. যথা ইত্থীসু কথা পৰত্তা অধিত্থীতি ৰুচ্চতি, এৰং অত্তানং অধিকিচ্চ পৰত্তা অজ্ঝত্তং. ‘‘এৰং পৰত্তমানা মযং ‘অত্তা’তি গহণং গমিস্সামা’’তি ইমিনা ৰিয অধিপ্পাযেন অত্তানং অধিকিচ্চ উদ্দিস্স পৰত্তা সত্তসন্ততিপরিযাপন্না অজ্ঝত্তং. তস্মিং অজ্ঝত্তরূপে, অত্তনো কেসাদিৰত্থুকে কসিণরূপেতি অত্থো. পরিকম্মৰসেন অজ্ঝত্তংরূপসঞ্ঞীতি পরিকম্মকরণৰসেন অজ্ঝত্তং রূপসঞ্ঞী, ন অপ্পনাৰসেন. ন হি পটিভাগনিমিত্তারম্মণা অপ্পনা অজ্ঝত্তৰিসযা সম্ভৰতি. তং পন অজ্ঝত্তং পরিকম্মৰসেন লদ্ধং কসিণনিমিত্তং অৰিসুদ্ধমেৰ হোতি, ন বহিদ্ধা পরিকম্মৰসেন লদ্ধং ৰিয ৰিসুদ্ধং. তেনাহ – ‘‘তং পনা’’তিআদি.

যস্সেৰং পরিকম্মং অজ্ঝত্তং উপ্পন্নন্তি যস্স পুগ্গলস্স এৰং ৰুত্তপ্পকারেন অজ্ঝত্তং পরিকম্মং জাতং. নিমিত্তং পন বহিদ্ধাতি পটিভাগনিমিত্তং সসন্ততিপরিযাপন্নং ন হোতীতি বহিদ্ধা. পরিত্তানীতি যথালদ্ধানি সুপ্পসরাৰমত্তানি. তেনাহ – ‘‘অৰড্ঢিতানী’’তি. পরিত্তৰসেনেৰাতি ৰণ্ণৰসেন আভোগে ৰিজ্জমানেপি পরিত্তৰসেনেৰ ইদং অভিভাযতনং ৰুত্তং পরিত্ততা হেত্থ অভিভৰনস্স কারণং. ৰণ্ণাভোগে সতিপি অসতিপি অভিভৰতীতি অভিভু, পরিকম্মং, ঞাণং ৰা. অভিভু আযতনং এতস্সাতি অভিভাযতনং, ঝানং. অভিভৰিতব্বং ৰা আরম্মণসঙ্খাতং আযতনং এতস্সাতি অভিভাযতনং. অথ ৰা আরম্মণাভিভৰনতো অভিভু চ তং আযতনঞ্চ যোগিনো সুখৰিসেসানং অধিট্ঠানভাৰতো মনাযতনধম্মাযতনভাৰতো চাতি সসম্পযুত্তজ্ঝানং অভিভাযতনং. অভিভাযতনভাৰনা নাম তিক্খপঞ্ঞস্সেৰ সম্ভৰতি, ন ইতরস্সাতি আহ – ‘‘ঞাণুত্তরিকো পুগ্গলো’’তি. অভিভৰিত্ৰা সমাপজ্জতীতি এত্থ অভিভৰনং সমাপজ্জনঞ্চ উপচারজ্ঝানাধিগমনসমনন্তরমেৰ অপ্পনাঝানুপ্পাদনন্তি আহ – ‘‘সহ নিমিত্তুপ্পাদেনেৰেত্থ অপ্পনং পাপেতী’’তি. সহ নিমিত্তুপ্পাদেনাতি চ অপ্পনাপরিৰাসাভাৰস্স লক্খণৰচনমেতং. যো খিপ্পাভিঞ্ঞোতি ৰুচ্চতি, ততোপি ঞাণুত্তরস্সেৰ অভিভাযতনভাৰনা. এত্থাতি এতস্মিং নিমিত্তে. অপ্পনং পাপেতীতি ভাৰনাঅপ্পনং নেতি.

এত্থ চ কেচি ‘‘উপ্পন্নে উপচারজ্ঝানে তং আরব্ভ যে হেট্ঠিমন্তেন দ্ৰে তযো জৰনৰারা পৰত্তন্তি, তে উপচারজ্ঝানপক্খিকা এৰ, তদনন্তরং ভৰঙ্গপরিৰাসেন উপচারসেৰনায চ ৰিনা অপ্পনা হোতি, সহ নিমিত্তুপ্পাদেনেৰ অপ্পনং পাপেতী’’তি ৰদন্তি, তং তেসং মতিমত্তং. ন হি পারিৰাসিকপরিকম্মেন অপ্পনাৰারো ইচ্ছিতো, নাপি মহগ্গতপ্পমাণজ্ঝানেসু ৰিয উপচারজ্ঝানে একন্ততো পচ্চৰেক্খণা ইচ্ছিতব্বা. তস্মা উপচারজ্ঝানাধিগমতো পরং কতিপযভৰঙ্গচিত্তাৰসানে অপ্পনং পাপুণন্তো ‘‘সহ নিমিত্তুপ্পাদেনেৰেত্থ অপ্পনং পাপেতী’’তি ৰুত্তো. সহ নিমিত্তুপ্পাদেনাতি চ অধিপ্পাযিকমিদং ৰচনং, ন নীতত্থং, তত্থ অধিপ্পাযো ৰুত্তনযেনেৰ ৰেদিতব্বো. ন অন্তোসমাপত্তিযং তদা তথারূপস্স আভোগস্স অসম্ভৰতো. সমাপত্তিতো ৰুট্ঠিতস্স আভোগো পুব্বভাগভাৰনাৰসেন ঝানক্খণে পৰত্তং অভিভৰনাকারং গহেত্ৰা পৰত্তোতি দট্ঠব্বং. অভিধম্মট্ঠকথাযং পন ‘‘ইমিনাস্স পুব্বাভোগো কথিতো’’তি ৰুত্তং. অন্তোসমাপত্তিযং তদা তথা আভোগাভাৰে কস্মা ঝানসঞ্ঞাযপীতি ৰুত্তন্তি আহ – ‘‘অভিভৰসঞ্ঞা হিস্স অন্তোসমাপত্তিযম্পি অত্থী’’তি.

ৰড্ঢিতপ্পমাণানীতি ৰিপুলপ্পমাণানীতি অত্থো, ন একঙ্গুলদ্ৰঙ্গুলাদিৰড্ঢিং পাপিতানি তথা ৰড্ঢনস্সেৰেত্থ অসম্ভৰতো. তেনাহ – ‘‘মহন্তানী’’তি. ভত্তৰড্ঢিতকন্তি ভুঞ্জনভাজনে ৰড্ঢেত্ৰা দিন্নং ভত্তং, একাসনে পুরিসেন ভুঞ্জিতব্বভত্ততো উপড্ঢভত্তন্তি অত্থো.

রূপে সঞ্ঞা রূপসঞ্ঞা, সা অস্স অত্থীতি রূপসঞ্ঞী, ন রূপসঞ্ঞী অরূপসঞ্ঞী. সঞ্ঞাসীসেন ঝানং ৰদতি. রূপসঞ্ঞায অনুপ্পাদনমেৰেত্থ অলাভিতা. বহিদ্ধাৰ উপ্পন্নন্তি বহিদ্ধাৰত্থুস্মিংযেৰ উপ্পন্নং. এত্থ চ –

‘‘অজ্ঝত্তং রূপসঞ্ঞী বহিদ্ধা রূপানি পস্সতি পরিত্তানি সুৰণ্ণদুব্বণ্ণানি. অজ্ঝত্তং রূপসঞ্ঞী বহিদ্ধা রূপানি পস্সতি অপ্পমাণানি সুৰণ্ণদুব্বণ্ণানি. অজ্ঝত্তং অরূপসঞ্ঞী বহিদ্ধা রূপানি পস্সতি পরিত্তানি সুৰণ্ণদুব্বণ্ণানি. অজ্ঝত্তং অরূপসঞ্ঞী বহিদ্ধা রূপানি পস্সতি অপ্পমাণানি সুৰণ্ণদুব্বণ্ণানী’’তি (দী. নি. ৩.৩৩৮, ৩৫৮; অ. নি. ৮.৬৫; ১০.২৯) –

এৰমিধ চত্তারি অভিভাযতনানি আগতানি. অভিধম্মে (ধ. স. ২৪৪-২৪৫) পন ‘‘অজ্ঝত্তং অরূপসঞ্ঞী বহিদ্ধা রূপানি পস্সতি পরিত্তানি সুৰণ্ণদুব্বণ্ণানি, অপ্পমাণানি সুৰণ্ণদুব্বণ্ণানী’’তি এৰমাগতানি. তত্থ চ কারণং অভিধম্মট্ঠকথাযং ৰুত্তমেৰ. তথা হি ৰুত্তং অট্ঠসালিনিযং (ধ. স. অট্ঠ. ২০৪) –

‘‘কস্মা পন যথা সুত্তন্তে ‘অজ্ঝত্তং রূপসঞ্ঞী একো বহিদ্ধা রূপানি পস্সতি পরিত্তানী’তিআদি ৰুত্তং, এৰং অৰত্ৰা ইধ চতূসুপি অভিভাযতনেসু অজ্ঝত্তং অরূপসঞ্ঞিতাৰ ৰুত্তাতি. অজ্ঝত্তরূপানং অনভিভৰনীযতো. তত্থ ৰা হি ইধ ৰা বহিদ্ধা রূপানেৰ অভিভৰিতব্বানি, তস্মা তানি নিযমতো ৰত্তব্বানী’’তি.

তত্রাপি ইধপি ৰুত্তানি ‘‘অজ্ঝত্তং রূপসঞ্ঞী অজ্ঝত্তং অরূপসঞ্ঞীতি ইদং পন সত্থু দেসনাৰিলাসমত্তমেৰা’’তি. অযং পনেত্থ অধিপ্পাযো – ইধ ৰণ্ণাভোগরহিতানি সহিতানি চ সব্বানি পরিত্তানি সুৰণ্ণদুব্বণ্ণানি অভিভুয্যাতি. পরিযাযকথা হি সুত্তন্তদেসনাতি. অভিধম্মে পন নিপ্পরিযাযদেসনত্তা ৰণ্ণাভোগরহিতানি ৰিসুং ৰুত্তানি, তথা সহিতানি. অত্থি হি উভযত্থ অভিভৰনৰিসেসোতি. তথা ইধ পরিযাযদেসনত্তা ৰিমোক্খানম্পি অভিভৰনপরিযাযো অত্থীতি ‘‘অজ্ঝত্তং রূপসঞ্ঞী’’তিআদিনা পঠমদুতিযঅভিভাযতনেসু পঠমৰিমোক্খো, ততিযচতুত্থঅভিভাযতনেসু দুতিযৰিমোক্খো, ৰণ্ণাভিভাযতনেসু ততিযৰিমোক্খো চ অভিভৰনপত্তিতো সঙ্গহিতো. অভিধম্মে পন নিপ্পরিযাযদেসনত্তা ৰিমোক্খাভিভাযতনানি অসঙ্করতো দেসেতুং ৰিমোক্খে ৰজ্জেত্ৰা অভিভাযতনানি কথিতানি. সব্বানি চ ৰিমোক্খকিচ্চানি ঝানানি ৰিমোক্খদেসনাযং ৰুত্তানি. তদেতং ‘‘অজ্ঝত্তং রূপসঞ্ঞী’’তি আগতস্স অভিভাযতনদ্ৰযস্স অভিধম্মে অভিভাযতনেসু অৰচনতো ‘‘রূপী রূপানি পস্সতী’’তিআদীনঞ্চ সব্বৰিমোক্খকিচ্চসাধারণৰচনভাৰতো ৰৰত্থানং কতন্তি ৰিঞ্ঞাযতি.

অজ্ঝত্তরূপানং অনভিভৰনীযতোতি ইদং অভিধম্মে কত্থচিপি ‘‘অজ্ঝত্তরূপানি পস্সতী’’তি অৰত্ৰা সব্বত্থ যং ৰুত্তং – ‘‘বহিদ্ধা রূপানি পস্সতী’’তি, তস্স কারণৰচনং. তেন যং অঞ্ঞহেতুকং সুত্তন্তে ‘‘বহিদ্ধা রূপানি পস্সতী’’তি ৰচনং, তং তেন হেতুনা ৰুত্তং. যং পন দেসনাৰিলাসহেতুকং অজ্ঝত্তং অরূপসঞ্ঞিতায এৰ অভিধম্মে ৰচনং, ন তস্স অঞ্ঞং কারণং মগ্গিতব্বন্তি দস্সেতি. অজ্ঝত্তরূপানং অনভিভৰনীযতা চ তেসং বহিদ্ধারূপানং ৰিয অৰিভূতত্তা. দেসনাৰিলাসো চ যথাৰুত্তৰৰত্থানৰসেন ৰেদিতব্বো ৰেনেয্যজ্ঝাসযৰসেন ৰিজ্জমানপরিযাযকথনভাৰতো. দেসনাৰিলাসো হি নাম ৰেনেয্যজ্ঝাসযানুরূপং ৰিজ্জমানস্স চ পরিযাযস্স ৰিভাৰনং, ন যস্স কস্সচি, তস্মা ‘‘ইধ পরিযাযদেসনত্তা’’তিআদিনা ৰুত্তপ্পকারং ৰৰত্থানং দেসনাৰিলাসনিবন্ধনন্তি দট্ঠব্বং.

সুৰণ্ণদুব্বণ্ণানীতি এতেনেৰ সিদ্ধত্তা ন নীলাদিঅভিভাযতনানি ৰত্তব্বানীতি চে? ন নীলাদীসু কতাধিকারানং নীলাদিভাৰস্সেৰ অভিভৰনকারণত্তা. ন হি তেসং পরিসুদ্ধাপরিসুদ্ধৰণ্ণানং পরিত্ততা অপ্পমাণতা ৰা অভিভৰনকারণং, অথ খো নীলাদিভাৰো এৰাতি. এতেসু চ পরিত্তাদিকসিণরূপেসু যংযংচরিতস্স ইমানি অভিভাযতনানি ইজ্ঝন্তি, তং দস্সেতুং – ‘‘ইমেসু পনা’’তিআদি ৰুত্তং.

সব্বসঙ্গাহিকৰসেনাতি নীলৰণ্ণনীলনিদস্সননীলনিভাসানং সাধারণৰসেন. ৰণ্ণৰসেনাতি সভাৰৰণ্ণৰসেন. নিদস্সনৰসেনাতি পস্সিতব্বতাৰসেন, চক্খুৰিঞ্ঞাণৰীথিযা গহেতব্বতাৰসেন. ওভাসৰসেনাতি সপ্পভাসতায অৰভাসনৰসেন. ৰণ্ণধাতুযা ৰাতি অঞ্জনরজতৰত্থাদিৰণ্ণধাতুযা. লোকিযানেৰ রূপাৰচরজ্ঝানভাৰতো.

৪৩৫. রূপীতি এত্থ যেনাযং সসন্ততিপরিযাপন্নেন রূপেন সমন্নাগতো, তং যস্স ঝানস্স হেতুভাৰেন ৰিসিট্ঠরূপং হোতি. যেন ৰিসিট্ঠেন রূপীতি ৰুচ্চেয্য, তদেৰ সসন্ততিপরিযাপন্নরূপনিমিত্তং ঝানং. ইধ পন পরমত্থতো রূপিভাৰসাধকন্তি আহ – ‘‘অজ্ঝত্তং কেসাদীসূ’’তিআদি. রূপজ্ঝানং রূপন্তি উত্তরপদলোপেন ৰুত্তং – ‘‘রূপূপপত্তিযা’’তিআদীসু (ধ. স. ১৬০-১৬১, ১৮৫-১৯০ আদযো, ২৪৪-২৪৫ আদযো; ৰিভ. ৬২৫) ৰিয.

সুভন্ত্ৰেৰ অধিমুত্তো হোতীতি অযং ততিযৰিমোক্খো. ইধ সুপরিসুদ্ধনীলাদিৰণ্ণকসিণজ্ঝানৰসেন ৰুত্তোতি দস্সেত্ৰা ইদানি পটিসম্ভিদাপাল়িযং তস্স ব্রহ্মৰিহারজ্ঝানৰসেন আগতভাৰং দস্সেতুং – ‘‘পটিসম্ভিদামগ্গে পনা’’তিআদি আরদ্ধং. ইধ পন উপরিপাল়িযংযেৰ ব্রহ্মৰিহারানং আগতত্তা তং নযং পটিক্খিপিত্ৰা পরিসুদ্ধনীলাদিৰণ্ণকসিণৰসেনেৰ সুভৰিমোক্খো অনুঞ্ঞাতো.

৪৪৩. পরিকম্মপথৰিযাপীতি অকতায ৰা কতায ৰা দল়্হমণ্ডলাদিসঙ্খাতপরিকম্মপথৰিযাপি. উগ্গহনিমিত্তাদীনং পথৰীকসিণন্তি নামং নিস্সিতে নিস্সযৰোহারৰসেন ৰুত্তন্তি দট্ঠব্বং, যথা ‘‘মঞ্চা উক্কুট্ঠিং করোন্তী’’তি.

সীলানীতি পাতিমোক্খসংৰরাদীনি চত্তারি সীলানি. সোধেত্ৰাতি অনাপজ্জনেন আপন্নৰুট্ঠাপনেন কিলেসেহি অপ্পটিপীল়নেন চ ৰিসোধেত্ৰা. তিৰিধঞ্হি সীলস্স ৰিসোধনং নাম – অনাপজ্জনং আপন্নৰুট্ঠাপনং কিলেসেহি চ অপ্পটিপীল়নন্তি. কম্মট্ঠানভাৰনং পরিবুন্ধেতি উপরোধেতি পৰত্তিতুং ন দেতীতি পলিবোধো রকারস্স লকারং কত্ৰা, পরিবন্ধোতি অত্থো. উপচ্ছিন্দিত্ৰাতি সমাপন্নেন সঙ্গাহণেন ৰা উপরুন্ধিত্ৰা, অপলিবোধং কত্ৰাতি অত্থো. কল্যাণমিত্তং উপসঙ্কমিত্ৰাতি –

‘‘পিযো গরু ভাৰনীযো, ৰত্তা চ ৰচনক্খমো;

গম্ভীরঞ্চ কথং কত্তা, নো চট্ঠানে নিযোজকো’’তি. (অ. নি. ৭.৩৭) –

এৰমাদিগুণসমন্নাগতং একন্তহিতেসিং ৰুদ্ধিপক্খে ঠিতং কল্যাণমিত্তং উপসঙ্কমিত্ৰা.

অননুরূপং ৰিহারন্তি অট্ঠারসন্নং দোসানং অঞ্ঞতরেন সমন্নাগতং. ৰুত্তঞ্হেতং অট্ঠকথাসু –

‘‘মহাৰাসং নৰাৰাসং, জরাৰাসঞ্চ পন্থনিং;

সোণ্ডিং পণ্ণঞ্চ পুপ্ফঞ্চ, ফলং পত্থিতমেৰ চ.

‘‘নগরং দারুনা খেত্তং, ৰিসভাগেন পট্টনং;

পচ্চন্তসীমা সপ্পাযং, যত্থ মিত্তো ন লব্ভতি.

‘‘অট্ঠারসেতানি ঠানানি, ইতি ৰিঞ্ঞায পণ্ডিতো;

আরকা পরিৰজ্জেয্য, মগ্গং সপ্পটিভযং যথা’’তি. (ৰিসুদ্ধি. ১.৫২);

অনুরূপেতি গোচরগামতো নাতিদূরনচ্চাসন্নতাদীহি পঞ্চহি অঙ্গেহি সমন্নাগতে. ৰুত্তঞ্হেতং ভগৰতা –

‘‘কথঞ্চ, ভিক্খৰে, সেনাসনং পঞ্চঙ্গসমন্নাগতং হোতি? ইধ, ভিক্খৰে, সেনাসনং নাতিদূরং হোতি নচ্চাসন্নং গমনাগমনসম্পন্নং দিৰা অপ্পাকিণ্ণং রত্তিং অপ্পসদ্দং অপ্পনিগ্ঘোসং অপ্পডংসমকসৰাতাতপসরীসপসম্ফস্সং. তস্মিং খো পন সেনাসনে ৰিহরন্তস্স অপ্পকসিরেন উপ্পজ্জন্তি চীৰরপিণ্ডপাতসেনাসনগিলানপচ্চযভেসজ্জপরিক্খারা. তস্মিং খো পন সেনাসনে থেরা ভিক্খূ ৰিহরন্তি বহুস্সুতা আগতাগমা ধম্মধরা ৰিনযধরা মাতিকাধরা. তে কালেন কালং উপসঙ্কমিত্ৰা পরিপুচ্ছতি পরিপঞ্হতি ‘ইদং, ভন্তে, কথং ইমস্স কো অত্থো’তি. তস্স তে আযস্মন্তো অৰিৰটঞ্চেৰ ৰিৰরন্তি, অনুত্তানীকতঞ্চ উত্তানিং করোন্তি, অনেকৰিহিতেসু চ কঙ্খাঠানিযেসু ধম্মেসু কঙ্খং পটিৰিনোদেন্তি. এৰং খো, ভিক্খৰে, সেনাসনং পঞ্চঙ্গসমন্নাগতং হোতী’’তি (অ. নি. ১০.১১).

এত্থ চ নাতিদূরং নচ্চাসন্নং গমনাগমনসম্পন্নন্তি একং অঙ্গং, দিৰা অপ্পাকিণ্ণং রত্তিং অপ্পসদ্দং অপ্পনিগ্ঘোসন্তি একং, অপ্পডংসমকসৰাতাতপসরীসপসম্ফস্সন্তি একং, তস্মিং খো পন সেনাসনে ৰিহরন্তস্স…পে… পরিক্খারাতি একং, তস্মিং খো পন সেনাসনে থেরা…পে… কঙ্খং পটিৰিনোদেন্তীতি একন্তি এৰং পঞ্চঙ্গানি ৰেদিতব্বানি.

খুদ্দকপলিবোধং উপচ্ছিন্দিত্ৰাতি দীঘকেসনখলোমানং ছেদনেন চীৰরকম্মচীৰররজনপত্তপচনমঞ্চপীঠাদিসোধনৰসেন খুদ্দকপলিবোধং উপচ্ছিন্দিত্ৰা.

৪৫৩. উদ্ধুমাতকাদীসূতি এত্থ আদি-সদ্দেন ৰিনীলকৰিপুব্বকৰিচ্ছিদ্দকৰিক্খাযিতকহতৰিক্খিত্তকলোহিতকপুল়ৰকঅট্ঠিকানং সঙ্গহো দট্ঠব্বো. তত্থ ভস্তা ৰিয ৰাযুনা উদ্ধং জীৰিতপরিযাদানা যথানুক্কমং সমুগ্গতেন সূনভাৰেন ধুমাতত্তা উদ্ধুমাতং, উদ্ধুমাতমেৰ উদ্ধুমাতকং, পটিকূলত্তা ৰা কুচ্ছিতং উদ্ধুমাতন্তি উদ্ধুমাতকং, তথারূপস্স ছৰসরীরস্সেতং অধিৰচনং. ৰিনীলং ৰুচ্চতি ৰিপরিভিন্ননীলৰণ্ণং, ৰিনীলমেৰ ৰিনীলকং, পটিকূলত্তা ৰা কুচ্ছিতং ৰিনীলন্তি ৰিনীলকং, মংসুস্সদট্ঠানেসু রত্তৰণ্ণস্স, পুব্বসন্নিচযট্ঠানেসু সেতৰণ্ণস্স, যেভুয্যেন চ নীলৰণ্ণস্স নিলট্ঠানে নীলসাটকপারুতস্সেৰ ছৰসরীরস্সেতং অধিৰচনং. পরিভিন্নট্ঠানেসু ৰিস্সন্দমানপুব্বং ৰিপুব্বং, ৰিপুব্বমেৰ ৰিপুব্বকং, পটিকূলত্তা ৰা কুচ্ছিতং ৰিপুব্বন্তি ৰিপুব্বকং, তথারূপস্স ছৰসরীরস্সেতং অধিৰচনং. ৰিচ্ছিদ্দং ৰুচ্চতি দ্ৰিধা ছিন্দনেন অপধারিতং, ৰিচ্ছিদ্দমেৰ ৰিচ্ছিদ্দকং, পটিকূলত্তা ৰা কুচ্ছিতং ৰিচ্ছিদ্দন্তি ৰিচ্ছিদ্দকং, ৰেমজ্ঝে ছিন্নস্স ছৰসরীরস্সেতং অধিৰচনং. ইতো চ এত্তো চ ৰিৰিধাকারেন সোণসিঙ্গালাদীহি খাযিতং ৰিক্খাযিতং, ৰিক্খাযিতমেৰ ৰিক্খাযিতকং, পটিকূলত্তা ৰা কুচ্ছিতং ৰিক্খাযিতন্তি ৰিক্খাযিতকং, তথারূপস্স ছৰসরীরস্সেতং অধিৰচনং.

ৰিৰিধা খিত্তং ৰিক্খিত্তং, ৰিক্খিত্তমেৰ ৰিক্খিত্তকং, পটিকূলত্তা ৰা কুচ্ছিতং ৰিক্খিত্তন্তি ৰিক্খিত্তকং, অঞ্ঞেন হত্থং, অঞ্ঞেন পাদং, অঞ্ঞেন সীসন্তি এৰং ততো ততো ৰিক্খিত্তস্স ছৰসরীরস্সেতং অধিৰচনং. হতঞ্চ তং পুরিমনযেনেৰ ৰিক্খিত্তকঞ্চাতি হতৰিক্খিত্তকং, কাকপদাকারেন অঙ্গপচ্চঙ্গেসু সত্থেন হনিত্ৰা ৰুত্তনযেনেৰ ৰিক্খিত্তস্স ছৰসরীরস্সেতং অধিৰচনং. লোহিতং কিরতি ৰিক্খিপতি ইতো চিতো চ পগ্ঘরতীতি লোহিতকং, পগ্ঘরিতলোহিতমক্খিতস্স ছৰসরীরস্সেতং অধিৰচনং. পুল়ৰা ৰুচ্চন্তি কিমযো, পুল়ৰে কিরতীতি পুল়ৰকং, কিমিপরিপুণ্ণস্স ছৰসরীরস্সেতং অধিৰচনং. অট্ঠিযেৰ অট্ঠিকং, পটিকূলত্তা ৰা কুচ্ছিতং অট্ঠীতি অট্ঠিকং, অট্ঠিসঙ্খলিকাযপি একট্ঠিকস্সপি এতং অধিৰচনং. ইমেসু দসসু অসুভেসু পঠমজ্ঝানমেৰ উপ্পজ্জতি, ন দুতিযাদীনি. তেনাহ – ইধ ‘‘পঠমজ্ঝানসহগতা সঞ্ঞা’’তি. তথা হি অপরিসণ্ঠিতজলায সীঘসোতায নদিযা অরিত্তবলেনেৰ নাৰা তিট্ঠতি, ৰিনা অরিত্তেন ন সক্কা ঠপেতুং. এৰমেৰং দুব্বলত্তা আরম্মণস্স ৰিতক্কবলেনেৰ চিত্তং একগ্গং হুত্ৰা তিট্ঠতি, ৰিনা ৰিতক্কেন ন সক্কা ঠপেতুং. তস্মা পঠমজ্ঝানমেৰেত্থ হোতি, ন দুতিযাদীনি. আরম্মণস্স দুব্বলতা চেত্থ পটিকূলভাৰেন চিত্তং ঠপেতুং অসমত্থতা.

‘‘রুক্খো মতো, লোহং মত’’ন্তিআদীসু যং খন্ধপ্পবন্ধং উপাদায রুক্খাদিসমঞ্ঞা, তস্মিং অনুপচ্ছিন্নেপি অল্লতাদিৰিগমনং নিস্সায মতৰোহারো সম্মুতিমরণং. সঙ্খারানং খণভঙ্গসঙ্খাতং খণিকমরণং. সমুচ্ছেদমরণন্তি অরহতো সন্তানস্স সব্বসো উচ্ছেদভূতং মরণং. ৰিপস্সনাভাৰনাৰসেন চেতং ৰুত্তং. মরণানুস্সতিভাৰনাযং পন তিৰিধম্পেতং নাধিপ্পেতং অসংৰেগৰত্থুতো অনুপট্ঠহনতো অবাহুল্লতো চ. মরণানুস্সতিযঞ্হি একেন ভৰেন পরিচ্ছিন্নস্স জীৰিতিন্দ্রিযপ্পবন্ধস্স ৰিচ্ছেদো মরণন্তি অধিপ্পেতো সংৰেগৰত্থুতো উপট্ঠহনতো বাহুল্লতো চ. ইদানি ইমমেৰ মরণং সন্ধায ৰিকপ্পন্তরং দস্সেন্তো, ‘‘হেট্ঠা ৰুত্তলক্খণা ৰা’’তিআদিমাহ.

অসিতপীতাদিভেদেতি অসিতপীতখাযিতসাযিতপ্পভেদে, অসিতব্বখাদিতব্বসাযিতব্বৰিভাগেতি অত্থো কালভেদৰচনিচ্ছায অভাৰতো যথা ‘‘দুদ্ধ’’ন্তি. কবল়ং করীযতীতি কবল়ীকারো, আহরীযতীতি আহারো, কবল়ীকারো চ সো আহারো চাতি কবল়ীকারাহারো. ৰত্থুৰসেন চেতং ৰুত্তং. সৰত্থুকো এৰ হি আহারো ইধ কম্মট্ঠানভাৰেন অধিপ্পেতো. ওজালক্খণো পন আহারো ওজট্ঠমকং রূপং আহরতীতি আহারোতি ৰুচ্চতি. সো ইধ নাধিপ্পেতো পটিকূলাকারগ্গহণস্স অসম্ভৰতো. নৰ পটিকূলানীতি গমনপরিযেসনপরিভোগাসযনিদানঅপরিপক্কপরিপক্কফলনিস্সন্দপ্পটিকূলৰসেন নৰ পটিকূলানি. সমক্খনপ্পটিকূলং পন পরিভোগাদীসু লব্ভমানত্তা ইধ ৰিসুং ন গহিতং, অঞ্ঞথা তেন সদ্ধিং ‘‘দস পটিকূলানী’’তি ৰত্তব্বং. ৰিসুদ্ধিমগ্গে (ৰিসুদ্ধি. ১.৩০৩-৩০৪) পন সমক্খনং পরিভোগাদীসু লব্ভমানম্পি নিস্সন্দৰসেন ৰিসেসতো পটিকূলন্তি ৰিসুং গহেত্ৰা দসহাকারেহি পটিকূলতা ৰুত্তা.

উপ্পজ্জনকসঞ্ঞন্তি পটিকূলাকারগ্গহণৰসেন উপ্পজ্জনকসঞ্ঞং. সঞ্ঞাসদ্দো চাযং ‘‘রূপসঞ্ঞা সদ্দসঞ্ঞা’’তিআদীসু (সং. নি. ৩.৫৭) সঞ্জাননলক্খণে ধম্মে আগতো, ‘‘অনিচ্চসঞ্ঞা দুক্খসঞ্ঞা’’তিআদীসু ৰিপস্সনায আগতো, ‘‘উদ্ধুমাতকসঞ্ঞাতি ৰা সোপাকরূপসঞ্ঞাতি ৰা ইমে ধম্মা একট্ঠা, উদাহু নানট্ঠা’’তিআদীসু সমথে আগতো. ইধ পন সমথস্স পরিকম্মে দট্ঠব্বো. আহারেহি পটিকূলাকারগ্গহণং, তপ্পভাৰিতং ৰা উপচারজ্ঝানং ইধ ‘‘আহারে পটিকূলসঞ্ঞা’’তি অধিপ্পেতং.

উক্কণ্ঠিতসঞ্ঞন্তি নিব্বিন্দনাকারেন উপ্পজ্জনকসঞ্ঞং. অনিচ্চসঞ্ঞন্তি এত্থ অনিচ্চং খন্ধপঞ্চকং উপ্পাদৰযঞ্ঞথত্তভাৰতো, হুত্ৰা অভাৰতো ৰা, তস্মিং অনিচ্চে খন্ধপঞ্চকে অনিচ্চন্তি উপ্পজ্জমানা অনিচ্চলক্খণপরিগ্গাহিকা সঞ্ঞা অনিচ্চসঞ্ঞা. তেনাহ – ‘‘পঞ্চন্নং উপাদানক্খন্ধান’’ন্তিআদি. তত্থ উদযো নিব্বত্তিলক্খণং, ৰযো ৰিপরিণামলক্খণং, অঞ্ঞথত্তং জরা. উদযব্বযঞ্ঞথত্তগ্গহণেন অনিচ্চলক্খণং দস্সেতি. উপ্পাদৰযঞ্ঞথত্তভাৰতো হি খন্ধপঞ্চকং অনিচ্চন্তি ৰুচ্চতি. যস্স চ সভাৰেন খন্ধপঞ্চকং অনিচ্চন্তি ৰুচ্চতি, তং অনিচ্চলক্খণং. তেন হি তং অনিচ্চন্তি লক্খীযতি, অনিচ্চলক্খণঞ্চ উদযব্বযানং অমনসিকারা সন্ততিযা পটিচ্ছন্নত্তা ন উপট্ঠাতি, উদযব্বযং পন পরিগ্গহেত্ৰা সন্ততিযা ৰিকোপিতায অনিচ্চলক্খণং যাথাৰসরসতো উপট্ঠাতি. ন হি সম্মদেৰ উদযব্বযং সল্লক্খেন্তস্স পুব্বাপরিযেন পৰত্তমানানং ধম্মানং অঞ্ঞোঞ্ঞভাৰং সল্লক্খণেন সন্ততিযা উগ্ঘাটিতায ধম্মা সম্বন্ধভাৰেন উপট্ঠহন্তি, অথ খো অযোসলাকা ৰিয অসম্বন্ধভাৰেনাতি সুট্ঠুতরং অনিচ্চলক্খণং পাকটং হোতি.

‘‘যদনিচ্চং, তং দুক্খ’’ন্তি (সং. নি. ৩.১৫, ৪৫, ৪৬, ৭৬, ৭৭, ৮৫; ২.৪.১, ৪) ৰচনতো তদেৰ খন্ধপঞ্চকং অভিণ্হপ্পটিপীল়নতো দুক্খং, অভিণ্হপ্পটিপীল়নাকারো পন দুক্খলক্খণং. তেনেৰাহ – ‘‘অনিচ্চে খন্ধপঞ্চকে…পে… সঞ্ঞং ভাৰেতী’’তি. তত্থ পটিপীল়নং নাম যথাপরিগ্গহিতং উদযৰযৰসেন সঙ্খারানং নিরন্তরং পটিপীল়িযমানতা ৰিবাধিযমানতা. দুক্খলক্খণঞ্চ অভিণ্হসম্পটিপীল়নস্স অমনসিকারা ইরিযাপথেহি পটিচ্ছন্নত্তা ন উপট্ঠাতি, অভিণ্হসম্পটিপীল়নং পন মনসি করিত্ৰা ইরিযাপথে লব্ভমানদুক্খপ্পটিচ্ছাদকভাৰে উগ্ঘাটিতে দুক্খলক্খণং যাথাৰসরসতো উপট্ঠাতি. তথা হি ইরিযাপথেহি পটিচ্ছন্নত্তা দুক্খলক্খণং ন উপট্ঠাতি, তে চ ইরিযাপথা অভিণ্হসম্পটিপীল়নামনসিকারেন পটিচ্ছাদকা জাতা. একস্মিঞ্হি ইরিযাপথে উপ্পন্নস্স দুক্খস্স ৰিনোদকং ইরিযাপথন্তরং তস্স পটিচ্ছাদকং ৰিয হোতি, এৰং সেসাপি. ইরিযাপথানং পন তংতংদুক্খপতিতাকারভাৰে যাথাৰতো ঞাতে তেসং দুক্খপ্পটিচ্ছাদকভাৰো উগ্ঘাটিতো নাম হোতি সঙ্খারানং নিরন্তরং দুক্খাভিতুন্নতায পাকটভাৰতো. তস্মা অভিণ্হসম্পটিপীল়নং মনসি করিত্ৰা ইরিযাপথে লব্ভমানদুক্খপ্পটিচ্ছাদকভাৰে উগ্ঘাটিতে দুক্খলক্খণং যাথাৰসরসতো উপট্ঠাতি.

‘‘যং দুক্খং, তদনত্তা’’তি ৰচনতো তদেৰ খন্ধপঞ্চকং অৰসৰত্তনতো অনত্তা, অৰসৰত্তনাকারো পন অনত্তলক্খণং. তেনাহ – ‘‘পটিপীল়নট্ঠেনা’’তিআদি. অনত্তলক্খণঞ্চ নানাধাতুৰিনিব্ভোগস্স অমনসিকারা ঘনেন পটিচ্ছন্নত্তা ন উপট্ঠাতি, নানাধাতুযো পন ৰিনিব্ভুজ্জিত্ৰা ‘‘অঞ্ঞা পথৰীধাতু, অঞ্ঞা আপোধাতূ’’তিআদিনা, ‘‘অঞ্ঞো ফস্সো, অঞ্ঞা ৰেদনা’’তিআদিনা চ ৰিসুং ৰিসুং কত্ৰা ঘনৰিনিব্ভোগে কতে সমূহঘনে কিচ্চারম্মণঘনে চ ভেদিতে অনত্তলক্খণং যাথাৰসরসতো উপট্ঠাতি. যা হেসা অঞ্ঞমঞ্ঞূপত্থম্ভেসু সমুদিতেসু রূপারূপধম্মেসু একত্তাভিনিৰেসৰসেন অপরিমদ্দিতসঙ্খারেহি মমাযমানা সমূহঘনতা, তথা তেসং তেসং ধম্মানং কিচ্চভেদস্স সতিপি পটিনিযতভাৰে একতো গয্হমানা কিচ্চঘনতা, তথা সারম্মণধম্মানং সতিপি আরম্মণকরণভেদে একতো গয্হমানা আরম্মণঘনতা. সা চতূসু ধাতূসু ঞাণেন ৰিনিব্ভুজিত্ৰা দিস্সমানাসু হত্থেন পরিমদ্দিযমানো ফেণপিণ্ডো ৰিয ৰিলীনং আগচ্ছতি, যথাপচ্চযং পৰত্তমানা সুঞ্ঞা এতে ধম্মমত্তাতি অৰসৰত্তনাকারসঙ্খাতং অনত্তলক্খণং পাকটতরং হোতি.

অপরঅচ্ছরাসঙ্ঘাতৰগ্গৰণ্ণনা নিট্ঠিতা.