১১. একাদসমো পরিচ্ছেদো

ৰিপস্সনাৰিভাগো

১৫০৬. দ্ৰিধা সমুট্ঠানধুরা, তিৰিধা ভূমিযো মতা;

তিৰিধাভিনিৰেসা চ, সরীরং তু চতুব্বিধং.

১৫০৭. তিৰিধা ভাৰনা তত্থ, সঙ্খারেসু যথারহং;

দুৰিধাকারমারব্ভ, নিজ্ঝাযতি তিলক্খণং.

১৫০৮. অট্ঠারসাকারভিন্না, দসাৰত্থা ৰিভাৰিতা;

তিধা ৰিভাগা সাধেতি, ৰিমোক্খত্তযমুত্তমং.

১৫০৯. চতুসচ্চপটিৰেধা, সত্তট্ঠারিযপুগ্গলা;

ক্লেসহানী যথাযোগং, চতস্সো পটিসম্ভিদা.

১৫১০. তিৰিধা চ সমাপত্তি, নিরোধা চ তথাপরা;

নিস্সন্দফলমিচ্চাহু, তস্সা সাসনকোৰিদা.

১৫১১. ৰিপস্সনাভাৰনায-মিতি ভাসন্তি পণ্ডিতা;

তমিদানি পৰক্খামি, যথানুক্কমতো কথং.

১৫১২. ভূমিধম্মে পরিগ্গয্হ, ৰিচিনন্তস্স যোগিনো;

সতিযা সমথা ৰাথ, সমুট্ঠাতি ৰিপস্সনা.

১৫১৩. সভাৰপটিৰেধে চ, সদ্ধম্মপটিপত্তিযং;

পঞ্ঞাসদ্ধাদ্ৰযং তস্সা, ধুরমাহু ধুরন্ধরা.

১৫১৪. তেভূমকসভাৰানং, সপ্পচ্চযপরিগ্গহো;

ঞাতপরিঞ্ঞা নামাযং, ভূমীতি পঠমা মতা.

১৫১৫. কলাপতো সম্মসনং, উদযব্বযদস্সনং;

পরিঞ্ঞাতীরণা নাম, দুতিযা ভূমি ভাসিতা.

১৫১৬. পহানপরিঞ্ঞা ভূমি, ততিযাহু ততোপরং;

ভঙ্গাদিঞাণমিচ্চেৰং, তিৰিধা ভূমিযো মতা.

১৫১৭. খণসন্ততিঅদ্ধান-ৰসেনেত্থ সমীরিতা;

অনিচ্চা দুক্খানত্তাতি, তিৰিধাভিনিৰেসনা.

১৫১৮. দিট্ঠিকঙ্খাৰিতরণা, মগ্গামগ্গপটিপ্পদা;

ৰিসুদ্ধিযো চতস্সোপি, সরীরন্তি নিদস্সিতা.

১৫১৯. সলক্খণৰৰত্থানং, পচ্চযাকারনিচ্ছযো;

কুম্মগ্গপরিহারো চ, তিলক্খণৰিপস্সনা.

১৫২০. ইতি লক্খণভিন্নত্তা, লব্ভন্তেকক্খণেপি চ;

দেসিতা হেতুভূতেন, কমেনেৰং ৰিসুদ্ধিযো.

১৫২১. সীলব্বিসুদ্ধিআদীনং, তথা সাৰ পরম্পরা;

চিত্তব্বিসুদ্ধিআদীনমত্থাযাতি পকাসিতা.

১৫২২. দিস্সমানসভাৰানং, পস্সন্তো পচ্চযট্ঠিতি;

পরিপন্থৰিমুত্তো হি, পটিপাদেতি ভাৰনং.

১৫২৩. তথাপি চ ৰিসেসেন, পটিপন্নস্স যোগিনো;

তত্থ তত্থ ৰিভূতত্তা, ঠানতো ভেদিতা কথং.

১৫২৪. রূপপুব্বঙ্গমং ৰাথ, নামপুব্বঙ্গমং তথা;

অজ্ঝত্তং ৰা বহিদ্ধা ৰা, যথাপাকটধম্মতো.

১৫২৫. নামরূপাদিভেদেন, ভূমিধম্মপরিগ্গহো;

ৰুত্তা দিট্ঠিৰিসুদ্ধীতি, অত্তদিট্ঠিপ্পহানতো.

১৫২৬. আহচ্চ পচ্চযুপ্পন্না, তথা তব্ভাৰভাৰিনো;

পৰত্তন্তীতি সঙ্খারে, পস্সতো পন যোনিসো.

১৫২৭. পচ্চযগ্গাহিনী পঞ্ঞা, নামরূপপ্পৰত্তিযা;

কঙ্খা তরন্তি তাযাতি, কঙ্খাৰিতরণা মতা.

১৫২৮. অনিচ্চা দুক্খানত্তাতি, পচ্চযাযত্তৰুত্তিতো;

সঙ্খিপিত্ৰা কলাপেন, সম্মসীযন্তি সঙ্খতা.

১৫২৯. উপ্পাদৰযভাৰোপি, লক্খণত্তযসাধকো;

পচ্চযাকারমারব্ভ, লক্খীযতি ৰিসেসতো.

১৫৩০. তস্মা সম্মসনঞাণং, উদযব্বযদস্সনং;

কঙ্খাৰিতরণাযং তু, সঙ্গয্হতি ৰিসুদ্ধিযং.

১৫৩১. তত্থ সংক্লেসৰিক্খেপং, কুম্মগ্গং পরিৰজ্জতো;

মগ্গামগ্গৰিসুদ্ধীতি, ঞাণদস্সনমীরিতং.

১৫৩২. ততো কথেন্তি অক্লিট্ঠমুদযব্বযদস্সনং;

আদিং কত্ৰা পটিপদাঞাণদস্সনসুদ্ধিযং.

১৫৩৩. পচ্চযপচ্চযুপ্পন্নে, যথাৰত্থুৰৰত্থিতে;

পহাতুমীহমানানং, নিয্যানপটিপত্তিতো.

১৫৩৪. উপক্লেসৰিসুদ্ধো হি, পুনদেৰোদযব্বযং;

অধিট্ঠহিত্ৰা ভঙ্গাদি-ঞাণেহি পটিপজ্জতি.

১৫৩৫. তথা চাভিনৰুপ্পন্নে, ভিজ্জমানে ৰিপস্সতো;

সংৰেগকড্ঢিতং ঞাণং, ভঙ্গাদিমনুতিট্ঠতি.

১৫৩৬. ততো পুব্বে পৰত্তা হি, সংক্লেসাপাযসম্ভৰা;

পটিপত্তিৰিসুদ্ধীতি, ন সঙ্গয্হতি ভাৰনা.

১৫৩৭. সম্পাদেন্তো পনিচ্চেতা, চতস্সোপি ৰিসুদ্ধিযো;

অনিচ্চা দুক্খানত্তাতি, ভাৰেয্য তিৰিধা কথং.

১৫৩৮. পচ্চযপচ্চযুপ্পন্না, জাতানন্তরভেদিনো;

অনিচ্চা চ পভঙ্গূ চ, পলুজ্জন্তি চৰন্তি চ.

১৫৩৯. অদ্ধুৰা চ অসারা চ, ৰিভৰা চ ৰিনাসিনো;

সঙ্খতা ৰিপরিণাম-ধম্মা ইত্তরকালিকা.

১৫৪০. খযধম্মা ৰযধম্মা, লহুকালপ্পৰত্তিনো;

তাৰকালিকধম্মা চ, পরিত্তট্ঠিতিকা তথা.

১৫৪১. খণত্তযপরিচ্ছিন্না, পুব্বাপরৰিচিত্তকা;

পুরক্খতা নিরোধস্স, সস্সতা ন কুদাচনং.

১৫৪২. জাযন্তি পরিহানায, ন তু জাযন্তি ৰুদ্ধিযা;

জিয্যমানাৰ তিট্ঠন্তি, জিণ্ণা ভঙ্গপরাযণা.

১৫৪৩. অহুত্ৰাযেৰুপ্পজ্জন্তি, ন কুতোচিপি আগতা;

হুত্ৰা অন্তরধাযন্তি, ন তু কত্থচি সঞ্চিতা.

১৫৪৪. তং তং পচ্চযসামগ্গি-মত্তলাভায নিস্সিতা;

নিরোধধম্মা জাযন্তি, জাতা ব্যন্তি ভৰন্তি তে.

১৫৪৫. যথা নদী পব্বতেয্যা, যথা দীপসিখা তথা;

সীঘসীঘং পৰত্তন্তা, উপ্পজ্জন্তি ৰযন্তি চ.

১৫৪৬. জাতা জাতা নিরুজ্ঝন্তি, অঞ্ঞে অঞ্ঞে তু জাযরে;

অৰীচি অনুসম্বন্ধা, ন জানন্তি ৰিসেসতো.

১৫৪৭. ইতি নানপ্পকারেন, ৰিপস্সন্তো ৰিচক্খণো;

অনিচ্চভাৰনং ধীরো, পরিপাচেতি সাধুকং.

১৫৪৮. দুক্খা চ দুক্খৰত্থূ চ, অভিণ্হপরিপীল়িতা;

রোগা গণ্ডা চ সল্লা চ, অঘতো চ উপদ্দৰা.

১৫৪৯. ভযোপসগ্গাঘমূলা,

সাসৰাদীনৰীতিতা;

অলেণাসরণাতাণা,

ৰধকা মারকামিসা.

১৫৫০. জাতিধম্মা জরাব্যাধি-

সোকোপাযাসভাগিনো;

পরিদেৰসভাৰা চ,

সংক্লেসা দুক্খভাগিনো.

১৫৫১. জেগুচ্ছা পটিকূলা চ, বীভচ্ছা চ ৰিরূপিনো;

অজঞ্ঞা চপলা হীনা, দুগ্গন্ধা বালসেৰিতা.

১৫৫২. সোকন্তরিকতানিচ্চং, তণ্হায কড্ঢিতা ভুসং;

কপণা দুগ্গতা দীনা, ৰিপন্না চ ৰিঘাতিনো.

১৫৫৩. অত্তলাভং গৰেসন্তি, তংতংপচ্চযনিস্সিতা;

দুক্খাধিট্ঠানমচ্চন্তং, জাতা পুন ৰিহঞ্ঞরে.

১৫৫৪. অগ্গিকূপে নিমুগ্গাৰ, ক্লেসসন্তাপভাগিনো;

ওৰিদ্ধা ৰিয সত্তীহি, সঙ্খারা নিচ্চদুক্খিতা.

১৫৫৫. জাযমানা চ জিয্যন্তা, মিয্যন্তা চ খণে খণে;

পসুকা ৰিয নিচ্চম্মা, হঞ্ঞন্তি সেরিকাতুরা.

১৫৫৬. তিলানি তিলযন্তেৰ, উচ্ছুযন্তেৰ উচ্ছুযো;

উদযব্বযাৰস্সং তে, পীল়যন্তি অভিণ্হসো.

১৫৫৭. মনোরমনৰাকারা, ৰিপল্লাসপরিক্খতা;

ইরিযাপথসঞ্ছন্না, নোপতিট্ঠন্তি দুক্খতো.

১৫৫৮. সঙ্খারেসু পনেতেসু, ৰেদনাস্সাদরোধিনো;

সাৰ সন্দুলসম্বদ্ধা, সম্মোহপরিৰারিতা.

১৫৫৯. ‘‘অদুং দুক্খমিদং দুক্খ’’-মিতি সংসারচারিনো;

দুক্খহেতুমজানন্তা, সম্ভমন্তি অৰিদ্দসু.

১৫৬০. সুখাকারমপস্সন্তা, দুক্খভারনিপীল়িতা;

পত্থেন্তি দুক্খমেৰঞ্ঞং, বালা ব্যসনভাগিনো.

১৫৬১. চৰন্তা উপপজ্জন্তা, রুক্খসাখংৰ মক্কটো;

দুক্খমেকং ৰিমুচ্চন্তি, ততো গণ্হন্তি চাপরং.

১৫৬২. তে দীঘরত্তং সোচন্তি, তণ্হাসল্লসমপ্পিতা;

দিট্ঠিপাসসমুপেতা, মানত্থম্ভানুসাযিনো.

১৫৬৩. তমাকারং পনিচ্চেৰং, ৰিপস্সন্তো ৰিসারদো;

দুক্খানুপস্সনং নাম, পরিপাচেতি ভাৰনং.

১৫৬৪. ধম্মট্ঠিতিনিযামা হি, খন্ধাযতনধাতুযো;

অনত্তাসস্সতন্তা চ, ঈহাভোগৰিৰজ্জিতা.

১৫৬৫. পযোজনমধিট্ঠায, ন তু ব্যাপারযন্তি চ;

পচ্চযপচ্চযুপ্পন্না, জনেতুং ৰাথ জাযিতুং.

১৫৬৬. তথাপি হেতুসামগ্গি-সম্ভৰে সম্ভৰন্তি তে;

তব্ভাৰভাৰিভাৰেন, অঞ্ঞমঞ্ঞপৰত্তিতা.

১৫৬৭. অজাযিতুং ন সক্কোন্তি, সতি পচ্চযসম্ভৰে;

পচ্চযানমলাভে তু, ন জাযন্তি কুদাচনং.

১৫৬৮. ন কিঞ্চেত্থ অপেক্খিত্ৰা, সমগ্গা হোন্তি পচ্চযা;

ন জনেতুং ন সক্কোন্তি, সমগ্গা চ কুদাচনং.

১৫৬৯. যথাপচ্চযলাভেন, পৰত্তন্তি যথা তথা;

রক্খিতা ৰা ৰিধাতা ৰা, নত্থি অস্সামিকা তথা.

১৫৭০. ‘‘অহং মম’’ন্তি গণ্হন্তা, পরিণামেন্তি অঞ্ঞথা;

ৰিস্সসন্তা হরন্তেতে, পরাভূতা পলম্ভিনো.

১৫৭১. রিত্তা তুচ্ছা চ সুঞ্ঞা চ, ৰিৰিত্তা সারৰজ্জিতা;

সলক্খণপরিচ্ছিন্না, ধম্মা নত্থেত্থ পুগ্গলো.

১৫৭২. জাযমানা চ জিয্যন্তা, মিয্যমানা চ সঙ্খতা;

ৰিৰসা পরিৰত্তন্তি, ৰসো তেসং ন কত্থচি.

১৫৭৩. ন তেসু কস্সচিস্সেরং, ন তেসঞ্চত্থি কত্থচি;

ন চত্তনীতি সঙ্খারা, আধিপচ্চৰিৰজ্জিতা.

১৫৭৪. কদলীপত্তৰট্টীৰ, অঞ্ঞমঞ্ঞপতিট্ঠিতা;

সহজাতগ্ঘনীভূতা, নোপট্ঠন্তি অনত্ততো.

১৫৭৫. অরূপনিস্সিতং রূপং, অরূপং রূপনিস্সিতং;

জচ্চন্ধপীঠসপ্পীৰ, অঞ্ঞমঞ্ঞৰৰত্থিতং.

১৫৭৬. যন্তসুত্তেন যন্তংৰ, কাযযন্তং পৰত্ততি;

নামাৰকড্ঢিতং তত্থ, নত্থি অত্তা সযংৰসী.

১৫৭৭. চেতোৰিপ্ফারনিপ্ফন্না, ৰাযোধাতুসমুট্ঠিতা;

ইরিযাপথৰিঞ্ঞত্তিৰিকারা পালকা মতা.