১. পঠমো পরিচ্ছেদো

রূপসঙ্খেপো

৩. সচ্চানি পরমত্থঞ্চ, সম্মুতিঞ্চাতি দ্ৰে তহিং;

থদ্ধভাৰাদিনা ঞেয্যং, সচ্চং তং পরমত্থকং.

৪. সন্নিৰেসৰিসেসাদিঞেয্যং সম্মুতি তং দ্ৰযং;

ভাৰসঙ্কেতসিদ্ধীনং, তথত্তা সচ্চমীরিতং.

৫. পরমত্থো সনিব্বানপঞ্চক্খন্ধেত্থ রাসিতো;

খন্ধত্থো চ সমাসেত্ৰা, ৰুত্তোতীতাদিভেদনং.

৬. ৰেদনাদীসুপেকস্মিং, খন্ধসদ্দো তু রুল়্হিযা;

সমুদ্দাদেকদেসে তু, সমুদ্দাদিরৰো যথা.

৭. তত্থ সীতাদিরুপ্পত্তা, রূপং ভ্ৰাপানলানিলং;

ভূতং কথিনদৰতাপচনীরণভাৰকং.

৮. চক্খু সোতঞ্চ ঘানঞ্চ, জিৰ্হা কাযো পভা রৰো;

গন্ধো রসোজা ইত্থী চ, পুমা ৰত্থু চ জীৰিতং.

৯. খং জাতি জরতা ভঙ্গো, রূপস্স লহুতা তথা;

মুদুকম্মঞ্ঞতা কাযৰচীৰিঞ্ঞত্তি ভূতিকং.

১০. চক্খাদী দট্ঠুকামাদিহেতুকম্মজভূতিকা;

পসাদা রূপসদ্দাদী, চক্খুঞাণাদিগোচরা.

১১. ওজা হি যাপনা ইত্থিপুমলিঙ্গাদিহেতুকং;

ভাৰদ্ৰযং তু কাযংৰ, ব্যাপি নো সহৰুত্তিকং.

১২. নিস্সযং ৰত্থু ধাতূনং, দ্ৰিন্নং কম্মজপালনং;

জীৰিতং উপ্পলাদীনং, উদকংৰ ঠিতিক্খণে.

১৩. খং রূপানং পরিচ্ছেদো, জাতিআদিত্তযং পন;

রূপনিব্বত্তি পাকো চ, ভেদো চেৰ যথাক্কমং.

১৪. লহুতাদিত্তযং তং হি, রূপানং কমতো সিযা;

অদন্ধথদ্ধতা চাপি, কাযকম্মানুকূলতা.

১৫. অভিক্কমাদিজনকচিত্তজস্সানিলস্স হি;

ৰিকারো কাযৰিঞ্ঞত্তি, রূপত্থম্ভাদিকারণং.

১৬. ৰচীভেদকচিত্তেন, ভূতভূমিৰিকারতা;

ৰচীৰিঞ্ঞত্তুপাদিন্নঘট্টনস্সেৰ কারণং.

১৭. রূপমব্যাকতং সব্বং, ৰিপ্পযুত্তমহেতুকং;

অনালম্বং পরিত্তাদি, ইতি একৰিধং নযে.

১৮. অজ্ঝত্তিকানি চক্খাদী, পঞ্চেতেৰ পসাদকা;

ৰত্থুনা ৰত্থু তানেৰ, দ্ৰারা ৰিঞ্ঞত্তিভী সহ.

১৯. সেসং বাৰীসতি চেকৰীস ৰীসতি বাহিরং;

অপ্পসাদমৰত্থুং চ, অদ্ৰারঞ্চ যথাক্কমং.

২০. পসাদা পঞ্চ ভাৰাযু, ইন্দ্রিযনিন্দ্রিযেতরং;

ৰিনাপং আদিতো যাৰ, রসা থূলং ন চেতরং.

২১. অট্ঠকং অৰিনিব্ভোগং, ৰণ্ণগন্ধরসোজকং;

ভূতং তং তু ৰিনিব্ভোগমিতরন্তি ৰিনিদ্দিসে.

২২. অট্ঠারসাদিতো রূপা, নিপ্ফন্নং তু ন চেতরং;

ফোট্ঠব্বমাপৰজ্জং তু, ভূতং কামে ন চেতরং.

২৩. সেক্খসপ্পটিঘাসেক্খপটিঘং দ্ৰযৰজ্জিতং;

ৰণ্ণং তদিতরং থূলং, সুখুমঞ্চেতি তং তিধা.

২৪. কম্মজাকম্মজংনেৰকম্মাকম্মজতো তিধা;

চিত্তোজউতুজাদীনং, ৰসেনাপি তিধা তথা.

২৫. দিট্ঠং সুতং মুতঞ্চাপি, ৰিঞ্ঞাতং ৰত চেতসা;

একমেকঞ্চ পঞ্চাপি, ৰীসতি চ কমা সিযুং.

২৬. হদযং ৰত্থু ৰিঞ্ঞত্তি, দ্ৰারং চক্খাদিপঞ্চকং;

ৰত্থু দ্ৰারঞ্চ সেসানি, ৰত্থু দ্ৰারঞ্চ নো সিযা.

২৭. নিপ্ফন্নং রূপরূপং খং, পরিচ্ছেদোথ লক্খণং;

জাতিআদিত্তযং রূপং, ৰিকারো লহুতাদিকং.

২৮. যথা সঙ্খতধম্মানং, লক্খণং সঙ্খতং তথা;

পরিচ্ছেদাদিকং রূপং, তজ্জাতিমনতিক্কমা.

২৯. কম্মচিত্তানলাহারপচ্চযানং ৰসেনিধ;

ঞেয্যা পৰত্তি রূপস্স, পিণ্ডানঞ্চ ৰসা কথং.

৩০. কম্মজং সেন্দ্রিযং ৰত্থু, ৰিঞ্ঞত্তি চিত্তজা রৰো;

চিত্তগ্গিজো লহুতাদিত্তযং চিত্তানলন্নজং.

৩১. অট্ঠকং জাতি চাকাসো, চতুজা জরতা খযং;

কুতোচি নেৰ জাতং তপ্পাকভেদং হি তং দ্ৰযং.

৩২. জাতিযাপি ন জাতত্তং, কুতোচিট্ঠকথানযা;

লক্খণাভাৰতো তস্সা, সতি তস্মিং ন নিট্ঠিতি.

৩৩. কম্মচিত্তানলন্নেহি, পিণ্ডা নৰ চ সত্ত চ;

চত্তারো দ্ৰে চ ৰিঞ্ঞেয্যা, সজীৰে দ্ৰে অজীৰকে.

৩৪. অট্ঠকং জীৰিতেনাযুনৰকং ভাৰৰত্থুনা;

চক্খাদী পঞ্চ দসকা, কলাপা নৰ কম্মজা.

৩৫. সুদ্ধট্ঠৰিঞ্ঞত্তিযুত্তনৰকোপি চ দসকো;

সুদ্ধসদ্দেন নৰকো, লহুতাদিদসেককো.

৩৬. ৰিঞ্ঞত্তিলহুতাদীহি, পুন দ্ৰাদস তেরস;

চিত্তজা ইতি ৰিঞ্ঞেয্যা, কলাপা সত্ত ৰা ছ ৰা.

৩৭. সুদ্ধট্ঠং সদ্দনৰকং, লহুতাদিদসেককং;

সদ্দেনলহুতাদীহি, চতুরোতুজকণ্ণিকা.

৩৮. সুদ্ধট্ঠলহুতাদীহি, অন্নজা দ্ৰেতিমে নৰ;

সত্ত চত্তারি দ্ৰে চেতি, কলাপা ৰীসতী দ্ৰিভি.

৩৯. তযট্ঠকা চ চত্তারো, নৰকা দসকা নৰ;

তযো দ্ৰেকো চ একেন, দস দ্ৰীহি চ তীহি চ.

৪০. চতুন্নম্পি চ ধাতূনং, অধিকংসৰসেনিধ;

রূপভেদোথ ৰিঞ্ঞেয্যো, কম্মচিত্তানলন্নজো.

৪১. কেসাদিমত্থলুঙ্গন্তা, পথৰংসাতি ৰীসতি;

পিত্তাদিমুত্তকন্তা তে, জলংসা দ্ৰাদসীরিতা.

৪২. যেন সন্তপ্পনং যেন, জীরণং দহনং তথা;

যেনসিতাদিপাকোতি, চতুরংসানলাধিকা.

৪৩. উদ্ধাধোগমকুচ্ছিট্ঠা, কোট্ঠাসেয্যঙ্গসারি চ;

অস্সাসোতি চ ৰিঞ্ঞেয্যা, ছল়ংসা ৰাযুনিস্সিতা.

৪৪. পুব্বমুত্তকরীসঞ্চুদরিযং চতুরোতুজা;

কম্মা পাচগ্গি চিত্তম্হা-স্সাসোতি ছপি একজা.

৪৫. সেদসিঙ্ঘানিকস্সু চ, খেল়ো চিত্তোতুসম্ভৰা;

দ্ৰিজা দ্ৰত্তিংস কোট্ঠাসা, সেসা এৰ চতুব্ভৰা.

৪৬. একজেস্ৰাদিচতূসু, উতুজা চতুরট্ঠকা;

জীৰীতনৰকো পাচেস্সাসে চিত্তভৰট্ঠকো.

৪৭. দ্ৰিজেসু মনতেজেহি, দ্ৰে দ্ৰে হোন্তি পনট্ঠকা;

সেসতেজানিলংসেসু, একেকম্হি তযো তযো.

৪৮. অট্ঠকোজমনগ্গীহি, হোন্তি অট্ঠসু কম্মতো;

অট্ঠাযুনৰকা এৰং, ইমে অট্ঠ চতুব্ভৰা.

৪৯. চতুৰীসেসু সেসেসু, চতুজেসুট্ঠকা তযো;

একেকম্হি চ ৰিঞ্ঞেয্যা, পিণ্ডা চিত্তানলন্নজা.

৫০. কম্মজা কাযভাৰৰ্হা, দসকাপি সিযুং তহিং;

চতুৰীসেসু অংসেসু, একেকম্হি দুৰে দুৰে.

৫১. পঞ্চাপি চক্খুসোতাদী, পদেসদসকা পুন;

নৰকা সদ্দসঙ্খাতা, দ্ৰেতিচ্চেৰং কলাপতো.

৫২. তেপঞ্ঞাস দসেকঞ্চ, নৰুত্তরসতানি চ;

দসকা নৰকা চেৰ, অট্ঠকা চ সিযুং কমা.

৫৩. সেকপঞ্চসতং কাযে, সহস্সং তং পৰত্ততি;

পরিপুণ্ণিন্দ্রিযে রূপং, নিপ্ফন্নং ধাতুভেদতো.

৫৪. চিত্তুপ্পাদে সিযুং রূপ-হেতূ কম্মাদযো পন;

ঠিতি ন পাঠে চিত্তস্স, ন ভঙ্গে রূপসম্ভৰো.

৫৫. ‘‘অঞ্ঞথত্তং ঠিতস্সা’’তি, ৰুত্তত্তাৰ ঠিতিক্খণং;

অত্থীতি চে পবন্ধেন, ঠিতি তত্থ পৰুচ্চতি.

৫৬. অথ ৰা তিক্খণে কম্মং, চিত্তমত্তুদযক্খণে;

উতুওজাত্তনো ঠানে, রূপহেতূ ভৰন্তি হি.

৫৭. সেয্যস্সাদিক্খণে কায-

ভাৰৰত্থুৰসা তযো;

দসকা হোন্তিভাৰিস্স,

ৰিনা ভাৰং দুৰে সিযুং.

৫৮. ততো পরঞ্চ কম্মগ্গিচিত্তজা তে চ পিণ্ডিকা;

অট্ঠকা চ দুৰে পুব্বে, ৰুত্তৰুত্তক্খণে ৰদে.

৫৯. কালেনাহারজং হোতি, চক্খাদিদসকানি চ;

চতুপচ্চযতো রূপং, সম্পিণ্ডেৰং পৰত্ততি.

৬০. তং সত্তরসচিত্তাযু, ৰিনা ৰিঞ্ঞত্তিলক্খণং;

সন্ততামরণা রূপং, জরাদিফলমাৰহং.

৬১. ভঙ্গা সত্তরসুপ্পাদে, জাযতে কম্মজং ন তং;

তদুদ্ধং জাযতে তস্মা, তক্খযা মরণং ভৰে.

৬২. আযুকম্মুভযেসং ৰা, খযেন মরণং ভৰে;

উপক্কমেন ৰা কেসঞ্চুপচ্ছেদককম্মুনা.

৬৩. ওপপাতিকভাৰিস্স, দসকা সত্ত কম্মজা;

কামে আদো ভৰন্তগ্গিজাহি পুব্বেৰ ভূযতে.

৬৪. আদিকপ্পনরানঞ্চ, অপাযে অন্ধকস্স চ;

বধিরস্সাপি আদো ছ, পুব্বেৰেতরজা সিযুং.

৬৫. তত্থেৰন্ধবধিরস্স, পঞ্চ হোন্তি অভাৰিনো;

যুত্তিযা ইধ ৰিঞ্ঞেয্যা, পঞ্চ ৰা চতুরোপি ৰা.

৬৬. চক্খাদিত্তযহীনস্স, চতুরোৰ ভৰন্তিতি;

ৰুত্তং উপপরিক্খিত্ৰা, গহেতব্বং ৰিজানতা.

৬৭. রূপে জীৰিতছক্কঞ্চ, চক্খাদিসত্তকত্তযং;

পঞ্চ ছ উতুচিত্তেহি, পঞ্চ ছাসঞ্ঞিনং ভৰে.

৬৮. পঞ্চধাত্ৰাদিনিযমা, পাঠে গন্ধরসোজনং;

নুপ্পত্তি তত্থ ভূতানং, অফোট্ঠব্বপৰত্তিনং.

৬৯. থদ্ধুণ্হীরণভাৰোৰ, নত্থি ধাত্ৰাদিকিচ্চতো;

অঞ্ঞং গন্ধাদীনং তেসং, তক্কিচ্চেনোপলদ্ধিতো.

৭০. রূপে সপ্পটিঘত্তাদি, তত্থ রুপ্পনতা ৰিয;

ঘট্টনঞ্চ রৰুপ্পাদস্সঞ্ঞত্থস্সেৰ হেতুতা.

৭১. ইচ্ছিতব্বমিমেকন্তমেৰং পাঠাৰিরোধতো;

অথ ৰা তেহি ৰিঞ্ঞেয্যং, দসকং নৰকট্ঠকং.

৭২. সব্বং কামভৰে রূপং, রূপে একূনৰীসতি;

অসঞ্ঞীনং দস গন্ধরসোজাহি চ ব্রহ্মুনং.

ইতি সচ্চসঙ্খেপে রূপসঙ্খেপো নাম

পঠমো পরিচ্ছেদো.