একাদসমো পরিচ্ছেদো

১১. রাসিসরূপকথা

৩৮৪. সব্বং সভাৰসামঞ্ঞ-ৰিসেসেন যথারহং;

গতরাসিৰসেনাথ, অট্ঠারসৰিধং কথং.

৩৮৫. ফস্সপঞ্চকরাসী চ, ঝানিন্দ্রিযমথাপরে;

মগ্গবলহেতুকম্ম-পথলোকিযরাসযো.

৩৮৬. নিরৰজ্জা ছ পস্সদ্ধি-আদিকা চ সতীমতা;

যুগনন্ধা চ সমথা, তথা যেৰাপনাতি চ.

৩৮৭. ফস্সো চ ৰেদনা সঞ্ঞা, চেতনা চিত্তমেৰ চ;

ফস্সপঞ্চকরাসীতি, পঞ্চ ধম্মা পকাসিতা.

৩৮৮. ৰিতক্কো চ ৰিচারো চ, পীতি চেকগ্গতা তথা;

সুখং দুক্খমুপেক্খাতি, সত্ত ঝানঙ্গনামকা.

৩৮৯. সদ্ধিন্দ্রিযঞ্চ ৰীরিযং, সতি চেৰ সমাধি চ;

পঞ্ঞা চতুব্বিধা ৰুত্তা, মনো পঞ্চাপি ৰেদনা.

৩৯০. জীৰিতিন্দ্রিযমেকন্তি, চক্খাদীনি চ সত্তধা;

বাৰীসতিন্দ্রিযা নাম, ধম্মা সোল়স দেসিতা.

৩৯১. আদিমগ্গে অনঞ্ঞাত-ঞ্ঞস্সামীতিন্দ্রিযং ভৰে;

মজ্ঝে অঞ্ঞিন্দ্রিযং অন্তে, অঞ্ঞাতাৰিন্দ্রিযন্তি চ.

৩৯২. পঞ্ঞানুত্তরচিত্তেসু, হোন্তি তীণিন্দ্রিযানিপি;

তিহেতুকেসু সেসেসু, একং পঞ্ঞিন্দ্রিযং মতং.

৩৯৩. সুখং দুক্খিন্দ্রিযঞ্চেৰ, সোমনস্সিন্দ্রিযং তথা;

দোমনস্সমুপেক্খাতি, পঞ্চধা ৰেদনা কথা.

৩৯৪. রূপারূপৰসা দ্ৰেধা, জীৰিতিন্দ্রিযমেককং;

চক্খুসোতঘানজিৰ্হাকাযিত্থিপুরিসিন্দ্রিযা.

৩৯৫. তত্থ জীৰিতরূপঞ্চ, অট্ঠেত্থ ন তু গয্হরে;

তস্মা নামিন্দ্রিযানেৰ, দসপঞ্চ ৰিনিদ্দিসে.

৩৯৬. সম্মাদিট্ঠি চ সঙ্কপ্পো, ৰাযামো ৰিরতিত্তযং;

সম্মাসতি সমাধি চ, মিচ্ছাদিট্ঠি চ ধম্মতো.

৩৯৭. মগ্গঙ্গানি নৰেতানি, দ্ৰাদসাপি যতো দ্ৰিধা;

সম্মামিচ্ছাতি সঙ্কপ্পো, ৰাযামো চ সমাধি চ.

৩৯৮. লোকপালদুকঞ্চেৰ, হিরোত্তপ্পমথাপরং;

অহিরীকমনোত্তপ্পং, দুকং লোকৰিনাসকং.

৩৯৯. পঞ্চ সদ্ধাদযো চেতি, বলধম্মা নৰেরিতা;

কণ্হসুক্কৰসেনাপি, পটিপক্খে অকম্পিযা.

৪০০. ছ হেতূ হেতুরাসিম্হি,

লোভালোভাদিকা তিকা;

মোমূহে কঙ্খিতুদ্ধচ্চা,

তত্থ ৰুত্তাতি অট্ঠধা.

৪০১. মিচ্ছাদিট্ঠি অভিজ্ঝা চ, ব্যাপাদো ৰিরতিত্তযং;

সম্মাদিট্ঠিনভিজ্ঝা চ, অব্যাপাদো চ চেতনা.

৪০২. দস কম্মপথানেত্থ, ৰুত্তা ৰিরতিচেতনা;

লোকপালৰিনাসাতি, ৰুত্তা লোকদুকা দ্ৰিধা.

৪০৩. পস্সদ্ধিআদিযুগল়া, নিরৰজ্জা ছ রাসযো;

সতি চ সম্পজঞ্ঞঞ্চ, উপকারদুকং ভৰে.

৪০৪. যুগনন্ধদুকং নাম, সমথো চ ৰিপস্সনা;

পগ্গহো চ অৰিক্খেপো, সমথদ্দুকমীরিতং.

৪০৫. যে সরূপেন নিদ্দিট্ঠা, চিত্তুপ্পাদেসু তাদিনা;

তে ঠপেত্ৰাৰসেসা তু, যেৰাপনকনামকা.

৪০৬. ছন্দো চ অধিমোক্খো চ, তত্রমজ্ঝত্ততা তথা;

উদ্ধচ্চং মনসিকারো, পঞ্চাপণ্ণকনামকা.

৪০৭. মানো চ থিনমিদ্ধঞ্চ, ইস্সা মচ্ছরিযং তথা;

কুক্কুচ্চমপ্পমঞ্ঞা চ, তিস্সো ৰিরতিযোপি চ.

৪০৮. এতে অনিযতা নাম, একাদস যথারহং;

ততো চ সেসা সব্বেপি, নিযতাতি পকিত্তিতা.

৪০৯. কেচি রাসিং ন ভজন্তি, কেচি চানিযতা যতো;

তস্মা যেৰাপনাতেৰ, ধম্মা সোল়স দেসিতা.

৪১০. সত্ততিংসাৰসেসা তু, তত্থ তত্থ যথারহং;

সরূপেনেৰ নিদ্দিট্ঠা, চিত্তুপ্পাদেসু সব্বথা.

৪১১. দেসিতানুত্তরুদ্ধচ্চে, নামতো ৰিরতুদ্ধৰা;

তথানুত্তরচিত্তেসু, নিযতং ৰিরতিত্তযং.

৪১২. চিত্তং ৰিতক্কো সদ্ধা চ,

হিরোত্তপ্পবলদ্ৰযং;

অলোভো চ অদোসো চ,

লোভো দোসো চ দিট্ঠি চ.

৪১৩. অহিরীকমনোত্তপ্পং,

উদ্ধচ্চং ৰিরতিত্তযং;

সোল়সেতে যথাযোগং,

দ্ৰীসু ঠানেসু দেসিতা.

৪১৪. ৰেদনা তীসু ৰীরিযং, সতি চ চতুরাসিকা;

সমাধি ছসু পঞ্ঞা চ, সত্তট্ঠানেসু দীপিতা.

৪১৫. একৰীস পনিচ্চেতে, সৰিভত্তিকনামকা;

সেসা দ্ৰত্তিংসতি ধম্মা, সব্বেপি অৰিভত্তিকাতি.

ইতি চেতসিকৰিভাগে রাসিসরূপকথা নিট্ঠিতা.

একাদসমো পরিচ্ছেদো.