১০. পভেদকথা

৩৫২. একুপ্পাদা নিরোধা চ, একালম্বণৰত্থুকা;

সহগতা সহজাতা, সংসট্ঠা সহৰুত্তিনো.

৩৫৩. তেপঞ্ঞাস পনিচ্চেতে, সম্পযুত্তা যথারহং;

চিত্তচেতসিকা ধম্মা, অট্ঠারসৰিধাপি চ.

৩৫৪. একধা ছব্বিধা চেৰ, চতুধা সত্তধা ঠিতা;

চিত্তুপ্পাদপভেদেন, ভিন্দিতব্বা ৰিভাৰিনা.

৩৫৫. অট্ঠ ধম্মাৰিনিব্ভোগা, ভিন্নাসীতি নৰুত্তরা;

সত্তসতং দস দ্ৰে চ, সব্বে হোন্তি সমিস্সিতা.

৩৫৬. সন্তীরণমনোধাতু, সিতৰোট্ঠব্বনা তথা;

অপুঞ্ঞা কামপুঞ্ঞা চ, মহাপাকা মহাক্রিযা.

৩৫৭. পঠমজ্ঝানধম্মা চ, লোকুত্তরমহগ্গতা;

পঞ্চপঞ্ঞাস সব্বেপি, ৰিতক্কা হোন্তি ভেদিতা.

৩৫৮. ৰিচারাপি চ তেযেৰ, দুতিযজ্ঝাননামকা;

একাদসাপরে চেতি, ছসট্ঠি পরিদীপিতা.

৩৫৯. অপুঞ্ঞা কামপুঞ্ঞা চ, মহাপাকা মহাক্রিযা;

চতুক্কা চেৰ চত্তারো, সিতঞ্চ সুখতীরণং.

৩৬০. পঠমাদিতিকজ্ঝানা, লোকুত্তরমহগ্গতা;

ইচ্চেৰমেকপঞ্ঞাস, পীতিযো হোন্তি সব্বথা.

৩৬১. সিতৰোট্ঠব্বনা দ্ৰে চ, সাৰজ্জা চানৰজ্জকা;

ভিন্নমেৰং তু ৰীরিযং, তেসত্ততিৰিধং ভৰে.

৩৬২. সাৰজ্জা চানৰজ্জা চ, মোমূহদ্ৰযৰজ্জিতা;

ছন্দা ভৰন্তি সব্বেপি, সট্ঠিভেদা নৰুত্তরা.

৩৬৩. সন্তীরণমনোধাতু, সিতৰোট্ঠব্বনা তথা;

সাৰজ্জা চানৰজ্জা চ, ৰিচিকিচ্ছাৰিৰজ্জিতা.

৩৬৪. অধিমোক্খা পনিচ্চেৰং, অট্ঠসত্ততি ভেদিতা;

তিসতং নৰুতি দ্ৰে চ, ভিন্না হোন্তি পকিণ্ণকা.

৩৬৫. একূনসট্ঠি ৰা হোন্তি, সদ্ধাদেকূনৰীসতি;

সহস্সঞ্চ সতঞ্চেকং, একৰীসঞ্চ সব্বথা.

৩৬৬. ঞাণেন সম্পযুত্তা চ, কামে দ্ৰাদসধাপরে;

পঞ্চতিংসাতি পঞ্ঞাপি, সত্ততালীসধা কথা.

৩৬৭. রূপজ্ঝানচতুক্কা চ, কামপুঞ্ঞা মহাক্রিযা;

অট্ঠৰীসপ্পমঞ্ঞেৰং, ছপ্পঞ্ঞাস ভৰন্তি চ.

৩৬৮. অনুত্তরা কামপুঞ্ঞা, তিস্সো ৰিরতিযো পন;

হোন্তি সোল়সধা ভিন্না, অট্ঠতালীস পিণ্ডিতা.

৩৬৯. পঞ্চৰীসানৰজ্জেৰং, সম্পযুত্তা চতুব্বিধা;

সহস্সদ্ৰিসতঞ্চেৰ, দ্ৰি চ সত্ততি ভেদতো.

৩৭০. চত্তারো পাপসামঞ্ঞা, ভিন্না দ্ৰাদসধা পন;

অট্ঠতালীসধা হোন্তি, তে সব্বে পরিপিণ্ডিতা.

৩৭১. লোভো পনট্ঠধা ভিন্নো, থিনমিদ্ধঞ্চ পঞ্চধা;

চতুধা দিট্ঠিমানো চ, চতুধা দিট্ঠিযো ৰিসুং.

৩৭২. দ্ৰিধা দোসাদিচত্তারো, ৰিচিকিচ্ছেকধাতি চ;

সাৰজ্জা সত্তধা ৰুত্তা, ভিন্নাসীতি তিকুত্তরা.

৩৭৩. ইচ্চট্ঠারসধা ৰুত্তা, তেপঞ্ঞাসাপি ভেদতো;

দ্ৰিসহস্সঞ্চ তু সতং, ভৰন্তেকূনসট্ঠি চ.

৩৭৪. ৰিতক্কৰিচারপীতিসুখোপেক্খাসু পঞ্চসু;

ভিন্দিত্ৰা ঝানভেদেন, গহেতব্বা অনুত্তরা.

৩৭৫. অঞ্ঞত্র পন সব্বত্থ, নত্থি ভেদপ্পযোজনং;

অট্ঠেৰ কস্মা গয্হন্তি, অভেদেনাতি লক্খযে.

৩৭৬. পঠমাদিচতুজ্ঝানা, লোকুত্তরমহগ্গতা;

ইচ্চেকমেকদসধা, চতুতালীস পিণ্ডিতা.

৩৭৭. তেৰীস পঞ্চমা চেতি, সত্তসট্ঠি সমিস্সিতা;

অপ্পনা তত্থ সব্বাপি, অট্ঠপঞ্ঞাস দীপিতা.

৩৭৮. পঞ্চতিংসেৰ সঙ্খেপা, লোকুত্তরমহগ্গতা;

অপ্পনা তত্থ সব্বাপি, ছব্বীসতি পকাসিতা.

৩৭৯. ইদ্ধিৰিধং দিব্বসোতং, চেতোপরিযনামকা;

পুব্বেনিৰাসানুস্সতি, দিব্বচক্খূতি পঞ্চধা.

৩৮০. অভিঞ্ঞাঞাণমীরেন্তি, রূপাৰচরপঞ্চমা;

কুসলঞ্চ ক্রিযা চেতি, ভেদিতং দুৰিধম্পি চ.

৩৮১. তং দ্ৰযম্পি সম্মিস্সেত্ৰা, পঞ্চাভিঞ্ঞা চ লোকিযা;

আসৰক্খযঞাণঞ্চ, ছল়ভিঞ্ঞা পৰুচ্চরে.

৩৮২. লোকিযা চ দসাভিঞ্ঞা, ভিন্দিত্ৰা কুসলক্রিযা;

সত্তসত্ততি ঝানানি, অট্ঠসট্ঠি পনপ্পনা.

৩৮৩. সত্তসত্ততি চিত্তানি, চতুপঞ্ঞাস সব্বথা;

পচিতানি চ চিত্তানি, একতিংসসতং সিযুন্তি.

ইতি চেতসিকৰিভাগে পভেদকথা নিট্ঠিতা.

দসমো পরিচ্ছেদো.