সত্তৰীসতিমো পরিচ্ছেদো

১০৬২. চিত্তং চেতসিকং রূপং, নিব্বানম্পি চ ভাজিতং;

তস্মা দানি যথাযোগং, পঞ্ঞত্তিপি পৰুচ্চতি.

১০৬৩. সা চাযং অত্থপঞ্ঞত্তি-নামপঞ্ঞত্তিভেদতো;

দুৰিধা হোতি পঞ্ঞত্তি, অত্থপঞ্ঞত্তি তত্থ চ.

১০৬৪. সত্তসম্ভারসণ্ঠান-সঙ্ঘাটপরিণামতো;

ৰিকপ্পুপট্ঠানাকারৰোহারাভিনিৰেসতো.

১০৬৫. তথা পৰত্তসঙ্কেতসিদ্ধা অত্থা পকপ্পিতা;

পঞ্ঞাপীযন্তি নামাতি, পঞ্ঞত্তীতি পকিত্তিতা.

১০৬৬. অত্থা হি পরমত্থত্থা, পঞ্ঞত্তত্থাতি চ দ্ৰিধা;

তত্থ চ পরমত্থত্থা, সচ্চিকট্ঠা সলক্খণা.

১০৬৭. পঞ্ঞত্তত্থা সচ্চিকট্ঠসলক্খণসভাৰতো;

অঞ্ঞথা গহিতা তংতমুপাদায পকপ্পিতা.

১০৬৮. তস্মা উপাদাপঞ্ঞত্তি, অত্থপঞ্ঞত্তিনামকা;

পঞ্ঞপেতব্বনামাৰ, পঞ্ঞত্তত্থাৰ সব্বথা.

১০৬৯. পরমত্থা যথাৰুত্তা, চিত্তচেতসিকাদযো;

পঞ্ঞত্তা ইত্থিপুরিসমঞ্চপীঠপটাদযো.

১০৭০. যেন ৰুচ্চতি তং নামং, পঞ্ঞপেতীতি ৰুচ্চতি;

পঞ্ঞত্তীতি চ সা নামপঞ্ঞত্তীতি ততো মতা.

১০৭১. সঙ্খা সমঞ্ঞা পঞ্ঞত্তি, ৰোহারোতি চ ভাজিতা;

চতুধা পঞ্ঞপেতব্বপঞ্ঞত্তীতি হি ৰণ্ণিতা.

১০৭২. ততো নামং নামকম্মং, নামধেয্যং অথাপরং;

নিরুত্তি ব্যঞ্জনমভিলাপোতি পন ভাজিতা.

১০৭৩. নামপঞ্ঞত্তি নামাতি, পঞ্ঞত্তি দুৰিধা কতা;

সব্বেৰ ধম্মা পঞ্ঞত্তিপথাতি পন ভাজিতা.

১০৭৪. পরমত্থপঞ্ঞত্তত্থা, দুৰিধা হোন্তি তত্থ চ;

পঞ্ঞত্তিপথাৰ হোন্তি, পরমত্থা সলক্খণা.

১০৭৫. পঞ্ঞত্তত্থা পঞ্ঞত্তি চ, পঞ্ঞপেতব্বমত্ততো;

পঞ্ঞত্তিপথা চ নামপঞ্ঞত্তিপথভাৰতো.

১০৭৬. নামম্পি পঞ্ঞাপেতব্বমেৰ কিঞ্চাপি কেনচি;

নামমেৰম্পেতং তত্থ, পঞ্ঞত্তিচ্চেৰ ৰণ্ণিতং.

১০৭৭. পঞ্ঞপেতব্বধম্মা চ, তেসং পঞ্ঞাপিতাপি চ;

ইচ্ছিতব্বাপি পঞ্ঞত্তিপথা পঞ্ঞত্তিনানতা.

১০৭৮. ইতি ৰুত্তানুসারেন, ৰুত্তং অট্ঠকথানযে;

নযং গহেত্ৰা এত্থাপি, পঞ্ঞত্তি দুৰিধা কতা.

১০৭৯. তস্মিম্পি পরমত্থা চ, সচ্চিকট্ঠসলক্খণা;

অত্থা পঞ্ঞত্তিমত্তা চ, অত্থপঞ্ঞত্তিনামকা.

১০৮০. তেসং পঞ্ঞাপিকা চেৰ, নামপঞ্ঞত্তিনামিকা;

ইচ্চেৰং ৰণ্ণনামগ্গে, ঞেয্যত্তা তিৰিধা কতা.

১০৮১. পরমত্থসচ্চং নাম, পরমত্থাৰ তত্থ চ;

সচ্চিকট্ঠসভাৰত্তা, অৰিসংৰাদকা হি তে.

১০৮২. সম্মুতিসচ্চং পঞ্ঞত্তিদ্ৰযং ৰোহারৰুত্তিযা;

লোকসমঞ্ঞাধিপ্পাযাৰিসংৰাদকভাৰতো.

১০৮৩. ইতি সচ্চদ্ৰযম্পেতং, অক্খাসি পুরিসুত্তমো;

তেনাপি নামসংৰিঞ্ঞূ, ৰোহরেয্যুভযম্পি ৰা.

ইতি পঞ্ঞত্তিৰিভাগে পভেদকথা নিট্ঠিতা.

সত্তৰীসতিমো পরিচ্ছেদো.