৪. চতুত্থো পরিচ্ছেদো

ৰিঞ্ঞাণক্খন্ধপকিণ্ণকনযসঙ্খেপো

১৯২. একধাদিনযোদানি, পটুৰড্ঢায যোগিনং;

ৰুচ্চতে ৰিসযগ্গাহা, সব্বমেকৰিধং মনং.

১৯৩. একাসীতি তিভূমট্ঠং, লোকিযং সুত্তরঞ্চ তং;

সেসং লোকুত্তরং অট্ঠ, অনুত্তরঞ্চিতী দ্ৰিধা.

১৯৪. লোকপাকক্রিযাহেতূ, চেকহেতূতি সত্তহি;

তিংস নাধিপতি সাধি-পতি সেসাতিপী দ্ৰিধা.

১৯৫. ছন্দচিত্তীহৰীমংসা-স্ৰেকেন মতিমা যুতং;

ৰিনা ৰীমংসমেকেন, ঞাণহীনমনং যুতং.

১৯৬. পরিত্তানপ্পমাণানি, মহগ্গতমনানিতি;

তিধা ছনৰ চট্ঠ চ, তিনৰা চ যথাক্কমং.

১৯৭. দ্ৰিপঞ্চ চিত্তং ৰিঞ্ঞাণং, তিস্সো হি মনোধাতুযো;

ছসত্ততি মনোঞাণ-ধাতূতি তিৰিধা পুন.

১৯৮. একারম্মণচিত্তানি, অনভিঞ্ঞং মহগ্গতং;

অমলং পঞ্চৰিঞ্ঞাণং, নৰপঞ্চ ভৰন্তিমে.

১৯৯. পঞ্চালম্বং মনোধাতু, সাভিঞ্ঞং কামধাতুজং;

সেসং ছারম্মণং তং হি, তেচত্তালীস সঙ্খ্যতো.

২০০. কামপাকদুসা চাদি-মগ্গো চাদিক্রিযা দুৰে;

রূপা সব্বেতিরূপে ন, তেচত্তালীস হোন্তিমে.

২০১. ৰিনাৰ রূপেনারুপ্প-ৰিপাকা চতুরো সিযুং;

দ্ৰেচত্তালীস সেসানি, ৰত্তন্তুভযথাপি চ.

২০২. চতুধাপি অহেত্ৰেকদ্ৰিহেতুকতিহেতুতো;

অট্ঠারস দ্ৰে বাৰীস, সত্তচত্তালিসং ভৰে.

২০৩. কামে জৰা সৰোট্ঠব্বা, অভিঞ্ঞাদ্ৰযমেৰ চ;

রূপিরিযাপথৰিঞ্ঞত্তিকরামে চতুরট্ঠকা.

২০৪. ছব্বীসতি জৰা সেসা, করা রূপিরিযাপথে;

দ্ৰিপঞ্চমনৰজ্জানি, কামরূপফলানি চ.

২০৫. আদিক্রিযাতি চেকূন-ৰীস রূপকরা ইমে;

সেসা চুদ্দস ভিন্নাৰচুতি সন্ধি ন তীণিপি.

২০৬. এককিচ্চাদিতো পঞ্চ-ৰিধা তত্থেককিচ্চকা;

দ্ৰিপঞ্চচিত্তং জৰনং, মনোধাতুট্ঠসট্ঠিমে.

২০৭. দ্ৰিকিচ্চাদীনি ৰোট্ঠব্বং, সুখতীরং মহগ্গতে;

পাকা কামমহাপাকা, সেসা তীরা যথাক্কমং.

২০৮. দস্সনং সৰনং দিট্ঠং, সুতং ঘাযনকাদিকং;

তযং মুতং মনোধাতুত্তযং দিট্ঠং সুতং মুতং.

২০৯. দিট্ঠং সুতং মুতং ঞাতং, সাভিঞ্ঞং সেসকামিকং;

ৰিঞ্ঞাতারম্মণং সেসমেৰং ছব্বিধমীরযে.

২১০. সত্তধা সত্তৰিঞ্ঞাণধাতূনং তু ৰসা ভৰে;

ৰুচ্চতেদানি তস্সেৰ, অনন্তরনযক্কমো.

২১১. পুঞ্ঞেস্ৰাদিদ্ৰযা কামে, রূপপুঞ্ঞমনন্তকং;

তপ্পাদকুত্তরানন্তং, ভৰঙ্গঞ্চাদিতীরণং.

২১২. দুতিযন্তদ্ৰযা তীরং, ভৰঙ্গং ততিযদ্ৰযা;

তে অনন্তামলং পুঞ্ঞং, মজ্ঝত্তঞ্চ মহগ্গতং.

২১৩. সব্বৰারে সযঞ্চেতি, তেপঞ্ঞাস তিসত্ত চ;

তেত্তিংস চ ভৰন্তেতে, রূপেসু পন পুঞ্ঞতো.

২১৪. তপ্পাকা চ মতিযুত্ত-কামপাকা সযং দস;

আরুপ্পপুঞ্ঞতো তে চ, সকো পাকো সযং পুন.

২১৫. অধোপাকা চ অন্তম্হা, ততিযঞ্চ ফলন্তিমে;

দসেকদ্ৰিতিপঞ্চাহি, মগ্গা চেকং সকং ফলং.

২১৬. লোভমূলেকহেতূহি, অন্তকামসুভা ৰিয;

সত্ত দোসদ্ৰযা কাম-ভৰঙ্গপেক্খৰা সযং.

২১৭. মহাপাকতিহেতূহি, সাৰজ্জা সব্বসন্ধিযো;

কামচ্চুতীহি সেসাহি, সাৰজ্জা কামসন্ধিযো.

২১৮. কামচ্চুতি চ ৰোট্ঠব্বং, সযঞ্চ সুখতীরতো;

পটিচ্ছা তীরণানি দ্ৰে, ইতরা সকতীরণং.

২১৯. সকং সকং পটিচ্ছং তু, ৰিঞ্ঞাণেহি দ্ৰিপঞ্চহি;

রূপপাকেহি সাৰজ্জা, সন্ধিযোহেতুৰজ্জিতা.

২২০. অরূপপাকেস্ৰাদিম্হা, কামপাকা তিহেতুকা;

অন্তাৰজ্জম্পি চারুপ্প-পাকা চ নৰ হোন্তিমে.

২২১. দুতিযাদীহি তেযেৰ, অধোপাকং ৰিনা ৰিনা;

ফলা তিহেতুকা পাকা, সযঞ্চেতি চতুদ্দস.

২২২. দ্ৰিপঞ্চাদিক্রিযা হাসা, সযঞ্চারুপ্পৰজ্জিতা;

ঞাণযুত্তভৰঙ্গাতি, দস ৰোট্ঠব্বতো পন.

২২৩. কামে জৰা ভৰঙ্গা চ, কামরূপে সযম্পি ৰা;

নৰপঞ্চ সহেতাদি-কিরিযদ্ৰযতো পন.

২২৪. সযং ভৰঙ্গমতিমা, রূপে সাতক্রিযাপি চ;

তপ্পাদকন্তিমঞ্চেতি, বাৰীস ততিযা পন.

২২৫. তে চ পাকা সযঞ্চন্তে, ফলং মজ্ঝা মহগ্গতা;

ক্রিযাতি ৰীসতি হোন্তি, সেসদ্ৰীহি দুকেহি তু.

২২৬. ৰুত্তপাকা সযঞ্চেতি, চুদ্দসেৰং ক্রিযাজৰা;

তদারম্মণং মুঞ্চিত্ৰা, পট্ঠাননযতো নযে.

২২৭. অথ সাতক্রিযা সাতং, সেসং সেসক্রিযাপি চ;

তদালম্বং যথাযোগং, ৰদে অট্ঠকথানযা.

২২৮. মহগ্গতা ক্রিযা সব্বা, সকপুঞ্ঞসমা তহিং;

অন্তা ফলন্তিমং হোতি, অযমেৰ ৰিসেসতা.

২২৯. ইমস্সানন্তরা ধম্মা, এত্তকাতি পকাসিতা;

ইমং পনেত্তকেহীতি, ৰুচ্চতেযং নযোধুনা.

২৩০. দ্ৰীহি কামজৰা তীহি, রূপারূপা চতূহি তু;

মগ্গা ছহি ফলাদি দ্ৰে, সেসা দ্ৰে পন সত্তহি.

২৩১. একম্হা দস পঞ্চহি, পটিচ্ছা সুখতীরণং;

কামে দোসক্রিযাহীন-জৰেহি গহতো সকা.

২৩২. কামে জৰা ক্রিযাহীনা, তদালম্বা সৰোট্ঠব্বা;

সগহঞ্চেতি তেত্তিংসচিত্তেহি পরতীরণা.

২৩৩. কামপুঞ্ঞসুখীতীরকণ্হৰোট্ঠব্বতো দ্ৰযং;

মহাপাকন্তিমং হোতি, অনারুপ্পচুতীহি চ.

২৩৪. সত্ততিংস পনেতানি, এত্থ হিত্ৰা দুসদ্ৰযং;

এতেহি পঞ্চতিংসেহি, জাযতে দুতিযদ্ৰযং.

২৩৫. সুখতীরাদি সত্তেতে, ক্রিযতো চাপি সম্ভৰা;

ঞেয্যা সেসানি চত্তারি, ভৰঙ্গেন চ লব্ভরে.

২৩৬. মগ্গৰজ্জা সৰোট্ঠব্বসুখিতীরজৰাখিলা;

চুতীতি নৰকট্ঠাহি, ততিযদ্ৰযমাদিসে.

২৩৭. এতেহি দোসৰজ্জেহি, সত্ততীহিতরদ্ৰযং;

রূপপাকা ৰিনারুপ্পপাকাহেতুদুহেতুকে.

২৩৮. তেহেৰেকূনসট্ঠীহি, হোন্তিরুপ্পাদিকং ৰিনা;

হাসাৰজ্জে জৰে রূপে, অট্ঠছক্কেহি তেহি তু.

২৩৯. সাধোপাকেহি তেহেৰ, দুতিযাদীনি অত্তনা;

অধোধোজৰহীনেহি, একেকূনেহি জাযরে.

২৪০. সুখতীরভৰঙ্গানি, সযঞ্চাতি তিসত্তহি;

অন্তাৰজ্জং অনারুপ্পভৰঙ্গেহি পনেতরং.

২৪১. ৰুত্তানন্তরসঙ্খাতো, নযো দানি অনেকধা;

পুগ্গলাদিপ্পভেদাপি, পৰত্তি তস্স ৰুচ্চতে.

২৪২. পুথুজ্জনস্স জাযন্তে, দিট্ঠিকঙ্খাযুতানি ৰে;

সেক্খস্সেৰামলা সত্ত, অনন্তানিতরস্স তু.

২৪৩. অন্তামলং অনাৰজ্জক্রিযা চেকূনৰীসতি;

কুসলাকুসলা সেসা, হোন্তি সেক্খপুথুজ্জনে.

২৪৪. ইতরানি পনাৰজ্জদ্ৰযং পাকা চ সাসৰা;

তিণ্ণন্নম্পি সিযুং এৰং, পঞ্চধা সত্তভেদতো.

২৪৫. কামে সোল়স ঘানাদিত্তযং দোসমহাফলা;

রূপারূপে সপাকোতি, পঞ্চৰীসতি একজা.

২৪৬. কামপাকা চ সেসাদিমগ্গো আদিক্রিযা দুৰে;

রূপে জৰাতি বাৰীস, দ্ৰিজা সেসা তিধাতুজা.

২৪৭. ৰিত্থারোপি চ ভূমীসু, ঞেয্যো কামসুভাসুভং;

হাসৰজ্জমহেতুঞ্চ, অপাযে সত্ততিংসিমে.

২৪৮. হিত্ৰা মহগ্গতে পাকে, অসীতি সেসকামিসু;

চক্খুসোতমনোধাতু, তীরণং ৰোট্ঠব্বম্পি চ.

২৪৯. দোসহীনজৰা সো সো, পাকো রূপে অনারিযে;

পঞ্চসট্ঠি ছসট্ঠী তু, পরিত্তাভাদীসু তীসু.

২৫০. আদিপঞ্চামলা কঙ্খাদিট্ঠিযুত্তে ৰিনা তহিং;

তেযেৰ পঞ্চপঞ্ঞাস, জাযরে সুদ্ধভূমিসু.

২৫১. আদিমগ্গদুসাহাসরূপহীনজৰা সকো;

পাকো ৰোট্ঠব্বনঞ্চাতি, তিতালীসং সিযুং নভে.

২৫২. অধোধোমনৰজ্জা তে,

পাকো চেৰ সকো সকো;

দুতিযাদীসু জাযন্তে,

দ্ৰে দ্ৰে ঊনা ততো ততো.

২৫৩. অরূপেস্ৰেকমেকস্মিং, রূপেস্ৰাদিত্তিকেপি চ;

তিকে চ ততিযে একং, দ্ৰে হোন্তি দুতিযত্তিকে.

২৫৪. অন্তিমং রূপপাকং তু, ছসু ৰেহপ্ফলাদিসু;

কামসুগতিযংযেৰ, মহাপাকা পৰত্তরে.

২৫৫. ঘাযনাদিত্তযং কামে, পটিঘদ্ৰযমেৰ চ;

সত্তরসেসু পঠমং, অমলং মানৰাদিসু.

২৫৬. অরিযাপাযৰজ্জেসু, চতুরোদিপ্ফলাদিকা;

অপাযারুপ্পৰজ্জেসু, হাসরূপসুভক্রিযং.

২৫৭. অপাযুদ্ধত্তযং হিত্ৰা, হোতাকাসসুভক্রিযং;

তথাপাযুদ্ধদ্ৰে হিত্ৰা, ৰিঞ্ঞাণকুসলক্রিযং.

২৫৮. ভৰগ্গাপাযৰজ্জেসু, আকিঞ্চঞ্ঞসুভক্রিযং;

দিট্ঠিকঙ্খাযুতা সুদ্ধে, ৰিনা সব্বাসু ভূমিসু.

২৫৯. অমলানি চ তীণন্তে,

ভৰগ্গে চ সুভক্রিযা;

মহাক্রিযা চ হোন্তেতে,

তেরসেৰানপাযিসু.

২৬০. অনারুপ্পে মনোধাতু, দস্সনং সৰতীরণং;

কামে অনিট্ঠসংযোগে, ব্রহ্মানং পাপজং ফলং.

২৬১. ৰোট্ঠব্বং কামপুঞ্ঞঞ্চ, দিট্ঠিহীনং সউদ্ধৰং;

চুদ্দসেতানি চিত্তানি, জাযরে তিংসভূমিসু.

২৬২. ইন্দ্রিযানি দুৰে অন্তদ্ৰযৰজ্জেস্ৰহেতুসু;

তীণি কঙ্খেতরাহেতুপাপে চত্তারি তেরস.

২৬৩. ছ ঞাণহীনে তব্বন্তসাসৰে সত্ত নিম্মলে;

চত্তালীসে পনট্ঠেৰং, ঞেয্যমিন্দ্রিযভেদতো.