অট্ঠমো পরিচ্ছেদো

২. চেতসিকৰিভাগো

৮. চেতসিকসম্পযোগকথা

২৮৬. ইতি চিত্তৰিধিং ঞত্ৰা, দ্ৰেপঞ্ঞাস ৰিভাৰিনা;

ঞেয্যা চেতসি সম্ভূতা, ধম্মা চেতসিকা কথং.

২৮৭. ফস্সো চ ৰেদনা সঞ্ঞা, চেতনেকগ্গতা তথা;

জীৰিতং মনসিকারো, সত্ত সাধারণা ইমে.

২৮৮. ৰিতক্কো চ ৰিচারো চ, পীতি চ ৰীরিযং তথা;

ছন্দো চ অধিমোক্খো চ, ছ পকিণ্ণকনামকা.

২৮৯. পুঞ্ঞাপুঞ্ঞেসু পাকেসু, ক্রিযাসু চ যথারহং;

মানসেসু পৰত্তন্তি, ৰিপ্পকিণ্ণা পকিণ্ণকা.

২৯০. সদ্ধা সতিন্দ্রিযঞ্চেৰ, হিরোত্তপ্পবলদ্ৰযং;

অলোভো চ অদোসো চ, পঞ্ঞা মজ্ঝত্ততাপি চ.

২৯১. অট্ঠেতে উত্তমা নাম, ধম্মা উত্তমসাধনা;

নিৰজ্জাতি পৰুচ্চন্তি, যুগল়া ছ ততোপরে.

২৯২. পস্সদ্ধি কাযচিত্তানং, লহুতা মুদুতা তথা;

কম্মঞ্ঞতা চ পাগুঞ্ঞ-তা চ উজুকতাতি চ.

২৯৩. অপ্পমঞ্ঞাদ্ৰযং নাম, করুণামুদিতা সিযুং;

সম্মাৰাচা চ কম্মন্তা-জীৰা চ ৰিরতিত্তযং.

২৯৪. পঞ্চৰীস পনিচ্চেতে, অনৰজ্জা যথারহং;

পাপাহেতুকমুত্তেসু, অনৰজ্জেসু জাযরে.

২৯৫. লোভো দোসো চ মোহো চ,

মানো দিট্ঠি চ সংসযো;

থিনমিদ্ধঞ্চ উদ্ধচ্চং,

কুক্কুচ্চঞ্চ তথা দস.

২৯৬. অহিরীকমনোত্তপ্পং, ইস্সা মচ্ছরিযন্তি চ;

হোন্তি চুদ্দস সাৰজ্জা, সাৰজ্জেস্ৰেৰ সম্ভৰা.

২৯৭. দ্ৰেপঞ্ঞাস চতুদ্ধেৰং, ধম্মা চেতসিকা ঠিতা;

তেসং দানি পৰক্খামি, সম্পযোগঞ্চ সঙ্গহং.

২৯৮. সত্ত সাধারণা সব্ব-চিত্তসাধারণা ততো;

চিত্তেন সদ্ধি অট্ঠন্নং, ৰিপ্পযোগো ন কত্থচি.

২৯৯. ৰিতক্কো পঞ্চৰিঞ্ঞাণং, দুতিযাদিৰিৰজ্জিতে;

ৰিচারোপি চ তত্থেৰ, ততিযাদিৰিৰজ্জিতে.

৩০০. সোমনস্সযুতে পীতি-চতুত্থজ্ঝানৰজ্জিতে;

ৰীরিযং পঠমাৰজ্জ-ৰিপাকাহেতুৰজ্জিতে.

৩০১. ছন্দো সম্ভোতি সব্বত্থ, মোমূহাহেতুৰজ্জিতে;

অধিমোক্খো ৰিচিকিচ্ছা-পঞ্চৰিঞ্ঞাণৰজ্জিতে.

৩০২. ছসট্ঠি পঞ্চপঞ্ঞাস, সত্ততি চেৰ সোল়স;

ৰীসতেকাদসেৰাথ, পকিণ্ণকৰিৰজ্জিতা.

৩০৩. মানসা পঞ্চপঞ্ঞাস, সৰিতক্কা ছসট্ঠি চ;

সৰিচারেকপঞ্ঞাস, সপ্পীতিকমনা তথা.

৩০৪. তেসত্ততি সৰীরিযা, সছন্দেকূনসত্ততি;

সাধিমোক্খা পৰুচ্চন্তি, অট্ঠসত্ততি মানসা.

৩০৫. পঞ্ঞাপ্পমঞ্ঞাৰিরতী, হিত্ৰা একূনসট্ঠিসু;

পাপাহেতুকমুত্তেসু, সদ্ধাদেকূনৰীসতি.

৩০৬. দ্ৰিহেতুকাহেতুপাপৰজ্জিতেসু সমাসতো;

পঞ্ঞা তু জাযতে সত্তচত্তালীসেসু সব্বথা.

৩০৭. মহাক্রিযাকামপুঞ্ঞ-রূপজ্ঝানেসু জাযরে;

অপ্পমঞ্ঞাট্ঠৰীসেসু, হিত্ৰা ঝানং তু পঞ্চমং.

৩০৮. লোকুত্তরেসু সব্বত্থ, সহেৰ ৰিরতিত্তযং;

কামপুঞ্ঞেসু সম্ভোতি, যথাসম্ভৰতো ৰিসুং.

৩০৯. ৰিরতীঅপ্পমঞ্ঞাসু, পঞ্চস্ৰপি যথারহং;

কদাচিদেৰ সম্ভোতি, একেকোৰ ন চেকতো.

৩১০. অহিরীকমনোত্তপ্পং, মোহউদ্ধচ্চমেৰ চ;

পাপসাধারণা নাম, চত্তারো পাপসম্ভৰা.

৩১১. লোভো চ লোভমূলেসু, দিট্ঠিযুত্তেসু দিট্ঠি চ;

মানো দিট্ঠিৰিযুত্তেসু, দিট্ঠিমানা ন চেকতো.

৩১২. দোসমূলেসু দোসো চ, ইস্সা মচ্ছরিযং তথা;

কুক্কুচ্চমিতি চত্তারো, ৰিচিকিচ্ছা তু কঙ্খিতে.

৩১৩. সহেৰ থিনমিদ্ধং তু, সসঙ্খারেসু পঞ্চসু;

ইতি চুদ্দস সাৰজ্জা, সাৰজ্জেস্ৰেৰ নিচ্ছিতা.

৩১৪. মানো চ থিনমিদ্ধঞ্চ, সহ ৰাথ ৰিসুং ন ৰা;

ইস্সামচ্ছেরকুক্কুচ্চা, অঞ্ঞমঞ্ঞং ৰিসুং ন ৰাতি.

ইতি চেতসিকৰিভাগে চেতসিকসম্পযোগকথা নিট্ঠিতা.

অট্ঠমো পরিচ্ছেদো.