৭. ভূমিপুগ্গলসম্ভৰকথা

২৭০. দ্ৰিহেতুকাহেতুকানং, ন সম্পজ্জতি অপ্পনা;

অরহত্তঞ্চ নত্থীতি, নত্থেৰ জৰনক্রিযা.

২৭১. ঞাণপাকা ন ৰত্তন্তি, জল়ত্তা মূলসন্ধিযা;

দ্ৰিহেতুকতদালম্বং, সিযা সুগতিযং ন ৰা.

২৭২. তিহেতুকানং সত্তানং, সমথঞ্চ ৰিপস্সনং;

ভাৰেন্তানং পৰত্তন্তি, ছব্বীসতিপি অপ্পনা.

২৭৩. অরহন্তান সত্তানং, ভৰন্তি জৰনক্রিযা;

যথাভূমিনিযামেন, ঞাণপাকা চ লব্ভরে.

২৭৪. ৰজ্ঝা পঠমমগ্গেন, কঙ্খাদিট্ঠিযুতা পন;

পটিঘং ততিযেনেৰ, কম্মমন্তেন সাসৰং.

২৭৫. তস্মা তেসং ন ৰত্তন্তি, তানি চিত্তানি সব্বথা;

মগ্গট্ঠানং তু মগ্গোৰ, নাঞ্ঞং সম্ভোতি কিঞ্চিপি.

২৭৬. অহেতুকৰিপাকানি, লব্ভমানায ৰীথিযা;

সব্বথাপি চ সব্বেসং, সম্ভৰন্তি যথারহং.

২৭৭. পঞ্চদ্ৰারে মনোদ্ৰারে, ধুৰমাৰজ্জনদ্ৰযং;

পরিত্তপুঞ্ঞাপুঞ্ঞানি, লব্ভন্তি লহুৰুত্তিতো.

২৭৮. ক্রিযাজৰনমপ্পনা, নত্থাপাযেসু কারণং;

নত্থি সহেতুকা পাকা, দুগ্গতত্তা হি সন্ধিযা.

২৭৯. ব্রহ্মানং পটিঘং নত্থি, ঝানৰিক্খম্ভিতং তথা;

হেট্ঠাঝানং ৰিরত্তত্তা, ন ভাৰেন্তি অরূপিনো.

২৮০. পুব্বেৰ দিট্ঠসচ্চাৰ, অরিযারূপভূমকা;

তস্মাদিমগ্গো নত্থেত্থ, কাযাভাৰা সিতং তথা.

২৮১. সুদ্ধাৰাসাপি পত্তাৰ, হেট্ঠানুত্তরপঞ্চকং;

সত্তপাপপহীনা চ, তস্মা নত্থেত্থ তানি চ.

২৮২. পঞ্চদ্ৰারিকচিত্তানি, দ্ৰারাভাৰে ন ৰিজ্জরে;

সহেতুকৰিপাকা চ, যথাভূমিৰৰত্থিতা.

২৮৩. সম্ভৰাসম্ভৰঞ্চেৰং, ঞত্ৰা পুগ্গলভূমিসু;

লব্ভমানৰসা তত্থ, চিত্তসঙ্গহমুদ্দিসে.

২৮৪. কুসলাদিপ্পভেদা চ, তথা ভূমাদিভেদতো;

ৰত্থুদ্ৰারারম্মণতো, ভূমিপুগ্গলতোপি চ.

২৮৫. ৰিভাগো যো সমুদ্দিট্ঠো,

চিত্তানঞ্চ তু সম্ভৰা;

ঞেয্যো চেতসিকানঞ্চ,

সম্পযোগানুসারতোতি.

ইতি চিত্তৰিভাগে ভূমিপুগ্গলসম্ভৰকথা নিট্ঠিতা.

সত্তমো পরিচ্ছেদো.

নিট্ঠিতো চ চিত্তৰিভাগো.