৮. অট্ঠমো পরিচ্ছেদো

পকিণ্ণকনিদ্দেসো

৪৭৫. ইদানি পন সব্বেসং, এতেসং মানসং মযা;

পাটৰত্থায ভিক্খূনং, কথীযতি পকিণ্ণকং.

৪৭৬. পন্থমক্কটকো নাম, দিসাসু পন পঞ্চসু;

তত্থ সুত্তং পসারেত্ৰা, জালমজ্ঝে নিপজ্জতি.

৪৭৭. পঠমায দিসাযেত্থ, সুত্তে পন পসারিতে;

পাণকেন পটঙ্গেন, ঘট্টিতে মক্খিকায ৰা.

৪৭৮. নিপন্নট্ঠানতো কিঞ্চি, চলিত্ৰা উণ্ণনাভি তু;

গন্ত্ৰা সুত্তানুসারেন, যূসং পিৰতি তস্স সা.

৪৭৯. পুনাগন্ত্ৰান তত্থেৰ, নিপজ্জতি যথাসুখং;

এৰমেৰ করোতেৰ, দিসাসু দুতিযাদিসু.

৪৮০. পসাদা পঞ্চ দট্ঠব্বা, সুত্তং পঞ্চদিসাস্ৰিৰ;

চিত্তং পন চ দট্ঠব্বং, মজ্ঝে মক্কটকো ৰিয.

৪৮১. পাণকাদীহি সুত্তস্স, তস্স সঙ্ঘট্টনা ৰিয;

পসাদানং তু দট্ঠব্বা, ঘট্টনারম্মণেন হি.

৪৮২. চলনং ৰিয তংমজ্ঝে, নিপন্নাযুণ্ণনাভিযা;

পসাদঘট্টনং তত্থ, গহেত্ৰারম্মণং পন.

৪৮৩. মনোধাতুক্রিযাচিত্তং, ভৰঙ্গাৰট্টনং মতং;

তস্সা সুত্তানুসারংৰ, ৰীথিচিত্তপৰত্তনং.

৪৮৪. সীসে পনস্স ৰিজ্ঝিত্ৰা, যূসপানংৰ চেতসো;

আরম্মণেসু দট্ঠব্বং, জৰনস্স পৰত্তনং.

৪৮৫. পুনাগন্ত্ৰা যথা সুত্ত-জালমজ্ঝে নিপজ্জনং;

ৰত্থুংযেৰ চ নিস্সায, চিত্তস্স পরিৰত্তনং.

৪৮৬. ইদং তু পন ওপম্মং, অত্থং দীপেতি কিং তু হি;

আরম্মণেন পঠমং, পসাদে ঘট্টিতে পন.

৪৮৭. পসাদৰত্থুতো চিত্তা, ৰত্থুসন্নিস্সিতং মনো;

ততো হি পঠমংযেৰ, জাযতীতি হি দীপিতং.

৪৮৮. একেকারম্মণং দ্ৰীসু, দ্ৰীসু দ্ৰারেসু সব্বসো;

আগচ্ছতি তেনাপাথং, অযমত্থোপি দীপিতো.

৪৮৯. রূপং চক্খুপসাদম্হি, ঘট্টিত্ৰা তঙ্খণে পন;

মনোদ্ৰারে তথাপাথ-মাগচ্ছতি নিসংসযো.

৪৯০. খগো যথা হি রুক্খগ্গে, নিলীযন্তোৰ সাখিনো;

সাখং ঘট্টেতি তস্সীধ, ছাযা ফরতি ভূমিযং.

৪৯১. সাখায ঘট্টনচ্ছাযা, ফরণানি চ সব্বসো;

অপুব্বাচরিমং এক-ক্খণস্মিংযেৰ জাযরে.

৪৯২. এৰমেৰ চ রূপস্স, পসাদস্স চ ঘট্টনং;

ভৰঙ্গচলনস্সাপি, পচ্চযত্তেন অত্থতো.

৪৯৩. তথেৰ চ মনোদ্ৰারে, আপাথগমনম্পি চ;

অপুব্বাচরিমং এক-ক্খণস্মিংযেৰ হোতিতি.

৪৯৪. ততো ভৰঙ্গং ছিন্দিত্ৰা, চক্খুদ্ৰারে যথাক্কমং;

আৰজ্জনে সমুপ্পন্নে, দস্সনে সম্পটিচ্ছনে.

৪৯৫. সন্তীরণে সমুপ্পন্নে, ততো ৰোট্ঠব্বনেপি চ;

কুসলং জৰনং চিত্তং, তথাকুসলমেৰ ৰা.

৪৯৬. এসো এৰ নযো সোত-দ্ৰারাদীসুপি ৰিঞ্ঞুনা;

অৰিসেসেন ৰিঞ্ঞেয্যো, সদ্দাদীনং তু ঘট্টনে.

৪৯৭. দোৰারিকোপমাদীনি, এতস্সত্থস্স দীপনে;

উদ্ধরিত্ৰান তানেত্থ, দস্সেতব্বানি ৰিঞ্ঞুনা.

৪৯৮. অসম্ভেদেন চক্খুস্স, রূপাপাথগমেন চ;

আলোকনিস্সযেনাপি, সমনক্কারহেতুনা.

৪৯৯. পচ্চযেহি পনেতেহি, সমেতেহি চতূহিপি;

জাযতে চক্খুৰিঞ্ঞাণং, সম্পযুত্তেহি তং সহ.

৫০০. অসম্ভেদেন সোতস্স, সদ্দাপাথগমেন চ;

আকাসনিস্সযেনাপি, সমনক্কারহেতুনা.

৫০১. পচ্চযেহি পনেতেহি, সমেতেহি চতূহিপি;

জাযতে সোতৰিঞ্ঞাণং, সম্পযুত্তেহি তং সহ.

৫০২. অসম্ভেদেন ঘানস্স, গন্ধাপাথগমেন চ;

ৰাযোসন্নিস্সযেনাপি, সমনক্কারহেতুনা.

৫০৩. পচ্চযেহি পনেতেহি, সমেতেহি চতূহিপি;

জাযতে ঘানৰিঞ্ঞাণং, সম্পযুত্তেহি তং সহ.

৫০৪. অসম্ভেদেন জিৰ্হায, রসাপাথগমেন চ;

আপোসন্নিস্সযেনাপি, সমনক্কারহেতুনা.

৫০৫. পচ্চযেহি পনেতেহি, সমেতেহি চতূহিপি;

জাযতে জিৰ্হাৰিঞ্ঞাণং, সম্পযুত্তেহি তং সহ.

৫০৬. অসম্ভেদেন কাযস্স, ফোট্ঠব্বাপাথসঙ্গমা;

পথৰীনিস্সযেনাপি, সমনক্কারহেতুনা.

৫০৭. পচ্চযেহি পনেতেহি, সমেতেহি চতূহিপি;

জাযতে কাযৰিঞ্ঞাণং, সম্পযুত্তেহি তং সহ.

৫০৮. অসম্ভেদা মনস্সাপি, ধম্মাপাথগমেন চ;

ৰত্থুসন্নিস্সযেনাপি, সমনক্কারহেতুনা.

৫০৯. পচ্চযেহি পনেতেহি, সমেতেহি চতূহিপি;

মনোৰিঞ্ঞাণমেৰং তু, সম্পযুত্তেহি জাযতে.

৫১০. মনো ভৰঙ্গচিত্তন্তি, ৰেদিতব্বং ৰিভাৰিনা;

আৰজ্জনক্রিযাচিত্তং, সমনক্কারোতি সঞ্ঞিতং.

৫১১. ৰত্থুসন্নিস্সযেনাতি, নাযং সব্বত্থ গচ্ছতি;

ভৰং তু পঞ্চৰোকারং, সন্ধায কথিতো পন.

৫১২. পটিসন্ধাদিচিত্তানি, সব্বানেকূনৰীসতি;

কামে দস চ রূপেসু, পঞ্চ চত্তারিরূপিসু.

৫১৩. কম্মং কম্মনিমিত্তঞ্চ, তথা গতিনিমিত্তকং;

ইদং হি তিৰিধং তেসং, আরম্মণমুদীরিতং.

৫১৪. কামাৰচরসন্ধীনং, পরিত্তারম্মণং মতং;

পচ্চুপ্পন্নমতীতং ৰা, হোতি নত্থি অনাগতং.

৫১৫. অট্ঠেৰ চ মহাপাকা, তীণি সন্তীরণানি চ;

একাদসৰিধং চিত্তং, তদারম্মণসঞ্ঞিতং.

৫১৬. একাদসৰিধে চিত্তে, তদারম্মণসঞ্ঞিতে;

দস পুঞ্ঞৰিপাকানি, একং হোতি অপুঞ্ঞজং.

৫১৭. মহাপাকা ন জাযন্তে, রূপারূপভৰদ্ৰযে;

কামে রূপে ভৰে চেৰ, হোতি সন্তীরণত্তযং.

৫১৮. তদারম্মণচিত্তানি, যানি ৰুত্তানি সত্থুনা;

তেসু চিত্তং পনেকম্পি, রূপারূপভৰদ্ৰযে.

৫১৯. ন তদারম্মণং হুত্ৰা, পৰত্ততি কদাচিপি;

কস্মা ন হোতি চে তত্থ, বীজস্সাভাৰতো পন.

৫২০. পটিসন্ধিবীজং নত্থেত্থ, কামাৰচরসঞ্ঞিতং;

রূপাদিগোচরে তস্স, ভৰেয্য জনকং তু যং.

৫২১. চক্খুৰিঞ্ঞাণকাদীনং, নত্থিতাপজ্জতীতি চে;

নিন্দ্রিযানং পৰত্তানু-ভাৰতো চিত্তসম্ভৰো.

৫২২. একন্তেন যথা চেতং, তদারম্মণমানসং;

নপ্পৰত্ততি সব্বম্পি, রূপারূপভৰদ্ৰযে.

৫২৩. অকামাৰচরধম্মেপি, তদেতং নানুবন্ধতি;

কস্মা অজনকত্তা হি, জনকস্সাসমানতো.

৫২৪. জনকং তেন তুল্যং ৰা, কামাৰচরসঞ্ঞিতং;

কুসলাকুসলাদিং তু, জৰনং অনুবন্ধতি.

৫২৫. কামাৰচরধম্মাপি, যে মহগ্গতগোচরা;

হুত্ৰা ৰত্তন্তি তে চাপি, ইদং নেৰানুবন্ধতি.

৫২৬. পরিত্তারম্মণত্তা চ, একন্তেন পনস্স হি;

তথাপরিচিতত্তা চ, নানুবন্ধতি সব্বদা.

৫২৭. কিং তেন যুত্তিৰাদেন, ৰুত্তং অট্ঠকথাসু হি;

তদারম্মণচিত্তানি, একাদসপি সব্বসো.

৫২৮. নামগোত্তং পনারব্ভ, জৰনে জৰিতেপি চ;

তদারম্মণং ন গণ্হন্তি, রূপারূপভৰেসু ৰা.

৫২৯. যদা পঞ্ঞত্তিমারব্ভ, জৰনে জৰিতেপি ৰা;

তথা ৰিপস্সনাযাপি, লক্খণারম্মণায চ.

৫৩০. তদারম্মণা ন লব্ভন্তি, মিচ্ছত্তনিযতেসুপি;

ন লোকুত্তরধম্মেপি, আরব্ভ জৰনে গতে.

৫৩১. তথা মহগ্গতে ধম্মে, আরব্ভ জৰনে পন;

পটিসম্ভিদাঞাণানি, আরব্ভ জৰিতেপি চ.

৫৩২. মনোদ্ৰারেপি সব্বেসং, জৰনানমনন্তরং;

তদারম্মণচিত্তানি, ভৰন্তি অনুপুব্বতো.

৫৩৩. ন ৰিজ্জতি মনোদ্ৰারে, ঘট্টনারম্মণস্স হি;

কথং ভৰঙ্গতো হোতি, ৰুট্ঠানং পন চেতসো.

৫৩৪. মনোদ্ৰারেপি আপাথ-মাগচ্ছন্তেৰ গোচরা;

ঘট্টনায ৰিনা তস্মা, চিত্তানং হোতি সম্ভৰো.

৫৩৫. দ্ৰাদসাপুঞ্ঞচিত্তানং, ৰিপাকা সত্তসত্ততি;

ভৰন্তি চতুরাসীতি, পাপপাকা পৰত্তিযং.

৫৩৬. একাদসৰিধানং তু, হিত্ৰা উদ্ধচ্চমানসং;

একাদসৰিধা চেৰ, ভৰন্তি পটিসন্ধিযো.

৫৩৭. ক্রিযচিত্তেসু সব্বেসু, জৰনং ন চ হোতি যং;

তং ৰে করণমত্তত্তা, ৰাতপুপ্ফসমং মতং.

৫৩৮. জৰনত্তং তু সম্পত্তং, কিচ্চসাধনতো পন;

ছিন্নমূলস্স রুক্খস্স, পুপ্ফংৰ অফলং সিযা.

৫৩৯. পটিচ্চ পন এতস্মা, ফলমেতীতি পচ্চযো;

যো ধম্মো যস্স ধম্মস্স, ঠিতিযুপ্পত্তিযাপি ৰা.

৫৪০. উপকারো হি সো তস্স, পচ্চযোতি পৰুচ্চতি;

সম্ভৰোপভৰো হেতু, কারণং পচ্চযো মতো.

৫৪১. লোভাদি পন যো ধম্মো, মূলট্ঠেনুপকারকো;

হেতূতি পন সো ধম্মো, ৰিঞ্ঞাতব্বো ৰিভাৰিনা.

৫৪২. লোভো দোসো চ মোহো চ,

তথালোভাদযো তযো;

ছল়েৰ হেতুযো হোন্তি,

জাতিতো নৰধা সিযুং.

৫৪৩. ধম্মানং কুসলাদীনং, কুসলাদিত্তসাধকো;

মূলট্ঠোতি ৰদন্তেৰং, একে আচরিযা পন.

৫৪৪. এৰং সন্তে তু হেতূনং, তংসমুট্ঠানরূপিসু;

হেতুপচ্চযতা নেৰ, সম্পজ্জতি কদাচিপি.

৫৪৫. ন হি তে পন রূপানং, সাধেন্তি কুসলাদিকং;

ন তেসং পন রূপানং, পচ্চযা ন চ হোন্তি তে.

৫৪৬. তস্মা হি কুসলাদীনং, কুসলাদিত্তসাধকো;

মূলট্ঠোতি ন গন্তব্বো, ৰিঞ্ঞুনা সমযঞ্ঞুনা.

৫৪৭. সুপ্পতিট্ঠিতভাৰস্স, সাধনেনুপকারকো;

মূলট্ঠোতি চ হেতূনং, ৰিঞ্ঞাতব্বো ৰিভাৰিনা.