একূনৰীসতিমো পরিচ্ছেদো

১৯. পভেদকথা

৭০৬. অট্ঠৰীসৰিধম্পেতং, রূপং দানি যথারহং;

ভূতরূপাদিভেদেহি, ৰিভজেয্য ৰিচক্খণো.

৭০৭. পথৰাদিকমিদন্তি, ভূতরূপং চতুব্বিধং;

উপাদারূপমঞ্ঞং তু, চতুৰীসতিৰিধং ভৰে.

৭০৮. পঞ্চৰিধম্পি চক্খাদিরূপমজ্ঝত্তিকং মতং;

তেৰীসতিৰিধং সেসং, বাহিরন্তি পৰুচ্চতি.

৭০৯. রূপসদ্দগন্ধরসফোট্ঠব্বা সত্ত পঞ্চধা;

পঞ্চপ্পসাদৰিসযা, পঞ্চারম্মণনামকা.

৭১০. একৰীসতিৰিধং সেসং, ধম্মারম্মণসঙ্গহং;

মনোৰিঞ্ঞাণৰিঞ্ঞেয্যং, মনোদ্ৰারস্স গোচরং.

৭১১. পসাদা ৰিসযা চেৰ, পঞ্চকা দ্ৰেপি সম্ভৰা;

দ্ৰাদসাপি সরূপেন, দসাযতনধাতুযো.

৭১২. যদেদং পন সব্বম্পি, রূপং সপ্পটিঘং মতং;

তদেৰোল়ারিকং নাম, সন্তিকেতি পৰুচ্চতি.

৭১৩. সেসমপ্পটিঘং নাম, ধম্মাযতনধাতু চ;

সুখুমঞ্চেৰ রূপঞ্চ, রূপং সোল়সধা ঠিতং.

৭১৪. ছব্বিধা ৰত্থুরূপং তু, পসাদহদযম্পি চ;

অৰত্থুরূপং সেসং তু, দ্ৰাৰীসতিৰিধং ভৰে.

৭১৫. পসাদা চেৰ ৰিঞ্ঞত্তি, দ্ৰাররূপং তু সত্তধা;

সেসং অদ্ৰাররূপং তু, একৰীসৰিধম্পি চ.

৭১৬. পসাদা ভাৰযুগল়ং, জীৰিতঞ্চেতি অট্ঠধা;

ইন্দ্রিযরূপমঞ্ঞং তু, ৰীসধানিন্দ্রিযং সিযা.

৭১৭. ৰণ্ণো গন্ধো রসো ওজা, ভূতরূপন্তি অট্ঠধা;

অৰিনিব্ভোগমিতরং, ৰিনিব্ভোগং তু ৰীসধা.

৭১৮. অৰিনিব্ভোগরূপানি, সদ্দৰত্থিন্দ্রিযানি চ;

নিপ্ফন্নং অট্ঠারসধা, রূপরূপন্তি ৰেদিতং.

৭১৯. পরিচ্ছেদো পনাকাসো, ৰিঞ্ঞত্তিলহুতাদযো;

ৰিকারা লক্খণা চেৰ, রূপস্সুপচযাদযো.

৭২০. দসধাপি অনিপ্ফন্নং, নত্থেতং পরমত্থতো;

রূপস্সেতন্তি কত্ৰান, রূপমিচ্চেৰ ৰুচ্চতি.

৭২১. রূপাযতনমেৰেকং, সনিদস্সনমীরিতং;

অনিদস্সনমঞ্ঞং তু, সত্তৰীসতিৰিধম্পি চ.

৭২২. কম্মজং পনুপাদিন্নং, অনুপাদিন্নকাপরং;

তিৰিধং চিত্তজঞ্চেৰ, উতুজাহারজন্তি চ.

৭২৩. চক্খুসম্ফস্সৰত্থূতি, চক্খুধাতু পকিত্তিতা;

ন ৰত্থু তস্স সেসং তু, সত্তৰীসতিৰিধং ভৰে.

৭২৪. সোতসম্ফস্সৰত্থাদি-ৰসা চ দুৰিধা তথা;

তিৰিধা চ ৰিভাৰেয্য, যথাসম্ভৰতো কথং.

৭২৫. সনিদস্সনরূপঞ্চ, ৰণ্ণো সপ্পটিঘম্পি চ;

অনিদস্সনমঞ্ঞং তু, থূলং সপ্পটিঘং ভৰে.

৭২৬. অনিদস্সনরূপঞ্চ, সেসমপ্পটিঘম্পি চ;

সোল়সাতি চ সব্বম্পি, রূপং তিৰিধমুদ্দিসে.

৭২৭. অপত্তগাহকং নাম, চক্খুসোতদ্ৰযং পন;

সম্পত্তগাহকং নাম, ঘানাদিত্তযমীরিতং.

৭২৮. অগাহকমতো সেসং, তেৰীসতিৰিধং ভৰে;

কিঞ্চি সারম্মণং নাম, ন গয্হতীতি সব্বথা.

৭২৯. উপাদা অজ্ঝত্তিকং রূপং, উপাদা বাহিরং তথা;

নোপাদা বাহিরঞ্চেতি, এৰম্পি তিৰিধং ভৰে.

৭৩০. অজ্ঝত্তিকমুপাদিন্নং, বাহিরঞ্চ তথাপরং;

অনুপাদিন্নকঞ্চেতি, এৰমাদিৰসাপি চ.

৭৩১. দিট্ঠং রূপং সুতং সদ্দো, গন্ধাদি তিৰিধং মুতং;

ৰিঞ্ঞাতমঞ্ঞৰিঞ্ঞেয্যং, মনসাতি চতুব্বিধং.

৭৩২. রূপরূপং পরিচ্ছেদো, ৰিকারো লক্খণং কমা;

অট্ঠারসেককং পঞ্চ, চতুক্কন্তি চ তং তথা.

৭৩৩. দ্ৰারঞ্চ হোতি ৰত্থু চ, ন ৰত্থু দ্ৰারমেৰ তু;

ন দ্ৰারং ৰত্থুমেৰাথ, নোভযন্তি চ নিদ্দিসে.

৭৩৪. উপাদা অনুপাদিন্নং, অনুপাদিন্নকং তথা;

নোপাদা দুৰিধঞ্চেতি, চতুদ্ধেৰম্পি দেসিতং.

৭৩৫. সপ্পটিগ্ঘমুপাদা চ, রূপমপ্পটিঘং তথা;

নোপাদা দুৰিধঞ্চেতি, চতুদ্ধা এৰমাদিতো.

৭৩৬. একাদসেকজরূপং, হদযিন্দ্রিযনৰকং;

কম্মজং চিত্তজঞ্চেৰ, তথা ৰিঞ্ঞত্তিকং দ্ৰযং.

৭৩৭. সদ্দো চিত্তোতুজো তস্মা, রূপমেকং দ্ৰিজং মতং;

চিত্তোতাহারসম্ভূতং, লহুতাদিত্তযং তিজং.

৭৩৮. নৰাকাসাৰিনিব্ভোগা, কম্মাদিচতুসম্ভৰা;

অথ লক্খণরূপন্তি, রূপমেৰং তু পঞ্চধা.

৭৩৯. নৰাকাসাৰিনিব্ভোগা, নৰ ৰত্থিন্দ্রিযানি চ;

অট্ঠারসৰিধং রূপং, কম্মজং হোতি পিণ্ডিতং.

৭৪০. সদ্দাকাসাৰিনিব্ভোগা, ৰিঞ্ঞত্তিলহুতাদযো;

পঞ্চদসৰিধং রূপং, চিত্তসম্ভৰমুদ্দিসে.

৭৪১. সদ্দাকাসাৰিনিব্ভোগা, লহুতাদিত্তযন্তি চ;

উতুসম্ভৰমীরেন্তি, রূপং তেরসধা ঠিতং.

৭৪২. পরিচ্ছেদাৰিনিব্ভোগা, লহুতাদিত্তযম্পি চ;

এৰমাহারজং নাম, রূপং দ্ৰাদসধা ঠিতং.

৭৪৩. জাতি জরা চ মরণং, ন কুতোচিপি জাযতি;

এৰম্পি পঞ্চধা হোতি, রূপজাতিৰিভাগতো.

৭৪৪. পঞ্চৰীসতিৰিধং কম্মং, কামরূপৰৰত্থিতং;

জনেতি কম্মজং রূপং, কামরূপভৰদ্ৰযে.

৭৪৫. পঞ্চৰিঞ্ঞাণমারুপ্প-ৰিপাকা সব্বসন্ধিযো;

চুতি খীণাসৰস্সেতি, সোল়সেতে ৰিৰজ্জযে.

৭৪৬. পঞ্চসত্ততি সেসানি, চিত্তানিমানি সম্ভৰা;

জনেন্তি চিত্তজং রূপং, পঞ্চৰোকারভূমিযং.

৭৪৭. জনেভি উতুজং রূপং, তেজোধাতু ভৰদ্ৰযে;

কামভূমিযমোজা তু, জনেতাহারজং তথা.

৭৪৮. কম্মং জনেতি রূপানি, অত্তজানি খণে খণে;

চিত্তমুপ্পাদকালম্হি, উপ্পাদানন্তরং পরং.

৭৪৯. উতুসম্ভৰমীরেন্তি, রূপং তেরসধা ঠিতং;

পরিচ্ছেদাৰিনিব্ভোগা, লহুতাদিত্তযম্পি চ.

৭৫০. সন্ধিযম্পি কম্মজং তু, পৰত্তেপি চ সম্ভৰা;

জনেতি রূপং সেসানি, পৰত্তে, ন তু সন্ধিযং.

৭৫১. ইন্দ্রিযবদ্ধসন্তানে, কম্মাদি তিৰিধম্পি চ;

জনেতি রূপং মতকে, বাহিরে তু যথারহং.

৭৫২. ইতি কম্মাদযো রূপং, জনেন্তি চ যথাসকং;

সেসানম্পি চ রূপানং, পচ্চযা হোন্তি সম্ভৰা.

৭৫৩. ইতি রূপৰিভাগঞ্চ, জাতিভেদঞ্চ সম্ভৰা;

জনকাদিপ্পভেদঞ্চ, রূপানং তত্থ দীপযেতি.

ইতি রূপৰিভাগে পভেদকথা নিট্ঠিতা.

একূনৰীসতিমো পরিচ্ছেদো.