৩. রূপৰিভাগো

১৮. সরূপকথা

৬৫৩. তেপঞ্ঞাস পনিচ্চেৰং, নামধম্মা পকাসিতা;

অট্ঠৰীসৰিধং দানি, রূপং নাম কথীযতি.

৬৫৪. পথৰাপো চ তেজো চ, ৰাযো চেতি চতুব্বিধো;

চক্খুসোতঘানজিৰ্হা, কাযোতি পন পঞ্চ চ.

৬৫৫. রূপসদ্দগন্ধরসা, চত্তারো চ অথাপরং;

ইত্থিপুম্ভাৰযুগল়ং, জীৰিতং হদযম্পি চ.

৬৫৬. কাযৰিঞ্ঞত্তি চেৰাথ, ৰচীৰিঞ্ঞত্তি চ দ্ৰযং;

আকাসধাতু রূপস্স, লহুতা মুদুতা তস্স.

৬৫৭. কম্মঞ্ঞতা উপচযো, সন্ততি জরতা পন;

অনিচ্চতা চ কবল়ীকারাহারোতি সব্বথা.

৬৫৮. অট্ঠৰীসৰিধং হোতি, রূপমেতং সরূপতো;

তস্স লক্খণভেদেন, সভাৰঞ্চ ৰিভাৰযে.

৬৫৯. সন্ধারণং তু পথৰীধাতু কক্খল়লক্খণা;

আবন্ধনমাপোধাতু, আপগ্ঘরণলক্খণা.

৬৬০. পরিপাচনতা তেজোধাতু উণ্হত্তলক্খণা;

সমুদীরণতা ৰাযোধাতু ৰিত্থম্ভলক্খণা.

৬৬১. সব্বত্থাৰিনিভুত্তাপি, অসম্মিস্সকলক্খণা;

তংতংভাৰসমুস্সন্নসম্ভারেসুপলক্খিতা.

৬৬২. অঞ্ঞমঞ্ঞেনুপত্থদ্ধা, সেসরূপস্স নিস্সযা;

চতুধেৰং কলাপেসু, মহাভূতা পৰত্তরে.

৬৬৩. চক্খু সম্ভারচক্খুম্হি, সত্তক্খিপটলোচিতে;

কণ্হমণ্ডলমজ্ঝম্হি, পসাদোতি পৰুচ্চতি.

৬৬৪. যেন চক্খুপসাদেন, রূপানি অনুপস্সতি;

পরিত্তং সুখুমঞ্চেতং, ঊকাসিরসমূপমং.

৬৬৫. সোতং সোতবিলস্সন্তো,

তম্বলোমাচিতে তথা;

অঙ্গুলিৰেধনাকারে,

পসাদোতি পকাসিতো.

৬৬৬. অন্তো অজপদট্ঠানে, ঘানং ঘানবিলে ঠিতং;

জিৰ্হা জিৰ্হায মজ্ঝম্হি, উপ্পলাকারসন্নিভে.

৬৬৭. ইচ্চেৰং পন চত্তারো, তংতংদেসৰৰত্থিতা;

কাযপ্পসাদোপাদিন্নে, সব্বকেতি যথাক্কমং.

৬৬৮. রূপাদ্যাভিঘাতারহভূতানং ৰা যথারহং;

দট্ঠুকামনিদানাদিকম্মভূতানমেৰ ৰা.

৬৬৯. পসাদলক্খণা ভূতরূপানং ভূতনিস্সিতা;

কপ্পাসপটলস্নেহসন্নিভাতি চ ৰণ্ণিতা.

৬৭০. পঞ্চাপি জীৰিতারক্খা, রূপাদিপরিৰারিতা;

ধীতরাৰ কুমারাৰ, কলাপন্তরৰুত্তিনো.

৬৭১. রূপং নিভাসো ভূতানং, সদ্দো নিগ্ঘোসনং তথা;

গন্ধো চ গন্ধনং তত্থ, রসো চ রসনীযতা.

৬৭২. ভূতত্তযঞ্চ ফোট্ঠব্বং, আপোধাতুৰিৰজ্জিতং;

সদ্দো অনিযতো তত্থ, তদঞ্ঞে সহৰুত্তিনো.

৬৭৩. চক্খাদিপটিহননলক্খণা তু যথাক্কমং;

পঞ্চেৰ পঞ্চৰিঞ্ঞাণৰীথিযা ৰিসযা মতা.

৬৭৪. ইত্থিন্দ্রিযং পনিত্থিত্তং, ইত্থিভাৰোতি দেসিতো;

পুরিসত্তং তথাভাৰো, পুরিসিন্দ্রিয নামকো.

৬৭৫. তং দ্ৰযং পনুপাদিন্নে, কাযে সব্বত্থ লব্ভতি;

কলাপন্তরভিন্নঞ্চ, ভিন্নসন্তানৰত্তি চ.

৬৭৬. রূপানং কম্মজাতানং, অনুপালনলক্খণং;

জীৰিতিন্দ্রিযরূপন্তি, আযু নাম পৰুচ্চতি.

৬৭৭. মনোধাতুযা চ তথা, মনোৰিঞ্ঞাণধাতুযা;

নিস্সযলক্খণং ৰত্থুরূপং হদযনিস্সিতং.

৬৭৮. মজ্ঝে হদযকোসম্হি, অড্ঢপ্পসতলোহিতে;

ভূতরূপমুপাদায, চক্খাদি ৰিয ৰত্ততি.

৬৭৯. আকাসধাতু রূপানং, পরিচ্ছেদকলক্খণা;

তংতংরূপকলাপানং, পরিযন্তোতি ৰুচ্চতি.

৬৮০. চিত্তং সহজরূপানং, কাযস্স গমনাদিসু;

সন্থম্ভনসন্ধারণচলনস্স তু পচ্চযো.

৬৮১. ৰাযোধাতুৰিকারোযং, কাযৰিঞ্ঞত্তিনামকো;

ৰাযোধাতাধিকানং তু, ভূতানমিতি কেচনা.

৬৮২. তথা চিত্তসমুট্ঠিনো, ৰচীঘোসপ্পৰত্তিযং;

উপাদিন্নরূপকাযঘট্টনস্স তু পচ্চযো.

৬৮৩. পথৰীধাতুৰিকারোযং, ৰচীৰিঞ্ঞত্তিনামকো;

পথৰীধাতাধিকানং তু, ভূতানমিতি কেচনা.

৬৮৪. দ্ৰেপি কাযৰচীকম্মদ্ৰারভূতা যথাক্কমং;

তে পন ঘট্টনাহেতু-ৰিকারাকারলক্খণা.

৬৮৫. ৰিঞ্ঞাপেতীতি কাযেন, ৰাচায চ ৰিচিন্তিতং;

সযঞ্চ ৰিঞ্ঞাযতীতি, ৰিঞ্ঞত্তীতি পকিত্তিতা.

৬৮৬. লহুতা পন রূপানং, অদন্ধাকারলক্খণা;

মুদুতাপি চ রূপানং, মদ্দৰাকারলক্খণা.

৬৮৭. কম্মঞ্ঞতা চ রূপানং, যোগ্গতাকারলক্খণা;

গারৰথদ্ধতা যোগ্গপটিপক্খা যথাক্কমং.

৬৮৮. সপ্পাযমুতুমাহারং, লভিত্ৰা চিত্তসম্পদং;

লহূ মুদু চ কম্মঞ্ঞং, যদা রূপং পৰত্ততি.

৬৮৯. তথাপৰত্তরূপস্স, পৰত্তাকারভেদিতং;

লহুতাদিত্তযম্পেতং, সহৰুত্তি তদা ভৰে.

৬৯০. সপ্পাযং পটিৰেধায, পটিপত্তুপকারিতা;

সাকারা রূপসম্পত্তি, পঞ্ঞত্তাৰ মহেসিনা.

৬৯১. রূপস্সোপচযো নাম, রূপস্সাচযলক্খণো;

পৰত্তিলক্খণা রূপসন্ততীতি পকাসিতা.

৬৯২. রূপমাচযরূপেন, জাযতিচ্চুপরূপরি;

পেক্খতোপচযাকারা, জাতি গয্হতি যোগিনো.

৬৯৩. অনুপ্পবন্ধাকারেন, জাযতীতি সপেক্খতো;

তদাযং সন্ততাকারা, জাতি গয্হতি তস্স তু.

৬৯৪. এৰমাভোগভেদেন, জাতিরূপং দ্ৰিধা কতং;

অত্তূপলদ্ধিভাৰেন, জাযন্তং ৰাথ কেৰলং.

৬৯৫. রূপং ৰিৰিত্তোকাসস্স, পূরকট্ঠেন চীযতি;

অভাৰা পুনভাৰায, পৰত্তং সন্ততীতি চ.

৬৯৬. এৰমাকারভেদাৰ, সব্বাকারৰরাকরো;

জাতিরূপং দ্ৰিধাকাসি, জাতিরূপৰিরোচনো.

৬৯৭. জরতা নৰতাহাযা, রূপানং পাকলক্খণা;

অনিচ্চতন্তি মপ্পত্তি, পরিভিজ্জনলক্খণা.

৬৯৮. ইতি লক্খণরূপং তু, তিৰিধং ভিন্নকালিকং;

সভাৰরূপধম্মেসু, তংতংকালোপলক্খিতং.

৬৯৯. যেন লক্খীযতি রূপং, ভিন্নাকারং খণে খণে;

ৰিপস্সনানযত্থায, তমিচ্চাহ তথাগতো.

৭০০. কবল়ীকারো আহারো,

যাপেতব্বোজলক্খণো;

আহারো সেন্দ্রিযজাতো,

রূপকাযানুপালকো.

৭০১. ইচ্চেৰং সপরিচ্ছেদা, সৰিকারা সলক্খণা;

অকিচ্চপটিৰেধায, দযাপন্নেন তাদিনা.

৭০২. তত্থ তত্থ যথাযোগং, দেসিতাতি পকাসিতা;

রূপধম্মা সরূপেন, অট্ঠৰীসতি সব্বথা.

৭০৩. কত্ৰান জাতিমেকং তু, তত্থোপচযসন্ততিং;

সত্তৰীসতি রূপানি, ভৰন্তীতি ৰিনিদ্দিসে.

৭০৪. ভূতত্তযং তু ফোট্ঠব্বং, কত্ৰা ছব্বীসধাপি চ;

উভযং জাতিফোট্ঠব্বং, গহেত্ৰা পঞ্চৰীসতি.

৭০৫. রূপধম্মানমিচ্চেৰং, ৰিভাৰেয্য ৰিসারদো;

সরূপং নামসঙ্খেপং, সভাৰঞ্চ সলক্খণন্তি.

ইতি রূপৰিভাগে সরূপকথা নিট্ঠিতা.

অট্ঠারসমো পরিচ্ছেদো.