৪. চতুত্থো পরিচ্ছেদো

একৰিধাদিনিদ্দেসো

১২৭. ইতো পরং পৰক্খামি, নযমেকৰিধাদিকং;

আভিধম্মিকভিক্খূনং, বুদ্ধিযা পন ৰুদ্ধিযা.

১২৮. সব্বমেকৰিধং চিত্তং, ৰিজাননসভাৰতো;

দুৰিধঞ্চ ভৰে চিত্তং, অহেতুকসহেতুতো.

১২৯. পুঞ্ঞাপুঞ্ঞৰিপাকা হি, কামে দস চ পঞ্চ চ;

ক্রিযা তিস্সোতি সব্বেপি, অট্ঠারস অহেতুকা.

১৩০. একসত্ততি সেসানি, চিত্তুপ্পাদা মহেসিনা;

সহেতুকাতি নিদ্দিট্ঠা, তাদিনা হেতুৰাদিনা.

১৩১. সৰত্থুকাৰত্থুকতো, তথোভযৰসেন চ;

সব্বং ৰুত্তপকারং তু, তিৰিধং হোতি মানসং.

১৩২. সব্বো কামৰিপাকো চ, রূপে পঞ্চদসাপি চ;

আদিমগ্গো সিতুপ্পাদো, মনোধাতু ক্রিযাপি চ.

১৩৩. দোমনস্সদ্ৰযঞ্চাপি, তেচত্তালীস মানসা;

নুপ্পজ্জন্তি ৰিনা ৰত্থুং, একন্তেন সৰত্থুকা.

১৩৪. অরূপাৰচরপাকা চ, একন্তেন অৰত্থুকা;

দ্ৰাচত্তালীস সেসানি, চিত্তানুভযথা সিযুং.

১৩৫. একেকারম্মণং চিত্তং, পঞ্চারম্মণমেৰ চ;

ছল়ারম্মণকঞ্চেতি, এৰম্পি তিৰিধং সিযা.

১৩৬. ৰিঞ্ঞাণানি চ দ্ৰেপঞ্চ, অট্ঠ লোকুত্তরানি চ;

সব্বং মহগ্গতঞ্চেৰ, ঠপেত্ৰাভিঞ্ঞমানসং.

১৩৭. তেচত্তালীস ৰিঞ্ঞেয্যা, একেকারম্মণা পন;

মনোধাতুত্তযং তত্থ, পঞ্চারম্মণমীরিতং.

১৩৮. তেচত্তালীস সেসানি, ছল়ারম্মণিকা মতা;

তথা চ তিৰিধং চিত্তং, কুসলাকুসলাদিতো.

১৩৯. অহেতুং একহেতুঞ্চ, দ্ৰিহেতুঞ্চ তিহেতুকং;

এৰং চতুব্বিধং চিত্তং, ৰিঞ্ঞাতব্বং ৰিভাৰিনা.

১৪০. হেট্ঠা মযাপি নিদ্দিট্ঠা, অট্ঠারস অহেতুকা;

ৰিচিকিচ্ছুদ্ধচ্চসংযুত্তং, একহেতুমুদীরিতং.

১৪১. কামে দ্ৰাদসধা পুঞ্ঞ-ৰিপাকক্রিযতো পন;

দসধাকুসলা চাতি, বাৰীসতি দুহেতুকা.

১৪২. কামে দ্ৰাদসধা পুঞ্ঞ-ৰিপাকক্রিযতো পন;

সব্বং মহগ্গতঞ্চেৰ, অপ্পমাণং তিহেতুকং.

১৪৩. রূপীরিযাপথৰিঞ্ঞত্তি-জনকাজনকাদিতো;

এৰঞ্চাপি হি তং চিত্তং, হোতি সব্বং চতুব্বিধং.

১৪৪. দ্ৰাদসাকুসলা তত্থ, কুসলা কামধাতুযা;

তথা দস ক্রিযা কামে, অভিঞ্ঞামানসং দ্ৰযং.

১৪৫. সমুট্ঠাপেন্তি রূপানি, কপ্পেন্তি ইরিযাপথং;

জনযন্তি চ ৰিঞ্ঞত্তিং, ইমে দ্ৰত্তিংস মানসা.

১৪৬. কুসলা চ ক্রিযা চেৰ, তে মহগ্গতমানসা;

অট্ঠানাসৰচিত্তানি, ছব্বীসতি চ মানসা.

১৪৭. সমুট্ঠাপেন্তি রূপানি, কপ্পেন্তি ইরিযাপথং;

চোপনং ন চ পাপেন্তি, দ্ৰিকিচ্চা নিযতা ইমে.

১৪৮. ঠপেত্ৰা দস ৰিঞ্ঞাণে, ৰিপাকা দ্ৰীসু ভূমিসু;

ক্রিযা চেৰ মনোধাতু, ইমানেকূনৰীসতি.

১৪৯. সমুট্ঠাপেন্তি রূপানি, ন করোন্তিতরদ্ৰযং;

পুন দ্ৰেপঞ্চৰিঞ্ঞাণা, ৰিপাকা চ অরূপিসু.

১৫০. সব্বেসং সন্ধিচিত্তঞ্চ, চুতিচিত্তঞ্চারহতো;

ন করোন্তি তিকিচ্চানি, ইমে সোল়স মানসা.

১৫১. একদ্ৰিতিচতুট্ঠান-পঞ্চট্ঠানপভেদতো;

পঞ্চধা চিত্তমক্খাসি, পঞ্চনিম্মললোচনো.

১৫২. কুসলাকুসলা সব্বে, চিত্তুপ্পাদা মহাক্রিযা;

মহগ্গতা ক্রিযা চেৰ, চত্তারো ফলমানসা.

১৫৩. সব্বেৰ পঞ্চপঞ্ঞাস, নিপ্পপঞ্চেন সত্থুনা;

জৰনট্ঠানতোযেৰ, একট্ঠানে নিযামিতা.

১৫৪. পুন দ্ৰেপঞ্চৰিঞ্ঞাণা, দস্সনে সৰনে তথা;

ঘাযনে সাযনে ঠানে, ফুসনে পটিপাটিযা.

১৫৫. মনোধাতুত্তিকং ঠানে, আৰজ্জনে পটিচ্ছনে;

অট্ঠসট্ঠি ভৰন্তেতে, একট্ঠানিকতং গতা.

১৫৬. পুন দ্ৰিট্ঠানিকং নাম, চিত্তদ্ৰযমুদীরিতং;

সোমনস্সযুতং পঞ্চ-দ্ৰারে সন্তীরণং সিযা.

১৫৭. তদারম্মণং ছদ্ৰারে, বলৰারম্মণে সতি;

তথা ৰোট্ঠব্বনং হোতি, পঞ্চদ্ৰারেসু ৰোট্ঠবো.

১৫৮. মনোদ্ৰারেসু সব্বেসং, হোতি আৰজ্জনং পন;

ইদং দ্ৰিট্ঠানিকং নাম, হোতি চিত্তদ্ৰযং পন.

১৫৯. পটিসন্ধিভৰঙ্গস্স, চুতিযা ঠানতো পন;

মহগ্গতৰিপাকা তে, নৰ তিট্ঠানিকা মতা.

১৬০. অট্ঠ কামা মহাপাকা, পটিসন্ধিভৰঙ্গতো;

তদারম্মণতো চেৰ, চুতিট্ঠানৰসেন চ.

১৬১. চতুট্ঠানিকচিত্তানি, অট্ঠ হোন্তীতি নিদ্দিসে;

কুসলাকুসলপাকং তু-পেক্খাসহগতদ্ৰযং.

১৬২. সন্তীরণং ভৰে পঞ্চ-দ্ৰারে ছদ্ৰারিকেসু চ;

তদারম্মণতং যাতি, বলৰারম্মণে সতি.

১৬৩. পটিসন্ধিভৰঙ্গানং, চুতিট্ঠানৰসেন চ;

পঞ্চট্ঠানিকচিত্তন্তি, ইদং দ্ৰযমুদীরিতং.

১৬৪. পঞ্চকিচ্চং দ্ৰযং চিত্তং, চতুকিচ্চং পনট্ঠকং;

তিকিচ্চং নৰকং দ্ৰে তু, দ্ৰিকিচ্চা সেসমেককং.

১৬৫. ভৰঙ্গাৰজ্জনঞ্চেৰ, দস্সনং সম্পটিচ্ছনং;

সন্তীরণং ৰোট্ঠব্বনং, জৰনং ভৰতি সত্তমং.

১৬৬. ছব্বিধং হোতি তং ছন্নং, ৰিঞ্ঞাণানং পভেদতো;

সত্তধা সত্তৰিঞ্ঞাণ-ধাতূনং তু পভেদতো.

১৬৭. একেকারম্মণং ছক্কং, পঞ্চারম্মণভেদতো;

ছল়ারম্মণতো চেৰ, হোতি অট্ঠৰিধং মনো.

১৬৮. তত্থ দ্ৰেপঞ্চৰিঞ্ঞাণা, হোন্তি একেকগোচরা;

রূপারম্মণিকা দ্ৰে তু, দ্ৰে দ্ৰে সদ্দাদিগোচরা.

১৬৯. সব্বং মহগ্গতং চিত্তং, পঞ্চাভিঞ্ঞাৰিৰজ্জিতং;

সব্বং লোকুত্তরঞ্চেতি, একেকারম্মণং ভৰে.

১৭০. একেকারম্মণং ছক্ক-মিদং ঞেয্যং ৰিভাৰিনা;

পঞ্চারম্মণিকং নাম, মনোধাতুত্তযং ভৰে.

১৭১. কামাৰচরচিত্তানি, চত্তালীসং তথেককং;

অভিঞ্ঞানি চ সব্বানি, ছল়ারম্মণিকানিতি.

১৭২. চিত্তং নৰৰিধং হোতি, সত্তৰিঞ্ঞাণধাতুসু;

পচ্ছিমঞ্চ তিধা কত্ৰা, কুসলাকুসলাদিতো.

১৭৩. পুঞ্ঞাপুঞ্ঞৰসেনেৰ, ৰিপাকক্রিযভেদতো;

ছসত্ততিৰিধো ভেদো, মনোৰিঞ্ঞাণধাতুযা.

১৭৪. মনোধাতুং দ্ৰিধা কত্ৰা, ৰিপাকক্রিযভেদতো;

নৰধা পুব্বৰুত্তেহি, দসধা হোতি মানসং.

১৭৫. ধাতুদ্ৰযং তিধা কত্ৰা, পচ্ছিমং পুন পণ্ডিতো;

একাদসৰিধং চিত্তং, হোতীতি পরিদীপযে.

১৭৬. মনোৰিঞ্ঞাণধাতুম্পি, কুসলাকুসলাদিতো;

চতুধা ৰিভজিত্ৰান, ৰদে দ্ৰাদসধা ঠিতং.

১৭৭. ভৰে চুদ্দসধা চিত্তং, চুদ্দসট্ঠানভেদতো;

পটিসন্ধিভৰঙ্গস্স, চুতিযাৰজ্জনস্স চ.

১৭৮. পঞ্চন্নং দস্সনাদীনং, সম্পটিচ্ছনচেতসো;

সন্তীরণস্স ৰোট্ঠব্ব-জৰনানং ৰসেন চ.

১৭৯. তদারম্মণচিত্তস্স, তথেৰ ঠানভেদতো;

এৰং চুদ্দসধা চিত্তং, হোতীতি পরিদীপযে.

১৮০. ভূমিপুগ্গলনানাত্ত-ৰসেন চ পৰত্তিতো;

বহুধা পনিদং চিত্তং, হোতীতি চ ৰিভাৰযে.

১৮১. একৰিধাদিনযে পনিমস্মিং,

যো কুসলো মতিমা ইধ ভিক্খু;

তস্সভিধম্মগতা পন অত্থা,

হত্থগতামলকা ৰিয হোন্তি.

ইতি অভিধম্মাৰতারে একৰিধাদিনিদ্দেসো নাম

চতুত্থো পরিচ্ছেদো.