৭. সত্তমো পরিচ্ছেদো

সব্বসঙ্গহৰিভাগো

৬১৭. চতুপঞ্ঞাস ধম্মা হি, নামনামেন ভাসিতা;

অট্ঠারসৰিধা ৰুত্তা, রূপধম্মাতি সব্বথা.

৬১৮. অভিঞ্ঞেয্যা সভাৰেন, দ্ৰাসত্ততি সমীরিতা;

সচ্চিকট্ঠপরমত্থা, ৰত্থুধম্মা সলক্খণা.

৬১৯. তেসং দানি পৰক্খামি, সব্বসঙ্গাহিকং নযং;

আভিধম্মিকভিক্খূনং, হত্থসারমনুত্তরং.

৬২০. দুকা তিকা চ খন্ধাযতনতো ধাতুসচ্চতো;

পটিচ্চসমুপ্পাদা চ, পচ্চযা চ সমঞ্ঞতো.

৬২১. পচ্চযো এৰ নিব্বানমপচ্চযমসঙ্খতং;

অসঙ্খারমনুপ্পাদং, সস্সতং নিচ্চলক্খণং.

৬২২. পচ্চযা চেৰ সঙ্খারা, সঙ্খতা চ ততোপরে;

উপ্পাদৰযধম্মা চ, পচ্চযট্ঠিতিকা তথা.

৬২৩. নিব্বানং রূপধম্মা চ, ৰিপ্পযুত্তাৰ কেৰলং;

আরম্মণা এৰ নাম, নালম্বন্তি হি কিঞ্চিপি.

৬২৪. একুপ্পাদনিরোধা চ, একালম্বণৰত্থুকা;

সংসট্ঠা সম্পযুত্তা চ, সহজাতা যথারহং.

৬২৫. অঞ্ঞমঞ্ঞেনুপত্থদ্ধা, সব্বত্থ সহৰুত্তিনো;

সারম্মণারম্মণা চ, চিত্তচেতসিকা মতা.

৬২৬. ৰিপস্সনায ভূমীতি, তত্থ তেভূমকা মতা;

লোকিযা পরিযাপন্না, ৰট্টধম্মা সউত্তরা.

৬২৭. সক্কাযধম্মা সভযা, তীরমোরিমনামকং;

সংযোজনিযা সমলা, তথা নীৰরণীযকা.

৬২৮. সংক্লেসিকা পরামট্ঠা, উপাদানীযসাসৰা;

ওঘনীযা যোগনীযা, গন্থনীযাতি ভাসিতা.

৬২৯. অঞ্ঞে অপরিযাপন্না, ৰিৰট্টা চাৰিপস্সিযা;

লোকুত্তরানুত্তরা চ, নোসংযোজনিযাদযো.

৬৩০. কম্মজাতা উপাদিন্না, নাম ৰুচ্চন্তি সাসৰা;

অনুপাদিন্নকা নাম, ততো সেসা পৰুচ্চরে.

৬৩১. ধম্মা সপ্পটিভাগাতি, কুসলাকুসলা মতা;

অপ্পটিভাগধম্মাতি, তদঞ্ঞে পরিদীপযে.

৬৩২. সরণা চ পহাতব্বা, দ্ৰাদসাকুসলা পন;

তদঞ্ঞে অরণা নাম, পহাতব্বা ন কেহিচি.

৬৩৩. রূপিনো রূপধম্মা চ, নামধম্মা অরূপিনো;

এৰমাদিপ্পভেদেন, দ্ৰিধা ভেদং ৰিভাৰযে.

৬৩৪. বালা ধম্মা তপনীযা, কণ্হা চ কটুকপ্ফলা;

অসেৰিতব্বা সাৰজ্জা, দ্ৰাদসাকুসলা মতা.

৬৩৫. পণ্ডিতা চাতপনীযা, সুক্কা চ সুখদাযকা;

সেৰিতব্বানৰজ্জা চ, কুসলা একৰীসতি.

৬৩৬. ক্রিযা ৰিপাকা রূপঞ্চ, নিব্বানন্তি চতুব্বিধা;

ৰুত্তা অব্যাকতা নাম, ধম্মা তব্বিপরীততো.

৬৩৭. হীনা ধম্মা পরিত্তা চ, কামাৰচরভূমিকা;

রূপারূপা পৰুচ্চন্তি, মজ্ঝিমা চ মহগ্গতা.

৬৩৮. অপ্পমাণা পণীতা চ, ধম্মা লোকুত্তরা মতা;

সংকিলিট্ঠসংক্লেসিকা, দ্ৰাদসাকুসলা তথা.

৬৩৯. অসংকিলিট্ঠসংক্লেসিকা, ধম্মা তেভূমকাপরে;

অসংক্লিট্ঠাসংক্লেসিকা, নৰ লোকুত্তরা সিযুং.

৬৪০. ৰিপাকা তে পৰুচ্চন্তি, ৰিপাকা চতুভূমকা;

ৰিপাকধম্মা নামাতি, কুসলাকুসলা মতা.

৬৪১. ক্রিযা রূপঞ্চ নিব্বানং, ন পাকং ন তু পচ্চতি;

আচযগামিনো ধম্মা, পুঞ্ঞাপুঞ্ঞাৰ সাসৰা.

৬৪২. ৰুত্তাপচযগামিনো, কুসলানুত্তরা পন;

ক্রিযা রূপঞ্চ নিব্বানং, পাকা চোভযৰজ্জিতা.

৬৪৩. পঠমানুত্তরো মগ্গো, দস্সনং ভাৰনাপরে;

তদঞ্ঞে দ্ৰযনিম্মুত্তা, সব্বেপি পরমত্থতো.

৬৪৪. সত্ত লোকুত্তরা হেট্ঠা, ৰুত্তা সেক্খাতি তাদিনা;

অরহত্তফলমেৰ, অসেক্খন্তি পকাসিতং.

৬৪৫. লোকিযাপি চ নিব্বানং, ভাসিতোভযৰজ্জিতা;

এৰমাদিপ্পকারেহি, তিৰিধাতি ৰিভাৰযে.

৬৪৬. অতীতানাগতং রূপং, পচ্চুপ্পন্নমথাপরং;

অজ্ঝত্তং ৰা বহিদ্ধা ৰা, সুখুমোল়ারিকং তথা.

৬৪৭. হীনং পণীতং যং দূরে, সন্তিকে ৰা তদেকতো;

সব্বং রূপং সমোধায, রূপক্খন্ধোতি ৰুচ্চতি.

৬৪৮. তথেৰ ৰেদনাক্খন্ধো, নাম যা কাচি ৰেদনা;

সঞ্ঞাক্খন্ধোতি সঞ্ঞা চ, রাসিভাৰেন ভাসিতা.

৬৪৯. ৰট্টধম্মেসু অস্সাদং, তদস্সাদোপসেৰনং;

ৰিনিভুজ্জ নিদস্সেতুং, খন্ধদ্ৰযমুদাহটং.

৬৫০. ৰিৰাদমূলসংসার-কমহেতুনিদস্সনং;

সন্ধায ৰেদনা সঞ্ঞা, কতা নানাতি কেচন.

৬৫১. চিত্তসংসট্ঠধম্মানং, চেতনামুখতো পন;

সঙ্খারক্খন্ধনামেন, ধম্মা চেতসিকা মতা.

৬৫২. সব্বভেদং তথা চিত্তং, ৰিঞ্ঞাণক্খন্ধ সম্মতং;

ভেদাভাৰেন নিব্বানং, খন্ধসঙ্গহনিস্সটং.

৬৫৩. আলম্বনীযভাৰেন, উপাদানোপকারতো;

পঞ্চুপাদানক্খন্ধাতি, লোকুত্তরৰিৰজ্জিতা.

৬৫৪. যথা থূলং হিতত্থায, পরিগ্গাহকযোগিনং;

ধম্মা তেভূমকা এক-ভূমিভাৰায দেসিতা.

৬৫৫. ভাজনং ভোজনং তস্স, ব্যঞ্জনং ভোজকো তথা;

ভুঞ্জিতা চাতি পঞ্চেতে, উপমেন্তি যথাক্কমং.

৬৫৬. গিলানসালা গেলঞ্ঞং, অসপ্পাযোপসেৰনা;

সমুট্ঠানং গিলানোতি, উপমেন্তি চ পণ্ডিতা.

৬৫৭. চারকো কারণং তত্থ, অপরাধো চ কারকো;

অপরাধকতো চোরো, ইতি চোপমিতা পুন.

৬৫৮. নিচ্চাধিপীল়নট্ঠেন, ভারাতি পরিদীপিতা;

ক্লেসদুক্খমুখেনেতে, খাদকা চ নিরন্তরং.

৬৫৯. অনত্থাৰহিতা নিচ্চমুক্খিত্তাসিকৰেরিনো;

মচ্চুমারাভিধেয্যত্তা, ৰধকাতি চ ভাসিতা.

৬৬০. ৰিমদ্দাসহনং রূপং, ফেণপিণ্ডংৰ দুব্বলং;

মুহুত্তরমণীযত্তা, ৰেদনা বুব্বুল়ূপমা.

৬৬১. মরীচিকূপমা সঞ্ঞা, ৰিপল্লাসকভাৰতো;

সঙ্খারাপি চ নিস্সারা, কদলিক্খন্ধসাদিসা.

৬৬২. নানপ্পকারং চিন্তেন্তং, নানাক্লেসৰিমোহিতং;

পলম্ভতীতি ৰিঞ্ঞাণং, মাযাসমমুদীরিতং.

৬৬৩. ইচ্চেৰং পঞ্চুপাদানক্খন্ধা খন্ধা চ কেৰলং;

পঞ্চক্খন্ধাতি নামেন, দেসিতাতি ৰিভাৰযে.

৬৬৪. অজ্ঝত্তঞ্চ বহিদ্ধা চ, ৰিঞ্ঞাণুপ্পত্তিকারণং;

দ্ৰারালম্বণভেদেন, দ্ৰেধাযতনমীরিতং.

৬৬৫. চক্খাদজ্ঝত্তিকং তত্থ, ছদ্ৰারাযতনং ভৰে;

বাহিরাযতনং নাম, তথা রূপাদিগোচরং.

৬৬৬. ইতি ৰীথিপ্পৰত্তানং, দ্ৰারালম্বণসঙ্গহো;

আগমে অভিধম্মে তু, সব্বথাপি যথারহং.

৬৬৭. তথাহনন্তরাতীতো, জাযমানস্স পচ্ছতো;

মনো সব্বোপি সব্বস্স, মনস্সাযতনং ভৰে.

৬৬৮. তথা পুব্বঙ্গমট্ঠেন, সহজানমরূপিনং;

দ্ৰারভাৰেন ৰিঞ্ঞাণং, সব্বমাযতনং মতং.

৬৬৯. মনাযতনমিচ্চেৰং, পসাদাযতনং তথা;

পঞ্চৰিঞ্ঞাণধম্মানং, ইতি ছদ্ধা ৰিভাৰযে.

৬৭০. পঞ্চপ্পসাদৰিসযা, পঞ্চাযতনসম্মতা;

সেসং রূপঞ্চ নিব্বানং, সব্বে চেতসিকাতি চ.

৬৭১. একূনসট্ঠিধম্মানং, ধম্মাযতনসঙ্গহো;

ইতি ছদ্ধা পকাসেন্তি, বাহিরাযতনং বুধা.

৬৭২. সুঞ্ঞগামোৰ দট্ঠব্ব-মজ্ঝত্তিকমসারতো;

গামঘাতকচোরাৰ, তং হনন্তংৰ বাহিরং.

৬৭৩. নামপ্পৰত্তিমুল়্হানং, তদুপ্পত্তিককারণং;

দ্ৰাদসাযতনানীতি, ৰুত্তমিত্থং মহেসিনা.

৬৭৪. সমত্তা ভাৰমত্তেন, ধারেন্তীতি সলক্খণং;

দ্ৰারালম্বতদুপ্পন্ন-পরিযাযেন ভেদিতা.

৬৭৫. মনাযতনমেত্থাহ, সত্ত ৰিঞ্ঞাণধাতুযো;

একাদস যথাৰুত্তা, ইচ্চট্ঠারস ধাতুযো.

৬৭৬. অন্তাদিকা মনোধাতু, মনোৰিঞ্ঞাণধাতুযা;

পৰেসাপগমে দ্ৰার-পরিযাযেন তিট্ঠতি.

৬৭৭. ভেরীতলদণ্ডঘোস-সমং ছক্কং যথাক্কমং;

কট্ঠারণিপাৰকাদি-সমঞ্চ তিৰিধং ভৰে.

৬৭৮. দুক্খং সমুদযো চেৰ, নিরোধো চ তথাপরো;

মগ্গো চাতি চতুদ্ধাহ, সচ্চং সচ্চপরক্কমো.

৬৭৯. ভারো চ ভারদানঞ্চ, ভারনিক্খেপনং তথা;

ভারনিক্খেপনূপাযো, ইচ্চোপম্মং যথাক্কমং.

৬৮০. রোগো রোগনিদানঞ্চ, রোগৰূপসমো তথা;

রোগভেসজ্জমিচ্চেৰ-মুপমাহি চ দীপিতং.

৬৮১. ৰিসরুক্খো রুক্খমূলং, রুক্খচ্ছেদো তথাপরো;

রুক্খচ্ছেদকসত্থন্তি, চতুধোপমিতং তথা.

৬৮২. তীরমোরিমসঙ্খাতং, মহোঘো পারিমং তথা;

তদতিক্কমুপাযোতি, উপমেন্তি চ তং বুধা.

৬৮৩. সচ্ছিকত্ৰান পচ্চক্খ-মিচ্চোপম্মং যথাক্কমং;

সমাচিক্খি ৰিমোক্খায, সচ্চং তচ্ছনিযামতো.

৬৮৪. তথা হি দুক্খং নাবাধং, নাঞ্ঞং দুক্খা চ বাধকং;

বাধকত্তনিযামেন, দুক্খসচ্চমিতীরিতং.

৬৮৫. তং ৰিনা নাঞ্ঞতো দুক্খং, ন হোতি ন চ তং ততো;

দুক্খহেতুনিযামেন, সচ্চমাহ ৰিসত্তিকং.

৬৮৬. নাঞ্ঞা নিব্বানতো সন্তি, ন চ সন্তং ন তং যতো;

সন্তভাৰনিযামেন, নিব্বানং সচ্চমুত্তমং.

৬৮৭. নাঞ্ঞং মগ্গাচ নিয্যানং, অনিয্যানো ন চাপি সো;

তস্মা নিয্যানভাৰেন, মগ্গো সচ্চন্তি সম্মতো.

৬৮৮. ইতি তচ্ছাৰিপল্লাস-ভূতভাৰো চতূসুপি;

সচ্চট্ঠোতি ৰিনিদ্দিট্ঠো, দুক্খাদীস্ৰৰিসেসতো.

৬৮৯. পীল়নট্ঠো সঙ্খতট্ঠো, সন্তাপট্ঠো চ ভাসিতো;

ৰিপরীণামট্ঠো চাতি, দুক্খস্সেৰং চতুব্বিধা.

৬৯০. আযূহনা নিদানা চ, সংযোগা পলিবোধতো;

দুক্খস্সমুদযস্সাপি, চতুধত্থা পকাসিতা.