২. দুতিযো পরিচ্ছেদো

খন্ধত্তযসঙ্খেপো

৭৩. ৰেদনানুভৰো তেধা, সুখদুক্খমুপেক্খযা;

ইট্ঠানিট্ঠানুভৰনমজ্ঝানুভৰলক্খণা.

৭৪. কাযিকং মানসং দুক্খং, সুখোপেক্খা চ ৰেদনা;

একং মানসমেৰেতি, পঞ্চধিন্দ্রিযভেদতো.

৭৫. যথা তথা ৰা সঞ্ঞাণং, সঞ্ঞা সতিনিবন্ধনং;

ছধা ছদ্ৰারসম্ভূতফস্সজানং ৰসেন সা.

৭৬. সঙ্খারা চেতনা ফস্সো,

মনক্কারাযু সণ্ঠিতি;

তক্কো চারো চ ৰাযামো,

পীতি ছন্দোধিমোক্খকো.

৭৭. সদ্ধা সতি হিরোত্তপ্পং, চাগো মেত্তা মতি পুন;

মজ্ঝত্ততা চ পস্সদ্ধী, কাযচিত্তৰসা দুৰে.

৭৮. লহুতা মুদুকম্মঞ্ঞপাগুঞ্ঞমুজুতা তথা;

দযা মুদা মিচ্ছাৰাচা, কম্মন্তাজীৰসংৰরো.

৭৯. লোভো দোসো চ মোহো চ, দিট্ঠি উদ্ধচ্চমেৰ চ;

অহিরীকং অনোত্তপ্পং, ৰিচিকিচ্ছিতমেৰ চ.

৮০. মানো ইস্সা চ মচ্ছেরং, কুক্কুচ্চং থিনমিদ্ধকং;

ইতি এতেৰ পঞ্ঞাস, সঙ্খারক্খন্ধসঞ্ঞিতা.

৮১. ব্যাপারো চেতনা ফস্সো, ফুসনং সরণং তহিং;

মনক্কারো পালনাযু, সমাধি অৰিসারতা.

৮২. আরোপনানুমজ্জট্ঠা, তক্কচারা পনীহনা;

ৰীরিযং পীননা পীতি, ছন্দো তু কত্তুকামতা.

৮৩. অধিমোক্খো নিচ্ছযো সদ্ধা,

পসাদো সরণং সতি;

হিরী পাপজিগুচ্ছা হি,

ওত্তপ্পং তস্স ভীরুতা.

৮৪. অলগ্গো চ অচণ্ডিক্কং, চাগো মেত্তা মতি পন;

যাথাৰবোধো মজ্ঝত্তং, সমৰাহিতলক্খণং.

৮৫. ছ যুগানি কাযচিত্তদরগারৰথদ্ধতা-

অকম্মঞ্ঞত্তগেলঞ্ঞকুটিলানং ৰিনোদনা.

৮৬. তানুদ্ধতাদিথিনাদিদিট্ঠাদীনং যথাক্কমং;

সেসকাদিঅসদ্ধাদিমাযাদীনং ৰিপক্খিনো.

৮৭. দুক্খাপনযনকামা, দযা মোদা পমোদনা;

ৰচীদুচ্চরিতাদীনং, ৰিরামো ৰিরতিত্তযং.

৮৮. লোভো দোসো চ মোহো চ,

গেধচণ্ডমনন্ধনা;

কমেন দিট্ঠি দুগ্গাহো,

উদ্ধচ্চং ভন্ততং মতং.

৮৯. অহিরীকমলজ্জত্তং, অনোত্তপ্পমতাসতা;

সংসযো ৰিচিকিচ্ছা হি, মানো উন্নতিলক্খণো.

৯০. পরস্সকসম্পত্তীনং,

উসূযা চ নিগূহনা;

ইস্সামচ্ছেরকা তাপো,

কতাকতস্স সোচনা.

৯১. থিনং চিত্তস্স সঙ্কোচো, অকম্মঞ্ঞত্ততা পন;

মিদ্ধমিচ্চেৰমেতেসং, লক্খণঞ্চ নযে বুধো.

৯২. ৰেদনাদিসমাধন্তা, সত্ত সব্বগসঞ্ঞিতা;

তক্কাদিঅধিমোক্খন্তা, ছ পকিণ্ণকনামকা.

৯৩. সদ্ধাদযো ৰিরমন্তা, অরণা পঞ্চৰীসতি;

লোভাদিমিদ্ধকন্তানি, সরণানি চতুদ্দস.

৯৪. ইস্সামচ্ছেরকুক্কুচ্চদোসা কামে দযা মুদা;

কামে রূপে চ সেসা ছ-চত্তালীস তিধাতুজা.

৯৫. ছন্দনিচ্ছযমজ্ঝত্তমনক্কারা সউদ্ধৰা;

দযাদী পঞ্চ মানাদী, ছ যেৰাপন সোল়স.

৯৬. ছন্দাদী পঞ্চ নিযতা, তত্থেকাদস নেতরা;

অহিরীকমনোত্তপ্পং, লোকনাসনকং দ্ৰযং.

৯৭. এতে দ্ৰে মোহুদ্ধচ্চাতি, চত্তারো পাপসব্বগা;

লোকপালদুকং ৰুত্তং, হিরিওত্তপ্পনামকং.

৯৮. আরম্মণূপনিজ্ঝানা, ঝানঙ্গা তক্কচারকা;

পীতি একগ্গতা চেতি, সত্ত ৰিত্তিত্তযেন ৰে.

৯৯. সদ্ধা সতি মতেকগ্গ-ধিতি লোকৰিনাসকা;

পালকা নৰ চেতানি, বলানি অৰিকম্পতো.

১০০. এত্থ সদ্ধাদিপঞ্চাযু, কত্ৰাত্র চতুধা মতিং;

ৰেদনাহি দ্ৰিসত্তেতে, ইন্দ্রিযানাধিপচ্চতো.

১০১. মনরূপিন্দ্রিযেহেতে, সব্বে ইন্দ্রিযনামকা;

বাৰীসতি ভৰন্তাযুদ্ৰযং কত্ৰেকসঙ্গহং.

১০২. দিট্ঠীহেকগ্গতাতক্কসতীৰিরতিযো পথা;

অট্ঠ নিয্যানতো আদিচতুরো ভিত্ৰান দ্ৰাদস.

১০৩. ফস্সো চ চেতনা চেৰ,

দ্ৰেৰেত্থাহারণত্ততো;

আহারা মনৰোজাহি,

ভৰন্তি চতুরোথৰা.

১০৪. হেতু মূলট্ঠতো পাপে,

লোভাদিত্তযমীরিতং;

কুসলাব্যাকতে চাপি,

অলোভাদিত্তযং তথা.

১০৫. দিট্ঠিলোভদুসা কম্মপথাপাযস্স মগ্গতো;

তব্বিপক্খা সুগতিযা, তযোতি ছ পথীরিতা.

১০৬. পস্সদ্ধাদিযুগানি ছ, ৰগ্গত্তা যুগল়ানি তু;

উপকারা সতি ধী চ, বহূপকারভাৰতো.

১০৭. ওঘাহরণতো যোগা,

যোজনেনাভৰগ্গতো;

সৰনেনাসৰা দিট্ঠি-

মোহেজেত্থ দুধা লুভো.

১০৮. দল়্হগ্গাহেন দিট্ঠেজা, উপাদানং তিধা তহিং;

দিট্ঠি দোসেন তে গন্থা, গন্থতো দিট্ঠিহ দ্ৰিধা.

১০৯. পঞ্চাৰরণতো কাম-কঙ্খাদোসুদ্ধৰং তপো;

থিনমিদ্ধঞ্চ মোহেন, ছ ৰা নীৰরণানিথ.

১১০. কত্ৰা তাপুদ্ধৰং একং, থিনমিদ্ধঞ্চ ৰুচ্চতি;

কিচ্চস্সাহারতো চেৰ, ৰিপক্খস্স চ লেসতো.

১১১. দিট্ঠেজুদ্ধৰদোসন্ধ-

কঙ্খাথিনুণ্ণতী দস;

লোকনাসযুগেনেতে,

কিলেসা চিত্তক্লেসতো.

১১২. লোভদোসমূহমান-দিট্ঠিকঙ্খিস্সমচ্ছরা;

সংযোজনানি দিট্ঠেজা, ভিত্ৰা বন্ধনতো দুধা.

১১৩. তানি মোহুদ্ধৰংমানকঙ্খাদোসেজদিট্ঠিযো;

দুধাদিট্ঠি তিধা লোভং, ভিত্ৰা সুত্তে দসীরিতা.

১১৪. দিট্ঠিলোভমূহমানদোসকঙ্খা তহিং দুধা;

কত্ৰা লোভমিমে সত্তানুসযা সমুদীরিতা.

১১৫. দিট্ঠি এৰ পরামাসো, ঞেয্যো এৰং সমাসতো;

অত্থো সঙ্খারক্খন্ধস্স, ৰুত্তো ৰুত্তানুসারতো.

ইতি সচ্চসঙ্খেপে খন্ধত্তযসঙ্খেপো নাম

দুতিযো পরিচ্ছেদো.