৭. সত্তমো পরিচ্ছেদো

ৰিপাকচিত্তপ্পৰত্তিনিদ্দেসো

৩৭৬. অনন্তঞাণেন নিরঙ্গণেন,

গুণেসিনা কারুণিকেন তেন;

ৰুত্তে ৰিপাকে মতিপাটৰত্থং,

ৰিপাকচিত্তপ্পভৰং সুণাথ.

৩৭৭. একূনতিংস কম্মানি, পাকা দ্ৰত্তিংস দস্সিতা;

তীসু দ্ৰারেসু কম্মানি, ৰিপাকা ছসু দিস্সরে.

৩৭৮. কুসলং কামলোকস্মিং, পৰত্তে পটিসন্ধিযং;

তং তং পচ্চযমাগম্ম, দদাতি ৰিৰিধং ফলং.

৩৭৯. একায চেতনাযেকা, পটিসন্ধি পকাসিতা;

নানাকম্মেহি নানা চ, ভৰন্তি পটিসন্ধিযো.

৩৮০. তিহেতুকং তু যং কম্মং, কামাৰচরসঞ্ঞিতং;

তিহেতুকং দুহেতুঞ্চ, ৰিপাকং দেত্যহেতুকং.

৩৮১. দুহেতুকং তু যং কম্মং, তং ন দেতি তিহেতুকং;

দুহেতুকমহেতুঞ্চ, ৰিপাকং দেতি অত্তনো.

৩৮২. তিহেতুকেন কম্মেন,

পটিসন্ধি তিহেতুকা;

দুহেতুকাপি হোতেৰ,

ন চ হোতি অহেতুকা.

৩৮৩. দুহেতুকেন কম্মেন,

পটিসন্ধি দুহেতুকা;

অহেতুকাপি হোতেৰ,

ন চ হোতি তিহেতুকা.

৩৮৪. অসঙ্খারমসঙ্খারং, সসঙ্খারম্পি দেতি হি;

সসঙ্খারমসঙ্খারং, সসঙ্খারং ফলং তথা.

৩৮৫. একায চেতনাযেত্থ, কুসলস্স চ সোল়স;

ৰিধা ৰিপাকচিত্তানি, ভৰন্তীতি পকাসযে.

৩৮৬. আরম্মণেন হোতেৰ, ৰেদনাপরিৰত্তনং;

তদারম্মণচিত্তম্পি, জৰনেন নিযামিতং.

৩৮৭. কামাৰচরচিত্তেন, কুসলেনাদিনা পন;

তুল্যেন পাকচিত্তেন, গহিতা পটিসন্ধি চে.

৩৮৮. বলৰারম্মণে ইট্ঠে, চক্খুস্সাপাথমাগতে;

মনোধাতু ভৰঙ্গস্মিং, তায আৰট্টিতে পন.

৩৮৯. ৰীথিচিত্তেসু জাতেসু, চক্খুৰিঞ্ঞাণকাদিসু;

জাযতে জৰনং হুত্ৰা, পঠমং কামমানসং.

৩৯০. সত্তক্খত্তুং জৰিত্ৰান, পঠমে কুসলে গতে;

তদেৰারম্মণং কত্ৰা, তেনেৰ সদিসং পুন.

৩৯১. ৰিপাকং জাযতে চিত্তং, তদারম্মণসঞ্ঞিতং;

সন্ধিযা তুল্যতো মূল-ভৰঙ্গন্তি পৰুচ্চতে.

৩৯২. তঞ্চ সন্তীরণং এত্থ, দস্সনং সম্পটিচ্ছনং;

গণনূপগচিত্তানি, চত্তারেৰ ভৰন্তি হি.

৩৯৩. যদা হি দুতিযং চিত্তং, কুসলং জৰনং তদা;

তেন তুল্যৰিপাকম্পি, তদারম্মণকং সিযা.

৩৯৪. সন্ধিযা অসমানত্তা, দ্ৰে নামানিস্স লব্ভরে;

‘‘আগন্তুকভৰঙ্গ’’ন্তি, ‘‘তদারম্মণক’’ন্তি চ.

৩৯৫. যদা হি ততিযং পুঞ্ঞং, জৰনং হোতি তেন চ;

সদিসং ততিযং পাকং, তদারম্মণকং সিযা.

৩৯৬. ‘‘আগন্তুকভৰঙ্গ’’ন্তি, ইদম্পি চ পৰুচ্চতি;

ইমিনা পন সদ্ধিং ছ, পুরিমানি চ পঞ্চপি.

৩৯৭. যদা চতুত্থং কুসলং, জৰনং হোতি তেন চ;

তুল্যং চতুত্থং পাকং তু, তদারম্মণতং ৰজে.

৩৯৮. আগন্তুকভৰঙ্গং তু, তদারম্মণনামকং;

পুরিমানি ছ পাকানি, ইমিনা হোন্তি সত্ত তু.

৩৯৯. তস্মিং দ্ৰারে যদা ইট্ঠ-মজ্ঝত্তারম্মণং পন;

আগচ্ছতি তদাপাথং, তদা ৰুত্তনযেনিধ.

৪০০. আরম্মণৰসেনেৰ, ৰেদনা পরিৰত্ততি;

উপেক্খাসহিতং তস্মা, হোতি সন্তীরণং মনো.

৪০১. উপেক্খাসহিতেস্ৰেৰ, জৰনেসু চতূসুপি;

তেহি তুল্যানি চত্তারি, পাকচিত্তানি জাযরে.

৪০২. ৰেদনাযাসমানত্তা, অচ্চন্তং পুরিমেহি তু;

হোন্তি পিট্ঠিভৰঙ্গানি, চত্তারীতি চ নামতো.

৪০৩. পঞ্চিমানি ৰিপাকানি, পুরিমেহি চ সত্তহি;

সদ্ধিং দ্ৰাদস পাকানি, ভৰন্তীতি ৰিনিদ্দিসে.

৪০৪. চক্খুদ্ৰারে তথা এৰং, সোতাদীস্ৰপি নিদ্দিসে;

দ্ৰাদস দ্ৰাদস পাকা, সমসট্ঠি ভৰন্তিমে.

৪০৫. একায চেতনাযেৰ, কম্মে আযূহিতে পন;

সমসট্ঠি ৰিপাকানি, উপ্পজ্জন্তি ন সংসযো.

৪০৬. গহিতাগহণেনেত্থ, চক্খুদ্ৰারেসু দ্ৰাদস;

সোতৰিঞ্ঞাণকাদীনি, চত্তারীতি চ সোল়স.

৪০৭. এৰমেৰ সসঙ্খার-তিহেতুকুসলেনপি;

অসঙ্খারসসঙ্খারু-পেক্খাসহগতেহিপি.

৪০৮. কম্মে আযূহিতে তেসং, ৰিপাকেহি চ তীহিপি;

এসেৰ চ নযো তেহি, দিন্নায পটিসন্ধিযা.

৪০৯. পঠমং ইট্ঠমজ্ঝত্ত-গোচরস্স ৰসেনিধ;

পৰত্তিং পন দস্সেত্ৰা, উপেক্খাসহিতদ্ৰযে.

৪১০. দস্সেতব্বা তপ্পচ্ছা তু, ইট্ঠস্মিং গোচরে ইধ;

একেকস্মিং পন দ্ৰারে, দ্ৰাদস দ্ৰাদসেৰ তু.

৪১১. গহিতাগহণেনেত্থ, পাকচিত্তানি সোল়স;

পুব্বে ৰুত্তনযেনেৰ, ঞেয্যং সব্বমসেসতো.

৪১২. তিহেতুকেন কম্মেন, পটিসন্ধি তিহেতুকা;

ভৰতীতি অযং ৰারো, ৰুত্তো এত্তাৰতা মযা.

৪১৩. সন্ধিমেকং তু কম্মেকং, জনেতি ন ততো পরং;

অনেকানি ৰিপাকানি, সঞ্জনেতি পৰত্তিযং.

৪১৪. একস্মা হি যথা বীজা, জাযতে একমঙ্কুরং;

সুবহূনি ফলানিস্স, হোন্তি হেতুপৰত্তিতো.

৪১৫. দুহেতুকেন কম্মেন, পটিসন্ধি দুহেতুকা;

হোতীতি হি অযং ৰারো, অনুপুব্বেন আগতো.

৪১৬. দুহেতুকেন কম্মেন, সোমনস্সযুতেনিধ;

অসঙ্খারিকচিত্তেন, কম্মে আযূহিতে পন.

৪১৭. তেন তুল্যেন পাকেন, গহিতা পটিসন্ধি চে;

ইট্ঠে আরম্মণে চক্খু-দ্ৰারে আপাথমাগতে.

৪১৮. সোমনস্সযুতে ঞাণ-হীনে কুসলমানসে;

সত্তক্খত্তুং জৰিত্ৰান, গতে তস্মিং দুহেতুকে.

৪১৯. তদেৰারম্মণং কত্ৰা, জাযতে তদনন্তরং;

তংসরিক্খকমেকং তু, অসঙ্খারিকমানসং.

৪২০. তং হি মূলভৰঙ্গন্তি, তদারম্মণমিচ্চপি;

উভযম্পি চ তস্সেৰ, নামন্তি পরিদীপিতং.

৪২১. দুহেতুকসসঙ্খারে, জৰিতেপি চ তংসমং;

হোতাগন্তুকসঙ্খাতং, তদারম্মণমানসং.

৪২২. তথেৰ চ দুহেতূনং, ইট্ঠমজ্ঝত্তগোচরে;

দ্ৰিন্নং উপেক্খাযুত্তানং, জৰনানমনন্তরং.

৪২৩. দ্ৰে তাদিসানি জাযন্তে, তদারম্মণমানসা;

তেসং ‘‘পিট্ঠিভৰঙ্গ’’ন্তি, নামং ‘‘আগন্তুক’’ন্তি চ.

৪২৪. সন্তীরণদ্ৰযঞ্চেৰ, দস্সনং সম্পটিচ্ছনং;

ইমানি চ ভৰঙ্গানি, চক্খুদ্ৰারে পনট্ঠ হি.

৪২৫. এৰমট্ঠট্ঠ কত্ৰান, দ্ৰারেসুপি চ পঞ্চসু;

চত্তালীস ৰিপাকানি, ভৰন্তীতি পৰত্তিযং.

৪২৬. গহিতাগহণেনেত্থ, চক্খুদ্ৰারে পনট্ঠ চ;

সোতঘানাদিনা সদ্ধিং, দ্ৰাদসেৰ ভৰন্তি হি.

৪২৭. একায চেতনাযেৰং, কম্মে আযূহিতে পন;

দ্ৰাদসেৰ ৰিপাকানি, ভৰন্তীতি পকাসিতং.

৪২৮. দুহেতুকত্তযেনাপি, সেসেন সদিসেন তু;

পাকেনাদিন্নসন্ধিযা, অযমেৰ নযো মতো.

৪২৯. দুহেতুকেন কম্মেন, পটিসন্ধি দুহেতুকা;

হোতীতিপি অযং ৰারো, ৰুত্তো এত্তাৰতা মযা.

৪৩০. দুহেতুকেন কম্মেন, পটিসন্ধি অহেতুকা;

হোতীতি চ অযং ৰারো, অনুপুব্বেন আগতো.

৪৩১. দুহেতুকেসু চিত্তেসু, কুসলেসু চতূসুপি;

তেসু অঞ্ঞতরেনেৰ, কম্মে আযূহিতে পন.

৪৩২. তস্সেৰ পাকভূতায, আদিন্নপটিসন্ধিনো;

উপেক্খাসহিতাহেতু, মনোৰিঞ্ঞাণধাতুযা.

৪৩৩. পটিসন্ধি ন ৰত্তব্বা, সা কম্মসদিসাতি হি;

কম্মং দুহেতুকং হোতি, পটিসন্ধি অহেতুকা.

৪৩৪. তস্স বুদ্ধিমুপেতস্স, ইট্ঠমজ্ঝত্তগোচরে;

আপাথমাগতে চক্খু-দ্ৰারে পুন চ দেহিনো.

৪৩৫. দুহেতূনং চতুন্নম্পি, পুঞ্ঞানং যস্স কস্সচি;

জৰনস্সাৰসানস্মিং, অহেতুকমিদং মনো.

৪৩৬. তদারম্মণভাৰেন, জাযতে নত্থি সংসযো;

তং তু মূলভৰঙ্গঞ্চ, তদারম্মণমেৰ চ.

৪৩৭. ৰীথিচিত্তেসু জাতেসু, চক্খুৰিঞ্ঞাণকাদিসু;

উপেক্খাসহিতংযেৰ, হোতি সন্তীরণম্পি চ.

৪৩৮. তেসু একং ঠপেত্ৰান, গহিতাগহণেনিধ;

গণনূপগচিত্তানি, তীণিযেৰ ভৰন্তি হি.

৪৩৯. ইট্ঠে আরম্মণে চক্খু-দ্ৰারে আপাথমাগতে;

তদা সন্তীরণঞ্চেৰ, তদারম্মণমানসং.

৪৪০. সোমনস্সযুতংযেৰ, গহেত্ৰা তেসু এককং;

পুরিমানি চ তীণীতি, চত্তারোৰ ভৰন্তি হি.

৪৪১. এৰং চত্তারি চিত্তানি, দ্ৰারেসুপি চ পঞ্চসু;

হোন্তি ৰীসতি চিত্তানি, ৰিপাকানি পৰত্তিযং.

৪৪২. চক্খুদ্ৰারে তু চত্তারি, গহিতাগহণেনিধ;

সোতঘানাদিনা সদ্ধিং, হোতেৰাহেতুকট্ঠকং.

৪৪৩. অহেতুপটিসন্ধিস্স, ন তদারম্মণং ভৰে;

দুহেতুকং তিহেতুং ৰা, দুহেতুপটিসন্ধিনো.

৪৪৪. জাতা সুগতিযং যেন, পাকেন পটিসন্ধি তু;

তেন তুল্যম্পি হীনং ৰা, তদারম্মণকং ভৰে.

৪৪৫. মনুস্সলোকং সন্ধায, ৰুত্তঞ্চাহেতুকট্ঠকং;

চতূসুপি অপাযেসু, পৰত্তে পন লব্ভতি.

৪৪৬. থেরো নেরযিকানং তু, ধম্মং দেসেতি ৰস্সতি;

গন্ধং ৰাযুঞ্চ মাপেতি, যদা তেসং তদা পন.