১০. দসমো পরিচ্ছেদো

সেসকম্মট্ঠানৰিভাগো

১২৯৮. ব্যাপাদাদীনৰং দিস্ৰা, খেমভাৰঞ্চ খন্তিযং;

অপ্পমঞ্ঞা তু ভাৰেন্তো, ৰিনেয্য পটিঘং কথং.

১২৯৯. চেতোসন্তাপনো কোধো,

সম্পসাদৰিকোপনো;

ৰিরূপবীভচ্ছকরো,

মুখৰণ্ণপ্পধংসনো.

১৩০০. সীলকালুস্সিযুপ্পাদো, চিত্তৰিক্খেপসম্ভৰো;

পঞ্ঞাপজ্জোতৰিদ্ধংসী, পটিপত্তিৰিবন্ধকো.

১৩০১. অপাযেকাযনো মগ্গো, পাপকণ্টকবন্ধকো;

ধম্মমগ্গসমুচ্ছেদী, মগ্গদ্ৰারপিধানকো.

১৩০২. যসোৰণ্ণৰিসঙ্খারো, গুণমূলপ্পভঞ্জকো;

দুক্খধম্মসমোধানো, ব্যসনোপদ্দৰাকরো.

১৩০৩. দুন্নিমিত্তমিদং জাতং, সব্বসম্পত্তিধংসনং;

ধূমকেতুসমুপ্পাদো, সব্বলোকৰিনাসকো.

১৩০৪. সব্বকল্যাণধম্মানং, অৰমঙ্গলমুট্ঠিতং;

হিতারম্ভসমুগ্ঘাতী, অন্তরাযসমাগমো.

১৩০৫. সব্বাকারপটিক্কূলং, সব্বৰিদ্দেসকারণং;

ৰিপত্তিমুখমুপ্পন্নং, অমিত্তজনপত্থিতং.

১৩০৬. সপত্তকরণং ঘোরং, সব্বানত্থৰিধাযকং;

ভযমন্তরতো জাতং, তং জনো নাৰবুজ্ঝতি.

১৩০৭. খুরধারং লিহন্তাৰ, গিলন্তাৰ হুতাসনং;

তিত্তলাবুংৰ খাদন্তা, গণ্হন্তাদিত্তমাযুধং.

১৩০৮. ব্যাপাদমত্তসম্ভৰ-মত্তঘঞ্ঞায কেৰলং;

উপলাল়েন্তি দুম্মেধা, ঘোরমাসীৰিসং যথা.

১৩০৯. দোসতেজেন রুক্খোৰ, সুসিরারুল়্হপাৰকো;

অন্তোনুদয্হমানাপি, ৰিপ্ফন্দন্তি ৰিঘাতিনো.

১৩১০. নাৰবুজ্ঝন্তি দুম্মেধা, চেতোসঙ্কপ্পৰাযুনা;

উক্কামুখামিৰাদিত্ত-মুজ্জলন্তা পুনপ্পুনং.

১৩১১. ভযমগ্গসমারুল়্হা, খেমমগ্গৰিরোধিনো;

ব্যাপন্না কিব্বিসাকিণ্ণা, অত্থদ্ৰযৰিরোধিনো.

১৩১২. অনাথা সল্লকাৰিদ্ধা, ৰিসট্টা অনুসোচিনো;

অন্ধা ৰিয মিগারঞ্ঞে, ভমন্তি হতচক্খুকা.

১৩১৩. অসংৰিহিতকম্মন্তা, বালা কোধৰসানুগা;

খিপ্পং লক্খিং পরিচ্চত্তা, যসোভোগেহি ধংসরে.

১৩১৪. দুপ্পটিপ্পাদিতারম্ভা, কোধসঙ্খোভমোহিতা;

ধম্মামতরসস্সাদং, ন ৰিন্দন্তি অৰিদ্দসু.

১৩১৫. বহ্ৰাদীনৰমিচ্চেৰ-মন্তো ব্যাধিমিৰুট্ঠিতং;

জাতানলমিৰুচ্ছঙ্গে, অজ্ঝুপেক্খন্তি দুজ্জনা.

১৩১৬. চোদযমানা দুক্খেহি, ক্লেসাচিণ্ণমলীমহা;

পাপকম্মেহি পূরেন্তা, সেন্তি মচ্চুপথে চিরং.

১৩১৭. তমেৰং পটিসঙ্খায, পটিঘং পন যোনিসো;

ৰাল়মিগংৰ ধাৰন্তং, আৰিসন্তংৰ রক্খসং.

১৩১৮. পাৰকংৰ পরিব্যুল়্হং, ভাযমানস্স যোগিনো;

সোত্থিভাৰায খেমন্ত-মুপঞ্ঞত্তং মহেসিনা.

১৩১৯. মাতা কল্যাণধম্মানং, খমা নাম মহিদ্ধিকা;

সমপ্পৰত্তি সত্তেসু, সব্বসম্পত্তিসাধিকা.

১৩২০. কোধানলজলাসেকো,

সোকোপাযাসনাসনং;

আঘাতসল্লনিদ্ধারী,

উপনাহৰিমোচনং.

১৩২১. ৰণ্ণকিত্তিসমুট্ঠানং, গুণমূলাভিসেৰনং;

অপারুতমুখংৰেত-মত্থদ্ৰযসমিদ্ধিযা.

১৩২২. ৰিঘাতপরিযাদান-মাসৰানমসেসতো;

পটিপস্সম্ভনং চেতো-পীতিকরণচন্দনং.

১৩২৩. সব্বদুক্খসমুগ্ঘাতি, সুখুপট্ঠানমুত্তমং;

ব্যসনোদযৰিচ্ছেদো, ভযভেরৰনিগ্গমো.

১৩২৪. চেতোপসাদসন্ধানো, পাসাদিকফলাৰহো;

পৰরো বোধিসম্ভারো, নরানরনিসেৰিতো.

১৩২৫. পাপকন্তারনিত্থারো, চতুরাপাযরোধকো;

দ্ৰারাৰাপুরণঞ্চেতং, দেৰলোকূপপত্তিযা.

১৩২৬. পঞ্ঞাসীলসমাধানং, পটিপত্তিৰিসোধনো;

পিযঙ্করো সোম্মভাৰো, দুল্লভো বহুপত্থিতো.

১৩২৭. ক্লেসসঙ্খোভৰিক্খেপ-ৰিপ্ফন্দপটিবন্ধনং;

তিতিক্খাগুণমক্খাত-মারক্খৰিধিমত্তনো.

১৩২৮. ৰিহিংসারতিসারম্ভ-পটিরোধৰিমোচনং;

ৰেরিকিব্বিসৰিদ্ধংসী, লোকানুগ্গহকারণং.

১৩২৯. ধম্মপজ্জোতকরণং, সংযোগমলসোধনং;

সম্মোহতিমিরুদ্ধারি, সম্পত্তিপটিপাদনং.

১৩৩০. ইচ্চত্তত্থং পরত্থঞ্চ, সম্পাদেত্ৰা খমাপরো;

সাধেতি সব্বসম্পত্তি-মিধ চেৰ পরত্থ চ.

১৩৩১. তিতিক্খাগুণসম্পন্নো, পাণভূতানুকম্পকো;

অনাকুলিতকম্মন্তো, সোরতো সখিলো সুচি.

১৩৩২. নিৰাতো সমিতাচারো, সুভগো পিযদস্সনো;

পটিসঙ্খাবলপ্পত্তো, ধিতিমা মতিপাটৰো.

১৩৩৩. অক্খোভো অধিৰাসেন্তো,

সব্বানত্থে পরিস্সযে;

ভীমসঙ্গামাৰচরো,

হত্থিনাগোৰ সোভতি.

১৩৩৪. ইত্থং সমন্ততো ভদ্দং, তিতিক্খং পচ্চৰেক্খতো;

পস্সম্ভেতি সমুট্ঠায, খমা ব্যাপাদসম্ভমং.

১৩৩৫. দিব্বোসধমিৰাতঙ্কং, মেঘজ্জৰং হুতাসনং;

খিপ্পমন্তরধাপেতি, তিতিক্খা কোধমত্তনো.

১৩৩৬. ততোনেকগুণোপেতং, নেকদোসপ্পভঞ্জনং;

খন্তিধম্মমধিট্ঠায, পসন্নধীরমানসো.

১৩৩৭. ভাৰেয্য পঠমং তাৰ, মেত্তাভাৰনমুত্তমং;

অত্তানমুপমং কত্ৰা, সত্তেসু হিতৰুড্ঢিযা.

১৩৩৮. সব্বে সত্তা চ পাণা চ, ভূতা জীৰা চ পুগ্গলা;

অব্যাপজ্জা তথাৰেরা, অনীঘা চ সুখেধিনো.

১৩৩৯. ৰিজ্জাসম্পত্তিভোগেহি, পৰড্ঢন্তু যসস্সিনো;

পরিৰারবলপ্পত্তা, ভযোপদ্দৰৰজ্জিতা.

১৩৪০. সখিলা সুখসম্ভাসা, অঞ্ঞমঞ্ঞাৰিরোধিনো;

মোদন্তু সুহিতা সব্বে, মা কিঞ্চি পাপমাগমা.

১৩৪১. সদ্ধাপামোজ্জবহুলা, দানসীলমহুস্সৰা;

গুণভূসিতসন্তানা, আযুং পালেন্তনামযং.

১৩৪২. সম্মাদিট্ঠিং পুরোধায, সদ্ধম্মপটিপত্তিযা;

আরাধেন্তু হিতোপায-মচ্চন্তং সুখসাধনং.

১৩৪৩. ইতি নানপ্পকারেন, সত্তেসু হিতমানসং;

মাতাৰ পিযপুত্তম্হি, পৰত্তেয্য নিরন্তরং.

১৩৪৪. সিনেহং পরিৰজ্জেন্তো, ব্যাপাদঞ্চ ৰিনাসযং;

পরিসুদ্ধেন চিত্তেন, হিতকামোৰ কেৰলং.

১৩৪৫. মেত্তায মিত্তে মজ্ঝত্তে, ৰেরিকে চ যথাক্কমং;

করোন্তো সীমসম্ভেদং, অত্তনি চ সমং ফরে.

১৩৪৬. আসেৰন্তস্স তস্সেৰং, হিতাভোগসমাহিতং;

সত্তপঞ্ঞত্তিমারব্ভ, সমাধিযতি মানসং.

১৩৪৭. ততো অনীঘো একগ্গো, উপসন্তমনোরথো;

ঝানত্তিকং চতুক্কং ৰা, মেত্তাচেতোৰিমুত্তিযা.

১৩৪৮. ভূমিদেসদিসাসত্ত-ভেদভিন্নেসু ওধিসো;

যথাসম্ভৰমপ্পেতি, সব্বসত্তেস্ৰনোধিসো.

১৩৪৯. তদেৰমেকসত্তম্হি, পরিচ্ছেদনিযামতো;

বহুকেসু চ সত্তেসু, সব্বেসু চ পৰত্ততি.

১৩৫০. তথাসেৰিতসন্তানো,

মেত্তাচেতোৰিমুত্তিযা;

করুণাভাৰনাযোগ-

মারভেয্য ততো পরং.

১৩৫১. সত্তানং দুক্খিতাকার-মাৰজ্জিত্ৰান যোনিসো;

‘‘অহো দুক্খা ৰিমুচ্চন্তু, সব্বে সত্তা’’তি চিন্তযং.

১৩৫২. কথং মাণৰকোযঞ্চ, ভযভেরৰকম্পিতো;

ব্যসনোপদ্দৰাৰিদ্ধো, ৰিপ্ফন্দতি ৰিঘাতৰা.

১৩৫৩. তথা হেতে ৰিমোসায, পটিপন্না ৰিরোধিনো;

সব্যাপজ্জা ৰিহঞ্ঞন্তি, চেতোদুক্খসমপ্পিতা.

১৩৫৪. অথঞ্ঞে পরিদেৰন্তি, ৰিপত্তিৰিনিপাতিকা;

পধুপাযিকসঙ্কপ্পা, সোকোপাযাসভাগিনো.

১৩৫৫. অথাপরে পরাভূতা, কামক্লেসৰসীকতা;

মোহন্ধকারপক্খন্তা, সত্তা গচ্ছন্তি দুগ্গতিং.

১৩৫৬. তে তত্থ কটুকং ঘোরমনুভোন্তা সকং ফলং;

দুক্খসূলসমাৰিদ্ধা, বাহা পগ্গয্হ কন্দরে.

১৩৫৭. দীঘরত্তাধিমুত্তায, দেৰলোকসমিদ্ধিযা;

দেৰকাযা ৰিহাযন্তি, অকামা পরিৰত্তিনো.

১৩৫৮. চিরকালং জলিত্ৰান, সূরিযোৰ নভন্তরে;

ব্রহ্মানোপি পতন্তেৰ, ব্রহ্মলোকাপরাযণা.

১৩৫৯. খন্ধপঞ্চকমিচ্চেৰং, দুক্খাগারং সমুব্বহং;

নানাগতীসু ৰিক্খিত্তং, পাণজাতং ৰিহঞ্ঞতি.

১৩৬০. অনাথমনযাপন্নং, পরিহানিভযাকুলং;

ৰাতমণ্ডলিকক্খিত্তপক্খীৰ পরিৰত্ততি.

১৩৬১. ইতি দিস্ৰান সুত্ৰা ৰা, সম্ভাৰেত্ৰান ৰা পুন;

দুক্খাপগমমিচ্ছন্তো, দুক্খাপগম পত্থযং.

১৩৬২. সুখিতেসু চ মেধাৰী, দুক্খাকারমনুস্সরং;

পৰত্তেয্য দযাপন্নো, করুণাভাৰনপ্পনং.

১৩৬৩. ‘‘অহো সত্তা ৰিমুচ্চন্তু, দুক্খধম্মেহি সব্বথা;

সাধু সমেন্তুপাযাসা, সোকা চ পরিদেৰনা.

১৩৬৪. ‘‘খীযন্তু পাপধম্মা চ, পস্সম্ভেন্তামযা তথা;

সংক্লেসা পলিবোধা চ, সমুচ্ছিজ্জন্তু পাণিনং.

১৩৬৫. ‘‘ব্যাপাদা চ ৰিহাযন্তু, ৰিনিৰত্তন্তুপদ্দৰা;

ব্যসনানি ৰিনস্সন্তু, ৰিগচ্ছন্তু ৰিপত্তিযো.

১৩৬৬. ‘‘ৰিহেসা চ ৰিঘাতা চ, খীযন্তু ভযভেরৰা;

পটিক্কমন্তু ৰিস্সট্ঠা, সোত্থিং পস্সন্তু পাণিনো’’.

১৩৬৭. ইচ্চেৰমনুকম্পন্তো, সব্বসত্তেপি সব্বথা;

সব্বদুক্খসমুগ্ঘাতং, পত্থেন্তো করুণাযতি.