৮. অট্ঠমো পরিচ্ছেদো

কসিণাসুভৰিভাগো

৮৮০. ইতো পরং পৰক্খামি, ভাৰনানযমুত্তমং;

নামরূপং পরিগ্গয্হ, পটিপজ্জিতুমীহতো.

৮৮১. ভাৰনা দুৰিধা তত্থ, সমথো চ ৰিপস্সনা;

সমথো দুৰিধো তত্থ, পরিত্তো চ মহগ্গতো.

৮৮২. উপচারমনুপ্পত্তো, পরিত্তোতি পৰুচ্চতি;

মহগ্গতপ্পনাপত্তো, সমথো লোকিযো মতো.

৮৮৩. কসিণানি দসাসুভা, দসধানুস্সতী তথা;

অপ্পমঞ্ঞা চ সঞ্ঞা চ, ৰৰত্থারুপ্পকানি চ.

৮৮৪. কম্মট্ঠানানি তত্থাহু, চত্তালীস ৰিচক্খণা;

যত্থানুযোগং কুব্বন্তা, ভাৰেন্তি সমথদ্ৰযং.

৮৮৫. তং পযোগৰিসুদ্ধেন, পত্ৰানোপাযসম্পদং;

অজ্ঝাসযং ৰিসোধেত্ৰা, ভাৰেতব্বন্তি ভাসিতং.

৮৮৬. কথং করোন্তো চারিত্তং, ৰারিত্তঞ্চ ৰিৰজ্জিয;

পাতিমোক্খং সমাদায, সদ্ধায পরিপূরযে.

৮৮৭. পটিসঙ্খায সোধেত্ৰা, ছদ্ৰারেসু মলাসৰং;

ছল়িন্দ্রিযানি মেধাৰী, সতারক্খেন গোপযে.

৮৮৮. পাপকাজীৰনিস্সঙ্গো, কুহকাচারনিস্সটো;

আজীৰং পরিসোধেয্য, পহিতত্তেট্ঠিসুদ্ধিযা.

৮৮৯. ইদমত্থিতমারব্ভ, পটিসঙ্খায যোনিসো;

পঞ্ঞৰা সম্পজঞ্ঞেন, পরিভুঞ্জেয্য পচ্চযে.

৮৯০. সংৰরং পাতিমোক্খে চ, সীলমিন্দ্রিযসংৰরং;

আজীৰপারিসুদ্ধিঞ্চ, তথা পচ্চযনিস্সিতং.

৮৯১. সমাদায চতুদ্ধেৰ-মধিট্ঠেয্য ততো পরং;

তস্সেৰ পরিৰারায, ধুতঙ্গানি যথারহং.

৮৯২. পংসুকূলিকমঙ্গং তি-চীৰরং চীৰরাযুগং;

পিণ্ডপাতিকমঙ্গঞ্চ, সপদানিকমুত্তমং.

৮৯৩. খলুপচ্ছাভত্তিকঙ্গং, ধুতঙ্গং পত্তপিণ্ডিকং;

একাসনিকমিচ্চেৰং, পঞ্চধা ভোজনে ঠিতং.

৮৯৪. আরঞ্ঞিকং যথাসন্থ-

তিকঙ্গং রুক্খমূলিকং;

অব্ভোকাসিকসোসানি-

কঙ্গা নেসজ্জিকং তথা.

৮৯৫. ছ সেনাসনমারব্ভ, ধুতঙ্গানীতি তেরস;

কপ্পিযেপি চ লোলুপ্প-সমাচারৰিমুত্তিযা.

৮৯৬. সামীচিপটিপত্তীতি, কত্ৰা সল্লেখৰুত্তিযা;

পচ্চযত্তযমাহচ্চ, পঞ্ঞত্তানি মহেসিনা.

৮৯৭. চতুপারিসুদ্ধিসীলং, ধুতঙ্গপরিৰারিতং;

পূরেত্ৰান ৰিসুদ্ধেৰং, পযোগপরিসুদ্ধিযা.

৮৯৮. ততো পণিধিসম্পন্নো, ভাৰনায ৰিসারদো;

উপাযং পটিপাদেয্য, পৰিৰেকরতো কথং?

৮৯৯. আৰাসো চ কুলং লাভো,

গণো কম্মঞ্চ পঞ্চমং;

অদ্ধানং ঞাতি আবাধো,

গন্থো ইদ্ধীতি তে দস.

৯০০. ছেত্ৰান নিপকো যোগী,

পলিবোধে যথারহং;

নিরালযো নিরারম্ভো,

পপঞ্চোপসমে রতো.

৯০১. পিযং গরুং ভাৰনিযং, ৰত্তারং ৰচনক্খমং;

কত্তারমতিগম্ভীরকথং ঠাননিযোজকং.

৯০২. বহুস্সুতং গুণৰন্ত-মাগম্মাচরিযং বুধো;

খমো পদক্খিণগ্গাহী, নিয্যাতত্তুজু ভদ্রকো.

৯০৩. আরাধেত্ৰান গণ্হেয্য, তং কম্মট্ঠানদাযকং;

কম্মট্ঠানং পরিক্খিত্ৰা, চরিযারহমত্তনো.

৯০৪. রাগো দোসো চ মোহো চ,

চরিযা তীহি পণ্ডিতা;

সদ্ধাবুদ্ধিৰিতক্কেহি,

ছব্বিধা চ ৰিভাৰযুং.

৯০৫. রাগুস্সন্নস্স সপ্পাযা, কোট্ঠাসাসুভভাৰনা;

দোসুস্সন্নস্সপ্পমঞ্ঞা, নীলাদি চ চতুব্বিধা.

৯০৬. ৰিতক্কং মোহুস্সন্নানং, আনাপানং পকাসিতং;

ছ সদ্ধাচরিতস্সাহু, বুদ্ধানুস্সতিআদযো.

৯০৭. মরণোপসমাসঞ্ঞাৰৰত্থানানি বুদ্ধিনো;

সেসানি পন সব্বেসং, তত্থাপি কসিণং বুধা.

৯০৮. ৰিতক্কপকতিকস্স, পরিত্তং মোহচারিনো;

মহন্তমিতি সপ্পাযং, গহেত্ৰান ততো পরং.

৯০৯. মহাৰাসং নৰং জিণ্ণং, পন্থসোণ্ডিকসন্তিকং;

পণ্ণপুপ্ফফলাকিণ্ণং, বহুসম্মানপত্থিতং.

৯১০. সীমন্তদারুনগর-ক্খেত্তপচ্চন্তনিস্সিতং;

ৰিসভাগমসপ্পাযং, পট্টনং মিত্তদুল্লভং.

৯১১. ঠানানিট্ঠারসেতানি, পরিৰজ্জেয্য পণ্ডিতো;

সেৰেয্য ভাৰনাযোগ্গং, সেনাসনমতন্দিতো.

৯১২. নাতিদূরং নাচ্চাসন্নং, অপ্পসদ্দমনাকুলং;

গমনাগমনসম্পন্নং, অপ্পডংসানুপদ্দৰং.

৯১৩. অকিচ্ছপচ্চযুপ্পাদং, লজ্জীভিক্খুগণোচিতং;

ৰিৰেকট্ঠানবহুলং, বহুস্সুতনিসেৰিতং.

৯১৪. অপ্পভযং নিরাসঙ্কং, অপ্পদোসং মহাগুণং;

ৰিহারমনুসেৰন্তো, তত্থ নিস্সঙ্গচেতসা.

৯১৫. ততো কেসনখচ্ছেদ-রজনাদিমসেসতো;

খুদ্দকং পলিবোধঞ্চ, ছিন্দিত্ৰান যথারহং.

৯১৬. আৰাসং গোচরং ভস্সং, পুগ্গলং ভোজনং তথা;

ৰজ্জেন্তোতুমসপ্পাযং, ইরিযাপথমত্তনো.

৯১৭. সেৰন্তো সত্ত সপ্পাযে, তে এৰাতি পধানৰা;

ভাৰনূপাযসম্পন্নো, ৰূপকট্ঠো রহোগতো.

৯১৮. কামেস্ৰাদীনৰং দিস্ৰা, নেক্খম্মং দট্ঠু খেমতো;

পরিযুট্ঠাননিব্বিন্দো, সোধেয্যজ্ঝাসযং কথং.

৯১৯. অপ্পস্সাদা মহাদুক্খা, কামা হি কটুকপ্ফলা;

দুস্সংহারা দুরারক্খা, বহ্ৰাদীনৰসণ্ঠিতা.

৯২০. অট্ঠিকা খজ্জমানাৰ, ৰিঘাতায পভিজ্জিতা;

গয্হন্তত্তৰধাযেতে, মংসপেসীৰ পক্খিভি.

৯২১. পটিৰাতে তিণুক্কাৰ, পরিগ্গাহকদাহিনো;

অঙ্গারকাসুসঙ্কাসা, সব্বঙ্গপরিতাসকা.

৯২২. সুপিনে পরিভুত্তাৰ, নালং কস্সচি তিত্তিযা;

ন তু কস্সচি অচ্চন্তা, অলঙ্কারাৰ যাচিতা.

৯২৩. ছজ্জন্তা ফলরুক্খাৰ, পটিপন্নপভঞ্জিনো;

অসিসূনূপমা নিচ্চ-মধিকোট্টেন্তি পাণিনো.

৯২৪. সত্তিসূলূপমা দল়্হং, তণ্হাসল্লানুৰেধিনো;

ঘোরানত্থৰিসাকিণ্ণা, কণ্হসপ্পসিরূপমা.

৯২৫. সব্বাসৰপরিক্লিট্ঠা, সব্বাসংক্লেসৰত্থুকা;

গম্মা চ চপলা নীচা, পুথুজ্জনমমাযিতা.

৯২৬. বহুসাধারণা চেতে, সপত্তজনপত্থিতা;

মহোপদ্দৰুপযট্ঠা, বহ্ৰাযাসা ভযাৰহা.

৯২৭. মহারম্ভসমারদ্ধা, খিপ্পাকারৰিধংসিনো;

সোকসল্লং পৰেসেন্তা, ৰিগচ্ছন্তি সুৰে সুৰে.

৯২৮. নালং কস্সচি তাণায, নালমস্সাসনায চ;

অৰিসাসনিযাৰস্সং, কিতৰা মারকিংকরা.

৯২৯. সত্তানমুপঘাতায, মধুরাকারনিম্মিতা;

রক্খসী ৰিয সন্তান-মাৰিসন্তি মনোহরা.

৯৩০. আৰিট্ঠা যেহি দুম্মেধা, ব্যসনাহিতসম্ভৰা;

ৰিপল্লাসপরাভূতা, ব্যাপজ্জন্তা ৰিহঞ্ঞরে.

৯৩১. চেতোসঙ্কপ্পরচিতা, নন্দিরাগোপসেৰনা;

মধুলিত্তাসিধারাৰ, ব্যাপারেনোপসেৰিতা.

৯৩২. মনোরমসুভাকারা, পিযরূপোপলম্ভিনো;

মিত্তমুখং সপত্তাৰ, ৰঞ্চযন্তি মহাজনং.

৯৩৩. ৰঞ্চিতা যেহি দুম্মেধা, সব্বসম্পত্তিধংসিতা;

খেমমগ্গা পরিব্ভট্ঠা, ধারেন্তি ৰধমত্তনো.

৯৩৪. ৰিরূপরূপাকারেন, নিম্মথেন্তা পলোভিনো;

অভাৰিতানং বালানং, মানসং নিহনন্তিমে.

৯৩৫. যত্থ রাগসল্লৰিদ্ধা, সল্লেনেৰ ৰনে মিগা;

তত্থ তত্থানুধাৰন্তা, ৰিপ্ফন্দন্তি নিরন্তরং.

৯৩৬. মমংকারেন ৰুড্ঢন্তা, ঘোরমাসীৰিসং যথা;

ৰিস্সট্ঠা ভোগধম্মেসু, অস্সাদেন্তি অৰিদ্দসু.

৯৩৭. অনযব্যসনাযেতে, ৰসী কুব্বন্তি পাণিনো;

ৰিচিত্তাকারসণ্ঠানা, পিসাচনগরং যথা.

৯৩৮. অনত্থাৰহিতা বালা, ৰাগুরং নাৰবুজ্ঝরে;

তত্থেৰ পটিৰমন্তি, যথা হঞ্ঞন্তি মুচ্ছিতা.

৯৩৯. সীঘৰাহী মহোঘোযং, ক্লেসৰট্টং মহব্ভযো;

সকণ্টকঞ্চ গহনং, পঙ্কোৰ দুরতিক্কমো.

৯৪০. চেতোসংমোহনট্ঠানং, পমাদপটিসন্ধিতং;

ওহারি সিথিলং চেতং, দুপ্পমুঞ্চঞ্চ বন্ধনং.

৯৪১. জালংৰ ৰিত্থতং লোকে,

মারপাসো সমোড্ডিতো;

পঞ্জরং চারকো চেসো,

সত্তানমনযাৰহো.

৯৪২. যত্থানুরাগসম্বদ্ধা, পলিগুণ্ঠিতসাযিনো;

মক্কটালেপবদ্ধাৰ, নিত্থুনন্তি ৰিঘাতিনো.

৯৪৩. বল়িসংৰামিসচ্ছন্নং, সৰিসং ৰিয ভোজনং;

মিগলুদ্দনিৰাপোৰ, ৰিনাসায সমোড্ডিতা.

৯৪৪. মীনকা ৰঙ্কগিদ্ধাৰ, যে গিলিত্ৰা পুথুজ্জনা;

ঘোরং মচ্চুমুখং পত্ৰা, সোচন্তাপাযভাগিনো.

৯৪৫. পাপক্খেত্তমিদং ঠানং, মিচ্ছালোভনিসেৰনং;

দুচ্চরীতঙ্কুরারোহং, অপাযফলপূরণং.

৯৪৬. অজ্ঝোসিতা পনেত্থ চ, লোভমুচ্ছাৰিদাহিনো;

কোধূপনাহজলিতা, ইস্সামচ্ছেরধূপিতা.

৯৪৭. সারম্ভাযুধসন্নদ্ধা, ৰিপ্ফুরন্তা মনোরথা;

আবন্ধিচ্ছা মহাকচ্ছা, ঠন্তি লোকৰিপত্তিযা.

৯৪৮. অৰজ্জং নত্থি এতেস-মকত্তব্বং ন ৰিজ্জতি;

সম্মুট্ঠসচ্চতা তেসু, ন পতিট্ঠাতি সাধুতা.