তেরসমো পরিচ্ছেদো

১৩. রাসিযোগকথা

৪৪১. ইতি রাসিৰীথিং ঞত্ৰা, লব্ভমানৰসা বুধো;

তেসমেৰাথ যোগম্পি, চিত্তুপ্পাদেসু দীপযে.

৪৪২. কামাৰচরকুসলস্স, পঠমদ্ৰযমানসে;

সব্বেপি রাসযো হোন্তি, যথাসম্ভৰতো কথং.

৪৪৩. ফস্সপঞ্চকরাসী চ, ঝানপঞ্চকরাসি চ;

ইন্দ্রিযট্ঠকরাসী চ, মগ্গপঞ্চকরাসি চ.

৪৪৪. বলসত্তকরাসী চ, হেতুকম্মপথত্তিকা;

দসাৰসেসা রাসী চ, লোকপালদুকাদযো.

৪৪৫. যেৰাপনকনৰকং, নিযতুদ্ধচ্চৰজ্জিতা;

অপ্পমঞ্ঞাদ্ৰযঞ্চেৰ, তিস্সো ৰিরতিযোতি চ.

৪৪৬. ইতি সত্তরসেৰেতে, দেসিতা চ সরূপতো;

যেৰাপনকরাসী চ, লব্ভন্তিট্ঠারসাপি চ.

৪৪৭. ছপ্পঞ্ঞাস পদানেত্থ, দেসিতানি সরূপতো;

ধম্মা পন সমতিংস, তত্থ হোন্তি সরূপতো.

৪৪৮. তানি যেৰাপনকেহি, পঞ্চসট্ঠি পদানি চ;

ধম্মা চেকূনতালীস, ভৰন্তি পন সম্ভৰা.

৪৪৯. তত্থ দ্ৰাদস ধম্মা চ, দেসিতা সৰিভত্তিকা;

অৰসেসা তু সব্বেপি, অৰিভত্তিকনামকা.

৪৫০. একদ্ৰি চ তিচতুক্ক-ছসত্তট্ঠানিকা পন;

সত্তৰীস চ সত্তেকো, দ্ৰেকেকো চ যথাক্কমং.

৪৫১. নিযতা তু চতুত্তিংস, ধম্মাৰ সহৰুত্তিতো;

যথাসম্ভৰৰুত্তিতো, পঞ্চধা নিযতা কথা.

৪৫২. তত্থ চানিযতে সব্বে, গহেত্ৰা চ পহায চ;

পচ্চেকঞ্চ গহেত্ৰাপি, সত্তধা যোজনক্কমো.

৪৫৩. সকিমেকূনতালীস, চতুত্তিংস যথাক্কমং;

পঞ্চক্খত্তুঞ্চ যোজেয্য, পঞ্চতিংসাতি পণ্ডিতো.

৪৫৪. রাসযো চ পদানীধ, ধম্মন্তরৰিভত্তিযো;

সরূপযেৰাপনকে, নিযতানিযতে যথা.

৪৫৫. যোজনানযভেদঞ্চ, গণনাসঙ্গহট্ঠিতি;

লব্ভমানানুমানেন, সল্লক্খেন্তো তহিং তহিং.

৪৫৬. ঞাণং ঞাণৰিযুত্তম্হি, হিত্ৰা পীতিং উপেক্খিতে;

ৰেদনা পরিৰত্তেন্তো, কামপুঞ্ঞে চ সেসকে.

৪৫৭. মহাক্রিযে চ যোজেয্য, পহায ৰিরতিত্তযং;

অপ্পমঞ্ঞা চ হিত্ৰাথ, মহাপাকে চ যোজযে.

৪৫৮. তক্কাদিং কমতো হিত্ৰা, সব্বত্থ ৰিরতিত্তযং;

পঞ্চমে অপ্পমঞ্ঞায, হিত্ৰা রূপে চ যোজযে.

৪৫৯. হিত্ৰাপ্পমঞ্ঞা যোজযে, যথাঝানমনুত্তরে;

লোকুত্তরিন্দ্রিযঞ্চেৰ, গহেত্ৰা ৰিরতিত্তযং.

৪৬০. ঝানানি চতুতালীস, সুখযুত্তানি ৰত্তরে;

উপেক্খিতানি তেৰীস, পঞ্চমজ্ঝানে চ সব্বথা.

৪৬১. অপ্পমঞ্ঞাৰিরতিযো, কামপুঞ্ঞেসু লব্ভরে;

অপ্পমঞ্ঞা রূপজ্ঝান-চতুক্কে চ মহাক্রিযে.

৪৬২. লোকুত্তরেসু সব্বত্থ, সম্ভোতি ৰিরতিত্তযং;

নত্থিদ্ৰযম্পি আরুপ্পে, মহাপাকে চ পঞ্চমে.

৪৬৩. ৰিতক্কাদিত্তযং পঞ্ঞা, পঞ্চ চানিযতা চলা;

হানিবুদ্ধিৰসা সেসা, ন চলন্তি কুদাচনং.

৪৬৪. বাৰীসতিৰিধো চেত্থ, সঙ্গহো অনৰজ্জকে;

দ্ৰযদ্ৰযৰসা চেৰ, ঝানপঞ্চকতোপি চ.

৪৬৫. ইতি ঞত্ৰানৰজ্জেসু, রাসিসঙ্গহ সম্ভৰং;

সাৰজ্জেসুপি ৰিঞ্ঞেয্যা, ৰিঞ্ঞুনা রাসযো কথং.

৪৬৬. লোভমূলেসু পঠমে, ফস্সপঞ্চকরাসি চ;

ঝানপঞ্চকরাসী চ, তথেৰিন্দ্রিযপঞ্চকং.

৪৬৭. মগ্গবলচতুক্কঞ্চ, হেতুকম্মপথদুকা;

লোকনাসকরাসী চ, সমথো সমথদ্দুকা.

৪৬৮. তত্রমজ্ঝত্ততং হিত্ৰা, যেৰাপনকনামকা;

চত্তারো চেতি লব্ভন্তি, তত্থেকাদস রাসযো.

৪৬৯. দ্ৰত্তিংসেৰ পদানেত্থ, দেসিতানি সরূপতো;

তানি যেৰাপনকেহি, ছত্তিংসেৰ ভৰন্তি চ.

৪৭০. অসম্ভিন্নপদানেত্থ, সমৰীসতি সম্ভৰা;

সৰিভত্তিকনামা চ, নৰ ধম্মা পকাসিতা.

৪৭১. একদ্ৰযতিচতুক্ক-ছট্ঠাননিযতা পন;

একাদস ছল়েকা চ, কমেনেকো পুনেককো.

৪৭২. নত্থেৰানিযতা হেত্থ, যেৰাপনকনামকা;

যোজনানযভেদো চ, তস্মা তত্থ ন ৰিজ্জতি.

৪৭৩. মানো চ থিনমিদ্ধঞ্চ, ইস্সা মচ্ছরিযং তথা;

কুক্কুচ্চমিতি সাৰজ্জে, ছল়েৰানিযতা মতা.

৪৭৪. মানো দিট্ঠিৰিযুত্তেসু, সসঙ্খারেসু পঞ্চসু;

থিনমিদ্ধং তযো সেসা, পটিঘদ্ৰযযোগিনো.

৪৭৫. ইচ্চেৰমট্ঠ সাৰজ্জা, অনৰজ্জট্ঠৰীসতি;

ছত্তিংস মানসা সব্বে, হোন্তানিযতযোগিনো.

৪৭৬. তেহি যুত্তা যথাযোগং, একদ্ৰিত্তযপঞ্চহি;

দ্ৰে দ্ৰাৰীসং তযো চেৰ, নৰ চাথ যথাক্কমং.

৪৭৭. ইতি ৰুত্তানুসারেন, লব্ভমানৰসা পন;

তদঞ্ঞেসুপি যোজেয্য, সাৰজ্জেসু যথাক্কমং.

৪৭৮. লোভমূলেসু লোভঞ্চ, দোসঞ্চ পটিঘদ্ৰযে;

মোহমূলে কঙ্খুদ্ধচ্চং, গহেত্ৰা হেতুরাসিযং.

৪৭৯. দিট্ঠিং দিট্ঠিৰিযুত্তম্হি, হিত্ৰা পীতিমুপেক্খিতে;

ৰেদনং পরিৰত্তেন্তো, দোসমূলে চ পণ্ডিতো.

৪৮০. তথা কম্মপথং দিট্ঠিং,

পীতিং ছন্দঞ্চ মোমুহে;

কঙ্খিতে অধিমোক্খঞ্চ,

হিত্ৰা যোজেয্য রাসযো.

৪৮১. চিত্তস্স ঠিতিং পত্তাসু, চিত্তস্সেকগ্গতা পন;

কঙ্খিতে পরিহীনাৰ, ইন্দ্রিযাদীসু পঞ্চসু.

৪৮২. ইতি দ্ৰাদসধা ঞত্ৰা, সাৰজ্জেসুপি সঙ্গহং;

অহেতুকেপি ৰিঞ্ঞেয্যা, যথাসম্ভৰতো কথং.

৪৮৩. অট্ঠারসাহেতুকেসু, পঞ্চৰিঞ্ঞাণমানসে;

ফস্সপঞ্চকরাসী চ, ঝানট্ঠানদুকং তথা.

৪৮৪. ইন্দ্রিযত্তিকরাসী চ, যেৰাপনকনামকো;

একো মনসিকারোতি, চত্তারো রাসযো সিযুং.

৪৮৫. অসম্ভিন্না পনট্ঠেৰ, দ্ৰে তত্থ সৰিভত্তিকা;

একদ্ৰযতিকট্ঠানা, ছল়েকো চ পুনেককো.

৪৮৬. মনোধাতুত্তিকাহেতু-পটিসন্ধিযুগে পন;

ৰিতক্কো চ ৰিচারো চ, অধিকা ঝানরাসিযং.

৪৮৭. সুখসন্তীরণে পীতি, দুতিযাৰজ্জনে পন;

ৰীরিযঞ্চ সমাধিঞ্চ, লব্ভতিন্দ্রিযরাসিযং.

৪৮৮. অধিকা হসিতে হোন্তি, পীতি চ ৰীরিযাদযো;

যেৰাপনাধিমোক্খো চ, পঞ্চৰিঞ্ঞাণৰজ্জিতে.

৪৮৯. ইচ্চানৰজ্জে বাৰীস,

সাৰজ্জে দ্ৰাদসাপরে;

যোগা হেতুম্হি পঞ্চেতে,

তালীসেকূনকা কথাতি.

ইতি চেতসিকৰিভাগে রাসিযোগকথা নিট্ঠিতা.

তেরসমো পরিচ্ছেদো.