৫. পঞ্চমো পরিচ্ছেদো

নিব্বানপঞ্ঞত্তিপরিদীপনো

৩০৪. রাগাদীনং খযং ৰুত্তং, নিব্বানং সন্তিলক্খণং;

সংসারদুক্খসন্তাপতত্তস্সালং সমেতৰে.

৩০৫. খযমত্তং ন নিব্বানং, সগম্ভীরাদিৰাচতো;

অভাৰস্স হি কুম্মানং, লোমস্সেৰ ন ৰাচতা.

৩০৬. খযোতি ৰুচ্চতে মগ্গো, তপ্পাপত্তা ইদং খযং;

অরহত্তং ৰিযুপ্পাদ-ৰযাভাৰা ধুৰঞ্চ তং.

৩০৭. সঙ্খতং সম্মুতিঞ্চাপি, ঞাণমালম্ব নেৰ হি;

ছিন্দে মলে ততো ৰত্থু, ইচ্ছিতব্বমসঙ্খতং.

৩০৮. পত্তুকামেন তং সন্তিং, ছব্বিসুদ্ধিং সমাদিয;

ঞাণদস্সনসুদ্ধী তু, সাধেতব্বা হিতত্থিনা.

৩০৯. চেতনাদিৰিধা সীল-সুদ্ধি তত্থ চতুব্বিধা;

সোপচারসমাধী তু, চিত্তসুদ্ধীতি ৰুচ্চতে.

৩১০. সম্পাদেত্ৰাদিদ্ৰেসুদ্ধিং, নমনা নামং তু রুপ্প-

তো রূপং নত্থি অত্তাদিৰত্থূতি চ ৰৰত্থপে.

৩১১. মণিন্ধনাতপে অগ্গি, অসন্তোপি সমাগমে;

যথা হোতি তথা চিত্তং, ৰত্থালম্বাদিসঙ্গমে.

৩১২. পঙ্গুলন্ধা যথা গন্তুং, পচ্চেকমসমত্থকা;

যন্তি যুত্তা যথা এৰং, নামরূপৰ্হযা ক্রিযা.

৩১৩. ন নামরূপতো অঞ্ঞো, অত্তাদি ইতি দস্সনং;

সোধনত্তা হি দুদ্দিট্ঠিং, দিট্ঠিসুদ্ধীতি ৰুচ্চতি.

৩১৪. অৰিজ্জাতণ্হুপাদান-কম্মেনাদিম্হি তং দ্ৰযং;

রূপং কম্মাদিতো নামং, ৰত্থাদীহি পৰত্তিযং.

৩১৫. সদা সব্বত্থ সব্বেসং, সদিসং ন যতো ততো;

নাহেতুনাঞ্ঞো অত্তাদিনিচ্চহেতূতি পস্সতি.

৩১৬. এৰং তীরযতে কঙ্খা, যায পঞ্ঞায পচ্চযে;

দিট্ঠত্তা সুদ্ধি সা কঙ্খাতরণং ইতি ৰুচ্চতি.

৩১৭. পত্তঞ্ঞাতপরিঞ্ঞো সো, অত্রট্ঠো যততেযতি;

তীরণৰ্হপরিঞ্ঞায, ৰিসুদ্ধত্থং সদাদরো.

৩১৮. তিকালাদিৰসা খন্ধে, সমাসেত্ৰা কলাপতো;

অনিচ্চা দুক্খানত্তাতি, আদো এৰং ৰিপস্সতি.

৩১৯. খন্ধানিচ্চা খযট্ঠেন, ভযট্ঠেন দুখাৰ তে;

অনত্তাসারকট্ঠেন, ইতি পস্সে পুনপ্পুনং.

৩২০. আকারেহি অনিচ্চাদিচত্তালীসেহি সম্মসে;

লক্খণানং ৰিভূতত্থং, খন্ধানং পন সব্বসো.

৩২১. এৰঞ্চাপি অসিজ্ঝন্তে, নৰধা নিসিতিন্দ্রিযো;

সত্তকদ্ৰযতো সম্মা, রূপারূপে ৰিপস্সযে.

৩২২. রূপমাদাননিক্খেপা, ৰযোৰুদ্ধত্তগামিতো;

সম্মসেৰন্নজাদীহি, ধম্মতারূপতোপি চ.

৩২৩. নামং কলাপযমতো, খণতো কমতোপি চ;

দিট্ঠিমাননিকন্তীনং, পস্সে উগ্ঘাটনাদিতো.

৩২৪. অৰিজ্জাতণ্হাকম্মন্ন-হেতুতো রূপং উব্ভৰে;

ৰিনাহারং সফস্সেহি, ৰেদনাদিত্তযং ভৰে.

৩২৫. তেহিযেৰ ৰিনা ফস্সং,

নামরূপাধিকেহি তু;

চিত্তং হেতুক্খযা সো সো,

ৰেতি ৰে তস্স তস্স তু.

৩২৬. হেতুতোদযনাসেৰং, খণোদযৰযেনপি;

ইতি পঞ্ঞাসাকারেহি, পস্সে পুনূদযব্বযং.

৩২৭. যোগিস্সেৰং সমারদ্ধউদযব্বযদস্সিনো;

পাতুভোন্তি উপক্লেসা, সভাৰা হেতুতোপি চ.

৩২৮. তে ওভাসমতুস্সাহপস্সদ্ধিসুখুপেক্খনা;

সতি পীতাধিমোক্খো চ, নিকন্তি চ দসীরিতা.

৩২৯. তণ্হাদিট্ঠুন্নতিগ্গাহৰত্থুতো তিংসধা তে চ;

তদুপ্পন্নে চলে বালো, অমগ্গে মগ্গদস্সকো.

৩৩০. ৰিপস্সনা পথোক্কন্তা, তদাসি মতিমাধুনা;

ন মগ্গো গাহৰত্থুত্তা, তেসং ইতি ৰিপস্সতি.

৩৩১. উপক্লেসে অনিচ্চাদি-ৰসগে সোদযব্বযে;

পস্সতো ৰীথিনোক্কন্তদস্সনং ৰুচ্চতে পথো.

৩৩২. মগ্গামগ্গে ৰৰত্থেত্ৰা, যা পঞ্ঞা এৰমুট্ঠিতা;

মগ্গামগ্গিক্খসঙ্খাতা, সুদ্ধি সা পঞ্চমী ভৰে.

৩৩৩. পহানৰ্হপরিঞ্ঞায, আদিতো সুদ্ধিসিদ্ধিযা;

তীরণৰ্হপরিঞ্ঞায, অন্তগো যততেধুনা.

৩৩৪. জাযতে নৰঞাণী সা, ৰিসুদ্ধি কমতোদয-

ব্বযাদী ঘটমানস্স, নৰ হোন্তি পনেত্থ হি.

৩৩৫. সন্ততীরিযতো চেৰ, ঘনেনাপি চ ছন্নতো;

লক্খণানি ন খাযন্তে, সংকিলিট্ঠা ৰিপস্সনা.

৩৩৬. ততোত্র সম্মসে ভিয্যো, পুনদেৰুদযব্বযং;

তেনানিচ্চাদিসম্পস্সং, পটুতং পরমং ৰজে.

৩৩৭. আৰট্টেত্ৰা যদুপ্পাদট্ঠিতিআদীহি পস্সতো;

ভঙ্গেৰ তিট্ঠতে ঞাণং, তদা ভঙ্গমতী সিযা.

৩৩৮. এৰং পস্সযতো ভঙ্গং, তিভৰো খাযতে যদা;

সীহাদিৰ ভযং হুত্ৰা, সিযা লদ্ধা ভযিক্খণা.

৩৩৯. সাদীনৰা পতিট্ঠন্তে, খন্ধাদিত্তঘরং ৰিয;

যদা তদা সিযা লদ্ধা, আদীনৰানুপস্সনা.

৩৪০. সঙ্খারাদীনৰং দিস্ৰা, রমতে ন ভৰাদিসু;

মতি যদা তদা লদ্ধা, সিযা নিব্বিদপস্সনা.

৩৪১. ঞাণং মুচ্চিতুকামং তে, সব্বভূসঙ্খতে যদা;

জালাদীহি চ মচ্ছাদী, তদা লদ্ধা চজ্জমতি.

৩৪২. সঙ্খারে অসুভানিচ্চদুক্খতোনত্ততো মতি;

পস্সন্তী চত্তুমুস্সুক্কা, পটিসঙ্খানুপস্সনা.

৩৪৩. ৰুত্তাত্র পটুভাৰায, সব্বঞাণপৰত্তিযা;

মীনসঞ্ঞায সপ্পস্স, গাহলুদ্দসমোপমা.

৩৪৪. অত্তত্তনিযতো সুঞ্ঞং, দ্ৰিধা ‘‘নাহং ক্ৰচা’’দিনা;

চতুধা ছব্বিধা চাপি, বহুধা পস্সতো ভুসং.

৩৪৫. আৰট্টতিগ্গিমাসজ্জ,

ন্হারূৰ মতি সঙ্খতং;

চত্তভরিযো যথা দোসে,

তথা তং সমুপেক্খতে.

৩৪৬. তাৰ সাদীনৰানম্পি, লক্খণে তিট্ঠতে মতি;

ন পস্সে যাৰ সা তীরং, সামুদ্দসকুণী যথা.

৩৪৭. সঙ্খারুপেক্খাঞাণাযং, সিখাপত্তা ৰিপস্সনা;

ৰুট্ঠানগামিনীতি চ, সানুলোমাতি ৰুচ্চতি.

৩৪৮. পত্ৰা মোক্খমুখং সত্ত, সাধেতিরিযপুগ্গলে;

ঝানঙ্গাদিপ্পভেদে চ, পাদকাদিৰসেন সা.

৩৪৯. অনিচ্চতো হি ৰুট্ঠানং, যদি যস্সাসি যোগিনো;

সোধিমোক্খস্স বাহুল্লা, তিক্খসদ্ধিন্দ্রিযো ভৰে.

৩৫০. দুক্খতোনত্ততো তঞ্চে, সিযা হোন্তি কমেন তে;

পস্সদ্ধিৰেদবাহুল্লা, তিক্খেকগ্গমতিন্দ্রিযা.

৩৫১. পঞ্ঞাধুরত্তমুদ্দিট্ঠং, ৰুট্ঠানং যদিনত্ততো;

সদ্ধাধুরত্তং সেসেহি, তং ৰিযাভিনিৰেসতো.

৩৫২. দ্ৰে তিক্খসদ্ধসমথা, সিযুং সদ্ধানুসারিনো;

আদো মজ্ঝেসু ঠানেসু, ছসু সদ্ধাৰিমুত্তকা.

৩৫৩. ইতরো ধম্মানুসারীদো, দিট্ঠিপ্পত্তো অনন্তকে;

পঞ্ঞামুত্তোভযত্থন্তে, অঝানিঝানিকা চ তে.

৩৫৪. তিক্খসদ্ধস্স চন্তেপি, সদ্ধামুত্তত্তমীরিতং;

ৰিসুদ্ধিমগ্গে মজ্ঝস্স, কাযসক্খিত্তমট্ঠসু.

৩৫৫. ৰুত্তং মোক্খকথাযং যং, তিক্খপঞ্ঞারহস্স তু;

দিট্ঠিপত্তত্তং হেতঞ্চ, তঞ্চ নত্থাভিধম্মিকে.

৩৫৬. তে সব্বে অট্ঠমোক্খানং, লাভী চে ছসু মজ্ঝসু;

কাযসক্খী সিযুং অন্তে, উভতোভাগমুত্তকা.

৩৫৭. অনুলোমানি চত্তারি, তীণি দ্ৰে ৰা ভৰন্তি হি;

মগ্গস্স ৰীথিযং মন্দমজ্ঝতিক্খমতিব্বসা.

৩৫৮. ৰিসুদ্ধিমগ্গে চত্তারি, পটিসিদ্ধানি সব্বথা;

এৰমট্ঠসালিনিযা, ৰুত্তত্তা এৰমীরিতং.

৩৫৯. ভৰঙ্গাসন্নদোসোপি, নপ্পনায থিরত্ততো;

সুদ্ধিং পটিপদাঞাণদস্সনেৰং লভে যতি.

৩৬০. আৰজ্জং ৰিয মগ্গস্স, ছট্ঠসত্তমসুদ্ধিনং;

অন্তরা সন্তিমারব্ভ, তেহি গোত্রভু জাযতে.

৩৬১. সংযোজনত্তযচ্ছেদী, মগ্গো উপ্পজ্জতে ততো;

ফলানি একং দ্ৰে তীণি, ততো ৰুত্তমতিক্কমা.

৩৬২. তথা ভাৰযতো হোতি, রাগদোসতনূকরং;

দুতিযো তপ্ফলং তম্হা, সকদাগামি তপ্ফলী.

৩৬৩. এৰং ভাৰযতো রাগদোসনাসকরুব্ভৰে;

ততিযো তপ্ফলং তম্হা, তপ্ফলট্ঠোনাগামিকো.

৩৬৪. এৰং ভাৰযতো সেসদোসনাসকরুব্ভৰে;

চতুত্থো তপ্ফলং তম্হা, অরহা তপ্ফলট্ঠকো.

৩৬৫. কতকিচ্চো ভৰচ্ছেদো, দক্খিণেয্যোপধিক্খযা;

নিব্বুতিং যাতি দীপোৰ, সব্বদুক্খন্তসঞ্ঞিতং.

৩৬৬. এৰং সিদ্ধা সিযা সুদ্ধি, ঞাণদস্সনসঞ্ঞিতা;

ৰুত্তং এত্তাৰতা সচ্চং, পরমত্থং সমাসতো.

৩৬৭. সচ্চং সম্মুতি সত্তাদিঅৰত্থু ৰুচ্চতে যতো;

ন লব্ভালাতচক্কংৰ, তং হি রূপাদযো ৰিনা.

৩৬৮. তেন তেন পকারেন, রূপাদিং ন ৰিহায তু;

তথা তথাভিধানঞ্চ, গাহঞ্চ ৰত্ততে ততো.

৩৬৯. লব্ভতে পরিকপ্পেন, যতো তং ন মুসা ততো;

অৰুত্তালম্বমিচ্চাহু, পরিত্তাদীস্ৰৰাচতো.

৩৭০. পাপকল্যাণমিত্তোযং, সত্তোতি খন্ধসন্ততি;

একত্তেন গহেত্ৰান, ৰোহরন্তীধ পণ্ডিতা.

৩৭১. পথৰাদি ৰিযেকোপি, পুগ্গলো ন যতো ততো;

কুদিট্ঠিৰত্থুভাৰেন, পুগ্গলগ্গহণং ভৰে.

৩৭২. এতং ৰিসযতো কত্ৰা, সঙ্খাদীহি পদেহি তু;

অৰিজ্জমানপঞ্ঞত্তি, ইতি তঞ্ঞূহি ভাসিতা.

৩৭৩. পঞ্ঞত্তি ৰিজ্জমানস্স, রূপাদিৰিসযত্ততো;

কাযং পঞ্ঞত্তি চে সুট্ঠু, ৰদতো সুণ সচ্চতো.

৩৭৪. সৰিঞ্ঞত্তিৰিকারো হি, সদ্দো সচ্চদ্ৰযস্স তু;

পঞ্ঞাপনত্তা পঞ্ঞত্তি, ইতি তঞ্ঞূহি ভাসিতা.

৩৭৫. পচ্চুপ্পন্নাদিআলম্বং, নিরুত্তিপটিসম্ভিদা-

ঞাণস্সাতি ইদঞ্চেৰং, সতি যুজ্জতি নাঞ্ঞথা.