দ্ৰাদসমো পরিচ্ছেদো

১২. রাসিৰিনিচ্ছযকথা

৪১৬. তত্থ ৰিঞ্ঞাণকাযা ছ, সত্ত ৰিঞ্ঞাণধাতুযো;

ফস্সা চক্খাদিসম্ফস্সা, ছব্বিধা সত্তধাপি চ.

৪১৭. চক্খুসম্ফস্সজাদীহি, ভেদেহি পন ৰেদনা;

সঞ্ঞা চ চেতনা চেৰ, ভিন্না ছধা চ সত্তধা.

৪১৮. চিত্তুপ্পাদেসু ধম্মা চ, খন্ধাযতনধাতুযো;

আহারা চ যথাযোগং, ফস্সপঞ্চকরাসিযং.

৪১৯. সব্বে সঙ্গহিতা হোন্তি, তস্মা নামপরিগ্গহো;

মূলরাসি চ সো সব্ব-সঙ্গহোতি পৰুচ্চতি.

৪২০. ঝানরাসিম্হি পঞ্চেৰ, ধম্মা সত্তপ্পভেদতো;

ইন্দ্রিযানি চ বাৰীস, ধম্মতো পন সোল়স.

৪২১. নৰ মগ্গঙ্গধম্মা চ, ভিন্না দ্ৰাদসধাপি তে;

ছল়েৰ হেতুযো তত্থ, দেসিতা কঙ্খিতুদ্ধৰা.

৪২২. দস কম্মপথা ধম্মা, ছল়েৰ পন দেসিতা;

সেসাৰ দসধম্মেহি, সমানা চতুরাসযো.

৪২৩. পঞ্ঞা দসৰিধা তত্থ, ৰেদনা নৰধা ঠিতা;

সমাধি সত্তধা হোতি, ৰীরিযং পন পঞ্চধা.

৪২৪. সতি ভিন্না চতুধাৰ, ৰিতক্কো তিৰিধো মতো;

দ্ৰিধা চিত্তাদযো হোন্তি, দসপঞ্চেৰ সম্ভৰা.

৪২৫. সেসা দ্ৰত্তিংস সব্বেপি, ধম্মা একেকধাপি চ;

হিত্ৰা রূপিন্দ্রিযানেতে, ৰিভাগা অট্ঠধা কথং.

৪২৬. ফস্সো চ চেতনা সঞ্ঞা, ৰিচারো পীতি জীৰিতং;

নিরৰজ্জা ছ যুগল়া, সাৰজ্জমোহকঙ্খিতা.

৪২৭. যেৰাপনকধম্মা চ, ৰিরতুদ্ধচ্চৰজ্জিতা;

দ্ৰাদসা চেতি সব্বেপি, দ্ৰত্তিংসকেকধা তথা.

৪২৮. চিত্তং মনিন্দ্রিযং চিত্তং, সদ্ধা সদ্ধিন্দ্রিযং বলং;

বলেসু লোকিযা ৰুত্তা, লোকিযে চ দুকদ্ৰযে.

৪২৯. লোভালোভাদিকা দ্ৰে দ্ৰে,

চত্তারো হেতুরাসিযং;

মিচ্ছাদিট্ঠি চ মগ্গঙ্গে,

পঞ্চকম্মপথেপি তে.

৪৩০. যেৰাপনকরাসিম্হি, দেসিতা ৰিরতুদ্ধৰা;

মগ্গহেতূসু চেৰেতি, দ্ৰিধা পঞ্চদস ঠিতা.

৪৩১. ৰিতক্কো ঝানমগ্গেসু, তিৰিধা নৰধা পন;

ৰেদনা মূলরাসিম্হি, তথা ঝানিন্দ্রিযেসু চ.

৪৩২. ইন্দ্রিযমগ্গরাসিম্হি, বলপিট্ঠিদুকত্তিকে;

চতুধা সতি তত্থেৰ, ৰীরিযম্পি চ পঞ্চধা.

৪৩৩. সমাধি সত্তধা ৰুত্তো, ঝানঙ্গেসু চ তত্থ চ;

তত্থেৰ দসধা পঞ্ঞা, হেতুকম্মপথেসু চ.

৪৩৪. দসনৰসত্তপঞ্চচতুতিদ্ৰেকধা ঠিতা;

ছল়েককা পঞ্চদস, দ্ৰত্তিংস চ যথাক্কমং.

৪৩৫. অট্ঠ ৰিভাগসঙ্খেপা, পদানি দসধা সিযুং;

তেপঞ্ঞাসেৰ ধম্মা চ, অট্ঠারস চ রাসযো.

৪৩৬. ইতি ধম্মৰৰত্থানে, ধম্মসঙ্গণিযং পন;

চিত্তুপ্পাদপরিচ্ছেদে, উদ্দেসনযসঙ্গহো.

৪৩৭. পদানি চতুরাসীতি, দেসিতানি সরূপতো;

যেৰাপনকনামেন, সোল়সেৰ যথারহং.

৪৩৮. তত্থানিযতনামানি, পদানেকাদসেৰ তু;

ৰুত্তানেকূননৰুতি, নিযতানেৰ সম্ভৰা.

৪৩৯. অসম্ভিন্নপদানেত্থ, তেপঞ্ঞাসেৰ সব্বথা;

চিত্তচেতসিকানং তু, ৰসেন পরিদীপযে.

৪৪০. ৰিভাগপদধম্মানং, ৰসেনেৰং পকাসিতো;

চিত্তচেতসিকানং তু, কমতো রাসিনিচ্ছযোতি.

ইতি চেতসিকৰিভাগে রাসিৰিনিচ্ছযকথা নিট্ঠিতা.

দ্ৰাদসমো পরিচ্ছেদো.