৮. কল্যাণমিত্তাদিৰগ্গৰণ্ণনা

৭১. অট্ঠমস্স পঠমে বুদ্ধা, সারিপুত্তাদযো ৰা কল্যাণমিত্তা. ৰুত্তপটিপক্খনযেনাতি ‘‘পাপমিত্ততা’’তি পদে ৰুত্তস্স পটিপক্খনযেন.

৭২-৭৩. দুতিযে যোগোতি সমঙ্গীভাৰো. পযোগোতি পযুঞ্জনং পটিপত্তি. অযোগোতি অসমঙ্গীভাৰো. অপ্পযোগোতি অপ্পযুঞ্জনং অপ্পটিপত্তি. অনুযোগেনাতি অনুযোগহেতু.

৭৪. চতুত্থে বুজ্ঝনকসত্তস্সাতি চতুন্নং অরিযসচ্চানং পটিৰিজ্ঝনকপুগ্গলস্স. অঙ্গভূতাতি তস্সেৰ পটিৰেধস্স কারণভূতা. এত্থ চ চত্তারি অরিযসচ্চানি বুজ্ঝতি, অঞ্ঞাণনিদ্দায ৰাপি বুজ্ঝতীতি বোধীতি লদ্ধনামো অরিযসাৰকো বুজ্ঝনকসত্তো, তস্স বুজ্ঝনকসত্তস্স. বোধিযাতি তস্সা ধম্মসামগ্গিসঙ্খাতায বোধিযা. বুজ্ঝনট্ঠেন বোধিযো, বোধিযো এৰ সচ্চসম্পটিবোধস্স অঙ্গাতি ৰুত্তং. ‘‘বুজ্ঝন্তীতি বোজ্ঝঙ্গা’’তি. ৰিপস্সনাদীনং কারণানং বুজ্ঝিতব্বানঞ্চ সচ্চানং অনুরূপং বুজ্ঝনতো অনুবুজ্ঝন্তীতি বোজ্ঝঙ্গা, পটিমুখং পচ্চক্খভাৰেন অভিমুখং বুজ্ঝনতো পটিবুজ্ঝন্তীতি বোজ্ঝঙ্গা, সম্মা অৰিপরীততো বুজ্ঝনতো সম্বুজ্ঝন্তীতি বোজ্ঝঙ্গাতি এৰং অত্থৰিসেসদীপকেহি উপসগ্গেহি অনুবুজ্ঝন্তীতিআদি ৰুত্তং. বোধিসদ্দো সব্বৰিসেসযুত্তং বুজ্ঝনসামঞ্ঞেন সঙ্গণ্হাতি. বোধায সংৰত্তন্তীতি ইমিনা তস্সা ধম্মসামগ্গিযা বুজ্ঝনস্স একন্তকারণতং দস্সেতি. এৰং পনেতং পদং ৰিভত্তমেৰাতি ৰুত্তপ্পকারেন এতং ‘‘বোজ্ঝঙ্গা’’তি (পটি. ম. ২.১৭) পদং নিদ্দেসে পটিসম্ভিদামগ্গে ৰিভত্তমেৰ.

৭৫. পঞ্চমে যাথাৰসরসভূমীতি যাথাৰতো সকিচ্চকরণভূমি. সাতি যাথাৰসরসভূমি. ৰিপস্সনাতি বলৰৰিপস্সনা. কেচি ‘‘ভঙ্গঞাণতো পট্ঠাযা’’তি ৰদন্তি. ৰিপস্সনায পাদকজ্ঝানে চ সতিআদযো বোজ্ঝঙ্গপক্খিকা এৰ পরিযাযবোধিপক্খিযভাৰতো. তত্থাতিআদি চতুব্বিধানং বোজ্ঝঙ্গানং ভূমিৰিভাগদস্সনং.

৭৬. ছট্ঠে তেসং অন্তরেতি তেসং ভিক্খূনং অন্তরে. কামং সঙ্গীতিআরুল়্হৰসেন অপ্পকমিদং সুত্তপদং, ভগৰা পনেত্থ সন্নিপতিতপরিসায অজ্ঝাসযানুরূপং ৰিত্থারিকং করোতীতি কত্ৰা ইদং ৰুত্তং – ‘‘মহতী দেসনা ভৰিস্সতী’’তি. গামনিগমাদিকথা নত্থীতি তস্সা কথায অতিরচ্ছানকথাভাৰমাহু. তথা হি সা পুব্বে বহুঞাতিকং অহোসি বহুপক্খং, ইদানি অপ্পঞাতিকং অপ্পপক্খন্তি অনিচ্চতামুখেন নিয্যানিকপক্খিকা জাতা. এতাযাতি যথাৰুত্তায পরিহানিযা. পতিকিট্ঠন্তি নিহীনং. মম সাসনেতি ইদং কম্মস্সকতজ্ঝানপঞ্ঞানম্পি ৰিসেসনমেৰ. তদুভযম্পি হি বাহিরকানং তপ্পঞ্ঞাদ্ৰযতো সাতিসযমেৰ সব্বঞ্ঞুবুদ্ধানং দেসনায লদ্ধৰিসেসতো ৰিৰট্টূপনিস্সযতো চ.

৭৭. সত্তমে তেসং চিত্তাচারং ঞত্ৰাতি তথা কথেন্তানং তেসং ভিক্খূনং তত্থ উপগমনেন অত্তনো দেসনায ভাজনভূতং চিত্তপ্পৰত্তিং ঞত্ৰা. কম্মস্সকতাদীতি আদিসদ্দেন ঝানপঞ্ঞাদীনং চতুন্নম্পি পঞ্ঞানং গহণং.

৭৮-৮০. অট্ঠমাদীসু হেট্ঠা ৰুত্তনযেনেৰাতি ‘‘যা এস মম সাসনে’’তিআদিনা হেট্ঠা ৰুত্তনযেনেৰ. সেসমেত্থ উত্তানত্থমেৰ.

কল্যাণমিত্তাদিৰগ্গৰণ্ণনা নিট্ঠিতা.

৮১-৮২. নৰমে ৰগ্গে নত্থি ৰত্তব্বং.