৩. ততিযো পরিচ্ছেদো

চেতসিকৰিভাগনিদ্দেসো

৮৯. সব্বে চেতসিকা ৰুত্তা, বুদ্ধেনাদিচ্চবন্ধুনা;

নামসামঞ্ঞতোযেৰ, দ্ৰেপঞ্ঞাস ভৰন্তি তে.

সেয্যথিদং – ফস্সো ৰেদনা সঞ্ঞা চেতনা ৰিতক্কো ৰিচারো পীতি চিত্তেকগ্গতা ৰীরিযং জীৰিতং ছন্দো অধিমোক্খো মনসিকারো তত্রমজ্ঝত্ততা সদ্ধা সতি হিরী ওত্তপ্পং অলোভো অদোসো অমোহো কাযপ্পস্সদ্ধিআদীনি ছ যুগানি, তিস্সো ৰিরতিযো, করুণা মুদিতা লোভো দোসো মোহো উদ্ধচ্চং মানো দিট্ঠি ইস্সা মচ্ছরিযং কুক্কুচ্চং থিনং মিদ্ধং ৰিচিকিচ্ছা অহিরিকং অনোত্তপ্পঞ্চাতি.

৯০. চতুপঞ্ঞাসধা কামে, রূপে পঞ্চদসেরিতা;

তে হোন্তি দ্ৰাদসারূপে, চত্তালীসমনাসৰা.

৯১. একৰীসসতং সব্বে, চিত্তুপ্পাদা সমাসতো;

এতেসু তেসমুপ্পত্তিং, উদ্ধরিত্ৰা পনেককং.

৯২. ফস্সাদীনং তু ধম্মানং, পৰক্খামি ইতো পরং;

পাটৰত্থায ভিক্খূনং, চিত্তচেতসিকেস্ৰহং.

৯৩. একগ্গতা মনক্কারো, জীৰিতং ফস্সপঞ্চকং;

অট্ঠেতে অৰিনিব্ভোগা, একুপ্পাদা সহক্খযা.

৯৪. ফস্সো চ ৰেদনা সঞ্ঞা, চেতনা জীৰিতিন্দ্রিযং;

একগ্গতা মনক্কারো, সব্বসাধারণা ইমে.

৯৫. ৰিতক্কো পঞ্চপঞ্ঞাস-চিত্তেসু সমুদীরিতো;

চারো ছসট্ঠিচিত্তেসু, জাযতে নত্থি সংসযো.

৯৬. একপঞ্ঞাসচিত্তেসু, পীতি তেসট্ঠিযা সুখং;

উপেক্খা পঞ্চপঞ্ঞাস-চিত্তে দুক্খং তু তীসু হি.

৯৭. হোতি দ্ৰাসট্ঠিচিত্তেসু, সোমনস্সিন্দ্রিযং পন;

দুক্খিন্দ্রিযং পনেকস্মিং, তথেকম্হি সুখিন্দ্রিযং.

৯৮. পঞ্চুত্তরসতে চিত্তে, ৰীরিযং আহ নাযকো;

চতুত্তরসতে চিত্তে, সমাধিন্দ্রিযমব্রৰি.

৯৯. সব্বাহেতুকচিত্তানি, ঠপেত্ৰা চেকহেতুকে;

একুত্তরসতে চিত্তে, ছন্দস্সুপ্পত্তিমুদ্দিসে.

১০০. ঠপেত্ৰা দস ৰিঞ্ঞাণে, ৰিচিকিচ্ছাযুতম্পি চ;

দসুত্তরসতে চিত্তে, অধিমোক্খো উদীরিতো.

১০১. সদ্ধা সতি হিরোত্তপ্পং, অলোভাদোসমজ্ঝতা;

ছল়েৰ যুগল়া চাতি, ধম্মা একূনৰীসতি.

১০২. একনৰুতিযা চিত্তে, জাযন্তি নিযতা ইমে;

অহেতুকেসু চিত্তেসু, অপুঞ্ঞেসু ন জাযরে.

১০৩. একূনাসীতিযা চিত্তে, পঞ্ঞা জাযতি সব্বদা;

অট্ঠৰীসতিযা চিত্তে, করুণামুদিতা সিযুং.

১০৪. কামাৰচরপুঞ্ঞেসু, সব্বলোকুত্তরেসু চ;

চত্তালীসৰিধে চিত্তে, সাট্ঠকে ৰিরতিত্তযং.

১০৫. সদ্ধা সতি হিরোত্তপ্পং, অলোভাদিত্তযম্পি চ;

যুগল়ানি ছ মজ্ঝত্তং, করুণামুদিতাপি চ.

১০৬. তথা ৰিরতিযো তিস্সো, সব্বে তে পঞ্চৰীসতি;

কুসলাব্যাকতা চাপি, কুসলেন পকাসিতা.

১০৭. অহিরীকমনোত্তপ্পং, মোহো উদ্ধচ্চমেৰ চ;

দ্ৰাদসাপুঞ্ঞচিত্তেসু, নিযতাযেৰ জাযরে.

১০৮. লোভো দোসো চ মোহো চ, মানো দিট্ঠি চ সংসযো;

মিদ্ধমুদ্ধচ্চকুক্কুচ্চং, থিনং মচ্ছরিযম্পি চ.

১০৯. অহিরীকমনোত্তপ্পং, ইস্সা চ দোমনস্সকং;

এতে অকুসলা ৰুত্তা, একন্তেন মহেসিনা.

১১০. লোভো অট্ঠসু নিদ্দিট্ঠো, ৰুত্তা চতূসু দিট্ঠিতু;

মানো দিট্ঠিৰিযুত্তেসু, দোসোদ্ৰীস্ৰেৰ জাযতে.

১১১. ইস্সামচ্ছেরকুক্কুচ্চা, দ্ৰীসু জাযন্তি নো সহ;

ৰিচিকিচ্ছা পনেকস্মিং, থিনমিদ্ধং তু পঞ্চসু.

১১২. ফস্সো চ ৰেদনা সঞ্ঞা, চেতনা জীৰিতং মনো;

ৰিতক্কো চ ৰিচারো চ, পীতি ৰীরিযসমাধি চ.

১১৩. ছন্দো চেৰাধিমোক্খো চ, মনসিকারো চ চুদ্দস;

কুসলাকুসলা চেৰ, হোন্তি অব্যাকতাপি চ.

১১৪. একূনতিংসচিত্তেসু, ঝানং পঞ্চঙ্গিকং মতং;

চতুঝানঙ্গযুত্তানি, সত্ততিংসাতি নিদ্দিসে.

১১৫. একাদসৰিধং চিত্তং, তিৰঙ্গিকমুদীরিতং;

চতুতিংসৰিধং চিত্তং, দুৰঙ্গিকমুদীরিতং.

১১৬. সভাৰেনাৰিতক্কেসু, ঝানঙ্গানি ন উদ্ধরে;

সব্বাহেতুকচিত্তেসু, মগ্গঙ্গানি ন উদ্ধরে.

১১৭. তীণি সোল়সচিত্তেসু, ইন্দ্রিযানি ৰদে বুধো;

একস্মিং পন চত্তারি, পঞ্চ তেরসসুদ্ধরে.

১১৮. সত্ত দ্ৰাদসচিত্তেসু, ইন্দ্রিযানি জিনোব্রৰি;

একেনূনেসু অট্ঠেৰ, চত্তালীসমনেসু চ.

১১৯. চত্তালীসায চিত্তেসু, নৰকং নাযকোব্রৰি;

এৰং ইন্দ্রিযযোগোপি, ৰেদিতব্বো ৰিভাৰিনা.

১২০. অমগ্গঙ্গানি নামেত্থ, অট্ঠারস অহেতুকা;

ঝানঙ্গানি ন ৰিজ্জন্তি, ৰিঞ্ঞাণেসু দ্ৰিপঞ্চসু.

১২১. একং চিত্তং দুমগ্গঙ্গং, তিমগ্গঙ্গানি সত্তসু;

চত্তালীসায চিত্তেসু, মগ্গো সো চতুরঙ্গিকো.

১২২. পঞ্চদ্দসসু চিত্তেসু, মগ্গো পঞ্চঙ্গিকো মতো;

ৰুত্তো দ্ৰত্তিংসচিত্তেসু, মগ্গো সত্তঙ্গিকোপি চ.

১২৩. মগ্গো অট্ঠসু চিত্তেসু, মতো অট্ঠঙ্গিকোতি হি;

এৰং তু সব্বচিত্তেসু, মগ্গঙ্গানি সমুদ্ধরে.

১২৪. বলানি দ্ৰে দ্ৰিচিত্তেসু, একস্মিং তীণি দীপযে;

একাদসসু চত্তারি, ছ দ্ৰাদসসু নিদ্দিসে.

১২৫. একূনাসীতিযা সত্ত, সোল়সেৰাবলানি তু;

চিত্তমেৰং তু ৰিঞ্ঞেয্যং, সবলং অবলম্পি চ.

১২৬. ঝানঙ্গমগ্গঙ্গবলিন্দ্রিযানি,

চিত্তেসু জাযন্তি হি যেসু যানি;

মযা সমাসেন সমুদ্ধরিত্ৰা,

ৰুত্তানি সব্বানিপি তানি তেসু.

ইতি অভিধম্মাৰতারে চেতসিকৰিভাগনিদ্দেসো নাম

ততিযো পরিচ্ছেদো.