১২. দ্ৰাদসমো পরিচ্ছেদো

দসাৰত্থাৰিভাগো

১৬৪২. ইচ্চট্ঠারসধা ভিন্না, পটিপক্খপ্পহানতো;

লক্খণাকারভেদেন, তিৰিধাপি চ ভাৰনা.

১৬৪৩. কলাপতো সম্মসনং, উদযব্বযদস্সনং;

ভঙ্গে ঞাণং ভযে ঞাণং, ঞাণমাদীনৰেপি চ.

১৬৪৪. তথেৰ নিব্বিদাঞাণং, ঞাণং মুচ্চিতুকম্যতা;

পটিসঙ্খা চ সঙ্খারু-পেক্খাঞাণানুলোমকং.

১৬৪৫. ইচ্চাৰত্থাপভেদেন, দসধাপি ৰিভাৰিতা;

সভাগত্থৰিসেসেন, তিধা সঙ্গহিতা পুন.

১৬৪৬. যথাভূতং নাম ঞাণত্তযং সম্মসনাদিকং;

ভযাদিঞাণং তিৰিধং, নিব্বিদাতি পৰুচ্চতি.

১৬৪৭. তথা মুচ্চিতুকামাদি, ৰিরাগোৰ চতুব্বিধং;

লক্খণত্তযনিজ্ঝানৰসেন পুন ৰুট্ঠিতা.

১৬৪৮. সুঞ্ঞতঞ্চানিমিত্তঞ্চ, তথাপ্পণিহিতন্তি চ;

সাধেতি মগ্গসঙ্খাতং, ৰিমোক্খত্তযমুত্তমং.

১৬৪৯. ইতি ভাৰেতুকামস্স, ৰিভাৰেতি যথাক্কমং;

দসাৰত্থাৰিভাগেন, সমাদায যথা কথং.

১৬৫০. ৰিসুদ্ধো পঠমং তাৰ, সাধু সীলৰিসুদ্ধিযা;

উপচারপ্পনাযঞ্চ, ঠত্ৰা চিত্তৰিসুদ্ধিযং.

১৬৫১. সপ্পচ্চযং পরিগ্গয্হ, নামরূপং সভাৰতো;

দিট্ঠিকঙ্খাৰিতরণং, পত্ৰা সুদ্ধিং ততো পরং.

১৬৫২. অতীতানাগতে খন্ধে, পচ্চুপ্পন্নে চ সাসৰে;

কলাপতো সম্মসিত্ৰা, সম্মসেয্য তিলক্খণং.

১৬৫৩. আদাননিক্খেপনতো,

ৰযোৰুদ্ধত্থগামিতো;

আহারতোপি উতুতো,

কম্মতো চাপি চিত্ততো.

১৬৫৪. ধম্মতারূপতো চাপি, রূপসত্তকতো নযে;

কলাপতো যমকতো, খণিকা পটিপাটিতো.

১৬৫৫. দিট্ঠিমুগ্ঘাটযন্তো চ, মানমুগ্ঘাটযং তথা;

নিকন্তিপরিযাদানো, নামসত্তকতো নযে.

১৬৫৬. নিচ্চা চে ন নিরুজ্ঝেয্যুং, ন বাধেয্যুং সুখা যদি;

ৰসে ৰত্তেয্যুমত্তা চে, তদভাৰা ন তাদিসা.

১৬৫৭. সম্ভৰন্তি হি সঙ্খারা, সতি পচ্চযসম্ভৰে;

ততো পচ্চযনিপ্ফন্না, অৰস্সং ভেদগামিনো.

১৬৫৮. তদনিচ্চা খযট্ঠেন, দুক্খা নাম ভযট্ঠতো;

অনত্তাসারকট্ঠেন, সঙ্খারাতি ৰিভাৰযং.

১৬৫৯. কালেন সম্মসে রূপং, নামং কালেন সম্মসে;

অজ্ঝত্তঞ্চ বহিদ্ধা চ, সমাসব্যাসতো ততো.

১৬৬০. যথোপট্ঠিতভেদেন, সম্মসন্তো সমূহতো;

কলাপতো সম্মসনমিতি ভাৰেতি পণ্ডিতো.

১৬৬১. তস্সেৰং সম্মসন্তস্স, কম্মঞ্ঞং হোতি মানসং;

সূপট্ঠন্তি চ সঙ্খারা, ৰোদাযতি চ ভাৰনা.

১৬৬২. ততো পরং ৰিপস্সন্তো, পরিগ্গণ্হাতি পণ্ডিতো;

পচ্চুপ্পন্নসভাৰানং, খন্ধানমুদযব্বযং.

১৬৬৩. তণ্হাসম্মোহকম্মেহি,

খন্ধপঞ্চকসভাৰো;

রূপমাহারতো হোতি,

ফস্সতো ৰেদনাদযো.

১৬৬৪. ৰিঞ্ঞাণং নামরূপম্হা, সম্ভোতীতি চ পস্সতো;

তস্স পচ্চযতো হোতি, খন্ধেসুদযদস্সনং.

১৬৬৫. তণ্হাদীনং নিরোধা চ,

নিরোধো হোতি পস্সতো;

তথা ৰীসতিধা হোতি,

তত্থেৰ ৰযদস্সনং.

১৬৬৬. নিব্বত্তিৰিপরিণামলক্খণং পন পস্সতো;

খণতো দসধা নেসমুদযব্বযদস্সনং.

১৬৬৭. ইত্থং পঞ্ঞাসধা ভেদো,

খন্ধানমুদযব্বযো;

আযতনাদিভেদোপি,

যোজেতব্বো যথারহং.

১৬৬৮. তদেৰমনুপস্সন্তো, খন্ধাযতনধাতুযো;

অনিচ্চা দুক্খানত্তাতি, ভাৰেতি বহুধা বুধো.

১৬৬৯. ভাৰনাপসুতস্সেৰং, পস্সতো বোধিপক্খিযা;

পাতুভূতা পৰত্তন্তি, ৰিসেসেন ৰিসারদা.

১৬৭০. সলক্খণপরিচ্ছিন্নে, তিলক্খণৰৰত্থিতে;

ছন্দো সাসৰসঙ্খারে, সারদং পরিযেসতি.

১৬৭১. তত্থ পুব্বঙ্গমং হুত্ৰা, সংপক্খন্দতি মানসং;

সঙ্কপ্পোভিনিরোপেতি, আহরন্তো পুনপ্পুনং.

১৬৭২. যথাৰত্থুসভাৰেন, ততো সদ্ধাধিমুচ্চতি;

সতি সূপট্ঠিতা হোতি, পরিগ্গয্হ সভাৰতো.

১৬৭৩. পঞ্ঞা সম্পটিৰিজ্ঝন্তী, সমাহচ্চ ৰিপস্সতি;

পগ্গহেত্ৰান ৰাযামো, পটিপাদেতি ভাৰনং.

১৬৭৪. ততো পীতিমনো হোতি, নিপ্ফাদিতমনোরথো;

পামোজ্জবহুলো হুত্ৰা, পস্সদ্ধদরথো পন.

১৬৭৫. ৰিক্খেপুদ্ধচ্চনিত্তিণ্ণো, সমাধিযতি নিচ্চলো;

উপেক্খা ভাৰনাৰীথিং, অধিট্ঠাতি ততো পরং.

১৬৭৬. আরুল়্হযোগ্গাচরিযো, আজানীযরথো ৰিয;

ৰাতাভাৰে পদীপোৰ, পসন্নেকমুখট্ঠিতা.

১৬৭৭. সুখুমা নিপুণাকারা, খুরধারাগতা ৰিয;

গণ্হন্তী ভাৰনাগব্ভং, পৰড্ঢতি ৰিপস্সনা.

১৬৭৮. সম্পত্তপটিৰেধস্স,

তস্সেৰং তং ৰিপস্সতো;

জাযতেকো উপক্লেসো,

দসোপক্লেসৰত্থুকা.

১৬৭৯. ওভাসো পীতি পস্সদ্ধি, অধিমোক্খো চ পগ্গহো;

সুখং ঞাণমুপট্ঠানমুপেক্খা চ নিকন্তি চ.

১৬৮০. জাতেস্ৰেতেসু যং কিঞ্চি, উল়ারং জাতৰিম্হযো;

দিস্ৰা ৰিপস্সনামগ্গা, ৰোক্কমিত্ৰা ততো পরং.

১৬৮১. তমহংকারৰিক্খিত্তো, অস্সাদেন্তো মমাযতি;

হোতাধিমানিকো ৰাথ, মঞ্ঞন্তো তমনুত্তরং.

১৬৮২. সিযা চেৰমুপক্লিট্ঠা, পতিতা ৰাথ ভাৰনা;

তত্থেৰং পটিসঙ্খায, পটিৰিজ্ঝতি পণ্ডিতো.

১৬৮৩. ন তণ্হাদিট্ঠিমানেহি, পরিযোগাহহেতুতো;

লক্খণালম্বণত্তা চ, লোকিযাযং ৰিপস্সনা.

১৬৮৪. দিট্ঠিমাননিকন্তী চ, কুম্মগ্গা পরিপন্থকা;

মগ্গো ৰিসুদ্ধিযা নাম, ৰিসুদ্ধা চ ৰিপস্সনা.

১৬৮৫. সারথীৰ রথং ভন্তমিতি সঙ্খায সাধুকং;

পৰিট্ঠমগ্গং ৰিক্খিত্তং, সম্পাদেতি যথা পুরে.

১৬৮৬. ইত্থং মগ্গে অমগ্গে চ, যাথাৰপটিৰেধকং;

মগ্গামগ্গৰিসুদ্ধীতি, ঞাণদস্সনমীরিতং.

১৬৮৭. চেতোপৰত্তনাকারমিতি সল্লক্খযং বুধো;

সাধুকং পটিৰিজ্ঝন্তো, সুখুমং নিপুণং ততো.

১৬৮৮. পরিপন্থে ৰিমোচেত্ৰা, বোধেত্ৰা বোধিপক্খিযে;

ভাৰনং পটিপাদেন্তো, পুনদেৰোদযব্বযং.

১৬৮৯. সমধিট্ঠায মেধাৰী, ৰিপস্সতি তিলক্খণং;

উদযব্বযঞাণন্তি, তমীরেন্তি ততো পরং.

১৬৯০. সঙ্খারানং ৰিভূতত্তা, সাকারানং ৰিসেসতো;

তিলক্খণানং দিট্ঠত্তা, সঙ্খারেসু সভাৰতো.

১৬৯১. পরিপন্থা ৰিমুত্তস্স, মগ্গামগ্গৰিসুদ্ধিযা;

যথাৰীথিপ্পৰত্তস্স, পটিপত্তিৰিসুদ্ধিযা.

১৬৯২. ইন্দ্রিযানং সুতিক্খত্তা, পরিপক্কা ৰিপস্সনা;

উদযম্হা ৰিমুচ্চিত্ৰা, ভঙ্গে ঠাতি যথা কথং.

১৬৯৩. উপ্পাদো পচ্চযাযত্তো, ধম্মানমিতি নিচ্ছিতে;

নিরোধানুগতা জাতি, সিদ্ধাৰস্সং নিযামতো.

১৬৯৪. ততোদযাৰ পট্ঠায, অত্থায সূরিযো ৰিয;

ৰিনাসায পৰত্তন্তা, ৰযন্তেৰাতি পেক্খতি.

১৬৯৫. উদযাভোগমোহায, ৰযন্তিচ্চেৰ সব্বথা;

ভেদস্সভাৰমারব্ভ, ধম্মেসু সতি তিট্ঠতি.

১৬৯৬. অতীতা চ নিরুদ্ধাৰ, নিরুজ্ঝিস্সন্তিনাগতা;

নিরুজ্ঝন্তেৰ ৰত্তন্তা, ইচ্চেৰমনুপস্সতো.

১৬৯৭. নিজ্ঝরোৰ গিরগ্গম্হি, ৰারিৰোণতপোক্খরে;

পদীপো ৰিয ঝাযন্তো, আরগ্গেরিৰ সাসপো.

১৬৯৮. আতপে ৰিয উস্সাৰো, পরিস্সাৰে জলং ৰিয;

মদ্দিতং ফেণপিণ্ডংৰ, লোণপিণ্ডমিৰোদকে.

১৬৯৯. উদকে দণ্ডরাজীৰ, ৰিজ্জুতাৰ ৰলাহকে;

জলং তত্তকপালেৰ, সলিলে ৰিয বুব্বুল়ং.

১৭০০. ৰাতব্ভাহততূলংৰ, তীরং পত্তাৰ ৰীচিযো;

ফলং বন্ধনমুত্তংৰ, তিণানীৰ হুতাৰহে.

১৭০১. জাযন্তাপি চ জিয্যন্তা, মিয্যন্তা চ নিরন্তরং;

নিরোধাযাভিধাৰন্তা, ভঙ্গাভিমুখপাতিনো.

১৭০২. ৰিগচ্ছন্তাৰ দিস্সন্তি, খীযন্তন্তরধাযিনো;

ৰিদ্ধংসযন্তা সঙ্খারা, পতন্তা চ ৰিনাসিনো.

১৭০৩. ভঙ্গঞাণং তমক্খাতং, যেন ঞাণেন পস্সতো;

অনিচ্চন্তানুধাৰন্তি, তিৰিধাপি ৰিপস্সনা.

১৭০৪. উদযব্বযভঙ্গেসু, পাকটা হি অনিচ্চতা;

ভযাদীনৰনিব্বেদে, দুক্খতানত্ততা ততো.

১৭০৫. ইত্থং ভঙ্গমধিট্ঠায, পস্সন্তস্স তিলক্খণং;

সঙ্খারা সভযা হুত্ৰা, সমুপট্ঠন্তি যোগিনো.

১৭০৬. ৰাল়মিগানুবদ্ধাৰ, নিম্মুজ্জন্তা ৰিযণ্ণৰে;

অমনুস্সগহিতাৰ, পরিক্খিত্তাৰ ৰেরিহি.

১৭০৭. কণ্হসপ্পসমালীল়্হা, চণ্ডহত্থিসমুট্ঠিতা;

পপাতাৰাটপক্খন্তা, পতন্তাৰ হুতাৰহে.

১৭০৮. ৰজ্ঝপ্পত্তা মহাচোরা, ছিজ্জন্তা ৰিয সীসতো;

সূলমারোপিযন্তাৰ, পব্বতেনোত্থটা ৰিয.

১৭০৯. জাতিসঙ্কটপক্খন্তা, জরাব্যাধিনিপীল়িতা;

মরণাসনিসম্মদ্দা, মহাব্যসনভাগিনো.

১৭১০. মচ্চুনব্ভাহতা নিচ্চং, দুক্খভারসমোত্থটা;

সোকোপাযাসনিস্সন্দা, পরিদেৰপরাযণা.