ছব্বিসতিমো পরিচ্ছেদো

২৬. ৰুট্ঠানৰিসুদ্ধিকথা

১০১৯. তস্সেৰং পটিপন্নস্স, সিখাপত্তা ৰিপস্সনা;

ৰুট্ঠানগামিনী নাম, যদা হোতি তদা পন.

১০২০. পরিকম্মোপচারানুলোমগোত্রভুতো পরং;

মগ্গো ততো ফলং হোতি, ভৰঙ্গা পচ্চৰেক্খণা.

১০২১. পরিকম্মোপচারানুলোমসঙ্খাতগোচরা;

মগ্গস্সাৰজ্জনং হুত্ৰা, নিব্বানে হোতি গোত্রভু.

১০২২. চতুত্থং পঞ্চমং ৰাথ, ছট্ঠং ৰাপি যথারহং;

অপ্পেতি মগ্গজৰনং, নিব্বানে সকিমেৰ তং.

১০২৩. ততো ফলানি তীণি দ্ৰে, একং ৰাথ যথাক্কমং;

মগ্গাৰসেসনিরোধমগ্গৰুট্ঠানৰীথিযং.

১০২৪. ততো ভৰঙ্গপাতোৰ,

তং ছেত্ৰা পচ্চৰেক্খণা;

তিস্সো পঞ্চৰিধা হোন্তি,

যথাযোগং তথা হি চ.

১০২৫. মগ্গং ফলঞ্চ নিব্বানং, অৰস্সং পচ্চৰেক্খতি;

হীনে কিলেসে সেসে চ, পচ্চৰেক্খতি ৰা ন ৰা.

১০২৬. ততো চ পুন সঙ্খারে, ৰিপস্সন্তো যথা পুরে;

অপ্পেতি অনুপুব্বেন, সেসমগ্গফলানি চ.

১০২৭. তত্থ ৰুচ্চন্তি নিব্বান-ফলমগ্গৰিপস্সনা;

সুঞ্ঞতা চানিমিত্তা চ, তথাপণিহিতানি চ.

১০২৮. সুঞ্ঞতাৰিপস্সনাদিনামেন হি ৰিপস্সতি;

ৰিমোক্খমুখভূতাতি, তিৰিধা ভাজিতা তথা.

১০২৯. সুঞ্ঞতাদিকনামেন, ৰিমোক্খা তিৰিধা মতা;

নিব্বানফলমগ্গা চ, সমাপত্তিসমাধযো.

১০৩০. তত্থেৰ পঠমভূমিং, পত্তো অরিযপুগ্গলো;

সত্তক্খত্তুপরমো সো, সোতাপন্নোতি ৰুচ্চতি.

১০৩১. পত্তো দুতিযভূমিঞ্চ, সকদাগামিনামকো;

সকিমেৰ ইমং লোকং, আগন্ত্ৰা হোতি মানুসং.

১০৩২. পত্তো ততিযভূমিঞ্চ, অনাগামীতি ৰুচ্চতি;

ব্রহ্মলোকা অনাগন্ত্ৰা, ইধকামোপপত্তিযা.

১০৩৩. পত্তো চতুত্থভূমিঞ্চ, অরহা অগ্গপুগ্গলো;

দিট্ঠেৰ ধম্মে দুক্খগ্গিং, নিব্বাপেতীতি ৰুচ্চতি.

১০৩৪. ইতি মগ্গফলট্ঠানং, ৰসা অরিযপুগ্গলা;

দ্ৰিধাপি চতুধা যুগ্গা, অট্ঠ হোন্তি ৰিভাগতো.

১০৩৫. উভতোভাগৰিমুত্ত-

ৰিভাগাদিৰসা পন;

ৰিভত্তা হোন্তি সত্তেতে,

যথাযোগং তথা হি চ.

১০৩৬. সদ্ধাধুরস্সানিচ্চতো, ৰুট্ঠানং দুক্খতোপি চ;

পঞ্ঞাধুরস্সানত্ততো, ইতি দীপেন্তি পণ্ডিতা.

১০৩৭. সদ্ধানুসারি আদিম্হি, মজ্ঝে সদ্ধাৰিমুত্তকো;

অন্তে পঞ্ঞাৰিমুত্তোৰ, তস্মা সদ্ধাধুরো সিযা.

১০৩৮. ধম্মানুসারি আদিম্হি, দিট্ঠিপ্পত্তো ততোপরি;

অন্তে পঞ্ঞাৰিমুত্তোৰ, হোতি পঞ্ঞাধুরোপি চ.

১০৩৯. সমথযানিকা চেৰ, রূপানুত্তরপাদকা;

ৰিপস্সনাযানিকা চ, সব্বে সুক্খৰিপস্সকা.

১০৪০. ধুরৰুট্ঠানভেদেন, হোন্তি পঞ্চেৰ সব্বথা;

আরুপ্পপাদকা চাপি, আদিম্হি দুৰিধা তথা.

১০৪১. ছসু ঠানেসু মজ্ঝকে, কাযসক্খীতি ভাজিতা;

উভতোভাগৰিমুত্তো, অরহত্তে পতিট্ঠিতো.

১০৪২. ইত্থং ৰুত্তযানধুর-ৰুট্ঠানানং ৰিভাগতো;

মগ্গপ্ফলভূমিযো চ, সত্তট্ঠারিযপুগ্গলা.

১০৪৩. তত্থ চানুত্তরঞাণং, সচ্চানং পটিৰেধকং;

সমুচ্ছেদপ্পহানেন, ক্লেসানুসযসোধনং.

১০৪৪. চতুমগ্গৰিভাগেন, ৰুট্ঠানন্তি পকিত্তিতং;

ঞাণদস্সনৰিসুদ্ধি, নাম হোতি তথাপি চ.

১০৪৫. মগ্গো চ পরিজানাতি, দুক্খং তেভূমকং তথা;

যথাযোগং পজহতি, তণ্হাসমুদযম্পি চ.

১০৪৬. নিরোধং সচ্ছিকরোতি, মগ্গসচ্চমনুত্তরং;

ভাৰনাৰীথিমোতিণ্ণো, ভাৰেতীতি পৰুচ্চতি.

১০৪৭. দিট্ঠিগ্গতৰিচিকিচ্ছা-সীলব্বতমসেসতো;

অপাযগমনীযঞ্চ, রাগদোসাদিকত্তযং.

১০৪৮. তদেকট্ঠে কিলেসে চ, সহজাতপ্পহানতো;

পজহাতি সোতাপত্তি-মগ্গো পঠমভূমিকো.

১০৪৯. তদেকট্ঠে পজহতি, রাগদোসাদিকেপি চ;

থূলে তু সকদাগামি-মগ্গো দুতিযভূমিকো.

১০৫০. পজহাতি অনাগামি-মগ্গো নিরৰসেসতো;

কামরাগব্যাপাদে চ, তদেকট্ঠে চ সম্ভৰা.

১০৫১. রূপারূপরাগমানু-দ্ধচ্চাৰিজ্জাতি পঞ্চকং;

অগ্গমগ্গো পজহতি, ক্লেসে সেসে চ সব্বথা.

১০৫২. ইতি সচ্চপটিৰেধং, ক্লেসক্খযফলাৰহং;

মগ্গঞাণং পকাসেন্তি, ৰিসুদ্ধিং সত্তমং বুধা.

১০৫৩. ছব্বিসুদ্ধিকমেনেৰং, সব্বথায ৰিসুদ্ধিযা;

সত্তমাযানুপত্তব্বং, নিব্বানন্তি পৰুচ্চতি.

১০৫৪. ক্লেসক্খযকরং তাণং, সংসারাতিক্কমং পরং;

পারিমং তীরমভযং, সব্বসঙ্খারনিস্সটং.

১০৫৫. তেনম্মদনিম্মদনং, পিপাসৰিনযাদিনা;

ক্লেসসংসারসঙ্খার-পটিপক্খনিদস্সিতং.

১০৫৬. অজরামরমচ্চন্ত-মনুপ্পাদমসঙ্খতং;

অনুত্তরমসঙ্খারং, অনন্তমতুলঞ্চ তং.

১০৫৭. পরমত্থমনোপম্মং, সন্তি অপ্পটিমং সুখং;

নিরোধসচ্চ নিব্বানং, একন্তং অমতং পদং.

১০৫৮. সোপাদিসেসনিব্বান-ধাতু চেৰ তথাপরা;

অনুপাদিসেসা চেতি, দুৰিধা পরিযাযতো.

১০৫৯. সুঞ্ঞতং চানিমিত্তঞ্চ, তথাপণিহিতন্তি চ;

অত্তাদিগাহাভাৰেন, তিৰিধাপি চ ভাজিতং.

১০৬০. ক্লেসসংসারসঙ্খার-পচ্চনীকৰিভাগতো;

ভৰক্খযাদিভেদেহি, বহুধাপি পৰুচ্চতি.

১০৬১. তদেৰমচ্চুতং ধম্মং, লোকুত্তরমকালিকং;

ৰানাভাৰা ৰানাতীতো, ‘‘নিব্বান’’ন্তি পকিত্তিতং.

ইতি নিব্বানৰিভাগে ৰুট্ঠানৰিসুদ্ধিকথা নিট্ঠিতা.

ছব্বীসতিমো পরিচ্ছেদো.

নিট্ঠিতো চ সব্বথাপি নিব্বানৰিভাগো.