নৰমো পরিচ্ছেদো

৯. চেতসিকসঙ্গহকথা

৩১৫. সত্ত সাধারণা চেৰ, ছ ধম্মা চ পকিণ্ণকা;

সদ্ধাদি পঞ্চৰীসেতি, অট্ঠতিংস সমিস্সিতা.

৩১৬. কামাৰচরপুঞ্ঞেসু, লব্ভন্তি পঠমদ্ৰযে;

সত্ততিংসেৰ দুতিযে, পঞ্ঞামত্তৰিৰজ্জিতা.

৩১৭. ততিযে চ যথাৰুত্তা, পীতিমত্তৰিৰজ্জিতা;

ছত্তিংসেৰ চতুত্থম্হি, পঞ্ঞাপীতিদ্ৰযং ৰিনা.

৩১৮. মহাক্রিযাসু যুজ্জন্তি, হিত্ৰা ৰিরতিযো তথা;

পঞ্চতিংস চতুত্তিংসদ্ৰযং তেত্তিংসকং কমা.

৩১৯. ঠপেত্ৰা অপ্পমঞ্ঞা চ, মহাপাকেসু যোজিতা;

তেত্তিংসা চেৰ দ্ৰত্তিংসদ্ৰযেকত্তিংসকং কমা.

৩২০. অপ্পমঞ্ঞা গহেত্ৰান, হিত্ৰা ৰিরতিযো তথা;

পঞ্চতিংসেৰ পঠমে, রূপাৰচরমানসে.

৩২১. ৰিতক্কং দুতিযে হিত্ৰা, ৰিচারঞ্চ ততো পরং;

চতুত্থে পন পীতিঞ্চ, অপ্পমঞ্ঞঞ্চ পঞ্চমে.

৩২২. যথাৰুত্তপকারাৰ, চতুত্তিংস যথাক্কমং;

তেত্তিংস চেৰ দ্ৰত্তিংস, সমতিংসঞ্চ লব্ভরে.

৩২৩. পঞ্চমেন সমানা চ, ঠপেত্ৰারুপ্পমানসা;

ভূমারম্মণভেদঞ্চ, অঙ্গানঞ্চ পণীততং.

৩২৪. অপ্পমঞ্ঞা ঠপেত্ৰান, গহেত্ৰা ৰিরতিত্তযং;

ছত্তিংসানুত্তরে হোন্তি, পঠমজ্ঝানমানসে.

৩২৫. ৰিতক্কং দুতিযে হিত্ৰা, ৰিচারঞ্চ ততো পরং;

পীতিং হিত্ৰা চতুত্থে চ, পঞ্চমেপি চ সব্বথা.

৩২৬. যথাৰুত্তপ্পকারাৰ, পঞ্চতিংস যথাক্কমং;

চতুত্তিংসঞ্চ তেত্তিংস, তথা তেত্তিংস চাপরে.

৩২৭. এৰং বাৰীসধা ভেদো, অনৰজ্জেসু সঙ্গহো;

একূনসট্ঠিচিত্তেসু, অট্ঠতিংসানমীরিতো.

৩২৮. ৰিরতী অপ্পমঞ্ঞা চ, গহেত্ৰা পন সব্বসো;

একমেকং গহেত্ৰা চ, পচ্চক্খায চ সব্বথা.

৩২৯. কামেসু সত্তধা পুঞ্ঞে, চতুধা চ ক্রিযে তথা;

রূপজ্ঝানচতুক্কে চ, কত্তব্বোযম্পি সঙ্গহো.

৩৩০. ইমিনা পনুপাযেন, সমসত্ততি ভেদতো;

অনৰজ্জেসু ৰিঞ্ঞেয্যো, চিত্তুপ্পাদেসু সঙ্গহো.

৩৩১. ইতি সব্বপ্পকারেন, অনৰজ্জৰিনিচ্ছযং;

ঞত্ৰা যোজেয্য মেধাৰী, সাৰজ্জেসু চ সঙ্গহং.

৩৩২. সত্ত সাধারণা চেৰ, ছ ধম্মা চ পকিণ্ণকা;

চত্তারো পাপসামঞ্ঞা, ধম্মা সত্তরসেৰিমে.

৩৩৩. একূনৰীসাসঙ্খারে, পঠমে লোভদিট্ঠিযা;

দুতিযে লোভমানেন, যথাৰুত্তা চ তত্তকা.

৩৩৪. অট্ঠারস ৰিনা পীতিং, ততিযে লোভদিট্ঠিযা;

চতুত্থেপি ৰিনা পীতিং, লোভমানেন তত্তকা.

৩৩৫. পটিঘে চ ৰিনা পীতিং, অসঙ্খারে তথেৰ তে;

লব্ভন্তি দোসকুক্কুচ্চ-মচ্ছরিযাহি ৰীসতি.

৩৩৬. অসঙ্খারেসু ৰুত্তা চ, সসঙ্খারেসু পঞ্চধা;

থিনমিদ্ধেনেকৰীস, ৰীস দ্ৰেৰীসতিক্কমা.

৩৩৭. ছন্দং পীতিঞ্চ উদ্ধচ্চে, হিত্ৰা পঞ্চদসেৰ তে;

হিত্ৰা ৰিমোক্খং কঙ্খঞ্চ, গহেত্ৰা কঙ্খিতে তথা.

৩৩৮. সত্তৰীসতিধম্মানং, ইতি দ্ৰাদস সঙ্গহা;

দ্ৰাদসাপুঞ্ঞচিত্তেসু, ৰিঞ্ঞাতব্বা ৰিভাৰিনা.

৩৩৯. হিত্ৰা ছানিযতে ধম্মে, গহেত্ৰা চ যথারহং;

চতুত্তিংসাপি ৰিঞ্ঞেয্যা, সঙ্গহা তত্থ ৰিঞ্ঞুনা.

৩৪০. দ্ৰাদসাকুসলেস্ৰেৰ, ঞত্ৰা সঙ্গহমুত্তরং;

ঞেয্যাহেতুকচিত্তেসু, সঙ্গহং কমতো কথং?

৩৪১. সত্ত সাধারণা ছন্দৰজ্জিতা চ পকিণ্ণকা;

হসিতুপ্পাদচিত্তম্হি, দ্ৰাদসেৰ পকাসিতা.

৩৪২. ৰোট্ঠব্বে চ ৰিনা পীতিং, ৰীরিযং সুখতীরণে;

একাদস যথাৰুত্তা, ধম্মা দ্ৰীসুপি দেসিতা.

৩৪৩. মনোধাতুত্তিকে চেৰ, উপেক্খাতীরণদ্ৰযে;

দস হোন্তি যথাৰুত্তা, হিত্ৰা ৰীরিযপীতিযো.

৩৪৪. সত্ত সাধারণা এৰ, পঞ্চৰিঞ্ঞাণসম্ভৰা;

ইচ্চাহেতুকচিত্তেসু, পঞ্চধা সঙ্গহো ঠিতো.

৩৪৫. ইতি চেতসিকে ধম্মে, চিত্তেসু গণিতে পুন;

চিত্তেন সহ সঙ্গয্হ, গণেয্যাপি চ পণ্ডিতো.

৩৪৬. অট্ঠতিংসাতি যে ৰুত্তা, চিত্তেন সহ তে পুন;

একূনচত্তালীসেতি, সব্বত্থেকাধিকং নযে.

৩৪৭. বাৰীসেৰং দস দ্ৰে চ, পঞ্চ চেতি যথারহং;

সঙ্গহা সম্পযুত্তানং, তালীসেকূনকা কথা.

৩৪৮. ৰিতক্কো চ ৰিচারো চ, পীতি পঞ্ঞা তথা পন;

অপ্পমঞ্ঞা ৰিরতীতি, নৰ ধম্মা যথারহং.

৩৪৯. গহেতব্বাপনেতব্বা, ভৰন্তি অনৰজ্জকে;

পরিৰত্তেতি সব্বত্থ, ৰেদনা তু যথারহং.

৩৫০. ছন্দাধিমোক্খৰীরিযা, সদ্ধাদেকূনৰীসতি;

ফস্সাদযো ছল়েৰাতি, ন চলন্তট্ঠৰীসতি.

৩৫১. তেরসেৰ তু সাৰজ্জে, ছল়েৰাহেতুমানসে;

ন চলন্তি দস অঞ্ঞে, চুদ্দসা ছ চ সম্ভৰাতি.

ইতি চেতসিকৰিভাগে চেতসিকসঙ্গহকথা নিট্ঠিতা.

নৰমো পরিচ্ছেদো.