চুদ্দসমো পরিচ্ছেদো

১৪. রাসিসম্ভৰকথা

৪৯০. নৰেৰ যেৰাপনকা, অট্ঠারস চ রাসযো;

নৰভিংসতিসম্ভিন্না, দস দ্ৰে সৰিভত্তিকা.

৪৯১. একদ্ৰযতিচতুছসত্তট্ঠানানৰজ্জকে;

সত্তৰীসতি সত্তেকো, দ্ৰযমেকো পুনেককো.

৪৯২. দসেৰ যেৰাপনকা, একাদস চ রাসযো;

অট্ঠৰীসতিসম্ভিন্না, দসেৰ সৰিভত্তিকা.

৪৯৩. একদ্ৰযতিচতুক্কছট্ঠাননিযতা পন;

অট্ঠারস চ সত্তেকো, একো চেকোৰ পাপকে.

৪৯৪. দ্ৰে যেৰাপনকা হোন্তি, রাসযো চ চতুব্বিধা;

তেরসেত্থ অসম্ভিন্না, তযোৰ সৰিভত্তিকা.

৪৯৫. একদ্ৰযতিকট্ঠানা, দস দ্ৰেকো অহেতুকে;

ইচ্চানৰজ্জা সাৰজ্জা-হেতুকে যোগনিচ্ছযো.

৪৯৬. সত্তাপি নত্থি সাৰজ্জে, নিরৰজ্জে পকাসকো;

অহেতুকে চ মগ্গাদিরাসযো নত্থি চুদ্দস.

৪৯৭. অনৰজ্জা তু সাৰজ্জে, সাৰজ্জকানৰজ্জকে;

চিত্তুপ্পাদম্হি নত্থেৰ, নত্থোভযমহেতুকে.

৪৯৮. সাৰজ্জা পন সাৰজ্জে, অনৰজ্জানৰজ্জকে;

গহেতব্বা তু সব্বত্থ, সাধারণা পকিণ্ণকা.

৪৯৯. ঝানপঞ্চকচিত্তেসু, সত্তসট্ঠিসু নিদ্দিসে;

ঝানঙ্গযোগভেদেন, রাসিভেদং তহিং তহিং.

৫০০. চতুছক্কানৰজ্জেসু, ঞাণপীতিকতং তথা;

চতুৰীস পরিত্তেসু, চতুধা ভেদমুদ্দিসে.

৫০১. সরাগৰীতরাগানং, অপ্পমঞ্ঞাপৰত্তিযং;

করুণামুদিতা হোন্তি, কামপুঞ্ঞমহাক্রিযে.

৫০২. উপচারপ্পনাপত্তা, সুখিতা সত্তগোচরা;

তস্মা ন পঞ্চমারুপ্পে, মহাপাকে অনুত্তরে.

৫০৩. সোতাপতিতুপেক্খাসু, পরিকম্মাদিসম্ভৰে;

ঝানানং তুল্যপাকত্তা, তপ্পাকেসু চ লব্ভরে.

৫০৪. ৰিরতী চ সরাগানং, ৰীতিক্কমনসম্ভৰা;

সম্পত্তে চ সমাদানে, কামপুঞ্ঞেসু লব্ভরে.

৫০৫. তংতংদ্ৰারিকদুস্সিল্য-চেতনুচ্ছেদকিচ্চতো;

মগ্গে চ তুল্যপাকত্তা, ফলে চ নিযতা সিযুং.

৫০৬. পৰত্তাকারৰিসযভিন্না পঞ্চাপি সম্ভৰা;

লোকিযে লব্ভমানাপি, ৰিসুং চেৰ সিযুং ন ৰা.

৫০৭. পাপা লব্ভন্তি পাপেসু, সত্ত ছক্কেককা কমা;

সরূপযেৰোভযকা, নিযতট্ঠ ছল়েতরে.

৫০৮. সাধারণা চ সব্বত্থ, যথাৰুত্তা পকিণ্ণকা;

তত্থ চেকগ্গতা নত্থি, ইন্দ্রিযাদীসু কঙ্খিতে.

৫০৯. ছন্দাধিমোক্খা যেৰাপি, ৰীসেকাদসৰজ্জিতে;

উদ্ধচ্চমেকাদসসু, মজ্ঝত্তমনৰজ্জকে.

৫১০. সব্বত্থ মনসিকারো, তিদ্ৰেকদ্ৰিতিকাপরে;

অট্ঠট্ঠৰীসচতূসু, পঞ্চদ্ৰীসু যথাক্কমং.

৫১১. সমুদাযৰসেনেত্থ, উদ্ধচ্চৰিরতিত্তযং;

সৰিভত্তিকমঞ্ঞত্থ, অৰিভত্তিকমেৰ তং.

৫১২. চিত্তুপ্পাদেসু তেনেতং, ৰিভত্তিঅৰিভত্তিকং;

ইতি সাধু সল্লক্খেয্য, সম্ভৰাসম্ভৰং বুধোতি.

ইতি চেতসিকৰিভাগে রাসিসম্ভৰকথা নিট্ঠিতা.

চুদ্দসমো পরিচ্ছেদো.