৯. নৰমো পরিচ্ছেদো

দসানুস্সতিৰিভাগো

১১০০. সদ্ধাপব্বজিতো যোগী, ভাৰেন্তোনুস্সতিং পন;

দসানুস্সতিভেদেসু, ভাৰেয্যঞ্ঞতরং কথং.

১১০১. অরহং সুগতো লোকে, ভগৰা লোকপারগূ;

ৰিজ্জাচরণসম্পন্নো, ৰিমুত্তিপরিনাযকো.

১১০২. জেট্ঠো সম্মাভিসম্বুদ্ধো, সেট্ঠো পুরিসসারথী;

সত্থা দেৰমনুস্সানং, বুদ্ধো অপ্পটিপুগ্গলো.

১১০৩. সব্বলোকহিতো বন্ধু, সমত্তরতনালযো;

সত্তানমনুকম্পায, জাতো নাথো সিৰংকরো.

১১০৪. চক্খুমা তিত্থকুসলো, ধম্মস্সামী তথাগতো;

মচ্চুধেয্যৰিমোক্খায, পটিপাদযি পাণিনো.

১১০৫. সত্থৰাহো মহাযোগ্গো, মগ্গামগ্গযুধন্ধরো;

সিরিসত্থমধিগ্গয্হ, ৰিচরিত্থ মহাপথং,

১১০৬. অনোমো অসমো ধীরো,

লোকহীতপরক্কমো;

সব্বাকারৰরোপেতো,

অচ্ছেরব্ভুতপুগ্গলো.

১১০৭. অত্থভূতো ধম্মভূতো,

ব্রহ্মভূতো মহাযসো;

ঞাণালোকপরিচ্ছিন্ন-

ঞেয্যাসেসপরিগ্গহো.

১১০৮. আনুভাৰৰসিপ্পত্তো, আসভণ্ডাননিচ্চলো;

মহন্তমরিযাদোযমনন্তগতিগোচরো.

১১০৯. সব্বা ভিঞ্ঞাবলপ্পত্তো, ৰেসারজ্জৰিসারদো;

সব্বসম্পত্তিনিট্ঠানো, গুণপারমিপূরকো.

১১১০. অপ্পমেয্যো মহানাগো, মহাৰীরো মহামুনি;

মহেসী মহিতাচারো, মহামহো মহিদ্ধিকো.

১১১১. সব্বত্থসিদ্ধিসঞ্চারো, মহেসীগণপূজিতো;

রাজাধিরাজমহিতো, দেৰব্রহ্মাভিৰন্দিতো.

১১১২. অভিভূয তযো লোকে, আদিচ্চোৰ নভন্তরে;

ৰিরোচতি মহাতেজো, অন্ধকারে পভঙ্করো.

১১১৩. ব্যামপ্পভাপরিক্খিত্তো, কেতুমালাহলঙ্কতো;

দ্ৰত্তিংসলক্খণাসীতিঅনুব্যঞ্জনসোভিতো.

১১১৪. ছব্বণ্ণরংসিললিতো, রতনগ্ঘিযসন্নিভো;

সমিদ্ধিরূপসোভগ্গো, দস্সনেয্যংৰ পিণ্ডিতং.

১১১৫. ফুল্লং পদুমসণ্ডংৰ, কপ্পরুক্খোৰলঙ্কতো;

নভংৰ তারকাকিণ্ণং, উত্তমো পটিদিস্সতি.

১১১৬. সত্থুকপ্পমহাৰীরপুত্তেহি পরিৰারিতো;

সব্বলোকমহিদ্ধায, ধম্মরাজা সযংৰসী.

১১১৭. নিদ্ধোতমলচন্দোৰ, নক্খত্তপরিৰারিতো;

খত্তসঙ্ঘপরিব্যুল়্হো, চক্কৰত্তীৰ সোভতি.

১১১৮. ইচ্চানন্তগুণাকিণ্ণমসেসমলনিস্সটং;

সব্বসম্পত্তিদাতারং, ৰিপত্তিৰিনিবন্ধকং.

১১১৯. দযাপরমহোরত্তং, ভগৰন্তমনুস্সরং;

ভাৰেতি পঞ্ঞৰা যোগী, বুদ্ধানুস্সতিভাৰনং.

১১২০. স্ৰাখাতো তেন সদ্ধম্মো, সম্বুদ্ধেন সতীমতা;

পচ্চত্তপটিৰেধেন, পস্সিতব্বো যথারহং.

১১২১. তণ্হাদলিদ্দনাসায, মনোরথসমিদ্ধিযা;

কালন্তরমনাগম্ম, পচ্চক্খফলদাযকো.

১১২২. উপনিস্সযৰন্তানং, ‘‘এহি পস্সা’’তি দস্সিযো;

পচ্চত্তমেৰ ৰিঞ্ঞূহি, ৰেদিতব্বো সভাৰতো.

১১২৩. সব্বাসৰসমুগ্ঘাতী, সুদ্ধো সোৰত্থিকো সিৰো;

পিহিতাপাযকুম্মগ্গো, মগ্গো নিব্বানপত্তিযা.

১১২৪. ক্লেসসংকটদুগ্গম্হা, দুক্খক্খন্ধমহব্ভযা;

খেমন্তভূমিং নিয্যাতি, অচ্চন্তমনুপদ্দৰং.

১১২৫. পুঞ্ঞতিত্থমিদং নাম, মঙ্গলঞ্চ সিৰঙ্করং;

হিতোদযসুখাধান-মমতাহারমুত্তমং.

১১২৬. অৰিজ্জাপটলুদ্ধারৰিজ্জানেত্তোসধং ৰরং;

পঞ্ঞাধারমিদং সত্থং, ক্লেসগণ্ডপ্পভেদকং.

১১২৭. চতুরোঘনিমুগ্গানং, সেতুবন্ধো সমুগ্গতো;

ভৰচারকরুদ্ধানং, মহাদ্ৰারো অপারুতো.

১১২৮. সোকোপাযাসৰিদ্ধানং, পরিদেৰসমঙ্গিনং;

সল্লনীহরণোপাযো, অচ্চন্তসুখমীরিতো.

১১২৯. ব্যসনোপদ্দৰাপেতো, সংক্লেসমলনিস্সটো;

উজুসম্মত্তনিযতো, পটিপত্তিৰিসুদ্ধিযা.

১১৩০. সুদ্ধসীলপরিক্খারো, সমাধিমযপঞ্জরো;

সম্মাসঙ্কপ্পচক্কঙ্গো, সম্মাৰাযামৰাহনো.

১১৩১. সতিসারথিসংযুত্তো, সম্মাদিট্ঠিপুরেজৰো;

এস ধম্মরথো যাতি, যোগক্খেমস্স পত্তিযা.

১১৩২. ৰিপত্তিপটিবাহায, সব্বসম্পত্তিসিদ্ধিযা;

সব্বখন্ধৰিমোক্খায, ধম্মং দেসেসি চক্খুমা.

১১৩৩. হিতেসী সব্বপাণীনং, দযাপন্নো মহামুনি;

ধম্মালোকং পকাসেসি, চক্খুমন্তানমুত্তমো.

১১৩৪. যং ধম্মং সম্মদঞ্ঞায, খেমমগ্গপ্পতিট্ঠিতা;

পাপকাপগতা ধীরা, পস্সদ্ধিদরথাসযা.

১১৩৫. ভৰযোগা ৰিনিমুত্তা, পহীনভযভেরৰা;

অচ্চন্তসুখমেধেন্তি, সোত্থিপত্তা মহেসযো.

১১৩৬. তমেৰমুত্তমং ধম্মং, চিন্তেন্তো পন পণ্ডিতো;

ভাৰেতীতি পকাসেন্তি, ধম্মানুস্সতিভাৰনং.

১১৩৭. চত্তারো চ পটিপন্না, চত্তারো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

১১৩৮. পলাপাপগতো সুদ্ধো, পটিপত্তিপতিট্ঠিতো;

পরিগ্গহিতসদ্ধম্মো, সমিদ্ধিগুণসোভিতো.

১১৩৯. পহীনাপাযগমনো, পাপক্লেসৰিনিস্সটো;

পরিপন্থসমুচ্ছেদী, ভৰচারকভেদকো.

১১৪০. উত্তমদমথপ্পত্তো, সুৰিনীতো মহেসিনা;

ৰিজ্জাৰিমুত্তিৰোদাতো, আজানীযপথে ঠিতো.

১১৪১. সুগতোরসি সম্ভূতো, সুচিধম্মসিরিন্ধরো;

পটিপাদিতসম্পত্তো, ধম্মসাসনসেৰিতো.

১১৪২. ভযভেরৰনিস্সঙ্গো, জিনতেজানুপালিতো;

মোনেয্যপথসঞ্চারো, সুগতোৰাদভাজনো.

১১৪৩. অপ্পমাদপরিত্তাণো, সীলালঙ্কারভূসিতো;

চেতোসমাধিসন্নদ্ধো, পঞ্ঞাযুধসমুজ্জলো.

১১৪৪. উজুমগ্গমধিট্ঠায, মারকাযপ্পদালনো;

অপরাজিতসঙ্গামো, ললিতোদাতৰিক্কমো.

১১৪৫. মচ্চুধেয্যমতিক্কন্তো, বোধিধম্মপ্পতিট্ঠিতো;

ছল়াভিঞ্ঞাবলপ্পত্তো, সমারাধিতসাসনো.

১১৪৬. অনুবোধিমনুপ্পত্তো, পভিন্নপটিসম্ভিদো;

সামঞ্ঞপারমিপ্পত্তো, তোসেতি জিনমানসং.

১১৪৭. নেকাকারৰরূপেতো, নানাসম্পত্তিফুল্লিতো;

ৰিপত্তিপথনিত্তিণ্ণো, অভিবুদ্ধিপরাযণো.

১১৪৮. আহুনেয্যো পাহুনেয্যো,

দক্খিণেয্যো সুদুল্লভো;

সদেৰকস্স লোকস্স,

পুঞ্ঞক্খেত্তমনুত্তরং.

১১৪৯. যত্থ সুদ্ধিম্হি নিদ্দোসে, সদ্ধাবীজং পতিট্ঠিতং;

অচ্চন্তং পরিপাচেতি, সম্পত্তিফলমুত্তমং.

১১৫০. যং ফলং পরিভুঞ্জন্তা, ৰিমুত্তিরসসেৰনং;

অচ্চন্তসুখিতা ধীরা, ভৰন্তি অজরামরা.

১১৫১. তং ফলং পত্থযন্তেন, সঙ্ঘানুস্সতিভাৰনা;

ভাৰেতব্বা পনিচ্চেৰমিতি ভাসন্তি পণ্ডিতা.

১১৫২. পঞ্চসীলং দসসীলং, পাতিমোক্খমুপোসথং;

চাতুপারিসুদ্ধিসীলং, ধুতঙ্গপরিৰারিতং.

১১৫৩. এৰমেতেসু যং কিঞ্চি, সমাদায রহোগতো;

তমানিসংসং গুণতো, ফলতো চ ৰিচিন্তযে.

১১৫৪. আদি চেতং পতিট্ঠা চ, মুখং পমুখমুত্তমং;

মূলং কুসলধম্মানং, পভৰং পটিপত্তিযা.

১১৫৫. সাসনোতরণদ্ৰারং, তিত্থং সদ্ধম্মৰাপিযা;

পারিসুদ্ধিপদট্ঠানং, মগ্গো খেমন্তপাপকো.

১১৫৬. সাধু সিক্খাসমাদানং, বাহুসচ্চৰিভূসনং;

অরিযাচারচারিত্ত-মৰণ্ণমলৰজ্জনং.

১১৫৭. কুলপুত্তঅলঙ্কারো, পাপজল্লপৰাহনং;

অনপাযি সুগন্ধঞ্চ, মহাপুরিসসেৰিতং.

১১৫৮. পচ্ছানুতাপহরণং, পীতিপামোজ্জৰড্ঢনং;

নেক্খম্মভাৰনোপেতং, পব্বজ্জাৰেসসোভনং.

১১৫৯. সোপানং সগ্গলোকস্স, দল়্হাপাযৰিধানকং;

অনুপদ্দৰসম্পত্তি, সমত্থগুণসূদনী.

১১৬০. ক্লেসপঞ্জরৰিচ্ছেদি, ৰিপত্তিপথৰারণং;

সোত্থিকম্মসমুট্ঠানং, অসাধারণমঙ্গলং.

১১৬১. ‘‘সুলদ্ধা ৰত মে লদ্ধা, সদ্ধা সুগতসাসনে;

সীলং মে যস্স কল্যাণং, পরিসুদ্ধমখণ্ডিতং.

১১৬২. ‘‘দুল্লভো ৰত মে লদ্ধো,

মহালাভো অনপ্পকো;

যোহমক্খলিতাচারো,

উপঘাতৰিৰজ্জিতো.

১১৬৩. ‘‘ধম্মঙ্কুরিতসন্তানো, মূলজাতোস্মি সাসনে;

উজুমগ্গং সমারুল়্হো, পিহিতা সভযা দিসা.

১১৬৪. ‘‘অৰঞ্চা ৰত মে জাতি, আরদ্ধা খণসম্পদা;

পতিট্ঠিতোম্হি সদ্ধম্মে, সফলং মম জীৰিতং’’.

১১৬৫. ইত্থং নানপ্পকারেন, চিন্তেন্তো গুণমত্তনো;

সীলক্খন্ধস্স ভাৰেতি, সীলানুস্সতিভাৰনং.

১১৬৬. সদ্ধায সীলৰন্তেসু, দত্ৰা দানং যথারহং;

নিদ্ধোতমলমচ্ছেরো, ৰিৰিত্তো তমনুস্সরে.

১১৬৭. দানং নিধানমনুগং, অসাধারণমুত্তমং;

অৰিনাসসুখাধানং, অচ্চন্তং সব্বকামদং.

১১৬৮. কোপদাহোপসমনং, মচ্ছেরমলসোধনং;

পমাদনিদ্দাৰুট্ঠানং, লোভপাসৰিমোচনং.

১১৬৯. চেতোৰিকারদমনং, মিচ্ছামগ্গনিৰারণং;

ৰিত্তিলাভসুখস্সাদো, ৰিভৰোদযমঙ্গলং.